1-2. Ena anua a bɔloo kɔ i ɛrɛ nia bu eloh akiiloo Samson a?

 ENA a wee a yii nyiɛ sɔ̄ o dā bee Samson a? Naadaba o wee kɛɛrɛ kɛ̄ a bee ɛrɛ gbɛnɛ ekpo doo. Lu kaka doo wo. Mɛ Samson bee doonage ziī pɔrɔ biaɛfii lo a bee doo kɔ a tɔga gbɛnɛ. Kerewo, Jɛhova bee sere ekɛɛrɛ nyɔɔ kɛ̄ Samson bee bia bu bɔloo ture nyiɛ loo doo, lo a ɛm bu Baibol lokwa i ɛrɛ biī aāloo.

² Jɛhova bee su Samson daā pio nu alu nyɛŋia lo eyerebah nɛ pya nɛɛ a bee sagɛ lo a le pya Izrɛl. Sɔ̄ gbɛnɛ-edo zua etɛ̄na aā sɔ̄ Samson e’ua sah, Jɛhova bee doo kɔ nɛɛ lɛɛratam Pɔɔl a ɛm bee Samson yere yɛɛ pya nɛɛ a ye kuī loo a bee ɛrɛ yira. (Hib 11:32-34) Edoba Samson dap i yere mɛm loo. A bee dɛɛa nyɔɔ Jɛhova, kere sɔ̄ a bee kpesī e’aga kɛ̄tɔɔ̄. Doraa i naa kɛɛrɛ kɛ̄ i dap ɛrɛ e’aga loo doo kuma sɔ̄ i nɔ pya dɔɔ̄na lenu ye aāloo.

3. Amunu tam na a bee lu enɛ Samson a?

³ A bee le sɔ̄ pya Filistia bee le aa bɛɛ edonyɔɔ Izrɛl sa wa biinɛ nɛ kɛ̄ na Samson bee mɛā a. (Biaɛ 13:1) Wa pɔrɔ bɛbɛɛ bee su gbɛnɛ tɔga nua nyɔɔ pya Izrɛl. Jɛhova bee sagɛ Samson kɔ a “zuura pya Izrɛl lɛɛ kɛ̄ bah pya Filistia.” (Biaɛ 13:5) E’aga tam sɛh! Lo esi e’aga tam ama Samson ɛrɛ edɛɛa nyɔɔ Jɛhova.

4. Bu mɛ sīdee na Jɛhova bee yerebah nɛ Samson kɔ a dap kpɔā ye loo lɛɛ kɛ̄bah pya Filistia a? (Pya Biaɛ 15:14-16)

⁴ Naa ɛp ziī edoba a tɔgɛ kɛ̄ Samson bee dɛrɛ nyiɛ nyɔɔ Jɛhova sa ye gbī yerebah aābah doo ama. Ɛrɛ ziī  sɔ̄, ziī eku pya nɔ̄ Filistia bee lu wee aa Samson li Lehi, a dap lu buɛ̄ a bee le Juda. Nyɔɔ bɔɔ pya nɛɛ Juda bee ɛrɛ loo pya Filistia ba bee su Samson wa nɛ. Pya ye nɛɛ bee su aā eziī ye bɔma agɛrɛ sa ye su ma pya Filistia. (Biaɛ 15:9-13) Kerewo, “edɔɔ̄ Jɛhova” bee nɛ ekpo Samson lo a doo kɔ a dap aŋ lo eziī lɛabah ye. Lo sɔ̄ “a bee muɛ ziī aā ekpo elag enyanya-toora-to,” sa su fɛā 1,000 pya Filistia!—Buū Pya Biaɛ 15:14-16.

5. Sɔ̄ Samson bee su ekpo elag enyanya-toora-toh fɛā pya Filistia ena a tɔgɛ akiiloo kɛ̄ a dɛrɛ nyiɛ nyɔɔ Jɛhova doo a?

⁵ Ena anua Samson bee su elag enyanya-toora-to a? Naa bee le nu beā nɔ̄ doo pippip! Lɔgɔ baɛbaɛ beenyiɛ naale loo kɔ Samson bee suā kɔ nu edoo kɔ a eebah na yerekpotɛ̄ a aabah Jɛhova, e a naale dua nu nɔ̄ a ye le bah. Bu kaka, gbara a bɔ ture nyiɛ loo ama bee su nu a muɛ kɛ̄ daānu alu ekɛɛrɛ Jɛhova. I muɛ leere kɔ Jɛhova bee doo kɔ Samson a eebah pya Filistia nyɔɔ kɛ̄ a bee ye dɛrɛ nyiɛ nyɔɔ doo!

6. Ena i dap nɔ aāloo Samson sɔ̄ i aa si tam alu enɛ i bu bɔŋanaloo a?

⁶ Jɛhova dapnage i nɛ ekpo esiātam alu enɛ i, kere a bee kɔ a aga gbɛnɛ. Bari dap i nɛ ekpo bu sīdee elu i nyɛŋia loo. Ture nyiɛ loo Jɛhova kɔ enɛe a ekpo kɔ o dap doo nu alu ye nia dookɛ̄ a bee nɛ ekpo Samson doo, lo o dɛɛa Ye nyɔɔ.—Kam 16:3.

7. Amunu edoba na a tɔgɛ kɛ̄ alu gbɛnɛ doo lo egbī tɔgɛ dee a aabah Jɛhova a?

⁷ Gbɛnɛ-edo pya wuga nɛɛdam le nɛɛwa lo ba gaa si tam wu pya i kɛ̄ etɔɔ̄ taāŋabah etɔgɛ kɔ ba dɛɛae nyɔɔ Jɛhova. Sɔ̄ akii adumɛ a, pya i wuga wee tɔ̄ sa wu gbɛnɛ-edo aā Tɔ Nɔnu Buɛ̄-mɛnɛ le pya dɔɔ̄na tɔ. Kerewo, a sira kɔ kɛ̄ ebɛɛ̄ bɔŋanaloo aa nyim yiiloo doo gbī kɔ alu esikɛ̄ kwabaloo nu. Pya wuga ba gaa kuūdɛɛ̄loo lo tam bee gbī tɔgɛdee a  aabah Jɛhova sa dobah loo pya dɔɔ̄na aā sīdee esi lo tam, doodoo yaɛ pya tɔ elua ewu sah, sa sikɛ̄ kwabaloo. Robert lo a le yɛɛ pya esiatam loo gbɛnɛ-edo pya i tɔ aa lu ewu tɛ̄ma ɛŋɛnɛ nyɔuwe a bu dee ama kɔ: “Tua sɔ̄, a naa bee waɛ bah siga nɛɛ enyɔɔnɛ aā sīdee doonu ama.” A kɔ gbaāloo kɔ: “A bee lu kaāna kee loo kɛ̄ i wee doonu doo bu gbɛnɛ-edo zua akii adumɛ. Mɛ pya wuga bee kpɛ̄naloo enyɔɔnɛ lo nɔɔnɔɔnu, e i bee muɛ kɛ̄ Jɛhova nɛ leelee kwabaloo nu ama doo.” Lo ama lu ziī edoba a tɔgɛ kɛ̄ Jɛhova baɛloo pya ye nɛɛ kɔ ba a dap doo nu alu ye nia doo. Aā ziī sɔ̄ yii ziī, elee dɛ̄dɛɛ̄ ii bip i loo kɔ: ‘M gaa gbīge tɔgɛdee a aabah Jɛhova sa kpɛ̄naloo enyaa nyɔɔnɛ aā sīdee alu ekwabaloo nu bu na esiatam ni?’

8. Ena Samson bee doo ziī sɔ̄ maā bee ye taɛ gbɛnɛ a?

⁸ O edaba buū nu akiiloo pya dɔɔ̄na sɔ̄ Samson bee doonu alu nyɛŋia. Aba ɛɛ bee bebe loo sasa-ekpo sa fɛ 30 pya nɛɛ Filistia bie ziī wa buɛ̄ a kura Ashkelon. (Biaɛ 14:5, 6, 19) Samson bee suā kɔ a naale ebee dabe doo pya nu ama lo Jɛhova naa bee ye yerebah nɛ. Lo ama bee sira leere sɔ̄ maā bee ye taɛ kaāna sɔ̄ efɛa 1,000 pya Filistia sah. Ena a bee doo a? Taā a gbī kɛ̄ maā le nyɔɔ ye loo, a bee bara yerebah aābah Jɛhova.—Biaɛ 15:18.

9. Ena Jɛhova bee doo sɔ̄ Samson bee ye yere kara nɛ a? (Pya Biaɛ 15:19)

⁹ Jɛhova bee agara kara Samson sɔ̄ a bee ye to loo yerebah, tɛ̄maloo edoo kɔ a muɛ maā e’ɔ̄ bu nyɛŋia sīdee. Sɔ̄ Samson bee ɔ̄ lo maā, “ye edɔɔ̄ bee obia lu, e a sikɛ̄ ɛrɛ dum.” (Buū Pya Biaɛ 15:19.) A sira kɔ, aā ezi maā ama bee lege mmɛ bu dee nɛɛ mɔmanudɛɛ̄ Samuɛl a bee ɛm kpa Pya Biaɛ. Pya Izrɛl ba bee muɛ lo ezi maā bee dap nyɛŋiabu kɔ a bɔloo kɔ pya zooro Jɛhova a dɛɛa ye nyɔɔ sɔ̄ ba le bu ebɛɛ̄.

10. Ena i doo lokwa i ɛrɛ yerebah aabah Jɛhova a? (Ɛpnage foto.)

¹⁰ Lunage ebɛɛ̄ kɔ i gbī yerebah aābah Jɛhova kaɛlɛɛ nu i para, kɛ̄ i suānu doo ale pya nu i edora bu esitam ye nɛ. Lee i yiga kɔ i kiisī leere aba sɔ̄ i dɛɛa nyɔɔ Jɛhova. Dookɛ̄ Samson bee sikɛ̄ ɛrɛ ekpo sɔ̄ a bee ɔ̄ maā Jɛhova bee ye nɛ doo, kɛ̄ mɛm eyiinage i loo lo i su dɛ̄dɛɛ̄ pya nu Jɛhova enɛā i daānu leere doo lo.—Mat 11:28.

11. Bu mɛ sīdee na i dap su pya nu Jɛhova enɛā i daānu leere a? Naa nɛ edoba.

¹¹ Kɛɛrɛbu edoba ziī wuga nɛɛdam a kura Aleksey alu Russia lo aa egerebu kɛ̄bah e’agabah tɛ̄ŋaloo. Ena a ye yerebah nɛ kɔ a lege aa ɛrɛ e’aga loo bu e’aga kɛ̄tɔɔ̄ ama a? Alɛ le ye wa wee nɔ Baibol sa si enɔānu eree sɔ̄ loo. A kɔ: “M piiga lo ebuū sa nɔ Baibol nyɔɔ na loo dookɛ̄ m bee nɔɔ doo. Dɛ̄dɛɛ̄ lɔɔrɛ na wa le mm wee gbaa ɛp nu a le nɛ dee sa yere kara nɛ Jɛhova.” Ena lo ama i tɔgɛ a? Taā i dɛɛa nyɔɔ i loo, lee kɔ i dɛɛa nyɔɔ Jɛhova. Bu mɛ sīdee? Tɛ̄maloo edoo pya nu e’agɛrɛtɛ̄ i yira, doodoo yere kara, nɔ nu nyɔɔ i loo, si uwe zue ue le si enɔānu. Lo ama edoo kɔ Jɛhova a nɛ leelee i epiaga lo esitam ye nɛ. Bari bee nɛ ekpo Samson, e a ɛrɛge enɛ i ekpo.

12. Amunu pɔrɔ biaɛfii na Samson bee doo a, e lo ama lu kee loo lo tuatua doodoo wa?

¹² Samson bee lu nɛɛ a naa mmana doodoo ili, nyɔɔwo wee tɛɛ̄nage ekwɔ bu ye biaɛfii. Ziī biaɛfii a bee doo bee ye nua gbɛnɛ taāŋa loo. Sɔ̄ Samson esua pio sɔ̄ siātam doodoo nɛɛ biaɛ, “a bee wereloo ziī wa bu pɛɛ kɛ̄ Sorek, e ye bee kura Delila.” (Biaɛ 16:4) Lɛɛ a gae lu lo sɔ̄, Samson bee gbī e’ii ziī wa Filistia, mɛ “a bee aabah Jɛhova; nyɔnɛbee a gbī nu a enua lo edoo pya Filistia.” Sɔ̄ esaa Samson bee tɔɔ̄ tɔ ziī waa kiā uwe li buɛ̄ pya Filistia a kura Gaza. Lo sɔ̄ ama Bari bee nɛ ekpo Samson kɔ a dāna bū lɛɛ nudee buɛ̄, sa doo kɔ lo buɛ̄ aa ɛrɛna kpega. (Biaɛ 14:1-4; 16:1-3) Mɛ gbanialoo Samson bee ɛrɛ loo Delila bee dap lu kee, nyɔɔbee a bee dap lu waa Izrɛl.

13. Bu mɛ sīdee na Delila bee pagɛrɛ Samson yerebu pɔrɔ kɛ̄tɔɔ̄ a?

¹³ Delila bee su gbɛnɛkpo kpugi aābah pya Filistia lo etɛ̄ŋaloo Samson. Nyɔnɛbee a bee wereloo Delila mmɛ kɛ̄ a naa bee suā nu a gaa gbī edoo. Kɛādoo, Delila bee bialoo zū Samson kɔ a kɔ kɛ̄ a aā ye ekpo ye nɛ, e Samson bee ye kɔ nɛ. Alu nu ekiɛ̄nu kɔ Samson bee doo nu a doo kɔ aa ɛrɛna ekpo le yerekpotɛ̄ a aabah Jɛhova bu pio sɔ̄.—Biaɛ 16:16-20.

14. Ena a bee siraloo Samson nyɔɔbee a bee dɛrɛ nyiɛ nyɔɔ Delila a?

¹⁴ Samson bee tɛɛ̄bu ezialoo kɛ̄tɔɔ̄ nyɔnɛbee a bee dɛrɛ nyiɛ nyɔɔ Delila taā a dɛrɛ nyiɛ nyɔɔ Jɛhova. Pya  Filistia bee aa Samson sa ye zimɛ dɛɛ̄. A bee lu eyere ye kpɔgɔrɔ li Gaza, kɛ̄ a bee bugara bū nudee wa buɛ̄, e ba su ye nua nɛɛ a gbɛ̄ nuede wa nɛ. Sɔ̄ esaa a bee lu ebɔbɛɛ ye kɛɛ sɔ̄ pya Filistia bee bɔŋanaloo lo edoo ziī wa doonu. Ba bee waara gbɛnɛ zɔɔ nɛ wa ekwɔ bari Dagon, doodoo bee alɛ na a doo kɔ Samson a dɔ wa bah a. Ba bee su Samson lɛɛ kpɔgɔrɔ nua kɛ̄ a gaa lu edoo lo doonu lokwa a wa “doo nu mɔm nɛ,” sa ba kɛgɛ ye.—Biaɛ 16:21-25.

15. Bu mɛ sīdee na Samson bee sikɛ̄ tɔgɛ kɔ a dɛrɛe nyiɛ nyɔɔ Jɛhova a? (Pya Biaɛ 16:28-30) (Ɛp foto a le nyɔɔ eko.)

¹⁵ Samson bee tɛɛ̄ gbɛnɛ ekwɔ, kerewo, a naa bee pee beenyiɛ ye. A bee gbī dee esiātam Bari bee ye nɛ kiiloo pya Filistia mmɛnɛ. (Buū Pya Biaɛ 16:28-30.) Samson bee bara Jɛhova kɔ: Doolo “m obara kpɛ pya Filistia.” Lo kaka Bari bee agara kara Samson, sa bee obara keebee ekpo a bee ye le loo a ye nɛ. Lo ama bee doo kɔ Samson a fɛ gbɛnɛ-edo pya Filistia lo dee eekɛ̄ ebee doo.

16. Ena i dap nɔ aāloo ekwɔ Samson bee tɛɛ̄ a?

¹⁶ Kere pɔrɔ nu bee siraloo Samson nyɔɔ ekwɔ a bee tɛɛ̄, a naa bee ɔbɛ edoo nu Jɛhova gbī. Lo alu kɔ i tɛɛ̄ ekwɔ ale i peere ziī dɔtam, ii ɛrɛ e’ɔbɛ etaāŋabah Jɛhova. Nyɛŋiabu kɔ Jɛhova kpɛ̄naloo e’aaloo i nɛ. (Yɔɔ 103:8-10) Kaɛlɛɛ i tɛɛ̄ ekwɔ, Jɛhova dap i su siātam dookɛ̄ a bee su Samson siā doo.

17-18. Ena anua edoba Michael yere a mɛm loo a? (Ɛpnage foto.)

¹⁷ Naa kɛɛrɛbu edoba ziī wuga nɛɛdam a kura Michael. A gaa bee piiga bu esiatam bu bɔŋanaloo doodoo nɛɛ yerebahtam le nɛɛ sɛmdee. Kerewo, alu ekiɛ̄nu kɔ a bee tɛɛ̄ ekwɔ sa peere pya dɔtam a bee ɛrɛ bu bɔŋanaloo. A kɔ: “Lɛɛ a gae lu lo sɔ̄, m gaa bee lu kirikiri bu na esiatam nɛ Jɛhova. Lɛɛ bu bugia, a aadee bee kɔ lɔgɔ nu m dap sikɛ̄ doo bu tam Bari naa lena. Mm bee kɛɛrɛ kɔ Jɛhova elɛɛ mɛ baloo, mɛ m bee kɛɛrɛ lo a le m sigekɛ̄ ɛrɛ le gbanialoo ye kumaloo ale sikɛ̄ si tam bu mmɛɛ sīdee bu bɔŋanaloo naa e.”

 ¹⁸ A lee kɔ Michael naa bee lɛɛbaloo etaāŋabah Jɛhova. A bee kɔ gbaāloo kɔ: “M bee piiga lo esikɛ̄ nyɔɔnɛ Jɛhova ɛrɛ le gbanialoo, tɛ̄maloo nɔ nu, ɛrɛ ekɛɛrɛ nyɔɔ, sa kɔ kɛ̄ nu mɛ tɔɔ̄loo doo ye nɛ bu kara dɛ̄dɛɛ̄ sɔ̄.” Sɔ̄ esaa, Michael bee sikɛ̄ ɛrɛ dee lo esitam bu bɔŋanaloo. Nyaawo a gaa si tam doodoo nɛɛ kanɛɛ le nɛɛ sɛmdee. A kɔ: “Kɛ̄ a bee lu eyere mɛ kpotɛ̄ sa mɛ yere mɛm loo doo, eetɔɔ̄ na tɛ̄mabah pya kanɛɛ bee doo kɔ m suā kɔ Jɛhova lege aa mɛ wereloo. Nyaawo, m gaa su le ekɛɛrɛ beenyiɛ siātam bu bɔŋanaloo. Nu a sira ama doo kɔ m suā kɔ Jɛhova e’aaloo nɛ ɛrɛgeba nɛɛ a kiiya kaāna.” I dap suā leere kɔ Jɛhova esu i siātam sa i nɛ leelee kere i ebee tɛɛ̄ ekwɔ lo i piiga lo ekiiya kaāna sa kiisī lo edɛɛa ye nyɔɔ.—Yɔɔ 86:5; Kam 28:13.

19. Bu mɛ sīdee na edoba Samson a yere mɛm loo a?

¹⁹ Bu ekobee ue ama, i enɔā pio keebee nu a bee siraloo Samson. A naa bee mmana, kerewo, a naa bee lɛɛbaloo esitam nɛ Jɛhova kere sɔ̄ a bee tɛɛ̄ ekwɔ kiikɛ̄ Delila le. E Jɛhova bee kiisī lo esu ye siātam. Bari bee sikɛ̄ su Samson siātam bu gbɛnɛ sīdee. Jɛhova lege aa ye su nua nɛɛ a ɛrɛ keebee yira, sa yere ye bee yɛɛ pya a bee ɛrɛ yira alu e’ɛm bu kpa Pya Hibru 11 ekobee. Naa ɛp kɛ̄ a i yere mɛm loo kɔ i gaa si tam nɛ i Tɛ a le li bunyɔɔ lo a ɛrɛ dua wereloo ama doo a! A gbī eyere i mɛm loo eetɔɔ̄ na sɔ̄ i le bu taāŋa sa gbī ye yerebah. Nyɔɔwo, doodoo Samson, doolo i bara Jɛhova kɔ: “Kɛɛrɛ mɛ bu, sa mɛ nɛ ekpo.”—Biaɛ 16:28.