33 EKOBEE UE ENƆ
YƆƆ 130 Wee Aaloo Pɔrɔ
Kɛ̄ Jɛhova Gbī Kɔ Bɔŋanaloo A Aara Pya A Si Gbɛnɛ Pɔrɔ Doo
“Mɛ lo a le nɛɛ doo ziī pɔrɔ, i ɛrɛ nɛɛ a i kɔ ue bee.” —1 JƆN 2:1.
NU I NƆ
I gaa le nɔ ziī gbɛnɛ nu aāloo nu a bee sira bu bɔŋanaloo Pya Nɛɛ Kraist bu tua sɔ̄ o’oo tup zua sɔ̄ ziī nɛɛ wuga si gbɛnɛ pɔrɔ.
1. Ena Jɛhova gbī kɔ dɛ̄dɛɛ̄ nɛɛ a doo a?
JƐHOVA bee dɛm pya miɔŋɔ nɛɛ kɔ ba dap sagɛ nu ba edoo. O su lo dɔɔ̄nu daānu sɔ̄ o biaɛfii nu o doo. Biaɛfii a kuī nɛɛ dap doo na lo ekiīloo nɛ Jɛhova sa lu ziī yɛɛ pya Ye butɔ a gaa ye taāŋabah. Jɛhova gbī kɔ dɛ̄dɛɛ̄ nɛɛ a doo wo. Ena anua a? Nyɔnɛbee a wereloo pya nɛɛ sa gbī nu e lee wa loo. A gbī kɔ ba a nyɔɔnɛ ye ɛrɛ kaāna gbānialoo sa tɔɔ̄dum mmɛ dɛ̄dɛɛ̄.—Deut 30:19, 20; Gal 6:7, 8.
2. Mɛ dua ekɛɛrɛ na Jɛhova ɛrɛ kumaloo pya a naa kiiya aabu wa pɔrɔ a? (1 Jɔn 2:1)
2 Kerewo, Jɛhova naa su bah-ekpo aā lɔgɔ nɛɛ kɔ a taāŋa ye bah. A lɛɛbahloo ziī ziī nɛɛ kɔ a sagɛ nu edoo. E lo a le ziī Nɛɛ Kraist eliamaā gbee lok Bari sa si gbɛnɛ pɔrɔ a? Lo a le a naa kiiya aaloo ye pɔrɔ ɛrɛ elu elɛɛ ye bu bɔŋanaloo. (1 Kɔr 5:13) Mɛ kerewo, Jɛhova bɛābu kɔ nɛɛ a bee doo pɔrɔ a e’obia Ye lu loo. Taɛ nu anua a bee nɛ waara zɔɔ a’agara lo, lokwa adap lu e’aaloo i pɔrɔ. (Buū 1 Jɔn 2:1.) I Bari a ɛrɛ wereloo gaa wa zū kɔ ba a kiiya.—Zek 1:3; Rom 2:4; Jem 4:8.
3. Ena i kɔnia bu ekobee ue ama a?
3 Jɛhova gbī kɔ i nyɔɔnɛ ye ɛrɛ dua ekɛɛrɛ a ɛrɛ kumaloo pɔrɔ dogo le pya a doo pɔrɔ. Ekobee ue ama gaa le kɔ sīdee i dap doo wo. Kuma sɔ̄ o gaa buū ekobee ue ama, ɛp (1) kɛ̄ a bee lu e’aabahloo nɛɛ a bee si gbɛnɛ pɔrɔ bu bɔŋanaloo Kɔrint a bu tua sɔ̄ o’oo tup zua a doo, (2) zuurabahtɔ̄ Pɔɔl bee nɛ sɔ̄ nɛɛ a bee doo pɔrɔ bee kiiya, le (3) nu kpɛa a le bu Baibol ama tɔgɛ kɔ alu ekɛɛrɛ Jɛhova a kiiloo nɛɛ a bee doo gbɛnɛ pɔrɔ.
KƐ̄ A BEE LU E’AABAHLOO NƐƐ A BEE SI GBƐNƐ PƆRƆ BU TUA SƆ̄ O’OO TUP ZUA A DOO
4. Amunu kɛ̄tɔɔ̄ na a bee le bu bɔŋanaloo Pya Nɛɛ Kraist bu tua sɔ̄ o’oo tup zua a? (1 Pya Kɔrint 5:1, 2)
4 Buū 1 Pya Kɔrint 5:1, 2. Pɔɔl bee dā pɔrɔ kpɛa bu ye taa sɔ̄ zue ue bu dɔɔ̄na edo a bee sira bu bɔŋanaloo Kɔrint a bee lu eyere aā. Ziī wuga nɛɛdam bee nyɔɔnɛ wa ye tɛ kunagā. Dogo ama bee bee piya yeekɛ̄ lo “a naale kunɛ yɛɛ pya a naa yira!” Bɔŋanaloo naa bee doo lɔgɔ nu kumaloo sa kaāganage loo lo dogo. Naadabah, pio aba bee kɛɛrɛ kɔ a tɔgɛ kɛ̄ Bari ɛrɛ toesaɛ̄ sa dābeeloo miɔŋɔ nɛɛ a naa mmana doo. Mɛ Jɛhova naa wee lɛɛbahloo pɔrɔ dogo kɔ a le yɛɛ pya ye nɛɛ. Gbara a doo dogo yemakɛ̄ ama, gaa bee gbee bee bɔŋanaloo. A bee dapnage zū pya dɔɔ̄na Nɛɛ Kraist ba ye gbaaloo. Nyɔɔwo, ena Pɔɔl bee kɔ bɔŋanaloo a doo a?
5. Ena Pɔɔl bee kɔ bɔŋanaloo a doo a, e ena lo ama kura a? (1 Pya Kɔrint 5:13) (Ɛpnage foto.)
5 Buū 1 Pya Kɔrint 5:13. Pɔɔl bee ɛm lɛta tɛ̄maloo kaɛ edɔɔ̄ Bari kɔ alu elɛɛ nɛɛ a doo pɔrɔ sa naa kiiya ama bu bɔŋanaloo. Bu mɛ sīdee na Pya Nɛɛ Kraist ba gaa tɔɔ̄dum leere etɔɔ̄loo lo nɛɛ a? Pɔɔl bee wa kɔ nɛ kɔ “bui aa su loo i yereloo” nɛɛ ama. Ena lo ama kura a? Pɔɔl baatɛ̄ kɔ lok ama kuūnage kɔ aa lu e “yɔ dua nɛɛ a de nu.” (1 Kɔr 5:11) Ɛŋɛtɛkɛ̄ nyɔɔnɛ dua nɛɛ ama denu dap doo kɔ i wee ye nyɔɔnɛ ɛrɛ gbanialoo. Nyɔɔwo a sira pie kɔ, Pɔɔl gaa kɔ bɔŋanaloo aa ye nyɔɔnɛ yii gbo. Lo ama ebaɛloo bɔŋanalo lokwa a naa lu egbee bɔŋanaloo. (1 Kɔr 5:5-7) Sɔ̄ ba naa suloo ye biiloo, edoonage kɔ a suā kɛ̄ nu a doo a bɛa Jɛhova doo, e kɛɛ dap ye bɔp sa alu elɛɛ ye bu bɔŋanaloo.
Tɛ̄maloo kaɛ edɔɔ̄, Pɔɔl bee ɛm lɛta kɔ alu elɛɛ nɛɛ a bee doo pɔrɔ sa naa kiiya bu bɔŋanaloo (Ɛp 5 barakpaɛ̄)
6. Amunu pah na lɛta Pɔɔl bee ɛm bee ɛrɛ nyɔɔ bɔŋanaloo le nɛɛ a bee doo pɔrɔ a?
6 Sɔ̄ Pɔɔl eyere ye lɛta ma bɔŋanaloo a bee le Kɔrint, a bee bɔātɛ̄ kɛɛrɛ kɛ̄ bɔŋanaloo edoo dogo kumaloo doo. Nu a bee sira aabu na bee, Taitɔs bee su le kpɛa ye mmɛloo. Bɔŋanaloo bee su baɛbah suā kpa Pɔɔl bee wa ɛm ma ama. (2 Kɔr 7:6, 7) Ba bee su zuurabahtɔ̄ a bee wa nɛ. Sɔ̄ pio enɔɔ̄ etɛ̄na aā sɔ̄ Pɔɔl bee ɛm lo lɛta, nɛɛ a bee doo pɔrɔ ama bee kiiya! Bee nyaa bu ye tɔɔ̄dum sa nyɔɔnɛ daakuū Jɛhova a kaāna. (2 Kɔr 7:8-11) Nyaawo ena Pɔɔl ekɔ nɛ bɔŋanaloo kɔ ba a doo a?
KƐ̄ BƆŊANALOO EBEE AARA NƐƐ A BEE DOO PƆRƆ SA A KIIYA DOO
7. Lɛɛ nɛɛ a bee doo pɔrɔ a bu bɔŋanaloo bee dɔ amumu biī ni? (2 Pya Kɔrint 2:5-8)
7 Buū 2 Pya Kɔrint 2:5-8. Pɔɔl bee kɔ “kpɔte a aabah dɛ̄dɛɛ̄ nɛɛ egbɔ̄mɛɛ̄” yeloo. I dap kɔ lo kakamɛnɛ dɔbiī ye nɛ. Amunu biī? Doo kɔ a kiiya.—Hib 12:11.
8. Ena Pɔɔl bee kɔ bɔŋanaloo a doo a?
8 Nyɔɔbee wo Pɔɔl bee kɔ nɛ bɔŋanaloo kɔ: “aaloo sa ye agɛrɛ beenyiɛ” nɛɛ a bee doo pɔrɔ a, sa “bui sikɛ̄ tɔgɛ bui wereloo ye loo.” Yere nukuādɛɛ̄loo kɔ Pɔɔl bee kɔ bɔŋanaloo a doo emanyɔɔ aba esikɛ̄ ye lɛɛbahloo kɔ a le yɛɛ pya nɛɛ Jɛhova. Pɔɔl bee gbī kɔ tɛ̄maloo wa dogo le wa tɔɔ̄dum ba a doo kɔ nɛɛ a bee doo pɔrɔ a suā kɔ elua e’aaloo ye nɛ kaāna sa ba weree ye loo. Bu lo sīdee ba edoo kɔ a suā kɔ ba gaa ye su baɛbah suā yima bu bɔŋanaloo.
9. Ena anua a naa bee nia pio nɛɛ lo e’aaloo pɔrɔ nɛ gbara a bee doo pɔrɔ ama a?
9 Ekɔ a naa bee nia pio pya a le bu bɔŋanaloo lo esu baɛbah suā nɛɛ a bee doo pɔrɔ sa kiiya ama ni? Kpɛa naa kɔ i nɛ mɛ a dap sira doo wo. Nyɔnɛbee ye dogo bee nua taāŋa bu bɔŋanaloo sa dap bɔbɛ kɛɛ pio nɛɛ. Pio nɛɛ bee dap kɛɛrɛ kɔ a naa lee kɔ alu esu baɛbah suā nɛɛ a nua nɛɛ wuga sɔ̄ alabah bee piiga lo ekiisī lo etɔɔ̄dum leere. (Dooreloo Luk 15:28-30.) Kerewo, ena anua a bee lu ebɛɛ̄ kɔ bɔŋanaloo a tɔgɛ kaāna wereloo kumaloo wuga akiiya ama a?
10-11. Ena adap sira lo pya kanɛɛ naa aaloo pɔrɔ nɛ nɛɛ a bee doo pɔrɔ sa ekiiya a?
10 Naa kɛɛrɛ nu e bee dap sira lo pya kanɛɛ naa bee lɛɛbahloo nɛɛ a kiiya kaāna ama kɔ a sikɛ̄ yii bu bɔŋanaloo, ale sɔ̄ e obia lu a, bɔŋanaloo naa tɔgɛ wereloo ye kumaloo. “Gbɛnɛ biirabu” dap ye ee nyɔɔ. Dap kɛɛrɛ kɔ a naa ɛrɛ nae lɔgɔ bɛābu. A dap pee beenyiɛ lo ekwa ye gbanialoo kiikɛ̄ Jɛhova le.
11 E bee piya gbɛnɛ lo pya wuga nɛɛdam le nɛɛwa bu bɔŋanaloo naa aaloo nɛ nɛɛ a bee kiiya ama. Ba dap gbeenage wa gbanialoo kiikɛ̄ Jɛhova le. Ena anua? Nyɔnɛbee ba naa tɔgɛ elap dogo Jɛhova lo e’aaloo nɛ nɛɛ a bee doo pɔrɔ, mɛ e’agabah dogo Setan le dogo toesaɛ̄ naale loo. Lo ba doo wo, ba gaa lɛɛbahloo Setan kɔ a su wa ɔbɛ gbaaloo lo nɛɛ nyɔɔnɛ Jɛhova ɛnia.—2 Kɔr 2:10, 11; Ɛfɛs 4:27.
12. Bu mɛ sīdee na bɔŋanaloo dap nɔ Jɛhova a?
12 Lo a le wo, bu mɛ sīdee na bɔŋanaloo a bee le Kɔrint dap nɔ Jɛhova sa naa nɔ Setan a? Tɛ̄maloo enɔ kɛ̄ Jɛhova aara pya a bee doo pɔrɔ sa ba kiiya doo. Yere nukuādɛɛ̄loo pio nu Baibol kɔ akiiloo Jɛhova. Devid kɔ alu “le sa aaloo pɔrɔ.” (Yɔɔ 86:5) Maika ɛm kɔ: “Mɛɛ na alu Bari doodoo olo a, lo a lɛɛbahloo tɛɛ̄-ekwɔ sa tɛɛ̄ yee gbee lok a?” (Maika 7:18) E Aisaia bee kɔnage kɔ: “Doolo nɛɛ bag dogo aaloo ye dee, le nɛɛ a naa doo kaāna dogo aaloo dɛ̄dɛɛ̄ ye ekɛɛrɛ; edoo lo a obia pii Jɛhova, lokwa a ye ɛrɛ toesaɛ̄ loo, le obia pii ilii Bari, nyɔnɛbee a elɛɛbahloo ye nɛ emanyɔɔ.”—Ais 55:7.
13. Ena anua a bee bɔloo esu nɛɛ a bee doo pɔrɔ sa a kiiya yere bu bɔŋanaloo a? (Ɛp ekpo a kura, “ Mɛ Sɔ̄ Na Bɔŋanaloo Bee Sikɛ̄ Su Gbara Kɔrint A?”)
13 Lo enɔ Jɛhova bɔŋanaloo a bee le Kɔrint ɛrɛ esu baɛbah suā nɛɛ a bee kiiya ama sa doo kɔ a suā kɔ ba weree ye loo. Tɛ̄maloo esu zuurabahtɔ̄ Pɔɔl kɔ alu esu baɛbah suā nɛɛ a bee doo pɔrɔ, bɔŋanaloo etɔgɛ kɔ ba gbaɛ̄tɔ̄loo “dɛ̄dɛɛ̄ nu.” (2 Kɔr 2:9) Bu kaka, aba pio enɔɔ̄ na etɛ̄na a, mɛ lo kakamɛnɛ kiā leere sa doo kɔ a kiiya. Nyɔɔwo a naa bɔloo e pee sɔ̄ lo esikɛ̄ su lo nɛɛ yere bu bɔŋanaloo.
ƐRƐ EKƐƐRƐ NYƆƆ KAĀNA BIAƐ LE TOESAƐ̄ JƐHOVA
14-15. Ena i enɔā aaloo kɛ̄ a bee lu e’aabahloo ue a bee sira li Kɔrint a kere doo a? (2 Pita 3:9) (Ɛpnage foto.)
14 Kpɛa akiiloo kɛ̄ ue a bee sira li Kɔrint a kere ama bee lu e’aabahloo doo lu e’ɛm serekɛ̄ “lo enɔɛ i nu.” (Rom 15:4) Kpɛa ama doo kɔ i suā kɔ Jɛhova naa bee lɛɛbahloo gbɛnɛ pɔrɔ a bee sira yɛɛ pya ye nɛɛ. A naa lunage ye ekɛɛrɛ kɔ nɛɛ a bee doo pɔrɔ sa naa kiiya kɔ a lu etɔgɛ “ewonu” wa kumaloo sa wa lɛɛbahloo kɔ ba a kiisī lo egbaaloo pya a gaa taāŋabah Bari leere. Jɛhova ɛrɛ toesaɛ̄, mɛ a naa wee lɛɛbahloo pɔrɔ dogo, e a naa wee nyaana ye daakuū. (Jud 4) Lo a doo wo, a naa tɔgɛ toesaɛ̄ doo pippip nyɔnɛbee a gaa su dɛ̄dɛɛ̄ pya a le bu bɔŋanaloo yere bu pe.—Kam 13:20; 1 Kɔr 15:33.
15 Kerewo, i nɔ kɔ Jɛhova naa gbī kɔ lɔgɔ nɛɛ a lu egbeesī. A gbī ekpɔā pya nɛɛ ɛrɛgebah sɔ̄ a bɔloo. A wee tɔgɛ toesaɛ̄ kumaloo pya nɛɛ ba nyaana nyiɛ sa gbī ekwa gbaaloo ba ɛrɛ kiikɛ̄ a le. (Ezek 33:11; buū 2 Pita 3:9.) Nyɔɔwo, sɔ̄ gbara Kɔrint ama bee kiiya sa lɛɛbahloo ye pɔrɔ dogo, Jɛhova bee su Pɔɔl kɔā nɛ bɔŋanaloo kɔ alu e’aaloo ye nɛ sa ye su baɛbah suā.
Kɛɛrɛbu kɛ̄ Jɛhova ɛrɛ wereloo le toesaɛ̄ doo, doo kɔ bɔŋanaloo a su baɛbah suā pya alu esikɛ̄ su (Ɛp 14-15 barakpaɛ̄)
16. Kɛ̄ a bee lu e’aabahloo ue a bee sira li Kɔrint doo tɔɔ̄ a loo doodoo wa?
16 I tɛɛ̄ nyɔɔ kɛ̄ a bee lu e’aabahlo ue a bee sira li Kɔrint doo, edoora kɔ i muɛ kɛ̄ Jɛhova tɔgɛ wereloo, kaāna dogo le kaāna biaɛ doo. (Yɔɔ 33:5) Ekɔ a naa luge ezū a kɔ o leera Bari yereloo ni? Nyɔnɛbee dɛ̄dɛɛ̄ ii pya pɔrɔ, dɛ̄dɛɛ̄ ii gaa doo pɔrɔ, e i gbī kɔ a aaloo i nɛ. Ziī ziī ii ɛrɛ edoo yaa Jɛhova nyɔɔ waara zɔɔ a’agara lo a doo kɔ a dap lu e’aaloo i pɔrɔ. Ɛp kɛ̄ bu i ɛɛ sa loo i sukɛ̄ doo lo esuā kɔ Jɛhova wereloo pya ye nɛɛ kaāna sa gbī le kɛ̄tɔɔ̄ wa kumaloo a!
17. Ena i gaa le kɔnia bu pya ekobee ue i yii li a?
17 Lo a le wo, elu e’aabahloo sɔ̄ nɛɛ doo pɔrɔ dogo doodoo wa anii’ee? Pya kanɛɛ bu bɔŋanaloo edap tɔgɛ taɛ Jɛhova ɛrɛ lo eyerebah nɛ pya a doo pɔrɔ kɔ ba a kiiya doodoo wa? Bɔŋanaloo edoodoo wa sɔ̄ pya kanɛɛ biaɛfii lo elɛɛ ziī nɛɛ bu bɔŋanaloo ale sikɛ̄ ye su ni? Pya ebip ama elu e’agara bu pya ekobee ue i yii li.
YƆƆ 109 Wereloo Aā Taɛ Bu Beenyiɛ A
