Bu lo ekobee ue i bee kɔ a ɛrɛ ziī gbɛnɛ ue lo a kpesī dɛ̄dɛɛ̄ pya nɛɛ le pya ɛnjɛl, ɛɛ na: sere bee Jɛhova alu gbɛnɛ kaɛ. Ue akiiloo bɛbɛɛ, lo a le kɔ sīdee Jɛhova bɛɛ na a lee eera a, lu ziī gah a le loo sere bee Jɛhova kaɛ. Bu aba lo sīdee, ue akiiloo tɔɔ̄ agara miɔŋɔ nɛɛ lu dɔɔ̄na gah loo lo gbɛnɛ ue a le kɛ̄ ama

Ena anua i dap kɔ kɔ gbɛnɛ ue a le kɛ̄ na bee Jɛhova le sesere lo bee kaɛ a? I naa ɛp taa nu anua.

Tuatua, Setan bee gbee bee Jɛhova, ale doo kɔ alu e’ɛp ye bu pɔrɔ sīdee bie bu gɔh Idɛn. Ebip Setan bee bip Iv ama tɔgɛ kɔ Jɛhova lu Bari wiibu sa naa aara pya a ye le kɛɛ̄ bu le sīdee. Lɛɛ Setan kɔ nu alu kee loo nu Jɛhova bee kɔ. Bu lo sīdee a gaa kɔ Bari lu nɛɛ esah. A gbee bee Jɛhova. A bee lu “pɔrɔ-edɔɔ̄,” nyɔɔbee alu ‘nɛɛ gbee bee nɛɛ.’ (Jɔn 8:44) Nyɔɔbee Iv bee gbaɛ̄tɔ̄loo esah Setan a, a bee lɛɛbeekɛɛ̄ ekpo bɛbɛɛ Jɛhova. (Jɛn 3:1-6) Setan gaa kiisī lo egbee bee Bari, sa kɔ esah loo dua Nɛɛ Jɛhova lu mmɛ nii’ee. Pya ba yiga esah ama, dap lɛɛbeekɛɛ̄ Jɛhova. Nyɔɔwo, kiikɛ̄ pya nɛɛ Bari le, gbee bee Jɛhova a le kaɛ lu gbɛnɛ pɔrɔ biaɛ. Ɛɛ na alu ekatɛ̄ dɛ̄dɛɛ̄ taāŋa le bag dogo a gaa kiisī bu nyɔuwe a.

Eree baɛ, lokwa nu lee loo dɛ̄dɛɛ̄ nu a bee dɛm, Jɛhova ebiaɛrafii lo esere ye bee kaɛ lokwa a naa luna egbee bu lɔgɔ sīdee. Lo ama kuī loo Jɛhova ee dɛ̄dɛɛ̄ nu. Nu anua lo a kɔ: “M gaa le doo kɔ na gbɛnɛ bee kaɛ a yira agɛrɛ.” (Ezek 36:23) E Jizɔs bee kɔ taɛ nu a kuī loo dɛ̄dɛɛ̄ pya zooro Jɛhova sɔ̄ ba gaa yere kara, sɔ̄ a kɔ: “Doolo o bee le kaɛ.” (Mat 6:9) Baibol kɔ booboo sɔ̄ kɛ̄ alu gbɛnɛ lo enɛ ka bee Jɛhova doo. Naa ɛp pio edoba ama: “Nɛa Jɛhova ka a bɔloo ye bee.” (1 Edoo 16:29; Yɔɔ 96:8) “Ɔraa yɔɔ ka nɛ ye bee.” (Yɔɔ 66:2) “M gaa le nɛ ka o bee ina deedee.” (Yɔɔ 86:12) Ziī yɛɛ pya sɔ̄ Jɛhova alɛɛ loo bee kɔ ue aā bunyɔɔ bee le bie tɔkaɛ li Jerusalɛm sɔ̄ Jizɔs bee kɔ: “Tɛ, nɛ ka o bee.” E Jɛhova bee agara kɔ: “M enɛa ye ka, e m sinagekɛ̄ ye nɛ ka.”—Jɔn 12:28. a

Eree taa, nu alu ekɛɛrɛ Jɛhova ɛrɛ nu edoo kiiloo ye bee, ale kɛ̄ pya nɛɛ ye ɛp doo. Naa kɛɛrɛ nu akiiloo kɛ̄ bee Bari elu gbɛnɛ doo sɔ̄ kpɛdumɛ doā-ɛp etɛ̄na sɔ̄ Bɛbɛɛ Baɛ Boo Le Lop tup Zua Kraist e’ina kuma. Ekɔ pya nɛɛ le pya ɛnjɛl ele gaa ɛrɛge baɛbaɛ beenyiɛ kiiloo sere bee Jɛhova kaɛ ni? Lo e’agara ebip ama doraa i kɛɛrɛbu baɛ gah a ɛrɛ nu edoo kiiloo ziī;  lo a le tɔɔ̄ agara pya nɛɛ, le nɛɛ a ɛrɛ ekpo lo ebɛɛ dɛ̄dɛɛ̄ nu. Ekɔ pya nɛɛ lo ba bɔ ture nyiɛ loo elege gaa ɛrɛ finiabah lo ekiisī lo etɔɔ̄ agara ni? Eeye. Ba elu pya a emmana sa elu edo wa ɛp lo emuɛ kɔ ba bɔ ture nyiɛ loo. Ba e’ɛrɛ dum anaatah. Ekɔ pya nɛɛ le pya ɛnjɛl elege aa kɔ nu akiiloo nɛɛ a bɔloo kɔ a bɛɛ dɛ̄dɛɛ̄ nu ni? Eeye. Lo sɔ̄, dɛ̄dɛɛ̄ nɛɛ gbaāloo pya ɛnjɛl emuɛ kɔ aba Jɛhova na a ɛrɛ ekpo sa bɔloo ebɛɛ a. Ekɔ bee Jɛhova ele aa luge nu a kuī loo pya ye nɛɛ ee dɛ̄dɛɛ̄ nu lo sɔ̄ ni?

Bee Jɛhova elu esere kaɛ lɛɛ a gae lu lo sɔ̄, sa naale eluna ekɔ gbee. Kerewo, bee Jɛhova ekiisī lo elu nu a kuī loo pya ye zooro a le bunyɔɔ le nyɔuwe ee dɛ̄dɛɛ̄ nu. Ena anua a? Nu anua na bee ba emuɛ kɔ Jɛhova ekiisī lo edoo pya nu alu nyɛŋia. Kɛādoo, bu kumaloo kɛ̄ Jizɔs e’obara dɛ̄dɛɛ̄ bɛbɛɛ nɛ Jɛhova. Elo sɔ̄, Bari elu “dɛ̄dɛɛ̄ nu loo dɛ̄dɛɛ̄ nɛɛ.” (1 Kɔr 15:28) Sɔ̄ lo ama etɛ̄na, pya nɛɛ e’ɛrɛ ɛɛbu a nyɔɔ kɛnɛkɛ̄ lo e’ɛrɛ “ka miɔŋɔ Bari.” (Rom 8:21) E Jɛhova edoo nu a bee lu ye ekɛɛrɛ aadee gbɔ̄mɛɛ lo esu dɛ̄dɛɛ̄ pya nɛɛ a le bunyɔɔ le kɛnɛkɛ̄ gbaloo ziī nua ziī gbɛnɛ butɔ.—Ɛfɛs 1:10.

Bu mɛ sīdee na dɛ̄dɛɛ̄ siranu ama e’ɛrɛ pah nyɔɔ butɔ Jɛhova a le bunyɔɔ le kɛnɛkɛ̄ a? Bu kaka, edoo kɔ i taɛ lo enɛ ka bee Jɛhova a agɛrɛbah agatɛ̄. Tɛ̄maloo kaɛ edɔɔ̄ Devid bee ɛm bu yɔɔ kɔ: “Leelee a le nɛ Jɛhova, Bari . . . Leelee a le nɛ ye bee ka ina deedee.” (Yɔɔ 72:18, 19) Pya nu edoo kɔ i kiisī lo enɛ ka Jɛhova naale etah lɔgɔ dee.

Bee Jɛhova tɔɔ̄dɔ taɛ nɛɛ alu. Nyɔɔwo, Ye bee doo kɔ i nyɛŋiabu kɛ̄ a ɛrɛ wereloo doo. (1 Jɔn 4:8) Naale e’ibere  i lɔgɔ sɔ̄ kɔ nyɔɔ wereloo Jɛhova ɛrɛ na anua a bee i dɛm a, a bee i nɛ waara zɔɔ a’agara nyɔɔbee a were i loo, e ye bɛbɛɛ lu lo a kaāna nyɔɔ wereloo a ɛrɛ. Mɛ i kiisī lo emuɛ kɛ̄ Jɛhova tɔgɛ wereloo kumaloo pya nu a bee dɛm doo. Nyɔɔwo, a gaa le taɛ i ekiisī lo etɔɔ̄ waɛloo i Tɛ a le li bunyɔɔ sa nɛ ka ye bee mmɛ deedee.—Yɔɔ 73:28.