31 EKOBE UE ENƆ
YƆƆ 12 Jɛhova Lo Gbɛnɛ Bari
Nu Jɛhova Edoora Lo E’agara Miɔŋɔ Nɛɛ
“Nyɔnɛbee Bari bee wereloo nyɔuwe doo wo kɔ a bee su aba ye Nwiīnɛɛdam a bee ɛrɛ nɛ.”—JƆN 3:16.
NU I NƆ
Kɛ̄ Jɛhova gaa i yerebah nɛ lo ebe eebah pɔrɔ doo le kɛ̄ a doo kɔ elu e’ɛrɛ dum anaatah sa agia aabah pɔrɔ doo.
1-2. (a) Ena na a kura pɔrɔ a, e bu mɛ sīdee na i dap ye be eebah (Ɛpnage “Ue Alu Ekɔ Baatɛ̄.”) (b) Ena i kɔnia bu ekobee ue ama le bu pya dɔɔ̄na ekobee ue a le bu Tɔ Baɛloo ama a? (Ɛpnage “Ue A Le Nɛ Pya A Buū Ue Ama” bu ekpo tɔ baɛloo ama a.)
ENIAGE a esuā kɛ̄ Jɛhova a wereloo doo ni? Ziī le sīdee o dap suā ye ture na: Tɛ̄maloo enɔ nu edoora lo ekpɔā a lɛɛ bu pɔrɔ le luh. Pɔrɔ a lu i gbɛnɛ nɛɛ baa lo oo le edap be eebah nyɔɔ o loo. Dɛ̄dɛɛ̄ ii gaa doo pɔrɔ dɛ̄dɛɛ̄ dee, e pɔrɔ na a i nua luh nyɔɔ a. (Rom 5:12) Kerewo, le yereue le. Tɛ̄maloo yerebah Jɛhova, i dap be eebah pɔrɔ. Bu kaka, Jɛhova ekpɔā i lɛɛbah pɔrɔ le luh!
2 Jɛhova eyerebah nɛ miɔŋɔ nɛɛ kɔ ba a be eebah pɔrɔ bu nu alu 6,000 zua. Ena anua a? Nyɔnɛbee a were i loo. A bee wereloo miɔŋɔ nɛɛ aā bɔātɛ̄, sa doo dogo lo eyerebah wa nɛ loo be ama. Bari suā kɔ pɔrɔ wee nua luh, e a naa gbī kɔ i u. A gbī kɔ i tɔɔ̄dum mmɛ deedee. (Rom 6:23) Ekɛɛrɛ a a ɛrɛ kumaloo lo. Bu ekobee ue ama i gaa le agara taa ebip, lo a le: (1) Bu mɛ sīdee na Jɛhova nɛ bɛābu miɔŋɔ nɛɛ a doo pɔrɔ a? (2) Bu mɛ sīdee na miɔŋɔ nɛɛ a bee doo pɔrɔ bu sɔ̄ a bee lu e’ɛm Baibol bee ɛrɛ ewonu aābah Jɛhova a? (3) Bu mɛ sīdee na Jizɔs wee lu lo e’agara miɔŋɔ nɛɛ a doo pɔrɔ a?
BU MƐ SĪDEE NA JƐHOVA NƐ BƐĀBU MIƆŊƆ NƐƐ A DOO PƆRƆ A?
3. Bu mɛ sīdee na i tua tɛ le ka bee lu pya pɔrɔ a?
3 Sɔ̄ Jɛhova bee dɛm tuatua nɛɛdam le nɛɛwa, a bee gbī kɔ ba a le bu ɛɛbu. A bee wa nɛ ekpedɛɛ̄ kɛ̄ etɔɔ̄, dɔɔ̄nu iya dam le wa le ekpeloo tam ba esi. Ba ebee doo kɔ pya wa manamana a mma bu nyɔuwe lokwa yube loo nyɔuwe lu paradais doodoo gɔh Idɛn. A bee wa nɛ ziī ewɛrabah lok. E a zuura wa bahtɔ̄ kɔ lo ba naa sere lo lok, sa ɛmɛnɛbee ye lɛɛbeekɛɛ̄, wa pɔrɔ enua luh. I suā nu a bee sira. Ziī nɛɛ a le bu edɔɔ̄ lo a naa wereloo Bari ale werenage wa loo bee lu sa wa dɔā-ɛp kɔ ba a doo lo pɔrɔ. Adam le Iv bee dɔ bu lo dɔā-ɛp. Ba bee doo pɔrɔ nyɔnɛbee ba naa bee ture nyiɛ loo wa wereloo Tɛ. Dookɛ̄ i suā doo, nu Jɛhova bee kɔ a bee dooa. Ba bee ana, sa bu kpɛdumɛ ba u.—Jɛn 1:28, 29; 2:8, 9, 16-18; 3:1-6, 17-19, 24; 5:5.
4. Ena anua Jɛhova baaloo pɔrɔ sa i yerebah nɛ lo ebe ye a? (Pya Rom 8:20, 21)
4 Jɛhova doo kɔ alu e’ɛm pɔrɔ nu a bee sira ama lokwa i nɔnu aāloo. A doo kɔ i dābeeloo nu anua a baaloo pɔrɔ gbɛnɛ. Pɔrɔ kpoora i lɛɛ loo i Tɛ sa doo kɔ i u. (Ais 59:2) Ɛɛ na anua lo nɛɛ a le bu edɔɔ̄, a nua dɛ̄dɛɛ̄ taāŋa ama wereloo pɔrɔ sa zūnage pya nɛɛ kɔ ba a doo a. A bee dap kɛɛrɛ kɔ a bee be e eebah bu gɔh Idɛn. Mɛ a naa suā kɛ̄ Jɛhova ɛrɛ wereloo doo. Bari sii nyaana ye ekɛɛrɛ kumaloo pya manamana Adam le Iv. Nyɔɔ wereloo a ɛrɛ loo miɔŋɔ nɛɛ, a bee nwaabah nɛ bɛābu dɛ̄dɛɛ̄ nɛɛ. (Buū Pya Rom 8:20, 21.) Jɛhova suā kɔ pio pya wa manamana ebiaɛfii lo ewere ye loo sa gbī kɔ a yerebah wa nɛ lo ebe eebah pɔrɔ. E doodoo wa Tɛ le Nɛɛ a bee wa Dɛm, enɛ wa dee lo e’agia aabu pɔrɔ sa ye tɔɔ̄ waɛloo. Jɛhova edoo doodoo wa lokwa dɛ̄dɛɛ̄ lo ama dap waɛ ni?
5. Mɛ sɔ̄ na alu tua sɔ̄ Jɛhova bee doo kɔ miɔŋɔ nɛɛ a doo pɔrɔ a ɛrɛ bɛābu a? Naa baatɛ̄. (Jɛnɛsis 3:15)
5 Buū Jɛnɛsis 3:15. Tua sɔ̄ i bee ɛrɛ bɛābu na sɔ̄ Jɛhova bee tɛ̄ma biaɛ nyɔɔ Setan. Bari bee kɔ ziī “eyuu” edoo kɔ i ɛrɛ bɛābu. Lo eyuu ama ezaga tɔ bee Setan sa lɛɛ dɛ̄dɛɛ̄ taāŋa a bee nua bie bu gɔh Idɛn. (1 Jɔn 3:8) Kerewo, lo eyuu gaa le tɔga sɔ̄ a gaa doo wo. Setan edam ye sa ye nua luh loo. Lo ama esu gbɛnɛ ekiɛ̄nu nua loo Jɛhova. Mɛ lo ekiɛ̄nu ebɔloo bu kpɛdumɛ nyɔnɛbee booboo nɛɛ e’ɛrɛ kpɔā aākɛ̄ bah pɔrɔ le luh.
BU MƐ SĪDEE NA MIƆŊƆ NƐƐ A DOO PƆRƆ BU SƆ̄ A BEE LU E’ƐM BAIBOL BEE DAP ƐRƐ YEREKPOTƐ̄ A AABAH JƐHOVA A?
6. Ena pya nɛɛ a bee ɛrɛ yira doodoo Abɛl le Noa bee doo lo etɔɔ̄ waɛloo Jɛhova a?
6 Bu booboo zua a sikɛ̄ nyɔɔnɛ, Jɛhova bee doo kɔ alu e’agɛrɛbah suā kɛ̄ miɔŋɔ nɛɛ a doo pɔrɔ edap ye tɔɔ̄ waɛloo doo. Ebɛl alu lo eree baɛ nwiīnɛɛdam Adam le Iv na a bee le tua nɛɛ a bee ɛrɛ yira bu Jɛhova a sɔ̄ taāŋa esira bu gɔh Idɛn sah. Nyɔɔbee Abɛl bee wereloo Jɛhova sa gbī edoo nu a Ye nia sa Ye tɔɔ̄ waɛloo a, a bee ye waara zɔɔ nɛ. Abɛl wee tɔɔ̄loo naana pee, nyɔɔwo, a bee kee pio zege naana pee sa waāna zɔɔ nɛ Jɛhova. Jɛhova bee doo dogo kumaloo doodoo wa? A “bee ɛp Abɛl le ye nu bɛɛ kɛ̄sī leere.” (Jɛn 4:4) Jɛhova bee tɔgɛnage kɔ a sue dua waara zɔɔ ama lo pya dɔɔ̄na nɛɛ ba ye wereloo sa ye ture nyiɛ loo bee doo, doodoo Noa. (Jɛn 8:20, 21) Jɛhova tɔgɛ tɛ̄maloo susu pya lo zɔɔ kɔ miɔŋɔ nɛɛ a doo pɔrɔ dap ɛrɛ ewonu ye aābah sa ye tɔɔ̄ waɛloo. b
7. Ena i nɔ aāloo sɔ̄ Abreham bee kpɛ̄naloo lo esu ye nwiī waāna zɔɔ a? (Ɛpnage foto.)
7 Jɛhova bee kɔ nɛ Abreham alu nɛɛ a ɛrɛ e’agatɛ̄ yira kɔ a doo ziī nu a aga, lo a le su ye nwiī Aizik waāna zɔɔ. Bu kaka, Abreham bee muɛ kɔ nu a bee lu ekɔ a doo ama aga gbɛnɛ. Kerewo, a bee kpɛ̄naloo lo edoo doo wo. Mɛ Bari bee ye ɔbɛ taɛ sɔ̄ ebee ina edoo. Kerewo, edobah ama tɔgɛ ziī kpog bee kaka ue dɛ̄dɛɛ̄ pya a ɛrɛ yira. Jɛhova kpɛ̄naloo lo esu ye wereloo Nwiīnɛɛdam waāna zɔɔ. Nyɔnɛbee a wereloo miɔŋɔ nɛɛ gbɛnɛ.—Jɛn 22:1-18.
8. Ena gbɛnɛ-edo waara zɔɔ a bee lu edoo kɛɛ̄ Lok tɔgɛ a? (Levitikɔs 4:27-29; 17:11)
8 Sɔ̄ gbɛnɛ-edo zua etɛ̄na, Lok a bee lu enɛ edonyɔɔ Izrɛl bee kɔ alu edoo gbɛnɛ-edo waara zɔɔ lo e’uu pɔrɔ pya nɛɛ Bari. (Buū Levitikɔs 4:27-29; 17:11.) Lo waara zɔɔ ama bee tɔgɛ kɔ lo gbɛnɛ waara zɔɔ lo ekpɔā pya nɛɛ lɛɛ bu pɔrɔ gaa lu. Bee lu enɛ edɔɔ̄ pya nɛɛ mɔmanudɛɛ̄ Bari kɔ ba a kɔ siā kɔ eyuu a bee lu eyira yii loo, lo a le Nwiī Bari lo a bee lu keebee elu etɔg ye sa ye fɛ. Elu efɛ ye doodoo naana pee alu ewɔma zɔɔ. (Ais 53:1-12) Naa kɛɛrɛ: Jɛhova nɔɔ kɔ ye Nwiīnɛɛdam a wereloo alu ewaana zɔɔ lo ekpɔā miɔŋɔ nɛɛ, gbaāloo olo lɛɛ bu pɔrɔ le luh!
BU MƐ SĪDEE NA JIZƆS BEE LU WEE AGARA MIƆŊƆ NƐƐ A?
9. Ena Jɔn Nɛɛ Limaā Nɛɛ bee kɔ a kiiloo Jizɔs a? (Pya Hibru 9:22; 10:1-4, 12)
9 Bu tua sɔ̄ o’oo tup zua C.E., zooro Bari a kura Jɔn Nɛɛ Limaā Nɛɛ bee kɔ kumaloo Jizɔs nɛɛ Nazɛrɛt kɔ: “Ɛp, Nwiī Naana Pee Bari lo a su pɔrɔ nyɔuwe lɛɛ!” (Jɔn 1:29) Ue alu ekɔ tɛ̄maloo kaɛ edɔɔ̄ ama tubebahloo Jizɔs nua eyuu a bee lu ekɔ nu akiiloo aā sɔ̄ a binia. A gaa le waara lo zɔɔ a bee lu eyira yii loo. Nyaawo, e’agatɛ̄ bɛābu le nɛ miɔŋɔ nɛɛ a doo pɔrɔ ee dɛ̄dɛɛ̄ sɔ̄, e lo ama lu kaāna be eebah pɔrɔ.—Buū Pya Hibru 9:22; 10:1-4, 12.
10. Bu mɛ sīdee na Jizɔs bee tɔgɛ kɔ a bee lue lo e “kue” pya pɔrɔ a?
10 Jizɔs bee yerebah nɛ pya nɛɛ pɔrɔ ba bee si gaa nɛ taāŋa sa wa kue kɔ ba alu pya a ye nyɔɔnɛ dumɛ. A bee suā kɔ pɔrɔ na anua dɛ̄dɛɛ̄ taāŋa a le loo miɔŋɔ nɛɛ a. Nyɔɔwo, a bee ina loo pya nɛɛdam le nɛɛwa lo a wee lu esuā wa loo nua pya pɔrɔ. A bee baatɛ̄ tɛ̄maloo edobah kɔ: “Pya loo nwaɛ̄ naa wee gbī dambie, mɛ pya loo dumɛ.” A kɔ yereloo kɔ: “Mm bee lu wee kue pya kaāna dogo, mɛ pya pɔrɔ.” (Mat 9:12, 13) Tɔɔ̄dum Jizɔs bee tɔgɛ doo wo. Bu fɛgɛ, a bee aaloo pɔrɔ nɛ wa a bee su maāto ye loŋa tɔ. (Luk 7:37-50) A bee tɔgɛ gbɛnɛ kaka ue wa Sameria bie nu bana maā, kereadoo a suā kɔ a wee kūnagā. (Jɔn 4:7, 17-19, 25, 26) Bari nɛnage ekpo Jizɔs lo elɛɛ luh lo a lu kuma dɛ̄dɛɛ̄ taāŋa pɔrɔ wee nua. Bu mɛ sīdee? Jizɔs bee lɛɛ pya nɛɛ kɛ̄ bu luh, nɛɛdam le nɛɛwa, pya miɔŋɔ le pya nama nɛɛ.—Mat 11:5.
11. Ena anua pya nɛɛ a doo pɔrɔ bee dap yiiloo Jizɔs a?
11 A naa lu nyɛŋia kɔ kunɛ pya nɛɛ a bee doo gbɛnɛ pɔrɔ bee yiiloo Jizɔs. A bee wa toesaɛ̄ sa wa kɛɛrɛbu. Loo wa bee su kɛ̄ lo eyii ye loo. (Luk 15:1, 2) E Jizɔs bee kaɛgɛ sa nɛ ekpɛanu pya nɛɛ ama nyɔɔ wa yira. (Luk 19:1-10) Jizɔs bee tɔgɛ pya nɛɛ kɛ̄ ye Tɛ ɛrɛ toesaɛ̄ doo. (Jɔn 14:9) Bu ye ekɔaue le ye dogo, a bee tɔgɛ kɔ ye Tɛ a ɛrɛ wereloo lu nɛɛ a ɛrɛ toesaɛ̄ sa gbī eyerebah nɛ ziī ziī nɛɛ kɔ a be eebah pɔrɔ. Jizɔs bee yerebah nɛ pya nɛɛ ba doo pɔrɔ kɔ ba a gbī enyaana wa tɔɔ̄dum sa ye nyɔɔnɛ.—Luk 5:27, 28.
12. Ena Jizɔs bee tɔgɛ a kiiloo ye luh a?
12 Jizɔs bee suā nu a gaa le sira ye loo. Nu a eeloo ziī sɔ̄, a bee kɔ nɛ pya a wee ye nyɔɔnɛ dumɛ kɔ a elu elɛɛe ye sa ye fɛ nyɔɔ te tɔga. (Mat 17:22; 20:18, 19) A bee suā kɔ ye waara zɔɔ gaa le su pɔrɔ nyɔuwe lɛɛ, dookɛ̄ Jɔn le pya nɛɛ mɔmanudɛɛ̄ ebee zue serekɛ̄ doo. Jizɔs bee tɔgɛnage kɔ sɔ̄ a enɛa ye dum sah, a gaa le “zuura dɛ̄dɛɛ̄ nɛɛ” yaaloo ye. (Jɔn 12:32) Pya nɛɛ a doo pɔrɔ dap doo nu a nia Jɛhova tɛ̄maloo esu Jizɔs nua Nɛɛ-a-wa-ɛrɛ sa nyɔɔnɛ ye pah ekaɛtɔ. Lo ba doo wo, bu ye kpɛdumɛ elu “e’ iye [wa] lɛɛkɛ̄ bah pɔrɔ.” (Rom 6:14, 18, 22; Jɔn 8:32) Nyɔɔwo, Jizɔs bee kpɛ̄naloo sa ɛrɛ e’agaloo lo e’u ezialoo luh.—Jɔn 10:17, 18.
13. Jizɔs bee u bu mɛ sīdee, e ena ye luh i tɔgɛ akiiloo Jɛhova a? (Ɛpnage foto.)
13 Bee lu etɛ̄ŋaloo Jizɔs, ye aa, ye gbɛ, ye gbee bee, biaɛ kɔ alu efɛ ye, sa ye tɔg. Pya nɔ̄ bee ye su kumakɛ̄ elu efɛ ye sa ye ka loo te. Sɔ̄ a gaa bee kiisī lo e’egerebu bu dɛ̄dɛɛ̄ ekiɛ̄nu ama, a ɛrɛ Nɛɛ a bee ziloo gbɛnɛ. Lo Nɛɛ na Jɛhova Bari. A naa bee su ye ekpo a kuī eera daā dogo lo ekpega ye. Ena anua a? Ena a dap zū Tɛ a ɛrɛ wereloo kɔ a doo dogo doo wo a? Bu ekpurubah, ɛɛ na wereloo. Jizɔs bee kɔ: “Bari bee wereloo nyɔuwe doo wo, kɔ a bee su aba ye Nwiīnɛɛdam a bee ɛrɛ nɛ, lokwa ɛrɛgebah nɛɛ a ye yira nɛ naale epe mɛ a e’ɛrɛ dum anaatah.”—Jɔn 3:16.
Bu lɛɛbahloo kɔ alu efɛ ye Nwīneedam, Jɛhova ɛrɛ gbɛnɛ ekiɛ̄nu lokwa i agia aabu pɔrɔ le luh (Ɛp 13 barakpaɛ̄)
14. Ena waara zɔɔ Jizɔs i tɔgɛ a?
14 Waara zɔɔ Jizɔs na gbɛnɛ nu a tɔgɛ kɛ̄ Jɛhova wereloo miɔŋɔ nɛɛ ba lu manamana Adam le Iv doo a. A tɔgɛ kɛ̄ Jɛhova wereloo olo gbɛnɛ doo. A bee su ye Nwiī a wereloo waāna zɔɔ sa egerebu gbɛnɛ bu ekiɛ̄nu lo e’agara a lɛɛ kɛ̄bah pɔrɔ le luh. (1 Jɔn 4:9, 10) Aiī, a gbī eyerebah nɛ ziī ziī ii kɔ i bebe loo pɔrɔ sa ye eebah!
15. Ena i ɛrɛ edoo lokwa i ɛrɛ biī aāloo dɔɔ̄nu Bari i nɛ tɛ̄maloo waara zɔɔ a’agara Jizɔs a?
15 Dɔɔ̄nu waara zɔɔ a’agara lo a bee nɛ ye Nwiīnɛɛdam doo kɔ a waɛ bah lo e’aaloo i pɔrɔ i nɛ. Lokwa Bari aaloo i pɔrɔ, a ɛrɛ nu i ɛrɛ edoo. Ɛɛ e ni? Jɔn Nɛɛ Limaā le Jizɔs Kraist bee nɛ ye ture kɔ: “Kiiya, nyɔnɛbee Buɛ̄-mɛnɛ bunyɔɔ ewara.” (Mat 3:1, 2; 4:17) Nyɔɔwo, kikiiya na gbɛnɛ nu i doo lo i gaa gbīge ebebe loo pɔrɔ kaāna sa tɔɔ̄ yii loo i Tɛ a i wereloo a. Mɛ ena i doo lo etɔgɛ kɔ i ekiiya a, e bu mɛ sīdee na eyerebah i nɛ kɔ i be eebah i taɛ lo edoo pɔrɔ a? Ekobee ue a nyɔɔnɛ li e’agara ebip ama.
YƆƆ 18 Tɔgɛ Nia Loo Waara Zɔɔ A’agara
a UE ALU EKƆ BAATƐ̄: Bu Baibol, bee ue “pɔrɔ” kiiloo pɔrɔ dogo, sɔ̄ nɛɛ naa tɔɔ̄dum ale doo dogo a gbaaloo daakuu Jɛhova a ɛɛ. Mɛ bee ue “pɔrɔ dapnage kura sɔ̄ nɛɛ naa mmana ale kɔ pɔrɔ le ye loo lo a le kɛ̄tɔɔ̄ i bee ɛrɛ aābah Adam. Pɔrɔ i ɛrɛ aābah Adam ama na anua dɛ̄dɛɛ̄ ii gaa u a.
