1. Bu mɛ sīdee na 2 Pya Kɔrint 3:1-3 i yerebah nɛ kɔ i tɔgɛ nia loo dee a i kpaā nɛ lo enɔɛ̄ Baibol pya nɛɛ mmɛ loo liamaā a? (Ɛp foto a le nyɔɔ eko.)

WEE a tɔɔ̄loo doodoo wa sɔ̄ o muɛ̄ kɔ ziī nɛɛ a le o bɔŋanaloo liamaā ni? Bu kaka, wee a ɛɛrɛbu kaāna. (Mat 28:19) E lo alu olo na o bee nyɔɔnɛ aā nɛɛ ama nɔnu a, naa ɛp kɛ̄ enia a doo sɔ̄ o muɛ̄ sɔ̄ a gaa liamaā! (1 Tɛs 2:19, 20) Pya a liamaā aā lu “kpa ture nyiɛ loo,” naale loo aba pya a bee wa nɔɛ̄nu, mɛ loo dɛ̄dɛɛ̄ bɔŋanaloo.—Buū 2 Pya Kɔrint 3:1-3.

2. (a) Amunu ebip a kuī na i gaa le kɔ ue nyɔɔ a, e e na anua a? (b) E na alu enɔānu Baibol a? (Ɛp ue a le kɛɛ̄.)

² A nia i esuā kɔ bu nu alu nia zua akii adumɛ, gaa lu enɔɛ̄ Baibol * nu a dap lu 10,000,000 pya nɛɛ bu ziī ziī enɔɔ̄ tɛɛ̄ ɛŋɛnɛ nyɔuwe. E bu aba pya zua ama, nu a eeloo 280,000 pya nɛɛ gaa liamaā sa lu Pya Ekeebee Jɛhova le pya nɛɛ a gaa nyɔɔnɛ dumɛ Jizɔs Kraist. Bu mɛ sīdee na i dap yerebah nɛ gbɛnɛ-edo miliɔn pya i gaa nyɔɔnɛ nɔ Baibol kɔ ba a liamaā a? Kuma sɔ̄ Jɛhova gaa egerebu sa nɛ dee pya nɛɛ kɔ ba alu pya a nyɔɔnɛ dumɛ Kraist a, i doo kuma kɛ̄ i dap doo lo eyerebah nɛ pya i gaa nyɔɔnɛ nɔnu kɔ ba a nwaabah nyim kiisī sa liamaā. Sɔ̄ gaa nwaabah tah!—1 Kɔr 7:29a; 1 Pit 4:7.

3. E na i gaa le nɔ bu ekobee ue ama akiiloo sere enɔānu Baibol a?

³ Nyɔɔbee tam zue ue lu gbaragbara a, Eku A Baɛbee bee  kɔ tɔ naa tam a ɛp nu edap lu edoo lokwa a dap lu eyerebah nɛ pya i gaa nyɔɔnɛ nɔ Baibol kɔ ba a nyim kiisī sa liamaā. Bu ekobee ue ama le lo enyɔɔnɛ, i gaa le muɛ̄ nu i dap nɔ aāloo edoba pya sɛmdee, pya zue ue aā ziī edo yii ziī, le pya kuūdɛɛ̄loo sɛkiut. * (Kam 11:14; 15:22) Ba kɔ nu akiiloo nu nɛɛ a gaa nyɔɔnɛ nɛɛ nɔnu le pya nɛɛ ba gaa nyɔɔnɛ nɔnu edoo lokwa wa enɔānu kiisī leere. Bu ekobee ue ama, i kɔ ue nyɔɔ o’oo nu alu ebɛɛ̄ kɔ dɛ̄dɛɛ̄ nɛɛ a gaa nɔ Baibol a doo lokwa ba dap kiisī leere sa liamaā.

4. E na a bɔloo kɔ i suā akiiloo nyɔɔnɛ nɛɛ nɔnu tua sɔ̄ i ye ina kpaɛ̄ a?

⁴ Gbɛnɛ-edo pya wuga nɛɛdam le nɛɛwa gaa nyɔɔnɛ pya nɛɛ nɔ Baibol taɛ tua sɔ̄ ba wa si loo bie wa tɔ. Kere lo ama lu le sīdee edoo kɔ pya nɛɛ a ɛrɛ taɛ bu nu a le bu Baibol, kɔniaue ama wee lu edoo bu ekpurubah sa a naa wee lu edoo dɛ̄dɛɛ̄ kaɛ. Lo edoo kɔ lo nɛɛ a agɛrɛbah ɛrɛ taɛ, pio nɛɛ wee bip nɔmba fon lo nɛɛ lokwa ba ye dap kue, ale ba eyere ue ye ma sa ye nyɔɔnɛ kɔnia ue aābu Baibol. Dua enɔānu a naa aadee lu edoo dɛ̄dɛɛ̄ sɔ̄ doowo dap le gaa kiisī bu pio enɔɔ̄ mɛ a naale enɔānu Baibol a gaa kiisī leere. Nɛɛ a gaa nɔnu ama ekiigesī leere, kiīloo nɛ sa liamaā lo a le aba kunɛ nwīgbagbara sɔ̄ le epiaga a * doo lo enɔ nu lo ni? Eeye doo pippip.

5. Dookɛ̄ kpa Luk 14:27-33 kɔ doo, e na Jizɔs bee kɔ a dap i yerebah nɛ bu i tam doo kɔ pya nɛɛ a nyɔɔnɛ ye dumɛ a?

⁵ A ɛrɛ sɔ̄ Jizɔs bee kɔ nu akiiloo nu esu i bah lo enyɔɔnɛ ye dumɛ. A bee kɔ nu akiiloo nɛɛ a gaa gbī ewu tɔ le kiiloo nɛɛ mɛnɛ a gaa gbī ekii uwe be. Jizɔs bee kɔ nɛɛ a gaa gbī ewu tɔ a ɛrɛ “edasī ɛŋɛtɛ̄kɛ̄ buū nu a esi” lokwa a dap wu ye tɔ sah bee mɛɛ̄ le kɔ nɛɛ mɛnɛ a ɛrɛ “edasī yii bira” lo a le pya ye gbo nɔ̄ edapge doo nu ba gaa gbī edoo. (Buū Luk 14:27-33.) Bu aba lo sīdee, Jizɔs bee suā kɔ nɛɛ a gbī enyɔɔnɛe ye dumɛ ɛrɛ edasī suā nu alu ebɛɛ̄ kɔ a doo lokwa a ye dap nyɔɔnɛ dumɛ. Nyɔɔwo, a lee kɔ i yere mɛm loo pya i gaa nyɔɔnɛ nɔ Baibol kɔ ba a nɔ nu dɛ̄dɛɛ̄ kaɛ. Bu mɛ sīdee na i doo wo a?

6. E na i piiga lo edoo lokwa pya nɛɛ i gaa nyɔɔnɛ nɔnu kiisi leere a?

⁶ Kpɛ̄naloo tɛ̄maloo edoo kɔ o enɔānu Baibol a nyɔɔ kina dɛɛ̄. Naa daba o dap  kɔ ue nyɔɔ dɔɔ̄na kpog-bee nu a le bu Baibol dɔɔ̄na sɔ̄ o si ye loo. Sɔ̄ kɔnia ue bu nyɔɔnyɔɔ sɔ̄ esualoo lo nɛɛ, bip ye lo a le a ɛrɛ kɛ̄ bui dap gbaa ɛŋɛtɛ̄ sa kɔnia ue aābu Baibol. Kɛ̄ lo tɛ ɛrɛ tɔ agara ue doo edoo kɔ o suā lo a le nɔ Baibol kuīge ye loo naa e. Sɔ̄ sɔ̄ gaa kiisī, o dap ye bip lo a le edapge wee nɔ nu baɛ sɔ̄ bu ziī kaɛ, lo ama edoo kɔ o suā lo a le a gaa kiigesī. Kerewo, naale aba nɔnu ziī ale baɛ sɔ̄ bu kaɛ na alu ebɛɛ̄ a.

7. Bu mɛ sīdee na nɛɛ a gaa nɔɛ̄nu nɛɛ dap kpɛ̄naloo loo ziī ziī enɔānu Baibol a?

⁷ Doodoo nɛɛ a gaa nɔɛ̄nu nɛɛ, alu ebɛɛ̄ kɔ o kpɛ̄naloo leere loo ziī ziī lo enɔānu. O dap bɔātɛ̄ tɛ̄maloo ebuū kɛ̄ bui gaa le nɔ sa buū pya dɔ Baibol a le bu. Suā taɛ kpog-bee ue a le bu. Kɛɛrɛbu taɛ ekobee ue lo nu enɔ, pya ye gbagbara ekobee ue, pya ebip a le bu, pya dɔ kpa kaɛ ba ɛm “buū” kpaɛ̄, foto, le vidio a dap doo kɔ o baatɛ̄ lo ekobee ue leere. Kɛɛrɛbu nɛɛ o gaa nyɔɔnɛ nɔnu, dasī ɛrɛ ekɛɛrɛ nyɔɔ kɛ̄ o nɔɛ̄ ye nu bu sīdee a waɛ sa lera lokwa a dap dābeeloo nu a gaa nɔ sa su yere bu dogo doo.—Neh 8:8; Kam 15:28a.

8. E na ue nɛɛ lɛɛratam Pɔɔl a le bu Pya Kɔlɔsi 1:9, 10 i tɔgɛ akiiloo yere kara bee pya i gaa nyɔɔnɛ nɔ Baibol a?

⁸ Doodoo ziī gah loo o kpɛ̄naloo, yere kara bara kɔ Jɛhova a kuūdɛɛ̄loo ebɛɛ̄ nɛɛ o gaa nyɔɔnɛ nɔnu. Bara kɔ Jɛhova a yerebah a nɛ lokwa o dap tɔgɛ nu nɛɛ aābu Baibol le lo e’ina ye bu beenyiɛ. (Buū Pya Kɔlɔsi 1:9, 10.) Kɛɛrɛ pya nu o suā kɔ e agabah nɛɛ o gaa nyɔɔnɛ nɔnu edābeeloo ale yiyiga. Suā kɔ nu o seeasī na lo eyerebah ye nɛ kɔ a liamaā.

9. Bu mɛ sīdee na nɛɛ a gaa nɔɛ̄nu nɛɛ eyerebah nɛ nɛɛ a gaa nɔɛ̄nu kɔ a kpɛ̄naloo loo ziī ziī enɔānu a? Naa baatɛ̄.

⁹ I bɛābu kɔ tɛ̄maloo enyɔɔnɛ nɛɛ nɔ Baibol dɛ̄dɛɛ̄ sɔ̄, lo nɛɛ etɔgɛ nia loo nu Jɛhova le Jizɔs edora sa egbī enɔ nu yereloo. (Mat 5:3, 6) Lo e’ɛrɛ kaāna biī aāloo lo enɔānu, nɛɛ a gaa nɔnu ɛrɛ esere ekɛɛrɛ nyɔɔ nu a gaa nɔ. Lokwa o ye yerebah nɛ kɔ a doo wo, tɔgɛ ye kɛ̄ alu ebɛɛ̄ doo kɔ a kpɛ̄naloo loo ziī ziī enɔānu tɛ̄maloo ebuū pya ye nuenɔ sa kɛɛrɛ kɛ̄ edap su nu a gaa nɔ yere bu dogo doo. Nɛɛ a gaa nɔɛ̄nu nɛɛ eyerebah doodoo wa? Nyɔɔnɛ nɛɛ o gaa nyɔɔnɛ nɔnu kpɛ̄naloo ziī ye nuenɔ lo etɔgɛ kɛ̄ a  wee lu edoo lo ama doo. * Baatɛ̄ ye nɛ kɛ̄ edap muɛ̄ ture pya ebip alu ebip, le kɛ̄ edap niina nu kɛɛ̄ pio etaā ue doo lokwa a dap nwaabah nyɛŋiabu ture pya lo ebip. Lɛɛ o kɔ ye nɛ kɔ a agara lo ebip dookɛ̄ a dābeeloo doo. Dodoo wo edoo kɔ o suā kɛ̄ a dābeeloo nu a gaa nɔ a doo. Mɛ a ɛrɛ dɔɔ̄na nu a bɔloo kɔ o yere mɛm loo nɛɛ o gaa nyɔɔnɛ nɔnu kɔ a doo.

10. E na anua alu ebɛɛ̄ lo ebuū Baibol dɛ̄dɛɛ̄ dee a, e e na nɛɛ a gaa nɔnu edoo lokwa a ɛrɛ biī aāloo buū Baibol a?

¹⁰ Gbaāloo nyɔɔnɛ nɛɛ nɔnu dɛ̄dɛɛ̄ kaɛ, ɛrɛ nu nɛɛ a gaa nɔnu e’ɛrɛ biī aāloo lo a doo dɛ̄dɛɛ̄ dee. A ɛrɛ enyɔɔnɛ Jɛhova kɔnia ue. Bu mɛ sīdee? Tɛ̄maloo egbaɛ̄tɔ̄ Jɛhova sa ye kɔ ue nɛ. A dap gbaɛ̄tɔ̄loo Bari tɛ̄maloo ebuū Baibol dɛ̄dɛɛ̄ dee. (Josh 1:8; Yɔɔ 1:1-3) Tɔgɛ ye kɛ̄ esu “Nɔɔ̄nu Akiiloo Buū Baibol” a le i dɔ intanɛt jw.org. * daānu doo. Bu kaka, lo eyerebah ye nɛ kɔ a ɛrɛ biī aāloo ye buū Baibol, yere ye mɛm loo kɔ a ɛrɛ ekɛɛrɛ nyɔɔ nu a gaa nɔ aābu Baibol akiiloo Jɛhova, le sīdee a dap su nu a gaa nɔ yere bu ye dum.—Doonu pya Nɛɛ lɛɛratam 17:11; Jem 1:25.

11. Bu mɛ sīdee na nɛɛ a gaa nɔnu enɔ eyere kara a, e e na anua alu ebɛɛ̄ kɔ a wee yere kara dɛ̄dɛɛ̄ sɔ̄ a?

¹¹ Yere mɛm loo nɛɛ o gaa nyɔɔnɛ nɔnu kɔ a kɔ ue nɛ Jɛhova tɛ̄maloo eyere kara ziī ziī dee. Yere kara aā taɛ bu o beenyiɛ lɛɛ bui gae nɔnu le sɔ̄ bui enɔā nu sah, nyɔɔnɛ nɛɛ o gaa nɔɛ̄nu yere kara sa ye yere kara bee. Sɔ̄ a gaa a gbaɛ̄tɔ̄, a gaa le nɔ kɛ̄ eyere kara aābu ye beenyiɛ doo sa nɔnage lo eyere kara ma Jɛhova Bari tɛ̄ma bu bee Jizɔs Kraist. (Mat 6:9; Jɔn 15:16) Naa kɛɛrɛ kɛ̄ buū Baibol dɛ̄dɛɛ̄ dee (gbaɛ̄tɔ̄loo Jɛhova) le yere kara (kɔ ue nɛ Jɛhova) eyerebah nɛ nɛɛ o gaa nyɔɔnɛ nɔnu kɔ a agɛrɛbah ye tɔɔ̄ waɛloo doo a! (Jem 4:8) Ɛrɛ pya elap dogo ama eyerebah nɛ nɛɛ o gaa nyɔɔnɛ nɔnu kɔ a kiisī leere, kiīloo nɛ Jɛhova sa liamaā.

12. Nɛɛ a gaa nɔɛ̄nu nɛɛ eyerebah nɛ nɛɛ a gaa nɔɛ̄nu kɔ a ɛrɛ le gbanialoo kumaloo Jɛhova doodoo wa?

¹² Naale aba bee nu i gaa nyɔɔnɛ nɛɛ nɔ aābu Baibol etɔaloo ye ekɛɛrɛ, mɛ  etɔanage loo ye beenyiɛ. E na anua a? I beenyiɛ, lo a le i taɛ, i ekɛɛrɛ le kɛ̄ nu i tɔɔ̄loo doo, wee doo kɔ i doo dogo. Jizɔs bee le le nɛɛ tɔgɛnu, e ye tɔgɛnu wee nia pya nɛɛ. Mɛ pya nɛɛ bee gbaɛ̄tɔ̄ ye tɔgɛnu nyɔnɛbee a bee wa ina bu beenyiɛ. (Luk 24:15, 27, 32) Alu ebɛɛ̄ kɔ nɛɛ o gaa nyɔɔnɛ nɔnu a suāloo Jɛhova doodoo Nɛɛ a le, nɛɛ a dap nyɔɔnɛ ɛrɛ le gbanialoo, ye muɛ̄ doodoo ye Tɛ, ye Bari, le ye Gbo. (Yɔɔ 25:4, 5) Sɔ̄ bui gaa nɔnu, doo kɔ a suā pya elap dogo Bari. (A’aa 34:5, 6; 1 Pit 5:6, 7) Kaɛlɛɛ ɛrɛgeba ekobee ue bui gaa nɔ, doo kɔ a sere ekɛɛrɛ nyɔɔ dua nɛɛ Jɛhova lu. Yerebah ye nɛ kɔ a tɔgɛ nia loo pya lele elap dogo Jɛhova doodoo ye wereloo, fɛgɛ dogo, le toesaɛ̄. Jizɔs bee kɔ “lo gbɛnɛ le lo tuatua etɔānu” na “wereloo [Jɛhova] o Bari.” (Mat 22:37, 38) Piiga lo eyerebah nɛ nɛɛ o gaa nyɔɔnɛ nɔnu kɔ a wereloo Bari aā taɛ bu ye beenyiɛ.

13. Naa nɛ edoba loo kɛ̄ o dap yerebah nɛ nɛɛ o gaa nɔɛ̄nu kɔ a nɔ pya lele elap dogo Jɛhova doo.

¹³ Sɔ̄ o gaa nyɔɔnɛ lo nɛɛ nɔnu, baatɛ̄ ye nɛ nu anua o wereloo Jɛhova. Lo ama eyerebah ye nɛ kɔ a suā kɔ alu ebɛɛ̄ kɔ a ɛrɛe le gbanialoo kumaloo Bari. (Yɔɔ 73:28) Bu edoba, ekɔ a ɛrɛ ziī etaā ue a le bu kɛ̄ bui gaa nɔ ale bee a le bu ziī dɔ kpa kaɛ lo a muuna ziī nu akiiloo Jɛhova, ye wereloo, suānu, kaāna biaɛ, ale ye ekpo lo a a tɔaloo kaāna ni? Kɔ nu akiiloo nɛ nɛɛ o gaa nyɔɔnɛ nɔnu, sa doo kɔ a suā kɔ lo ama le yɛɛ ziī nu anua o wereloo i Tɛ a le li bunyɔɔ. A ɛrɛ nage nu dɛ̄dɛɛ̄ pya a gaa nɔ Baibol edoo lokwa ba dap nyim kiisī sa liamaā.

14. E na Pya Hibru 10:24, 25 i kɔ nɛ akiiloo kɛ̄ si enɔānu bu bɔŋanaloo dap yerebah nɛ nɛɛ i gaa nyɔɔnɛ nɔnu kɔ a kiisī leere doo a?

¹⁴ Dɛ̄dɛɛ̄ ii gbī kɔ pya i gaa nyɔɔnɛ nɔnu a nyim kiisī sa liamaā. Ziī gbɛnɛ sīdee i wa dap yerebah nɛ na tɛ̄maloo eyere wa mɛm loo kɔ ba a si enɔānu bu bɔŋanaloo. Pya a gaa nɔɛ̄nu nɛɛ lo ba edaābeeloo nu wee kɔ sɔ̄ pya a gaa lu enyɔɔnɛ nɔnu si enɔānu aba lo sɔ̄ wee doo kɔ ba a nwaabah nyim kiisī leere. (Yɔɔ 111:1) Pio pya a gaa nɔɛ̄nu nɛɛ wee kɔ nɛ nɛɛ ba gaa nɔɛ̄nu kɔ ba gaa le nɔ gbɛnɛ-edo nu a le bu Baibol sɔ̄ ba si enɔānu. Buū Pya Hibru 10:24, 25 nɛ nɛɛ o gaa nɔɛ̄nu, lɛɛ o baatɛ̄ ye nɛ biī e’ɛrɛ lo a si enɔānu. Bira vidio a kura  Ena A Wee Lu Edoo Bie I Tɔ Nɔnu Buɛ̄-mɛnɛ Ani? * ye nɛ. Yerebah nɛ nɛɛ o gaa nyɔɔnɛ nɔnu kɔ a su si enɔānu ziī ziī kaɛ nua nu a ye kuī loo.

15. E na i doo lo eyerebah nɛ nɛɛ i gaa nyɔɔnɛ nɔnu kɔ a si enɔānu eree sɔ̄ loo a?

¹⁵ E na o doo lo nɛɛ o gaa nyɔɔnɛ nɔnu sii si enɔānu ale bee a naa gaa si enɔānu eree sɔ̄ loo ani? Kpɛ̄naloo enyɔɔnɛ nɛɛ o gaa nɔɛ̄nu ponia nu o bee nɔ aā enɔānu a kunɛ dee ama. Mumuɛ̄ kɛ̄ si enɔānu a nia doo edoo kɔ si enɔānu a taɛ ye. Nɛ ye Tɔ Baɛloo le Kpa Enɔānu Tɔɔ̄dum le Tam Zue Ue a gaa lu enɔ bie enɔānu lo sɔ̄. Kɔ ye nɛ nu elu enɔ bie enɔānu sɔ̄ elu esikɛ̄ ɛrɛ enɔānu, sa o bip ye lo gah a ye nia kaāna. Nu nɛɛ o gaa nɔɛ̄nu dā sa muɛ̄ tua dee a si enɔānu enia ye ee ɛrɛgeba nu ebee muɛ̄ bie dɔɔ̄na tɔbari. (1 Kɔr 14:24, 25) A gaa le muɛ̄ pya a dap nɔ wa le elap dogo le pya nɛɛ eyerebah ye nɛ kɔ a nyim kiisī leere sa liamaā.

16. E na alu ebɛɛ̄ kɔ alu edoo lokwa nɛɛ i gaa nyɔɔnɛ nɔnu dap liamaā a, e e na i gaa le nɔ bu lo ekobee ue enyɔɔnɛ a?

¹⁶ Bu mɛ sīdee na i dap nɔɛ̄nu nɛɛ kɔ a nyim kiisī leere sa liamaā a? I dap yerebah nɛ ziī ziī nɛɛ i gaa nyɔɔnɛ nɔnu kɔ a su lo enɔānu nua nu a ye kuī loo tɛ̄maloo eyere ye mɛm loo kɔ a nɔnu dɛ̄dɛɛ̄ kaɛ le kɔ a kpɛ̄naloo loo ziī ziī enɔānu. I yere nage ye mɛm loo kɔ a yere kara nɛ Jɛhova dɛ̄dɛɛ̄ dee le kɔ a ɛrɛ le gbanialoo ye kumaloo. I gbī nage eyere mɛm loo nɛɛ i gaa nyɔɔnɛ nɔnu kɔ a si enɔānu. (Ɛp ekpo a le 12 naɛsī a kɔ “ Nu Pya A Gaa Nɔnu Edoo Lokwa Ba Dap Nyim Kiisī Leere Sa Liamaā.”) Kerewo, a ɛrɛ dɔɔ̄na o’oo nu nɛɛ a gaa nyɔɔnɛ nɛɛ nɔnu dap doo lokwa nɛɛ a gaa nɔɛ̄nu dap liamaā, e a gaa le lu ebaatɛ̄ pya nu ama bu ekobee ue enyɔɔnɛ.