M bee mɛa bu zua 1934 na tɛ le na ka lu Switzerland e i bee tɔɔ̄ Timmins, kɛ̄ a wee lu esu Gold aā li barasī Ontario, li Canada. Dee bu zua 1939, na ka bee bɔātɛ̄ ebuū magazin akura Watchtower sa si enɔānu Pya Ekeebee Jɛhova. A bee aara mda le ini’iī pya na wuga. Sɔ̄ naa bee binia a bee lu ziī yɛɛ Pya Ekeebee Jɛhova.

Bu na tɛ naa bee ɛɛ loo ye taāŋabah, mɛ na ka bee wereloo kaka ue sa biaɛfii lo ekiisī bu ye taāŋabah. A bee kiisī lo edoo wo kere bu pya zua 1940 sɔ̄ a bee lu ekpaɛ̄ tam Pya Ekeebee Jɛhova li Canada. A wee lu fɛgɛ sa nwadɛɛ̄ i tɛ, kaɛlɛɛ pɔrɔ pɔrɔ ue a wee ye kɔ kumaloo. Ye le edobah bee mɛ yerebah nɛ le pya na wuga kɔ i sunage kaka. Ɛɛrɛ mɛ bu kɔ, nyiɛ i tɛ bee kiikɛ̄ e a bee bɔātɛ̄ e’aara i butɔ bu fɛgɛ.

M bee si Theocracy’s Increase Asɛmbli bu zua 1950 li New York City. Sɔ̄ m bee zɔŋia pya wuga nɛɛdam le nɛɛwa ba aabu yube nyɔuwe sa dā ue a lu ebip aānu pya esia tɔkpa Gilead, bee mɛ yere mɛm loo kɔ m nyimɛ na esiatam nɛ Jɛhova yereloo! M bee agɛrɛbah biaɛfii lo eyii bu tam mmɛɛ sɔ̄. Aba sɔ̄ m ina be, m bee yere bee loo tam sɛmdee mmɛɛ sɔ̄. Tɔ naatam li Canada bee obara kpa mɛ ma kɔ m dasī liamaā. M bee liamaā 1 biradee bu Lop Enɔɔ̄ 1950. Sɔ̄ ziī enɔɔ̄ etɛ̄na, m bee lu nɛɛ sɛmdee mmɛɛ sɔ̄, tua kɛ̄ a bee lu eyere mɛ ture na Kapuskasing. Buɛ ama binia aāloo kɛ̄ m wee tɔɔ̄ lo sɔ̄.

Bu zua 1951, tɔ naatam bee gbī pya ekii Quebec barasī ba kɔ French wee sitam. Ebɛɛ̄ a le lo kɛ̄ bee lu gbɛnɛ. Sɔ̄ m  bee le nwiī m bee nɔ French le Beke, m bee kɔ m sie e a bee lu eyere mɛ ture Rouyn. Mm bee suāloo lɔgɔ nɛɛ lo kɛ̄. Aba nu a bee mɛ le bah na kpa ba bee ɛm kɛ̄ m gaa kii bu dookɛ̄ m bee kɔ doo tua sɔ̄. Mɛ nu bee sikɛ̄ kiā leere. Marcel le mm bee lu le gbo, e a bee mɛ kpeloo esitam li Quebec bu nia zua a sikɛ̄ nyɔɔnɛ, doodoo nɛɛ sɛmdee bu keebee sīdee.

Sɔ̄ m bee le Quebec, bu mɛ bee ɛɛ sɔ̄ a bee lu ekue mɛ kɔ m le yɛɛ lo eree 26 tɔkpa Gilead li South Lansing, New York. M bee tɛɛ̄ aā lo tɔkpa nyɔɔ 12 biradee bu Baɛ Enɔɔ̄ 1956, e a bee lu eyere mɛ ture edo alu ekure Ghana , b anyaawo li barasī West Africa. Mɛ lɛɛ m gae kii li m bee obia kii Canada “bu pio kaɛ” mmɛ sɔ̄ elua e kwa kpa edoo kɔ m dap kii lo edo.

M bee tɔɔ̄ baɛ loo Ɛrɛba Enɔɔ̄ li Toronto lɛɛ m gae ɛrɛ lo kpa. Bu sɔ̄ ama, pya butɔ Cripps bee lu fɛgɛ mɛ loo sa m tɔɔ̄ wa tɔ, sɔ̄ ama na m bee suāloo wa nwiīnɛɛwa a kura Sheila. E bu i bee ɛɛ loo ziī. Sɔ̄ m ebee sa e’ii ye, kpa m kuma lo edo bee lu. Sheila le mm bee yere kara biaɛfii kɔ m kiige wee si na tam. Mɛ i wee le gaa kɔnia ue nɛ ziī sa ɛp sɔ̄ edap waɛ kɔ i i’ya ziī. Biaɛfii ama naa bee waɛ e, kerewo kɛ̄ nu mɛa doo i muɛ kɔ a bee lee.

Sɔ̄ m etɔɔ̄na nyɔɔ dee loo enɔɔ̄ bu train, bu fah maā, le fah bunyɔɔ, m bee ina Accra li Ghana. Bee lu etubo mɛ bahloo nua nɛɛ kuūdɛɛ̄loo district. Lo ama wee doo kɔ m kiā yube barasī Ghana le pya edo a ye waɛ kpaɛ̄ doodoo, Ivory Coast (lo akura Côte d’Ivoire anyaawo) le Togoland (akura Togo anyaawo). Gbɛnɛkpo sɔ̄, aba mm wee aara fah tɔ naatam siā kiā. A wee mɛ nia gbɛnɛ lo e ina loo pya wuga!

Ye tah kaɛ m wee nɛ ekɔaue, bu sɛkiut asɛmbli. Ii wee ɛrɛ Asɛmbli Hall. Nyɔɔwo,  pya wuga wee su mii-mɔŋɔ-beke toma loo sa su lah zoo uu nyɔɔ loo zue. Nyɔɔbee ii bee ɛrɛ nu edoo kɔ nu aa gbe bie kɛ̄ i bui nu a, wee lu esere nam a le dum kɛ̄ sɔ̄ alu ebɛɛ̄ lokwa pya a si dap ba.

I wee ɛrɛ pio nu a i kpeloo bie lo asɛmbli. Ɛrɛ dee ziī nɛɛ le mm gaa bee zue ue dɔɔ̄na edo akura, Herb Jennings, c gaa bee nɛ ekɔaue, nama a bee le kɛ̄ bui nu bee teera sa gbī ekii. A bee fia tɛɛ̄ deesī nɛɛ a gaa nɛ ekɔaue le pya a le kɛ̄. Wuga Herb bee ɔbɛ e nɛ ye ekɔaue e lo nama bee kwɔɔga. Mɛ nia pya wuga nɛɛdam ekpo le loo bee piiga loe aa ye kuma kɛ̄ bui nu, e dɛ̄dɛɛ̄ pya a le kɛ̄ bee kɔma.

Bu kaɛ i ɛrɛ asɛmbli m wee tɔgɛ fim akura, The New World Society in Action bu pya buɛ̄ a waɛloo kɛ̄. Lo etɔgɛ lo fim, m wee bɔb eba ɛɛ bɛ loo baɛ te ale bɔb loo baɛ te m sip yah. Wee nia pya lo buɛ̄ esi-ee gbɛnɛ! Gbɛnɛkpo aba sii wee sī-ee fim. Ba bee kpa bah gbɛnɛ sɔ̄ ba muɛ pya a gaa liamaā. Fim ama bee yerebah nɛ pya a si-ee kɔ ba a suā kɔ i lu bɔŋanaloo a gbaaloo ziī bu yube nyɔuwe.

Sɔ̄ m etɔna barasī Africa lo baɛ zua, a bee kpeloo lo esi international convention li New York City a bu zua 1958. Bu mɛ bee ɛɛ gbɛnɛ lo e muɛ Sheila, lo a bee aa Quebec si, kɛ̄ a gaa bee sitam sɛmdee alu keebee. I wee le aa ɛm lɛta ma ziī, mɛ nyaawo i esiakɛ̄ mɔna sī le sī. M bee ye kɔ nɛ kɔ m ii e ye, e a bee yiga. M bee ɛm lɛta ma Wuga Knorr d lo a le Sheila dapge si tɔ kpa Gilead lɛɛ a gbaa mɛ loo li Africa. A bee yiga. Bu ye kpɛdumɛ, Sheila bee lu Ghana. I bee iya ziī bie Accra, 3 biradee bu Lop Enɔɔ̄, 1959. I bee muɛ kɔ bu kaka Jɛhova nɛ i leelee nyɔɔbee i su ye nua tuatua bu i dum.

Bee lu eyere i ture edo akura Cameroon a bu zua 1961. I bee lu kirikiri bu esiatam nyɔnɛbee a bee lu ekɔ i yerebah lo edoo kɔ tɔ naatam a bɔātɛ̄. Lu nɛɛ a kuūdɛɛ̄loo aā tɔ naatam, m bee ɛrɛ gbɛnɛ-edo nu enɔ. Sɔ̄ esaa a bu zua 1965 i muɛ kɔ bu eyiraloo na wa Sheila. A naa bee waɛ sɔ̄ i suā kɔ i gaa  le ɛrɛ nwiī. Mɛ sɔ̄ i ebee su warɛ sa kpɛ̄naloo etoora aā to ama, sa nɔɔ lo e’obia kii Canada ziī gbɛnɛ pɔrɔ nu bee i siraloo.

Bu bee aaloo Sheila. Dɔktɔ bee i kɔ nɛ kɔ lo nwiī bee le nwiīnɛɛdam. Nu ama bee sira nu a eeloo 50 zua akii adumɛ a, mɛ a sii i ibere. Kereadoo nu a sira ama bee i kiɛ̄ gbɛnɛ, i bee kiisī lo esitam a i nia gbɛnɛ ama bie dɔɔ̄na edo.

Pya wuga li Cameroon bee kpesī tɛ̄ŋaloo nyɔɔbee ba naa yere bee bu bira bɛbɛɛ. Kɛ̄tɔɔ̄ ama bee agɛrɛbah aga taɛ sɔ̄ aa bee lu etɛrɛ kpa nɛ nɛɛ ebɛɛ lo edo. E gbɛnɛ bɔɔ bee le sɔ̄ a bee lu ekpaɛ̄ tam pya ekeebee Jɛhova nyɔɔ 13 biradee bu O’oo Enɔɔ̄ bu zua 1970. I ekpedɛɛ̄ aā tɔ naatam i e tɔɔ̄na bu aba o’oo enɔɔ̄ bee lu ekpaɛ̄ tɛ̄mabah pya bɛbɛɛ. Bu nu aluge aba ziī kaɛ, dɛ̄dɛɛ̄ pya a aa dɔɔ̄na edo lo aa bee zue ue gbaāloo mda le Sheila bee lu ekɔ i aa Cameroon. A bee i zɔrabah lo e’aaloo pya wuga nɛɛdam le nɛɛwa bie dumɛ nyɔnɛbee i were wa loo gbɛnɛ sa kɛɛrɛ nu esira wa loo sɔ̄ esaa.

Sɔ̄ i aa Cameroon i bee tɔɔ̄ tɔ naatam a le France lo Ini’ii Enɔɔ̄. Sɔ̄ m le France m bee kiisī lo edoo dɛ̄dɛɛ̄ nu m dap lo eyerebah nɛ pya wuga li Cameroon. Lop le baɛ Enɔɔ̄ bu lo zuā a, bee lu eyere i ture tɔ naatam a le Nigeria lo a bee bɔātɛ̄ ekuūdɛɛ̄loo tam li Cameroon. Pya wuga a le Nigeria bee i su baɛbah suā, e i bee su ɛɛbu siātam lo kɛ̄ bu gbɛnɛkpo zua.

I bee doo ziī e’agabah biaɛfii a bu zua 1973. Nu bee dumɛ Sheila gbɛnɛ. Sɔ̄ i bee le kɔnvɛnsion li New York, a bee to sa mɛ kɔ nɛ kɔ: “mm le edap na kiisī bu esiatam ama! Nu dumɛ mɛ sa loo mɛ ɔ gbɛnɛkpo sɔ̄.” A gaa bee mɛ nyɔɔnɛ siniatam bie West Africa lo 14 zua. A bee mɛ nia gbɛnɛ kɛ̄ a bee sitam bu bɔ ture nyiɛ loo doo, mɛ a bɔloo kɔ i kwabahloo i kɛ̄tɔɔ̄. Sɔ̄ i ekɔnia ue nyɔɔ i kɛ̄tɔɔ̄ sa su nyɔɔnyɔɔ sɔ̄ yea kara nyɔɔ, i bee biaɛfii lo e’ɔbia kii Canada. Lokwa i dap kuūdɛɛ̄loo ye dumɛloo. Aabu i esiatam dɔɔ̄na edo le bu esiatam mmɛɛ sɔ̄ bee lu e’agabah biaɛfii i edoora.

Sɔ̄ m bee ina Canada, m bee nyɔɔnɛ ziī na nama gbo doo gbora a kiiloo fah ziī buɛ a le mmnyɔɔ lo Toronto. M bee bara tɔ, yaɛ nama nu daānu butɔ, sa bee dap tɔɔ̄ lo kɛ̄ sa mm bɔgara kpugi. I bee gbī etɔɔ̄dum a waɛbah, sa ɛmadɛɛ̄ kɔ ziī dee a ee i dap obia yii bu tam mmɛɛ sɔ̄. Mɛ a bee i lu nyieŋia loo kɔ nu i bee emadɛɛ̄ a bee nwaabah doo wa ee kɛ̄ i bee emadɛɛ̄ doo.

M bee bɔātɛ̄ esu loo nɛ dɛ̄dɛɛ̄ dee nwī pīnikaɛ lo esitam kɛ̄ a gaa lu e wu aā Asɛmbli Hall li Norval, Ontario. Sɔ̄ esaa, a bee lu esu mɛ nua nɛɛ a kuudɛɛ̄loo lo Assɛmbli Hall. Dumɛ loo Sheila bee kiikɛ̄ sa i kɛɛrɛ kɔ i dap e sietam ama. Nyɔɔwo i bee kii bu tɔ a le Asɛmbli Hall bu Ini’ii Enɔɔ̄ 1974. Bu i bee ɛɛ gbɛnɛ; lo esikɛ̄ obia yii bu tam mmɛɛ sɔ̄!

 Bu i ɛɛ kɔ dumɛloo Sheila bee kiisī lo ekiikɛ̄. Sɔ̄ baɛ zua etɛna i bee dap yii bu tam kuūdɛɛ̄loo sekuit. Lo sɛkuit bee le Manitoba, li Canada kɛ̄ gbɛnɛ tɔɔ wee le. Kerewo, kɛ̄ pya wuga nɛɛdan le nɛɛwa ba le lo kɛ̄ bee i wereloo doo bee i nia gbɛnɛ. I e mɔna kɔ kɛ̄ i gaa sitam naa lu gbɛnɛ, mɛ nu a lu gbɛnɛ na kɔ i kiisī lo esitam nɛ Jɛhova ɛrɛgebah kɛ̄ i le.

Sɔ̄ i esua gbɛnɛkpo zua siātam sɛkuit sah, a bee lu ekue i kɔ i sitam tɔ naatam Canada a bu zua 1978. Sɔ̄ naa bee binia aā lo sɔ̄, a ɛrɛ nu m bee nɔ bu ezialoo. A bee lu enɛ mɛ ziī ekɔaue bu French a su ziī awa le siga bie Montreal. Lu nu ekiɛ̄nu kɔ pya a bee le kɛ̄ naa bee ɛrɛ nia bu na ekɔaue, e ziī wuga a aa Service Department bee mɛ zuurabahtɔ̄ kumaloo. Bu kaka, e bee lee kɔ m suā lo sɔ̄ dookɛ̄ m e mɔna doo, kɔ mm bee para nɛ ekɔaue gbɛnɛ. Mɛ mm bee su lo zuurabahtɔ̄ leere. Ue i bee kɔnia naa bee kiā leere. Bu mɛ bee biira kɔ a agabah a naa kɔ mɛ nɛ kɛ̄ m doo leere. M bee tɛɛ̄ ekwɔ lo e’ɛp lo zuurabahtɔ̄ aāloo kɛ̄ alu enɛ doo le dua nɛɛ m kɛɛrɛ kɔ nɛɛ a mɛ nɛ lo zuurabahtɔ̄ lu.

Sɔ̄ pio dee etɛna, ziī nɛɛ a le yɛɛ kɔmitii a kuūdɛɛ̄loo tɔ naatam bee kɔ ue nyɔɔ ue ama mɛ nɛ. M bee ye kɔ nɛ kɔ a kiɛ̄mɛ kɔ mm bee sue lo zuurabahtɔ̄. Lɛɛ m sikɛ̄ nyɔɔnɛ lo wuga a bee mɛ nɛ zuurabahtɔ̄ a kɔnia ue. A bee mɛ aaloo nɛ bu fɛgɛ. Nu a bee mɛ siraloo ama tɔgɛ kɔ m kumaloo kɛ̄, lo mm le e ibere. (Kam 16:18) M eyere kara nyɔɔ ue ama gbɛnɛkpo sɔ̄ nɛ Jɛhova, sa biaɛfii kɔ mm le e’ɛp na zuurabahtɔ̄ bu piya sīdee.

Nyaawo, m esiatam tɔ naatam li Canada lo 40 zua, e m gaa sitam yɛɛ kɔmitii a kuudɛɛ̄loo lo tɔ-naa-tam aā bu zua 1985. Na wa Sheila m bee wereloo gbɛnɛ bee dɔ bu daa luh bu Baɛ Enɔɔ̄ 2021 a. Kaɛlɛɛ kɔ m e peere ye, lo mda gaa dumɛnage anyaawo. Mɛ esiatam Jɛhova doo kɔ m lu kirikiri sa le bu ɛɛbu, elo ama doo kɔ m aa “enyɛŋiabu loo dɛ̄dɛɛ̄ dee” na dum gbɛnɛ. (Eklis 5:20) Kere m ekpeasī gbɛnɛ-edo taāŋa, ɛɛbu m ɛrɛ eenyɔɔ pya lo taāŋa. Su Jɛhova nua tuatua bu na dum sa ye sitam nɛ bu 70 zua dɔbiī mɛ nɛ gbɛnɛ. M gaa yere kara kɔ pya i zege wuga nɛɛdam le nɛɛwa akiinagesī lo esu Jɛhova nua tuatua. Nyɔɔbee m suā leere kɔ aba sitam nɛ Jɛhova na edoo kɔ wa tɔɔ̄dum a dɔbiī sa kpeloo a.