1-2. Bu amunu sīdee na Nɛɛ Kraist bee tɔ a kii nyɔɔ kaāna a? (1 Pya Kɔrint 15:58)

 BU ZUA 1978, bee lu etop zii tɔ a kii nyɔɔ kaāna alu 60 tɔnyɔɔ ziī bie Tokyo, li Japan. Pya nɛɛ bee bɔātɛ̄ ekɛɛrɛ sɛh edapge yira baɛ nyɔŋa kɛnɛkɛ̄ lo a wee siragi lo gbɛnɛ buɛ̄. Ena pya a bee top lo tɔ bee doo lokwa lo tɔ agaloo a? Pya a bee top lo tɔ bee su nu a agaloo toma, kerewo, ba bee su pya nu edoo kɔ lo tɔ a dap yira baɛ nyɔŋa kɛnɛkɛ̄ toma. Pya Nɛɛ Kraist le doodoo tɔ a kii nyɔɔ ama. Bu mɛ sīdee ni?

² Nɛɛ Kraist ɛrɛ etɔɔ̄ agara sa lu nɛɛ a gbɔɔbah. A ɛrɛ elu nɛɛ a agaloo sa kpɛ̄naloo etɔɔ̄ nɛ pya daakuu Jɛhova le ye lok. (Buū 1 Pya Kɔrint 15:58.) A ‘kpɛ̄naloo egbaɛ̄tɔ̄’ sa naa aa dɔ. Mɛ alunage ebɛɛ̄ kɔ a “kumalookɛ̄,” ale lu nɛɛ a naa agabah sɔ̄ alu ebɛɛ̄ kɔ a doo wo. (Jem 3:17) Nɛɛ Kraist a kuūnadɛɛ̄ naale e’agabah gbɛnɛ ale ɛp nu tɛrɛ yemakɛ̄. Bu ekobee ue ama, i kɔnia kɛ̄ i lu pya a naa aa dɔ doo. I yerenage nukuādɛɛ̄loo o’oo sīdee Setan gbī esu ɔɛ̄loo i baiɛfii lo etɔɔ̄ agara nɛ Jɛhova sa nɔ kɛ̄ i dap kiī ye epiaga ama doo.

3. Pya amunu lok a aabah Nɛɛ Nɛ Lok A Kiinyɔɔ eera na a le bu kpa Doonu 15:28, 29 a?

³ Kuma sɔ̄ Jɛhova na alu Nɛɛ Nɛ Lok A Kiinyɔɔ eera a, a gaa kiisī lo edoo kɔ pya ye lok a waɛbah pya ye nɛɛ edābeeloo. (Ais 33:22) Bu edoba, bu tua sɔ̄ o’oo  tup zua a, eku a baɛbee bee kɔ taa sīdee Pya Nɛɛ Kraist ɛrɛ ekiisī lo etɔɔ̄ agara, lo a le: (1) tɛ̄maloo ekiī taāŋabah yɔ, sa taāŋabah aba Jɛhova, (2) tɛ̄maloo egbaɛ̄tɔ̄loo lok Jɛhova kiiloo kɛ̄ esu miī daānu doo, le (3) tɛ̄maloo etɔɔ̄dum a ɛɛ dookɛ̄ Baibol kɔ doo. (Buū Doonu pya Nɛɛ lɛɛratam 15:28, 29.) Bu mɛ sīdee na Pya Nɛɛ Kraist anii’ee edap kiisī lo etɔɔ̄ agara bu taa sīdee alu ekɔ ama ani?

4. Bu mɛ sīdee na i taāŋabah aba Jɛhova a? (Mumuuna 4:11)

⁴ I kiī taāŋabah yɔ, sa taāŋabah aba Jɛhova. A bee nɛ lok pya Izrɛl kɔ ba a taāŋabah aba alɛ. (Deut 5:6-10) E sɔ̄ pɔrɔ edɔɔ̄ bee doā-ɛp Jizɔs, Jizɔs bee tɔgɛ leere kɔ aba Jɛhova na i ɛrɛ etaāŋabah a. (Mat 4:8-10) Nyɔɔbee wo, ii taāŋabah lɔgɔ bonu pya nɛɛ taāŋabah. Ii le eyere ka loo nɛɛ yemakɛ̄, kere alu pya zaasī yigabari, pya bira bɛbɛɛ, le pya a para biī laɛgɛloo ale pya ɔɛ yɔɔ sa wa nɛ ka doodoo bari. I tɔɔ̄ agara nɛ Jɛhova sa ye taāŋabah nyɔɔbee alɛ na a bee “doo dɛ̄dɛɛ̄ nu” a.—Buū Mumuuna 4:11.

5. Ena anua i yira agara nɛ lok Jɛhova nɛ kiiloo miī le dum a le kaɛ a?

⁵ I tɔɔ̄ agara nɛ Jɛhova kiiloo sere miī le dum kaɛ. Ena anua a? Nyɔnɛbee Jɛhova kɔ miī yira dɔ dum, lo alu gbɛnɛ dɔɔ̄nu a ye aabah. (Lev 17:14) Tua sɔ̄ Jɛhova bee lɛɛbaloo miɔŋɔ nɛɛ kɔ ba a ba nam, a bee wa kɔ nɛ kɔ ba aa ba ye miī. (Jɛn 9:4) A bee sinagekɛ̄ tɛɛ̄ nyɔɔ lok ama sɔ̄ a gaa bee nɛ lok pya Izrɛl tɛ̄maloo Mozis. (Lev 17:10) E a bee doo kɔ eku a baɛbɛɛ a bu tua sɔ̄ o’oo tup zua a kɔ nɛ dɛ̄dɛɛ̄ Pya Nɛɛ Kraist “kɔ [ba a] . . . aaloo miī.” (Doonu 15:28, 29) I yira agara bu egbaɛ̄tɔ̄loo lok ama sɔ̄ i gaa biaɛfii kɛ̄ elu ebo i doo. b

6. Pya ena i doo lokwa i dap tɔɔ̄dum a ɛɛ kɛ̄dɛɛ̄ Jɛhova a?

⁶ I tɔɔ̄ agara kaāna nɛ daakuu tɔɔ̄dum Jɛhova a ɛɛ. (Hib 13:4) Tɛ̄maloo ue a tɔɔ̄dɔ nu a waɛ edābeeloo, nɛɛ lɛɛratam Pɔɔl bee i zuurabahtɔ̄ kɔ “fɛɛa keekee kɛ̄tɔɔ̄ ekpaloo” a i le loo. Lo ama kura kɔ i doo ɛrɛgebah nu i dap doo lo elɛa pɔrɔ taɛ bu i. Ii le esi’ee ale doo lɔgɔ nu eyere i taɛ kunagā bu. (Kɔl 3:5; Job 31:1) Sɔ̄ alu edoā i ɛp kɔ i doo nu a naa lee, i tuebee amana ɛrɛgebah ekɛɛrɛ ale dogo lo a dap gbee i gbanialoo kii kɛ̄ Bari le.

7. Ena i baiɛfii lo edoo a, e ena anua a?

⁷ Jɛhova ɛmadɛɛ̄ kɔ i “su beenyiɛ i nyia.” (Rom 6:17) Pya nu a i kɔ nɛ kɔ i doo wee i lee loo dɛ̄dɛɛ̄ sɔ̄, e ii le edap nyaana pya ye lok. (Ais 48:17, 18; 1 Kɔr 6:9, 10) I piiga lo edoo nu e’ɛɛrɛbu Jɛhova sa ɛrɛ aba ekɛɛrɛ nɛɛ uɛ le-yɔɔ bee ɛrɛ sɔ̄ a bee kɔ: “M kiira dɛ̄dɛɛ̄ na beenyiɛ loo edoo dɛ̄dɛɛ̄ o etɔānu, ina deedee, mmɛ kuma.” (Le-yɔɔ 119:112) Kerewo, Setan egbī e’ɔɛloo i baiɛfii lo etɔɔ̄ agara. Pya amunu sīdee na a wee doo lo ama a?

8. Bu mɛ sīdee na Setan su tɛ̄ŋaloo daānu lo e’ɔɛ̄loo i baiɛfii lo etɔɔ̄ agara a?

⁸ Tɛ̄ŋaloo. Pɔrɔ-edɔɔ̄ su dogo lumiī le nu eyere i saŋ bu i nua nyɔɔ lo e’ɔɛloo i baiɛfii lo etɔɔ̄ agara. Nu a gbī na lo “eba” i, lo egbee i gbanialoo kii kɛ̄ Jɛhova le. (1 Pit 5:8) Bee lu eyere bɔɔ  bu Pya Nɛɛ Kraist bu tua sɔ̄ o’oo tup zua a, wa zip, sa wa fɛ nyɔɔ wa biaɛfii lo etɔɔ̄ agara. (Doonu 5:27, 28, 40; 7:54-60) Setan gaa kiisī lo esu tɛ̄ŋaloo daānu anii’ee. Lu emuɛ lo ama sɔ̄ alu edoo dogo lumiī loo pya i wuga nɛɛdam le nɛɛwa li Russia le pya dɔɔ̄na edo. E pya gbanasī gaa tɛ̄ŋanageloo pya i wuga bu pya dɔɔ̄na sīdee.

9. Naa nɛ edoba a tɔgɛ kɔ alu ebɛɛ̄ kɔ nɛɛ a nwaɛ̄dɛɛ̄ loo pya ezū a naa agabah.

⁹ Ezū a naa agabah. Setan su “kiaŋana” le tɛ̄ŋaloo a agabah daānu. (Ɛfɛs 6:11) Naa kɛɛrɛbu edoba ziī wuga nɛɛdam a kura Bob lo a bee lu ebaa ye loo bie tɔpie. A bee kɔ nɛ pya dɔktɔ kɔ a naale eyaae miī loo doo pip pip. Dɔktɔ ebaa ye loo a, bee yiga kɔ a naale eyeree ye miī loo. Kerewo, uunɛ lɛɛ a gae lu ebaa ye loo, nɛɛ edasī ye yere pie loo bee ina loo Bob sɔ̄ pya ye butɔ ekira be. A bee kɔ nɛ Bob kɔ ba naale eyere ye miī loo kerewo ba esue miī sere kpaɛ̄ wa lo a le elu ebɛɛ̄ kɔ alu eyere ye loo lo. Naadaba, lo dɔktɔ bee kɛɛrɛ kɔ Bob enyaana nyiɛ ye sɔ̄ pya ye butɔ naa lena kɛ̄. Mɛ Bob bee tɔɔ̄ agara, sa kɔ a naale eyae miī loo kaɛlɛɛ ɛrɛgebah nu esira.

10. Ena anua ekɛɛrɛ pya miɔŋɔ nɛɛ ba naa nwadɛɛ̄ Jɛhova lu zaɛ̄ i nɛ a? (1 Pya Kɔrint 3:19, 20)

¹⁰ Ekɛɛrɛ miɔŋɔ nɛɛ ba naa nwadɛɛ̄ Jɛhova. Lo i ɛp nu dookɛ̄ miɔŋɔ nɛɛ a naa nyɔɔnɛ nu Jɛhova kɔ ɛp nu doo, i dap kiī Jɛhova le pya ye daakuu. (Buū 1 Pya Kɔrint 3:19, 20.) “Suānu nyɔuwe ama” wee zū pya nɛɛ kɔ ba a lɛɛbeekɛɛ̄ Bari. Pio Pya Nɛɛ Kraist a bee le Peagamɔm le Taiataira bee ɛp taāŋabah yɔ le dum kunagā dookɛ̄ gbɛnɛ-edo pya lo buɛ̄ wee doo. Jizɔs bee zuurabahtɔ̄ baɛ bɔŋɔnaloo ama nyɔɔ kɛ̄ ba ɛp dogo kunagā tɛrɛ doo. (Mum 2:14, 20) Nii’ee, pya nɛɛ a i le kpaɛ̄ gbī ezū i kɔ i ɛp nu bu sīdee a naa lee. Pya i butɔ le pya nɛɛ le ii le dap kɔ i agabah gbɛnɛ sa gbī edoo kɔ i gbee lok Jɛhova. Bu edoba, ba dap kɔ i dap doo ɛrɛgeba nu a i taɛ, le kɔ pya daakuu Baibol nyɔɔ tɔɔ̄dum a ɛɛ naa dɔnabiī.

11. Ena ii le edoo sɔ̄ i aa tɔɔ̄ge agara nɛ Jɛhova a?

¹¹ Pio sɔ̄, i dap kɛɛrɛ kɔ pya zuurabahtɔ̄ Jɛhova i nɛ naa gbɔɛ̄ i loo. Dapnage lu edoā i ɛp kɔ i ‘doo dogo yema nyɔɔ nu a bee lu e’ɛm.’ (1 Kɔr 4:6) Pya zaāsī yigabari bu dee Jizɔs bee doo dogo yema nyɔɔ nu a bee lu e’ɛm. Ba bee yere alaba lok loo lok Bari sa doo kɔ a agabah pya nɛɛ lo esere. (Mat 23:4) Jɛhova doo kɔ i suā nu a i gbī aābah leere tɛ̄maloo ye Muɛ̄ Ue le ye bɔŋɔnaloo. Naa kuu i lo eyere ziī nu loo zuurabahtɔ̄ a i nɛ doo pip pip. (Kam 3:5-7) Nyɔɔwo, ii doo dogo yema nyɔɔ nu a bee lu e’ɛm bu Baibol ale kɔ i tɔ̄ lok nɛ pya i wuga bu yira nyɔɔ nu a kuu ziī ziī nɛɛ lo ebiaɛfii nyɔɔ ye loo.

12. Bu mɛ sīdee na Setan gaa su “ekobu kiaŋana” daā nu a?

¹² Keekee ue dag. Setan gaa su “ekobu kiaŋana” le “tuatua tɔgɛ nu lo nyɔuwe” daŋa pya nɛɛ sa wa yere epoo epoo yɛɛ. (Kɔl 2:8) Bu tua sɔ̄ o’oo tup zua a, pio lo kiaŋana bee le tɔgɛnu a aabah miɔŋɔ nɛɛ ba kɔ ba suāenu, tɔgɛnu pya Juu lo a naa aabu Kpa Kaɛ, le tɔgɛnu kɔ Pya Nɛɛ Kraist ɛrɛ esere Lok Mozis. Ba bee lu nu dag nyɔɔbee ba bee lɛɛ ekɛɛrɛ pya nɛɛ loo Jɛhova nɛɛ kaka suānu aabah. Nii’ee Setan su pya sīdee alu ekɔāue yaari nyɔɔ intanɛt le ue pya  bira bɛbɛɛ kɔ lo a naa lu kaka daŋa pya nɛɛ. I bee muɛ gbɛnɛ-edo esah ama sɔ̄ dumɛloo COVID-19 bee yaara yah a. c Pya Ekeebee Jɛhova lo ba bee su zuurabahtɔ̄ a bee lu enɛ wa tɛ̄ma bu i bɔŋanaloo naa bee ɛrɛ gbɛnɛ ekɛɛrɛ lo pya a bee gbaɛ̄tɔ̄ esah esah ue a bee lu ekɔ wa nɛ bee ɛrɛ.—Mat 24:45.

13. Ena anua i ɛrɛ enwaɛ̄dɛɛ̄ kiiloo pya nu a dap dabara ekɛɛrɛ nɛɛ a?

¹³ Pya nu a dabara ekɛɛrɛ nɛɛ. I ɛrɛ esere i ekɛɛrɛ nyɔɔ pya “nu a lee kaāna.” (Fil 1:9, 10) Pya nu a dabara ekɛɛrɛ nɛɛ dap su gbɛnɛkpo i sɔ̄ le i ekɛɛrɛ lɛɛloo ekponia pya nu a dɔbiī gbɛnɛ. Pya nu a naa bee piya edoo bu dum doodoo, de nu, ɔ̄ nu, ɛrɛ ekpeloo, le si tam dap dabara i ekɛɛrɛ lo i lɛɛ wa baloo kɔ ba a su tua dɔ bu i dum. (Luk 21:34, 35) Gbaāloo wo, dɛ̄dɛɛ̄ dee i aa dā keekee kpɛa akiiloo kɛ̄ pya nɛɛ le pya bira bɛbɛɛ gaa aŋa aŋa yɛɛ wa doo. Naa lee kɔ pya amkɛ̄ a wa le yɛɛ ama a dabara i ekɛɛrɛ. Lo i doo wo, i dap bɔātɛ̄ eyere kpotɛ̄ ziī sī bu i ekɛɛrɛ le bu i nyiɛ. Setan gaa su dɛ̄dɛɛ̄ pya sīdee elua ekɔ ama daānu lo e’ɔɛ̄loo i baiɛfii lo edoo nu a lee. Doraa i naa ɛp kɛ̄ i dap amana pya ye epiaga ama doo sa kiisī lo etɔɔ̄ agara.

14. Ziī ena edap i yerebah nɛ kɔ i tɔɔ̄ agara nɛ Jɛhova a?

¹⁴ Ɛrɛ ekɛɛrɛ nyɔɔ nu anua o bee kiīloo nɛ Jɛhova sa liamaā. O bee doo wo nyɔɔbee o gbī etɔɔ̄ agara nɛ Jɛhova. Naa kɛɛrɛ pya nu a bee a yerebah nɛ kɔ o yiga kɔ o emɔnae kaka ue. O bee suā nu akiiloo Jɛhova, ewo bee doo kɔ o bɔātɛ̄ enwa ye dɛɛ̄ sa ye wereloo doodoo o Tɛ a le li bunyɔɔ. O bee bɔātɛ̄ ɛrɛ yira elo ama bee a zū kɔ o kiiya aaloo o pɔrɔ. O beenyiɛ bee a zū kɔ o lɛɛbaloo pya dogo a naa lee sa tɔɔ̄dum dookɛ̄ Bari gbī doo. Loo a bee sukɛ̄ sɔ̄ o muɛ kɔ Bari  e’aaraloo o pɔrɔ a nɛ. (Yɔɔ 32:1, 2) O bee si enɔānu bu bɔŋanaloo sa bɔātɛ̄ kɔ pya lele nu o enɔā nɛ pya dɔɔ̄na. Nyaawo kuma sɔ̄ o ekina o dum nɛ Bari sa lu Nɛɛ Kraist eliamaā a, o gaa kiā nyɔɔ dee dum sa o ebiaɛrafii lo edoo dɛ̄dɛɛ̄ nu o dap lo ebia nyɔɔ.—Mat 7:13, 14.

15. Ena anua nɔ nu sa ɛrɛ ekɛɛrɛ nyɔɔ dɔbiī a?

¹⁵ Nɔ Muɛ̄ Ue Bari sa ɛrɛ ekɛɛrɛ nyɔɔ. Dookɛ̄ te ye li kii bukɛ̄ wee agaloo doo, i dap tɔɔ̄ agara lo i yira dɛɛa nyɔɔ Muɛ̄ Ue Bari. Kuma sɔ̄ te gaa nyim, ye li wee agɛrɛba kii bukɛ̄ sa yaara. Sɔ̄ i nɔ nu sa ɛrɛ ekɛɛrɛ nyɔɔ, i agɛrɛtɛ̄ i yira sa suā leere kɔ sīdee Bari doo nu na a lee eera a. (Kɔl 2:6, 7) Ɛrɛ ekɛɛrɛ nyɔɔ kɛ̄ zuurabahtɔ̄, baɛloo le kpega a aabah Jɛhova bee yerebah nɛ pya ye zooro sɔ̄ akii adumɛ doo. Bu edoba, bu mɔmanudɛɛ̄ Ezekiel bee muɛ a bee ɛp leere sɔ̄ ɛnjɛl gaa do tɔkaɛ. Lo mɔmanudɛɛ̄ bee yere mɛm loo Ezekiel, sa i tɔgɛ kɛ̄ i aabaloo daakuu Jɛhova kiiloo logaloga taāŋabah doo. d (Ezek 40:1-4; 43:10-12) Ili ɛrɛnage biī aāloo sɔ̄ i su sɔ̄ nɔā sa ɛrɛ ekɛɛrɛ nyɔɔ pya nu a toga a le bu Muɛ̄ Ue Bari.

16. Bu mɛ sīdee na beenyiɛ a naa nyɔŋa bee kpega Bob a? (Le-yɔɔ 112:7)

¹⁶ Doo kɔ beenyiɛ a aa nyɔŋa. Mɛnɛ Devid bee kɔ a naale e’ɔbɛ ewereloo Jɛhova sɔ̄ a bee uɛ kɔ: “Mdaa beenyiɛ etɔɔ̄na agɛrɛ, Aa Bari.” (Yɔɔ 57:7) Ili dapnage ɛrɛ beenyiɛ a tɔɔ̄ agara, sa dɛrɛ nyiɛ nyɔɔ Jɛhova mmɛnɛ. (Buū Le-yɔɔ 112:7.) Naa kɛɛrɛ kɛ̄ lo ama bee yerebah nɛ Bob i bee kɔ nu akiiloo tua sɔ̄ a doo. Sɔ̄ a bee lu ekɔ ye nɛ kɔ ba esue mii sere kɛ̄ a waɛloo kɛ̄ lokwa ba ye dap yere loo lo alu ebɛɛ̄, a bee kɔ aba sɔ̄ kɔ lo a ɛrɛ ziī nu edoo kɔ ba a yeree ye mii loo e’aae lo tɔpie aba lo sɔ̄. Sɔ̄ esaa Bob bee kɔ: “Mm bee ɛrɛ lɔgɔ baɛ baɛ beenyiɛ kiiloo nu m doo, e mm bee nɛ taāŋa loo mɛ loo nu edap sira.”

17. Ena i dap nɔ aāloo edoba Bob a? (Ɛpnage foto)

 ¹⁷ Bob naa bee nyɔŋa nyɔɔbee ebee agɛrɛtɛ̄ ye biaɛfii lɛɛ a gae kii tɔpie. Tua tua, a bee gbī edoo kɔ bu Jɛhova a ɛɛ. Eree baɛ, a bee biibahkɛ̄ nɔ nu Baibol le pya nu i kpa a dɛɛa nyɔɔ Baibol kɔ akiiloo sere mii le dum kaɛ. Eree taa, a bee muɛ kɔ nyɔnyɔɔnɛ leredee a aabah Jɛhova edɔbiī ye nɛ mmɛ deedee. Ili dapnage ɛrɛ beenyiɛ a naa nyɔŋa kaɛlɛɛ ɛrɛgebah taāŋa i kpesī.

18. Bu mɛ sīdee na edoba Barak i tɔgɛ kɔ i dɛrɛ nyiɛ nyɔɔ Jɛhova a? (Ɛp foto a le nyɔɔ eko.)

¹⁸ Dɛrɛ nyiɛ nyɔɔ Jɛhova. Naa kɛɛrɛ kɛ̄ Barak bee kiisī leere nyɔɔbee a bee dɛrɛ nyiɛ nyɔɔ leeredee a aabah Jɛhova doo. Kere lɔgɔ nu beā nɔ̄ naa bee le bu yube lo buɛ̄ taɛ lo sɔ̄, Jɛhova bee ye kɔ nɛ kɔ a kii wee bebe loo Sisera alu nɛɛbee loo gbo nɔ̄ pya Kenan le dɛ̄dɛɛ̄ ye gbo nɔ̄ lo ba le ekpɛ̄naloo kaāna sa ɛrɛ nu nɔ̄. (Biaɛ 5:8) Waa mɔmanudɛɛ̄ Debora bee kɔ nɛ Barak kɔ a aa nyɔɔ kpokɛ̄ kii kɛ̄ a ɔgarasī wee bebe loo Sisera le 900 fah kɛnɛkɛ̄ a aara. Barak bee suā kɔ e’agabah pya nɛɛ Izrɛl kaāna kɔ ba a bebe loo fah kɛnɛkɛ̄ a para tee bie kɛ̄ a ɔgarasī, kerewo, a bee gbaɛ̄tɔ̄. Sɔ̄ pya lo gbo nɔ̄ bee kii kɛ̄ aa nyɔɔ Egu Tabor, Jɛhova bee yere boo aā bunyɔɔ. Pya fah kɛnɛkɛ̄ Sisera naa bee dap kiā bu gba, e Jɛhova bee doo kɔ Barak a eebah. (Biaɛ 4:1-7, 10, 13-16) Bu aba lo sīdee, Jɛhova edoo kɔ i eebah lo i dɛrɛ ye nyiɛ nyɔɔ le pya zuurabahtɔ̄ a i nɛ tɛ̄maloo ye bɔŋanaloo.—Deut 31:6.

19. Ena anua o gbī ekiisī lo e’ɛrɛ beenyiɛ a naa nyɔŋa a?

¹⁹ I ɛrɛge ekiisī lo e’ɛrɛ beenyiɛ a naa nyɔŋa kuma sɔ̄ i lege bu nyɔuwe ama. (1 Tim 6:11, 12; 2 Pit 3:17) Doolo i biaɛfii kɔ ii le elɛɛ baloo tɛ̄ŋaloo, ezū a naa agabah, ekɛɛrɛ miɔŋɔ nɛɛ ba naa nwadɛɛ̄ Jɛhova, keekee ue dag, le pya nu a dap dabara ekɛɛrɛ nɛɛ kɔ a nyɔŋɛ i. (Ɛfɛs 4:14) Taāwo, i yira agɛrɛ, ɛrɛ beenyiɛ a naa nyɔŋa bu i taāŋabah Jɛhova sa biaɛfii lo egbaɛ̄tɔ̄loo ye lok. E alunage ebɛɛ̄ kɔ i ɛrɛ le ekɛɛrɛ. Bu ekobee ue enyɔɔnɛ, i nɔ kɛ̄ Jɛhova le Jizɔs sere kaāna le edoba bu kɛ̄ esu suānu daānu doo.