1. Amunu kɛ̄tɔɔ̄ na nɛɛ lɛɛratam Jɔn bee le bu dee bu zua 95 C.E a?

NƐƐ LƐƐRATAM Jɔn bee le bu e’aga kɛ̄tɔɔ̄ dee bu zua 95 C.E. Ebee ina gaa ana, sa a bee tɔɔ̄ buɛ̄ maā tɛɛ̄ ɛŋɛnɛ loo buɛ̄ Patmos e a bee le aba nɛɛ lɛɛratam a bee lege dum. (Mum 1:9) A bee suā kɔ pya gbanasī gaa tɔgɛ ekwɔ tɔgɛnu sa yere epoo epoo yɛɛ pya Nɛɛ Kraist. Bee bee kɔ lɔgɔ nu a lu pya Nɛɛ Kraist naale elena.—Jud 4; Mum 2:15, 20; 3:1, 17.

2. Dookɛ̄ kpa Mumuuna 7:9-14 kɔ doo, amunu mɔmanudɛɛ̄ na Jɔn bee muɛ̄ a? (Ɛp foto a le nyɔɔ eko.)

² Kere adoo Jɔn bee le bu e’aga kɛ̄tɔɔ̄ ama, Bari bee ye muuna nu a gaa le sira li deesī nɛ. Bu lo mɔmanudɛɛ̄, lu ekɔ nɛ pya ɛnjɛl kɔ ba a aa efɔp a wee gbee nu loo gbɛnɛ etɛɛrɛloo mmɛ sɔ̄ elua esu nu ā’aɛ̄mɛ aɛ̄mɛ eku pya nɛɛ. (Mum 7:1-3) Pya lo eku nɛɛ na pya 144,000 nɛɛ lo ba enyɔɔnɛ Jizɔs bɛɛ li bunyɔɔ. (Luk 12:32; Mum 7:4) Lɛɛ Jɔn kɔ nu akiiloo dɔɔ̄na eku pya nɛɛ a kuīkpo, a bee kɔ: “Ɛp” lo a lu ue a tɔgɛ kɔ a muɛ̄ nu a ye lu nyɛŋia loo lo a naa gaa bee ɛmadɛɛ̄. E na Jɔn bee muɛ̄ a? “Gbɛnɛ-edo nɛɛ lo lɔgɔ nɛɛ naa dap wa buū, aābu dɛ̄dɛɛ̄ edonyɔɔ le dɛ̄dɛɛ̄ edo le pya nɛɛ, le muɛ̄ ue, le yira kɛ̄sī kasi mɛnɛ a, le kɛ̄ sī Nwī naana pee.” (Buū Mumuuna 7:9-14.) Naa ɛp kɛ̄ bu Jɔn bee ɛɛ doo lo esuā kɔ deesī li gbɛnɛ-edo nɛɛ gaa le lu wee taāŋabah Bari bu kaka sīdee!

3. (a) E na anua mɔmanudɛɛ̄ Jɔn agɛrɛtɛ̄ i yira a? (b) E na i gaa le nɔ bu lo ekobee ue ama a?

³ I suā leere kɔ lo mɔmanudɛɛ̄ bee agɛrɛtɛ̄ yira Jɔn. E i suā nage kɔ lo mɔmanudɛɛ̄ eyere i mɛm loo, kuma sɔ̄ i le bu kpɛdumɛ dee a. I emɔna kɔ gbɛnɛ-edo nɛɛ gaa lu  wee taāŋabah Jɛhova sa bɛābu lo etɛɛ̄ yeebah gbɛnɛ etɛɛrɛloo sa tɔɔ̄ dum a kɛnɛkɛ̄ ina deedee. Bu lo ekobee ue ama, i gaa le nɔ sīdee Jɛhova bee muuna pya gbɛnɛ eku nɛɛ ama nɛ pya ye nɛɛ bu nu a yeeloo nia tup zua akii adumɛ a. Lɛɛ i nɔ baɛ nu akiiloo pya lo eku ama: (1) kɛ̄ ba kuī epoo doo le (2) kɔ ba aa dɛ̄dɛɛ̄ kɛ̄ a le bu nyɔuwe. Pya kpog-bee nu ama e agɛrɛtɛ̄ yira dɛ̄dɛɛ̄ pya a ɛrɛ bɛābu lo ele yɛɛ eku alu enɛ leelee ama.

4. Amunu kaka ue a le bu Baibol na pya ekwɔ sīdee yigabari naa suā a, e bu mɛ sīdee na eku Pya Nɔ Baibol wa lu kee loo a?

⁴ Pya ekwɔ sīdee taāŋabah naa tɔgɛ kɔ a ɛrɛ sɔ̄ pya nɛɛ a gbaɛ̄tɔ̄loo etɔɔ̄dum a kɛnɛkɛ̄ ina deedee. (2 Kɔr 4:3, 4) Bu ilii dee ama, gbɛnɛ-edo yigabari tɔgɛ kɔ dɛ̄dɛɛ̄ pya le nɛɛ kii bunyɔɔ sɔ̄ ba u. Bee lu kee loo nwīgbagbara eku Pya Nɔ Baibol lo ba gaa bee kwa Watch Tower aābu zua 1879. Ba bee dābeeloo kɔ Bari gaa le sikɛ̄ kwa kɛnɛkɛ̄ nua Paradais le kɔ gbɛnɛ-edo miliɔn pya a gbaɛ̄tɔ̄loo gaa le tɔɔ̄ a kɛnɛkɛ̄—naale bunyɔɔ. Kerewo, a bee wa su sɔ̄ bah lo edap suā pya nɛɛ ba etɔɔ̄ a kɛnɛkɛ̄ ama.—Mat 6:10.

5. E na eku Pya Nɔ Baibol bee suā akiiloo 144,000 nɛɛ a?

⁵ Bu kaka, eku Pya Nɔ Baibol bee suā nage aābu Baibol kɔ pio pya nɛɛ gaa le “lu e agara aābu nyɔuwe” kɔ ba a nyɔɔnɛ Jizɔs bɛɛ li bunyɔɔ. (Mum 14:3) Lo eku nɛɛ ama elu 144,000 pya Nɛɛ Kraist eliamaā lo ba bee tɔɔ̄ agara nɛ Bari sɔ̄ ba bee le a kɛnɛkɛ̄. E pya gbɛnɛ eku nɛɛ a?

6. E na eku pya Nɔ Baibol bee yiga akiiloo pya gbɛnɛ eku nɛɛ a?

⁶ Bu mɔmanudɛɛ̄ Jɔn, a bee muɛ̄ eku pya nɛɛ a le “e yira kɛ̄sī kasi mɛnɛ a, le kɛ̄sī Nwiīnaana pee.” (Mum 7:9) Pya ue ama bee doo kɔ eku Pya Nɔ Baibol a kɔ pya gbɛnɛ eku nɛɛ a ekii bunyɔɔ dookɛ̄ pya 144,000 ekii nage doo. Lo a le pya 144,000 nɛɛ le pya gbɛnɛ eku nɛɛ egbaa kii bunyɔɔ, lo sɔ̄ ba lu kee loo ziī doodoo wa? Pya Nɔ Baibol bee kɛɛrɛ kɔ pya lo gbɛnɛ eku nɛɛ elu pya Nɛɛ Kraist lo ba naa bee gbaɛ̄tɔ̄loo sɔ̄ ba bee le a kɛnɛkɛ̄. Kere adoo ba bee tɔɔ̄dum a ɛɛ, gbɛnɛ-edo aba bee lege bu ekwɔ sīdee yigabari. Pya Nɔ Baibol bee kɔ pya a le doo wo tɔgɛ kɔ ba wereeloo Bari mɛ ba naa nyim tura lo enyɔɔnɛ Jizɔs bɛɛ. Nyɔɔbee wereloo pya gbɛnɛ eku nɛɛ ɛrɛ loo Bari naa agatɛ̄ kaāna a, ba nyim tura lo e yira kɛ̄sī kasi mɛnɛ li bunyɔɔ mɛ ba naa nyim tura lo e ɛŋɛtɛ̄ nyɔɔ kasi mɛnɛ.

7. Pya Nɔ Baibol bee kɛɛrɛ kɔ ba mɛɛ̄ na etɔɔ̄dum a kɛnɛkɛ̄ kɛɛ̄ Bɛbɛɛ baɛ boo le lop tup zua Kraist a, e e na Pya Nɔ Baibol bee kɛɛrɛ nage akiiloo pya nɛɛ ba bee yira agɛrɛ sɔ̄ akii adumɛ a?

⁷ Lo a le wo, ba mɛɛ̄ na etɔɔ̄ a kɛnɛkɛ̄ a? Eku Pya Nɔ Baibol bee yiga kɔ sɔ̄ elua ebɔŋɛnɛloo 144,000 nɛɛ le pya gbɛnɛ eku nɛɛ kuma bunyɔɔ sah, gbɛnɛ-edo miliɔn pya dɔɔ̄na gaa le tɔɔ̄ a nyɔɔ kɛnɛkɛ̄ sa ɛrɛ leelee aāloo Bɛbɛɛ Kraist. Pya Nɔ Baibol ama naa bee ɛmadɛɛ̄ kɔ lo gbɛnɛ eku nɛɛ etaāŋabah Jɛhova lɛɛ Kraist gae bɔātɛ̄ ye bɛbɛɛ. Taāwo, ba bee kɛɛrɛ kɔ eku pya nɛɛ ama enɔ nu akiiloo Jɛhova bie kɛɛ̄ Bɛbɛɛ baɛ boo le lop tup zua Kraist. Sɔ̄ a esaa, elu enɛ leelee pya nɛɛ a aabaloo daakuu Jɛhova agɛrɛ tɛ̄maloo enɛ wa dum a naa tah a  kɛnɛkɛ̄, sa a lu egbeesī pya a lɛɛbeekɛɛ̄. Pya Nɔ Baibol bee kɛɛrɛ nage kɔ naa daba elu enɛ ekpɛanu pya elu pya “nɛɛ bee” lo sɔ̄ gbaā nage loo pya ba bee yira agɛrɛ lɛɛ Kraist gae lu, sa wa lɛɛ kɛ̄ bu luh kɔ ba a tɔɔ̄ dum li bunyɔɔ.—Yɔɔ 45:16.

8. Amunu taa eku na a bee bee kɔ ba e’ɛrɛ biī aāloo Buɛ̄-mɛnɛ Bari a?

⁸ Pya Nɔ Baibol bee kɛɛrɛ kɔ a ɛrɛ taa eku a le: (1) 144,000 nɛɛ enyɔɔnɛ Jizɔs bɛɛ li bunyɔɔ; (2) gbɛnɛ eku pya Nɛɛ Kraist ba naa aadee ɛrɛ mɛm lo ba eyira kɛ̄sī kasi mɛnɛ Jizɔs li bunyɔɔ; le (3) gbɛnɛ-edo miliɔn pya nɛɛ ba enɔ nu akiiloo Jɛhova a nyɔɔ kɛnɛkɛ̄ kɛɛ̄ Bɛbɛɛ Kraist Loo Baɛ Boo le Lop Tup Zua. * Mɛ sɔ̄ a esaa, Jɛhova bee wa yerebah nɛ kɔ ba a dābeeloo ue ama leere.—Kam 4:18.

9. (a) Bu mɛ sīdee na pya gbɛnɛ eku nɛɛ eyira “kɛ̄sī kasi mɛnɛ le kɛ̄sī Nwiī naana pee” a? (b) E na anua kɛ̄ alu edābeeloo ue a le bu kpa Mumuuna 7:9 doo lee kaāna a?

⁹ Bu zua 1935 Pya Ekeebee Jɛhova bee dābeeloo nu lo gbɛnɛ-edo nɛɛ a le bu mɔmanudɛɛ̄ Jɔn a kura. Ba bee dābeeloo kɔ pya lo gbɛnɛ eku nɛɛ a naale ele bunyɔɔ lo eyira “kɛ̄sī kasi mɛnɛ le kɛ̄si Nwiī naana pee.” Taāwo, ba gaa le doo lo ama bu sīdee a tɔɔ̄dɔ nu. Kere pya gbɛnɛ eku nɛɛ ele a kɛnɛkɛ̄, ba eyira “kɛ̄sī kasi mɛnɛ” tɛ̄maloo esuā kɔ Jɛhova na a ɛrɛ ekpo ebɛɛ dɛ̄dɛɛ̄ nyɔuwe a, le kɔ a bɔloo kɔ ba a su loo ye sere kɛɛ̄ tɛ̄maloo egbaɛ̄ ye tɔ̄ loo. (Ais 66:1) Ba gaa le yira “kɛ̄sī Nwiī naana pee” tɛ̄maloo e’ɛrɛ yira bu waara zɔɔ a’agara Jizɔs. Bu aba sīdee ama, kpa Matiu 25:31, 32, kɔ “elu ebɔŋɛnɛloo dɛ̄dɛɛ̄ edonyɔɔ” gbaāloo pya bag dogo—kɔ ba a yira kɛ̄sī kasi mɛnɛ Jizɔs. Bu kaka, pya a aa dɛ̄dɛɛ̄ edonyɔɔ ama naa le bunyɔɔ, mɛ ba le kɛnɛkɛ̄. Edaābeeloo ama bee lee kaāna. A baatɛ̄ nu anua Baibol naa kɔ elu esu pya gbɛnɛ eku nɛɛ ama kuma bunyɔɔ. Aba pya nɛɛ etɔɔ̄ dum li bunyɔɔ na 144,000, ba enyɔɔnɛ Jizɔs “bɛɛ bu nyɔuwe.”—Mum 5:10.

10. E na anua elu ebɛɛ̄ kɔ pya gbɛnɛ eku nɛɛ a dasī nɔ nu akiiloo Jɛhova lɛɛ bɛbɛɛ Kraist gae bɔātɛ̄ a?

¹⁰ Aābu zua 1935 a, Pya Ekeebee Jɛhova edaābeeloo kɔ pya gbɛnɛ eku nɛɛ Jɔn bee muɛ̄ bu mɔmanudɛɛ̄ a na eku pya ba bɔloo ture nyiɛ loo ba ɛrɛ bɛābu lo etɔɔ̄dum a kɛnɛkɛ̄ mmɛ deedee. Lokwa pya gbɛnɛ eku nɛɛ ama tɛɛ̄ yeebah gbɛnɛ etɛɛrɛloo, ba enɔ nu akiiloo Jɛhova lɛɛ bɛbɛɛ Kraist gae bɔātɛ̄. Ba etɔgɛ kɔ ba ɛrɛe e’agatɛ̄ yira lokwa ba dap “teera aaloo dɛ̄dɛɛ̄ pya lo nu a esudɔ” lɛɛ bɛbɛɛ Kraist Loo Baɛ Boo le Lop Tup Zua gae bɔātɛ̄.—Luk 21:34-36.

11. E na anua pio Pya Nɔ Baibol bee kɛɛrɛ kɔ naa daba pio nɛɛ ekii bunyɔɔ lɛɛ Jizɔs gae bɔātɛ̄ ebɛɛ a?

¹¹ E lo ue a wee lu ekɔ kɔ elu esu pya ba bɔloo aā kɛnɛkɛ̄ kuma bunyɔɔ sɔ̄ Bɛbɛɛ baɛ boo le lop tup zua Kraist e ina kuma a? Bee lu ekɔ ue ama pio zua akii adumɛ bu ekpo The Watch Tower February 15, 1913. O dap kɛɛrɛ kɔ, ‘E na anua pya zooro Bari a bee yira agɛrɛ aā kere etɔɔ̄ a kɛnɛkɛ̄, sɔ̄ pya Nɛɛ Kraist a naa bee yira agɛrɛ dookɛ̄ alaba doo ekii bunyɔɔ a?’ Bee dap lu ekɔ ue ama nyɔɔbee ba bee kɛɛrɛ kɔ: (1) pya gbɛnɛ eku nɛɛ gaa le kii bunyɔɔ le kɔ (2) pya  a naa aadee ɛrɛ yira elenage yɛɛ pya gbɛnɛ eku nɛɛ.

12-13. E na pya alu etɔ̄ nɔɔ̄ bee le pya gbɛnɛ eku nɛɛ suā akiiloo wa ekpɛanu a?

¹² Dookɛ̄ i emɔna doo, aā bu zua 1935 Pya Ekeebee Jɛhova edaābeeloo kɔ pya nɛɛ etɛɛ̄ yeebah nɔ̄ Amagidɔn na pya gbɛnɛ eku nɛɛ Jɔn bee muɛ̄ bu mɔmanudɛɛ̄ a. Ba gaa le lu pya a “aabu gbɛnɛ etɛɛrɛloo” a nyɔɔ kɛnɛkɛ̄, e ba gaa le “su gbɛnɛ muɛ̄ wimakpā kɔ: ‘Kpɔā le nɛ ilii Bari lo a ɛŋɛtɛ̄ nyɔɔ kasi mɛnɛ le lo Nwiī naana pee.” (Mum 7:10, 14) Gbaāloo wo, Kpa Kaɛ tɔgɛ nage kɔ pya alu elɛɛ kɛ̄ bu luh kuma bunyɔɔ e ɛrɛ “le nu” ee pya nɛɛ ba bee yira agɛrɛ sɔ̄ akii adumɛ. (Hib 11:40) Pya i wuga bee bɔātɛ̄ su mɛm kuema pya nɛɛ kɔ ba a lu wee taāŋabah Jɛhova lokwa ba ɛrɛ bɛābu lo etɔɔ̄ a kɛnɛkɛ̄ mmɛ deedee.

¹³ Pya gbɛnɛ eku nɛɛ ɛrɛ ɛɛbu loo wa bɛābu ama. Ba dābeeloo kɔ Jɛhova na a sagɛ kɛ̄ pya ye zooro ba bɔloo ture nyiɛ loo etɔɔ̄ ye si tam nɛ a, bunyɔɔ ale kɛnɛkɛ̄. Pya a bee lu etɔ̄ nɔɔ̄ bee le pya gbɛnɛ eku nɛɛ suā kɔ ba ɛrɛ ekpɛanu ama aba nyɔɔbee ewonu Bari lo a tɛ̄maloo waara zɔɔ a’agara Jizɔs Kraist.—Rom 3:24.

14. Sɔ̄ zua 1935 etaa, e na anua gbɛnɛ-edo nɛɛ bee ɛrɛ baɛbaɛ beenyiɛ nyɔɔ kɛ̄ mɔmanudɛɛ̄ akiiloo pya gbɛnɛ eku nɛɛ edooa gbɔ̄mɛɛ̄ doo a?

¹⁴ Sɔ̄ pya nɛɛ Jɛhova edaābeeloo ue ama sah bu zua 1935 a, gbɛnɛ-edo nɛɛ bee lege gaa kɛɛrɛ kɛ̄ pya nɛɛ a ɛrɛ bɛābu lo etɔɔ̄ a kɛnɛkɛ̄ ekuī buā doo. Bu edoba, Ronald Parkin bee le 12 zua sɔ̄ a bee lu ebaatɛ̄ nu pya gbɛnɛ eku nɛɛ ama lu. A bee kɔ “nu a dap lu 56,000 pya zue ue bee le tɛɛ̄ ɛŋɛnɛ nyɔuwe, e gbɛnɛ-edo aba bee le pya a lu etɔ̄ nɔɔ̄ bee. Nyɔɔwo a bee bee kɔ pya gbɛnɛ eku nɛɛ naa kuīkpo.”

15. Bu mɛ sīdee na bɔbɔŋɛnɛloo pya gbɛnɛ eku enyima yiiloo a?

¹⁵ Bu pya zua a nyɔɔnɛ, bee lu eyere pya zue ue aā ziī edo yii ziī ture keekee buɛ̄, sa buā Pya Ekeebee Jɛhova bee yii loo. E bu zua 1968, bee lu ebɔātɛ̄ esu kpa a kura The Truth That Leads to Eternal Life nɔɛ̄nu pya nɛɛ. Kɛ̄ a baatɛ̄ Baibol bu ewara sīdee doo, doo kɔ pya a kuma nyiɛ kɛ̄ a gbī etaāŋabah Jɛhova ee kɛ̄ ba wee doo tua sɔ̄. Bu nu a lu nia zua, nu a waɛloo ziī miliɔn pya nɛɛ lu wee taāŋabah Jɛhova sa liamaā. Kuma sɔ̄ pya tɔbari Fada naa bee ɛrɛna  ekpo lo e’ɔbɛ i tam bie Latin America le pya dɔɔ̄na barasī a, lo ama bee doo kɔ i tam a kiisī leere bie Eastern Europe le siga kɛ̄ a le Africa, e gbɛnɛ-edo miliɔn pya nɛɛ bee liamaā. (Ais 60:22) Bu dee ama, bɔŋanaloo Jɛhova ekwaa pya dɔɔ̄na nu tam lo eyerebah nɛ pya nɛɛ kɔ ba a suā nu Baibol tɔgɛ. Lu kaka kɔ elua ebɔŋɛnɛloo pya gbɛnɛ eku nɛɛ a eeloo ɛrɛtaa miliɔn.

16. Mɛ kɛ̄ na alu ebɔŋɛnɛloo pya gbɛnɛ eku nɛɛ aā a?

¹⁶ Sɔ̄ Jɔn bee ɛm nu akiiloo ye mɔmanudɛɛ̄, a bee kɔ pya gbɛnɛ eku nɛɛ e aabu “dɛ̄dɛɛ̄ edonyɔɔ, edo, le edɛm.” Nɛɛ zue ue Zekaria ebee dasī kɔ dua nu a bee wo. A bee ɛm kɔ: “Bu gbo dee ama lop lop nɛɛ aaloo ziī ziī edonyɔɔ lo a kɔ keekee muɛ̄ ue gaa le aabaloo bɛloo ziī nɛɛ Juu, sa kɔ, ‘Doo i nyɔɔnɛ a kii, nyɔnɛbee i ebee dā kɔ Bari le a loo.’ ”—Zek 8:23.

17. E na elua edoo lo eyerebah nɛ pya nɛɛ a aa dɛ̄dɛɛ̄ edonyɔɔ le edɛm a?

¹⁷ Pya Ekeebee Jɛhova bee suā kɔ lokwa a dap lu ebɔŋɛnɛloo pya nɛɛ a kɔ dɛ̄dɛɛ̄ muɛ̄ ue, a ɛrɛ elu ezue le yereue bu booboo muɛ̄ ue. I etaba pya  kpa esu nɔā Baibol bu nu a yeeloo 130 zua, mɛ nyaawo i gaa tap kpa yere bu gbɛnɛ-edo muɛ̄ ue ee kɛ̄ a wee lu edoo sɔ̄ akii adumɛ. Bu kaka, Jɛhova gaa si nyɛŋia tam bu ilii sɔ̄ ama, lo a le bɔbɔŋɛnɛloo gbɛnɛ eku nɛɛ aā dɛ̄dɛɛ̄ edonyɔɔ. Bu i ɛɛ kaāna nyɔnɛbee Baibol le pya kpa esu ye nɔā le bu gbɛnɛ-edo muɛ̄, e pya nɛɛ Jɛhova taāŋa ye bah bu gbaaloo kere adoo ba aa keekee barasī. E alu esuāloo Pya Ekeebee nyɔɔ wa su mɛm zuema le yereue sa tɔgɛ wereloo loo ɛnia aba. Naa ɛp kɛ̄ lo ama agɛrɛtɛ̄ i yira doo a!—Mat 24:14; Jɔn 13:35.

18. (a) Dookɛ̄ kpa Aisaia 46:10, 11 kɔ doo, e na anua a naa lu i nyɛŋia loo kɔ Jɛhova gaa le doo gbɔ̄mɛɛ̄ mɔmanudɛɛ̄ akiiloo pya gbɛnɛ eku nɛɛ a? (b) E na anua pya a ɛrɛ bɛābu lo etɔɔ̄dum a kɛnɛkɛ̄ naa kɛɛrɛ kɔ ba gaa peere e ziī nu a?

¹⁸ I ɛrɛ gbɛnɛ-edo nu anua i ɛrɛ ɛɛbu loo mɔmanudɛɛ̄ akiiloo gbɛnɛ eku nɛɛ! Naa lu i nyɛŋia loo kɔ Jɛhova edoora gbɔ̄mɛɛ̄ mɔmanudɛɛ̄ ama bu sīdee a lu nyɛŋia. (Buū Aisaia 46:10, 11.) Bɛābu Jɛhova enɛā pya gbɛnɛ eku nɛɛ ɛɛrɛ wa bu kaāna. Ba naa kɛɛrɛ kɔ ba gaa peere e ziī nu nyɔɔbee ba naa le e yɛɛ pya a lu etɔ̄ nɔɔ̄ bee lo ba enyɔɔnɛ Jizɔs bɛɛ li bunyɔɔ. Bu Baibol, i buū nu akiiloo pya nɛɛdam le nɛɛwa lo kaɛ edɔɔ̄ bee wa yerebah nɛ; pio aba naale pya 144,000 nɛɛ. Jɔn nɛɛ limaā le yɛɛ ziī pya lo nɛɛ. (Mat 11:11) Dɔɔ̄na nɛɛ na Devid. (Doonu pya Nɛɛ lɛɛratam 2:34) Alaba le gbɛnɛ-edo pya dɔɔ̄na elu elɛɛ kɛ̄ bu luh sere dum bu paradais a kɛnɛkɛ̄. Dɛ̄dɛɛ̄ aba, gbaāloo pya gbɛnɛ eku e’ɛrɛ dee lo etɔgɛ kɔ ba tɔɔ̄e agara nɛ Jɛhova le ye bɛbɛɛ.

19. Dooa gbɔmɛɛ̄ mɔmanudɛɛ̄ Jɔn akiiloo gbɛnɛ eku nɛɛ tɔgɛ kɔ sɔ̄ i le ama lu gbaragbara doodoo wa?

¹⁹ Nyaawo na tua sɔ̄ Bari gaa bɔŋɛnɛloo gbɛnɛ-edo miliɔn pya nɛɛ ba aa dɛ̄dɛɛ̄ edonyɔɔ kɔ ba a taāŋa ye bah a. Kere i bɛābu lo etɔɔ̄ dum li bunyɔɔ ale a kɛnɛkɛ̄, lu ebɛɛ̄ kɔ i yerebah nɛ gbɛnɛ-edo pya nɛɛ kɔ ba a le yɛɛ pya gbɛnɛ eku nɛɛ lo a le pya “dɔɔ̄na eku naana pee.” (Jɔn 10:16) Sɔ̄ sɔ̄ naa binia, Jɛhova gaa le nua gbɛnɛ etɛɛrɛloo nyɔɔ pya bɛbɛɛ le pya yigabari lo ba esua gbɛnɛ tɔga nua loo pya nɛɛ. Mɛ dua dee a kpaā nɛ dɛ̄dɛɛ̄ pya gbɛnɛ eku nɛɛ lo etaāŋabah Jɛhova mmɛ deedee sɛh!—Mum 7:14.