1-2. Dookɛ̄ 1 Timɔti 6:20 kɔ doo, e na a bee lu enɛ Timoti a?

I WEE su nu a i kuī loo kpooge bah pya dɔɔ̄na. Bu edoba, i wee sere kpugi tɔ kpooge kpugi. Sɔ̄ i doo wo, i ɛmadɛɛ̄ kɔ i kpugi elu ekpoogeloo leere sa naa pe ale bee elu eyib. Nyɔɔwo, i suā nu a kura su nu a i kuī loo kpooge bah dɔɔ̄na nɛɛ.

² Buū 1 Timɔti 6:20. Nɛɛ lɛɛratam Pɔɔl bee nyɛŋiabu Timoti kɔ alu esu nu a kuī ye yere kɛ̄bah, lo a le kaka suānu akiiloo nu alu ekɛɛrɛ Bari kumaloo pya nɛɛ. Bee lunage enɛ tam “zue ue” Timoti, le kɔ a “si tam nɛɛ zue le yereue.” (2 Tim 4:2, 5) Pɔɔl bee kɔ nɛ Timoti kɔ a ɛp nu a bee lu eyere ye kɛ̄bah. Doodoo Timoti, lunage esu pya nu a kuī i yere kɛ̄bah. Pya lo nu na e? E e na anua i baɛloo pya zɔ Jɛhova eyere i kɛ̄bah a?

3-4. Pio e na anua kaka ue Baibol kuī a?

³ Jɛhova enɛā i kaāna suānu akiiloo pya kaka ue a le bu ye Muɛ̄ Ue, lo a le Baibol. Pya kaka ue ama kuī nyɔnɛbee a tɔgɛ kɛ̄ e’ɛrɛ le gbanialoo kumaloo Jɛhova doo sa baa nagetɛ̄ nu a i dap nɛ kaāna ɛɛbu bu dum. Yiga pya lo kaka ue sa su yere bu i dum edoo kɔ i lu puɛ aaloo ekwɔ tɔgɛnu le dogo a naa ɛɛ.—1 Kɔr 6:9-11.

⁴ Dɔɔ̄na nu anua kaka ue a le bu Muɛ̄ Ue Bari kuī nage na kɔ Jɛhova muuna wa nɛ aba pya a kumalookɛ̄ a bee “lu esere loo dum a naa tah.” (Doonu pya Nɛɛ lɛɛratam 13:48) Pya nɛɛ ama yira kɔ zooro a bɔloo eture nyiɛ loo sa suānu na a gaa i tɔgɛ nu anii’ee a. (Mat 11:25; 24:45)  Ii le edap nɔ kaka ue ama nyɔɔ i loo, e lɔgɔ dɔɔ̄na nu a kuī ee kaka ama naa le.—Kam 3:13, 15.

5. Dɔɔ̄na amunu tam na Jɛhova i nɛnage a?

⁵ Jɛhova enɛa nage i tam lo etɔgɛ kaka a ye kiiloo le ye ekɛɛrɛ pya dɔɔ̄na. (Mat 24:14) Yereue i zue kuī kaāna nyɔnɛbee a yerebah nɛ pya nɛɛ a nuūna butɔ Jɛhova sa doo kɔ dee a kpaā wa nɛ lo e’ɛrɛ dum a naa tah. (1 Tim 4:16) Kere kɛ̄ i ɛrɛ epoo bu esiatam zue ue doo tera ale a kuī, i gaa yerekpotɛ̄ tam a kuī a gaa lu esi anyaawo. (1 Tim 2:3, 4) Naa ɛp kɛ̄ alu nu ka lo enyɔɔnɛ Bari siniatam doo a!—1 Kɔr 3:9.

6. E na a bee sira loo pio pya a naa bee baɛloo nu a bee lu enɛ wa a?

⁶ Pio pya a bee le bu dee Timoti naa bee tɔgɛ nia loo dee a bee wa kpaā nɛ lo elu pya a gaa nyɔɔnɛ Bari siniatam. Nyɔnɛbee Dimas bee wereloo nyɔuwe a bee lɛɛbaloo dee a bee ye kpaā nɛ lo egbaaloo Pɔɔl bu esiatam. (2 Tim 4:10) Faɛgilɔs le Hamɔgɛnis bee teera bie wa esiatam zue ue nyɔnɛbee ba bee ɛrɛ bɔɔ kɔ ba etɛ̄ŋae wa loo doodoo Pɔɔl. (2 Tim 1:15) Haimɛniɔs, Aleksanda, le Filitɔs bee ana yira sa ɔbɛ etaāŋabah Jɛhova. (1 Tim 1:19, 20; 2 Tim 2:16-18) Alu kaka kɔ dɛ̄dɛɛ̄ pya alu ekue bee ama lu pya a bee agaloo sa le bu kaka tua sɔ̄, mɛ ba bee ɔbɛ etɔgɛ nia loo nu a kuī.

7. Amunu kiaŋana na Setan i su daŋa a?

⁷ Bu mɛ sīdee na Setan gbī edoo kɔ i lɛɛbaloo pya zɔ Jɛhova enɛā i a? Ɛp pio kiaŋana Setan ama. A su sīdee ɛrɛ ekpeloo le nu si ee nyimɛ taɛ, ekɛɛrɛ le dogo a ɛmadɛɛ̄ kɔ edoo kɔ i lɛɛbaloo kaka ue. A gbī ebiinɛ i nɛ kɛ̄ tɛ̄maloo pya i gbo le kɔ alu etɛ̄ŋa i loo lokwa i ɔbɛ esi uwe zue ue. A gbī nage ezū i kɔ i gbaɛ̄tɔ̄loo “suānu bu kɔ esah” a aabah pya anna yira lokwa i lɛɛbaloo kaka ue.—1 Tim 6:20, 21.

8. E na o nɔ aāloo nu a bee sira loo wuga nɛɛdam a kura Daniel a?

⁸ Lo ii nwaɛ̄dɛɛ̄, i dap dɔ aaloo kaka kinakina. Naa kɛɛrɛ edoba Daniel * a wee wereloo ebira vidio game. A bee kɔ: “M bee bɔātɛ̄ ebira vidio game aā sɔ̄ m ebee dap lu lop zua. Tua sɔ̄ m wee bira pya game a naa aadee bee piya. Mɛ sɔ̄ sɔ̄ gaa kiisī, m bee bɔātɛ̄ ebira pya lo ba doo dogo lumiī sa doo yɔ bu.” Wo bee doo kɔ a wee su nu alu 15 awa biā vidio game bu ziī biradee. Daniel bee kɔ: “Alu kaka kɔ m bee muɛ̄ kɔ pya game  m gaa bee bira le buā sɔ̄ m wa su biā gaa bee mɛ kpoora lɛɛloo Jɛhova. Kerewo, na beenyiɛ ebee aga mmɛ kɛ̄ mm bee yiga na edoo pya nu Baibol kɔ.” Nyɔɔwo, lo ii nwaɛ̄dɛɛ̄ ɛrɛ ekpeloo dap doo kɔ i lɛɛbaloo kaka ue. Lo a sira doo wo, a dap doo kɔ i lɛɛbaloo pya nu a kuī Jɛhova ebee i nɛ.

9. Dookɛ̄ 1 Timɔti 1:18, 19 kɔ doo, mɛɛ̄ na Pɔɔl bee su Timɔti dooreloo a?

⁹ Buū 1 Timɔti 1:18, 19. Pɔɔl bee su Timoti dooreloo nɛɛ nɔ̄, e a bee ye zū kɔ a kiisī lo ebe “lo le nɔ̄.” Lo be naale lo sī le sī, mɛ be bu edɔɔ̄. Bu mɛ sīdee na pya Nɛɛ Kraist le doodoo nɛɛ nɔ̄ a le uwe nɔ̄ a? Amunu dogo na a bɔloo kɔ i ɛrɛ doodoo pya gbo nɔ̄ Kraist a? Doo i naa kɛɛrɛbu o’oo nu i dap nɔ aāloo edoba Pɔɔl. Pya nu enɔ ama dap i yerebah nɛ kɔ i biibaloo kaka ue.

10. E na ɛrɛ elap dogo Bari kura a, e e na anua alu ebɛɛ̄ a?

¹⁰ Ɛrɛ pya elap dogo Bari. Le nɛɛ nɔ̄ wee tɔɔ̄ agara. A wee bebe bu e’agabah lo ekpega nɛɛ a wereloo ale nu a ye kuī loo. Pɔɔl bee kɔ nɛ Timoti kɔ a ɛrɛ pya elap dogo Bari, lo a le tɔɔ̄ agara le tɔɔ̄ waɛloo Bari. (1 Tim 4:7) Kɛ̄ wereloo i ɛrɛ loo Bari toga doo, kɛ̄ i gbī nage e biibaloo kaka ue doolo.—1 Tim 4:8-10; 6:6.

11. E na anua alu ebɛɛ̄ kɔ i ɛrɛ elap dogo su loo nɛ a?

¹¹ Ɛrɛ elap dogo su loo nɛ. Nɛɛ nɔ̄ ɛrɛ ekpɔā aba ɛɛ lokwa a dap kiisī lo ewee bebe. Timɔti bee tɔɔ̄ agara bu edɔɔ̄ nyɔnɛbee a bee gbaɛ̄tɔ̄loo pya zurabahtɔ̄ Pɔɔl a kɔ teera aaloo pɔrɔ taɛ, nyɔɔnɛ le dogo, le nyɔɔnɛ pya wuga nɛɛdam le nɛɛwa gbaa. (2 Tim 2:22) Lo ama gbī su loo nɛ. Lu ebɛɛ̄ kɔ i nɔ doo le lokwa i dap be eebah pɔrɔ taɛ. (Rom 7:21-25) Gbaāloo wo, alu ebɛɛ̄ kɔ i nɔ edoo le lokwa i dap kiisī lo elɛa nama dee dum loo sa yaa lo aā. (Ɛfɛs 4:22, 24) Kere sɔ̄ i aa uwe tam sa loo i e’ɔa, alu ebɛɛ̄ kɔ i piiga sa si enɔānu.—Hib 10:24, 25.

12. Bu mɛ sīdee na i dap nyimɛ kɛ̄ i su Baibol daānu doo a?

¹² Lu ebɛɛ̄ kɔ nɛɛ nɔ̄ a nɔ kɛ̄ esu ye nu nɔ̄ beā be doo. Lokwa a dap para leere, lu ebɛɛ̄ kɔ a doo wo dɛ̄dɛɛ̄ sɔ̄. Bu aba lo sīdee, alu ebɛɛ̄ kɔ i para esu Muɛ̄ Ue Bari daānu. (2 Tim 2:15) I dap nɔ pio sīdee ama bie enɔānu. Mɛ lo i gbī ezū pya dɔɔ̄na kɔ ba a yiga kɔ pya kaka ue a le bu Baibol kuī i loo, lu ebɛɛ̄ kɔ i wee nɔ Baibol nyɔɔ i loo dɛ̄dɛɛ̄ sɔ̄. Lu ebɛɛ̄ kɔ i su Muɛ̄ Ue Bari agɛrɛtɛ̄ i yira. Lo ama eenyɔɔ aadee buū Baibol. A gbī kɔ i ɛrɛ ekɛɛrɛ nyɔɔ nu i buū sa gbītɛ̄ nu aābu pya i kpa lokwa i dap dābeeloo sa su nu a le bu Kpa Kaɛ yere bu dogo. (1 Tim 4:13-15) Lo sɔ̄ i dap su Muɛ̄ Ue Bari tɔŋɛnu pya dɔɔ̄na. Lo dɔɔ̄na, lo ama kura kɔ ii le e’aadee buū pya dɔ a le bu Baibol wa nɛ. I gbī edoo kɔ pya a gaa i gbaɛ̄tɔ̄ a dābeeloo kɛ̄ i buū le kɛ̄ ba dap su yere bu dogo doo. Tɛ̄maloo enɔ Baibol nyɔɔ i loo dɛ̄dɛɛ̄ sɔ̄, i nyim kiisī bu kɛ̄ i su Muɛ̄ Ue Bari tɔŋɛnu pya dɔɔ̄na doo.—2 Tim 3:16, 17.

13. Aāloo nu Pya Hibru 5:14 kɔ, e na anua a bɔloo kɔ i ɛrɛ ekɛɛrɛ a?

¹³ Ɛrɛ ekɛɛrɛ. Nɛɛ nɔ̄ ɛrɛ enwaabah muɛ̄ nu bɔɔ sa gɔ̄ ye loo. I ɛrɛ enɔ lo esuāloo kɛ̄tɔɔ̄ a i dap yere muū loo lɛɛ i doo dogo lo eteera aaloo. (Kam 22:3;  buū Pya Hibru 5:14.) Bu edoba, alu ebɛɛ̄ kɔ i su suānu saŋɛ i bii laɛgɛloo le sīdee i ɛrɛ ekpeloo. Gbɛnɛ-edo sɔ̄, fim le pya nu ba tɔgɛ nyɔɔ TV wee tɔgɛ dogo a naa ɛɛ. Pya dogo ama biirebu Bari sa a ɛrɛge eyere i muū loo. Nyɔɔwo, i kiī pya sīdee ɛrɛ ekpeloo a dap ɔɛloo wereloo i ɛrɛ loo Bari.—Ɛfɛs 5:5, 6.

14. Ɛrɛ ekɛɛrɛ bee yerebah nɛ Daniel doodoo wa?

¹⁴ Daniel a bee lu ekɔ nu akiiloo tua sɔ̄ a bee bɔātɛ̄ e’ɛrɛ ekɛɛrɛ sa muɛ̄ kɔ bira pya game a aara dogo lumiī le doo yɔ gaa nua taāŋa. A bee gbītɛ̄ pya nu eyerebah ye nɛ kɔ a kwabaloo ye taāŋa aābu Watchtower Library. Lo ama bee ye ɛrɛ pah nyɔɔ doodoo wa? A bee ɔbɛ ebira pya vidio game a naa bɔloo. A bee ɔbɛ sa kpaɛ̄ dɔ intanɛt a wee si wee bira, e a bee ɔbɛ egbaaloo pya nɛɛ le ɛɛ wee gbaa bira. Daniel bee kɔ: “Taā m sikɛ̄ bira vidio game, m bee bɔātɛ̄ ekii ee sa gbaaloo pya gbo ba le bu bɔŋanaloo.” Nyaawo, Daniel gaa si tam doodoo nɛɛ sɛmdee dɛ̄dɛɛ̄ sɔ̄ le nɛɛ kanɛɛ.

15. E na anua esah yereue bee piya a?

¹⁵ Doodoo Timɔti, bɔloo kɔ i ɛrɛ ekɛɛrɛ nyɔɔ pya pɔrɔ nu a dap sira aabu esah yereue a aabah pya anna yira. (1 Tim 4:1, 7; 2 Tim 2:16) Bu edoba, ba dap kiisī loo ekɔ esah akiiloo pya wuga ale doo kɔ i ɛrɛ baɛbaɛ ekɛɛrɛ kumaloo bɔŋanaloo Jɛhova. Pya esah yereue ama dap ɔɛloo i yira. Ii le eyiga kɔ pya esah ama a dag i. E na anua a? Nyɔnɛbee dua yereue ama lu ekɔ yaari tɛ̄mabah “pya wa ekɛɛrɛ egbaa, pya a lu e’aŋana kaka ue wa lɛɛ bah.” Nu ba seea sī na ‘amkɛ̄ le doo ɛrabah bu ekɔaue.’ (1 Tim 6:4, 5) Ba gbī kɔ i yiga wa esah sa ii dɛrɛ na nyiɛ nyɔɔ pya wuga.

16. Pya e na ii le eyiga kɔ a dabara i ekɛɛrɛ a?

¹⁶ Bɔɔgɛ o ekɛɛrɛ. Doodoo “le nɛɛ nɔ̄ Kraist Jizɔs,” Timoti bee sere ye ekɛɛrɛ nyɔɔ esiatam zue ue sa naa bee yiga kɔ tam ale kponia nu bu namloo a dabara ye ekɛɛrɛ. (2 Tim 2:3, 4) I nɔ edoba Timoti sa ii le elɛɛbaloo kɔ taɛ ɛrɛ nu bu namloo a dabara i ekɛɛrɛ. “Kiaŋana zɔ” dap ɔɛloo wereloo i ɛrɛ loo Jɛhova, nia i ɛrɛ bu Muɛ̄ Ue Bari, le i taɛ lo etɔgɛ nu pya dɔɔ̄na. (Mat 13:22) I ɛrɛ edoo kɔ i dum a waɛbah sa su i sɔ̄ le i mɛm  gbiā “Buɛ̄-mɛnɛ Bari nua tuatua.”—Mat 6:22-25, 33.

17-18. E na i doo lokwa i kpega i loo lɛɛloo nu egbee i gbanialoo kumaloo Jɛhova a?

¹⁷ Kpɛ̄naloo enwaabah doo dogo. Nɛɛ nɔ̄ ɛrɛ enwaabah nɔɔ̄ nu edoo lo ekpega aba ɛɛ. Lo i gaa gbī ekpega pya nu Jɛhova bee i nɛ, bɔloo kɔ i nwaabah doo dogo sɔ̄ i muɛ̄ nu bɔɔ. E na eyerebah i nɛ kɔ i doo dogo nyɔɔ sɔ̄ a? Alu ebɛɛ̄ kɔ i nɔɔ̄ kɛ̄ i doo dogo kumaloo ziī nu bɔɔ doo sɔ̄ sɔ̄ le.

¹⁸ I naa su bu edoba sɔ̄ alu e’ɛrɛ ziī doonu, wee lu edoo kɔ pya nɛɛ a le kɛ̄ a suā kɛ̄ ba dap nwaabah tɛ̄ma aabu tɔ ba le a, lɛɛ ba gae bɔātɛ̄ lo doonu. E na anua a? Lokwa ba dap nwaabah teera lo ziī nu bugia sira lo. Bu aba lo sīdee, i dap wee kpɛ̄naloo “nu i doo” lo i kpesī dogo a naa ɛɛ, nu si ee a tɔgɛ dogo lumiī, ale sɔ̄ i muɛ̄ nu pya anna yira yere nyɔɔ intanɛt ale sɔ̄ i gaa ɛp fim ale TV. Lo i kpɛ̄naloo baɛ nu a dap sira, i kpega i loo lɛɛloo nu edap gbee i gbanialoo kumaloo Jɛhova sa bia ɛɛ kɛ̄dɛɛ̄ Jɛhova.—Yɔɔ 101:3; 1 Tim 4:12.

19. Pya amunu leelee na i ɛrɛ lo i baɛloo pya nu a kuī Jɛhova enɛā i a?

¹⁹ I ɛrɛ ebaɛloo pya nu a kuī Jɛhova enɛā i lo a le kaka ue Baibol le tam tɔgɛ nu pya dɔɔ̄na. Lo i doo wo, i ɛrɛ kaāna ekɛɛrɛ beenyiɛ, dum a dɔbiī, le ɛɛbu a le bu yerebah nɛ pya dɔɔ̄na kɔ ba a suāloo Jɛhova. Tɛ̄maloo yerebah a ye aabah, i dap baɛloo nu a bee lu eyere i kɛ̄bah.—1 Tim 6:12, 19.