Bu 1 Pya Kɔrint 15:8, Pɔɔl bee kɔ: “E ye kpɛdumɛ a bee sira mɛ loo mda doodoo nɛɛ a bee mɛā sɔ̄ ye sɔ̄ sii ina.” Sɔ̄ akii adumɛ a, i bee baatɛ̄ kɔ Pɔɔl gaa bee kɔ nu akiiloo mɔmanudɛɛ̄ a bee muɛ kiiloo Jizɔs sɔ̄ a le ye dɔ ka li bunyɔɔ. A bee le doodoo bee a mɛā, ale aakɛ̄ bu luh bu edɔɔ̄ gbɛnɛ-edo o’oo tup zua lɛɛ a gae lu sɔ̄ dua aakɛ̄ bu luh ama bee su dɔ. Kerewo, sɔ̄ a sikɛ̄ lu enɔ nu akiiloo dɔ ama leere alu ebɛɛ̄ kɔ i kwabaloo kɛ̄ i wee dābeeloo doo.

Lu kaka kɔ Pɔɔl aa bee kɔ nu akiiloo nu a bee sira sɔ̄ a bee lu ekiira ye. Mɛ ena a gaa bee kɔ a, sɔ̄ a kɔ a lue “nɛɛ a bee mɛā sɔ̄ ye sɔ̄ sii ina” a? A ɛrɛ keekee nu anua a bee dap kɔ doo wo.

Ye kikiiya bee sira bu bugia sa ye taɛ̄ŋɛ gbɛnɛ. A wee lu nyɛŋia loo pya nɛɛ sɔ̄ nwiī mɛā sɔ̄ ye sɔ̄ sii ina. Sɔ̄ Sɔɔl (lo a bee sikɛ̄ lu esuāloo nua Pɔɔl) gaa bee kii Damaskɔs lo etɛ̄ŋaloo Pya Nɛɛ Kraist, a naa bee ɛmadɛɛ̄ kɔ emuɛ Jizɔs lo e’aara kɛ̄ bu luh bu mɔmanudɛɛ̄. A bee lu nyɛŋia loo Pɔɔl sɔ̄ a bee kiiya sa bee lunage nyɛŋia loo Pya Nɛɛ Kraist a gaa bee gbī etɛ̄ŋaloo bie bu lo buɛ̄. Gbaāloo wo, nu a bee ye siraloo ama bee ye nɛ taāŋa mmɛ kɛ̄ a naa bee muɛna nu bu pio kere sɔ̄.—Doonu 9:1-9, 17-19.

Bee lu ekiira ye “sɔ̄ a naa bɔloo.” Bee ue Grik alu ekure “nɛɛ a bee mɛā sɔ̄ ye sɔ̄ sii ina” dap lu etap nua “nɛɛ a mɛā sɔ̄ a naa bɔloo.” Jerusalem Bible kɔ nu a ye kiiloo doo wo ama kɔ: “A le doodoo bee a bee lu emaɛ̄ mɛ sɔ̄ lɔgɔ nɛɛ naa bee ɛmadɛɛ̄.” Sɔ̄ a bee lu ekiira Pɔɔl, Jizɔs ebee obia kii bunyɔɔ. Pɔɔl naa bee muɛ Jizɔs lɛɛ a gae kii bunyɔɔ, dookɛ̄ pya nɛɛ a gaa bee kɔ ue kumaloo lɛɛ a gae ina lo barakpaɛ̄ ama bee ye muɛ doo. (1 Kɔr 15:4-8) Sɔ̄ Jizɔs siraloo Pɔɔl bu bugia, a yerebah ye nɛ kɔ a muɛ ye kere a bee le “sɔ̄ a naa bɔloo.”

A gaa bee kɔ nu kumaloo aba ɛɛ bu sīdee a bɔloo. Dookɛ̄ pio pya enɔā kpa kɔ doo, pya ue Pɔɔl su kɔā ue akɛāma dap bee kɔ a gaa kɔ pɔrɔ ue kumaloo aba ɛɛ. Lo alu nu a bee le nyiɛ Pɔɔl lo, a kura kɔ a bee ɛp dee a ye kpaā nɛ doodoo nɛɛ lɛɛratam kɔ a naa bɔe ye loo. Bu kaka, a bee kiisī lo ekɔ: “Nyɔnɛbee mda lu nwīgbagbara a kii kɛ̄ yɛɛ pya nɛɛ lɛɛratam, e mm bɔloo ekue mɛ nɛɛ lɛɛratam nyɔnɛbee m bee tɛ̄ŋaloo bɔŋanaloo Bari. Mɛ tɛ̄maloo ewonu Bari, mda le dookɛ̄ mda le doo.”—1 Kɔr 15:9, 10.

Nyɔɔwo, a bee kɔ Pɔɔl gaa bee kɔ nu akiiloo nyɛŋia sīdee Jizɔs bee ye siraloo, le ye kikiiya sɔ̄ a naa bee ɛmadɛɛ̄. Le kɔ a naa bɔ ye loo e’ɛrɛ dua mumuuna a aabah Bari ama. Kaɛlɛɛ ɛrɛgeba kɛ̄ a bee mɛā doo, nu a bee siraloo Pɔɔl ama bee ye kuī loo kaāna. Bu sīdee baɛbaɛ beenyiɛ naa le loo, a tɔgɛ ye kɔ Jizɔs e’aara kɛ̄ bu luh. Kɛādoo a lo a wee kɔgara ue kumaloo nu a bee ye siraloo ama sɔ̄ a gaa kɔ nu akiiloo aakɛ̄ bu luh Jizɔs nɛ pya dɔɔ̄na.—Doonu 22:6-11; 26:13-18.