Nɛɛ lɛɛratam Pɔɔl bee ɛm ma Pya Nɛɛ Kraist a bee le Tɛsalɔnaika, kɔ: “Lo a le ɛrɛgebah nɛɛ naa gbaɛ̄tɔ̄ i ue tɛ̄maloo lo kpa ama, ɛbaa nɛɛ ama leere.” (2 Tɛs 3:14) Tua sɔ̄, i wee kɔ aa lu ekɔ ue ama nɛ pya kanɛɛ. Lo a le ziī nɛɛ kiisī lo e’ɛp pya nu Baibol kɔ tɛrɛ kaɛlɛɛ kɛ̄ alu ekiisī enɛ ye zuurabahtɔ̄ doo, pya kanɛɛ dap nɛ ekɔaue edoo kɔ alu enwaɛdɛɛ̄ loo lo nɛɛ bu bɔŋanaloo. Sɔ̄ elua enɛ lo ekɔaue sah, ziī ziī nɛɛ zue ue naale esuna loo gbaloo nɛɛ a gaa lu enwaɛdɛɛ̄ loo a.

Kerewo, alu ebɛɛ̄ kɔ alu ekwabahloo. Nyaawo i dābeeloo kɔ zuurabahtɔ̄ Pɔɔl gaa kɔ nu ziī ziī Nɛɛ Kraist a doo bu pio kɛ̄tɔɔ̄. Nyɔɔwo naa lu ebɛɛ̄ kɔ pya kanɛɛ a nɛ ekɔaue lo edoo kɔ pya nɛɛ a nwaɛdɛɛ̄. Ena anua lo nyaa ama a? Naa kɛɛrɛbu pya ue a le kpaɛ dɔ Kpa Kaɛ Pɔɔl bee nɛ lo zuurabahtɔ̄.

Pɔɔl bee kɔ pio nɛɛ a le bu bɔŋanaloo “naale enyɔɔnɛ tɔgɛ.” Ba gaa bee ɛp zuurabahtɔ̄ a aabah Bari tɛrɛ. Tua sɔ̄ a bee wa inaloo, a bee wa nɛ lok kɔ: “Lo a le ɛrɛgebah nɛɛ naa sitam, doolo a naa denu.” Kerewo, pio nɛɛ naa bee gbī esitam lo eyerebah nɛ aba aba, kereadoo ba dap si. Gbaāloo wo, ba gaa bee yerenage bee bu ue a naa kuu wa. Bu mɛ sīdee na Pya Nɛɛ Kraist e’aara pya a naa nyɔɔnɛ lo tɔgɛ a?—2 Tɛs 3:6, 10-12.

Pɔɔl bee kɔ “ɛbaa [pya] nɛɛ ama leere.” Bee ue Grik alu ekɔā ue ama tɔgɛ nɛɛ e’ɛp dua ue ama sa nwaɛdɛɛ̄ lokwa a naa gbee ye. Pɔɔl aa bee kɔ ue ama nɛ dɛ̄dɛɛ̄ nɛɛ a le bu bɔŋanaloo naale aba pya kanɛɛ. (2 Tɛs 1:1; 3:6) Nyɔɔwo, ziī ziī Nɛɛ Kraist lo ba muɛ wa wuga alu Nɛɛ Kraist a kiisī lo elɛɛbeekɛɛ̄ zuurabahtɔ̄ Bari a “kpoora loo lɛɛloo” nɛɛ a naa nyɔɔnɛ tɔgɛnu Bari.

Ekɔ lo ama kurage kɔ lo nɛɛ bee lu e’aara ye doodoo nɛɛ alu elɛɛ bu bɔŋanaloo ni? Eeye, nyɔnɛbee Pɔɔl kɔ yereloo kɔ: kiisī lo e “zuura ye bahtɔ̄ doodoo wuga.” Nyɔɔwo ziī ziī Nɛɛ Kraist dap le aa gbaaloo nɛɛ a lu enwaɛdɛɛ̄loo bie enɔānu le uwe zue ue, mɛ ba naale esu ye nua gbo ale nɛɛ enyɔɔnɛ ɛrɛ ekpeloo. Ena anua a? Pɔɔl kɔ; “Lokwa kɛɛ ebɔp ye.” Lo alu enwaɛdɛɛ̄loo Nɛɛ Kraist a naa nyɔɔnɛ tɔgɛnu a, kɛɛ ebɔp ye sa a nyaa a.—2 Tɛs 3:14, 15.

Pya Nɛɛ Kraist anii’ee etɛɛ̄ doodoo wa suā sɔ̄ ba enwaɛdɛɛ̄loo nɛɛ a naa nyɔɔnɛ tɔgɛ ni? Tuatua, alu ebɛɛ̄ kɔ i suā leere kɔ dogo lo nɛɛ tɔgɛ kɔ a “naale enyɔɔnɛ tɔgɛ,” dookɛ̄ Pɔɔl baatɛ̄ doo. A naa gaa bee kɔ nu akiiloo pya nɛɛ ba doo nu alu kee loo lo ili nyɔɔ nu nɛɛ esu ekɛɛrɛ beenyiɛ ɛma ale nu a nia ziī ziī nɛɛ. E a naa gaa bee kɔ nu akiiloo pya a doo nu a i bɛā. Taāwo, pya Pɔɔl gaa kɔ na pya a ɛmɛnɛ bee biaɛfii lo elɛɛbeekɛɛ̄ zuurabahtɔ̄ Bari lo ba dābeeloo.

Nii’ee, lo i muɛ ziī nɛɛ le ii gbaa lu Nɛɛ Kraist lo a kiisī lo elɛɛbeekɛɛ̄ zuurabahtɔ̄ a le bu Muɛ̄ Ue Bari, a i dap biaɛfii nyɔɔ i loo kɔ ii le egbaa ye loo ale su ye nua gbo. Kuma sɔ̄ lo ama lu biaɛfiī ziī ziī ii doo nyɔɔ i loo a, ii le enyɔɔnɛ pya a naale i butɔ kɔnia. E i lege aa suloo ye gbaloo bie enɔānu le uwe zue ue. Sɔ̄ enyaana ye dum, i dap sikɛ̄ ye nyɔɔnɛ gbaaloo leere.