1. A wee tɔɔ̄loo pio nɛɛ doodoo wa sɔ̄ alu ekpo ziī nɛɛ a nuūna wa butɔ lɛɛ bu bɔŋanaloo?

EKƆ ebee lu ekpo ziī nɛɛ o wereloo lɛɛ bu bɔŋanaloo ni? Lo ama dap ziloo nɛɛ kaāna! Ziī wuga nɛɛwa a kura Hilda bee kɔ: “Sɔ̄ na dam a bee bɔ ture nyiɛ loo bee u sɔ̄ i ebee iya ziī bu nu alu 41 zua, a bee mɛ tɔɔ̄loo kɔ lɔgɔ nu edap mɛ ziloo ee lo ama naale. * Kerewo, a bee mɛ ziloo eewo sɔ̄ a bee lu ekpo na nwiīnɛɛdam lɛɛ bu bɔŋanaloo, sa a bie ye wa le pya ye nwiī.”

2-3. Dookɛ̄ kpa Le-yɔɔ 78:​40, 41 kɔ doo, a tɔɔ̄loo Jɛhova doodoo wa sɔ̄ pya ye zooro ɔbɛ etaāŋa ye bah ni?

² Naa kɛɛrɛ kɛ̄ a bee ziloo Jɛhova doo sɔ̄ siga pya ye ɛnjɛl bee ye kiī! (Jud 6) E naa kɛɛrɛnage dua kɛ̄ a bee ye kiɛ̄ doo sɔ̄ pya Izrɛl alu pya ye nɛɛ a bee wereloo bee ye lɛɛbeekɛɛ̄ booboo sɔ̄. (Buū Le-yɔɔ 78:​40, 41.) Suā leere kɔ a zinageloo i wereloo Tɛ a le li bunyɔɔ sɔ̄ ziī nɛɛ o wereloo ɔbɛ etaāŋa ye bah. A dābeeloo kɛ̄ aa a kiɛ̄ doo. A gaa le nɛ a egbɔ̄nyiɛ sa a yerebah nɛ.

³ Bu ekobee ue ama, i gaa le kɔnia pya nu i dap doo lokwa i ɛrɛ yerebah aābah Jɛhova sɔ̄ ziī nɛɛ i wereloo ɔbɛ etaāŋa ye bah. I gaa le kɔnianage kɛ̄ i dap yerebah nɛ pya dɔɔ̄na a le bu bɔŋanaloo lo elua ekpo ziī wa nɛɛ lɛɛ bu bɔŋanaloo doo. Mɛ dooraa i dasī kɔnia pio ekɛɛrɛ a naa lee, lo i ɛrɛ e’ɔbɛ.

4. A wee tɔɔ̄loo gbɛnɛ-edo tɛ le ka doodoo wa sɔ̄ ziī wa nwiī ɔbɛ etaāŋabah Jɛhova?

⁴ Sɔ̄ ziī nwiīnɛɛdam ale nwiīnɛɛwa ɔbɛ etaāŋabah Jɛhova, pya ye tɛ le ka dap kɛɛrɛ kɔ naadaba a ɛrɛ nu  ba ebee dooe, lo ebee ye yerebah nɛ kɔ a kiisī lo etaāŋabah Jɛhova. Sɔ̄ a bee lu ekpo nwiīnɛɛdam ziī wuga nɛɛdam a kura Luke, a bee kɔ: “M bee bege aba mm. M bee muɛgi pɔrɔ zagara akiiloo. Siga sɔ̄ m wee to sa a bee kɔ nyiɛ mɛ ebaara.” Ziī wuga nɛɛwa a kura Elizabeth lo a bee lunage ekpo ye nwiīnɛɛdam wee bialoo kɛɛrɛ kɔ: “Amunu ekwɔ na m bee tɛɛ̄ a? A bee mɛ tɔɔ̄loo kɔ mm bee foh kaka ue bu na nwiī leere.”

5. Lo a le ziī nɛɛ ɔbɛ etaāŋabah Jɛhova, mɛɛ̄ na alu bah ani?

⁵ Alu ebɛɛ̄ kɔ i nyɛŋiabu kɔ Jɛhova enɛa dee ziī ziī ii kɔ i sagɛ nu i doo. Lo ama kura kɔ i dap sagɛ lo egbaɛ̄ ye tɔ̄ ale lo elɛɛ ye bee kɛɛ̄. Pio miɔŋɔ naa bee ɛrɛ tɛ le ka a wa sere le edoba nɛ, kerewo ba biaɛfii lo etaāŋabah Jɛhova sa bia bu bɔ ture nyiɛ loo ye nɛ. Pya dɔɔ̄na bee ɛrɛ tɛ le ka a wa piiga lo ekpɔā bu sīdee a dɛɛa nyɔɔ daakuu Baibol, kerewo sɔ̄ ba enyima tura nɛɛ ba kiira dumɛ kpe kaka ue. Bu kaka, ziī ziī ii ɛrɛ ebiaɛfii lo etaāŋabah Jɛhova. (Josh 24:15) Nyɔɔwo, pya tɛ le ka a gaa ɛrɛ ekiɛ̄nu nyɔɔbee wa nwiī ɔbɛ etaāŋabah Jɛhova aa kɛɛrɛ kɔ a lue wa bah.

6. Sɔ̄ tɛ ale ka ɔbɛ etaāŋabah Jɛhova, amunu pah na a wee ɛrɛ nyɔɔ pya wa miɔŋɔ a?

⁶ Pio sɔ̄ tɛ ale ka dap ɔbɛ etaāŋabah Jɛhova sa lɛɛbaloo pya wa butɔ. (Yɔɔ 27:10) Lo ama dap nɛ taāŋa pya miɔŋɔ kaāna eetɔɔ̄ na sɔ̄ ba wee ɛp wa tɛ ale ka nua nɛɛ ba dap nɔ nu aāloo sa nɛ enwadɛɛ̄. Esther, lo a bee lu ekpo ye tɛ bee kɔ: “M wee bialoo to gbɛnɛkpo sɔ̄ nyɔnɛbee m bee muɛ kɔ a naa bee yɛɛ kina kina aabu kaka. Mɛ a bee ɛmɛnɛbee biaɛfii lo e’ɔbɛ etaāŋabah Jɛhova. M wereloo na tɛ, nyɔɔwo sɔ̄ a bee lu ekpo ye, m wee bialoo le gaa kɛɛrɛ kɛ̄ a le doo. A bee mɛ taāŋɛ gbɛnɛ.”

7. Jɛhova ɛmadɛɛ̄ pya zege alu ekpo wa nɛɛ lɛɛ bu bɔŋanaloo doodoo wa?

⁷ Pya zege, lo a le ebee lu ekpo bui tɛ ale ka lɛɛ bu bɔŋanaloo, suaā kɔ a kiɛ̄nage ili! Soosoo, suaā leere kɔ Jɛhova dānage beeloo kɛ̄ a i ziloo doo. A were i loo sa tɔgɛ nia loo bui yira agɛrɛ, e kɛ̄ ili pya bui wuga nɛɛdam le nɛɛwa doonage lo. Nyɛŋiaanage bu kɔ biaɛfii bui tɛ ale ka naa lu i bah. Dookɛ̄ a bee lu ekɔ doo tua sɔ̄ a, Jɛhova enɛa dee ziī ziī nɛɛ lo esagɛ lo a le etaāŋa ye bah ale a naale etaāŋa. E ziī ziī nɛɛ ekīnaloo nɛ sa liamaā ɛrɛ “etoora alɛɛ to.”​—⁠Gal 6:⁠5.

8. Ena pya a bɔ ture nyiɛ loo a le butɔ edap doo sɔ̄ ba gaa tɔɔ̄baɛ sɔ̄ nɛɛ ba wereloo e’obia pii Jɛhova a? (Ɛp ekpo a kura “ Obia Pii Jɛhova.”)

⁸ Sɔ̄ ziī nɛɛ o wereloo ɔbɛ etaāŋabah Jɛhova, alu nu a wee le kɔ o le aa ɛmadɛɛ̄ kɔ e’obia ye lu loo ziī dee a ee. Ena o dap doo kuma sɔ̄ o gaa ɛmagedɛɛ̄ taɛ dee e’obia pii Jɛhova a? O dap kiisī lo e’agɛrɛtɛ̄ o yira. Lo o doo wo, elu le edoba nɛ pya dɔɔ̄na a le o butɔ e naadaba elunage le edoba nɛ lo nɛɛ a bee lu ekpo a. O ɛrɛnage mɛm alu ebɛɛ̄ lokwa o dap egerebu bu lo kɛ̄tɔɔ̄. Doraa i kɔnia pio nu o dap doo lokwa o yira agaloo.

9. Bu mɛ sīdee na o dap aaloo kɔ Jɛhova a yere a mɛm loo a? (Ɛp ekpo a kura “ Pya Dɔ Kpa Kaɛ A Nɛ Egbɔ̄nyiɛ Sɔ̄ Ziī Nɛɛ O Wereloo Ɔbɛ Etaāŋabah Jɛhova.”)

⁹ Doo dɛ̄dɛɛ̄ nu o dap doo lo e’agɛrɛtɛ̄ o yira. Alu ebɛɛ̄ kɔ o kiisī lo eyere mɛm loo aba ɔɔ le pya dɔɔ̄na a le butɔ. Bu mɛ sīdee na o dap doo wo a? Aaloo kɔ Jɛhova a yere a mɛm loo tɛ̄maloo ewee buū Muɛ̄ Ue Bari sa ɛrɛ ekɛɛrɛ nyɔɔ nu o buū gbaāloo sisi enɔānu Pya Nɛɛ Kraist. Joanna, lo ye tɛ le ye wuga nɛɛwa bee aabu kaka kɔ: “Loo mɛ sukɛ̄ sɔ̄ m buū nu akiiloo pio nɛɛ a le bu Baibol doodoo Abigail, Ester, Job, Josɛf, le Jizɔs. Wa le edoba yere mɛ mɛm loo sa doo kɔ m dap tama lo ezialoo. Pya i keebee yɔɔ yerenage mɛ mɛm loo.”

10. Bu mɛ sīdee na Le-yɔɔ 32:​6-8 i yerebah nɛ kɔ i ɛrɛ egerebu sɔ̄ i le bu biirabu a?

¹⁰ Kɔ dɛ̄dɛɛ̄ nu a a taāŋɛ nɛ Jɛhova. Sɔ̄ o le bu biirabu, o aa ɔbɛ eyere kara ye nɛ. Bara Bari kɔ a doo kɔ o ɛp lo kɛ̄tɔɔ̄ dookɛ̄ alɛ ɛp doo sa a “zuura a bahtɔ̄ sa a tɔgɛ nu bu dee o kii.” (Buū Le-yɔɔ 32:​6-8.) Bu kaka, a dap le aa a ziloo sɔ̄ o gaa kɔ kɛ̄ nu a tɔɔ̄loo doo nɛ Jɛhova. Mɛ Jɛhova dābeeloo kaāna kɛ̄ a a ziloo doo. A were a loo kaāna e a gbī kɔ o kɔ dɛ̄dɛɛ̄ nu a a taāŋɛ ye nɛ.​—⁠A’aa 34:6; Yɔɔ 62:​7, 8.

11. Dookɛ̄ Pya Hibru 12:11 kɔ doo, ena anua i dɛrɛ nyiɛ nyɔɔ kākāmɛnɛ a tɔgɛ wereloo a aabah Jɛhova a? (Ɛp ekpo a kura “ Kpokpo Nɛɛ Lɛɛ Bu Bɔŋanaloo Lu Nu A Tɔgɛ Wereloo Jɛhova I Ɛrɛ Kumaloo.”)

¹¹ Yerekpotɛ̄ biaɛfii pya kanɛɛ. Kpokpo nɛɛ lɛɛ bu bɔŋanaloo lu ziī gah loo nɔɔnɔɔnu Jɛhova. Ye kākāmɛnɛ a tɔgɛ wereloo ama lu lo a lee loo dɛ̄dɛɛ̄ nɛɛ, gbaānage loo nɛɛ a bee lu ekpo a. (Buū Pya Hibru 12:11.) Pio nɛɛ ale bu bɔŋanaloo dap kɔ pya kanɛɛ naa doo leere sɔ̄  alu ekpo ziī nɛɛ. Mɛ nyɛŋiabu kɔ pio nɛɛ a le doo wo aadee gbī ekpɛakpɛa kɔ alu ekāmɛnɛ lo nɛɛ ale alu ekpo ye, mɛ ba naa gbī ekɔ nu akiiloo pɔrɔ lo nɛɛ bee doo lɛɛ a gae lu ekpo ye ale kāmɛnɛ ye. Alu kaka kɔ ii suā dɛ̄dɛɛ̄ nu akiiloo lo ue. Nyɔɔwo, alu nu suānu le loo lo edɛrɛ nyiɛ nyɔɔ pya kanɛɛ a bee aabaloo lo ue kɔ ba bee piiga kaāna lo enyɔɔnɛ pya daakuu Baibol le lo ebiaɛ “nɛ . . . Jɛhova.”​—⁠2 Edoo 19:⁠6.

12. Pya amunu biī na pio nɛɛ e’ɛrɛ nyɔɔbee ba yerekpotɛ̄ nɔɔnɔɔnu Jɛhova akiiloo kākāmɛnɛ ani?

¹² O dap yerebah nɛ nɛɛ o wereloo kɔ a obia pii Jɛhova tɛ̄maloo eyerekpotɛ̄ biaɛfii pya kanɛɛ bee doo lo ekpo ye. Elizabeth i bee kɔ nu akiiloo tua sɔ̄ a bee kɔ: “A bee i agaloo kaāna lo e’ɔbɛ eyiiloo i nwiīnɛɛdam etura nɛɛ ama. Mɛ sɔ̄ a bee obia lu loo Jɛhova, a kɔ a bee lu nu a bɔloo kɔ ba a kpoe ye. Sɔ̄ sɔ̄ aa kiisī a bee kɔ a nɔɛ̄ gbɛnɛ-edo nu aāloo nu a bee ye siraloo ama. A bee bɔātɛ̄ etɔgɛ nia loo kākāmɛnɛ a aabah Jɛhova.” Ye dam a kura Mark bee kɔ yere loo kɔ: “Sɔ̄ esaa, i nwiīnɛɛdam bee mɛ kɔ nɛ kɔ ziī nu anua a obiae lu na nyɔɔ kɛ̄ ii bee ye nyɔɔnɛ dania nu doo. Bu mɛ ɛɛ kaāna kɔ Jɛhova yerebah i nɛ kɔ i dap ye gbaɛ̄tɔ̄loo.”

13. Ena edap a yerebah nɛ lo o gaa tɛɛ̄ bu ezialoo a?

¹³ Kɔ ue nɛ pya gbo a dābeeloo kɛ̄ nu a tɔɔ̄loo doo. Yii gbo Pya Nɛɛ Kraist a nyim tura lo ba edap a yerebah nɛ kɔ o aa pee beenyiɛ a. (Kam 12:25; 17:17) Joanna i bee kɔ nu akiiloo tua sɔ̄ a, kɔ: “Bu nyiɛ mɛ, a wee bee kɔ m le aba mm. Mɛ sɔ̄ m kɔ ue nɛ pya gbo m dɛrɛ nyiɛ nyɔɔ bee mɛ yerebah nɛ kɔ m dap tama.” Mɛ ena o doo a, lo pio nɛɛ a le bu bɔŋanaloo kɔ ue a a ɔɛloo a?

14. Ena anua i kiisī lo ‘egbɔ̄ ɛnia ii sa su esaɛ̄ beenyiɛ lɛmabaloo nɛ ɛrɛgeba nɛɛ a’?

¹⁴ Ɛrɛ egerebu loo pya o wuga nɛɛdam le nɛɛwa. Bu kaka, naale dɛ̄dɛɛ̄ nɛɛ na edoo dogo bu sīdee a bɔloo a. (Jem 3:⁠2) Dɛ̄dɛɛ̄ ii lu pya a naa mmana, nyɔɔwo aa a ɔbɛ lo a le ziī nɛɛ naa suā nu ekɔ ale bee a kɔ nu a a ziloo sɔ̄ a naa suā. Nyɛŋiabu zuurabahtɔ̄ nɛɛ lɛɛratam Pɔɔl a kɔ: “Gbɔaā ɛnia ii, suaa esaɛ̄ beenyiɛ lɛɛbaloo nɛ ɛrɛgeba nɛɛ lo a le ɛrɛgeba nɛɛ pima a ue.” (Kɔl 3:13) Ziī wuga nɛɛwa a bee lu ekpo nɛɛ alu ye manamana bee kɔ: “Jɛhova eyerebah mɛ nɛ kɔ m dap aaloo nɛ pya wuga a bee gbī eyere mɛ mɛm loo, kerewo ba doo wo bu sīdee a mɛ sikɛ̄ biirebu.” Ena pya wuga bu bɔŋanaloo edap doo lo eyerebah nɛ nɛɛ alu ekpo ye nɛɛ a?

15. Ena i dap doo lo eyerebah nɛ pya nɛɛ alu ekpo wa nɛɛ lɛɛ bu bɔŋanaloo a?

¹⁵ Su baɛ bah suā pya alu ekpo wa nɛɛ lɛɛ bu bɔŋanaloo. Ziī wuga nɛɛwa a kura Miriam kɔ a naa bee ye waɛebah esi enɔānu sɔ̄ a bee lu ekpo ye wuga nɛɛdam.  A kɔ: “Bɔɔ bee mɛ aa loo nu pya nɛɛ ekɔ. Mɛ a bee ɛrɛ gbɛnɛ-edo pya wuga a bee ɛrɛ ekiɛ̄nu nyɔɔ nu a bee sira ama, e ba naa bee ɛrɛ saŋ loo na wuga nɛɛdam. M doo wa yaa, a naa bee bee kɔ m le aba mm bu lo ekiɛ̄nu.” Dɔɔ̄na wuga nɛɛwa kɔ: “Sɔ̄ a bee lu ekpo na nwiīnɛɛdam, pya i gbo a i wereloo bee lu wee nɛ i egbɔ̄nyiɛ. Pio aba kɔ i nɛ kɔ, ba naa bee suāe nu ekɔ. Siga aba bee mɛ nyɔɔnɛ to e pya dɔɔ̄na bee mɛ ɛm kpa ma lo eyere mɛ mɛm loo. Nu ba bee doo ama bee mɛ yerebah nɛ kaāna!”

16. Bu mɛ sīdee na pya a le bu bɔŋanaloo edap nɛ egbɔ̄nyiɛ sa kiisī lo eyerebah nɛ pya alu ekpo wa nɛɛ a?

¹⁶ Kiisī lo eyerekpotɛ̄ pya alu ekpo wa nɛɛ lɛɛ bu bɔŋanaloo. Ba gbī o wereloo le o yere mɛm loo eera anyaawo. (Hib 10:​24, 25) Pio sɔ̄, pya alu ekpo wa nɛɛ lɛɛ bu bɔŋanaloo emɔna kɔ siga pya wuga naa gbīna enyɔɔnɛe wa kɔnia ue doodoo bee a bee lunage ekpo ba alabae. Naa lee kɔ nu a le doo wo a sira! A lee kɔ i kaɛgɛ sa yere mɛm loo pya zege lo pya wa tɛ ale ka e’ɔbɛ etaāŋabah Jɛhova. Maria a bee lu ekpo ye dam lɛɛ bu bɔŋanaloo sa ye dam lɛɛbaloo pya ye butɔ, kɔ: “Pio pya na gbo bee lu na tɔ, i nyɔɔnɛ bui nu sa i yerebah nɛ lo esere enɔānu butɔ. Kɛ̄ a mɛ ziloo doo bee wa tɔaloo e ba bee mɛ nyɔɔnɛ to. Ba bee mɛ kɔ ue bee sɔ̄ pya nɛɛ bee mɛ kɔ esah loo. Ba bee mɛ agɛrɛloo kaāna!”​—⁠Rom 12:​13, 15.

17. Ena pya kanɛɛ edap doo lo enɛ egbɔ̄nyiɛ pya a le bu ekiɛ̄nu a?

¹⁷ Pya kanɛɛ, suaa ɛrɛgeba dee a i kpaānɛ yeā mɛm loo pya alu ekpo wa nɛɛ lɛɛ bu bɔŋanaloo. Bui ɛrɛ gbɛnɛ toh tam a i le bee lo enɛ egbɔ̄nyiɛ pya wa nɛɛ elɛrabaloo etaāŋabah Jɛhova. (1 Tɛs 5:14) Su zaāsī lo eyere wa mɛm loo lɛɛ enɔānu gae bɔātɛ̄ le sɔ̄ enɔānu e’ina kuma. Ina wa loo, sa o nyɔɔnɛ wa yere kara. Nyɔɔnɛ wa si uwe zue ue, ale o dap wa kue loo o enɔānu butɔ pio sɔ̄. Pya kanɛɛ ɛrɛ etɔgɛ toesaɛ̄ le wereloo kumaloo pya naana pee Jɛhova a le bu ekiɛ̄nu, taɛ sɔ̄ alu ebɛɛ̄.​—⁠1 Tɛs 2:​7, 8.

18. Dookɛ̄ 2 Pita 3:9 kɔ doo, ena Bari gbī kɔ pya a bee si pɔrɔ a doo a?

¹⁸ Jɛhova “naa gbī kɔ lɔgɔ nɛɛ a pe, mɛ kɔ dɛ̄dɛɛ̄ nɛɛ alu ina loo kikiiya.” (Buū 2 Pita 3:⁠9.) Kereadoo ziī nɛɛ si gbɛnɛ pɔrɔ, ye dum lege aa kuī loo Bari. Naa kɛɛrɛ dua nu Jɛhova bee kpɛ nyɔɔbee dum pya pɔrɔ, lo a le waara zɔɔ a’agara ye Nwiīnɛɛdam a wereloo. Aāloo ye toesaɛ̄ Jɛhova gaa piiga lo eyerebah nɛ pya a le doo wo kɔ ba a obia ye lu loo. A ɛrɛ bɛābu kɔ ba esagɛ lo edoo wo, dookɛ̄ i muɛ doo bu edoba Jizɔs akiiloo nwiī pee zɔ. (Luk 15:​11-32) Gbɛnɛ-edo pya a bee aabu kaka e’obia lu loo wa wereloo Tɛ a le li bunyɔɔ. E pya wuga bu bɔŋanaloo esua baɛ bah wa suā. Elizabeth a bee lu ekɔ nu akiiloo tua sɔ̄ a, kɔ kɛ̄ bu ye bee ɛɛ doo sɔ̄ ye nwiīnɛɛdam bee obia lu bu bɔŋanaloo. A bee kɔ: “M bee tɔgɛ kaāna nia loo pya a bee i yere mɛm loo kɔ i aa pee beenyiɛ.”

19. Ena anua i dap kiisī lo eture nyiɛ loo Jɛhova a?

¹⁹ I dap kiisī lo eture nyiɛ loo Jɛhova dɛ̄dɛɛ̄ sɔ̄. A naa wee kɔ i doo nu egbee i nu loo. Alu Tɛ a ɛrɛ toesaɛ̄ sa dɔɔ̄ nu bu yaaribah, lo a ɛrɛ togatoga wereloo kumaloo dɛ̄dɛɛ̄ pya a ye wereloo sa ye taāŋabah. Suā leere kɔ Jɛhova naale elɛɛ a baloo sɔ̄ o le bu etɛɛrɛloo. (Hib 13:​5, 6) Mark i bee dasī kɔ nu akiiloo a kɔ: “Jɛhova naa wee i lɛɛbaloo bie. A wee i yerebah nɛ sɔ̄ i le bu etɛɛrɛloo.” Jɛhova ekiisi lo enɛ a ekpo a “eenyɔɔ ekpo.” (2 Kɔr 4:⁠7) Bu kaka, o dap kiisī lo ebia bu bɔ ture nyiɛ loo sa ɛrɛ bɛābu kere nɛɛ o wereloo ɔbɛ etaāŋabah Jɛhova.