19 EKOBEE UE ENƆ
Ena I Dap Doo Lo E’agɛrɛtɛ̄ Yira I Ɛrɛ Bu Yii Jɛhova Loo Aā Nyɔuwe A?
“Sɔ̄ [Jɛhova] kɔ ziī nu, a naale edoo ni?”—BUĀ 23:19, NWT.
YƆƆ 142 Aabaloo I Bɛābu Agɛrɛ
DASĪ TƐƐ̄NYƆƆ a
1-2. Ena alu ebɛɛ̄ kɔ i doo sɔ̄ i gaa tɔɔ̄baɛ aā nyɔuwe a?
BU I ɛɛ kɔ Jɛhova eyira yii kɔ edooe kɔ nyɔuwe ama alu aā. (2 Pit 3:13) Kere ii suā sɔ̄ nu ama esira, pya nu aa sira tɔgɛ kɔ lo sɔ̄ ewaɛra.—Mat 24:32-34, 36; Doonu 1:7.
2 Kerewo, kaɛlɛɛ kuma zua i etɔ̄na bu kaka, alu ebɛɛ̄ kɔ dɛ̄dɛɛ̄ ii i agɛrɛtɛ̄ i yira bu lo yii. Ena anua a? Nu anua na bee kere nɛɛ a bee ɛrɛ e’agatɛ̄ yira dapnage ɔloo. Nɛɛ lɛɛratam Pɔɔl bee su sɔ̄ nɛɛ naa ɛrɛ yira kure “doo gbee lo a i dabaloo.” (Hib 12:1) Lokwa i yira naa ɔloo, alu ebɛɛ̄ kɔ i kɛɛrɛ nu akiiloo pya nu a tɔgɛ kɔ yii ama ɛrɛge edooa sɔ̄ sɔ̄ naa binia.—Hib 11:1.
3. Ena i nɔ bu ekobee ue ama a?
3 Bu ekobee ue ama, i nɔ taa sīdee i dap yere mɛm loo i yira bu yii Jɛhova yira akiiloo aā nyɔuwe: (1) tɛ̄maloo e’ɛrɛ ekɛɛrɛ nyɔɔ waara zɔɔ a’agara, (2) tɛ̄maloo ekɛɛrɛ bu kɛ̄ Jɛhova ɛrɛ ekpo doo, le (3) tɛ̄maloo edoo pya nu edoo kɔ i tɔɔ̄ waɛloo Jɛhova. Lɛɛ i kɔnia kɛ̄ ue Jɛhova bee kɔ nɛ Habakuk yere mɛm loo i yira anii’ee doo. Kerewo, i naa dasī kɔnia pio kɛ̄tɔɔ̄ i dap kpesī lo a gbī kɔ i ɛrɛ e’agatɛ̄ yira bu yii akiiloo aā nyɔuwe.
PYA KƐ̄TƆƆ̄ A GBĪ KƆ I ƐRƐ E’AGATƐ̄ YIRA
4. Pya amunu biaɛfii na a gbī kɔ i ɛrɛ e’agatɛ̄ yira a?
4 Pya biaɛfii i doo dɛ̄dɛɛ̄ dee gbī kɔ i ɛrɛ e’agatɛ̄ yira. Bu edoba, i wee biaɛfii pya nɛɛ i yii gbo, dua nu i ɛā ekpeloo, tɔkpa i si, nɛɛ i ii ale nɛɛ i iya, kuma buā nwiī i ɛrɛ, le tam i si. Elee i bip aba ii kɔ, ‘Ekɔ pya na baiɛfii tɔgɛge kɔ m suā kɔ nyɔuwe ama etɛɛ̄ aa sɔ̄ sɔ̄ naa binia sa Buɛ̄-mɛnɛ Bari su dɔ ni? Sɛh, pya biaɛfii m doo bee lo pya nɛɛ ba kɛɛrɛ kɔ luh na alu kuma dɛ̄dɛɛ̄ nu ani?’ (Mat 6:19, 20; Luk 12:16-21) Pya biaɛfii i doo elee kaāna lo i agɛrɛtɛ̄ i yira kɔ aā nyɔuwe e’waɛra loo kɛ̄.
5-6. Ena anua alu ebɛɛ̄ kɔ i ɛrɛ e’agatɛ̄ yira sɔ̄ i kpesī taāŋa a? Naa nɛ edoba.
5 I kpenagesī pya taāŋa a gbī kɔ i ɛrɛ e’agatɛ̄ yira. I dap kpesī tɛ̄ŋaloo, e’agabah eyɔloo, ale pya dɔɔ̄na nu a i dap ɔɛloo. Tua sɔ̄, dap i tɔɔ̄loo kɔ i dap tāma pya taāŋa ama. Mɛ lo pya taāŋa ama agɛrɛba dookɛ̄ a wee le doo pio sɔ̄, elu ebɛɛ̄ kɔ i ɛrɛ e’agatɛ̄ yira lokwa i dap kiisī lo e’egerebu sa kiinagesī lo etaāŋabah Jɛhova bu ɛɛbu.—Rom 12:12; 1 Pit 1:6, 7.
6 Taɛ sɔ̄ taāŋa le ebii i bah nyɔɔ, dap i tɔɔ̄ loo kɔ aā nyɔuwe Jɛhova yira yii loo naale elu doo pippip. Ekɔ lo ama kura kɔ i yira ɔloo ni? Naa aadee mɛa doo wo. Naa kɛɛrɛbu ziī edoba ama. Sɔ̄ boo, taɛ sɔ̄ tɔɔ le e’agabah kaāna, a dap i tɔɔ̄loo kɔ zue naale emɔna. Kerewo, zue wee mɔ sɔ̄ esaa. Bu aba lo sīdee, sɔ̄ i le bu gbɛnɛ e’ɔaloo, dap i tɔɔ̄loo kɔ aā nyɔuwe naale elu doo pippip. Kerewo, lo i ɛrɛ e’agatɛ̄ yira i suā kɔ yii Bari edoo a gbɔ̄mɛɛ. (Yɔɔ 94:3, 14, 15; Hib 6:17-19) Lo i yiga doo wo, i dap kiisī lo esu taāŋabah Jɛhova nua tuatua bu i dum.
7. Amunu elap dogo na i ɛrɛ enwaɛ̄dɛɛ̄ loo a?
7 Lunage ebɛɛ̄ kɔ i ɛrɛ e’agatɛ̄ yira lokwa i dap si tam zue ue. Gbɛnɛ-edo nɛɛ i zue ue nɛ naa yiga kɔ “le yere ue” akiiloo aā nyɔuwe edooa doo pippip. (Mat 24:14; Ezek 33:32) Ii le eyiga kɔ baɛbaɛ beenyiɛ ba ɛrɛ ama a ɔɛ i loo. Lokwa lo ama naa sira, i ɛrɛ ewee agɛrɛtɛ̄ i yira. I naa ɛp taa sīdee i dap doo lo ama.
ƐRƐ EKƐƐRƐ NYƆƆ WAARA ZƆƆ A’AGARA
8-9. Bu mɛ sīdee na ɛrɛ ekɛɛrɛ nyɔɔ waara zɔɔ a’agara dap agɛrɛtɛ̄ i yira a?
8 Ziī sīdee i dap agɛrɛtɛ̄ i yira na tɛ̄maloo e’ɛrɛ ekɛɛrɛ nyɔɔ waara zɔɔ a’agara. Waara zɔɔ a’agara doo kɔ i suā leere kɔ pya yii Bari edooa. Lo i su sɔ̄ ɛā ekɛɛrɛ nyɔɔ nu anua a bee lu edoo waara zɔɔ a’agara, edoo kɔ yira i ɛrɛ bu yii Bari yira kumaloo dum a naatah bu aā nyɔuwe a agatɛ̄. Ena anua i kɔ doo wo a?
9 Kɛādoo, pya e na a le bu waara zɔɔ a’agara a? Jɛhova bee yere ye Nwiīnɛɛdam a wereloo alu nɛɛ a ye tɔɔ̄ waɛloo kaāna aā bunyɔɔ kɔ a mɛa a kɛnɛkɛ̄ doodoo nɛɛ a mmana. Sɔ̄ Jizɔs bee le a kɛnɛkɛ̄, a bee egerebu kɛ̄bah dɛ̄dɛɛ̄ e’aga kɛ̄tɔɔ̄. Lɛɛ a tɔga sa u ezialoo luh. Naa ɛp kɛ̄ nu Jɛhova kpɛ ama si gbɛnɛ du doo a! Jɛhova naa bee lɛɛbahloo ye nwiīnɛɛdam kɔ a tɔga sa i u bee aba kɔ i tɔɔ̄dum bu nwīkere sɔ̄. (Jɔn 3:16; 1 Pit 1:18, 19) Nyɔnɛbee Jɛhova enɛa ye Nwiīnɛɛdam a wereloo gbɛnɛ kɔ a u i bee a, a gaa le doo gbɔ̄mɛɛ yii a kɔ i tɔɔ̄dum mmɛ deedee bu aā nyɔuwe.
ƐRƐ EKƐƐRƐ NYƆƆ KƐ̄ JƐHOVA ƐRƐ EKPO DOO
10. Dɛɛa nyɔɔ nu a le bu kpa Pya Ɛfɛsɔs 3:20, ena Jɛhova dap doo a?
10 Eree baɛ sīdee i dap agɛrɛtɛ̄ i yira na tɛ̄maloo e’ɛrɛ ekɛɛrɛ nyɔɔ kɛ̄ Jɛhova ɛrɛ ekpo doo. A ɛrɛ ekpo lo edoo gbɔ̄mɛɛ dɛ̄dɛɛ̄ nu a bee yira yii loo. A tɔɔ̄loo gbɛnɛ-edo nɛɛ anii’ee kɔ yii akiiloo tɔɔ̄dum a naatah bu aā nyɔuwe naale edap dooa. Kerewo, Jɛhova wee yira yii kɔ edooe nu miɔŋɔ nɛɛ naa dap doo. A dap doo lo ama, nyɔɔbee alɛ na Bari a eenyɔɔ dɛ̄dɛɛ̄ nu a. (Job 42:2; Maak 10:27) Nyɔɔwo, a naa lu i nyɛŋia loo kɔ a yira pya yii alu keebee ama—Buū Pya Ɛfɛsɔs 3:20.
11. Naa nɛ edoba akiiloo ziī yii Bari yira alu keebee. (Buū ekpo a kura: “ Pya Keebee Yii A Bee Dooa Gbɔ̄mɛɛ.”)
11 Naa ɛp pio nu Jɛhova bee yira nɛ pya Izrɛl a dee kere, lo a bee bee kɔ a naale edap sira ama. A bee kɔ nɛ Abreham le Sera kɔ ba e’ɛrɛ nwiī kere ba e’ana. (Jɛn 17:15-17) A bee kɔnage nɛ Abreham kɔ pya ye manamana e’ɛrɛ buɛ̄ Kenan. Bee bee kɔ yii ama naale edooa sɔ̄ pya Izrɛl alu manamana Abreham bee tɔɔ̄ kɛ̄bah zooro bu nyɔɔ nyɔɔ sɔ̄ li Ijipt. Mɛ lo yii bee dooa. Sɔ̄ sɔ̄ etɛ̄na, Jɛhova bee kɔ Elizabet emaɛ̄ nwiī kere e’ana. A bee kɔnage nɛ Meri a sii si nɛɛ kɔ emaɛ̄ ziī Nwiīnɛɛdam lo Jɛhova ebee yira yii loo gbɛnɛ-edo zua akii adumɛ bie bu gɔh Idɛn, e lo ama bee dooanage gbɔ̄mɛɛ!—Jɛn 3:15.
12. Ena kpa Joshua 23:14 le Aisaia 55:10, 11 doo kɔ i suā leere kiiloo ekpo Jɛhova ɛrɛ a?
12 Tɛ̄maloo ɛrɛ ekɛɛrɛ nyɔɔ pya yii Jɛhova bee yira sa a doo, edoo kɔ i yira bu ekpo Jɛhova ɛrɛ lo edoo kɔ nyɔuwe alu aā a agatɛ̄. (Buū Joshua 23:14; Aisaia 55:10, 11.) Lo ama doo kɔ i dap yerebah nɛ pya dɔɔ̄na kɔ ba a muɛ kɔ yii akiiloo aā nyɔuwe naa lu kunɛ zagara, e a naalenage kunɛ looge. Sɔ̄ Jɛhova aa kɔ nu akiiloo aā bunyɔɔ le aā nyɔuwe a kɔ: “Ue ama bɔloo eture nyiɛ loo sa lu kaka.”—Mum 21:1, 5.
DOO PYA NU EDOO KƆ O AGƐRƐBAH TƆƆ̄ WAƐLOO JƐHOVA
ENƆĀNU BU BƆŊANALOO
Bu mɛ sīdee na ziī ziī nu bu edɔɔ̄ ama dap agɛrɛtɛ̄ o yira a? (Ɛp 13 barakpaɛ̄)
13. Bu mɛ sīdee na enɔānu bu bɔŋanaloo dap yere mɛm loo i yira a? Naa baatɛ̄.
13 Eree taa sīdee i dap agɛrɛtɛ̄ i yira na tɛ̄maloo edoo pya nu edoo kɔ i agɛrɛbah tɔɔ̄ waɛloo Jɛhova. Bu edoba, naa kɛɛrɛ kɛ̄ i ɛrɛ biī aāloo pya i enɔānu bu bɔŋanaloo doo. Anna, lo esua gbɛnɛkpo zua siā keekee sīdee esiatam mmɛɛ sɔ̄ kɔ: “Si enɔānu edora kɔ m agɛrɛtɛ̄ na yira. Kereadoo nɛɛ a gaa tɔgɛ nu naa aadee para tɔgɛ nu, ale a naa kɔnage lɔgɔ aā nu bu ye ekɔaue, m wee dā pya nu a doo kɔ m sikɛ̄ dābeeloo kaka ue Baibol leere, sa lo ama e’agɛrɛtɛ̄ na yira.” b I yira dapnage agatɛ̄ sɔ̄ i gbaɛ̄tɔ̄ sɔ̄ pya i wuga nɛɛdam le nɛɛwa gaa agara ebip.—Rom 1:11, 12; 10:17.
TAM ZUE LE YEREUE
Bu mɛ sīdee na ziī ziī nu bu edɔɔ̄ ama dap agɛrɛtɛ̄ o yira a? (Ɛp 14 barakpaɛ̄)
14. Bu mɛ sīdee na tam zue ue agɛrɛtɛ̄ i yira a?
14 I agɛrɛnagetɛ̄ i yira sɔ̄ i su dɔ bu tam zue le yereue. (Hib 10:23) Barbara, lo esiatam nɛ Jɛhova bu nu a eeloo 70 zua kɔ: “M muɛ kɔ tam zue ue yere mɛm loo nɛɛ dɛ̄dɛɛ̄ sɔ̄. Kɛ̄ m kiisī lo ekɔ nu akiiloo pya keebee yii Jɛhova eyira kumaloo deesī nɛ pya dɔɔ̄na doo, kɛ̄ na yira nyimnage agaloo doo lo.”
NƆ NU NYƆƆ I LOO
Bu mɛ sīdee na ziī ziī nu bu edɔɔ̄ ama dap agɛrɛtɛ̄ o yira a? (Ɛp 15 barakpaɛ̄)
15. Bu mɛ sīdee na nɔ nu nyɔɔ i loo edap agɛrɛtɛ̄ i yira a? (Ɛpnage foto.)
15 Dɔɔ̄na nu a agɛrɛnagetɛ̄ i yira na nɔ nu nyɔɔ i loo. Susan kɔ nɔnɔɔ sɔ̄ esu nɔānu bee ye yereebah nɛ. A kɔ: “Sɔ̄ elua Deekaɛ, m wee nɔ ekpo Tɔ Baɛloo elu enɔ lo kaɛ a za nyɔɔnɛ. Tua le Baɛ Deelookaɛ na m wee tɛɛ̄nyɔɔ nu elu enɔ bie enɔānu taɛyɛɛ kaɛ a. E m wee su pya dɔɔ̄na dee a siga bu lo kaɛ nɔā pya dɔɔ̄na nu nyɔɔ na loo.” Susan bee agɛrɛtɛ̄ ye yira tɛ̄maloo enyɔɔnɛ sɔ̄ a bee nɔɔ lo enɔā nu. Irene, lo esua gbɛnɛkpo zua siātam bie i beekɛ̄ bu dɛ̄dɛɛ̄ nyɔuwe kɔ nɔnɔ pya mɔmanudɛɛ̄ Baibol e’agɛrɛtɛ̄ ye yira. A kɔ: “Alu mɛ nyɛŋia loo kɛ̄ dɛ̄dɛɛ̄ mɔmanudɛɛ̄ Jɛhova dooa doo.” c
“A GAA LE LU BU KAKA, A NAALE EPƆGƐLOO”
16. Ena anua ue egbɔ̄nyiɛ Jɛhova bee kɔ nɛ Habakuk kuunage ili anii’ee a? (Pya Hibru 10:36, 37)
16 Bu nyɔɔnyɔɔ sɔ̄, gbɛnɛ-edo pya nɛɛ Jɛhova etɔna baɛ sɔ̄ kuma lo nyɔuwe ama elu. Aāloo kɛ̄ nɛɛ ɛp nu doo, dap bee kɔ yii Bari ama ebiɛ̄naloo lo edooa. Mɛ Jɛhova dābeeloo kɛ̄ nu tɔɔ̄loo pya ye nɛɛ doo, sɔ̄ a kɔ nɛ nɛɛ mɔmanudɛɛ̄ Habakuk kɔ: “Nyɔnɛbee mɔmanudɛɛ̄ a lege etɔɔ̄ baɛ ye sɔ̄; a nwaaba ina ye kuma a naale kɔ esah. Kere a bee kɔ a pɔgɛloo, tɔɔ̄ ye baɛ; a gaa le lu bu kaka, naale epɔgɛloo.” (Hab 2:3) Ekɔ Bari bee kɔge lo ama lo enɛ egbɔ̄nyiɛ aba Habakuk ni? Sɛh ye ue ama kuunage ili anii’ee ni? Tɛ̄maloo edɔɔ̄ Bari, nɛɛ lɛɛratam Pɔɔl bee kɔnage ue ama nɛ Pya Nɛɛ Kraist lo ba gaa ɛmadɛɛ̄ aā nyɔuwe. (Buū Pya Hibru 10:36, 37.) Bu kaka i suā leere kɔ, kere a bee kɔ yii a i yira nɛ ama biɛ̄loo edooa, “a gaa le lu bu kaka, a naale epɔgɛloo.”
17. Bu mɛ sīdee na ziī wuga nɛɛwa bee su zuurabahtɔ̄ Jɛhova bee nɛ Habakuk yere bu dogo a?
17 Gbɛnɛ-edo pya nɛɛ Jɛhova esua zuurabahtɔ̄ Jɛhova a kɔ “tɔɔ̄ ye baɛ,” yere bu dogo bu gbɛnɛ-edo zua lo. Bu edoba, ziī wuga nɛɛwa a kura Louise bee bɔātɛ̄ esitam nɛ Jɛhova bu zua 1939. A kɔ: “Bu lo sɔ̄ ama, m bee kɛɛrɛ kɔ Amagidon elu lɛɛ m gae sah gbɛnɛ tɔkpa. Naa bee sira doo wo. Bu pya lo zua ama, nu a bee mɛ yerebah nɛ na būbuū nu m kure ‘eloh akiiloo tɔɔ̄baɛ’ a le bu Baibol doodoo nu akiiloo Nɔa, Abreham, Josɛf, le pya dɔɔ̄na lo ba bee yira bu nyɔɔnyɔɔ sɔ̄ sa ɛmadɛɛ̄ sɔ̄ Jɛhova enɛ wa ekpɛanu. Tɔ̄tɔɔ̄ baɛ le yiga kɔ yii ama edooa eyerebah nɛ pya dɔɔ̄na le mm kɔ i dap agɛrɛbah dɛrɛ nyiɛ nyɔɔ yii akiiloo aā nyɔuwe ama.” Gbɛnɛ-edo pya esiatam nɛ Jɛhova bu nyɔɔnyɔɔ sɔ̄ yiganage doo wo!
18. Bu mɛ sīdee na ɛrɛ ekɛɛrɛ nyɔɔ pya nu alu edɛm dap yere mɛm loo i yira bu aā nyɔuwe a gaa lu a?
18 Bu kaka, i sii ina bu aā nyɔuwe anyaawo. Kerewo, yere nukuādɛɛ̄ loo kɔ a ɛrɛ pio nu a le anyaawo doodoo zina, te, nam, le pya miɔŋɔ nɛɛ. Lɔgɔ nɛɛ naale e’ɛrɛ baɛbaɛ beenyiɛ kumaloo pya nu ama kɔ ba lu nu a le, kerewo, a ɛrɛ sɔ̄ lɔgɔ nu ama naa bee le. Ba le anyaawo nyɔɔbee Jɛhova bee wa dɛm. (Jɛn 1:1, 26, 27) Bari eyiranage yii loo aā nyɔuwe i nɛ, sa edoo lo yii ama. Bu aā nyɔuwe, pya nɛɛ etɔɔ̄dum mmɛ deedee bu kaāna nwanaloo. Sɔ̄ e’ina sɔ̄ Bari bee sere, aā nyɔuwe elu sa i mɔmadɛɛ̄ dookɛ̄ i muɛ pya nu alu edɛm a i tɛɛ̄ ɛŋɛnɛ doo.—Ais 65:17; Mum 21:3, 4.
19. Ena o doo lo e’agɛrɛtɛ̄ o yira a?
19 Nyaawo, su ɛrɛgeba dee a a kpaānɛ āŋɛnɛtɛ̄ o yira. Wee tɔgɛ nia bu waara zɔɔ a’agara. Ɛrɛ ekɛɛrɛ nyɔɔ ekpo Jɛhova ɛrɛ. Wee doo pya nu edoo kɔ o agɛrɛbah tɔɔ̄ waɛloo Jɛhova. Lo o doo wo, o le yɛɛ “pya a tɛ̄maloo [yira le] egerebu ɛrɛ epoo loo lo yii.”—Hib 6:11, 12; Rom 5:5.
YƆƆ 139 Ɛp Oloo Sɔ̄ Dɛ̄dɛɛ̄ Nu Elua Aā
a Gbɛnɛ-edo nɛɛ anii’ee naa yira bu yii a le bu Baibol kɔ aā nyɔuwe gaa le le. Ba ɛmadɛɛ̄ nua kunɛ zagara, kunɛ looge, ale nu a naale edap sira. Mɛ i suā leere kɔ dɛ̄dɛɛ̄ yii Jɛhova ɛrɛge edooa. Kerewo, alu ebɛɛ̄ kɔ i wee piiga lo e’agɛrɛtɛ̄ i yira. Bu mɛ sīdee? Ekobee ue ama ebaatɛ̄.
b Elua enyaana pio bee.
c O dap muɛ gbɛnɛ-edo ekobee ue akiiloo mɔmanudɛɛ̄ kɛɛ̄ ekobee ue a kura “Prophecy” a le bu Watch Tower Publications Index. Bu edoba, ɛp ekobee ue a kɔ “What Jehovah Foretells Comes to Be” bu Watchtower January 1, 2008.
