PYA a wee nɔ nu akiiloo nu alu ebugara aā bukɛ̄ e bugara gbɛnɛ-edo brik a bee lu esu wuā gbɛnɛ buɛ̄ Babilɔn, bie kɛ̄ Babilɔn bee le a dee kere. Dookɛ̄ ziī nɛɛ a wee nɔ nu akiiloo nu alu ebugara aā bukɛ̄ a kura Robert Koldewey kɔ doo, dua pya dɛm brik a le doo wo wee lu ekwa bu baāmiā bie “dumɛ buɛ̄ kɛ̄ le baɛ̄ wee le sa kaāni . . . le e’mma.”

Pya nu a bee lu e’ɛm a dee kere tɔgɛ kɔ pya a bee le dɔ ekpo bu buɛ̄ Babilɔn wee sunage baāmiā ama daā pya nu alu yiibee. Paul-Alain Beaulieu a le University of Toronto, a wee nɔ nu akiiloo pya Asiria kɔ: “Keekee e’ɛmanu pya Babilɔn . . . tɔgɛ kɔ pya nɛɛ a le dɔ ekpo wee nɛ lok kɔ alu e’ɔp pya ba lɛɛbeekɛɛ̄ le pya a naa nɛ enwadɛɛ̄ wa sīdee taāŋabah bu miā.” Bu edoba, ziī e’ɛmanu a bee le bu dee Mɛnɛ Nebukadneza kɔ: “Gbee wa sī, ɔp wa, nwaɛ̄ wa . . . bu naā, . . . doo kɔ wa sɔɔ̄miā akii nyɔɔ, fɛ wa tɛ̄maloo etop wa tɛrɛ bu gbɛnɛ ebɛamiā.

Lo ama doo kɔ pya a buū Baibol a nyɛŋiabu nu a le bu kpa Daniel 3 ekobee. Dookɛ̄ eloh akiiloo e’ɛma ama kɔ doo, Mɛnɛ Nebukadneza bee wu ziī gbɛnɛ ka nwīnɛɛpie gold bie ɔgarasī kɛ̄ Dura, a le dumɛ buɛ̄ Babilɔn. Sɔ̄ taa pya zege nɛɛdam ba lu Hibru wa bee kura Shadrak, Meshak, le Abednego naa bee yiga lo e’uu bee kɛ̄ nɛ lo nwīnɛɛpie, Nebukadneza bee ɛrɛ gbɛnɛ saŋ, sa a bee nɛmuɛ̄ kɔ alu ekwa miā bu baāmiā “ɛrɛba sɔ̄ eekɛ̄ a wee bɛ doo,” sa alu etop taa nɛɛ ama “tɛrɛ bu gbɛnɛ ebɛa miā.” Ziī ɛnjɛl a ɛrɛ ekpo bee wa kpɔā lɛɛbah luh.—Dan 3:1-6, 19-28.

Pya brik a wee le Babilɔn yerekpotɛ̄ e’ɛma a le bu Baibol. Ɛrɛ nu alu e’ɛm nyɔɔ gbɛnɛ-edo pya dɛm brik ama a leeranage mɛnɛ-buɛ̄. Ziī lo e’ɛma buū kɔ: “Nebukadneza Mɛnɛ-buɛ̄ Babilɔn, . . . Tɔ mɛnɛ, lo mda Gbɛnɛ Mɛnɛ bee wu . . . Doolo pya na manamana a bɛɛ bu ina deedee.” Nu a bee lu e’ɛm nyɔɔ dɛm ama bee ue a le bu kpa Daniel 4:30, lo a tɔgɛ kɛ̄ Nebukadneza bee kaaga doo kɔ: “Alɛ ama naale gbɛnɛ-buɛ̄ Babilɔn lo mda bee wu tɛ̄maloo na gbɛnɛ ekpo doodoo kɛ̄ mɛnɛ-buɛ̄ etɔɔ̄, le lo nyɛŋia mdaa gbɛnɛ kɛ̄tɔɔ̄?”