35 EKOBEE UE ENƆ
YƆƆ 123 Wee Nyɔɔnɛ Nɔɔnɔɔ Nu Jɛhova
Yerebah A Le Nɛ Pya A Lu Elɛɛ Bu Bɔŋanaloo
“Gbɛnɛ ɛɛŋa e le li bunyɔɔ nyɔɔ ziī nɛɛ pɔrɔ akiiya eenyɔɔ nia tup le lop le ɛrɛnia pya kaāna dogo lo pya ba naa gbī ekiiya.”—LUK 15:7.
NU I NƆ
Nu anua alu ebɛɛ̄ lo elɛɛ pio nɛɛ bu bɔŋanaloo le kɛ̄ pya kanɛɛ dap wa yerebah nɛ doo lo esikɛ̄ ɛrɛ ewonu aābah Jɛhova.
1-2. (a) Bu mɛ sīdee na Jɛhova ɛmadɛɛ̄ pya a si gbɛnɛ pɔrɔ sa naa gbī ekiiya a? (b) Amunu bɛābu na Jɛhova ɛrɛ kumaloo pya a doo pɔrɔ a?
JƐHOVA naa wee lɛɛbahloo dɛ̄dɛɛ̄ bee dogo. A baaloo pɔrɔ. (Yɔɔ 5:4-6) A gbī kɔ i nwadɛɛ̄ ye daakuu a kaāna, lo a le bu ye Muɛ Ue. Kerewo, Jɛhova naa ɛmadɛɛ̄ kɔ lɔgɔ nɛɛ a naa mmana a tɔɔ̄dum bu sīdee a mma. (Yɔɔ 130:3, 4) Aba lo sɔ̄, a naa lɛɛbahloo ‘pya a naa nwadɛɛ̄ Bari, pya ba kiirasī ewonu ilii Bari kɔ alu saaŋa dogo.’ (Jud 4) Bu kaka, Baibol kɔ elu “gbegbee pya a naa nwadɛɛ̄ Bari” bu nɔ̄ Bari lo a le Armagidɔn.—2 Pit 3:7; Mum 16:16.
2 Mɛ, Jɛhova naa gbī kɔ lɔgɔ nɛɛ a pe. Dookɛ̄ i bee kɔ doo bu pya ekobee ue a’aabahloo ue ama a, Baibol kɔ siā leere kɔ a gbī kɔ “dɛ̄dɛɛ̄ nɛɛ a lu ina loo kikiiya.” (2 Pit 3:9) Pya kanɛɛ ba lu Nɛɛ Kraist nɔ Jɛhova sɔ̄ ba egerebu sa piiga lo eyerebah nɛ pya a bee doo pɔrɔ kɔ ba a nyaana wa tɔɔ̄dum sa sikɛ̄ ɛrɛ ewonu aābah Jɛhova. Kerewo, naale dɛ̄dɛɛ̄ nɛɛ a doo pɔrɔ na akiiya a. (Ais 6:9) Pio nɛɛ kiisī lo edoo pɔrɔ kaɛlɛɛ kɛ̄ pya kanɛɛ kiisī lo eyerebah wa nɛ kɔ ba akiiya doo. Ena elu edoo sɔ̄ a mɛa doo wo a?
‘LƐRAA PƆRƆ NƐƐ A I LE LOO’
3. (a) Ena Baibol kɔ alu edoo loo nɛɛ a doo pɔrɔ sa naa kiiya a? (b) Bu ziī sīdee ena anua i dap kɔ nɛɛ a doo pɔrɔ a na a biaɛfii kɔ a lu elɛɛ ye bu bɔŋanaloo a?
3 Sɔ̄ nɛɛ doo pɔrɔ sa naa kiiya, lɔgɔ nu pya kanɛɛ edoo loo naale mɛ aba enyɔɔnɛ nu a le bu 1 Pya Kɔrint 5:13 lo a kɔ: ‘Lɛraa pɔrɔ nɛɛ a i le loo.’ Bu ziī sīdee, nɛɛ a doo pɔrɔ a na a biaɛfii kɔ nu ama a sira ye loo a, a gaa bugara nu a a bee foh. (Gal 6:7) Ena anua i dap kɔ doo wo a? Nyɔnɛbee a naa gbī esu dɛ̄dɛɛ̄ yerebah pya kanɛɛ kiisī lo enɛ ye lokwa a kiiya. (2 Mɛnɛ 17:12-15) Ye dogo tɔgɛ kɔ a ebiaɛrafii kɔ a naale enyɔɔnɛe daakuu Jɛhova.—Deut 30:19, 20.
4. Ena anua alu enɛ muɛ sɔ̄ nɛɛ a doo pɔrɔ sa naa kiiya lu elɛɛ bu bɔŋanaloo a?
4 Sɔ̄ nɛɛ a doo pɔrɔ naa kiiya a lu elɛɛ ye bu bɔŋanaloo, elu enɛ muɛ lo edoo kɔ bɔŋanaloo a suā kɔ a naale na ziī yɛɛ Pya Ekeebee Jɛhova. b Naa lu enɛ muɛ lo edoo kɔ kɛɛ a bɔp nɛɛ a bee doo pɔrɔ. Taāwo, alu enɛ muɛ lokwa bɔŋanaloo dap nyɔɔnɛ zuurabahtɔ̄ Kpa Kaɛ a kɔ “bui aa su loo i yereloo” lo nɛɛ “ale kunɛ eyɔ nɛɛ a de nu.” (1 Kɔr 5:9-11) Lee sɔ̄ Jɛhova i nɛ zuurabahtɔ̄ ama. Nɛɛ lɛɛratam Pɔɔl ɛm kɔ: “Nwī kere nu a wee muunɛ fituru muunɛ yube ye ekpo.” (1 Kɔr 5:6) Nɛɛ a doo pɔrɔ sa a naa kiiya, dap ɔɛloo biaɛfii pya a gaa piiga lo etɔɔ̄dum nyɔɔnɛ daakuu Jɛhova a kaāna.—Kam 13:20; 1 Kɔr 15:33.
5. I ɛmadɛɛ̄ nɛɛ alu elɛɛ bu bɔŋanaloo doodoo wa, e ena anua a?
5 Lo a le wo, mɛ sīdee na i ɛmadɛɛ̄ nɛɛ le ii gbaa yira alu elɛɛ bu bɔŋanaloo a? Kereadoo ii ye gbaaloo, ii le e’ɛma ye dɛɛ̄ doodoo nɛɛ lɔgɔ bɛābu naa lena nɛ, mɛ doodoo naana pee a pe. Naana pee a pe aa yɛɛ ye eku dap sikɛ̄ obiasī. Nyɛŋiabu kɔ naana pee a pe a, bee kiī ye dum nɛ Jɛhova. Lu ekiɛ̄nu kɔ, a naa gaa tɔɔ̄dum dookɛ̄ a bee kiīloo nɛ doo anyaawo, e lo ama lu gbɛnɛ nu bɔɔ. (Ezek 18:31) Kerewo, kuma sɔ̄ Jɛhova lege gaa ɛrɛ toesaɛ̄ a, lu ebɛābu kɔ nɛɛ ama dap obiasī lu. Bu mɛ sīdee na pya kanɛɛ etɔgɛ bɛābu ama siā kumaloo nɛɛ a bee doo pɔrɔ sa alu elɛɛ ye bu bɔŋanaloo a?
KƐ̄ PYA KANƐƐ YEREBAH NƐ NƐƐ A LU ELƐƐ BU BƆŊANALOO DOO
6. Pio ena pya kanɛɛ edoo lo eyerebah nɛ nɛɛ a bee lu elɛɛ bu bɔŋanaloo a?
6 Ekɔ nɛɛ alu elɛɛ bu bɔŋanaloo lu elɛɛ ye bahloo doo pippip kɔ a gbī dee nyɔɔ ye loo sa obia pii Jɛhova ni? Eeye doo pippip! Sɔ̄ kɔmitii a gaa kɔ nɛ nɛɛ a naa kiiya kɔ elu elɛɛ ye bu bɔŋanaloo, ba ebaatɛ̄ ye nɛ pya nu edoo lokwa a obia lu bu bɔŋanaloo. Mɛ pya kanɛɛ edoo emanyɔɔ wo. Gbɛnɛkpo sɔ̄ ba wee kɔ nɛ nɛɛ a bee doo pɔrɔ a kɔ ba esikɛ̄ ye zɔŋia lo e’ɛp lo a le enyaanage ye beenyiɛ. Lo a le nɛɛ a bee doo pɔrɔ a kpɛ̄naloo esikɛ̄ wa nyɔɔnɛ zɔŋia, pya kanɛɛ ekɔ ye nɛ bu wereloo kɔ a kiiya sa obiasī lu sɔ̄ ba esikɛ̄ zɔŋia. Kere a sii nyaana nyiɛ ye taɛ lo sɔ̄, sɔ̄ sɔ̄ gaa tɛɛ̄ ba ewee piiga kaāna lo esikɛ̄ ye zɔŋia.
7. Bu mɛ sīdee na pya kanɛɛ nɔ toesaɛ̄ Jɛhova sɔ̄ ba gaa nyɔɔnɛ nɛɛ a bee lu elɛɛ bu bɔŋanaloo kɔnia ue a? (Jeremia 3:12)
7 Pya kanɛɛ epiiga lo enɔ esaɛ̄ nyiɛ Jɛhova sɔ̄ ba gaa nyɔɔnɛ nɛɛ alu elɛɛ bu bɔŋanaloo kɔnia ue. Bu edobah, Jɛhova naa bee dasī baɛ kɔ pya ye nɛɛ Izrɛl a kere lo ba bee doo pɔrɔ a dasī doo dogo lo e’obia lu. Taāwo, alɛ bee dasī doo dogo wa kumaloo lɛɛ ba gae tɔgɛ kɔ ba ekiiyae. Dookɛ̄ a bee lu ekɔ doo bu lo eree baɛ ekobee ue a aabaloo ue ama, Jɛhova bee tɔgɛ ye toesaɛ̄ tɛ̄maloo ekɔ nɛ nɛɛ mɔmanudɛɛ̄ Hosea kɔ a su ye wa lo a bee lege gaa doo gbɛnɛ pɔrɔ. (Hos 3:1; Mal 3:7) Bu enɔ Jɛhova, a taɛ pya kanɛɛ a lu Nɛɛ Kraist kaāna kɔ nɛɛ a bee doo pɔrɔ a obiasī eba naa gbī kɔ a aga i bah lo edoo wo.—Buū Jeremia 3:12.
8. Mɛ sīdee na kam Jizɔs akiiloo nwiī pee zɔ doo kɔ i agɛrɛbah dābeeloo kɛ̄ Jɛhova ɛrɛ esaɛ nyiɛ le toesaɛ̄ doo a? (Luk 15:7)
8 Nyɛŋiabu kam Jizɔs akiiloo nwiī pee zɔ bu lo eree baɛ ekobee ue a kɔ ue nyɔɔ ue ama a. Sɔ̄ ye tɛ ye muɛ a gaa lu be, a “teera ye pigara bahloo, sa ye kuɛ̄ nyɔɔnu loo.” (Luk 15:20) Suā kɔ ye tɛ naa dasī baɛ ye nwiī kɔ a bara aaloo. Taāwo, a dasī doo dogo dookɛ̄ ɛrɛgebah tɛ a ɛrɛ wereloo edoo. Pya kanɛɛ piiga lo etɔgɛ dua elap dogo ama pima pya a aaloo Jɛhova. Ba gbī kɔ pya naana pee a pe ama a “obia pii [Jɛhova].” (Luk 15:22-24, 32) Ɛɛbu le li bunyɔɔ sɔ̄ ziī nɛɛ pɔrɔ obiasī lu, e ɛɛbu lenage a kɛnɛkɛ̄!—Buū Luk 15:7.
9. Bu mɛ sīdee na Jɛhova bu wereloo kɔ ue ezū pya a bee doo pɔrɔ a?
9 Aāloo nu i ekɔnia, i muɛ leere kɔ Jɛhova naa wee lɛɛbahloo pya a naa kiiya aabu wa pɔrɔ kɔ ba a kiisī lo ele bu bɔŋanaloo. Kerewo, a lege aa gbī eyerebah wa nɛ. A gbī kɔ ba a obiasī. Ekɛɛrɛ Jɛhova ɛrɛ loo pya a doo pɔrɔ lu ekɔ bu Hosea 14:4 kɔ: “m gaa le bo wa dɔ kii dumɛ; m gaa le were wa loo bu yɔrɔ, nyɔnɛbee na saŋ ebee wa kiiya aaloo.” Sɔ̄ ba suā kɛ̄ a tɔɔ̄loo Jɛhova doo, doo kɔ pya kanɛɛ a ɛp lo emuɛ ɛrɛgebah nu atɔgɛ kɔ lo nɛɛ ekiiya. E lo ama doo kɔ pya a bee aaloo Jɛhova a suā kɔ a weree wa loo sa gbī kɔ ba a obiasī.
10-11. Bu mɛ sīdee na pya kanɛɛ epiiga lo eyerebah nɛ pya a bee lu elɛɛ bu bɔŋanaloo sɔ̄ akii adumɛ a?
10 Ena i kɔ akiiloo pya nɛɛ a bee lu elɛɛ bu bɔŋanaloo sɔ̄ akii adumɛ, naadabah elua gbɛnɛ-edo zua a? Pio nɛɛ ama naa gaa doo na pɔrɔ a bee nua alu elɛɛ wa bu bɔŋanaloo. Pio aba naa suā na nu anua a bee lu elɛɛ wa bu bɔŋanaloo. Ɛrɛgebah kɛ̄ a le doo, pya kanɛɛ epiiga lo egbī wa sa inaloo ziī ziī aba. Sɔ̄ ba wa inaloo, pya kanɛɛ enyɔɔnɛ nage wa yere kara sa wa kɔ nɛ bu wereloo kɔ ba a obia lu. Kerewo, lo nɛɛ ebee aabu bɔŋanaloo gbɛnɛ-edo zua, a ɛrɛ e ɛrɛ e’ɔaloo bu edɔɔ̄ kaāna. Nyɔɔwo, lo a tɔgɛ kɔ a gbī e obia lu bu bɔŋanaloo, pya kanɛɛ dap nɔɔ kɔ nɛɛ a nɔɛ̄ ye Baibol kere a sii lu esu ye. Kerewo, bu dɛ̄dɛɛ̄ kɛ̄tɔɔ̄ pya kanɛɛ na enɔɔ nu akiiloo lo enɔānu Baibol a.
11 Bu enɔ toesaɛ̄ Jɛhova pya kanɛɛ edoo dogo lo eyerebah nɛ gbɛnɛ-edo aba kɔ ba a suā kɔ ba dap obiasī lu. Sɔ̄ nɛɛ a bee doo pɔrɔ tɔgɛ kikiiya sa aaloo ye pɔrɔ dee, dap lu esu ye sɔ̄ a naa lu epee sɔ̄.—2 Kɔr 2:6-8.
12. (a) Pya amunu kɛ̄tɔɔ̄ na pya kanɛɛ ɛrɛ enwaɛdɛɛ̄ loo gbɛnɛ a? (b) Ena anua ii le ekɛɛrɛ kɔ a naale ewaɛbah nɛɛ a bee doo pio bee pɔrɔ kɔ Jɛhova a to ye esaɛ̄ a? (Ɛpnage ue a le kɛɛ̄.)
12 Bu pio kɛ̄tɔɔ̄ alu ebɛɛ̄ kɔ pya kanɛɛ a nwaɛdɛɛ̄ kaāna lɛɛ ba gaa sikɛ̄ su lo nɛɛ. Bu edobah, lo lo nɛɛ bee gbee nwiī a sii tura nɛɛ ale a bee anna yira ale a bee si kiāŋana lo elɛa ye wa ale ye dam bah, pya kanɛɛ e’ɛp leere sɛh ekiiyage kaāna. (Mal 2:14; 2 Tim 3:6) Ba ɛrɛ ebaɛloo pya wuga bu bɔŋanaloo. Aba lo sɔ̄, alu ebɛɛ̄ kɔ i suā kɔ Jɛhova e’obia su ɛrɛgebah nɛɛ a bee doo pɔrɔ sa tɔgɛ kaāna kikiiya sa ɔbɛ edoo pɔrɔ. Nyɔɔwo, kereadoo pya kanɛɛ gaa nwaɛdɛɛ̄ loo pya a bee doo dogo kiāŋana kumaloo pya dɔɔ̄na ba aa doo yema kɛ̄ sa kɔ Jɛhova naale etɔgɛ toesaɛ̄ kumaloo pya a bee doo pio bee pɔrɔ ama. c—1 Pit 2:10.
NU BƆŊANALOO DAP DOO
13. Ena alu kee a le yɛɛ kɛ̄ i aara nɛɛ alu ekāmɛnɛ tɛ̄mabah pya kanɛɛ le nɛɛ a bee lu elɛɛ bu bɔŋanaloo a?
13 Dookɛ̄ i bee kɔ doo bu ekobee ue i aa a, pio sɔ̄ wee lu enɛ muɛ kɔ alu ekāmɛnɛ ziī nɛɛ. Sɔ̄ a le doo wo, i kiisī lo egbaa ye loo sa suā kɔ akiiya sa aaloo ye pɔrɔ dogo. (1 Tim 5:20) Alege aa le bu bɔŋanaloo sa gbī agɛrɛloo a aabah pya ye wuga bu bɔŋanaloo. (Hib 10:24, 25) Mɛ, kɛ̄tɔɔ̄ ama alu kaāna kee loo nɛɛ alu elɛɛ bu bɔŋanaloo. I ɔbɛ esu “loo yere loo” lo nɛɛ, “ale kunɛ eyɔ nɛɛ a denu.”—1 Kɔr 5:11.
14. Bu mɛ sīdee na Pya Nɛɛ Kraist dap su wa ekɛɛrɛ beenyiɛ Baibol ekpɔā daānu kiikɛ̄ nɛɛ a lu elɛɛ bu bɔŋanaloo le a? (Ɛpnage foto.)
14 Ekɔ pya ue elua ekɔ ama kurage kɔ i ɛp nɛɛ a bee lu elɛɛ bu bɔŋanaloo tɛrɛ doo pippip ni? Naa lu ebɛɛ̄ doo wo. Alu kaka kɔ ii le egbaa ye loo. Mɛ Pya Nɛɛ Kraist dap su wa ekɛɛrɛ beenyiɛ Baibol ekpɔā biaɛma fii lo a le ba ekue nɛɛ a bee lu elɛɛ bu bɔŋanaloo naadabah wa manamana ale ba wee tɔɔ̄ waɛloo ziī sɔ̄ akii adumɛ nua enɔānu bu bɔŋanaloo. Elo a si enɔānu ni a? Sɔ̄ akii adumɛ a, ii wee kana muɛ dua nɛɛ ama. Kerewo, kɛ̄tɔɔ̄ ama alu ebɛɛ̄ kɔ ziī ziī Nɛɛ Kraist a su ye ekɛɛrɛ beenyiɛ Baibol ekpɔā ɛma kɛ̄ edoodoo. Nyiɛ pio nɛɛ dap kɔ ba a kana muɛ lo nɛɛ, ale esu baɛbah ye suā sɔ̄ alu nɔnu. Kerewo, ii le enyɔɔnɛ ye kɔnia nyɔɔnyɔɔ ue ale su loo ye gbaloo.
Pya Nɛɛ Kraist dap su wa ekɛɛrɛ beenyiɛ Baibol ekpɔā biaɛma fii lo ba ekue nɛɛ a bee lu elɛɛ bu bɔŋanaloo nua enɔānu ale ba esu baɛbah ye suā sa ye kana muɛ sɔ̄ a lu enɔānu (Ɛp 14 barakpaɛ̄)
15. Pya a doo mɛ dua pɔrɔ na 2 Jɔn 9-11 gaa kɔ a? (Ɛpnage ekpo akura “ Ekɔ Jɔn Le Pɔɔl Gaa Kɔ Nu Akiiloo Aba Ziī Bee Pɔrɔ Ni?”)
15 A dap lu nyɛŋia loo pio nɛɛ kɔ, ‘Ekɔ Baibol naa kɔ Nɛɛ Kraist a kana muɛ dua nɛɛ ama yɔ ye ɛrɛ epoo bu ye pɔrɔ ni?’ (Buū 2 Jɔn 9-11.) Pya dɔ a waɛ kpaɛ dɔ kpa kaɛ ama tɔgɛ kɔ ue ama kiiloo pya a anna yira le pya a zū pya dɔɔ̄na kɔ ba a doo pɔrɔ dogo. (Mum 2:20) Nyɔɔwo, lo ziī nɛɛ gaa zū pya dɔɔ̄na kɔ ba a doo pɔrɔ dogo ale tɔgɛ esah tɔgɛnu, pya kanɛɛ enɔɔ lo e’ina ye loo. Kerewo, i bɛābu kɔ e suāloo ye. Mɛ lo a sii doo wo, ii le ekana ye muɛ ale kue ye nua enɔānu.
NƆ ESAƐ̄ NYIƐ LE TOESAƐ̄ JƐHOVA
16-17. (a) Ena Jɛhova gbī kɔ pya pɔrɔ a doo a? (Ezekiel 18:32) (b) Bu mɛ sīdee na pya kanɛɛ tɔgɛ kɔ ba gaa yɔ Jɛhova sitam sɔ̄ ba piiga lo eyerebah nɛ nɛɛ a doo pɔrɔ a?
16 Ena i enɔā bu ekpo tɔ baɛloo ama ni? Jɛhova naa gbī kɔ alu egbeesī lɔgɔ nɛɛ! (Buū Ezekiel 18:32.) A gbī kɔ pya a bee doo pɔrɔ le ɛɛ a sikɛ̄ gbaaloo. (2 Kɔr 5:20) Ɛɛna anua a aāge a kere, Jɛhova kiisī lo ezū pya ye nɛɛ a bee doo pɔrɔ a le ziī ziī nɛɛ a bee doo pɔrɔ kɔ ba a kiiya sa obia ye lu loo. Pya kanɛɛ bu bɔŋanaloo ɛrɛ dee lo eyɔ Jɛhova sitam bu epiiga lo eyerebah nɛ pya a si pɔrɔ kɔ ba a kiiya.—Rom 2:4; 1 Kɔr 3:9.
17 Naa kɛɛrɛ dua ɛɛbu a le li bunyɔɔ sɔ̄ pya pɔrɔ kiiya a! I Tɛ Jɛhova a le li bunyɔɔ, ɛrɛnage ɛɛbu dɛ̄dɛɛ̄ sɔ̄ ziī ye naana pee a bee pe obia lu bu bɔŋanaloo. Wereloo i ɛrɛ kumaloo Jɛhova kiisī lo e’agatɛ̄ sɔ̄ i ɛrɛ ekɛɛrɛ nyɔɔ kɛ̄ a ɛrɛ esaɛ̄ nyiɛ, toesaɛ̄ le ewonu doo.—Luk 1:78.
YƆƆ 111 Pya Nu A I Ɛɛrɛbu
a Bu ekobee ue ama, i su nɛɛ a doo pɔrɔ kure nɛɛ. Kerewo, ue ama kiinage loo nɛɛwa a doo pɔrɔ.
b Ii le esinakɛ̄ kɔ alu ekpo pya nɛɛ ama. Aāloo ue Pɔɔl kɔ bu 1 Pya Kɔrint 5:13, doo kɔ nyaawo i kɔ alu elɛɛ wa bu bɔŋanaloo.
c Dookɛ̄ Baibol kɔ doo, pɔrɔ a naale elu e aaloo nɛ naale ziī dua pɔrɔ mɛ pɔrɔ alu esi bu e’aga nyiɛ sa kiisī lo egbanasī Bari. Naale ili na i biaɛ kɔ nɛɛ esia lo dua pɔrɔ a.—Maak 3:29; Hib 10:26, 27.
