1. Amunu biaɛ na a gaa le sudɔ sɔ̄ sɔ̄ naa binia a?

 I TƆƆ̄DUM sɔ̄ gbɛnɛ nyaa gaa sira! Sɔ̄ sɔ̄ naa binia, Jizɔs gaa le biaɛ biaɛ loo dɛ̄dɛɛ̄ nɛɛ a tɔɔ̄dum. Jizɔs doo kɔ i suā kɔ dee biaɛ ama gaa tɔɔ̄ waɛloo kɛ̄, a bee nɛ “edobah” nu a gaa le sira bu ye lulu le “kuma lo sɔ̄ eku ama.” (Mat 24:3) Alu e’ɛm pya edobah nu ama sere kɛ̄ bu kpa Matiu ye 24 le 25, Kpa Maak ye 13 le Luk ye 21.

2. Ena i gaa le kɔnia bu ekobee ue ama, e lo ama eyerebah i nɛ doodoo wa?

² Jizɔs bee nɛ zuurabahtɔ̄ eyerebah i nɛ tɛ̄maloo ekɔ taa kam. Lo ama na kam akiiloo naana pee le kunɛ pee, miɔŋɔ emuā a bee suānu le pya lo a bee lu ezu, gbaāloo kam talɛnt. Ziī ziī lo kam tɔgɛ kɔ Jizɔs ebiaɛ pya nɛɛ dɛɛa nyɔɔ nu ba bee doo. Kuma sɔ̄ i gaa nɔ nu akiiloo pya kam ama, doraa i yere nukuādɛɛ̄ loo kɛ̄ i dap wa su yere bu dogo doo. Lo tua kam i gaa le kɔnia na lo naana pee le kunɛ pee.

NAANA PEE LE KUNƐ PEE

3. Mɛ sɔ̄ na Jizɔs ebiaɛ pya nɛɛ a?

³ Bu kam akiiloo naana pee le kunɛ pee, Jizɔs baatɛ̄ kɛ̄ elu ebiaɛ pya nɛɛ ba ɛrɛ dee lo esu le yereue sa yerekpotɛ̄ Pya Nɛɛ Kraist alu etɔ̄ nɔɔ̄ bee doo. (Mat 25:31-46) Bu “gbɛnɛ etɛɛrɛloo,” a gaa le biaɛ biaɛ ama lɛɛ nɔ Armagidɔn gae sudɔ. (Mat 24:21) Dookɛ̄ nɛɛ tɔɔ̄loo naana pee wee sere naana pee lɛɛ loo kunɛ pee doo, kɛ̄  Jizɔs esere nage kee yɛɛ pya nɛɛ atɔɔ̄ agara sa yerekpotɛ̄ Pya Nɛɛ Kraist alu etɔ̄ nɔɔ̄ bee le pya nɛɛ a naa yere wa kpotɛ̄ doo lo.

4. Dookɛ̄ Aisaia 11:3, 4 kɔ doo, ena anua i sua leere kɔ Jizɔs ebiaɛ pya nɛɛ bu sīdee a bɔloo a? (Ɛp nage eko.)

⁴ Doodoo nɛɛ biaɛ loo Jɛhova esagɛ, mɔmanudɛɛ̄ Baibol tɔgɛ kɔ, Jizɔs gaa le biaɛ kaāna biaɛ. (Buū Aisaia 11:3, 4.) A ɛp leere, elap dogo pya nɛɛ, nu ba kɛɛrɛ, le pya nu ba kɔ gbaāloo kɛ̄ ba aara pya ye wuga alu etɔ̄ nɔɔ̄ bee doo. (Mat 12:36, 37; 25:40) Jizɔs gaa le suā loo pya nɛɛ a yerekpotɛ̄ Pya Nɛɛ Kraist alu etɔ̄ nɔɔ̄ bee le wa tam. a Ziī sīdee pya alu naana pee yerekpotɛ̄ Pya Nɛɛ Kraist alu etɔ̄ nɔɔ̄ bee na tɛ̄maloo eyerebah wa nɛ bu tam zue le yereue. Pya a wa yerebah nɛ elu ebiaɛ wa nua pya “kaāna dogo” eba e’ɛrɛ dee lo etɔɔ̄ “dum a naa wee tah” a nyɔɔ kɛnɛkɛ̄. (Mat 25:46; Mum 7:16, 17) Mɛ dua ekpɛanu a le nɛ pya atɔɔ̄ agara sɛh! Tɛ̄maloo ekiisī lo elu pya a bɔ ture nyiɛ loo bu gbɛnɛ etɛɛrɛloo le sɔ̄ gbɛnɛ etɛɛraloo etɛ̄na, ba doo kɔ wa bee a bia “bu kpa dum.”—Mum 20:15.

5. Ena i nɔ aāloo kam akiiloo naana pee le kunɛ pee a, e ba mɛɛ na e’ɛrɛ biī aaloo a?

⁵ Tɔɔ̄ agara sa kiisī lo e’ɛrɛ yira. Kam Jizɔs bee kɔ akiiloo naana pee le kunɛ pee kiiloo pya a ɛrɛ dee lo etɔɔ̄ dum a nyɔɔ kɛnɛkɛ̄. Ba tɔgɛ wa yira naale aba tɛ̄maloo yerekpotɛ̄ Pya Nɛɛ Kraist alu etɔ̄ nɔɔ̄ bee bu tam zue le yereue, mɛ ba sunage baɛbah suā leredee a aabah nwīgbagbara eku pya wuga Kraist lo Jizɔs esagɛ kɔ ba a zaāsī. (Mat 24:45) Mɛ alunage ebɛɛ̄ kɔ pya ba ɛrɛ bɛābu kii bunyɔɔ a su zuurabahtɔ̄ lo kam ama. Ena anua a? Nyɔnɛbee Jizɔs muɛ wa elap dogo, wa ekɛɛrɛ, le nu ba kɔ. Ba etɔgɛ nage kɔ ba lue pya a bɔ ture nyiɛ loo. Bu kaka, Jizɔs bee kɔ dɔɔ̄na baɛ kam a’aara zuurabahtɔ̄ nɛ pya alu etɔ̄ nɔɔ̄ bee. Kam ama lenage bu Kpa Matiu ye 25. Nyaawo, doraa i kɔnia nu akiiloo kam pya miɔŋɔ emua a suānu le pya miɔŋɔ emua a lu ezu.

MIƆŊƆ EMUĀ A SUĀNU LE PYA LO ALU EZU

6. Bu mɛ sīdee na o’oo pya emuā a tɔgɛ kɔ ba suāe nu a? (Matiu 25:6-10)

⁶ Bu kam akiiloo pya miɔŋɔ emua, Jizɔs bee kɔ nu akiiloo lop pya miɔŋɔ emua ba bee kii wee muɛ nɛɛ a e’ii wa. (Mat 25:1-4) Ba bee bɛābu kɔ ba enyɔɔnɛe nɛɛ a gaa ii wa a kii uwe doonu ii’ii wa. Jizɔs bee kɔ o’oo aba “suānu” e o’oo eluaa lu “ezu.” Pya nwiī emua a suānu bee kpɛ̄naloo sa tɔɔ̄ baɛ. Ba bee le ekpɛ̄naloo etɔɔ̄ baɛ nɛɛ ii wa kumakɛ̄ a lu ebɛɛ̄ doo, kereadoo alu taɛ pie edɛɛ̄. Nyɔɔwo, ba bee aara wa numiā lo e nɛ wa ɛɛdee bu edɛɛ̄. Sa aara nage nɔɔ̄ bu wa ekɔp lo adoo nɛɛ ii wa biɛ̄ dumɛ. Ba bee kpɛ̄naloo lo edoo kɔ wa numiā a kiisī lo ebɛ. (Buū Matiu 25:6-10.) Sɔ̄ nɛɛ ii wa a bee lu, pya lo miɔŋɔ emuā a suānu bee ye yɔ yii tɔ loo nuede ii’ii wa. Bu aba lo sīdee, Pya Nɛɛ Kraist alu etɔ̄ nɔɔ̄ bee lo ba etɔgɛ kɔ ba le ekpɛ̄naloo etɔɔ̄ baɛ sa tɔɔ̄ bu bɔ ture nyiɛ loo mmɛ sɔ̄ Jizɔs elu, elu ebiaɛ wa kɔ ba bɔloo egbaaloo nɛɛ ii wa, lo  a le Jizɔs, bu ye Buɛ̄-mɛnɛ bunyɔɔ. b (Mum 7:1-3) E o’oo pya emuā a naa suānu a?

7. Ena a bee sira loo o’oo emuā a lu ezu a, e ena anua a?

⁷ Bu kiiya si loo pya emuā a suānu, o’oo pya lo ezu a naa bee le kpɛ̄naloo sa tɔɔ̄ baɛ sɔ̄ nɛɛ ii wa lu. Wa numiā ebee sah ezim, e ba naa bee aara lɔgɔ ekɔp numiā gbaāloo wa. Sɔ̄ ba suā kɔ nɛɛ a gaa ii wa esah elu, ba bee kii wee yaɛ nɔɔ̄. Ba sii aa dee sɔ̄ nɛɛ ii wa a lu. Lo sɔ̄, “pya a bee le tɔɔ̄ baɛ yɔ ye yii tɔ lo nuede ii wa; e alu ekpaɛ̄ bū.” (Mat 25:10) Sɔ̄ esaa pya emuā a naa suānu a, bee lunage sa gbī eyii tɔ, nɛɛ ii wa a bee wa kɔ nɛ: “mm i suā loo.” (Mat 25:11, 12) Pya emuā a naa suānu ama naa bee kpɛ̄naloo sa tɔɔ̄ baɛ nɛɛ ii wa dookɛ̄ a bɔloo doo. Ena pya alu etɔ̄ nɔɔ̄ bee dap nɔ aāloo a?

8-9. Ena pya alu etɔ̄ nɔɔ̄ bee a nɔ aāloo kam akiiloo pya miɔŋɔ emuā a? (Ɛpnage foto.)

⁸ Tɔgɛ kɔ o le ekpɛ̄naloo sa tɔɔ̄ baɛ. Jizɔs naa gaa bee kɔ baɛ eku pya alu etɔ̄ nɔɔ̄ bee ele, pya ele ekpɛ̄naloo sa tɔɔ̄ baɛ mmɛ kuma lo sɔ̄ eku ama, le pya a naale edoo wo. Taāwo, a gaa bee kɔ nu akiiloo nu esira loo pya alu etɔ̄ nɔɔ̄ bee ba kiisī lo e’ɛrɛ yira sa egerebu mmɛ kuma. Lo ba naa kpɛ̄naloo, ba naale ɛrɛ wa ekpɛanu. (Jɔn 14:3, 4) Lo ama lu nu a kuī! Kereadoo i ɛrɛ bɛābu lo ekii bunyɔɔ ale lo etɔɔ̄ a kɛnɛkɛ̄, dɛ̄dɛɛ̄ ii ɛrɛ eseea zuurabahtɔ̄ kam pya miɔŋɔ emuā nyiɛ i. Ziī ziī ii ɛrɛ etɔɔ̄ baɛ sa kpɛ̄naloo, lokwa i dap egerebu mmɛ kuma.—Mat 24:13.

⁹ Sɔ̄ ekɔa kam akiiloo pya miɔŋɔ emuā a tɔgɛ kɔ alu ebɛɛ̄ kɔ ba a kpɛ̄naloo sa tɔɔ̄ baɛ sah, Jizɔs bee sikɛ̄ kɔ kam akiiloo talɛnt. Kam ama tɔgɛ kɔ alu ebɛɛ̄ kɔ i kiisī lo esiātam bu e’agabah.

 LO TALƐNT

10. Bu mɛ sīdee na baɛ lo zooro bee tɔgɛ kɔ ba bɔloo eture nyiɛ loo a? (Matiu 25:19-23)

¹⁰ Bu kam akiiloo talɛnt, Jizɔs bee kɔ nu akiiloo baɛ zooro lo ba bɔloo eture nyiɛ loo kiikɛ̄ nɛɛ-a-wa-ɛrɛ le, le lo dɔɔ̄na a naa bɔ loo eture nyiɛ loo. (Mat 25:14-18) Mɛ baɛ zooro bee tɔgɛ kɔ ba bɔloo eture nyiɛ loo tɛ̄maloo esu kpugi wa tɛ ɛrɛ bee wa nɛ uma du sa ɛrɛ biī nyɔɔ nɛ wa tɛ ɛrɛ. Lɛɛ a gae kii nyɔɔ kiā a binia, a bee su ye talɛnt, alu gbɛnɛ-edo kpugi wa nɛ. Baɛ pya lo zooro a bɔloo eture nyiɛ loo bee kiisī leere bu esiātam sa su lo kpugi daānu bu sīdee suānu le loo. Ena a sira aabu a? Sɔ̄ wa tɛ ɛrɛ lu, ba bee ɛrɛ baɛ sɔ̄ nyɔɔ lo kpugi. Wa tɛ ɛrɛ bee wa kaɛgɛ, eba bee “yii bu ɛɛbu nɛɛ-a-[wa] ɛrɛ.” (Buū Matiu 25:19-23.) Mɛ ena a bee sira lo eree taa zooro a? Ena a bee su kpugi ye tɛ ɛrɛ bee ye nɛ daā a?

11. Ena a bee siraloo zooro alu “pɔp” a, e ena anua a?

¹¹ Lo eree taa zooro a bee ɛrɛ ziī talɛnt a bee lu “pɔp.” Ye tɛ ɛrɛ bee gbī kɔ a su lo talɛnt daānu bu sīdee suānu le loo. Taāwo, a bee dɔɔra bana sa gɔ̄ bu. Sɔ̄ nɛɛ-a-ye-ɛrɛ bee lu, lo zooro bee ye nɛ aba lo ziī talɛnt. Lo zooro naa bee ɛrɛ le ekɛɛrɛ. Taā a bara ye tɛ ɛrɛ kɔ a aaloo ye nɛ, lo zooro bee ye kure “nɛɛ eagabah.” Ye dogo naa bee nia ye tɛ ɛrɛ. Gbaāloo wo, bee lu esu ye talɛnt ye lɛɛ bah sa ye kpo tɛrɛ kɛ̄ ee lɛɛ tɔ ye tɛ ɛrɛ.—Mat 25:24, 26-30.

12. Ba mɛɛ na baɛ zooro a bɔloo eture nyiɛ loo tɔɔ̄ dɔ aniī’ee a?

¹² Lo baɛ zooro a bɔ loo eture nyiɛ loo a, tɔɔ̄ dɔ Pya Nɛɛ Kraist alu etɔ̄ nɔɔ̄ bee ba bɔ ture nyiɛ loo. Nɛɛ-a-i-ɛrɛ, Jizɔs, bee wa kue kɔ ba a “yii bu ɛɛbu nɛɛ-a-[wa]-ɛrɛ.” Ba bee ɛrɛ wa ekpɛanu li bunyɔɔ, lo a le tua aakɛ̄ bu luh. (Mat 25:21, 23; Mum 20:5b) Bu lo dɔɔ̄na sīdee, zooro alu pɔp sa lu pɔrɔ  edobah a, lu zuurabahtɔ̄ nɛ pya alu etɔ̄ nɔɔ̄ bee. Bu mɛ sīdee ni?

13-14. Ena pya alu etɔ̄ nɔɔ̄ bee dap nɔ aāloo kam talɛnt a? (Ɛpnage foto.)

¹³ Tɔgɛ kɔ o lu nɛɛ a wee sueloo kɛ̄ sa sitam bu e’agabah. Bu kam talɛnt, le kam akiiloo pya miɔŋɔ emuā a, Jizɔs naa gaa bee kɔ pya alu etɔ̄ nɔɔ̄ bee elu pɔp. Taāwo, aa bee baatɛ̄ nu esira wa loo lo ba peere wa mɛm. Ba epeere “[wa] kue le tubebahloo,” sa a naale lu elɛɛ wa bahloo kɔ ba a yii bu Buɛ-mɛnɛ bunyɔɔ.—2 Pit 1:10.

¹⁴ Kam Jizɔs akiiloo pya miɔŋɔ emuā le talɛnt a doo kɔ i suā kɔ dɛ̄dɛɛ̄ Pya Nɛɛ Kraist alu etɔ̄ nɔɔ̄ bee ɛrɛ ekpɛ̄naloo sa tɔɔ̄ baɛ, sa kiinagesī lo esueloo kɛ̄ sa sitam bu e’agabah. Ekɔ Jizɔs bee kɔge ziī ue alu zuurabahtɔ̄ nɛ pya alu etɔ̄ nɔɔ̄ bee ni? Aiī, a bee kɔ! I dap gbī lo zuurabahtɔ̄ ama muɛ bu ue Jizɔs bee kɔ bu Kpa Matiu 24:40, 41.

BA MƐƐ NA “ELU ESU”A?

15-16. Bu mɛ sīdee na kpa Matiu 24:40, 41 baatɛ̄ kɛ̄ alu ebɛɛ̄ doo kɔ Pya Nɛɛ Kraist alu etɔ̄ nɔɔ̄ bee a tɔɔ̄ baɛ a?

¹⁵ Lɛɛ Jizɔs gae kɔ taa kam ama, a bee baatɛ̄ nu akiiloo kpɛdumɛ biaɛ lo Pya Nɛɛ Kraist alu etɔ̄ nɔɔ̄ bee lo etɔgɛ pya e lu esu. A bee kɔ nu akiiloo baɛ nɛɛ ele wii le baɛ wa a gaa gbɛ̄nu nyɔɔ dɛm. Bu ziī ziī kɛ̄tɔɔ̄ ama, bee kɔ baɛ aba gaa si aba tam, mɛ Jizɔs kɔ elu “esu ziī aba e ziī aba lu e’aaloo.” (Buū Matiu 24:40, 41.) A sikɛ̄ yere mɛm loo pya a wee ye nyɔɔnɛ dumɛ kɔ: “Tɔɔ̄naa baɛ, nyɔnɛbee buii suā dee Nɛɛ-a-i-ɛrɛ elu.” (Mat 24:42) Jizɔs bee kɔ nu a bee lo ama sɔ̄ a ekɔa kam akiiloo miɔŋɔ emuā sah. (Mat 25:13) Pya ue ama beege ziī ni? A bee doo wo. Aba kaka Pya alu etɔ̄ nɔɔ̄ bee a tɔɔ̄ agara na “elu esu,” tɛ̄mabah Jizɔs nyima Buɛ̄-mɛnɛ bunyɔɔ a.—Jɔn 14:3.

¹⁶ Tɔgɛ kɔ o le etɔɔ̄ baɛ. Ɛrɛgebah Nɛɛ Kraist alu etɔ̄ nɔɔ̄ bee a naa tɔɔ̄ baɛ naale elu ebɔŋɛnɛ ye loo gbaāloo “pya alɛ.” (Mat 24:31) Gbaāloo wo, kuranage kɔ dɛ̄dɛɛ̄ pya a ɛrɛ bɛābu lo etɔɔ̄dum a nyɔɔ kɛnɛkɛ̄ a tɔɔ̄ baɛ sa lu pya a bɔ loo eture nyiɛ loo.

17. Ena anua ii le enɛ taāŋa loo i kɔ Jɛhova sagɛ lo etɔ̄ nɔɔ̄ bee pya nɛɛ bu ili sɔ̄ ama a?

¹⁷ I esuāloo Jɛhova leere, nyɔɔwo i dɛrɛ nyiɛ nyɔɔ kɔ dɛ̄dɛɛ̄ ye biaɛ lu lo a kaāna. Ii nɛ taāŋa loo i kɔ Jɛhova sagɛ pio pya alu etɔ̄ nɔɔ̄ bee bu ilii sɔ̄ ama. c I nyɛŋiabu loo kam Jizɔs bee kɔ akiiloo pya a bee lu ekue loo tam sɔ̄ elua 11 awa. (Mat 20:1-16) Pya a bee lu ekue kɔ ba a sitam bu kpɛdumɛ bee nyɔɔnɛ pya a bee bagara si ɛrɛ kunakuna kpugi. Bu aba lo sīdee, kaɛlɛɛ sɔ̄ alu esagɛ pya alu etɔ̄ nɔɔ̄ bee, ba gaa le ɛrɛ wa ekpɛanu li bunyɔɔ lo a le ba kiisī lo elu pya a tɔɔ̄ bu bɔ ture nyiɛ loo.

NYƆƆNƐ LO ZUURABAHTƆ̄

18-19. Ena i nɔ aāloo kam ama a?

¹⁸ Ena i ekɔ a? Kam akiiloo naana pee le kunɛ pee baatɛ̄ kɛ̄ alu ebɛɛ̄ doo, kɔ pya a ɛrɛ bɛābu lo etɔɔ̄ a nyɔɔ kɛnɛkɛ̄ a kiisī lo e bɔ ture nyiɛ loo sa tɔɔ̄ agara nɛ Jɛhova anyaawo le bu sɔ̄ gbɛnɛ etɛɛrɛloo. Deesī li, Jizɔs ebiaɛ pya atɔɔ̄ agara kɔ ba “eyii bu dum a naa wee tah.”—Mat 25:46.

 ¹⁹ I bee kɔnage nu akiiloo baɛ kam a nɛ zuurabahtɔ̄ pya a bee lu etɔ̄ nɔɔ̄ bee. Bu kam Jizɔs bee kɔ akiiloo pya miɔŋɔ emuā a suānu le pya lo alu ezu, o’oo aba bee tɔgɛ kɔ ba suāe nu. Ba bee kpɛ̄naloo sa tɔɔ̄ baɛ, nɛɛ a e ii wa dookɛ̄ alu ebɛɛ̄ doo. Mɛ pya lo ezu a naa bee kpɛ̄naloo. Nyɔɔwo lo nɛɛ ii wa naa bee yiga kɔ ba a yii lo doo doo nu ii’ii wa. Alunage ebɛɛ̄ kɔ ili i kpɛ̄naloo baɛ ɛrɛgebah sɔ̄ Jizɔs esu kuma mmɛ loo lo sɔ̄ eku ama kaɛlɛɛ kɛ̄ a biɛ̄ dee doo. Gbaāloo wo, bu kam Jizɔs akiiloo talɛnt a, i bee kɔ nu akiiloo baɛ zooro a bɔ loo eture nyiɛ loo lo ba bee sueloo kɛ̄ sa sitam bu e’agabah. Ba bee si e’agatam nyɔɔbee wa tɛ-ɛrɛ, e a bee wa su baɛ bah suā. Kerewo, a bee lu ekiī lo zooro alu pɔp a. Ena i nɔ aāloo a? I ɛrɛ ekiisī bu esiatam Jɛhova mmɛ kuma. Bu kpɛdumɛ, i bee kɔ nu anua alu ebɛɛ̄ kɔ pya alu etɔ̄ nɔɔ̄ bee a tɔɔ̄ baɛ lokwa alu “esu” wa kuma bunyɔɔ tɛ̄mabah Jizɔs. Pya nɛɛ ama ɛrɛ gbɛnɛ bɛābu kɔ deesī li ba e “gbaa bɔŋanaloo” sa gbaaloo Jizɔs li bunyɔɔ. Sɔ̄ nɔ Armagidɔn edɔa sah, ba gaa le lu wa Kraist bu doo doo nu ii’ii wa Nwī naana pee.—2 Tɛs 2:1; Mum 19:9.

20. Ena Jɛhova gaa le doo nɛ pya a su ye zuurabahtɔ̄ a?

²⁰ Kuma sɔ̄ dee Jizɔs ebiaɛ gaa tɔɔ̄ waɛloo kɛ̄ a, a naa lu ebɛɛ̄ kɔ i ɛrɛ bɔɔ. Lo i kiisī lo elu pya a bɔ ture nyiɛ loo, i wereloo Tɛ a le li bunyɔɔ gaa le nɛ i “eenyɔɔ ekpo” lokwa i “dap kiisi leere lo eyira . . . kɛ̄sī Nwī nɛɛ.” (2 Kɔr 4:7; Luk 21:36) Kere i ɛrɛ bɛābu lo etɔɔ̄dum li bunyɔɔ ale nyɔɔ kɛnɛkɛ̄, i doo kɔ bu Jɛhova a ɛɛ lo i gbaɛ̄tɔ̄loo zuurabahtɔ̄ Jizɔs kɔ bu pya kam ama. Tɛ̄maloo ewonu Jɛhova, i bee elu “egbī muɛ bu kpa” dum.—Dan 12:1; Mum 3:5.