1. Naa baatɛ̄ nu a bee sira lo a bee doo kɔ Jizɔs a si ye tua nyɛŋia tam.

 NAA kɛɛrɛ kɛ̄ a bee mɛā doo sɔ̄ Jizɔs bee bɔātɛ̄ ye esiatam sɔ̄ zua 29 C.E. esaa e’ina kuma. Bee lu ekue Jizɔs le ye ka Meri gbaāloo pio pya a wee ye nyɔɔnɛ dumɛ loo doonu ii’ii wa li Kena. Nwīgbagbara buɛ̄ ama waɛ kpaɛ̄ buɛ̄ Jizɔs aa a kura Nazarɛt. Meri lu gbo pya lo butɔ sa a gaa yerebah loo aara saanɛɛ. Mɛ sɔ̄ lo doonu ii’ii wa gaa kiisī, a ɛrɛ nu a sira lo ebee dap nua gbɛnɛ bɔp kɛɛ loo pya lo butɔ le baɛ zege nɛɛ a gaa iya ziī a. Nu a sira na bee mii bee tah. b Dap lu kɔ pya a bee si lo doonu kuī ee kɛ̄ a bee lu e’ɛmadɛɛ̄ doo. Meri bee nwaabah pii ye nwiīnɛɛdam sa ye kɔ nɛ kɔ: “Ba naa ɛɛnɛ mii.” (Jɔn 2:1-3) Ena Jizɔs bee doo a? A bee doo ziī nu alu keebee, lo a le kiira maā nua “le mii.”—Jɔn 2:9, 10.

2-3. (a) Pya amunu nyɛŋia tam na Jizɔs bee si a? (b) Bu mɛ sīdee na i dap ɛrɛ biī aāloo kɛɛrɛbu loo pya nyɛŋia tam Jizɔs bee si a?

² Jizɔs bee si gbɛnɛ-edo nyɛŋia tam bu ye esiatam. c A  bee su ye ekpo a wee siā nyɛŋia tam yeābah nɛ booboo pya nɛɛ. Bu edoba, a bee nɛ nuede 5,000 pya nɛɛdam, e sɔ̄ esaa a bee nɛnage nuede 4,000 pya nɛɛdam, sa dɛ̄dɛɛ̄ pya a bee nɛ nuede bee eenyɔɔ 27,000 pya nɛɛ lo i buū pya gbobia le gbomiɔŋɔ a bee de yere yɛɛ. (Mat 14:15-21; 15:32-38) Bu baɛ kɛ̄tɔɔ̄ ama, Jizɔs bee bonage gbɛnɛ-edo pya loo dumɛ. (Mat 14:14; 15:30, 31) Naa kɛɛrɛ kɛ̄ a bee lu nyɛŋia loo gbɛnɛ-edo nɛɛ Jizɔs bee nɛ nuede sa bo bu nyɛŋia sīdee doo a!

³ I dap nɔ gbɛnɛ-edo nu aāloo pya nyɛŋia tam Jizɔs bee si anii’ee. Bu ekobee ue ama, i kɔnia pio nu i dap nɔ aāloo pya nyɛŋia tam Jizɔs bee si lo a dap agɛrɛtɛ̄ i yira. Lɛɛ i gbītɛ̄ kɛ̄ i dap nɔ kumalookɛ̄ le esaɛ̄ beenyiɛ lo Jizɔs bee tɔgɛ sɔ̄ a gaa bee si pya nyɛŋia tam ama doo.

4. Pya nu i nɔ aāloo pya nyɛŋia tam Jizɔs agɛrɛtɛ̄ i yira bu mɛɛ ni?

⁴ Pya nyɛŋia tam Jizɔs tɔgɛ i pya nu a dap agɛrɛtɛ̄ yira i ye ɛrɛ kumaloo le ye Tɛ. Taɛ Jɛhova na ekpo a bee siā pya nyɛŋia tam ama aabah a. Doonu 10:38 kɔ i nɛ kɔ: “Bari bee tɔ̄ nɔɔ̄ bee Jizɔs nɛɛ Nazarɛt tɛ̄maloo kaɛ edɔɔ̄ le tɛ̄maloo ekpo, kɛ̄ a bee kiaŋa doogi le, sa bo dɛ̄dɛɛ̄ pya pɔrɔ edɔɔ̄ bee aa biikɛ̄, nyɔnɛbee Bari bee ye le loo.” Nyɛŋianage bu kɔ bu dɛ̄dɛɛ̄ nu Jizɔs bee kɔ sa doo, gbaāloo pya nyɛŋia tam a bee si, ye ekɛɛrɛ le ye dogo bee bee taɛ lo ye Tɛ. (Jɔn 14:9) Naa kɛɛrɛbu taa nu i dap nɔ aāloo pya nyɛŋia tam Jizɔs bee si.

5. Ena a bee zū Jizɔs kɔ a si nyɛŋia tam a? (Matiu 20:30-34)

⁵ Tuatua, Jizɔs le ye Tɛ were i loo kaāna. Sɔ̄ Jizɔs bee le a kɛnɛkɛ̄, a bee tɔgɛ wereloo a ɛrɛ loo pya nɛɛ tɛ̄maloo esu ye ekpo esiā nyɛŋia tam yeābah nɛ pya a gaa bee tɔga. A ɛrɛ sɔ̄ baɛ nɛɛ zimadɛɛ̄ bee ye bara yerebah aābah. (Buū Matiu 20:30-34.) Yere nukuādɛɛ̄ loo kɔ Jizɔs bee su “esaɛ̄ beenyiɛ” wa boā. Dookɛ̄ alu esu kɔā ue doo akɛāma, bee ue Grik alu etap nua “esaɛ̄ beenyiɛ” na gbɛnɛ toesaɛ̄ nɛɛ ɛrɛ bu beenyiɛ ye. Dua toesaɛ̄ lo Jizɔs ɛrɛ ama, lo a tɔgɛ kɛ̄ a wereloo pya nɛɛ doo, na a bee ye zūnage kɔ a nɛ nuede pya loo bee lɛɛ sa bo nɛɛ ebiakpaŋ a. (Mat 15:32; Maak 1:41) I dap suā leere kɔ Jɛhova alu Bari “fɛgɛ toesaɛ̄,” e ye Nwiīnɛɛdam were i loo, e a zi wa loo sɔ̄ i gaa tɔga. (Luk 1:78; 1 Pit 5:7) Naa ɛp kɛ̄ etaɛ wa lo elɛɛ dɛ̄dɛɛ̄ taāŋa a zia miɔŋɔ nɛɛ doo a!

6. Amunu ekpo na Bari enɛa Jizɔs a?

⁶ Eree baɛ, Bari enɛa ekpo Jizɔs kɔ a lɛɛ dɛ̄dɛɛ̄ taāŋa miɔŋɔ nɛɛ. Jizɔs tɔgɛ tɛ̄maloo pya ye nyɛŋia tam kɔ a ɛrɛe ekpo lo elɛɛ pya taāŋa ii dap lɛɛ nyɔɔ i loo. Bu edoba, a ɛrɛ ekpo lo edoo kɔ i agia aabu taɛ nu a i nua taāŋa nyɔɔ lo a le pɔrɔ. E e’agaranage i lɛɛ bu pah a sira aaloo lo a le eyɔloo le luh. (Mat 9:1-6; Rom 5:12, 18, 19) Pya ye nyɛŋia tam tɔgɛ kɔ a dap bo “ɛrɛgeba” dumɛloo sa lɛɛ pya nɛɛ kɛ̄ bu luh. (Mat 4:23; Jɔn 11:43, 44) Gbaānageloo wo, a ɛrɛ ekpo lo ebaɛbee gbɛnɛ fii efɔp sa be eeba pya pɔrɔ edɔɔ̄. (Maak 4:37-39; Luk 8:2) Naa ɛp kɛ̄ a i agɛrɛ nyiɛ lo esuā kɔ Jɛhova enɛa dua ekpo ama ye Nwiīnɛɛdam doo a!

7-8. (a) Ena pya nyɛŋia tam Jizɔs doo kɔ i suā a? (b) Pya amunu nyɛŋia tam na o gaa ɛmadɛɛ̄ bu aā nyɔuwe a?

 ⁷ Eree taa, i suā leere kɔ pya leelee alu eyira yii loo kɛɛ̄ bɛbɛɛ Buɛ̄-mɛnɛ Bari ɛrɛge edooa. Pya nyɛŋia tam Jizɔs bee si sɔ̄ a bee le a kɛnɛkɛ̄ tɔgɛ i gbɛnɛ nu a gaa le doo doodoo Mɛnɛ loo Buɛ̄-mɛnɛ Bari li bunyɔɔ. Naa kɛɛrɛ kɛ̄ kɛ̄tɔɔ̄ ele doo sɔ̄ sɔ̄ naa binia kɛɛ̄ bɛbɛɛ Kraist. I ɛrɛ mmɛɛ nwanaloo, nyɔnɛbee a gaa le lɛɛ dɛ̄dɛɛ̄ bee dumɛloo le boh lo a gaa nɛ taāŋa miɔŋɔ nɛɛ. (Ais 33:24; 35:5, 6; Mum 21:3, 4) Loo i naale elɛɛ, e bugia siranu lo edoo kɔ i tɔga naale elena. (Ais 25:6; Maak 4:41) I ɛrɛ gbɛnɛ ɛɛbu lo esu baɛ bah suā pya i wereloo sɔ̄ ba e’aa bu “li.” (Jɔn 5:28, 29) Taɛ amunu nyɛŋia tam na o gaa ɛmadɛɛ̄ lo emuɛ bu aā nyɔuwe a?

⁸ Jizɔs bee tɔgɛ kumalookɛ̄ le esaɛ̄ beenyiɛ sɔ̄ a bee si nyɛŋia tam. A lee kɔ i nɔ pya elap ama. Doo i naa kɛɛrɛbu baɛ edoba, i bɔātɛ̄ aāloo nu a bee sira bie doonu ii’ii wa li Kena.

9. Ena Jizɔs bee doo bie doonu ii’ii wa a? (Jɔn 2:6-10)

⁹ Buū Jɔn 2:6-10. Sɔ̄ mii bee tah bie doonu ii’ii wa a, ekɔ a bee luge toh a bee le bee Jizɔs lo edoo nu kumaloo ni? Eeye. Lɔgɔ mɔmanudɛɛ̄ a bee kɔ serekɛ̄ kɔ Mɛsaia gaa le doo kɔ alu e’ɛrɛ mii  bu nyɛŋia sīdee naale. Mɛ naa kɛɛrɛ kɛ̄ ebee a tɔɔ̄loo doo, lo a bee le olo na a gaa bee doo doonu sa mii tah a. Naadaba Jizɔs bee ɛrɛ toesaɛ̄ loo pya butɔ ama, eetɔɔ̄ na kumaloo dam le wa a, sa naa gbī kɔ kɛɛ a bɔp wa. Nyɔɔwo, dookɛ̄ a bee lu ekɔ doo aā bɔātɛ̄ a, a bee si nyɛŋia tam. A bee kiira maā aluge 390 lita (103 gal)—nua le mii. Naadaba a bee doo kɔ lo mii a kuīkpo lokwa pio ɛɛ dap siga sa ba ɔ̄ dɔɔ̄na sɔ̄ ale baɛ zege dam le wa ama dap oo sa su yeābah nɛ aba aba. Naa ɛp kɛ̄ loo baɛ nɛɛ a iya ziī aā ama bee dap sukɛ̄ doo a!

10. Pio e a dɔbiī na a le bu kpɛa alu e’ɛm bu kpa Jɔn 2 ekobee a? (Ɛpnage foto.)

¹⁰ Naa kɛɛrɛ pio gah a le bu e’ɛma a le bu kpa Jɔn 2 ekobee lo a i dap dɔbiī nɛ. O yerege nukuādɛɛ̄ loo kɔ Jizɔs naa bee su alɛɛ bah yeā maā bu pya lo kana ni? Taā a kue ekɛɛrɛ pya nɛɛ kumaloo aba ɛɛ, a bee kɔ nɛ pya zooro kɔ ba a yere maā mmɛ bu pya lo kana. (6, 7 barakpaɛ̄) E sɔ̄ a ekiira lo maā nua mii sah, Jizɔs naa bee su pio lo mii ma nɛɛbee lo doonu. Taāwo, a bee kɔ pya zooro a doo wo. (8 barakpaɛ̄) Bu kaka, Jizɔs naa bee su ziī kɔp lo mii kuma deesī pya saanɛɛ sa kaaga kɔ, ‘Naa ɔaāge mii mda kwa ama a!’

11. Ena i dap nɔ aāloo pya nyɛŋia tam Jizɔs bee si a?

¹¹ Ena i dap nɔ aāloo nyɛŋia tam Jizɔs bee si sɔ̄ a bee kiira maā nua mii a? I nɔ kumalookɛ̄ aāloo. Jizɔs naa bee kaaga loo nyɛŋia tam ama; bu kaka, a naa bee kaaga loo pya nu a bee doo. Taāwo, a bee kumalookɛ̄ sa kiisī lo esu dɛ̄dɛɛ̄ ka le leera a aaloo nɛ ye Tɛ. (Jɔn 5:19, 30; 8:28) Lo i nɔ Jizɔs sa kiisī lo e’ɛp aba ii bu sīdee a bɔloo, ii le ekaaga loo pya nu i doo. Dooraa ii le ekaaga bu pya nu i edora bu esiatam Jɛhova, mɛ i kaaga loo dee a i kpaānɛ lo esitam nɛ lo Bari alu nyɛŋia. (Jer 9:23, 24) Nyɔɔwo i nɛ ye ka a ye kuu. Bu kaka, ii dap doo lɔgɔ nu lo a le Jɛhova naa yerebah i nɛ.—1 Kɔr 1:26-31.

12. Bu dɔɔ̄na amunu sīdee na i dap nɔ kɛ̄ Jizɔs bee kumalookɛ̄ doo a? Naa baatɛ̄.

¹² Naa kɛɛrɛ dɔɔ̄na sīdee i dap nɔ kɛ̄ Jizɔs bee kumalookɛ̄ doo. Naa kɛɛrɛbu kɛ̄tɔɔ̄ ama: Ziī nɛɛ kanɛɛ su sɔ̄ yeābah nɛ ziī nɛɛ yerebahtam a le zege lo ekpɛ̄naloo ye tua ekɔaue. Nyɔɔbee lo nɛɛ kanɛɛ bee ye yerebah nɛ a, lo zege nɛɛ yerebahtam bee nɛ gbɛnɛ le ekɔaue sa dɛ̄dɛɛ̄ nɛɛ a le bu bɔŋanaloo bee ɛrɛ biī aāloo. Sɔ̄ enɔānu ekpāna, ziī wuga bee kɔ nɛ lo nɛɛ kanɛɛ kɔ: ‘Ekɔaue zege wuga nɛɛdam ama kpeloo kaāna.’ Luge ebɛɛ̄ kɔ lo nɛɛ kanɛɛ a kɔ: ‘Aiī, mɛ mda na m bee ye yerebah nɛ a’? Sɛh bu kumalookɛ̄ e kɔ: ‘Aiī, a doo leere. Kɛ̄ a aabahloo lo ekɔaue doo nia mɛ kaāna.’ Lo i kumalookɛ̄, ii le ekaaga nyɔɔ le nu i doo nɛ pya dɔɔ̄na. Bu i ɛɛ kɔ Jɛhova muɛ sa tɔgɛ nia loo nu i doo. (Dooreloo Matiu 6:2-4; Hib 13:16) Bu kaka, i doo kɔ bu Jɛhova a ɛɛ sɔ̄ i nɔ Jizɔs sa kumalookɛ̄.—1 Pit 5:6.

13. Ena Jizɔs bee muɛ sɔ̄ alu waɛloo buɛ̄ Nain a, e ena a bee doo a? (Luk 7:11-15)

¹³ Buū Luk 7:11-15. Naa kɛɛrɛ ziī nu a bee sira sɔ̄ Jizɔs bee le a kɛnɛkɛ̄. A bee ina buɛ̄ Nain, ziī buɛ̄ pya Galili a naa binia aaloo Shunem kɛ̄ nɛɛ mɔmanudɛɛ̄ Elaisha bee lɛɛ nwiī ziī wa kɛ̄ bu luh bu nu a dap lu 900 zua akii adumɛ lɛɛ a  gae lu lo sɔ̄. (2 Mɛnɛ 4:32-37) Sɔ̄ Jizɔs ewaraloo lo buɛ̄, a bee muɛ pya nɛɛ aa kii uwe li nɛɛ a gaa aabu lo buɛ̄. Lo kɛ̄tɔɔ̄ bee lu nu ekiɛ̄nu nyɔɔbee ziī wa ua dam epeere aba ye bee nwiī. Kerewo, lo wa naa bee le aba ɛɛ, gbɛnɛ eku nɛɛ a aa lo buɛ̄ bee ye le loo. Jizɔs bee kɔ ba a yira, sa a bee doo ziī nu alu nyɛŋia tɛ̄maloo elɛɛ nwiī lo wa ua dam kɛ̄ bu luh! Lo ama na tuatua lɛɛ nɛɛ kɛ̄ bu luh alu ekɔ nu kumaloo bu Kpa Le Yereue yɛɛ taa lɛɛ nɛɛ kɛ̄ bu luh Jizɔs bee doo a.

14. Pio amunu ue a dɔbiī na a le bu kpa Luk 7 ekobee a? (Ɛpnage foto.)

¹⁴ Naa kɛɛrɛbu pio ue a dɔbiī alu egbī muɛ bu kpa Luk 7 ekobee. O yerege nukuādɛɛ̄ loo kɔ sɔ̄ Jizɔs “emɔna” lo wa a gaa to, lo sɔ̄ “a ɛrɛ toesaɛ̄ ye loo” ni? (13 barakpaɛ̄) Nyɔɔwo, sɔ̄ Jizɔs muɛ dua kɛ̄ lo wa gaa to doo bee doo kɔ a ɛrɛ ye toesaɛ̄ loo. Jizɔs naa bee aadee ɛrɛ toesaɛ̄, mɛ a bee tɔgɛ kɔ a ɛrɛe toesaɛ̄ loo lo wa. A bee kɔ ue a ye nɛ egbɔ̄nyiɛ kɔ: “O aa tona.” Lɛɛ a yerebah ye nɛ. A bee lɛɛ ye nwiī kɛ̄ bu luh sa ye ‘su nɛ ye ka.’—14, 15 barakpaɛ̄.

15. Ena i dap nɔ aāloo pya nyɛŋia tam Jizɔs bee si a?

¹⁵ Ena i dap nɔ aāloo nyɛŋia tam Jizɔs bee si lo elɛɛ nwiī ziī wa ua dam kɛ̄ bu luh a? I nɔ kɔ a bɔloo kɔ i tɔgɛ toesaɛ̄ loo pya a le bu ekiɛ̄nu. Alu kaka kɔ ii le edap lɛɛ nɛɛ kɛ̄ bu luh dookɛ̄ Jizɔs bee doo. Mɛ doodoo Jizɔs, i dap tɔgɛ toesaɛ̄ loo pya a le bu ekiɛ̄nu tɛ̄maloo elu nɛɛ a ɛp nu leere. I dap lu fɛgɛ loo pya dɔɔ̄na sa wa gbɔ̄nyiɛ tɛ̄maloo nu i kɔ le nu i doo. d (Kam 17:17; 2 Kɔr 1:3, 4; 1 Pit 3:8) Kunɛ nwīgbagbara ue alu ekɔ bu fɛgɛ dap wa gbɔ̄nyiɛ.

16. Ena o nɔ aāloo nu a bee sira loo ziī wuga nɛɛwa ye nwiī bee u dookɛ̄ alu etɔgɛ bu foto doo a?

¹⁶ Naa kɛɛrɛbu ziī nu a bee sira ama. Pio zua akii adumɛ, ziī wuga nɛɛwa bee muɛ ziī ka a ye le barakpaɛ̄ a gaa to sɔ̄ a  gaa lu e’uɛ yɔɔ bie enɔānu. Lo yɔɔ bee kɔ nu akiiloo bɛābu aakɛ̄ bu luh, e nwiī lo wa bee aā e’u. Susuā doo wo, lo wuga nɛɛwa bee ye yira kpaɛ̄, ye pigara bahloo, sa ye nyɔɔnɛ uɛ lo yɔɔ mmɛ kɛ̄. Sɔ̄ esaa lo wa bee kɔ: “Bu mɛ ɛɛ loo kɛ̄ pya wuga nɛɛdam le nɛɛwa mɛ tɔgɛ wereloo kumaloo doo.” Bu ye bee ɛɛ kɔ a bee si enɔānu lo dee. A bee kɔ: “Kɛ̄ i dap ɛrɛ yerebah aā na bie taɛ i Tɔ Nɔnu Buɛ̄-mɛnɛ.” Bu kaka, Jɛhova muɛ sa yere nukuādɛɛ̄ loo kunɛ nwīgbagbara nu i doo lo etɔgɛ fɛgɛ dogo loo “pya beenyiɛ baara.”—Yɔɔ 34:18.

17. Ena i enɔā bu ekobee ue ama a?

¹⁷ Pya ue a le bu Kpa Le Yereue akiiloo pya nyɛŋia tam Jizɔs lu ziī enɔānu a i dap dɔbiī nɛ. Ba tɔgɛ i kɔ Jɛhova le Jizɔs were i loo gbɛnɛ, e Jizɔs ɛrɛ ekpo lo elɛɛ dɛ̄dɛɛ̄ pya i taāŋa le kɔ i ɛrɛ kaāna dɛrɛ nyiɛ nyɔɔ bu pya leelee Buɛ̄-mɛnɛ Bari enua. Sɔ̄ i nɔ nu akiiloo pya e’ɛma ama, i dap kɛɛrɛbu loo pya sīdee ili dap nɔ pya dogo Jizɔs. Elee lo o nɔɔ lo enɔ nu akiiloo pya nyɛŋia tam Jizɔs nyɔɔ oloo ale sɔ̄ bui ɛrɛ Enɔānu Butɔ. Ɛp pya nu o dap nɔ aāloo, sa kɔ nu o enɔā nɛ pya dɔɔ̄na. Naa kɛɛrɛ dua kɛ̄ o ue elu lo a wu nɛɛ yah doo a!—Rom 1:11, 12.

18. Ena i kɔnia bu ekobee ue enyɔɔnɛ a?

¹⁸ Waɛloo kuma esiatam zue ue Jizɔs, a bee lɛɛ lo eree taa nɛɛ kɛ̄ bu luh. Mɛ lo ama lu kee, nyɔnɛbee a bee lɛɛ ye gbo kɛ̄ bu luh, e a bee doo wo bu keebee sīdee. Ena i dap nɔ aāloo e’ɛma akiiloo nyɛŋia tam Jizɔs bee si ama a? E bu mɛ sīdee na i dap agɛrɛtɛ̄ i bɛābu bu aakɛ̄ bu luh a? Lo ekobee ue a nyɔɔnɛ e’agara pya ebip ama.