1-2. Bu mɛ sīdee na i ɛrɛ biī aāloo kɔ a bee lu edɛm i kɔ i ɛrɛ gbɛnɛ ɛɛbu aāloo nɛ nɛ ee susu a?

 I WEE ɛrɛ gbɛnɛ ɛɛbu sɔ̄ i dɔɔ̄ nu nɛ pya dɔɔ̄na ee sɔ̄ ba i dɔɔ̄ nu nɛ, nyɔɔbee kɛ̄ Jɛhova bee i dɛm doolo. (Doonu 20:35) Ekɔ lo ama kura kɔ ii wee ɛrɛ ɛɛbu doo pippip lo nɛɛ dɔɔ̄ nu i nɛ ni? Eeye. Bu dɛ̄dɛɛ̄ ii wee ɛɛ sɔ̄ nɛɛ i dɔɔ̄ nu nɛ. Kerewo, i ɛrɛ gbɛnɛ ɛɛbu sɔ̄ ili dɔɔ̄ nu nɛ pya dɔɔ̄na nɛɛ. Bu kaka, a dɔbiī i nɛ kɔ Jɛhova bee i dɛm doo wo. Ena anu a?

² Nyɔɔbee Jɛhova bee i dɛm doo wo a, ili dap doo nu edoo kɔ i ɛrɛ gbɛnɛ ɛɛbu. I dap ɛrɛ gbɛnɛ ɛɛbu tɛ̄maloo egbī pya sīdee edɔɔ̄ nu nɛ pya dɔɔ̄na. Alu nyɛŋia kɔ Jɛhova bee i dɛm bu lo sīdee.—Yɔɔ 139:14.

3. Ena anua i dap su Jɛhova kure ‘Bari ɛɛbu’ a?

³ Kpa Kaɛ doo kɔ i suā kɔ sɔ̄ nɛɛ dɔɔ̄nu a wee ye nɛ ɛɛbu. Nu a nua Baibol su Jɛhova kure ‘Bari ɛɛbu’ lo. (1 Tim 1:11) Tua alɛ na a bee dɔɔ̄ nu a, e lɔgɔ nɛɛ a ye dɔɔ̄ nu tɔɔ̄ naale. Dookɛ̄ nɛɛ lɛɛratam Pɔɔl kɔ doo, tɛ̄maloo alɛ na i “tɔɔ̄ a sa kiā sa ɛrɛ i dum” a. (Doonu 17:28) Bu kaka, “dɛ̄dɛɛ̄ le dɔɔ̄ nu le dɛ̄dɛɛ̄ gbɛnɛ dɔɔ̄ nu a mma” aabah Jɛhova.—Jem 1:17.

4. Ena eyerebah i nɛ kɔ i agɛrɛbah ɛrɛ ɛɛbu a?

⁴ E bee nia dɛ̄dɛɛ̄ ii lo e’ɛrɛ gbɛnɛ ɛɛbu a wee aaloo dɔɔ̄ nu nɛ pya dɔɔ̄na. I dap doo wo tɛ̄maloo enɔ kɛ̄ Jɛhova dɔɔ̄ nu doo. (Ɛfɛs. 5:1) Bu ekobee ue ama i gaa  le nɔ ye le edobah, le nu i doo lo atɔɔ̄ i loo kɔ pya dɔɔ̄na naa tɔgɛ nialoo nu i wa dɔɔ̄ nɛ. Pya nu i nɔ ama gaa le yerebah i nɛ kɔ i kiisī lo e’ɛrɛ ɛɛbu sa agɛrɛbah ɛrɛ ɛɛbu sɔ̄ i dɔɔ̄ nu nɛ pya dɔɔ̄na.

NƆ KƐ̄ JƐHOVA DƆƆ̄ NU DOO

5. Pya amunu nu tɔ̄ma dum na Jɛhova i nɛ a?

⁵ Pya amunu sīdee na Jɛhova tɔgɛ kɔ a para edɔɔ̄ nu a? Naa kɛɛrɛbu pio edobah. Jɛhova nɛ i pya nu i tɔ̄ma dum. A naa doo kɔ i ɛrɛ dɛ̄dɛɛ̄ nu a i taɛ, mɛ a doo kɔ i ɛrɛ pya nu i tama dum. Bu edobah, a doo kɔ i ɛrɛ nuede, nu eyaa le tɔ etɔɔ̄ bu. (Yɔɔ 4:8; Mat 6:31-33; 1 Tim 6:6-8) Jɛhova naa nɛ i pya nu ama nyɔɔbee a kuu ye kɔ a nɛ i, mɛ ena anua Jɛhova doo lo bah ama i nɛ a?

6. Ena i nɔ aābu kpa Matiu 6:25, 26 a?

⁶ Jɛhova nɛ i pya nu tɔ̄ma dum nyɔnɛbee a were i loo. Naa kɛɛrɛbu ue Jizɔs a le bu kpa Matiu 6:25, 26. (Buū.) Jizɔs nɛ i edobah aāloo nu Bari dɛm. Sɔ̄ Jizɔs gaa kɔ nu a kiiloo enuɛ̄ pɛɛ bunyɔɔ a bee kɔ: “Ba naa egara eyuu, ale fii nu aā wii, ale bɔgɛnɛloo nu yere bu nwī-be-gum.” Kerewo, yere nu kuādɛɛ̄loo kɔ a sikɛ̄ kɔ: “Bui tɛ lo a le li bunyɔɔ gaa wa kpɔā.” Lɛɛ a bip kɔ: “Bɔɔlo buii sidu wa ee ni?” Ena i nɔ aāloo a? Nu i nɔ na bee Jɛhova ɛp pya a ye taāŋabah nua gbɛnɛ ee nam a bee dɛm. Lo Jɛhova kuūdɛɛ̄loo pya nam a bee dɛm, i dap suā leere kɔ e kuūnage dɛɛ̄ loo miɔŋɔ nɛɛ a ye taāŋabah! Doodoo i tɛ a i kuūdɛɛ̄loo, Jɛhova dɔɔ̄ nu nɛ pya ye butɔ aābu wereloo.—Yɔɔ 145:16; Mat 6:32.

7. Ziī amunu sīdee na i dap nɔ kɛ̄ Jɛhova dɔɔ̄nu doo a? (Ɛpnage foto.)

⁷ Doodoo Jɛhova, ili dapnage dɔɔ̄ nu bu namloo nɛ pya dɔɔ̄na bu wereloo. Bu edobah, ekɔ o suāloo ziī wuga bu bɔŋanaloo lo nuede ale nu eyaa lu ye ebɛɛ̄ ni? Jɛhova dap a su doo kɔ o mmɛnɛ ebɛɛ̄ lo wuga. Alu esuāloo pya nɛɛ Jɛhova kɔ ba wee para edɔɔ̄ nu nɛ pya bugia siranu siraloo. Bu edobah, sɔ̄ dumɛloo COVID-19 bee le a, pya wuga nɛɛdam le nɛɛwa bee dɔɔ̄ nuede, nu eyaa le pya dɔɔ̄na nu tɔ̄ma dum nɛ pya nɛɛ ba le bu ebɛɛ̄. Gbɛnɛ-edo nɛɛ  bee lɛranage nu ture loo i tam bu yube nyɔuwe. Lo ama bee yerebah kɔ alu e kuūdɛɛ̄loo pya i wuga a le bu ebɛɛ̄ bu dɛ̄dɛɛ̄ nyɔuwe. Pya wuga nɛɛdam le nɛɛwa ama bee su ue a le bu pya Hibru 13:16 yere bu dogo, lo a kɔ: “Bui aa aaloo edoo le nu sa ponia nu bui ɛrɛ, nyɔɔnɛbee dua wɔp zɔɔ ama lu nu a nia Bari.”

8. Bu a munu sīdee na i dap ɛrɛ biī aāloo ekpo Jɛhova a? (Filipai 2:13)

⁸ Jɛhova wee nɛ ekpo. Bu Jɛhova ɛɛ lo enɛ ekpo pya nɛɛ a ye taāŋabah a bɔ loo eture nyiɛ loo. (Buū Filipai 2:13.) Ekɔ o e bee yerege kara bara kɔ Jɛhova a nɛ a ekpo lo e’amana doā-ɛp ale ekpo lo e’egerebu ziī e’agabah doā-ɛp ni? O edabanage yere kara kɔ alu enɛ a ekpo lo edaā pya nu alu ebɛɛ̄ bu ziī ziī bira dee. Sɔ̄ a bee lu e’agara o kara sa a nɛ ekpo, o dap yiga ue nɛɛ lɛɛratam pɔɔl kɔ ama kɔ: “M dap doo dɛ̄dɛɛ̄ nu bu nɛɛ a mɛ nɛ e’agaloo.”—Fil 4:13.

9. Bu mɛ sīdee na i dap nɔ kɛ̄ Jɛhova su ye ekpo daānu bu wereloo doo a? (Ɛpnage foto.)

⁹ Kere ii mmana, i dap nɔ kɛ̄ Jɛhova su ye ekpo daānu bu wereloo doo. Ii le edap tɛma ekpo ale mɛm yere bu loo pya dɔɔ̄na. Mɛ i dap su i ekpo wa siātam nɛ. Bu edobah, i dap si lɛɛratam ale tam bu tɔ nɛ Nɛɛ Kraist e’ana ale lo loo ye dumɛ. Lo i kɛ̄tɔɔ̄ nɛ i dee, i dap suloo nɛ lo ekwa i Tɔ-Nɔ-Nu Buɛ̄-mɛnɛ doo kɔ a ɛɛ ale doo kɔ aa gbe. Su i ekpo siātam bu pya sīdee ama dɔbiī nɛ pya dɔɔ̄na ba gaa taāŋabah Jɛhova.

10. Bu mɛ sīdee na i dap su ekpo a aaloo i ue lo edoo kɔ pya dɔɔ̄na a’ɛrɛ biī a?

¹⁰ O aa ibere nage kɔ o dap kɔ ue eyere mɛm loo pya dɔɔ̄na. O dapge kɛɛrɛbu nɛɛ edɔbiī nɛ lo a le o leera ye ni? O suāgeloo nɛɛ a le bu ebɛɛ̄ a gaa gbī egbɔ̄nyiɛ ni? Bu ɛrɛgebah kɛ̄tɔɔ̄ ama, ena anua oo su oloo nyima loo lo nɛɛ a? O dap ye ina loo sī le sī, ye kue nyɔɔ fon ale o dap ye yereue ma, ale bu kɔmputa, ale dɔɔ̄ nu ye ma. Waa nɛ taāŋa loo a gbɛnɛ loo nu o kɔ. E wɛba ue o kɔ aā nyiɛ a dap lu taɛ nu a bɛɛ̄ lo wuga lokwa a kiisī lo e’ɛrɛ yira ale lokwa nyiɛ ye dap kiikɛ̄ bu ye kɛ̄tɔɔ̄.—Kam 12:25; Ɛfɛs 4:29.

11. Bu mɛ sīdee na Jɛhova su ye suānu daānu a?

¹¹ Jɛhova wee nɛ suānu. Nɛɛ lɛɛratam Jemes bee ɛm kɔ: “Lo a le ɛrɛgebah bui naa ɛrɛ suānu, doolo a bara bah Bari,  nɛɛ a nɛ dɛ̄dɛɛ̄ nɛɛ bu ɛɛ beenyiɛ e beebee naale loo.” (Jem 1:5.) Dookɛ̄ ue ama tɔgɛ doo Jɛhova naa wee gɔ̄ ye suānu, a wee dɔɔ̄ nɛ pya dɔɔ̄na. Yerenage nu kuādɛɛ̄loo kɔ, sɔ̄ Jɛhova nɛ suānu, a wee doo wo bu sīdee “beebee naale loo.” A naa gbī kɔ nyiɛ i a bege i ue sɔ̄ i ye bara kɔ a nɛ i ye suānu. Bu kaka, a gbī kɔ i bara ye.—Kam 2:1-6.

12. Pya amunu dee na i ɛrɛ lo eyɔ pya dɔɔ̄na ponia nu i ɛrɛ a?

¹² E ili a? I dapge nɔ Jɛhova tɛ̄maloo eyɔ pya dɔɔ̄na ponia nu i suā ni? (Yɔɔ 32:8) Pya nɛɛ Jɛhova ɛrɛ gbɛnɛ-edo dee lo ekɔ pya nu ba enɔā nɛ pya dɔɔ̄na. Bu edobah, i wee kpɔā pya aā nɛɛ bu tam zue ue. Pya kanɛɛ wee egerebu lo eyerebah nɛ pya yerebahtam le pya nɛɛ wuga nɛɛdam eliamaā lokwa ba suā kɛ̄ alu e’aabahloo nu a lu enɛ wa bu bɔŋanaloo doo. E pya a para wuh be sa kwaloo wee yerebah lo ekpɔā pya a naa para kɔ ba a dap wuh pya i tɔ etɔɔ̄ taāŋabah.

13. Bu mɛ sīdee na i dap nɔ sīdee Jɛhova nyɔɔnɛ pya dɔɔ̄na ponia ye suānu sɔ̄ i gaa kpɔā pya dɔɔ̄na a?

¹³ Pya a gaa kpɔā pya dɔɔ̄na doo leere lo enɔ sīdee Jɛhova doo kɔ pya nɛɛ a ɛrɛ ye suānu. Nyɛŋiabu kɔ Jɛhova wee nɛ suānu bu wereloo. Bu aba lo sīdee, i ponia pya nu i esuā sa para doo kɔ pya a gaa nɔ nu a suā nu i suā le nu i para. Ii le egɔ̄ pio nu i suā sa kɛɛrɛ kɔ lo ba suā ba eyii i dɔ. Ii le ekɔnage kɔ mda: ‘lɔgɔ nɛɛ naa wee mɛ kpɔā! A nɔ nyɔɔ ye loo.’ Dua dogo ama naa bɔloo yɛɛ pya nɛɛ Jɛhova. Taāwo, i su ɛɛbu tɔgɛ nu i suā mɛ “ilii beenyiɛ” alenage nyɔɔ pya i gaa tɔgɛ nu. (1 Tɛs 2:8) I bɛābu na kɔ ba alu “pya ba dap tɔgɛnage pya dɔɔ̄na.” (2 Tim 2:1, 2) Bu lo sīdee, lo dɛ̄dɛɛ̄ ii nyɔɔnɛ pya dɔɔ̄na ponia nu i suā, ili le pya dɔɔ̄na ele bu ɛɛbu sa suānu.

SƆ̄ A I TƆƆ̄ LOO KƆ PYA NƐƐ NAA TƆGƐ NIA LOO NU I WA DƆƆ̄NƐ

14. Gbɛnɛ-edo nɛɛ wee doo doo wa sɔ̄ i wa dɔɔ̄ nu nɛ ni?

¹⁴ Sɔ̄ i dɔɔ̄ nu nɛ pya dɔɔ̄na ee tɔɔ̄ na pya i wuga nɛɛdam le nɛɛwa, ba wee tɔgɛ nia. Ba dap ɛm ue i ma sa i doo yaa ale ba etɔgɛ nia bu dɔɔ̄na sīdee. (Kɔl 3:15) Sɔ̄ alu edoo i yaa doo wo wee doo kɔ bu i a ɛɛ.

15. Ena i nyɛŋiabu sɔ̄ pio nɛɛ naa tɔgɛ nia a?

¹⁵ Kerewo, bu kaka pio nɛɛ naa wee tɔgɛ nia kumaloo. Pio sɔ̄ i dap pee i sɔ̄, ekpo, ale pya nu i ɛrɛ sa a tɔɔ̄ i loo kɔ nɛɛ i bee doo nɛ a naa buū nua lɔgɔ nu. Lo a sira a loo doo wo a, i doo doo wa lokwa ii pee i ɛɛbu ale ɛrɛ saŋ ni? Nyɛŋiabu ue a le dɔ kpa kaɛ a bɛɛ ekobee ue ama, lo a le Doonu 20:35. Ɛɛbu i ɛrɛ sɔ̄ i dɔɔ̄nu naa dɛɛa nyɔɔ nu pya nɛɛ doo kumaloo. I dap ɛrɛ ɛɛbu sɔ̄ i dɔɔ̄ nu nɛ pya dɔɔ̄na kere a bee kɔ ba naa tɔgɛ nia kumaloo. Bu mɛ sīdee ni? Naa ɛp pio sīdee ama.

16. Ena i sere ekɛɛrɛ nyɔɔ sɔ̄ i gaa dɔɔ̄ nu a?

¹⁶ Kiisī lo enɔ Jɛhova. A kiisī lo edoo le loo pya nɛɛ ale ba tɔgɛ nialoo ale ba naa tɔgɛ. (Mat 5:43-48) Jɛhova yira yii kɔ sɔ̄ ili dɔɔ̄nage nu doo wo sa ii “sikɛ̄ bɛābu lɔgɔ ekpɛanu,” bui “ekpɛanu elu gbɛnɛ.” (Luk 6:35) “Ekpɛanu” dap lu tɔgɛ nia. Ale a lu enɛ i ale a naa lu enɛ, Jɛhova e’obara le i kpɛā lo i lu ‘nɛɛ a su ɛɛbu nɛa.’—Kam 19:17; 2 Kɔr 9:7.

17. Bu mɛ sīdee na i dap kiisī lo e’ɛrɛ le ekɛɛrɛ a? (Luk 14:12-14)

 ¹⁷ I muɛ ziī ue eyerebah i nɛ sɔ̄ i gaa kɛɛrɛbu loo dɔɔ̄ nu nɛ pya dɔɔ̄na bu kpa Luk 14:12-14. (Buū.) A naa bee piya lo e’aara saanɛɛ ale dɔɔ̄ nu bu pya dɔɔ̄na sīdee nɛ pya a dap doo nu a bee wo i nɛ. Kerewo, elo i suā kɔ i gaa dɔɔ̄nu nɛ nɛɛ nyɔɔnɛbee i ɛmadɛɛ̄ kɔ a gaa le obara i kpɛ a? I gaa le piiga lo edoo nu Jizɔs bee kɔ. I dap aara saanɛɛ nɛɛ i suā kɔ a naale edap i obara kpɛ. Lo sɔ̄ i dap ɛrɛ ɛɛbu nyɔnɛbee i gaa nɔ Jɛhova. Dua ekɛɛrɛ ama edoo kɔ i kiisī lo e’ɛrɛ ɛɛbu kere pya nɛɛ naa tɔgɛ nialoo nu i wa doo nɛ.

18. Ena ii ɛrɛ e doo a, e ena anua?

¹⁸ O aa kɛɛrɛ kɔ pya dɔɔ̄na naa tɔgɛ nia. (1 Kɔr 13:7) Lo pya dɔɔ̄na naa tɔgɛ nia, i dap bip i loo kɔ: ‘Luge kaka kɔ ba naa tɔgɛ nia kumaloo sɛh a ibere wa lo edoo wo ni?’ Dap lu kɔ a ɛrɛ pya nu anua ba naa doo dookɛ̄ o bee kɛɛrɛ doo. Pio nɛɛ dap ɛrɛ kaāna nia kumaloo mɛ a aga wabah lo etɔgɛ siā. Kɛɛ dap wa bɔb sɔ̄ alu eyerebah wa nɛ ee tɔɔ̄ lo alaba wee yerebah nɛ pya dɔɔ̄na sɔ̄ a kii adumɛ. Ɛrɛgebah kɛ̄ a mɛā doo, wereloo Pya Nɛɛ Kraist ezū i kɔ i aa su ue ama nua gbɛnɛ sa doo kɔ i kiisī lo e le bu ɛɛbu.—Ɛfɛs 4:2.

19-20. Ena anua egerebu lu ebɛɛ̄ sɔ̄ i dɔɔ̄ nu nɛ pya dɔɔ̄na a? (Ɛpnage foto.)

¹⁹ Ɛrɛ egerebu. Nɛɛ suānu Solomom wee ɛm kumaloo dɔɔ̄ nu kɔ: “Top o fituru tɛrɛ nyɔɔ maā nyɔnɛbee o gaa le gbī ye muɛ sɔ̄ boo boo dee etɛna.” (Eklis 11:1) Dookɛ̄ ue ama kɔ doo, pio nɛɛ dap doo dogo kumaloo nu i bee wa dɔɔ̄ nɛ sɔ̄ nyɔɔnyɔɔ sɔ̄ etɛ̄na, —“lo a le sɔ̄ booboo dee etɛ̄na.” Naa kɛɛrɛbu loo edobah ama.

²⁰ Sɔ̄ gbɛnɛ-edo zua etɛ̄na, wa ziī nɛɛ kuūdɛɛ̄loo sɛkiut bee ɛm lɛta ma ziī  wuga nɛɛwa a liamaā aā, ye yere mɛm loo kɔ a kiisī lo etɔɔ̄ bu yira. Sɔ̄ nu a lu ɛrɛtaa zua etɛ̄na, lo wuga nɛɛwa bee agara kɔ: “Nyiɛ mɛ kɔ m ɛm kpa ama a ma nyɔɔ kɛ̄ o bee mɛ yerebah nɛ doo bu gbɛnɛ-edo zua lo olo oo suā.” A bee kiisī lo ekɔ: “[Kpa o bee mɛ ɛm ma ama] bee mɛ tɔaloo, e mm bee ibere.” a Sɔ̄ e kɔa pio taāŋah a bee kpesī sah, lo wuga nɛɛwa bee kɔ: “Pio sɔ̄ m wee gbī elɛɛbahloo dɛ̄dɛɛ̄ nu sa ɔbɛ etaāŋabah Jɛhova. Mɛ dɔ kpa kaɛ o bee mɛ ɛm ma wee mɛ nyɛŋiabu sa m kiisī lo epiiga.” Lo wuga bee sinagekɛ̄ kɔ: “Bu dɛ̄dɛɛ̄ ɛrɛtaa zua ama o lɛta bee mɛ ɛrɛ pah nyɔɔ ee dɛ̄dɛɛ̄ nu.” Naa kɛɛrɛ kɛ̄ bu wa nɛɛ kuūdɛɛ̄loo sɛkiut ama e ɛɛ doo sɔ̄ a ɛrɛ lɛta ama sɔ̄ “booboo dee etɛ̄na”! Dapnage lu ekɔ ue a tɔgɛ nia ma ili sɔ̄ ii bee kɛɛrɛnabu.

21. Ena anua i biaɛfii kɔ i kiisī lo enɔ kɛ̄ Jɛhova dɔɔ̄ nu doo a?

²¹ Dookɛ̄ a bee lu ekɔ doo, a ɛrɛ keebee sīdee Jɛhova i dɛm. Kere i wee ɛrɛ ɛɛbu sɔ̄ pya dɔɔ̄na i dɔɔ̄ nu nɛ, i ɛrɛ gbɛnɛ ɛɛbu sɔ̄ i dɔɔ̄ nu nɛ pya dɔɔ̄na. Bu i wee ɛɛ sɔ̄ i yerebah nɛ pya wuga bu bɔŋanaloo. E bu i wee ɛɛ sɔ̄ ba tɔgɛ nia kumaloo. Kerewo, ale nɛɛ i dɔɔ̄ nu nɛ tɔgɛ nia kumaloo ale a naa tɔgɛ, bu i dap ɛɛ kɔ i edoora nu a bɔloo. Waa ibere kɔ ɛrɛgebah nu o dɔɔ̄, “Jɛhova dap a nɛ nu a eenyɔɔ lo ba ama.” (2 Edoo 25:9) Jɛhova edɔɔ̄ nu a nɛ eemanyɔɔ nu olo bee dɔɔ̄! Lɔgɔ gbɛnɛ ɛɛbu o ɛrɛ eemanyɔɔ sɔ̄ Jɛhova a obara kpɛ naale. Lo a le wo, dooraa i biaɛfii lo enɔ i Tɛ a le li bunyɔɔ a para dɔɔ̄ nu.