1. E na pya Nɛɛ Kraist edoo lokwa ba teera tee dum mmɛ kuma a?

PYA NƐƐ Kraist gaa teera tee dum. Kere i gaa bɔātɛ̄ lo tee aā, ale i eteera bu nyɔɔnyɔɔ sɔ̄, a lu ebɛɛ̄ kɔ i kiisī lo eteera mmɛ sɔ̄ i teera mmɛ kuma. Zuurabahtɔ̄ nɛɛ lɛɛratam Pɔɔl bee nɛ pya Nɛɛ Kraist li Filipai dap i yerebah nɛ kɔ i teera lo tee mmɛ kɛ̄. Pio pya nɛɛ a bee le bu bɔŋanaloo pya Nɛɛ Kraist bu tua sɔ̄ o’oo tup zua ebee si tam nɛ Jɛhova bu pio zua lɛɛ Pɔɔl gae ɛm kpa ama wa ma. Ba gaa bee teera lo tee leere, mɛ Pɔɔl bee wa nyɛŋiabu kɔ a bɔloo kɔ ba a su egerebu teā lo tee dum. A bee gbī kɔ ba a wee nyɔɔnɛ ye edoba bu “zū kuma sī” lokwa ba ɛrɛ nu ba seea sī.​—⁠Fil 3:⁠14.

2. E na anua zuurabahtɔ̄ Pɔɔl bee nɛ pya wuga a le Filipai bee bɔloo taɛ lo sɔ̄ a?

² Zuurabahtɔ̄ Pɔɔl bee nɛ pya wuga a le Filipai ama bee bɔloo taɛ lo sɔ̄. Pya nɛɛ a le bu lo bɔŋanaloo bee baaloo ziī aā sɔ̄ a bee lu eyere lo bɔŋanaloo. A bee bɔātɛ̄ sɔ̄ a bee lu ekɔ Pɔɔl le Sailas a kii “Masɛdonia wee yerebah” e ba bee kii lo kɛ̄ bu zua 50 C.E. (Doonu pya Nɛɛ lɛɛratam 16:⁠9) Ba bee zɔŋia ziī wa a kura Lidia, lo a bee wa “dā sa Nɛɛ-a-i-ɛrɛ bee ye kpaāna beenyiɛ” lo egbaɛ̄tɔ̄ le yereue. (Doonu pya Nɛɛ lɛɛratam 16:14) Sɔ̄ sɔ̄ naa binia, alɛ le dɛ̄dɛɛ̄ pya ye butɔ bee liamaā. Kerewo, Pɔrɔ-edɔɔ̄ bee bɔātɛ̄ ebe wa. Pya nɛɛ lo buɛ̄ bee aa Pɔɔl le Sailas ma pya a gaa bɛɛ sa kɔ ba lu pya a doo taāŋa. E a bee sira kɔ a bee lu ezip Pɔɔl le Sailas, wa yere kpɔgɔrɔ, lɛɛ a lu ekɔ ba a aa lo buɛ̄. (Doonu pya Nɛɛ lɛɛratam 16:​16-40) Ba bee peege beenyiɛ wa ni? Eeye! E pya wuga a bee le bu aā bɔŋanaloo a bee lu eyere a a? Ba bee sere le edoba  nyɔnɛbee alaba bee egere nage bu. Bu kaka, le edoba Pɔɔl le Sailas bee tɔgɛ bee wa yere mɛm loo kaāna.

3. E na Pɔɔl bee suā a, e pya amunu ebip na i gaa le kɛɛrɛbu loo a?

³ Pɔɔl bee biaɛfii kɔ a naale e pee e beenyiɛ ye. (2 Kɔr 4:16) Kerewo, a bee suā kɔ lokwa a dap teerae lo tee dum mmɛ kɛ̄, a bɔloo kɔ a sere ekɛɛrɛ nyɔɔ nu a seea sī. E na i dap nɔ aāloo edoba Pɔɔl a? Amunu edoba akiiloo pya Nɛɛ Kraist bu ilii dee ama na a doo kɔ i suā kɔ ili dap nage egerebu kaɛlɛɛ ɛrɛgeba taāŋa i gaa tɛɛ̄ bu a? E bu mɛ sīdee na bɛābu i ɛrɛ kumaloo deesī li eyerebah i nɛ kɔ i biaɛfii kɔ ii le e pee e beenyiɛ i a?

4. Bu mɛ sīdee na Pɔɔl bee kiisī lo ezue ue kaɛlɛɛ pya nu a bee ye sira loo a?

⁴ Naa kɛɛrɛ kɛ̄ Pɔɔl bee piiga doo sɔ̄ a bee ɛm kpa ma pya wuga a le Filipai. Bee lu eyere ye kpɔgɔrɔ bie tɔ li Rom. E a naa bee dapna si uwe zue ue. Kerewo, a bee kiisī lo ezue ue nɛ pya a bee ye ina loo sa ɛm lɛta ma bɔŋanaloo a le ebini kɛ̄. Bu aba lo sīdee, gbɛnɛ-edo pya a naa dapna aatɔ anii’ee ekira sī lo ezue ue nɛ pya nɛɛ a wa ina loo. Ba ɛm nage lɛta ma pya nɛɛ ba naa wee le tɔ sɔ̄ i si uwe zue ue.

5. Dookɛ̄ pya ue Pɔɔl a le bu kpa Pya Filipai 3:​12-14 kɔ doo, e na a bee yerebah nɛ Pɔɔl kɔ a sere ekɛɛrɛ nyɔɔ nu a seea sī a?

⁵ Pɔɔl naa bee aaloo kɔ le nu ale piya nu a bee doo sɔ̄ akii akumɛ a dabara ye ekɛɛrɛ lɛɛloo edoo nu Bari gbī. Bu kaka, a bee kɔ a bee lu ebɛɛ̄ kɔ a “ibere nu a le gɔdumɛ” lokwa a dap “zū loo [ye] pima nu a [ye] le mmsī,” lo a kura, lokwa a dap teera lo tee mmɛ kɛ̄. (Buū Pya Filipai 3:​12-14.) E na alu pio nu ebee dap dabara ekɛɛrɛ Pɔɔl a? Tuatua, Pɔɔl ebee lu gbɛnɛ nɛɛ bu yigabari pya Juu. Kerewo, a bee ɛp dɛ̄dɛɛ̄ lo ama nua “ekpaɛkɛ̄.” (Fil 3:​3-8) Eree baɛ, a naa bee iye kɔ ekɛɛrɛ akiiloo kɛ̄ a bee tɛ̄ŋaloo pya Nɛɛ Kraist doo sɔ̄ akii adumɛ a ɔbɛ ye lɛɛloo esitam nɛ Jɛhova. Lo eree taa, a naa bee kɛɛrɛ kɔ kuma tam esiae nɛ Jɛhova egbɔ̄mɛ. Pɔɔl bee si tam zue ue mmɛɛ̄ kere adoo a bee tɛɛ̄ bu pya nu a le doodoo, yere ye kpɔgɔrɔ, bog, tubo ye dɛm, sɔ̄ fah ye zii loo, tɔɔ̄ bu lɛɛraloo le bu kiātɛ̄. (2 Kɔr 11:​23-27) Mɛ, kaɛlɛɛ pya nu Pɔɔl etɛ̄na bu le pya nu edoora, a bee suā kɔ a gaa le kiie sī lo esitam nɛ Jɛhova. Ili ɛrɛ nage edoo wo.

6. E na alu pio pya nu i bie “gɔdumɛ” a bɔloo kɔ i ibere a?

⁶ Bu mɛ sīdee na i dap nɔ edoba Pɔɔl bu e “ibere nu a le gɔdumɛ” a? Dap lu ebɛɛ̄ kɔ i aa bege na ue aba ii kiiloo pɔrɔ i bee si sɔ̄ akii adumɛ. Lo a le wo, e lee o nɔ nu akiiloo waara zɔɔ a’agara Jizɔs Kraist. Lo i nɔ nu, ɛrɛ ekɛɛrɛ nyɔɔ sa yere kara nyɔɔ ekobee ue akiiloo waara zɔɔ Jizɔs, eyerebah doo kɔ i aa bege aba ii ereloo. Edoo nage kɔ i biewo ewee begee ue aba ii nyɔɔ pɔrɔ Jɛhova e aaraloo i nɛ. Naa kɛɛrɛ dɔɔ̄na nu i dap nɔ aāloo Pɔɔl. Pio nɛɛ edaba aaloo tam ebee doo kɔ ba a ɛrɛ gbɛnɛkpo kpugi lokwa ba dap si tam nɛ Jɛhova. Lo a le wo, i dapge ibere pya nu i ebee bie gɔdumɛ ama sa lɛɛ nyiɛ loo pya nu i bee dap ɛrɛ ni? (Buā 11:​4-6; Eklis 7:10) Pya “nu a le gɔdumɛ” dap nage lu pya tam i esia nɛ Jɛhova ale pya taāŋa i bee tɛɛ̄ bu sɔ̄ akii adumɛ. Bu kaka, kɛkɛɛrɛbu loo pya kɛ̄ Jɛhova enɛa i leelee sa i yerebah  nɛ doo sɔ̄ akii adumɛ edoo kɔ i agɛrɛba Ye tɔɔ̄ waɛloo. Kerewo, ii le ekɛɛrɛ kɔ kuma tam i esia nɛ Jɛhova egbɔ̄mɛɛ̄.​—⁠1 Kɔr 15:⁠58.

7. (a) Dookɛ̄ 1 Pya Kɔrint 9:​24-27 kɔ doo, e na a lu ebɛɛ̄ lokwa i dap teera tee dum eeba a? Naa nɛ edoba.

⁷ Pɔɔl bee dābeeloo ue Jizɔs a kɔ: “Agɛrɛaaloo.” (Luk 13:​23, 24) Pɔɔl bee suā kɔ a ɛrɛ e agɛrɛe loo mmɛ kuma doodoo Kraist. Nyɔɔwo a bee su i sīdee tɔɔ̄dum doodoo pya Nɛɛ Kraist doloo teera tee. (Buū 1 Pya Kɔrint 9:​24-27.) Nɛɛ a gaa teera tee wee sere dɛɛ̄ nyɔɔ kɛ̄ a gaa teera kii sa a naa wee yiga kɔ lɔgɔ nu a dabara ye ekɛɛrɛ. Bu edoba, pya a gaa teera tee dap teera tee nyɔɔ dee kɛ̄ pya nɛɛ gaa uradu le kɛ̄ pya nu edap wa dabara ekɛɛrɛ le. O kɛɛrɛge kɔ lo nɛɛ a gaa teera tee a eyira sa bɔātɛ̄ e’ɛp pya nu ba gaa oo loo dee ni? A naale edoo wo lo a gbī e eeba! Bu tee dum, i ɛrɛ ekpooraloo lɛɛloo pya nu edabara i ekɛɛrɛ. Lo i sere ekɛɛrɛ nyɔɔ nu i seea sī, agɛrɛloo dookɛ̄ Pɔɔl bee doo, i gaa le ɛrɛ ekpɛanu!

8. Taa amunu nu finiabah na i gaa le nɔ nu akiiloo a?

⁸ I naa kɔ nu akiiloo taa nu finiabah a dap doo kɔ i ɛrɛ e’ɔaloo. Lo tuatua na sɔ̄ nu naa sira sɔ̄ i bee ɛmadɛɛ̄, eree baɛ na sɔ̄ i ekpo kiikɛ̄ nyɔɔbee i e’ina gaa ana, lo eree taa na sɔ̄ i le bu taāŋa bu nyɔɔnyɔɔ sɔ̄. I dap ɛrɛ biī tɛ̄maloo enɔ sīdee pya dɔɔ̄na gaa tama e’aga kɛ̄tɔɔ̄.​—⁠Fil 3:⁠17.

9. Sɔ̄ nu naa sira sɔ̄ i bee ɛmadɛɛ̄ dap i ɛrɛ pah nyɔɔ doodoo wa?

⁹ Sɔ̄ nu naa sira sɔ̄ i bee ɛmadɛɛ̄. I bɛābu lo emuɛ̄ pya le nu Jɛhova eyira yii loo. Bu kaka, sɔ̄ Habakuk nɛɛ mɔmanudɛɛ̄ bee bara Jɛhova kɔ a lɛɛ bag dogo bu buɛ̄ Juda, Jɛhova bee ye kɔ nɛ kɔ a kiisī lo e “tɔɔ̄ ye baɛ.” (Hab 2:⁠3) Mɛ, sɔ̄ nu naa sira sɔ̄ i bee ɛmadɛɛ̄, dap doo kɔ i aa ɛrɛna mɛm. Dap nage doo kɔ i ɛrɛ  e’ɔaloo. (Kam 13:12) Lo ama bee sira loo pya wuga bu pya zua a waɛloo zua 1914. Lo sɔ̄, gbɛnɛ-edo pya Nɛɛ Kraist alu etɔ̄ nɔɔ̄ bee bee le gaa ɛmadɛɛ̄ kɔ ba ekiie bunyɔɔ bu zua 1914. Sɔ̄ lo ama naa bee sira, pya a yira agɛrɛ bee aabah loo lo kɛ̄tɔɔ̄ doodoo wa?

10. E na ziī dam le wa bee doo sɔ̄ nu ba bee ɛmadɛɛ̄ naa sira ani?

¹⁰ Naa kɛɛrɛ edoba baɛ nɛɛ a bee tɔɔ̄ agara nɛ Jɛhova lo a bee be eeba nu finiabah ama. Wuga nɛɛdam Royal Spatz bee liamaā bu zua 1908 sɔ̄ a bee le 20 zua. A bee kɛɛrɛ kɔ a gaa le kiie bunyɔɔ sɔ̄ sɔ̄ naa binia. Bu kaka, sɔ̄ a bee gbī e’ii wa bu zua 1911, a bee kɔ nɛ Pearl a gaa gbī e’ii a kɔ: “Ɛrɛ nu a gaa le sira bu zua 1914. Lo i eyiga e’iya ziī, elee i doo wo bu nwaanwaabah!” Dam le wa ama bee peege beenyiɛ wa nyɔɔ tee dum sɔ̄ ba naa bee kii bunyɔɔ bu zua 1914 ni? Eeye, nyɔnɛbee taɛ nu ba bee sere ekɛɛrɛ nyɔɔ na doo nu Bari gbī, e a naale kii bunyɔɔ. Ba bee biaɛfii lo esu egerebu teā lo tee. Royal le Pearl bee kiisī lo etɔɔ̄ bu yira agɛrɛ nɛ Jɛhova mmɛ sɔ̄ ba u. Bu kaka, o ɛmadɛɛ̄ lo emuɛ̄ sɔ̄ Jɛhova esere ye bee kaɛ sa tɔgɛ kɔ ye bɛbɛɛ lee sa doo pya ye yii gbɔ̄mɛɛ̄. Suā leere kɔ pya nu ama gaa le sira taɛ sɔ̄ Jɛhova bee sere. Sɔ̄ i gaa tɔɔ̄ge baɛ a, doraa i kiisī lo esitam nɛ Bari, sa ii le eyiga kɔ nu i gaa ɛmadɛɛ̄ a sii sira a ɔɛ i loo.

11-12. E na anua i kiisī lo esitam nɛ Jɛhova kuma kɛ̄ i dap doo kere i kɛ̄tɔɔ̄ nwanaloo ekira kɛ̄ a? Naa nɛ edoba.

¹¹ Sɔ̄ i ekpo kiikɛ̄ nyɔɔbee i e’ina gaa ana. Ekpo bɛɛ̄ nɛɛ a gaa teera kunɛ tee lokwa a dap teera, mɛ a naa lu ebɛɛ̄ kɔ nɛɛ a gaa teera tee bu edɔɔ̄ a dasī ɛrɛ ekpo bu namloo lɛɛ a gae si tam nɛ Jɛhova. Bu kaka, gbɛnɛ-edo pya nɛɛ wa ekpo ekira kɛ̄ lege gaa gbī edoo kuma kɛ̄ ba dap doo lo esitam nɛ Jɛhova. (2 Kɔr 4:16) Bu edoba, Wuga Arthur Secord * bee le 88 zua sɔ̄ esua 55 zua siātam Bɛtɛl, e a naa bee lena bu kaāna nwanaloo. Ziī wa a gaa si tam tɔpie bee ye ina loo sa ye yerebah nɛ. A bee ye fɛɛrɛloo ɛp sa ye kɔ nɛ bu fɛgɛ kɔ: Wuga Secord, o esua gbɛnɛ-edo zua siātam nɛ Jɛhova.” Kerewo, Arthur naa bee sere ekɛɛrɛ nyɔɔ pya nu a bee doo sɔ̄ akii adumɛ. A bee ye ɛp sī, lɛɛ a kɛgɛ sa agara kɔ: “Aiī, o kɔ kaka. Mɛ a naale nu i edoora na a i kuī loo a. Mɛ nu a i kuī loo anyaawo na yira agɛrɛ.”

¹² Naa daba o esiatam nɛ Jɛhova bu  gbɛnɛ-edo zua sa oo dapna doo dookɛ̄ o wee doo nyɔɔ dumɛloo. Lo a le wo, o aa pee beenyiɛ a. Suā leere kɔ Jɛhova nyɛŋiabu sa tɔgɛ nia loo tam o ebee si sɔ̄ akii adumɛ. (Hib 6:10) E kiiloo lo o gaa si anyaawo, nyɛŋiabu kɔ si tam nɛ Jɛhova aābu beenyiɛ naa dɛɛa nyɔɔ kuma sɔ̄ i su siā. Taāwo, i tɔgɛ kɔ i weree loo Jɛhova tɛ̄maloo e’ɛrɛ le elap dogo sa doo kuma kɛ̄ i dap doo lo esitam ye nɛ. (Kɔl 3:23) Jɛhova dābeeloo i kɛ̄tɔɔ̄ sa a naa ɛmadɛɛ̄ nu ii dap doo i aābah.​—⁠Maak 12:​43, 44.

13. Bu mɛ sīdee na nu a bee sira loo Anatoly le Lidiya i yerebah nɛ kɔ i dap kiisī lo esitam nɛ Jɛhova kere i etɛ̄na bu gbɛnɛ-edo etɛɛrɛloo a?

¹³ Sɔ̄ i le bu taāŋa bu nyɔɔnyɔɔ sɔ̄. Pio pya zooro Jɛhova e egerebu tɛ̄ŋaloo bu gbɛnɛ-edo zua. Bu edoba, Anatoly Melnik  * bee le 12 zua sɔ̄ a bee lu e’aa ye tɛ yere kpɔgɔrɔ, lɛɛ alu eyere ye ture Siberia, kɛ̄ a luge 4,000 maɛl (7,000 km) aāloo pya ye butɔ li Moldova. Sɔ̄ ziī zua etɛ̄na, bee lu ekpo Anatoly, ye ka, gbaāloo ye kaāma le ye tɛɛ̄ma kuma Siberia. Sɔ̄ sɔ̄ gaa kiisī, ba bee dap si enɔānu bie dɔɔ̄na buɛ̄, mɛ ba ekiā loo nu a luge 20 maɛl (30 km) tɛɛ̄ bu snow, le bu gbɛnɛ tɔɔ. Wuga Melnik tɔɔ̄ kpɔgɔrɔ loo taa zua, aaloo ye wa Lidiya, le wa nwiī nɛɛwa a bee le ziī zua sɔ̄ ba bee ye aa. Kaɛlɛɛ e’aga kɛ̄tɔɔ̄ Anatoly bee tɛɛ̄ bu bu pya zua ama, alɛ le pya ye butɔ bee kiisī lo etaāŋabah Jɛhova bu bɔloo ture nyiɛ loo. Anatoly elua 82 zua anyaawo sa gaa si tam yɛɛ Kɔmitii a le bee tɔ-naatam bie Asia. Doraa i nɔ edoba Anatoly le Lidiya sa doo kuma kɛ̄ i dap doo bu esiatam nɛ Jɛhova, sa kiisī lo e egerebu dookɛ̄ i bee le gaa doo sɔ̄ akii adumɛ.​—⁠Gal 6:⁠9.

14. E na Pɔɔl bee muɛ̄ kɔ a lee kɔ a doo lokwa a dap ɛrɛ nu a bee seea sī a?

¹⁴ Pɔɔl bee suā leere kɔ a gaa le teerae lo tee mmɛ kuma sa ɛrɛ ye ekpɛanu. Doodoo Nɛɛ Kraist a elua etɔ̄ nɔɔ̄ bee, a bee bɛābu lo e’ɛrɛ, “dɔɔ̄nu kue Bari.” Kerewo, lokwa a dap ina loo lo nu a bee seea sī ama, a bee suā kɔ a ɛrɛe e “zū kuma sī.” (Fil 3:14) Pɔɔl bee su edoba a yere mɛm loo nɛɛ yeābah nɛ pya Nɛɛ Kraist a le Filipai kɔ ba a sere ekɛɛrɛ nyɔɔ nu ba seea sī.

15. Bu mɛ sīdee na Pɔɔl bee su edoba akiiloo lulu nwiī kɛ̄buɛ̄ yeābah nɛ pya Nɛɛ Kraist li Filipai kɔ ba a “zū kuma sī” a?

 ¹⁵ Pɔɔl bee nyɛŋiabu pya wuga a le Filipai kɔ ba gaa le lu nwiī kɛ̄buɛ̄ li bunyɔɔ. (Fil 3:20) E na anua kɛ̄ ba elu nwiī kɛ̄buɛ̄ lu ebɛɛ̄ ani? Bu lo sɔ̄, pya nɛɛ wee gbī elu nwiī kɛ̄buɛ̄ Rom nyɔɔbee a wee wa dɔbiī nɛ. * Kerewo, pya Nɛɛ Kraist a lu etɔ̄ nɔɔ̄ bee lu nwiī kɛ̄buɛ̄ loo bɛbɛɛ a lee eera, lo a gaa le dɔbiī kaāna. Sɔ̄ a lu esu doloo lulu nwiī kɛ̄buɛ̄ lo Buɛ̄-mɛnɛ Bari, lulu nwiī kɛ̄buɛ̄ Rom dɔ nwīgbagbara biī! Nyɔɔbee wo, Pɔɔl bee yere mɛm loo pya Nɛɛ Kraist a le Filipai kɔ ba a “doo dogo a bɔloo le yereue Kraist.” (Fil 1:27) Nii’ee, pya Nɛɛ Kraist alu etɔ̄ nɔɔ̄ bee sere le edoba bu epiiga lo e’ɛrɛ nu ba seea sī, lo a le dum a naa tah li bunyɔɔ.

16. Dookɛ̄ Pya Filipai 4:​6, 7 kɔ doo, e na i doo kere i ɛrɛ bɛābu lo etɔɔ̄dum li bunyɔɔ ale kɛnɛkɛ̄ a?

¹⁶ Kere i ɛrɛ bɛābu lo ekii bunyɔɔ ale lo etɔɔ̄ bu paradais a kɛnɛkɛ̄, i ɛrɛ epiiga lo edoo pya nu i seea sī. Kaɛlɛɛ ɛrɛgeba kɛ̄tɔɔ̄ i le bu, ii le e’ɛp pya nu a le dumɛ; ale doo kɔ ziī nu a ɔbɛ i lɛɛloo etaāŋabah Jɛhova. (Fil 3:16) Dap lu kɔ i etɔ̄na baɛ dooa gbɔ̄mɛɛ̄ pya yii Bari bu nyɔɔnyɔɔ sɔ̄, ale i ekpo e’ina gaa kiikɛ̄. I edaba nage egerebu e’aga kɛ̄tɔɔ̄ le tɛ̄ŋaloo bu gbɛnɛ-edo zua. Kaɛlɛɛ kɛ̄ lo kɛ̄tɔɔ̄ mɛā doo, o “aa ɛrɛ etɛɛrɛloo bu ɛrɛgeba nu.” Taāwo, doolo Bari suā dɛ̄dɛɛ̄ nu o bara, e a gaa le nɛ a efɛɛloo a eenyɔɔ kɛ̄ o bee ɛmadɛɛ̄ doo.​—⁠Buū Filipai 4:​6, 7.

17. E na i gaa le nɔ nu akiiloo bu lo ekobee ue a za nyɔɔnɛ a?

¹⁷ Dookɛ̄ nɛɛ a gaa teera tee wee yaa mɛm loo sɔ̄ esaa eteera ina kɛ̄ doo, a bɔnage loo kɔ i sere ekɛɛrɛ nyɔɔ nu i seea sī lo a le teera tee dum mmɛ kɛ̄. Doraa i yaa mɛm loo sa sere ekɛɛrɛ nyɔɔ dooa gbɔ̄mɛɛ̄ pya yii Bari eyira kiiloo deesī li. E na i doo lokwa i dap kiisī leere sa teera tee dum ama mmɛ kɛ̄ ani? Elua ekobee ue li eyerebah i nɛ kɔ i “doā-ɛp nu a lee kaāna.”​—⁠Fil 1:​9, 10.