1-2. Amunu gbaaloo na a le yɛɛ ue a le bu kpa Eklisiastis 11:6 le tam zue ue Buɛ̄-mɛnɛ a?

BIE pio barasī, pya nɛɛ wee nwaabah doo dogo sɔ̄ ba dā le yereue. Nyɔnɛbee alu taɛ nu ba gaa bee tɔɔ̄ baɛ! Bie pya dɔɔ̄na edo, pya nɛɛ tɔgɛ nwīgbagbara taɛ bu Bari ale Baibol, ale bee ba naa tɔgɛ doo pippip. Bie kɛ̄ o tɔɔ̄, pya nɛɛ wee doo dogo kiiloo le yereue doodoo wa? Ɛrɛgeba kɛ̄ a le doo, Jɛhova ɛmadɛɛ̄ kɔ i wee kiisī lo ezue ue mmɛ sɔ̄ ekɔ eleera.

² Sɔ̄ e’ina taɛ sɔ̄ Jɛhova bee sere, tam zue ue e’ina kuma, lɛɛ ‘kuma gae lu.’ (Mat 24:14, 36) Lɛɛ a gae lu lo sɔ̄, i gbaɛ̄tɔ̄loo ue a kɔ, “o a ɔbɛ bah a” * doodoo wa?—Buū Eklisiastis 11:6.

3. E na i gaa le nɔ bu ekobee ue ama a?

³ Bu elua ekobee ue a, i bee nɔ nia nu i doo lo edap lu pya a para “aa nɛɛ.” (Mat 4:19) Bu lo ekobee ue ama i gaa le kɔnia taa sīdee i dap yere mɛm loo i biaɛfii lo ezue ue kaɛlɛɛ nu i kpesī. I gaa le nɔ nu anua alu ebɛɛ̄ kɔ i (1) kiisī lo esu tam zue ue nua tuatua, (2) ɛrɛ egerebu, le (3) kiisī lo e’ɛrɛ e’agatɛ̄ yira.

4. E na anua alu ebɛɛ̄ kɔ i bie ekɛɛrɛ nyɔɔ tam Jɛhova enɛā i a?

⁴ Jizɔs bee kɔ pya nu esira lo etɔgɛ kɔ i le bu kpɛdumɛ  dee, le kɔ pya nu ama dap dabara ekɛɛrɛ pya a wee ye nyɔɔnɛ dumɛ lɛɛloo esi wa tam mmɛɛ̄. A bee zuurabahtɔ̄ pya a wee ye nyɔɔnɛ dumɛ kɔ ba a “tɔɔ̄ . . . baɛ.” (Mat 24:42) Nii’ee, i ɛrɛ gbɛnɛ-edo nu a i dap dabara ekɛɛrɛ dookɛ̄ a bee dabara ekɛɛrɛ pya nɛɛ bu dee Noa kɔ ba aa su zuurabahtɔ̄ Noa bee wa nɛ doo. (Mat 24:37-39; 2 Pit 2:5) Ɛɛ na anua alu ebɛɛ̄ kɔ i sere ekɛɛrɛ nyɔɔ tam Jɛhova enɛā i a.

5. Mɛ sīdee na kpa Doonu pya Nɛɛ lɛɛratam 1:6-8 kɔ kɛ̄ tam zue ue ekiisī doo a?

⁵ Nii’ee, alu ebɛɛ̄ kɔ i sere ekɛɛrɛ nyɔɔ tam zue ue Buɛ̄-mɛnɛ. Jizɔs bee kɔ pya a wee ye nyɔɔnɛ dumɛ gaa le si tam ama mmɛ kɛ̄ alɛ naa bee mmɛ, e lo tam ekiisī sɔ̄ a naa lena dum. (Jɔn 14:12) Sɔ̄ Jizɔs e’ua sah, pio pya a wee ye nyɔɔnɛ dumɛ bee obia kii wee fɛ bari. Sɔ̄ e’aara kɛ̄ bu luh, a bee doo kɔ pio pya a wee ye nyɔɔnɛ dumɛ a aa gbɛnɛkpo bari tɛ̄maloo nyɛŋiatam. A bee su lo sɔ̄ daā kɔ ba a suā kɔ tam zue ue kuī eenyɔɔ ɛrɛgeba dɔɔ̄na tam. (Jɔn 21:15-17) Lɛɛ Jizɔs gae kii bunyɔɔ, a bee kɔ nɛ pya a wee ye nyɔɔnɛ dumɛ kɔ tam zue ue a bee bɔātɛ̄ gaa le yɛg yee buɛ̄ Izrɛl. (Buū Doonu pya Nɛɛ lɛɛratam 1:6-8.) Sɔ̄ pio zua etɛ̄na, Jizɔs bee doo kɔ nɛɛ lɛɛratam Jɔn a muɛ̄ pya nu a gaa le sudɔ bu “dee Nɛɛ-a-i-ɛrɛ.” * Ziī gbɛnɛ nu Jɔn bee muɛ̄ na ziī ɛnjɛl “a ɛrɛ le yereue a naa wee tah lo ezue nɛ dɛ̄dɛɛ̄ edonyɔɔ, le edo, le edɛm, le pya nɛɛ.” (Mum 1:10; 14:6) A sirapie kɔ Jɛhova gbī kɔ i si tam zue ue mmɛ sɔ̄ e kɔ eleera.

6. I sere ekɛɛrɛ nyɔɔ tam zue ue doodoo wa?

⁶ I dap sere ekɛɛrɛ nyɔɔ tam zue ue lo i ɛrɛ ekɛɛrɛ nyɔɔ kɛ̄ Jɛhova eyerebah i nɛ doo. Bu edoba, a gaa i nɛ  gbɛnɛkpo nuede bu edɔɔ̄ tɛ̄maloo pya i kpa alu e’ɛm le lo a le bu kumputa, lo alu edā aba muɛ̄ le vidio, gbaāloo pya lo a le nyɔɔ Intanɛt. Naa kɛɛrɛ: I ɛrɛ gbɛnɛ-edo yereue a le bu nu a eeloo 1,000 muɛ̄ ue nyɔɔ i dɔ intanɛt! (Mat 24:45-47) Bu nyɔuwe pya nɛɛ le bu popooa nyɔɔbee bɛbɛɛ, yigabari, le kɔ pio nɛɛ ɛrɛ kpugi e pio naa ɛrɛ, nu a eeloo ɛrɛtaa miliɔn pya zooro Bari le bu gbaaloo tɛɛ̄ ɛŋɛnɛ nyɔuwe. Bu edoba, nyɔɔ O’oo deelookaɛ 19 biradee bu Nia Enɔɔ̄ bu zua 2019, Pya Ekeebee Jɛhova a le yube nyɔuwe bee gbaa ɛp nu a le nɛ dee. Sɔ̄ elua ye loo uunɛ, gbɛnɛ eku nɛɛ alu 20,919,041 bee bɔŋia loo Doonu Nyɛŋiabu Loo Luh Jizɔs. Nia i esere ekɛɛrɛ nyɔɔ tam zue ue Buɛ̄-mɛnɛ sɔ̄ i kɛɛrɛbu dee a i kpaā nɛ lo emuɛ̄ sa su dɔ bu tam a gaa lu esi bu nyɛŋia sīdee anii’ee.

7. Bu mɛ sīdee na edoba Jizɔs i yerebah nɛ kɔ i sere ekɛɛrɛ nyɔɔ tam zue ue a?

⁷ Dɔɔ̄na sīdee i dap sere ekɛɛrɛ nyɔɔ tam zue ue na tɛ̄maloo enɔ edoba Jizɔs. A naa bee lɛɛbaloo kɔ lɔgɔ nu a dabara ye ekɛɛrɛ lɛɛloo eyira ekeebee akiiloo kaka ue. (Jɔn 18:37) A naa bee dɔ bu doā-ɛp Setan sɔ̄ a bee kɔ enɛe ye “dɛ̄dɛɛ̄ buɛ̄-mɛnɛ nyɔuwe le wa nyɛŋia”; ale sɔ̄ pya dɔɔ̄na bee gbī esu ye nua mɛnɛ. (Mat 4:8, 9; Jɔn 6:15) A naa bee ɛrɛ taɛ lo e’ɛrɛ zɔ, e bɔɔ naa bee ye aa sɔ̄ ba bee ye gbanasī. (Luk 9:58; Jɔn 8:59) Sɔ̄ alu edoā-ɛp i yira, i dap kiisī lo ekɛɛrɛbu zuurabahtɔ̄ nɛɛ lɛɛratam Pɔɔl. A bee yere mɛm loo pya Nɛɛ Kraist kɔ ba a nyɔɔnɛ edoba Jizɔs “lokwa ekpo naa tah” wa loo sa ba gbaa!—Hib 12:3.

8. E na alu egerebu a, e e na anua alu ebɛɛ̄ anyaawo a?

⁸ Egerebu na sɔ̄ nɛɛ dap ziireloo mmɛ sɔ̄ kɛ̄tɔɔ̄ enyaa. I ɛrɛ e’ɛrɛ egerebu kere i gaa ɛmadɛɛ̄ sɔ̄ e’aga kɛ̄tɔɔ̄ i gaa tɛɛ̄ bu e’ina kuma ale i gaa ɛmadɛɛ̄ kɔ ziī le nu a sira. A bee taɛ nɛɛ mɔmanudɛɛ̄ Habakuk emuɛ̄ sɔ̄ dogo lumiī a bee le bu buɛ̄ Juda e’ina kuma. (Hab 1:2) Pya a wee nyɔɔnɛ dumɛ Jizɔs bee ɛmadɛɛ̄ kɔ Buɛ̄-mɛnɛ Bari “esira aba sɔ̄” sa wa agara lɛɛ bah bɛbɛɛ pya Rom a bee wa bii nɛ kɛ̄. (Luk 19:11) A gaa i taɛ emuɛ̄ dee Bari elɛɛ dɛ̄dɛɛ̄ bag dogo sa obara aā nyɔuwe lo kaāna dogo e’mma bu sere. (2 Pit 3:13) Kerewo, i ɛrɛ e egerebu sa tɔɔ̄ baɛ sɔ̄ Jɛhova bee sere. Naa ɛp pio sīdee Jɛhova etɔgɛ i kɔ i egerebu ama.

9. Pya amunu edoba na a tɔgɛ kɔ Jɛhova egerebu a?

⁹ Jɛhova na kaāna edoba loo egerebu a. A bee nɛ sɔ̄ Noa kɔ a kaā fah sa si tam doodoo “nɛɛ zue ue kaāna dogo.” (2 Pit 2:5; 1 Pit 3:20) Jɛhova bee egerebu sa gbaɛ̄tɔ̄ Abreham sɔ̄ a bee ye bipgi ebip akiiloo ye biaɛfii lo egbeesī pya pɔrɔ dogo ba bee le bu buɛ̄ Sɔdɔm le Gɔmɔra. (Jɛn 18:20-33) Bu gbɛnɛ-edo zua, Jɛhova bee kiisī lo etɔgɛ egerebu loo pya Izrɛl a naa bee ye yira agɛrɛ nɛ. (Neh 9:30, 31) I muɛ̄ kɛ̄ Jɛhova ɛrɛ egerebu doo anii’ee nyɔnɛbee a nɛ sɔ̄ pya nɛɛ kɔ ba “a lu ina loo kikiiya.” (2 Pit 3:9; Jɔn 6:44; 1 Tim 2:3, 4) Edoba Jɛhova tɔgɛ i kaāna nu anua i kiisī lo e’ɛrɛ egerebu sɔ̄ i gaa zue ue sa tɔgɛnu. A tɔgɛ nage i egerebu tɛ̄maloo edoba a le bu ye Muɛ̄ Ue.

10. Dookɛ̄ alu e’ɛm doo bu kpa Jemes 5:7, 8, e na edoba nɛɛ foh nu i tɔgɛ a?

 ¹⁰ Buū Jemes 5:7, 8. Edoba nɛɛ foh nu tɔgɛ i kɛ̄ e’ɛrɛ egerebu doo. Alu kaka kɔ pio nu alu efoh wee nwaabah nyim. Kerewo, gbɛnɛkpo ɛɛ wee su nyɔɔnyɔɔ sɔ̄ lɛɛ a gae lee egbī, eetɔɔ̄ na pya lo a wee mum bee. Nu pya Izrɛl foh wee tɔɔ̄ nu alu ini’ī enɔɔ̄ lɛɛ a gae lee egbī. Nɛɛ foh nu wee foh nu bu tua bee boo, sa a gbī nu aā wii sɔ̄ boo e’ina gaa kii. (Maak 4:28) Alu nu suānu le loo lo enɔ kɛ̄ nɛɛ foh nu ɛrɛ egerebu doo. Kerewo, lo ama naa aadee waɛ.

11. Mɛ sīdee na egerebu eyerebah i nɛ bu i tam zue ue a?

¹¹ Pya nɛɛ a naa mmana wee gbī enwaabah muɛ̄ nu esira aaloo wa epiaga. Kerewo, lo i gbī kɔ nu i foh a zii, i ɛrɛ ekuūdɛɛ̄loo kaāna, lo a le kwa lo kɛ̄ uwe, foh nu, lɛɛ ebie loo, le yere pie loo. Tam dodoo kɔ pya nɛɛ a nyɔɔnɛ dumɛ Jizɔs gbī nage epiaga. A wee su sɔ̄ lo edap yerebah nɛ pya i gaa nɔɛ̄nu kɔ ba a lɛa elap dogo ɛp sī nɛɛ bu wa. Egerebu eyerebah i nɛ kɔ loo i aa ɔ sɔ̄ pya nɛɛ naa gbaɛ̄ i tɔ̄loo. E lo ba gbaɛ̄ i tɔ̄loo, i ɛrɛ e’ɛrɛ egerebu. Ii le edap su bah ekpo aā nɛɛ i gaa nyɔɔnɛ nɔ Baibol kɔ a ɛrɛ yira. Pio sɔ̄, pya a wee nyɔɔnɛ dumɛ Jizɔs naa bee nwaabah dābeeloo nu a bee wa tɔgɛ. (Jɔn 14:9) A bɔloo enyɛŋiabu kɔ i dap foh nu sa tɔ̄ maā tɛ̄, mɛ Bari na a doo kɔ a nyim a.—1 Kɔr 3:6.

12. Bu mɛ sīdee na i tɔgɛ egerebu sɔ̄ i gaa zue ue nɛ pya i manamana a?

¹² Ziī nu a dap doo kɔ a aga i bah e’egerebu na sɔ̄ i gaa zue ue nɛ pya i manamana lo ba naa le Pya Ekeebee. Zuurabahtɔ̄ a le bu kpa Eklisiastis 3:1, 7 dap i yerebah nɛ. A kɔ: “Ɛrɛ . . . sɔ̄ ubepiī, le sɔ̄ kɔ ue.” I le elap dogo dap doo kɔ ba a gbaɛ̄ i tɔ̄loo, kerewo, a bɔloo kɔ i  kpɛ̄naloo ekɔ nu akiiloo Jɛhova wa nɛ. (1 Pit 3:1, 2) I ɛrɛ ebɛamiā bu tam zue ue le tɔgɛ nu, mɛ i ɛrɛ egerebu kumaloo dɛ̄dɛɛ̄ nɛɛ gbaā nage loo pya i butɔ.

13-14. Pio amunu edoba akiiloo egerebu na i dap nɔ a?

¹³ I dap nɔ egerebu aāloo edoba pya a bee yira agɛrɛ lo Baibol kɔ ue kiiloo le pya a le bu ilii dee ama. A bee taɛ Habakuk emuɛ̄ sɔ̄ bag dogo e’ina kuma, mɛ a bee tɔgɛ egerebu sɔ̄ a bee kɔ: “M gaa le yira sa baɛ loo.” (Hab 2:1) Nɛɛ lɛɛratam Pɔɔl bee kɔ a taɛ e ye esi ye tam “gbɔmɛɛ̄.” Kerewo, a bee su egerebu “zuema le yereue agɛrɛ.”—Doonu pya Nɛɛ lɛɛratam 20:24.

¹⁴ Naa kɛɛrɛbu edoba ziī dam le wa ba bee tɛɛ̄ aa tɔkpa Gilead sa alu eyere wa ture edonyɔɔ kunɛ nwīgbagbara Pya Ekeebee le, e gbɛnɛ-edo tɔbari a le lo kɛ̄ naa yiga bu Jizɔs. Gbɛnɛkpo aba naa bee gbī enɔ Baibol. Bu kiiyasī, pya le aba bee gbaa si tɔkpa Gilead lo ba le dɔɔ̄na edonyɔɔ bee le gaa wa kɔ nɛ gbɛnɛ-edo pya nɛɛ ba gaa nyɔɔnɛ nɔ Baibol sa wa yerebah nɛ kɔ ba alu Pya Ekeebee Jɛhova. Kaɛlɛɛ kɔ gbɛnɛ-edo nɛɛ a le wa kɛ̄ zue ue naa bee wa gbaɛ̄tɔ̄loo, dam le wa ama bee kiisī lo esu egerebu siātam zue ue. Sɔ̄ ba esua nu alu ɛrɛtaa zua zuema ue kɛ̄ pya nɛɛ naa bee wa aadee gbaɛ̄tɔ̄ ama, ba bee ɛrɛ ɛɛbu sɔ̄ ziī nɛɛ ba wee nyɔɔnɛ nɔ Baibol bee liamaā. E na edoba a dee kere le lo bu ilii dee ama i tɔgɛ a? Pya a bɔloo eture nyiɛ loo ama naa bee ɔloo ale ɔbɛ bah wa, e Jɛhova bee wa nɛ ekpɛanu nyɔɔbee wa egerebu. Doraa i nɔ “pya a tɛ̄maloo egerebu ɛrɛ epoo loo lo yii.”—Hib 6:10-12.

15. E na alu ziī sīdee yira agɛrɛtɛ̄ i biaɛfii lo ezue ue a?

¹⁵ I yiga nu i zue, nyɔɔwo i gbī ekɔ nɛ ɛrɛgeba nɛɛ i zɔŋia. I dɛrɛ nyiɛ nyɔɔ pya yii a le bu Muɛ̄ Ue Bari. (Yɔɔ 119:42; Ais 40:8) I emɔna pya mɔmanudɛɛ̄ Baibol a gaa dooa gbɔ̄mɛɛ̄ anii’ee. I emɔna kɛ̄ pya nɛɛ nyaana wa dum sa sikɛ̄ tɔɔ̄dum a lee doo sɔ̄ ba bɔātɛ̄ esu zuurabahtɔ̄ Baibol yere bu dogo. Lo ama doo kɔ i suā kɔ le yereue akiiloo Buɛ̄-mɛnɛ Bari lu yereue a bɛɛ̄ dɛ̄dɛɛ̄ nɛɛ.

16. Dɛɛa nyɔɔ ue a le bu kpa Le-yɔɔ 46:1-3, mɛ sīdee na yira i ɛrɛ bu Jɛhova le Jizɔs yere mɛm loo i biaɛfii lo ezue ue a?

¹⁶ I ɛrɛ nage yira bu Jɛhova lo alu nɛɛ a ɛrɛ ue i zue, le Jizɔs nɛɛ etubobaloo kɔ alu Mɛnɛ loo ye Buɛ̄-mɛnɛ. (Jɔn 14:1) Kaɛlɛɛ ɛrɛgeba kɛ̄tɔɔ̄ i kpesī, Jɛhova ekiisī lo ekpega i sa i nɛ mɛm. (Buū Le-yɔɔ 46:1-3.) Gbaāloo wo, i yiga kɔ Jizɔs gaa baɛbee tam zue ue aā bunyɔɔ tɛ̄maloo ekpo Jɛhova enɛā ye.—Mat 28:18-20.

17. Naa nɛ edoba loo nu anua i kiisī lo ezue ue.

¹⁷ Yira i ɛrɛ doo kɔ i suā leere kɔ Jɛhova enɛ leelee i epiaga, e a dap lu bu sīdee ii ɛmadɛɛ̄. (Eklis 11:6) Bu edoba, gbɛnɛ-edo nɛɛ gaa muɛ̄ pya i kasi alu elɛ kpa nyɔɔ le kpe yere kpa bu kigere. Lo sīdee zue ue ama leege ni? A lee kaāna! Kingdom Ministry Lop Le Eziī Enɔɔ̄ 2014 kɔ nu akiiloo ziī zege a le gbɛnɛ tɔkpa lo a bee gbī e’ɛm nu akiiloo Pya Ekeebee Jɛhova. A naa bee suā kɛ̄ Tɔ Nɔnu Buɛ̄-mɛnɛ le, mɛ a bee muɛ̄ kasi alu elɛ kpa nyɔɔ bie wa tɔkpa, sa a bee muɛ̄ nage yereue a esu ɛma lo nu. Sɔ̄ sɔ̄ gaa kiisī, a bee lu Nɛɛ Ekeebee  eliamaā sa nyaawo a gaa si tam sɛmdee dɛ̄dɛɛ̄ sɔ̄. Pya nu a sira a le doo wo ama zū i kɔ i kiisī lo ezue ue nyɔnɛbee a tɔgɛ kɔ a ɛrɛ pya nɛɛ a gaa gbī edā yereue Buɛ̄-mɛnɛ.

18. I doodoo wa suā kɔ tam zue ue akiiloo Buɛ̄-mɛnɛ gaa le ina kuma dookɛ̄ Jɛhova gbī doo ni?

¹⁸ I dap dɛrɛ nyiɛ nyɔɔ kɔ tam Buɛ̄-mɛnɛ elu esi mmɛ kɛ̄ taɛ sɔ̄ a bɔloo. Naa kɛɛrɛbu nu a bee sira bu dee Noa. Jɛhova bee tɔgɛ kɔ a lue nɛɛ a wee doo nu nyɔɔ sɔ̄. Nu alu 120 zua lɛɛ a gae lu lo sɔ̄, Jɛhova bee kɔ taɛ sɔ̄ yii maa ebɔātɛ̄. Sɔ̄ gbɛnɛkpo zua etɛ̄na, Jɛhova bee kɔ nɛ Noa kɔ a ka fah. Noa bee kiisī lo esitam bu nu a dap lu 40 ale 50 zua lɛɛ lo yii maa gae bɔātɛ̄. Kaɛlɛɛ kɔ pya nɛɛ naa bee ye gbaɛ̄tɔ̄, a bee kiisī lo ezue ue mmɛ sɔ̄ Jɛhova kɔ a yere nam bu fah. “Jɛhova bee ye kpaɛ̄ bū dɛɛ̄” taɛ sɔ̄ a bɔloo.—Jɛn 6:3; 7:1, 2, 16.

19. E na i ɛmadɛɛ̄ lo ii ɔbɛ bah i a?

¹⁹ Sɔ̄ sɔ̄ naa binia, Jɛhova gaa le su kuma mmɛ loo tam zue ue; a gaa le gbeesī nyɔuwe Setan sa obara aā nyɔuwe kaāna dogo sere. Mmɛ lo sɔ̄, doraa i nɔ Noa, Habakuk, le pya dɔɔ̄na lo ba naa bee ɔbɛ bah wa. Doraa i sere ekɛɛrɛ nyɔɔ tam zue ue, ɛrɛ egerebu, sa ɛrɛ e’agatɛ̄ yira bu Jɛhova le pya ye yii.