1. Bu mɛ sīdee na i ɛrɛ biī aāloo kɔ nu akiiloo kɛ̄ i bee tɛɛ̄ doo yii bu “kaka” a?

 “O BEE tɛɛ̄ doodoo wa yii bu kaka ni?” Lɔgɔ baɛbaɛ beenyiɛ naale loo kɔ o e agara ebip ama gbɛnɛ-edo sɔ̄. Ebip ama le yɛɛ tua ebip i wee bip nɛɛ wuga i gbī esuāloo leere. Wee i nia lo edā kɛ̄ i wuga nɛɛdam ale nɛɛwa bee tɛɛ̄ doo suāloo Jɛhova sa ye wereloo, sa a wee i nianage ekɔ wa nɛ nu anua a nia i elu ziī nɛɛ Ekeebee Jɛhova. (Rom 1:11) Dua kɔnia sɔh ama wee doo kɔ i agɛrɛbah suā kɛ̄ kaka ue kuī doo. Wee doonage kɔ i agɛrɛbah kiisī lo e “tɔɔ̄ dum bu kaka.” Lo a kura kɔ a doo kɔ i sīkɛ̄ biaɛfii lo etɔɔ̄dum bu sīdee edoo kɔ Jɛhova a yere i kpotɛ̄ sa i nɛ leelee.—3 Jɔn 4.

2. Ena i nɔ bu ekobee ue ama a?

² Bu ekobee ue ama, i kɔ ue nyɔɔ pio nu anua i wereloo kaka ue. E i gaa le muɛnage kɛ̄ i dap kiisī lo etɔgɛ kɔ i wereeloo kaka ue doo. Baɛbaɛ beenyiɛ naale loo kɔ nu i gaa le nɔ ama edoo kɔ i tɔgɛ nia loo nu Jɛhova doo lo esu i yere bu kaka. (Jɔn 6:44) Edoonage kɔ i agɛrɛbah ɛrɛ taɛ lo etɔgɛ kaka ue Baibol pya dɔɔ̄na.

3. Ziī e a kuī gbɛnɛ na anua i wereloo kaka ue a?

³ Ɛrɛ gbɛnɛ-edo nu anua i wereloo kaka ue. Lo a kuī ee dɛ̄dɛɛ̄ ɛɛ na bee i wereloo Jɛhova Nɛɛ kaka  ue tɛɛ̄ aabah. Aāloo pya nu i buū aābu Baibol, naale aba kɔ i suā ye loo doodoo nɛɛ a bee dɛm bunyɔɔ le kɛnɛkɛ̄, mɛ i suānage ye loo nua i Tɛ a le li bunyɔɔ a i wereloo sa i kuūdɛɛ̄loo leere. (1 Pit 5:7) I suā kɔ ilii Bari lu Bari “toesaɛ̄ le ewonu, lo a naa wee nwaabah ɛrɛ saŋ, sa mma bu wereloo a naa wee nyaa le kaana yira.” (A’aa 34:6) Jɛhova wereloo kaāna biaɛ. (Ais 61:8) A zi ye loo sɔ̄ a muɛ kɔ i gaa tɔga, e a taɛ ye kaāna lo elɛɛ tɔga bu nyɔuwe. (Jer 29:11) A taɛnage i lo emuɛ sɔ̄ tɔga naale elena! Kɛādoo i wereloo Jɛhova gbɛnɛ a lo!

4-5. Ena anua nɛɛ lɛɛratam Pɔɔl bee su i bɛābu dooreloo kpe aa fah a?

⁴ Dɔɔ̄na ena anua i wereloo kaka a? Kaka ue dɔbiī i nɛ kaāna. Naa ɛp ziī edoba ama. Bɛābu i ɛrɛ kiiloo deesī le yɛɛ kaka ue. Lo ebaatɛ̄ kɛ̄ bɛābu ama kuī doo, nɛɛ lɛɛratam Pɔɔl bee ɛm kɔ: “I ɛrɛ nu ama doodoo kpe aā fah lo i dap ture nyiɛ loo bu beenyiɛ sa yira agɛrɛ.” (Hib 6:19) Dookɛ̄ kpe aā fah wee doo kɔ fah maā aa yɛɛ aa doo, kɛ̄ bɛābu i ɛrɛ aābu Baibol doonage kɔ i aa nyɔŋa sɔ̄ doā-ɛp i lu loo doo lo.

⁵ Bu dɔ kpa kaɛ ama, Pɔɔl bee le aa kɔ nu akiiloo bɛābu pya alu etɔ̄ nɔɔ̄ bee ɛrɛ. Mɛ pya nu a bee kɔ ama, kuunage Pya Nɛɛ Kraist ba ɛrɛ bɛābu lo etɔɔ̄ a kɛnɛkɛ̄ bu paradais mmɛ deedee. (Jɔn 3:16) Bu kaka, nɔnɔ nu akiiloo bɛābu dum a naatah edora kɔ i dum a ɛrɛ kaāna nu a kura.

6-7. Amunu biī na Yvonne e’ɛrɛ aāloo nɔ kaka ue akiiloo deesī a?

⁶ Naa ɛp ziī nu a bee sira loo ziī wuga nɛɛwa ye bee kura Yvonne. A naa bee lu emaɛ ye bu kaka ue, e bɔɔ wee ye aa loo luh sɔ̄ a bee lege pya miɔŋɔ. A bee nyɛŋiabu sɔ̄ a bee buū ziī ue a kɔ: “Ziī dee a ee, lɔgɔ nyɔɔ’ee li naale elena.” A kɔ: “Pya ue ama bee doo kɔ m aa dap daa uunɛ, sa m wee le aa bura nu esira i loo li deesī. M bee kɛɛrɛ bu na loo kɔ ‘Ɛrɛge e’ɛrɛ taɛ nu dum kura,’ ‘Ena anua m le akɛāma ani?’ Mm bee gbī e’u!”

⁷ Sɔ̄ esaa, sɔ̄ a bee lege bu ye lop le dɛrɛ zua, Pya Ekeebee Jɛhova bee zue ue nɛ Yvonne. A kɔ: “M bee bɔātɛ̄ eyiga kɔ m dap ɛrɛ bɛābu lo etɔɔ̄ bu paradais a nyɔɔ kɛnɛkɛ̄ mmɛ deedee.” Nɔnɔ kaka ue bee dɔbiī nɛ i wuga nɛɛwa ama doodoo wa? A kɔ yereloo kɔ: “Mm aana daa uunɛ sa bura kɛ̄ i deesī li emɛā doo ale nu akiiloo luh.” O dap muɛ kɔ Yvonne wereloo kaka ue kaāna, e a nia ye ekɔ bɛābu a ɛrɛ kiiloo deesī li nɛ pya dɔɔ̄na.—1 Tim 4:16.

8-9. (a) Bu ziī kam Jizɔs, bu mɛ sīdee na ziī gbara bee tɔgɛ nia loo zɔ a bee muɛ a? (b) O tɔgɛ nia loo dee o ɛrɛ lo ele bu kaka doodoo wa?

⁸ Yere ue akiiloo Buɛ̄-mɛnɛ Bari lenage yɛɛ kaka ue Baibol. Jizɔs bee su kaka akiiloo lo buɛ̄-mɛnɛ dooreloo zɔ a gɔā. Dookɛ̄ a le bu Matiu 13:44 doo, Jizɔs bee kɔ: “Buɛ̄-mɛnɛ bunyɔɔ doodoo zɔ a bee lu egɔ̄ bu uwe, lo nɛɛ bee muɛ sa gɔ̄; lo sɔ̄ a, aā bu ye ɛɛbu a kii sa oo dɛ̄dɛɛ̄ nu a ɛrɛ sa nyaa kere uwe a.” Yere nukuādɛɛ̄ loo kɔ lo gbara naa gaa bee gbī lo zɔ. Mɛ sɔ̄ a bee muɛ, a bee doo dɛ̄dɛɛ̄ nu a dap doo lo e’ɛrɛ. A bee oo dɛ̄dɛɛ̄ nu a bee ɛrɛ. Ena anua a? A bee suā kɛ̄ lo zɔ si gbɛnɛ du doo. Ye biī ee dɛ̄dɛɛ̄ nu a bee peere.

 ⁹ Lege kɛ̄ kaka ue a tɔɔ̄loo doolo ni? Taɛ kɛ̄ a le doo lo! I suā kɔ lɔgɔ nu a le bu nyɔuwe ama i dap su dooreloo taāŋabah Jɛhova anyaawo le bɛābu dum a naatah i ɛrɛ li deesī kɛɛ̄ bɛbɛɛ ye Buɛ̄-mɛnɛ naale. Dee a i kpaā nɛ lo e’ɛrɛ kaāna gbanialoo kumaloo Jɛhova ee ɛrɛgeba waara zɔɔ i doo. Nu a i ɛɛrɛbu eera na lo edoo nu “a ye nia leere.”—Kɔl 1:10.

10-11. Ena a bee zū Michael kɔ a nyaana ye sīdee tɔɔ̄dum a?

¹⁰ Gbɛnɛ-edo ii elɛrabaloo pio nu lokwa i dap doo nu a nia Jɛhova. Pio nɛɛ elɛrabaloo gbɛnɛ gbɛnɛ tam bu nyɔuwe. Pya dɔɔ̄na elɛrabaloo gbī gbɛnɛkpo zɔ. Siga nɛɛ enyaananage baloo wa sīdee dum sɔ̄ ba nɔ nu akiiloo Jɛhova. Taɛ nu Michael bee doo lo. Naa bee lu ekpɔā ye aākɛ̄ bu kaka. Doodoo nɛɛ a le zege, a bee nɔ be kpuru be. A kɔ: “Tɔɔ̄ bu nwanaloo wee mɛ kuīloo kaāna. Pio sɔ̄, a wee mɛ tɔɔ̄loo kɔ lɔgɔ nɛɛ naale edap mɛ be eebah.” Mɛ sɔ̄ Michael bee bɔātɛ̄ enɔ Baibol, a bee nɔ kɛ̄ Jɛhova ɛp dogo lumiī doo. (Yɔɔ 11:5) Michael bee kɔ kumaloo dam le wa a bee ye nɔɛ̄ Baibol kɔ: “Ba naa bee mɛ kɔ nɛ lɔgɔ dee kɔ m ɔbɛ be kpuru be; ba bee aadee kiisī lo enɔɛ̄ mɛ kaka ue a le bu Baibol.”

¹¹ Kɛ̄ Michael kiisī lo enɔ nu akiiloo Jɛhova doo, kɛ̄ wereloo a ye ɛrɛ loo nyimnage doo lo. Kɛ̄ Jɛhova ɛrɛ toesaɛ̄ loo pya a ye taāŋabah doo bee ye tɔaloo kaāna. Sɔ̄ sɔ̄ gaa kiisī, a bee muɛ kɔ alu ebɛɛ̄ kɔ a kwabaloo ye sīdee tɔɔ̄dum. A bee kɔ “Ɔbɛ be kpuru be bee mɛ agaloo edoo ee dɛ̄dɛɛ̄ nu.” M bee suā kɔ lo m ɔbɛ be kpuru be edoo kɔ bu Jɛhova a ɛɛ, e m bee suānage leere kɔ taāŋabah Jɛhova kuī ee ɛrɛgeba nu m lɛɛbaloo.” Michael bee tɔgɛ nia loo kaka ue a bee nɔ, e lo ama bee ye zū kɔ a kwabaloo ye sīdee tɔɔ̄dum.—Jem 1:25.

12-13. Kaka ue Baibol bee yerebah nɛ Mayli doodoo wa?

¹² Baibol su kɛ̄ kaka ue kuī doo dooreloo numiā aa bɛ bu zii. (Yɔɔ 119:105; Ɛfɛs 5:8) Mayli, alu Azerbaijan bee tɔgɛ nia loo yerebah a bee ɛrɛ aābu Muɛ̄ Ue Bari. A bee lu ekpɔā ye aākɛ̄ bie butɔ ba wee si keekee tɔbari. Ye tɛ wee si tɔbari pya ɔrɔ alu ekure Muslim, e ye ka wee si tɔbari pya Jew. A kɔ: “Kereadoo mm wee anna kɔ Bari le, a ɛrɛ gbɛnɛ-edo ebip m gaa bee gbī esuā ye ture. M bee bura kɔ, ‘Ena anua Bari bee dɛm nɛɛ a, e ena enua nɛɛ tɔga bu yube dee ye tɔɔ̄dum sa bu kpɛdumɛ alu etɔg ye bu bana miā a?’ Sɔ̄ pya nɛɛ kɔ dɛ̄dɛɛ̄ nu a sira lu nia Bari a, m bee bura kɔ, ‘Ekɔ Bari baɛbee pya nɛɛ sa ɛrɛ ekpeloo aāloo sɔ̄ ba aa tɔga ni?’”

¹³ Mayli bee kiisī lo egbī ture pya ye ebip. Sɔ̄ sɔ̄ aa kiisī, a bee bɔātɛ̄ enɔ Baibol sa taāŋabah Jɛhova. A bee kɔ: “Pya ue Baibol kɔ bee nyaana na dum doo kɔ a lee. Kɛ̄ Muɛ̄ Ue Bari baatɛ̄ nu doo bee doo kɔ loo mɛ a ziīna.” Doodoo Mayli, dɛ̄dɛɛ̄ ii leera Jɛhova, “nɛɛ a bee i kue lɛɛ bu zii nyima bu ye nyɛŋia ɛɛ’dee.”—1 Pit 2:9.

14. Ena i dap doo lokwa i ɛrɛ togatoga wereloo kumaloo kaka ue a? (Ɛp ekpo a kɔ “ Pya Dɔɔ̄na Nu I Dap Su Kaka Ue Dooreloo.”)

¹⁴ Pya edoba i enɔā nu akiiloo ama lu pio edoba a tɔgɛ kɛ̄ kaka ue dɔbiī  doo. Mɛ o dap kɛɛrɛbu pya lo dɔɔ̄na edoba. O dap su nua nu o seeasī lo egbītɛ̄ pya dɔɔ̄na nu anua i wereloo kaka ue. Kɛ̄ i nyimɛ wereloo i ɛrɛ loo kaka ue doo, kɛ̄ i muɛnage pya dɔɔ̄na sīdee i dap tɔgɛ kɔ i wereeloo kaka ue doo lo.

15. Ziī amunu sīdee na i dap tɔgɛ kɔ i wereeloo kaka ue a?

¹⁵ I dap tɔgɛ kɔ i wereeloo kaka ue tɛ̄maloo enɔ Baibol le pya kpa a dɛɛa nyɔɔ Baibol. Nyɔɔbee kaɛlɛɛ kuma zua i etɔ̄na bu kaka, i ɛrɛ gbɛnɛ-edo nu i dap le aa nɔ. Tua ekpo magazin ama bee kɔ: “Suāloo kaka ue aga nyɔɔbee esah mma bu nyɔuwe. Lo o waa gbī emuɛ kaka ue, o ɛrɛ ekiisī lo egbī lokwa o dap muɛ. . . . O ɛrɛ epiaga lokwa o dap ɛrɛ. Aba ziī gah a le loo kaka ue aa a gbɔɛ̄ loo. . . . Kiisī lo egbī pya lo dɔɔ̄na yereloo.” Nɔnu aga, mɛ i ɛrɛ kaāna biī lo i piiga lo enɔ nu lo.

16. O wee serebah loo enɔ nu doodoo wa? (Kam 2:4-6)

¹⁶ Naale dɛ̄dɛɛ̄ ii na buū kpa le nɔ nu  kpeloo a. Mɛ Jɛhova kɔ i nɛ kɔ i kiisī lo e “gbī” kaka ue lokwa i dābeeloo leere. (Buū Kam 2:4-6.) Sɔ̄ i piiga doo wo, i ɛrɛ kaāna biī. Corey kɔ sɔ̄ a wee buūe Baibol a wee sere ekɛɛrɛ nyɔɔ ziī ziī ye barakpaɛ̄. A baatɛ̄ kɔ: “M wee buū dɛ̄dɛɛ̄ ue a le kɛɛ̄, le pya dɔ kpa kaɛ a nyɔɔnɛ lo dɔ sa gbītɛ̄ nu yereloo. . . . M wee nɔ gbɛnɛ-edo nu sɔ̄ m doo wo!” Kere alu kɔ lo sīdee ama na i gaa su nɔā nu a, ale kɔ i aa su lo dɔɔ̄na sīdee nɔā, i tɔgɛ kɔ kaka ue kuī i loo sɔ̄ i su sɔ̄ nɔā nu.—Yɔɔ 1:1-3.

17. Ena a kura lo esu kaka ue nua i sīdee tɔɔ̄dum a? (Jemes 1:25)

¹⁷ Bu kaka, i suā kɔ aba nɔ nu akiiloo kaka ue naa gbɔɛ̄. Lokwa i dap ɛrɛ kaāna biī aāloo, i ɛrɛ edoo kɔ alu i sīdee tɔɔ̄dum, lo a kura kɔ i su pya nu i nɔ yere bu dogo. Aba lo a le i doo wo na kaka ue edoo kɔ i ɛrɛ kaāna ɛɛbu a. (Buū Jemes 1:25.) Ena i doo lo esu pya nu i aa nɔ yere bu dogo a? Ziī wuga nɛɛdam bee lɛra ekɛɛrɛ kɔ i dap ɛp i loo lokwa i dap muɛ pya kɛ̄ i aa doo leere le pya kɛ̄ a bɔloo kɔ i si tam nyɔɔ. Nɛɛ lɛɛratam Pɔɔl bee kɔ doo wo ama kɔ: “Aba nu a le, doolo i aabaloo kaāna lo nu i e’ina loo.”—Fil 3:16.

18. Ena anua i doo kuma kɛ̄ i dap doo lo ekiisī lo e “tɔɔ̄ dum bu kaka” a?

¹⁸ Naa kɛɛrɛ biī i ɛrɛ lo i doo kuma kɛ̄ i dap doo lo ekiisī lo e “tɔɔ̄ dum bu kaka”! Naale aba bee kɛ̄ i tɔɔ̄dum doo ekpe i loo, mɛ i su ɛɛbu nuanage loo Jɛhova le pya i wuga bu yira. (Kam 27:11; 3 Jɔn 4) Bu kaka, taɛ nu anua i wereloo kaka ue sa tɔɔ̄dum a gbaaloo kaka ue lo!