1-2. (a) Kɛ̄tɔɔ̄ pya a le Judia bee mɛā doodoo wa sɔ̄ nɛɛ lɛɛratam Pɔɔl bee ɛm kpa ma pya Hibru? (b) Bu mɛ sīdee na kpa ama bee lu taɛ sɔ̄ a bɔloo a?

 PYA Nɛɛ Kraist alu Hibru a bee tɔɔ̄ Jerusalɛm le Judia bee tɛɛ̄ bu e’aga kɛ̄tɔɔ̄ sɔ̄ Jizɔs e’ua sah. Nwīgbagbara sɔ̄ aā sɔ̄ a bee lu eyere bɔŋanaloo Pya Nɛɛ Kraist, ba bee kpesī e’agabah tɛ̄ŋaloo. (Doonu 8:1) Sɔ̄ 20 zua etɛ̄na, pya a wee nyɔɔnɛ dumɛ Kraist bee kpesī e’aga kɛ̄tɔɔ̄ nyɔɔ kii le naɛbah a bee le lo barasī. (Doonu 11:27-30) Dee bu zua 61 C.E., Pya Nɛɛ Kraist bee ɛrɛ efɛɛloo bu pio sɔ̄, lo alu kee loo nu a gaa lu sī. Lo sɔ̄, Jɛhova bee nɛ ye kaɛ edɔɔ̄ nɛɛ lɛɛratam Pɔɔl kɔ a ɛm ziī kpa. Zuurabahtɔ̄ a le bu lo kpa bee yerebah nɛ Pya Nɛɛ Kraist a bee le lo sɔ̄ kɔ ba a kpɛ̄naloo baɛ nu esira nwīgbagbara sɔ̄ aā lo sɔ̄.

² Kpa a bee lu e’ɛm ma Pya Nɛɛ Kraist a le Hibru bee lu sɔ̄ a bɔloo nyɔnɛbee efɛɛloo ba gaa bee ɛrɛ lo sɔ̄ naale ebiɛ̄. Pɔɔl bee wa nɛ zuurabahtɔ̄ eyerebah wa nɛ kɔ ba a dap egerebu kɛ̄bah tɛ̄ŋaloo ba ekpesī sɔ̄ esaa. Gbeerasī sɔ̄ eku pya Juu lo Jizɔs bee kɔ sere kɛ̄ a, ebee tɔɔ̄ waɛloo kɛ̄. (Luk 21:20) Bu kaka, Pɔɔl ale Pya Nɛɛ Kraist a bee le Judia naa bee suā sɔ̄ lo gbeerasī esudɔ. Kerewo, Pya Nɛɛ Kraist ama esu pya sɔ̄ a siga ama wuā  wa yira sa nɔ lo e’egerebu.—Hib 10:25; 12:1, 2.

3. Ena anua kpa Hibru edɔbiī nɛ Pya Nɛɛ Kraist anii’ee a?

³ Sɔ̄ sɔ̄ naa binia, i gaa le kpesī tɛ̄ŋaloo a ee lo Pya Nɛɛ Kraist alu Hibru bee kpesī. (Mat 24:21; Mum 16:14, 16) Nyɔɔwo, doraa i kɛɛrɛbu pio zuurabahtɔ̄ Jɛhova bee nɛ Pya Nɛɛ Kraist lo sɔ̄ lo a i dap dɔbiī nɛ.

“NYIM LU NƐƐ KRAIST A AGALOO”

4. Pya amunu finiabah na Pya Nɛɛ Kraist alu Juu bee kpesī a? (Ɛpnage foto.)

⁴ A bee lu ebɛɛ̄ kɔ Pya Nɛɛ Kraist alu Juu a kwabaloo wa sīdee tɔɔ̄dum, e lo ama naa bee waɛ. A ɛrɛ sɔ̄ Jɛhova bee sagɛ pya Juu nua pya ye nɛɛ. Jerusalɛm na kɛ̄ pya mɛnɛ Jɛhova bee sagɛ kɔ a bɛɛ wee tɔɔ̄ a, e tɔkaɛ a le Jerusalɛm na pya nɛɛ a gbī etaāŋabah Jɛhova wee kii a. Dɛ̄dɛɛ̄ pya Juu a bɔ loo eture nyiɛ loo bee nyɔɔnɛ Lok Mozis dookɛ̄ pya wa zaāsī yiga bari kɔ doo. Ba bee ɛrɛ lok a baɛbee wa nuede, kokooa, le kɛ̄ ba e’aara pya a naale pya Juu doo. Kerewo, Jɛhova naa bee suna lɔgɔ waara zɔɔ alu ewɔp sɔ̄ Jizɔs e’ua sah. E a naa bee waɛbah pya Juu a bee lu Nɛɛ Kraist lo enyaana wa sīdee taāŋabah. (Hib 10:1, 4, 10) Bee aganage bah nɛɛ lɛɛratam Pita, lo ekwabahloo pya nu ama. (Doonu 10:9-14; Gal 2:11-14) Nyɔɔbee wa aā yira ama, pya zaāsī yigabari bee wa tɛ̄ŋaloo.

5. Ena a bɔloo kɔ Pya Nɛɛ Kraist a nwaɛdɛɛ̄ loo a?

⁵ Bee lu egbanasī Pya Nɛɛ Kraist a bee le Judia tɛ̄mabah baɛ eku pya nɛɛ. Pya zaāsī yigabari ama bee kɛɛrɛ kɔ ba elɛrabahloo wa taāŋabah. Gbaāloo wo, pio pya nɛɛ bu bɔŋanaloo bee kɔ Pya Nɛɛ Kraist a kiisī lo enyɔɔnɛ lok Mozis, lokwa a naa lu etɛ̄ŋa wa loo. (Gal 6:12) Ena eyerebah nɛ Pya Nɛɛ Kraist ba ɛrɛ yira kɔ ba a tɔɔ̄ bialoo kaka ue a?

6. Ena Pɔɔl bee yere mɛm loo pya wuga kɔ ba a doo a? (Hibru 5:14–6:1)

 ⁶ Bu kpa Pɔɔl bee ɛm ma pya Hibru, a bee wa yere mɛm loo kɔ ba a kiisī lo e buū sa ɛrɛ ekɛɛrɛ nyɔɔ Muɛ̄ Ue Bari. (Buū Pya Hibru 5:14–6:1.) Pɔɔl bee su kpa Hibru baātɛ̄ nu a anua sīdee Pya Nɛɛ Kraist taāŋabah Jɛhovah lee ee sīdee pya Juu ye su taāŋabah. a Pɔɔl bee suā kɔ lo Pya Nɛɛ Kraist kiisī lo e’ɛrɛ buābee sa dābeeloo kaka ue eyerebah wa nɛ kɔ ba a yere nu kuādɛɛ̄loo, sa kiī esah tɔgɛnu lokwa a naa lu edag wa.

7. Pya amunu nu finiabah na i kpesī a nii’ee a?

⁷ Doodoo Pya Nɛɛ Kraist a bee le Hibru, i gaa kpenagesī pya esah tɔgɛnu le pya ue a naa gbaaloo kaāna daakuu Jɛhova. Pio nɛɛ kɔ pya ekeebee Jɛhova gaa tɛɛ̄ ekwɔ nyɔɔnɛbee ba gbaɛ̄tɔ̄loo lok Baibol akiiloo maniakɛ̄ a naa ɛɛ. Elap dogo pya nɛɛ bu nyɔwue le wa ekɛɛrɛ gaa tɔɔ̄ binia aāloo kaāna sīdee kɛ̄ Bari ɛp nu doo. (Kam 17:15) Nyɔɔwo, a bɔloo kɔ i yere nu kuādɛɛ̄loo pɔrɔ ekɛɛrɛ sa ye kiī. Ii le eyiga kɔ pya a i gbanasī a ɔe i loo sa doo kɔ i ɔbɛ etaāŋabah Jɛhova.—Hib 13:9.

8. Bu mɛ sīdee na i dap nyim agaloo bu yira a?

⁸ A bɔloo kɔ i piiga kaāna lo enyɔɔnɛ zuurabahtɔ̄ Pɔɔl bee nɛ Pya Nɛɛ Kraist li Hibru, kɔ ba a nyim agaloo bu edɔɔ̄. Lo ama kura kɔ a lu ebɛɛ̄ kɔ i kiisī lo e nɔ Baibol lokwa i dap suāloo Jɛhova le ye ekɛɛrɛ leere. I kiisī lo edoo wo kereadoo i eliamaā sah. Kereadoo i etɔɔ̄na bu kaka bu gbɛnɛ-edo zua, dɛ̄dɛɛ̄ ii ɛrɛ ekiisī lo ebuū sa nɔ Muɛ̄ Ue Bari dɛ̄dɛɛ̄ sɔ̄. (Yɔɔ 1:2) Nɔ Muɛ̄ Ue Bari dɛ̄dɛɛ̄ sɔ̄ eyerebah i nɛ kɔ i yere mɛm loo i yira, lo elap dogo Pɔɔl bee yere mɛm loo Pya Nɛɛ Kraist a bee le Hibru kɔ ba a ɛrɛ.—Hib 11:1, 6.

“ƐRƐ YIRA LO E’ƐRƐ WA BEENYIƐ”

9. Ena anua a bee lu bɛɛ̄ kɔ Pya Nɛɛ Kraist alu Hibru a ɛrɛ e’agatɛ̄ yira a?

⁹ A bee lu ebɛɛ̄ kɔ Pya Nɛɛ Kraist alu Hibru a ɛrɛ e’agatɛ̄ yira lokwa ba dap tɛɛ̄ yeebah etɛɛraloo a gaa lu Judia. (Hib 10:37-39) Jizɔs bee zuurabahtɔ̄ pya a wee ye nyɔɔnɛ dumɛ kɔ sɔ̄ ba muɛ pya nɔ̄ a tɛɛ̄ ɛŋɛnɛ Jerusalɛm, ba a teera aa kii nyɔɔ kpokɛ̄. Lo zuurabahtɔ̄ bee le nɛ dɛ̄dɛɛ̄ Pya Nɛɛ Kraist ba le bu Jerusalɛm ale Judia. (Luk 21:20-24) Sɔ̄ pya nɔ̄ bebeloo ziī buɛ̄, pya nɛɛ wee teera kii gbɛnɛ buɛ a ɛrɛ ekpadaɛ̄ lokwa ba ɛrɛ kpega. Teera kii nyɔɔ gbɛnɛ kpokɛ̄ naa aadee lu nu suānu le loo e a gbī e’agatɛ̄ yira.

10. Ena e’agatɛ̄ yira ezū Pya Nɛɛ Kraist kɔ ba a doo a? (Hibru 13:17)

¹⁰ Alunage ebɛɛ̄ kɔ Pya Nɛɛ Kraist alu Hibru a dɛrɛ nyiɛ nyɔɔ pya nɛɛ Jizɔs gaa su zaāsī bɔŋanaloo. Pya nɛɛ a gaa su zaāsī wee nɛ zuurabahtɔ̄ lo eyerebah nɛ dɛ̄dɛɛ̄ pya nɛɛ bu bɔŋanaloo lo enyɔɔnɛ leredee a aabah Jizɔs taɛ nyɔɔ sɔ̄ le sīdee a bɔloo. (Buū Pya Hibru 13:17.) Bee ue Grik alu esu kɔā ue bu kpa Pya Hibru 13:17 a kɔ “gbanaatɔ̄” kura kɔ alu ezū pya nɛɛ kɔ a gbaɛ̄tɔ̄loo nyɔɔnɛbee a dɛrɛ nyiɛ nyɔɔ nɛɛ a gaa wa nɛ lo zuurabahtɔ̄. Naale aba egbaɛ̄  ye tɔ̄loo nyɔɔnɛbee alu e nɛ ye ekpo kɔ a nɛ zuurabahtɔ̄. Nyɔɔwo, a bee lu ebɛɛ̄ kɔ Pya Nɛɛ Kraist alu Hibru a nyimɛ wa dɛrɛ nyiɛ nyɔɔ pya a gaa su zaāsī lɛɛ gbɛnɛ etɛɛrɛloo gae bɔātɛ̄. Lo Pya Nɛɛ Kraist gbaɛ̄tɔ̄ loo pya kanɛɛ sɔ̄ taāŋa naale, e doo kɔ a waɛ wa bah lo gbaɛ̄tɔ̄ sɔ̄ gbɛnɛ etɛɛraloo.

11. Ena a nua alu ebɛɛ̄ kɔ Pya Nɛɛ Kraist anii’ee a ɛrɛ e’agatɛ̄ yira a?

¹¹ Nii’ee, alu ebɛɛ̄ kɔ i ɛrɛ yira dookɛ̄ Pya Nɛɛ Kraist a bee le Hibru bee doo. I tɔɔ̄ bu nyɔuwe gbɛnɛ-edo nɛɛ kiī sa gbɛ zuurabahtɔ̄ Baibol akiiloo kpɛdumɛ dee ama. (2 Pit 3:3, 4) Gbaāloo wo, Baibol muuna pio nu akiiloo kɛ̄ gbɛnɛ etɛɛraloo esira doo, a ɛrɛ gbɛnɛ-edo nu ii suā. A lu ebɛɛ̄ kɔ i ɛrɛ e’agatɛ̄ yira kɔ kuma lo sɔ̄ eku ama gaa le lu sɔ̄ a bɔloo e Jɛhova gaa le kuu i dɛɛ̄loo.—Hab 2:3.

12. Ena eyerebah i nɛ kɔ i tɛɛ̄ yeebah gbɛnɛ etɛɛrɛloo a?

¹² I ɛrɛnage ekiisī lo e’ɛrɛ e’agatɛ̄ yira bu sīdee Jɛhova gaa i su leredeebah anii’ee tɛ̄maloo “zooro a bɔloo eture nyiɛ loo sa suānu.” (Mat 24:45) Sɔ̄ gbɛnɛ etɛɛrɛloo ebɔātɛ̄, i dap ɛrɛ leredeebah ekpɔā i dum, dookɛ̄ Pya Nɛɛ Kraist alu Hibru bee ɛrɛ doo sɔ̄ pya nɔ Rom bee tɛɛ̄ ɛŋɛnɛ Jerusalɛm. Taɛ nyaawo na a bɔloo kɔ i agɛrɛbah dɛrɛ nyiɛ nyɔɔ leredeebah a aabah pya a gaa zaasī bu bɔŋanaloo Jɛhova a. Lo ii dɛrɛ nyiɛ nyɔɔ sa gbaɛ̄tɔ̄loo wa leredeebah anyaawo, e aganage i bah edoo wo bu gbɛnɛ etɛɛrɛloo.

13. Ena anua zuurabahtɔ̄ a le bu Pya Hibru 13:5 dɔbiī a?

¹³ Kuma sɔ̄ Pya Nɛɛ Kraist alu Hibru bee le gaa tɔɔ̄baɛ pya lo sira nu a, a bee lunage ebɛɛ̄ kɔ ba a tɔɔ̄dum a waɛbah, bie dɛɛ̄ nyɔɔ taāŋabah Jɛhova sa kiī “wereloo kpugi.” (Buū Pya Hibru 13:5.) Pio aba e bee tɛɛ̄ bu e’aga kɛ̄tɔɔ̄ le kii. (Hib 10:32-34) Kereadoo ba bee le ekpɛ̄naloo e’egerebu bu e’aga kɛ̄tɔɔ̄ nyɔɔbee le yereue, pio aba bee bɔātɛ̄ e’ɛp zɔ kɔ ekpegae wa. Mɛ lɔgɔ buā kpugi ba ɛrɛ naale edap wa kpɔā sɔ̄ elu egbeesī Jerusalɛm. (Jem 5:3) Bu kaka, e’agabah ɛrɛgebah aba a wereloo zɔ lo eteera aa wa tɔ.

14. Bu mɛ sīdee na e’agatɛ̄ yira dap ɛrɛ pah nyɔɔ i kponia zɔ anyaawo a?

¹⁴ Lo a le i ɛrɛ e’agatɛ̄ yira kɔ sɔ̄ sɔ̄ naa binia Jɛhova gaa le gbeesī lo pɔrɔ sɔ̄ nyɔuwe ama, ii le ekɛɛrɛ kɔ ɛrɛ gbɛnɛkpo kpugi lu ebɛɛ̄. Bu sɔ̄ gbɛnɛ etɛɛrɛloo, kpugi naale edɔna lɔgɔ biī, Baibol kɔ pya nɛɛ e, “top dɛ̄dɛɛ̄ wa silver tɛrɛ nyɔɔ dɛ̄dɛɛ̄ kɛ̄ dee buɛ” nyɔnɛbee ba gaa le muɛ kɔ “wa silver le wa gold naa dap wa zuura lɛɛ bu dee gbɛnɛ saŋ Jɛhova.” (Ezek 7:19) Taā i su i ekɛɛrɛ sere nyɔɔ ɛrɛ gbɛnɛkpo zɔ, alu ebɛɛ̄ kɔ i biaɛfii lo etɔɔ̄dum a waɛbah lokwa i dap kuudɛɛ̄loo pya i butɔ. Lo ama kura kɔ ii le ede kɔm ale yaɛ pya nu a naa lu ebɛɛ̄. I nwaɛnage dɛɛ̄ lokwa pya nu i ɛrɛ naa kuī i loo gbɛnɛ bu i dum. (Mat 6:19, 24) Kuma sɔ̄ i gaa tɔɔ̄baɛ kuma lo sɔ̄ eku ama, zɔ le pya dɔɔ̄na nu dap doā ɛp kɛ̄ i yira agara doo.

“EGEREBU BƐƐ̄ I”

15. Ena anua egerebu bee bɛɛ̄ Pya Nɛɛ Kraist a bee le Judia a?

¹⁵ Bee lu ebɛɛ̄ kɔ Pya Nɛɛ Kraist a bee  le Judia a egerebu bu wa esiatam nɛ Jɛhova nyɔɔbee taāŋa gaa bee lu. (Hib 10:36) Kereadoo pio Pya Nɛɛ Kraist sɔ̄ akii adumɛ e bee kpesī e’agabah tɛ̄ŋaloo, gbɛnɛ-edo aba bee yira bu Jizɔs sɔ̄ kina efɛɛloo bee le. Pɔɔl bee kɔ kereadoo ba etɛ̄na bu gbɛnɛ-edo nu a doā ɛp wa yira, ba sii tɔga mmɛ loo luh dookɛ̄ Jizɔs bee doo. (Hib 12:4) Kuma sɔ̄ Pya Nɛɛ Kraist bee kiisī lo enyim yiiloo a, pya Juu bee agɛrɛbah ɛrɛ biirabu sa wa gbanasī. Sɔ̄ pio zua etɛ̄na, bee lu ebebeloo Pɔɔl sɔ̄ a gaa zue ue li Jerusalɛm. Nu a eeloo 40 pya Juu bee kɔ “i ebɔba i loo agɛrɛ tɛ̄maloo yii kɔ ii le ede lɔgɔ nuede mmɛ sɔ̄ i efɛa Pɔɔl.” (Doonu 22:22; 23:12-14) Kaɛlɛɛ pya gbānasī le baaloo ba bee kpesī, a bee lu ebɛɛ̄ kɔ Pya Nɛɛ Kraist ama a kiisī lo etaāŋabah, zue le yereue, sa doo kɔ wa yira a’agatɛ̄.

16. Bu mɛ sīdee na kpa a bee lu e’ɛm ma Pya Nɛɛ Kraist alu Hibru eyerebah i nɛ kɔ i ɛrɛ le ekɛɛrɛ sɔ̄ i gaa kpesī tɛ̄ŋanaloo a? (Pya Hibru 12:7)

¹⁶ Ena ebee yerebah nɛ Pya Nɛɛ Kraist alu Hibru kɔ ba a kiisī lo e’egerebu kɛ̄bah gbanasī a? Pɔɔl bee suā kɔ alu ebɛɛ̄ kɔ ba a suā biī ba e’ɛrɛ lo ba egerebu bu wa tɛ̄ŋaloo. Pɔɔl bee baatɛ̄ kɔ sɔ̄ Pya Nɛɛ Kraist kpesī tɛ̄ŋaloo, Bari dap su lo sīdee wa kpɔā. (Buū Pya Hibru 12:7.) Dua kpɔā ama dap wa yerebah nɛ kɔ ba a tɔgɛ elap dogo Pya Nɛɛ Kraist. Tɛ̄maloo esere ekɛɛrɛ nyɔɔ nu esira aābu lo ba egerebu, edoo kɔ awaɛbah Pya Nɛɛ Kraist alu Hibru kɔ ba a egerebu.—Hib 12:11.

17. Ena Pɔɔl bee nɔ a kiiloo tɛ̄ŋaloo a?

¹⁷ Pɔɔl bee yere mɛm loo Pya Nɛɛ Kraist alu Hibru kɔ ba a egerebu bu tɛ̄ŋaloo, e ba aa pee beenyiɛ wa. Nɛɛ lɛɛratam Pɔɔl bee nɛ le zuurabahtɔ̄ nyɔɔ kɛ̄ ba edap egerebu kɛ̄bah tɛ̄ŋaloo  doo. Doodoo nɛɛ a bee tɛ̄ŋaloo Pya Nɛɛ Kraist tua sɔ̄, a bee suā nu ba gaa tɛɛ̄bu. A bee suānage kɛ̄ edoo egerebu bu tɛ̄ŋaloo, nyɔɔnɛbee sɔ̄ a bee lu Nɛɛ Kraist a bee kpesī keekee bee gbānasī. (2 Kɔr 11:23-25) Nyɔɔwo Pɔɔl bee suā leere pya nu a kura lo e’egerebu. Pɔɔl bee nyɛŋiabu Pya Nɛɛ Kraist ama kɔ sɔ̄ ba gaa egerebu, ba a dɛɛa nyɔɔ Jɛhova, e a naale alaba loo. Pɔɔl bee su e’agaloo kɔā kɔ: “[Jɛhova] na mdaa nɛɛ yerebah a, bɔɔ naale e’aa mɛ.”—Hib 13:6.

18. Ena lo i suā a kiiloo deesī edap i yerebah nɛ kɔ i egerebu a?

¹⁸ Nyaawo, pio pya i wuga gaa egerebu kɛ̄bah tɛ̄ŋaloo. I dap yerebah nɛ pya i wuga ama tɛ̄maloo i kara, le nɛ wa nu a wa bɛɛ̄. (Hib 10:33) Kpa Baibol kɔ leere kɔ “mɛ a elu etɛ̄ŋaloo dɛ̄dɛɛ̄ pya a gbī etɔɔ̄ dum enwadɛɛ̄ Bari bu Kraist Jizɔs.” (2 Tim 3:12) Nyɔɔbee wo, alu ebɛɛ̄ kɔ dɛ̄dɛɛ̄ ii a kpɛnaloo baɛ nu a gaa lu deesī. Doraa dɛ̄dɛɛ̄ ii i kiisī lo edɛrɛ nyiɛ nyɔɔ Jɛhova, bɛābu kɔ a gaa le yerebah i nɛ lo e’egerebu ɛrɛgebah tɛ̄ŋaloo a i lu sī. Bu sɔ̄ a gaa lu, a gaa le agara dɛ̄dɛɛ̄ pya a ye taāŋabah bu bɔ ture nyiɛ loo.—2 Tɛs 1:7, 8.

19. Ena i dap doo lo eyerebah i nɛ kɔ i kpɛ̄naloo baɛ gbɛnɛ etɛɛrɛloo a? (Ɛpnage foto.)

¹⁹ Bu kaka, kpa nɛɛ lɛɛratam Pɔɔl bee ɛm ma pya alu Hibru bee yerebah nɛ Pya Nɛɛ Kraist bu tua sɔ̄ o’oo tup zua a, kɔ ba a kpɛ̄naloo baɛ gbɛnɛ etɛɛrɛloo a gaa bee lu deesī. Pɔɔl bee yere mɛm loo pya wuga kɔ ba a dābeeloo toga toga suānu a le bu kpa kaɛ. Dodoo wo eyerebah wa nɛ kɔ ba a suāloo sa kiī pya tɔgɛnu adap ɔɛloo wa yira. A bee wa yere mɛm loo kɔ ba a ɛrɛ e’agatɛ̄ yira lokwa ba dap nyɔɔnɛ leredee a aabah Jizɔs le pya a gaa zaasī bu bɔŋanaloo. A bee yere nagebah nɛ Pya Nɛɛ Kraist kɔ ba a kiisī lo e’ɛrɛ egerebu, tɛ̄maloo e’ɛp pya lo taāŋa nua sīdee a lu ekpɔā wa tɛ̄mabah wa wereloo Tɛ. Ili ɛrɛnage enyɔɔnɛ pya zuurabahtɔ̄ a aabu Baibol ama. Lo sɔ̄ i dap egerebu sa tɔɔ̄ bu bɔ ture nyiɛ loo mmɛ kuma.—Hib 3:14.