1-2. Amunu nu a nyɔŋɛ kɛ̄ a tɔɔ̄dɔ nu na nɛɛ mɔmanudɛɛ̄ Hagai bee kɔ esira bu ilii dee ama a?

“BU PIO minit, tɔ oo nu le nama nama tɔ bee bɔātɛ̄ efega.” “Bɔɔ bee aa dɛ̄dɛɛ̄ nɛɛ . . . Gbɛnɛ-edo nɛɛ kɔ siranu ama bee kiisī bu nu aluge baɛ minit. Kerewo a bee tɔɔ̄loo mda kɔ a biɛ̄ eewo.” Nu pio nɛɛ a bee sibah nyɔŋa kɛnɛkɛ̄ a bee sira bie Nepal bu zua 2015 bee kɔ lo. Lo dua nu bɔɔ a le doo wo sira a loo, naale ewaɛ kɔ a ibere a.

² Kɛādoo, taɛ sɔ̄ i tɔɔ̄ ama, i gaa muɛ dɔɔ̄na nu a nyɔŋɛ kɛ̄ lo a naa sira aba bu ziī gbɛnɛ buɛ̄ ale bu ziī edonyɔɔ. Taāwo, aa sira bu dɛ̄dɛɛ̄ edonyɔɔ, e ekirasī bu gbɛnɛ-edo zua. Nɛɛ mɔmanudɛɛ̄ Hagai bee kɔ nu akiiloo lo nyɔnyɔŋɛ ama. A bee ɛm kɔ: “Nyɔnɛbee kɛ̄ Jɛhova lo gbɛnɛ gbo nɔ̄ kɔ doo na ama: ‘Dɔɔ̄na sɔ̄, bu ziī nwī kere sɔ̄, m gaa le nyɔŋɛ dɛ̄dɛɛ̄ bunyɔɔ le nyɔuwe, le gbɛnɛ pɛnɛ le kagara kɛnɛkɛ̄.’”​—⁠Hag 2:⁠6.

3. Bu mɛ sīdee na nu a nyɔŋɛ kɛ̄ a tɔɔ̄dɔ nu ama lu kee loo kasī nyɔŋa kɛnɛkɛ̄ a?

³ Lo nyɔnyɔŋɛ Hagai bee kɔ nu akiiloo naale kasī nyɔŋa kɛnɛkɛ̄, lo aba nu a wee doo na gbeesī nu. Taāwo, a doo kɔ le nu a sira. Jɛhova alɛɛ loo kɔ i nɛ kɔ: “M gaa le nyɔŋɛ dɛ̄dɛɛ̄ edonyɔɔ, lokwa nu a si gbɛnɛ du lo dɛ̄dɛɛ̄ edonyɔɔ lu i bu, e m gaa le mmɛ tɔ ama tɛ̄maloo nyɛŋia.” (Hag 2:⁠7) Ena mɔmanudɛɛ̄ ama bee kura nɛ pya nɛɛ a bee le bu dee Hagai ani? E ena a kura nɛ ili anii’ee a? I agara pya ebip ama sa nɔnage kɛ̄ i dap ɛrɛ epoo bu nyɔnyɔŋɛ dɛ̄dɛɛ̄ edonyɔɔ anii’ee doo.

4. Ena anua Jɛhova bee yere nɛɛ mɔmanudɛɛ̄ Hagai ma pya ye nɛɛ a?

⁴ Jɛhova bee nɛ ziī tam a kuī nɛɛ mɔmanudɛɛ̄ Hagai kɔ a si. Naa kɛɛrɛ nu a bee sira lɛɛ a gae lu lo sɔ̄. Naadaba Hagai bee le yɛɛ eku pya Juu a bee aabah aa li Babilɔn sa obia kii Jerusalɛm bu zua 537 B.C.E. a. Sɔ̄ ba e’ina Jerusalɛm, sɔ̄ naa bee tɛɛ̄ loo sɔ̄ pya a wee taāŋabah Jɛhova a bɔ ture nyiɛ loo ama, bee bɔātɛ̄ ewu tɔkaɛ. (Ezra 3:​8, 10) Mɛ sɔ̄ sɔ̄ naa binia, ziī kɛ̄tɔɔ̄ anua e’ɔaloo bee aakɛ̄. Loo wa bee ɔ sa ba bee ɔbɛ lo tam wu tɔkaɛ nyɔɔbee alu egbana wa sī. (Ezra 4:4; Hag 1:​1, 2) Nyɔɔwo bu zua 520 B.C.E., Jɛhova bee yere Hagai kɔ a sikɛ̄ wa yere mɛm loo kɔ ba a kiisī lo ewu sa sah tam loo lo tɔkaɛ. *​—⁠Ezra 6:​14, 15.

5. Ena anua yereue Hagai bee lu lo a yere mɛm loo pya nɛɛ Bari a?

⁵ Nu anua a bee lu ekɔ Hagai a kɔ lo yereue na lo eyere mɛm loo yira pya Juu ɛrɛ bu Jɛhova. Lo nɛɛ mɔmanudɛɛ̄ bee su e’agaloo kɔā pya ue ama nɛ pya Juu ba ebee ɔloo kɔ: “‘Ɛrɛa e’aga nyiɛ, bɔɔlo dɛ̄dɛɛ̄ pya a tɔɔ̄ bu lo buɛ̄ ama,’ Jɛhova kɔ, ‘siaa tam, nyɔnɛbee mda le i loo,’ Jɛhova lo gbɛnɛ gbo nɔ̄ kɔ.” (Hag 2:⁠4) Ue a kɔ “Jɛhova lo gbɛnɛ gbo nɔ̄” bee ɛrɛge elu ue a wa yere mɛm loo. Jɛhova ɛrɛ gbɛnɛ gbo nɔ̄ pya ɛnjɛl a ye le kɛɛ̄, nyɔɔwo a bee lu ebɛɛ̄ kɔ pya Juu a dɛɛa ye nyɔɔ lokwa ba dap kiisī leere.

6. Ena esira aabu nyɔnyɔŋɛ Hagai bee kɔ nu kumaloo a?

⁶ Jɛhova bee lɛɛra Hagai kɔ a kɔ nɛ pya Juu kɔ a gaa le nyɔŋɛe dɛ̄dɛɛ̄ edonyɔɔ bu sīdee a tɔɔ̄dɔ nu. Ue ama bee yere mɛm loo pya nɛɛ loo wa ebee ɔ lo ba aa bee wu tɔkaɛ a kɔ Jɛhova gaa le nyɔŋɛ Persia, lo alu edonyɔɔ a gaa bee bɛɛ dɛ̄dɛɛ̄ nyɔuwe lo sɔ̄. E ena esira aabu lo nyɔnyɔŋɛ a? Tuatua, pya nɛɛ Bari ewu lo tɔkaɛ lɛɛ. Lo sɔ̄, kunɛ pya a naale pya Juu enyɔɔnɛ wa taāŋabah Jɛhova bu lo tɔkaɛ a bee lu esikɛ̄ wu a. Naa ɛp kɛ̄ lo yereue bee yere mɛm loo pya nɛɛ Bari doo a!​—⁠Zek 8:⁠9.

7. Amunu tam a nyɔŋɛ kɛ̄ na ili gaa si anii’ee a? Naa baatɛ̄.

⁷ Ena mɔmanudɛɛ̄ Hagai kura nɛ ili anii’ee a? Jɛhova aa sikɛ̄ nyɔŋɛ dɛ̄dɛɛ̄ edonyɔɔ, e lo sɔ̄ ama ili aa yerebah lo enyɔɔnɛ ye nyɔŋɛ. Naa kɛɛrɛ nu a bee sira ama: Bu zua 1914, Jɛhova bee su Jizɔs Kraist nua Mɛnɛ loo Ye Buɛ̄-mɛnɛ bunyɔɔ. (Yɔɔ 2:⁠6) Wuwu lo Buɛ̄-mɛnɛ bee lu pɔrɔ yereue nɛ pya a gaa bɛɛ nyɔuwe. Nu a bee kura na kɔ ‘sɔ̄ a bee lu etubobaloo nɛ pya edonyɔɔ’ ebee ina kuma, lo a le eku sɔ̄ lɔgɔ nɛɛ aa bee bɛɛ a yira dɔ Jɛhova naa bee le. (Luk 21:24) Nyɔɔbee wo, aābu zua 1919 pya nɛɛ Jɛhova kiisī lo ekɔ nɛ dɛ̄dɛɛ̄ nɛɛ kɔ aba Buɛ̄-mɛnɛ Bari na bɛābu miɔŋɔ nɛɛ a. Zuzue “le yereue ama loo Buɛ̄-mɛnɛ” edoora kɔ dɛ̄dɛɛ̄ nyɔuwe a nyɔŋa.​—⁠Mat 24:⁠14.

8. Dookɛ̄ Le-yɔɔ 2:​1-3 kɔ doo, bu mɛ sīdee na gbɛnɛkpo edonyɔɔ a le bu dɛ̄dɛɛ̄ nyɔuwe edora dogo kumaloo lo yereue a?

⁸ Bu mɛ sīdee na pya nɛɛ edora dogo kumaloo lo yereue a? Gbɛnɛ-edo nɛɛ ekīna. (Buū Le-yɔɔ 2:​1-3.) Dɛ̄dɛɛ̄  edonyɔɔ e’ɛrɛ saŋ. Ba amana lo egbaɛ̄tɔ̄loo nɛɛ Jɛhova etubobaloo kɔ a bɛɛ. Ba naa ɛp yereue Buɛ̄-mɛnɛ i zue nua “le yereue.” Bu kaka, pio pya bɛbɛɛ ekpāna i tam zue ue! Kereadoo gbɛnɛ-edo pya nɛɛ aa bɛɛ bu pya edonyɔɔ ama sere loo doodoo bee ba gaa taāŋaebah Bari, ba naa gbī e’aa dɔ ekpo. Nyɔɔwo, dookɛ̄ pya nɛɛ a bee bɛɛ bu dee Jizɔs bee doo, pya nɛɛ a gaa bɛɛ bu ilii dee ama aa gbananage sī Nɛɛ Jɛhova Etɔā Nɔɔ̄ Bee tɛ̄maloo ebebe loo pya a ye nyɔɔnɛ dumɛ a bɔ ture nyiɛ loo.​—⁠Doonu 4:​25-28.

9. Jɛhova doo dogo doodoo wa sɔ̄ pya edonyɔɔ kiī lo yereue a?

⁹ Jɛhova doo dogo doodoo wa sɔ̄ pya edonyɔɔ kiī lo yereue a? Le-yɔɔ 2:​10-12 agara kɔ: “Nyɔɔwo, aa pya mɛnɛ-buɛ̄, suaāloo i anyaawo; aa, pya a bɛɛ nyɔuwe, ɛrɛa zuurabahtɔ̄. Suaa bɔɔ tuabah kɛ̄ nɛ Jɛhova, sa nyɔŋa, kuɛ̄ nyɔnu loo ye ekaɛtɔ, taā a doo a e’ɛrɛ saŋ, sa bui pe bu dee a; nyɔnɛbee ye saŋ gaa le nwaabah bɛ miā. Leelee a le nɛ dɛ̄dɛɛ̄ pya a ye teera yii bu.” Jɛhova lu fɛgɛ sa a nɛ sɔ̄ pya gbanasī ama kɔ ba a kiiya. Ba dap nyaana nyiɛ wa sa biaɛfii lo esu baɛ bah suā Buɛ̄-mɛnɛ Jɛhova. Kerewo, sɔ̄ e’ina gaa tah. I gaa tɔɔ̄dum bu “kpɛdumɛ dee” loo lo nyɔuwe ama. (2 Tim 3:1; Ais 61:⁠2) Sii bee lu gbara gbara loo pya nɛɛ lɔgɔ sɔ̄ lo esuā kaka sa biaɛfii lo etaāŋabah Jɛhova doo wo.

10. Amunu doo dogo a lee kumaloo lo nyɔnyɔŋɛ na alu ebaatɛ̄ bu Hagai 2:​7-9 a?

¹⁰ Pio nɛɛ doo dogo a lee kumaloo nyɔnyɔŋɛ Hagai bee kɔ nu akiiloo a. A kɔ nu esira aaloo lo nyɔnyɔŋɛ i nɛ sɔ̄ a kɔ, “nu a si gbɛnɛ du [pya nɛɛ le beenyiɛ] lo dɛ̄dɛɛ̄ edonyɔɔ [elu]” sa taāŋabah Jɛhova. * (Buū Hagai 2:​7-9.) Aisaia le Maika, bee kɔnage nu akiiloo dua nu ama kɔ esira bu “kpɛdumɛ dee.”​—⁠Ais 2:​2-4; Maika 4:​1, 2.

11. Ziī wuga nɛɛdam bee doo dogo doodoo wa tua sɔ̄ a bee dā yereue Buɛ̄-mɛnɛ?

 ¹¹ Naa kɛɛrɛ kɛ̄ yereue a nyɔŋɛ kɛ̄ ama bee ɛrɛ pah nyɔɔ ziī wuga nɛɛdam ye bee kura Ken doo, lo aa si tam anyaawo bie beekɛ̄ Pya Ekeebee Jɛhova bu yube nyɔuwe. A lege aa nyɛŋiabu nu a bee sira tua sɔ̄ a bee dā yereue Buɛ̄-mɛnɛ nu alu 40 zua akii adumɛ. Ken kɔ: “Tua sɔ̄ m bee nɔ kaka ue a aabu Muɛ̄ Ue Bari, bu mɛ bee ɛɛ kaāna lo esuā kɔ i gaa tɔɔ̄dum bu kpɛdumɛ dee loo lo nyɔuwe ama. M bee dābeeloo kɔ alu ebɛɛ̄ kɔ m kpooraloo lɛɛ loo nyɔuwe ama sa daba bialoo Jɛhova lokwa m dap ɛrɛ ye yerekpotɛ̄ sa ɛrɛnage dum a naatah. M bee yere kara sa nwaabah doo wo aba lo sɔ̄. M bee lɛɛbaloo nyɔuwe sa teera yii bu kpega Buɛ̄-mɛnɛ Bari a naa dap lu elɛɛ dɔ.”

12. Bu mɛ sīdee na tɔkaɛ Jɛhova bu edɔɔ̄ e’mma tɛ̄maloo nu alu nyɛŋia bu kpɛdumɛ dee ama a?

¹² I muɛ leere kɔ Jɛhova aa kiisī lo enɛ leelee pya ye nɛɛ. Bu kpɛdumɛ dee ama, i emɔna kɛ̄ buā pya aa taāŋabah Jɛhova aa nyim yii loo doo. Bu zua 1914 i bee lu kunɛ nwīepoo. Nyaawo, pya a gaa su mɛm taāŋabah Bari elua nu a eeloo ɛrɛtaa miliɔn, e bu ziī ziī zua booboo miliɔn pya nɛɛ aa i gbaaloo bu doonu Nyɛŋiabu Loo Luh Kraist. Bu lo sīdee ama, tɔkaɛ Jɛhova bu edɔɔ̄ a le a kɛnɛkɛ̄, lo a le ye nɔɔnɔɔnu kiiloo logaloga taāŋabah e’mma tɛ̄maloo “nu a si gbɛnɛ du lo dɛ̄dɛɛ̄ edonyɔɔ.” Eluanage enɛ ka bee Jɛhova tɛ̄maloo nyaa pya nɛɛ ama doo sɔ̄ ba yaa aā dee dum.​—⁠Ɛfɛs 4:​22-24.

13. Pya amunu dɔɔ̄na mɔmanudɛɛ̄ na edooa gbɔ̄mɛɛ̄ nyɔɔbee buā pya aa taāŋabah Jɛhova nyim yii loo a? (Ɛp foto a le nyɔɔ eko.)

¹³ Kɛ̄ pya nu ama aa dooa doo edora kɔ pya dɔɔ̄na mɔmanudɛɛ̄ a dooa gbɔ̄mɛɛ̄, doodoo lo a le bu kpa Aisaia 60 ekobee 22 barakpaɛ̄, lo a kɔ: “Nɛɛ alu nwīgbagbara gaa le lu gā, e nɛɛ a kii kɛ̄ ereloo elu edonyɔɔ a ɛrɛ ekpo; mda na Jɛhova a; e bu ye sɔ̄ m gaa le nwaabah ye doo.” Nyɔɔbee gbɛnɛ-edo nɛɛ aa bɔātɛ̄ etaāŋabah Jɛhova a, pya nu alu nyɛŋia aa sira. Pya “nu a si gbɛnɛ du  ama” aara keekee nu ba para nua, gbaāloo taɛ ba ɛrɛ lo esu dɔ bu zue “le yereue Buɛ̄-mɛnɛ.” Nu a sira aabu na bee, pya nɛɛ Jɛhova dap su pya lo nu ba para lo Aisaia kɔ alu “mah lo dɛ̄dɛɛ̄ edonyɔɔ” daānu. (Ais 60:​5, 16) Tɛ̄maloo yerebah pya nɛɛdam le nɛɛwa a si gbɛnɛ du ama, tam zue ue elua esi bu 240 edonyɔɔ e pya i kpa elua e’ɛm yere bu nu a eeloo 1,000 muɛ̄ ue.

14. Amunu biaɛfii na pya nɛɛ ɛrɛ edoo anyaawo a?

¹⁴ Bu sɔ̄ kpɛdumɛ ama, nyɔnyɔŋɛ dɛ̄dɛɛ̄ edonyɔɔ aa doo kɔ pya nɛɛ a biaɛfii nu ba edoo. Ekɔ ba eyerege kpotɛ̄ Buɛ̄-mɛnɛ Bari, sɛh ba edɛrɛ nyiɛ nyɔɔ bɛbɛɛ lo nyɔuwe ama ni? Lo ama lu biaɛfii lo dɛ̄dɛɛ̄ nɛɛ ɛrɛ edoo. Kereadoo pya nɛɛ Jɛhova gbaɛ̄tɔ̄loo lok a bɛɛ barasī ba tɔɔ̄, ba kiisī lo etɔɔ̄ kee kaāna aaloo bira bɛbɛɛ lo nyɔuwe ama. (Rom 13:​1-7) Ba suā kɔ aba Buɛ̄-mɛnɛ Bari na elɛɛ dɛ̄dɛɛ̄ taāŋa miɔŋɔ nɛɛ a. Lo Buɛ̄-mɛnɛ naa nuūna lo nyɔuwe ama.​—⁠Jɔn 18:​36, 37.

15. Bu mɛ sīdee na kpa Mumuuna tɔgɛ kɔ elu edoā-ɛp tɔɔ̄ agara pya nɛɛ Bari a?

¹⁵ Kpa Mumuuna kɔ elu edoā-ɛp tɔɔ̄ agara pya nɛɛ Bari bu kpɛdumɛ dee. Lo doā-ɛp ekiisī lo esu e’agabah gbanasī le tɛ̄ŋaloo i nua nyɔɔ. Pya bɛbɛɛ nyɔuwe egbī kɔ i dooe dɛ̄dɛɛ̄ nu ba kɔ, e ba etɛ̄ŋaloo pya a naa yiga eyere wa kpotɛ̄. (Mum 13:​12, 15) Ba edoo kɔ “pya nwīgbagbara le pya gbɛnɛ, pya mɛnɛ le pya kporo, pya a ɛrɛ wa loo le pya zooro, kɔ alu eyere wa kuu bara bale ale nyɔɔ gbɔɔsī wa.” (Mum 13:16) Wee lu eyere kuu loo pya zooro a dee kere a lokwa alu esuāloo nɛɛ a wa ɛrɛ. Bu aba lo sīdee, elu e’ɛmadɛɛ̄ dɛ̄dɛɛ̄ nɛɛ bu ilii dee ama kɔ ba a ɛrɛ kuu a tɔɔ̄dɔ nu nyɔɔ bah wa ale nyɔɔ gbɔɔsī wa. Ba egbī kɔ dɛ̄dɛɛ̄ nɛɛ a tɔgɛ kɔ ba lee nɛ sa yerekpotɛ̄ pya bɛbɛɛ nyɔuwe aābu wa ekɛɛrɛ le tɛ̄maloo wa elap dogo.

16. Ena anua alu gbara gbara kɔ i doo kɔ i tɔɔ̄ agara nɛ Jɛhova a agatɛ̄ anyaawo a?

¹⁶ Ekɔ i su lo kuu a tɔɔ̄dɔ nu ama sa yerekpotɛ̄ bɛbɛɛ nyɔuwe ni? Pya nɛɛ a amana lo esu lo kuu gaa le kpesī e’aga kɛ̄tɔɔ̄ le bɔɔ. Kpa Mumuuna kiisī lo ekɔ: “Lɔgɔ nɛɛ naa dap yaɛ ale o’oo kɛɛrɛ kɔ a ɛrɛ lo kuu ama.” (Mum 13:17) Mɛ pya nɛɛ Bari suā nu Bari edoo loo pya a ɛrɛ lo kuu alu ekɔ nu kumaloo bu kpa Mumuuna 14:​9, 10. Taā ba su lo kuu ama, ele doodoo bee ba ɛm ‘Le nɛ Jɛhova’ nyɔɔ bah wa. (Ais 44:⁠5) Nyaawo na sɔ̄ i doo kɔ i tɔɔ̄ agara nɛ Jɛhova a agatɛ̄ a. Lo i doo wo, Jɛhova esu ɛɛbu i suā nua pya alɛ!

17. Ena a bɔloo kɔ i nyɛŋiabu kiiloo egerebu Jɛhova a?

¹⁷ Bu kpɛdumɛ dee ama, Jɛhova etɔgɛ kɔ a egereebu kaāna. A naa gbī kɔ lɔgɔ nɛɛ a ɛrɛ gbeerasī. (2 Pit 3:⁠9) E nɛā dee dɛ̄dɛɛ̄ nɛɛ kɔ ba a kiiya sa sagɛ lo etaāŋa ye bah. Kerewo, ye egerebu esa a ina kuma. Pya nɛɛ a kiī lo esu dee a wa kpaānɛ ama daānu leere ele doodoo Fɛro bu dee Mozis. Jɛhova bee kɔ nɛ Fɛro kɔ: “Nyɔnɛbee nyaawo m dap niina bah mɛ sa a zip gbaāloo pya o nɛɛ tɛ̄maloo dumɛnu a wee nua luh, e a elu efii i lɛɛloo nyɔuwe; mɛ tɛ̄maloo lo ba ama na m bee i lɛɛbaloo kɔ bui tɔɔ̄dum a, lo etɔgɛ i na ekpo, lokwa alu  ezue na bee bu dɛ̄dɛɛ̄ nyɔuwe.” (A’aa 9:​15, 16) Dɛ̄dɛɛ̄ nyɔuwe gaa le suā kɔ Jɛhova na aba lo kaka Bari a. (Ezek 38:23) Lo ama esira doodoo wa?

18. (a) Amunu dɔɔ̄na nyɔnyɔŋɛ na alu ebaatɛ̄ bu kpa Hagai 2:​6, 20-22 a? (b) I tɛɛ̄ doodoo wa suā kɔ pya ue Hagai e’ɛrɛ ye dooa gbɔ̄mɛɛ li deesī?

¹⁸ Sɔ̄ gbɛnɛ-edo zua etɛ̄na aābu dee Hagai, kɛ̄bah leredeebah kaɛ edɔɔ̄ nɛɛ lɛɛratam Pɔɔl bee ɛm nu a tɔgɛ kɔ ue a le bu kpa Hagai 2:​6, 20-22 e’ɛrɛ ye dooa gbɔ̄mɛɛ li deesī. (Buū.) Pɔɔl bee ɛm kɔ: “Mɛ nyaawo ebee yira, ‘Aba ziī sɔ̄ lege m gaa le nyɔŋɛ naale aba nyɔuwe ama mɛ bunyɔɔ nage.’ Lo ue ama, ‘aba ziī sɔ̄ lege,’ a tɔgɛ lɛɛ loo nu a bee lu enyɔŋɛ, doodoo nu a bee lu edoo, lokwa nu a naa dap lu enyɔŋɛ etɔɔ̄.” (Hib 12:​26, 27) Bu sīdee alu kee loo nyɔnyɔŋɛ alu ekɔ bu kpa Hagai 2:​7, lo nyɔnyɔŋɛ ama elu gbeerasī ina deedee nɛ pya nɛɛ a bee Fɛro, lo ba amana eyere nukuādɛɛ̄ loo kɔ Jɛhova na nɛɛ a bɔloo kɔ a bɛɛ a.

19. Ena a naale elu enyɔŋɛ a, e i tɛɛ̄ doodoo wa suā?

¹⁹ Ena a naale elu elɛɛ dɔ ale nyɔnyɔŋɛ a? Pɔɔl bee kiisī lo ekɔ: “Nyɔɔbee wo doolo i su ewonu suā Buɛ̄-mɛnɛ a naa dap lu enyɔŋɛ i su aabɔɔ ele enwadɛɛ̄ suā i yere kara bɛɛ kɛ̄ sī Bari bu sīdee a enia ye.” (Hib 12:28) Bu kaka, sɔ̄ lo kpɛdumɛ nyɔnyɔŋɛ edooa sah, aba Buɛ̄-mɛnɛ Bari na ebia a. E kiisī lo etɔɔ̄ ina deedee!​—⁠Yɔɔ 110:​5, 6; Dan 2:⁠44.

20. Amunu biaɛfii na pya nɛɛ ɛrɛ edoo a, e i dap wa yerebah nɛ doodoo wa?

²⁰ Lɔgɔ sɔ̄ epee naale! Pya nɛɛ ɛrɛ ebiaɛfii nu ba edoo: Ekɔ ba ekiisī lo eyerekpotɛ̄ sīdee tɔɔ̄dum nyɔuwe ama lo a eture wa mmɛ loo gbeerasī, sɛh ba enyaana wa sīdee tɔɔ̄dum sa doo nu Bari gbī lo a eture wa mmɛ loo dum a naatah ni? (Hib 12:25) Tɛ̄maloo i tam zue ue, i dap yerebah nɛ pya nɛɛ kɔ ba a sagɛ nu ba edoo. Naa lege bee i yerebah nɛ gbɛnɛ-edo nɛɛ a si gbɛnɛ du kɔ ba a biaɛfii lo eyerekpotɛ̄ Buɛ̄-mɛnɛ Bari. E dooraa i su pya ue Nɛɛ-a-i-ɛrɛ Jizɔs seea nyiɛ i, lo a kɔ: “A elu ezue le yereue ama loo Buɛ̄-mɛnɛ tɛ̄ma ɛŋɛnɛ dɛ̄dɛɛ̄ nyɔuwe, doodoo nu ekeebee nɛ dɛ̄dɛɛ̄ edonyɔɔ; e lo sɔ̄ na kuma elua.”—Mat 24:⁠14.