1. Amunu dee na a i kpaā nɛ a?

MƐ DUA ka i ɛrɛ lo ele bu bɔŋanaloo Jɛhova sɛh! I le bu paradais bu edɔɔ̄ lo pya a mma bu na pya nɛɛ efɛɛloo le pya nɛɛ a ɛrɛ ɛɛbu. Amunu tam na o gaa si bu bɔŋanaloo a?

2. Amunu edoba na Pɔɔl bee su kɔā ue bu gbɛnɛ-edo pya ye kpa a bee ɛm tɛ̄maloo kaɛ edɔɔ̄ a?

² I dap nɔ gbɛnɛ-edo nu akiiloo i tam bu bɔŋanaloo aāloo edoba nɛɛ lɛɛratam Pɔɔl bee su kɔā ue bu gbɛnɛ-edo pya ye kpa a bee ɛm tɛ̄maloo kaɛ edɔɔ̄. Bu ziī ziī pya lo kpa, Pɔɔl su ekpaloo nɛɛ dooreloo bɔŋanaloo. A bee sunage ziī ziī nɛɛ a le bu bɔŋanaloo dooreloo pya kɛ̄ a le loo nɛɛ.—Rom 12:4-8; 1 Kɔr 12:12-27; Ɛfɛs 4:16.

3. Taa amunu nu enɔ na i gaa le nɔ bu lo ekobee ue ama a?

³ Bu ekobee ue ama, i gaa le nɔ taa nu enɔ alu gbɛnɛ aāloo edoba Pɔɔl bee su kɔā ue. Tuatua, i gaa le nɔ kɔ ziī ziī ii ɛrɛ tam * esi bu bɔŋanaloo Jɛhova. Eree baɛ, i gaa le nɔ nu ziī ziī ii dap doo lo a aga i bah esuā nu alu i tam bu bɔŋanaloo. Eree taa, i gaa le nɔ nu anua alu ebɛɛ̄ kɔ i kiisī lo ewee si tam Bari bee i nɛ bu bɔŋanaloo.

4. E na Pya Rom 12:4, 5 i tɔgɛ a?

⁴ Tua nu i dap nɔ aāloo edoba Pɔɔl bee su kɔā ue na kɔ ziī ziī ii ɛrɛ gbɛnɛ tam esi bu bɔŋanaloo Jɛhova. Pɔɔl bee bɔātɛ̄ ekɔ lo edoba nu tɛ̄maloo ekɔ: “Nyɔnɛbee dookɛ̄ i ɛrɛ keekee kɛ̄ a le loo ziī nɛɛ doo, e dɛ̄dɛɛ̄ kɛ̄ a naa gbaa ɛrɛ aba tam, kɛ̄ ili i kuikpo doo gbaa lu aba ekpaloo bu Kraist, e ziī ziī ii yerebah nɛ ziī doodoo keekee kɛ̄ a le loo nɛɛ.” (Rom 12:4, 5) E na Pɔɔl gaa bee kɔ a? Ziī ziī ii ɛrɛ keekee nu edoo bu bɔŋanaloo, kerewo ziī ziī ii gaa dɔ gbɛnɛ biī.

5. Amunu “dɔɔ̄nu” na Jɛhova enɛa ye bɔŋanaloo a?

⁵ Sɔ̄ o kɛɛrɛbu pya a ɛrɛ nu edoo bu bɔŋanaloo, nyiɛ a enwaaba kiiloo pya a gaa su zaāsī. (1 Tɛs 5:12; Hib 13:17) Alu kaka kɔ Jɛhova tɛ̄maloo Kraist enɛa “dɔɔ̄nu bu nɛɛ” kɔ ba a kuūdɛɛ̄loo ye bɔŋanaloo. (Ɛfɛs 4:8) Pya “dɔɔ̄nu bu nɛɛ” ama lunage yii bu Eku A Baɛbee, pya alu etubobaloo kɔ ba a yerebah nɛ Eku A Baɛbee, Kɔmitii a gaa kuūdɛɛ̄loo Tɔ naa tam, pya kuūdɛɛ̄loo sɛkiut, pya a wee tɔgɛnu bie keekee tɔkpa bɔŋanaloo, pya kanɛɛ, le pya yerebah tam. Lu etubobaloo dɛ̄dɛɛ̄ pya wuga nɛɛdam ama tɛ̄maloo kaɛ edɔɔ̄ lokwa ba dap kuūdɛɛ̄loo pya naana pee Jɛhova a ye kuī loo, le kɔ ba a yere mɛm loo bɔŋanaloo.—1 Pit 5:2, 3.

6. Dookɛ̄ 1 Pya Tɛsalɔnaika 2:6-8 kɔ doo, e na pya wuga nɛɛdam alu etubobaloo tɛ̄maloo kaɛ edɔɔ̄ piiga lo edoo a?

⁶ Lu etubobaloo pya nɛɛdam tɛ̄maloo kaɛ edɔɔ̄ lokwa ba aabaloo keekee dɔtam bu bɔŋanaloo. Dookɛ̄ keekee kɛ̄ a le ekpaloo nɛɛ, doodoo bah le ekpotɔ gbaa si tam sa dɔbiī nɛ dɛ̄dɛɛ̄ ekpaloo nɛɛ doo, kɛ̄ pya wuga nɛɛdam alu etubobaloo tɛ̄maloo kaɛ edɔɔ̄ ama bii nage bahkɛ̄ si tam a edɔbiī nɛ bɔŋanaloo doolo. Ba naa gbī ka a aabah pya dɔɔ̄na. Taāwo, ba piiga lo ewu sa yere mɛm loo pya wuga nɛɛdam le nɛɛwa a le bu bɔŋanaloo. (Buū 1 Pya Tɛsalɔnaika 2:6-8.) I doo yaa Jɛhova loo pya wuga nɛɛdam ba nyim tura bu edɔɔ̄ sa kiisī lo eyerebah nɛ pya dɔɔ̄na ama!

7. Amunu leelee na pya a le bu esiatam mmɛɛ̄ sɔ̄ ɛrɛ a?

⁷ Dap lu etubobaloo pio nɛɛ a le bu bɔŋanaloo kɔ ba a si tam doodoo pya zue ue aā ziī edo yii ziī, pya sɛmdee bu keebee sīdee, le pya sɛmdee dɛ̄dɛɛ̄ sɔ̄. Bu kaka, pya wuga nɛɛdam le nɛɛwa tɛɛ̄ ɛŋɛnɛ nyɔuwe esua tam zue ue le doo kɔ pya nɛɛ a nyɔɔnɛ dumɛ Jizɔs nua tam ba si dɛ̄dɛɛ̄ sɔ̄. Tɛ̄maloo wo, ba eyerebah nɛ gbɛnɛ-edo nɛɛ kɔ ba alu pya a nyɔɔnɛ dumɛ Jizɔs Kraist. Kere pya a gaa si tam mmɛɛ̄ sɔ̄ ama ɛrɛ nwīgbagbara nu bu namloo, Jɛhova enɛā wa gbɛnɛ-edo leelee bu wa dum. (Maak 10:29, 30) Bu i ɛɛ loo pya wuga nɛɛdam le nɛɛwa ama, e i tɔgɛ nia loo tam ba gaa si bu bɔŋanaloo!

8. E na anua dɛ̄dɛɛ̄ pya zue ue kuī loo Jɛhova a?

⁸ Lege aba pya wuga nɛɛdam alu etubobaloo le pya a le bu esiatam zue ue mmɛɛ̄ sɔ̄ na a ɛrɛ tam esi bu bɔŋanaloo a? Eeye doo pippip! Dɛ̄dɛɛ̄ pya zue ue kuī loo Bari le ye bɔŋanaloo. (Rom 10:15; 1 Kɔr 3:6-9) Bu kaka, ziī gbɛnɛ nu bɔŋanaloo seea sī na lo edoo kɔ pya nɛɛ a nyɔɔnɛ dumɛ Nɛɛ-a-i-ɛrɛ Jizɔs Kraist. (Mat 28:19, 20; 1 Tim 2:4) Dɛ̄dɛɛ̄ pya a le bu bɔŋanaloo, pya eliamaā le pya a sii  liamaā su tam zue ue nua nu a wa kuī loo kaāna.—Mat 24:14.

9. E na anua i tɔgɛ nia loo pya nɛɛwa ba lu pya Nɛɛ Kraist a?

⁹ Jɛhova nɛ dɔ ka pya wuga nɛɛwa ba lu pya Nɛɛ Kraist bu bɔŋanaloo tɛ̄maloo enɛ wa tam esi. A tɔgɛ nia loo pya wa, pya ka, pya wa ua dam, le pya wuga nɛɛwa ba le aba aba lo ba gaa ye taāŋabah bu yira agɛrɛ. Gbɛnɛ-edo sɔ̄, Kpa Kaɛ kɔ nu akiiloo pya nɛɛwa ba bee doo nu Bari gbī. Alu eka wa kɔ ba tɔgɛ le edoba bu e’ɛrɛ suānu, yira, mɛm, e’agaloo, para dɔɔ̄ nu, sa si le tam. (Luk 8:2, 3; Doonu pya Nɛɛ lɛɛratam 16:14, 15; Rom 16:3, 6; Fil 4:3; Hib 11:11, 31, 35) I doo yaa Jɛhova kaāna loo pya nɛɛwa ba lu pya Nɛɛ Kraist ba le bu i bɔŋanaloo, pya nɛɛwa ba ɛrɛ dua lele elap dogo ama!

10. Ena anua bu i ɛɛ loo pya nama nɛɛ a i le yɛɛ a?

¹⁰ Bu i ɛɛnage kɔ i ɛrɛ gbɛnɛ-edo pya nama nɛɛ ba le bu i bɔŋanaloo. Pio pya wuga nɛɛdam le nɛɛwa ba e’ana lo ba esua dɛ̄dɛɛ̄ wa dum siātam nɛ Jɛhova le bu pio bɔŋanaloo. Dap lu kɔ pio pya nama nɛɛ ama yii bu bɔŋanaloo aā. Ɛrɛgeba kɛ̄ a le doo, dap lu kɔ pya nama nɛɛ ama gaa kpesī keekee dumɛloo nyɔɔbee ba e’ina gaa anna. Pya dumɛloo ama dap doo kɔ ba aa dapna si pio tam bu bɔŋanaloo le tam zue ue. Kerewo, pya nama nɛɛ ama doo kuma kɛ̄ ba dap doo bu tam zue ue, e ba sunage wa mɛm yeābah nɛ pya dɔɔ̄na sa wa kpɔā! E i ɛrɛ biī aāloo wa suānu. Bu kaka, ba lu nu ka nɛ Jɛhova le ili.—Kam 16:31.

11-12. Bu mɛ sīdee na pya zege a le bu bɔŋanaloo eyere a mɛm loo a?

¹¹ Naa kɛɛrɛ nage nu akiiloo pya zege. Ba gaa kpesī gbɛnɛ-edo taāŋa kuma sɔ̄ ba le bu nyɔuwe Setan gaa bɛɛ tɛ̄maloo ye pɔrɔ ekɛɛrɛ ama. (1 Jɔn 5:19) Kerewo, dɛ̄dɛɛ̄ ii ɛrɛ e’agaloo sɔ̄ i muɛ̄ pya zege ba agara ebip bie pya i enɔānu, si tam zue ue, sa su e’agaloo kɔā ue bee  wa yira. Bu kaka, bɔɔlo pya zege ɛrɛ gbɛnɛ tam bu bɔŋanaloo Jɛhova!—Yɔɔ 8:2.

¹² A agabah pio pya i wuga nɛɛdam le nɛɛwa lo eyiga kɔ ba gaa sie gbɛnɛ tam bu bɔŋanaloo. Ena edap i yerebah nɛ kɔ i suā kɔ i gaa si gbɛnɛ tam bu bɔŋanaloo ani? Doraa i naa ɛp.

13-14. E na a dap doo kɔ pio nɛɛ a kɛɛrɛ kɔ ba naa le e dɛɛ̄ lɔgɔ nu bu bɔŋanaloo a?

¹³ Yere nukuādɛɛ̄ loo eree baɛ nu i dap nɔ aāloo edoba Pɔɔl bee su kɔā ue. A bee kɔ ue kumaloo taāŋa gbɛnɛkpo nɛɛ ɛrɛ anii’ee; kɔ a agabah pya nɛɛ eyiga kɔ ba lue gbɛnɛ bu bɔŋanaloo. Pɔɔl bee ɛm kɔ: “Lo a le ekpotɔ kɔ, ‘Nyɔnɛbee mm le bah, mm le loo ekpaloo,’ lo ama naale edoo kɔ aa le loo ekpaloo a. E lo a le tɔ̄ kɔ, ‘Kɛ̄ mm le dɛɛ̄ doo, mm le loo ekpaloo a,’ lo ama naale edoo kɔ aa le loo ekpaloo.” (1 Kɔr 12:15, 16) E na Pɔɔl gaa bee gbi kɔ i suā a?

¹⁴ Lo o su oloo dooreloo pya dɔɔ̄na bu bɔŋanaloo, o dap bɔātɛ̄ ekɛɛrɛ kɔ oo le e dɛɛ̄ lɔgɔ nu. Siga pya ba le bu bɔŋanaloo para tɔgɛnu, para nɔɔ̄nu, ale para yere mɛm loo sa gbɔ̄nyiɛ pya dɔɔ̄na. Naa daba o kɛɛrɛ kɔ oo para edoo nu dookɛ̄ pya dɔɔ̄na doo. Lo ama tɔgɛ kɔ o kumalookɛ̄ sa kuūnadɛɛ̄. (Fil 2:3) Mɛ nwaɛ̄dɛɛ̄ a. Lo a le o kiisī lo esu o loo doloo pya nɛɛ ba para edoo pio nu, dap a ɔɛloo. Dap nage a tɔɔ̄loo dookɛ̄ Pɔɔl bee kɔ doo, kɔ oo ɛrɛe lɔgɔ tam o dap si bu bɔŋanaloo. E na edoo kɔ o dap be eeba dua ekɛɛrɛ ama a?

15. Dookɛ̄ 1 Pya Kɔrint 12:4-11 kɔ doo, e na a bɔloo kɔ i suā akiiloo ɛrɛgeba nu i para a?

¹⁵ Naa kɛɛrɛbu ue ama: Tɛ̄maloo kaɛ edɔɔ̄, Jɛhova bee nɛ ekpo pio pya Nɛɛ Kraist bu tua sɔ̄ o’oo tup zua lo esiā nyɛŋiatam, mɛ a naale dɛ̄dɛɛ̄ pya Nɛɛ Kraist ama na a bee ɛrɛ aba dɔɔ̄nu a. (Buū 1 Pya Kɔrint 12:4-11.) Jɛhova bee wa nɛ keekee dɔɔ̄nu le ekpo,  mɛ ziī ziī pya Nɛɛ Kraist ama bee ye kuī loo. Bu ilii dee ama, ii ɛrɛ dɔɔ̄nu siā nyɛŋiatam tɛ̄maloo kaɛ edɔɔ̄, mɛ i kuī nage loo Jɛhova. Dap lu kɔ nu i para naa lu aba etɛɛ̄nɛ, kerewo dɛ̄dɛɛ̄ ii kuī loo Jɛhova.

16. Amunu zuurabahtɔ̄ nɛɛ lɛɛratam Pɔɔl na a bɔloo kɔ i gbaɛ̄tɔ̄loo a?

¹⁶ Taā i su i loo dooreloo pya dɔɔ̄na Nɛɛ Kraist, i gbaɛ̄tɔ̄ zuurabahtɔ̄ Nɛɛ lɛɛratam Pɔɔl bee nɛ tɛ̄maloo kaɛ edɔɔ̄ a kɔ: “Mɛ doolo ziī ziī nɛɛ ɛma ɛp alɛɛ tam, e lo sɔ̄ e’ɛɛŋa bu aba alɛɛ loo, e a naale lo dɔɔ̄na nɛɛ.”—Gal 6:4.

17. Amunu biī na i ɛrɛ lo i gbaɛ̄tɔ̄loo zuurabahtɔ̄ Pɔɔl a?

¹⁷ Lo i su zuurabahtɔ̄ Nɛɛ lɛɛratam Pɔɔl bee nɛ tɛ̄maloo kaɛ edɔɔ̄ sa ɛma ɛp nu i gaa doo, i dap bɔātɛ̄ emuɛ̄ kɔ a ɛrɛ pya nu i para le pya nu i dap doo a lee kaāna. Bu edoba, dap lu kɔ ziī nɛɛ kanɛɛ naa aadee para nɛ ekɔaue bie enɔānu, mɛ a para nɔɛ̄nu nɛɛ bie uwe zue ue. Ale bee a naa para nɔɔ̄nu leere bee pya dɔɔ̄na nɛɛ kanɛɛ bu bɔŋanaloo, mɛ a para yere mɛmloo sa kpɔā pya dɔɔ̄na bu wereloo, sa lu nɛɛ a para eyerebah nɛ pya wuga nɛɛdam le nɛɛwa sɔ̄ ba gbī yerebah. Ale bee a para aara saanɛɛ. (Hib 13:2, 16) Sɔ̄ i muɛ̄ nu i para le kɛ̄ i dap doo nu doo, edoo kɔ loo i a sukɛ̄ kiiloo nu i gaa doo bu bɔŋanaloo. E lo sɔ̄ ii lee baaloo pya i wuga ba para edoo nu alu kee loo nu ili para.

18. E na i doo lokwa i para etɔgɛ nu a?

¹⁸ Kaɛlɛɛ ɛrɛgeba nu i gaa doo bu bɔŋanaloo, dɛ̄dɛɛ̄ ii ɛrɛ enyimɛ i esiatam sa doo pya nu i dap doo leere. Lokwa i dap nyim kiisī, Jɛhova nɛ i keebee kpɔā tɛ̄maloo ye bɔŋanaloo. Bu edoba, bu i enɔānu taɛyɛɛ kaɛ, lu etɔgɛ i kɛ̄ i dap sitam zue ue leere doo. O gaa suge lo kpɔā ama daānu leere ni?

19. E na o doo lo edap si Tɔkpa Pya Zue Ue Buɛ̄-mɛnɛ a?

¹⁹ Dɔɔ̄na sīdee alu ekpɔā pya nɛɛ na tɛ̄maloo Tɔkpa Pya Zue Ue Buɛ̄-mɛnɛ. Pya a dap si tɔkpa ama na pya wuga nɛɛdam le nɛɛwa ba gaa si tam sɛmdee dɛ̄dɛɛ̄ sɔ̄ ba elua 23 mmɛ 65 zua. Dap a tɔɔ̄loo kɔ oo le edabe si tɔkpa ama. Taā o kɛɛrɛ pya nu anua oo le edap si lo tɔkpa, kɛɛrɛ pya nu anua o gbī esi. Lɛɛ o bɔātɛ̄ doo pya nu edoo kɔ o nyim tura. Tɛ̄maloo yerebah a aabah Jɛhova le oloo epiaga, o dap doo nu oo bee ɛmadɛɛ̄ kɔ o dabe doo.

20. E na i dap nɔ aābu Pya Rom 12:6-8 a?

²⁰ Eree taa nu i dap nɔ aāloo edoba Pɔɔl bee su kɔā ue le bu Pya Rom 12:6-8. (Buū.) Bu dɔ Kpa Kaɛ ama, Pɔɔl sinagekɛ̄ tɔgɛ kɔ dɛ̄dɛɛ̄ nɛɛ a le bu bɔŋanaloo ɛrɛ keekee nu ba para. Mɛ bu kɛ̄ ama, Pɔɔl baatɛ̄ kaāna kɔ i su ɛrɛgeba nu i para yeā mɛm loo sa wuā bɔŋanaloo agɛrɛ.

21-22. E na i dap nɔ aāloo edoba Robert le Felice a?

²¹ Naa kɛɛrɛ nu a bee sira loo ziī wuga nɛɛdam alu ekure Robert. Sɔ̄ esiatam bu dɔɔ̄na edo sah, bee lu ekɔ a si tam Bɛtɛl bie alɛɛ edo. Kere adoo pya wuga bee ye kɔ nɛ kɔ a naa lu enyaana ye tam nyɔɔbee a doo ziī piya nu, alɛ bee kɔ: “Bu pio enɔɔ̄ mm bee ɛrɛ ɛɛbu nyɔɔbee a bee mɛ tɔɔ̄loo kɔ mm gaa bee sina tam leere. Ɛrɛ pya sɔ̄ m bee gbī e’ɔbɛ tam Bɛtɛl.” A bee tɛɛ̄ doodoo wa sikɛ̄  ɛrɛ ɛɛbu ni? Ziī nɛɛ kanɛɛ bee ye nyɛŋiabu kɔ Jɛhova ekpɔā ziī ziī ii bu i nama tam lokwa i dap doo leere bu lo aā tam. Robert bee dābeeloo kɔ alu ebɛɛ̄ kɔ a ɔbɛ ekɛɛrɛ nu etɛ̄na sa bɔātɛ̄ ebie ekɛɛrɛ nyɔɔ nu a ɛrɛ edoo anyaawo.

²² Wuga Felice Episcopo bee kpe nage sī dua nu finiabah ama. Ye wa le ɛɛ bee aa Tɔkpa Gilead bu zua 1956 sa si tam doodoo nɛɛ kuūdɛɛ̄loo sɛkiut li Bolivia. Bu zua 1964 ba bee ɛrɛ nwiī. Felice bee kɔ: “A bee lu gbɛnɛ nu finiabah lo e’aaloo tam a bee i nia kaāna ama. Bu nu a luge ziī zua, m bee le bu ekiɛ̄nu le e’ɔaloo. Mɛ tɛ̄maloo yerebah Jɛhova, m bee nyaana na elap dogo sa sere ekɛɛrɛ nyɔɔ toh a mɛ le bee doodoo tɛ.” Ekɔ nu tɔɔ̄ a loo dookɛ̄ a bee tɔɔ̄loo Robert ale Felice doo ni? Loo a ɔ nyɔɔbee dɔtam a bee a le bah sɔ̄ akii adumɛ naa a lena bah ni? Lo a le wo, o sikɛ̄ ɛrɛ ɛɛbu lo o sere ekɛɛrɛ nyɔɔ nu o dap doo anyaawo lo esitam nɛ Jɛhova sa sinage tam nɛ pya o wuga. Ɛrɛ gbɛnɛkpo tam esi, sa su nu o para le mɛm o ɛrɛ yeābah nɛ pya dɔɔ̄na, e o gaa le ɛrɛ ɛɛbu kuma sɔ̄ o gaa yerebah lo eyere mɛm loo bɔŋanaloo.

23. E na i su sɔ̄ daā a, e e na i gaa le kɔ ue nyɔɔ bu lo ekobee ue enyɔɔnɛ a?

²³ Ziī ziī ii kuī loo Jɛhova. A gbī kɔ i nuūna ye butɔ. Lo i su sɔ̄ ɛā ekɛɛrɛ nyɔɔ nu i dap doo lo ewu pya i wuga nɛɛdam le nɛɛwa agɛrɛ sa piiga lo edoo wo, ii le ekɛɛrɛ kɔ ii nuūna e bɔŋanaloo. E kiiloo kɛ̄ i ɛp pya nɛɛ a le bu i bɔŋanaloo doo a? Bu mɛ sīdee na i dap tɔgɛ kɔ i weree wa loo sa wa nɛ enwadɛɛ̄ a? Bu ekobee ue enyɔɔnɛ ama, i gaa le kɔ ue nyɔɔ kpog-bee ue ama.