1. E na Devid bee kɔ kiiloo kumalookɛ̄ Jɛhova a?

I DAPGE kɔ Jɛhova kumalookɛ̄ ni? Aiī, i dap kɔ doowo. Devid bee ɛm kɔ: “Olo enɛā mɛ kpega loo o kpɔā, e bu oloo kumalookɛ̄ o bee doo kɔ m lu gbɛnɛ.” (2 Sam 22:36; Yɔɔ 18:35) Pio sɔ̄ Devid bee kɛɛrɛbu dee nɛɛ mɔmanudɛɛ̄ Samuɛl bee lu tɔ ye tɛ sa ye tɔ̄ nɔɔ̄ bee nua mɛnɛ a ebɛɛ Izrɛl li deesī. Devid na a bee le nwīgbagbara yɛɛ ɛrɛtaa miɔŋɔ nɛɛdam ye tɛ bee ɛrɛ a, kerewo, alɛ na Jɛhova bee sagɛ kɔ a su dɔ Mɛnɛ Sɔɔl a.—1 Sam 16:1, 10-13.

2. E na i gaa le nɔ bu ekobee ue ama a?

² Devid bee yiga nu nɛɛ uɛ le yɔɔ bee kɔ kumaloo Jɛhova kɔ: “A ɛp kɛɛ̄ nyɔɔ dɛ̄dɛɛ̄ bunyɔɔ le nyɔuwe, a edana pya kporo lɛɛ bu esaā sa daānage pya a le bu ebɛɛ̄ lɛɛ bu kpo tɔ̄, lokwa ba yɔ pya nɛɛ-bee ɛŋɛtɛ̄kɛ̄.” (Yɔɔ 113:6-8) Bu ekobee ue ama, i gaa le nɔ pya nu anua kumalookɛ̄ lu ebɛɛ̄ tɛ̄maloo e’ɛp pya sīdee Jɛhova bee tɔgɛ elap dogo ama. Sɔ̄ esaa i gaa le ɛp nu i dap nɔ aāloo edoba Mɛnɛ Sɔɔl, nɛɛ mɔmanudɛɛ̄ Daniɛl, le Jizɔs akiiloo ɛrɛ elap dogo kumalookɛ̄.

3. Jɛhova aara i doodoo wa, e e na lo ama i tɔgɛ a?

³ Jɛhova tɔgɛ kɔ a kumaelookɛ̄ bu sīdee a nyɔɔnɛ pya  nɛɛ a naa mmana ba gaa ye taāŋabah danianu. Naale aba bee a su i taāŋabah mɛ a sunage i nua pya ye gbo. (Yɔɔ 25:14) Jɛhova su zaāsī lo edoo kɔ pya nɛɛ a dap ye yii gbo tɛ̄maloo enɛ ye Nwiīnɛɛdam kɔ a u bee i pɔrɔ. Naa ɛp kɛ̄ a i toesaɛ̄, sa lu fɛgɛ loo doo a!

4. E na Jɛhova enɛā i a, e e na anua a?

⁴ Naa kɛɛrɛbu dɔɔ̄na sīdee Jɛhova tɔgɛ kumalookɛ̄. Doodoo Nɛɛ Dɛmnu, Jɛhova ebee i dap dɛm sa naa nɛ i ekpo lo edap sagɛ sīdee tɔɔ̄dum a i nia. Mɛ a naa doowo. A dɛm i bu ye bera sa i nɛ dee esagɛ nu i doo. A gbī kɔ ili pya nɛɛ a kiikɛ̄ i taāŋa ye bah aābu i beenyiɛ, nyɔnɛbee i were ye loo sa i suā kɔ gbāgbaɛ̄ ye tɔ̄loo edɔbiī i nɛ. (Deut 10:12; Ais 48:17, 18) Naa ɛp kɛ̄ alu nu ɛɛbu doo kɔ Jɛhova tɔgɛ dua kumalookɛ̄ ama a!

5. Bu mɛ sīdee na Jɛhova i tɔgɛ kumalookɛ̄ a? (Ɛp foto a le nyɔɔ eko.)

⁵ Jɛhova tɔgɛ i kumalookɛ̄ tɛ̄maloo kɛ̄ a i nyɔɔnɛ danianu doo. Jɛhova na nɛɛ a suānu ee dɛ̄dɛɛ̄ Nɛɛ a le bu nyɔuwe a. Kerewo, a kpɛ̄naloo esu lɛra ekɛɛrɛ a aabah pya dɔɔ̄na. Bu edoba, Jɛhova lɛɛbaloo ye Nwiīnɛɛdam kɔ a nyɔɔnɛ ye dɛm pya dɔɔ̄na nu. (Kam 8:27-30; Kɔl 1:15, 16) E kere Jɛhova ɛrɛ ekpo ee dɛ̄dɛɛ̄ nɛɛ a le bu nyɔuwe, a nɛnage tam pya dɔɔ̄na. Bu edoba, a tubobaloo Jizɔs nua Mɛnɛ bu ye Buɛ̄-mɛnɛ, e a enɛ nage ekpo 144,000 pya nɛɛ ba enyɔɔnɛ Jizɔs bɛɛ. (Luk 12:32) Kɛ̄adoo, Jɛhova ekpɔā Jizɔs nua Mɛnɛ le Gbɛnɛ Nɛɛ Tɛsī Ewɔp. (Hib 5:8, 9) Ekpɔā nage pya a gaa le nyɔɔnɛ Jizɔs bɛɛ, mɛ a naa nɛ wa tam sa obia gbī esi lo tam wa lɛɛbah. Taāwo, a dɛrɛ nyiɛ  nyɔɔ kɔ ba edap doo nu alu ye ekɛɛrɛ.—Mum 5:10.

6-7. E na i dap nɔ aābah i Tɛ a le li bunyɔɔ akiiloo nɛ tam pya dɔɔ̄na a?

⁶ Lo i Tɛ a le li bunyɔɔ a naa gbī yerebah aābah lɔgɔ nɛɛ nɛ tam pya dɔɔ̄na, lo ama kura kɔ ili ɛrɛ edoo nage wo! Bu edoba, ekɔ ɔɔ tɛ bee tɔ ale nɛɛ kanɛɛ ni? Nyɔɔnɛ edoba Jɛhova tɛ̄maloo enɛ tam pya dɔɔ̄na sa o aa wa baɛbee yemakɛ̄. Lo o nɔ Jɛhova, naale aba bee elu esi lo tam, mɛ o kpɔā nage pya dɔɔ̄na sa doo kɔ ba a dap para esi lo tam leere. (Ais 41:10) Dɔɔ̄na e na pya a le dɔ ekpo edap nɔ aābah Jɛhova a?

⁷ Baibol tɔgɛ kɔ Jɛhova ɛrɛ nia bu nu alu ekɛɛrɛ pya ye ɛnjɛl. (1 Mɛnɛ 22:19-22) Pya tɛ le ka, bu mɛ sīdee na buī dap nɔ edoba Jɛhova a? Sɔ̄ a bɔloo, bip pya o miɔŋɔ nu alu wa ekɛɛrɛ akiiloo kɛ̄ a dap lu esi ziī tam doo. E lo a lee, nyɔɔnɛ kɛ̄ ba doba doo.

8. Bu mɛ sīdee na Jɛhova bee tɔgɛ egerebu kumaloo Abreham le Sera a?

⁸ Dɔɔ̄na sīdee Jɛhova tɔgɛ kumalookɛ̄ na tɛ̄maloo kɛ̄ a egerebu doo. Bu edoba, Jɛhova tɔgɛ egerebu sɔ̄ pya a ye si tam nɛ bip ebip akiiloo ye biaɛfii bu enwadɛɛ̄. A bee gbaɛ̄tɔ̄ sɔ̄ Abreham bee kɔ kɛ̄ nu ye tɔɔ̄loo doo kiiloo ye biaɛfii lo egbeesī Sɔdɔm le Gɔmɔra. (Jɛn 18:22-33) Kɛɛrɛbu kɛ̄ Jɛhova bee nyɔɔnɛ wa Abreham a kura Sera danianu doo. A naa bee biirebu ale ɛrɛ saŋ sɔ̄ Sera bee kɛgɛ ye yii kɔ esu bu ye dee anna. (Jɛn 18:10-14) Taāwo, a bee yere ka loo Sera.

9. E na pya tɛ le ka le pya kanɛɛ dap nɔ aāloo edoba Jɛhova a?

⁹ Pya tɛ le ka le pya kanɛɛ, e na bui dap nɔ aāloo edoba Jɛhova a? Naa kɛɛrɛ kɛ̄ o wee doo dogo doo sɔ̄ nu o kɔ naa nia pya o gaa baɛbee. Ekɔ tua nu o wee doo na ekɔ wa nɛ kɔ ba tɛɛ̄ ekwɔ ni? Sɛh o wee gbīge edābeeloo kɛ̄ ba ɛp nu doo ni? Pya butɔ le bɔŋanaloo wee ɛrɛ biī sɔ̄ nɛɛ a gaa baɛbee nɔ edoba Jɛhova. I esua pio sɔ̄ nɔā nu akiiloo kumalookɛ̄ aāloo edoba Jɛhova. Nyaawo doo i naa ɛp nu i dap nɔ aāloo pya dɔɔ̄na edoba a le bu Baibol akiiloo kumalookɛ̄.

10. Bu mɛ sīdee na Jɛhova su edoba pya dɔɔ̄na i tɔŋɛnu a?

¹⁰ Doodoo i Gbɛnɛ “Nɛɛ-tɔgɛ-nu,” Jɛhova enɛa i gbɛnɛ-edo edoba aābu ye Muɛ̄ Ue lo etɔgɛ i nu. (Ais 30:20, 21) I nɔ gbɛnɛ-edo nu sɔ̄ i ɛrɛ ekɛɛrɛ nyɔɔ nu Baibol kɔ akiiloo pya a bee tɔgɛ lele elap dogo Bari, gbaāloo kumalookɛ̄. I nɔnage nu aāloo nu a bee sira loo pya a naa bee tɔgɛ pya lele elap dogo ama.—Yɔɔ 37:37; 1 Kɔr 10:11.

11. E na i dap nɔ aāloo pɔrɔ edoba Sɔɔl a?

¹¹ Kɛɛrɛbu nu a bee siraloo Mɛnɛ Sɔɔl. A bee le zege gbara a bee kumalookɛ̄ sɔ̄ a bee aakɛ̄. A bee suā kɛ̄ a dap doo nu mmɛ sa naa bee gbīna esi dɔɔ̄na tam yereloo. (1 Sam 9:21; 10:20-22) Kerewo, sɔ̄ a esaa Sɔɔl bee eeloo nɛ nyɔɔ, sa doo nu a naa kuu ye. A bee bɔātɛ̄ etɔgɛ pɔrɔ elap ama sɔ̄ sɔ̄ naa binia aā sɔ̄ alu mɛnɛ. A ɛrɛ sɔ̄ a naa bee egerebu, ɛɛ na sɔ̄ a gaa bee tɔɔ̄ baɛ nɛɛ mɔmanudɛɛ̄ Samuɛl. Taā a kumalookɛ̄ sa ture nyiɛ loo Jɛhova kɔ a doo dogo bee pya ye nɛɛ, Sɔɔl bee waara zɔɔ a naa bee ye kuu. A sira kɔ, Sɔɔl bee peere ewonu a aabah Jɛhova sa peere nage ye dɔ mɛnɛ.  (1 Sam 13:8-14) I tɔgɛ kɔ i suāe nu lo i nɔ nu aāloo edoba ama sa ɔbɛ e eeloo nɛ nyɔɔ.

12. Bu mɛ sīdee na Daniɛl bee tɔgɛ kumalookɛ̄ a?

¹² Bu kiiyasī loo pɔrɔ edoba Sɔɔl, naa kɛɛrɛbu le edoba nɛɛ mɔmanudɛɛ̄ Daniɛl. Bu dɛ̄dɛɛ̄ ye tɔɔ̄dum, Daniɛl bee le zooro Bari a kumalookɛ̄ lo a wee gbī leredee a aabah Jɛhova dɛ̄dɛɛ̄ sɔ̄. Bu edoba, sɔ̄ Jɛhova bee ye nɛ suānu etama zagara nɛ Nebukadneza, Daniɛl naa bee su ka nɛ ye loo. Taāwo, a bee kumalookɛ̄ sa su dɛ̄dɛɛ̄ lo ka le leera nɛ Jɛhova. (Dan 2:26-28) E na lo ama i tɔgɛ ani? Lo i ekɔaue nia pya wuga ale i tam zue ue kiisī leere, a lee kɔ i nyɛŋiabu lo esu dɛ̄dɛɛ̄ ka a aaloo nɛ Jɛhova. Bu kumalookɛ̄, i ɛrɛ etɔgɛ kɔ ii lee bee dap doo pya nu ama lo Jɛhova naa bee i yerebah nɛ. (Fil 4:13) Sɔ̄ i doowo, i gaa nɔnage le edoba Jizɔs. Bu mɛ sīdee?

13. E na i nɔ akiiloo kumalookɛ̄ aāloo nu Jizɔs kɔ bu kpa Jɔn 5:19, 30 a?

¹³ Jizɔs bee dɛɛa nyɔɔ Jɛhova, kere a bee le Nwiīnɛɛdam Bari a mmana. (Buū Jɔn 5:19, 30.) A naa bee gbī esu dɔ lɛɛbah ye Tɛ a le li bunyɔɔ. Pya Filipai 2:6 kɔ i nɛ kɔ Jizɔs “naa bee buū lo elu kɛmkɛm loo Bari doodoo nu a zige aā.” Doodoo Nwiī a gbaɛ̄tɔ̄loo, Jizɔs bee suā kɛ̄ a dap doo nu mmɛ, e a bee nɛ enwadɛɛ̄ dɔ ekpo ye Tɛ.

14. E na Jizɔs bee doo sɔ̄ a bee lu ekɔ ye nɛ kɔ a doo nu a naa kuu ye a?

¹⁴ Naa kɛɛrɛ kɛ̄ Jizɔs bee agara ue doo sɔ̄ Jemes le Jɔn gbaāloo wa ka bee ye lu loo sa bip dɔ a naa bee ye kuu lo enɛ wa. Jizɔs naa bee pee sɔ̄ lo ekɔ aba ye Tɛ na a kuu lo ekɔ nɛɛ a e’ɛŋɛ ye tɛ̄ bara bahle ale bahkie bu ye Buɛ̄-mɛnɛ a. (Mat 20:20-23) Jizɔs bee tɔgɛ kɔ a suāe kɛ̄ a dabe doonu mmɛ. A bee kuūnadɛɛ̄. A naa bee doo nu eekɛ̄ Jɛhova bee gbī kɔ a doodoo. (Jɔn 12:49) Bu mɛ sīdee na i dap nɔ le edoba Jizɔs ama a?

15-16. Bu mɛ sīdee na i dap su zuurabahtɔ̄ a le bu 1 Pya Kɔrint 4:6 daānu a?

¹⁵ I nɔ edoba Jizɔs tɛ̄maloo esu zuurabahtɔ̄ a le bu 1 Pya Kɔrint 4:6 yere bu dogo. Alu ekɔ i nɛ kɔ: I “tɔɔ̄dum dookɛ̄  kpa kaɛ kɔ doo.” Nyɔɔwo, sɔ̄ alu egbī zuurabahtɔ̄ i aābah ii le ekɔ ilii ekɛɛrɛ, ale bagara kɔ ue sɔ̄ i sii dābeeloo leere. Taāwo, i gbī zuurabahtɔ̄ a aabu Baibol le pya i kpa a dɛɛa nyɔɔ Baibol. Lo i doo wo, i tɔgɛ kɔ i suāe kɛ̄ i dap doo nu mmɛ. Tɛ̄maloo kumalookɛ̄, i nɛ ye ka doodoo Nɛɛ A Eenyɔɔ Dɛ̄dɛɛ̄ Nu le nɛɛ a wee “biaɛ” leere.—Mum 15:3, 4.

¹⁶ Kaɛlɛɛ nɛ ka Jɛhova, a ɛrɛ pya dɔɔ̄na nu anua i kumalookɛ̄. Nyaawo, i gaa le nɔ kɛ̄ kumalookɛ̄ le kuūnadɛɛ̄ dap doo kɔ i ɛrɛ ɛɛbu sa i yerebah nɛ lo enyɔɔnɛ pya nɛɛ tɔɔ̄ bu efɛɛloo doo.

17. E na anua pya a kumalookɛ̄ sa kuūnadɛɛ̄ wee ɛrɛ ɛɛbu a?

¹⁷ Sɔ̄ i kumalookɛ̄ sa kuūnadɛɛ̄, i ɛrɛ ɛɛbu. E na anua a? Sɔ̄ i suā kɛ̄ i dap doonu mmɛ, bu i e’ɛɛ lo esu ɛrɛgeba yerebah pya dɔɔ̄na i nɛ. Bu edoba, naa kɛɛrɛbu sɔ̄ Jizɔs bee boh lop nɛɛ ebiakpaŋ. Aba ziī aba na a bee obia lu wee ye edoo yaa a, nyɔnɛbee lo nɛɛ naale ebee dap boh aba ɛɛ. Nɛɛ a kumalookɛ̄ sa kuūnadɛɛ̄ ama bee doo yaa nyɔɔ kɛ̄ a bee lu eyerebah ye nɛ doo, sa a nɛ ka Bari.—Luk 17:11-19.

18. Bu mɛ sīdee na kumalookɛ̄ le kuūnadɛɛ̄ i yerebah nɛ kɔ i nyɔɔnɛ pya dɔɔ̄na danianu a? (Pya Rom 12:10)

¹⁸ Pya a kumalookɛ̄ sa kuūnadɛɛ̄ wee nyɔɔnɛ pya dɔɔ̄na danianu sa ɛrɛ pya gbo a wa tɔɔ̄ waɛloo. E na anua ani? Ba suā kɔ pya dɔɔ̄na ɛrɛ lele elap dogo sa wa dɛrɛ nyiɛ nyɔɔ. Pya a kumalookɛ̄ sa kuūnadɛɛ̄ wee ɛrɛ ɛɛbu sɔ̄ pya dɔɔ̄na si ɛrɛgeba tam ba wa nɛ leere sa ba wee wa nwaabah kaɛgɛ sa wa yere ka loo.—Buū Pya Rom 12:10.

19. Pio e na anua ii le e eeloo nɛ nyɔɔ a?

 ¹⁹ Bu kiiyasī, a wee agabah pya ba eeloo nɛ nyɔɔ eleera pya dɔɔ̄na, nyɔnɛbee ba ɛmadɛɛ̄ kɔ ba alaba na ka bɔloo a. Ba wee su loo wa doloo pya dɔɔ̄na sa gbī etɔgɛ kɔ ba lee wa ee. Nɛɛ a eeloo nɛ nyɔɔ wee gbī esu bah daānu, nyɔnɛbee a kɛɛrɛ kɔ pya dɔɔ̄na naale epara edoo. Nɛɛ a eeloo nɛ nyɔɔ wee gbī e eenyɔɔ pya dɔɔ̄na sa wa manyiɛ sɔ̄ ba ye doo nu leere ee. (Gal 5:26) Pya a le doo wo naa wee aadee ɛrɛ gbo a biɛ̄. Lo a le i muɛ̄ kɔ i ee e loo nɛ nyɔɔ, i bara Jɛhova kɔ a yerebah i nɛ kɔ ‘i nyaana i ekɛɛrɛ’ lokwa pɔrɔ elap dogo ama naa de i lɛɛ.—Rom 12:2.

20. E na anua i kumalookɛ̄ sa kuūnadɛɛ̄ ani?

²⁰ Bu i ɛɛ kaāna kɔ Jɛhova sere le edoba kɛ̄ i nɛ. Ye kumalookɛ̄ sira bu kɛ̄ a nyɔɔnɛ pya ye zooro danianu doo, sa i gbī enɔ ye. Gbaāloo wo, i gbī enɔ lele edoba a le bu Baibol akiiloo pya a bee si tam nɛ Bari bu kumalookɛ̄. Doraa i kiisī lo eleera Jɛhova sa ye nɛ ka a bɔloo. (Mum 4:11) Lo i doowo, i dap nage lu gbo i Tɛ a le li bunyɔɔ, lo a wereloo pya a kumalookɛ̄ sa kuūnadɛɛ̄.