1. Ena i suā leere a?

 DOODOO pya nɛɛ Jɛhova, i suā kɔ a were i loo sa gbī kɔ i tɔɔ̄dum bu sīdee a lee eera. (Rom 8:35-39) I suānage kɔ pya daakuu Baibol wee i dɔbiī nɛ sɔ̄ i su yere bu dogo. (Ais 48:17, 18) Mɛ, lo i kpesī taāŋa sɔ̄ ii bee ɛmadɛɛ̄ a?

2. Amunu taāŋa na i dap kpesī a, e ena pya lo taāŋa dap doo kɔ i kɛɛrɛ a?

² Dɛ̄dɛɛ̄ pya nɛɛ Jɛhova gaa kpesī keekee taāŋa. Bu edoba, ziī nɛɛ a nuūna i butɔ dap i lɔgara bu pio sīdee. I dap ɛrɛ gbɛnɛ dumɛloo lo a doo kɔ i aa dap taāŋabah Jɛhova dookɛ̄ i bee doo. Bugia siranu dap i ɛrɛ pɔrɔ pah nyɔɔ. Ale, a dap lu etɛ̄ŋa i loo nyɔɔ i yira. Sɔ̄ i kpesī pya taāŋa ama, i dap bura kɔ: ‘Ena anua nu ama aa mɛ siraloo a? Ekɔ m edoora ziī nu a bee piya ni? Ekɔ lo ama tɔgɛ kɔ Jɛhova naa gaa mɛ nɛ leelee ni?’ Nu ewee a tɔɔ̄ge loo doo wo ama ni? Lo ewee a siraloo doo wo, loo a aa ɔ. Gbɛnɛ-edo pya zooro Jɛhova ba bɔloo eture nyiɛ loo etɛ̄na bu dua taāŋa ama.—Yɔɔ 22:1, 2; Hab 1:2, 3.

3. Ena i dap nɔ aābu kpa Le-yɔɔ 34:19 a?

³ Buū Le-yɔɔ 34:19. Yere nukuadɛɛ̄ loo baɛ kpog-bee ue a le bu yɔɔ ama: (1) Pya kaāna dogo wee kpesī taāŋa. (2) Jɛhova zuura i lɛɛ bu pya taāŋa i kpesī. Bu mɛ sīdee na Jɛhova i zuura lɛɛ bu a? Ziī sīdee na tɛ̄maloo eyerebah i nɛ kɔ i tɔɔ̄dum bu sīdee a kuūnadɛɛ̄. Jɛhova kɔ lo i taāŋa ye bah i ɛrɛ ɛɛbu, mɛ a naa kɔ ii le ekpesī lɔgɔ  taāŋa anyaawo. (Ais 66:14) A yere i mɛm loo kɔ i bie ekɛɛrɛ nyɔɔ deesī li, sɔ̄ i gaa le ɛrɛ ekpeloo dum mmɛ deedee. (2 Kɔr 4:16-18) Mɛ nyaawo, a gaa i yerebah nɛ kɔ i dap kiisī lo etaāŋa ye bah ziī ziī dee.—Yɔɔ-To 3:22-24.

4. Ena i nɔ bu ekobee ue ama a?

⁴ Doraa i kɔnia nu i dap nɔ aāloo pya edoba akiiloo pya a bee taāŋabah Jɛhova bu bɔ ture nyiɛ loo bu sɔ̄ a bee lu e’ɛm Baibol le bu ilii dee ama. Dookɛ̄ i sah i muɛ doo, i dap kpesī pya taāŋa ii bee ɛmadɛɛ̄. Mɛ lo i dɛɛa nyɔɔ Jɛhova, a naale elɔɛ ekuū i dɛɛ̄ loo. (Yɔɔ 55:22) Sɔ̄ i aa nɔ nu akiiloo pya edoba ama, bip aba ɔɔ kɔ: ‘M bee doo dogo doodoo wa lo m le bu dua kɛ̄tɔɔ̄ a le doo wo ama? Bu mɛ sīdee na pya edoba ama agɛrɛtɛ̄ kɛ̄ m dɛrɛ nyiɛ nyɔɔ Jɛhova doo a? Ena m nɔ aāloo lo m dap su yerebu na dum a?’

5. Pya amunu taāŋa na Laban bee doo kɔ Jekɔb a kpesī a? (Ɛp foto a le nyɔɔ eko.)

⁵ Pya zooro Jɛhova bu sɔ̄ a bee lu e’ɛm Baibol bee kpesī pya taāŋa ba naa bee ɛmadɛɛ̄. Kɛɛrɛ nu akiiloo Jekɔb. Ye tɛ bee ye kɔ nɛ kɔ a ii wa aā yɛɛ pya miɔŋɔ nɛɛwa Laban a wa nuuna lo a wee taāŋanage bah Jɛhova, e ye tɛ bee doo kɔ a suā kɔ Jɛhova enɛ ye gbɛnɛ-edo leelee. (Jɛn 28:1-4) Nyɔɔwo Jekɔb bee doo taɛ wo. A bee aa buɛ̄ Kenan kii tɔ Laban a ɛrɛ baɛ miɔŋɔ nɛɛwa lo a le Lia le Rachel. Jekɔb bee wereloo Rachel alu gbagbara nwiīnɛɛwa Laban sa yiga kɔ e’iie ye tɛ̄maloo esitam bu ɛrɛba zua nɛ ye tɛ. (Jɛn 29:18) Mɛ nu bee nyaa loo kɛ̄ Jekɔb bee ɛmadɛɛ̄ nu doo. Laban bee ye bira sa doo kɔ a ii ye sira a kura Lia. Sɔ̄ ziī kaɛ etɛ̄na, Laban bee lɛɛbahloo Jekɔb kɔ a sikɛ̄ ii Rachel, mɛ e dasī si tam loo dɔɔ̄na ɛrɛba zua. (Jɛn 29:25-27) Laban naa bee aaranage Jekɔb leere bu wa gbora. Sɔ̄ alu egba buū, Laban bee ziā Jekɔb bu 20 zua!—Jɛn 31:41, 42.

6. Dɔɔ̄na amunu taāŋa na Jekɔb bee tɛɛ̄ bu a?

⁶ Jekɔb bee egerebu bu pya dɔɔ̄na taāŋa. A bee ɛrɛ gbɛnɛ-edo nwiī, kerewo pya ye nwiī naa bee gbaa le bu efɛɛloo. E ba bee oo wa wuga Josɛf nua zooro. Simeon le Levi alu baɛ nwiī Jekɔb bee su kɛɛ nua nyɔɔ wa butɔ, sa gbee bee Jɛhova. Gbaāloo wo, Rachel alu wa Jekɔb bee wereloo kaāna bee u bie dee maɛ̄ maɛ̄ wa eree baɛ nwiī. E nyɔɔ gbɛnɛ kii a bee dɔ, Jekɔb bee kii buɛ̄ Ijipt sɔ̄ e’ana.—Jɛn 34:30; 35:16-19; 37:28; 45:9-11, 28.

7. Bu mɛ sīdee na Jɛhova bee nɛ leelee Jekɔb nyɔɔbee a bee doo nu a ye nia a?

⁷ Bu dɛ̄dɛɛ̄ kɛ̄tɔɔ̄ ama, Jekɔb naa bee lɛɛbahloo ye yira a bee ɛrɛ bu Jɛhova le Ye yii. E sɔ̄ sɔ̄ aa kiisī, Jɛhova nɛ leelee Jekɔb nyɔɔbee a bee doo nu a ye nia. Bu edoba, kaɛlɛɛ kɛ̄ Laban bee dag Jekɔb doo, Jɛhova bee doo kɔ a ɛrɛ gbɛnɛkpo zɔ. E naa ɛp kɛ̄ bu Jekɔb bee ɛɛ loo Jɛhova doo sɔ̄ a bee sikɛ̄ obia gbaaloo ye nwiī Josɛf, lo a bee kɛɛrɛ kɔ ebee u bu nyɔɔnyɔɔ sɔ̄ akii adumɛ! Le gbanialoo Jekɔb bee nyɔɔnɛ Jɛhova ɛnia bee doo kɔ a dap be eebah pya taāŋa a bee kpesī. (Jɛn 30:43; 32:9, 10; 46:28-30) Sɔ̄ i kiisī lo e’ɛrɛ le gbanialoo kumaloo Jɛhova edoo kɔ i dap be eebah pya taāŋa ii bee ɛmadɛɛ̄ a i kpesī.

8. Ena Mɛnɛ Devid bee gbī edoo a?

⁸ Mɛnɛ Devid naa bee dap doo dɛ̄dɛɛ̄ nu a bee ɛmadɛɛ̄ lo edoo bu esiatam  nɛ Jɛhova. Bu edoba, a bee taɛ Devid kaāna lo ewu tɔkaɛ nɛ ye Bari. E a bee kɔ nɛ nɛɛ zue ue Natan kɔ a gbī edooe wo. Natan bee ye ture nɛ kɔ: “Doo dɛ̄dɛɛ̄ nu a le bu o beenyiɛ, nyɔnɛbee Bari le a loo.” (1 Edoo 17:1, 2) I suā kɔ pya ue ama bee dap yere mɛm loo Devid kaāna. Naadaba a bee bɔātɛ̄ kpɛ̄naloo lo etop gbɛnɛ tɔ ama.

9. Ena Devid bee doo kumaloo ue a naa bee ɛmadɛɛ̄ a bee lu ekɔ ye nɛ a?

⁹ Sɔ̄ sɔ̄ naa binia, nɛɛ zue ue Jɛhova bee obia lu sa kɔ yere ue alu kee loo nu Devid aa bee ɛmadɛɛ̄. “Bu aba edɛɛ̄ a,” Jɛhova bee kɔ nɛ Natan kɔ a naale Devid na etop lo tɔkaɛ a, mɛ ziī ye nwiī na etop a. (1 Edoo 17:3, 4, 11, 12) Ena Devid bee doo sɔ̄ a bee dā lo yere ue a? A bee kwabahloo nu a bee seeasī. A bee kiisī lo ebɔ̄ŋɛnɛloo kpugi le pya nu ye nwiī Solomɔn esu toma lo tɔkaɛ.—1 Edoo 29:1-5.

10. Bu mɛ sīdee na Jɛhova bee nɛ leelee Devid a?

¹⁰ Aba sɔ̄ Jɛhova bee kɔ nɛ Devid kɔ a naale alɛ na etop lo tɔkaɛ a, Jɛhova bee ye nyɔɔnɛ doo yii bɔmadum. Jɛhova bee yira yii nɛ Devid kɔ ziī ye manamana ebɛɛ mmɛ deedee. (2 Sam 7:16) Bu aā nyɔuwe, sɔ̄ Jizɔs ebɛɛ bu Baɛ Boo Le Lop Tup Zua, bu Devid e’ɛɛ kaāna sɔ̄ esuā kɔ nɛɛ a gaa bɛɛ a, ɛɛ Mɛnɛ a ye tɛɛ̄ aaloo! Ue ama yerebah i nɛ kɔ i suā kɔ kere ii dap doo dɛ̄dɛɛ̄ pya nu i bee ɛmadɛɛ̄ lo edoo nɛ Jɛhova, i Bari dap i nɛ pya dɔɔ̄na leelee ii bee ɛmadɛɛ̄.

11. Bu mɛ sīdee na Jɛhova bee nɛ leelee Pya Nɛɛ Kraist a bee le bu tua sɔ̄ o’oo tup zua kere lo Buɛ̄-mɛnɛ naa bee lu sɔ̄ ba bee ɛmadɛɛ̄ a? (Doonu 6:7)

¹¹ Pya Nɛɛ Kraist A Bee Le Bu Tua Sɔ̄ O’oo Tup Zua A bee kpesī pya taāŋa ba naa bee ɛmadɛɛ̄. Bu edoba, ba bee ɛrɛ taɛ kɔ Buɛ̄-mɛnɛ Bari alu, mɛ ba naa bee suā sɔ̄ elu. (Doonu 1:6, 7) Nyɔɔwo, ena ba bee doo a? Ba bee kiisī lo elu kirikiri bu esiatam zue ue. Sɔ̄ ba bee le aa yɛgɛ lo le yereue kumasī, ba bee muɛ kɛ̄ Jɛhova aa nɛ leelee wa epiaga doo.—Buū Doonu pya Nɛɛ lɛɛratam 6:7.

12. Ena Pya Nɛɛ Kraist bu tua sɔ̄ o’oo tup zua bee doo sɔ̄ gbɛnɛ kii bee dɔ a?

¹² A ɛrɛ sɔ̄ gbɛnɛ kii bee dɔ “bu dɛ̄dɛɛ̄ nyɔuwe.” (Doonu 11:28) Lo kii bee ɛrɛnage pah nyɔɔ Pya Nɛɛ Kraist bu tua sɔ̄ o’oo tup zua. Naa ɛp kɛ̄ ba bee tɔga doo nyɔɔ gbɛnɛ kii a bee dɔ ama a! Bu kaka, pya tɛ le ka bee le aa kɛɛrɛ kɛ̄ ba edap tɛɛ̄ doo nɛ nuede pya wa butɔ. E bu mɛ sīdee na a bee ɛrɛ pah nyɔɔ pya zege ba bee gbī enyimɛ wa esiatam zue ue yereloo a? Ekɔ ba bee le aa kɛɛrɛ sɛh ba edasī yira mmɛ sɔ̄ lo kii ekira kɛ̄ naa e? Kaɛlɛɛ kɛ̄ nu bee mɛa loo Pya Nɛɛ Kraist ama doo, ba bee kwabahloo wa kɛ̄tɔɔ̄ lokwa ba dap si tam zue ue. Ba bee kiisī lo ezue ue bu ɛrɛgeba sīdee ba dap. E ba bee su ɛɛbu dɔma pya nu ba ɛrɛ nɛ pya wa wuga nɛɛdam le nɛɛwa bu yira lo ba bee le Judia.—Doonu 11:29, 30.

13. Amunu leelee na Pya Nɛɛ Kraist bee ɛrɛ sɔ̄ kii aa bee dɔ a?

¹³ Pya amunu leelee na Pya Nɛɛ Kraist bee ɛrɛ sɔ̄ lo kii bee dɔ a? Pya a bee lu edɔɔ̄ nu nɛ bee muɛ kɛ̄ Jɛhova wa yerebah nɛ doo. (Mat 6:31-33) Wa gbanialoo kiiloo pya wa wuga nɛɛdam le nɛɛwa a bee wa yerebah nɛ bee sikɛ̄ agatɛ̄. E pya nɛɛ a bee dɔɔ̄nu lɛabah ale pya nɛɛ a bee su dɔ bu lo eyerebah wa nɛ bee ɛrɛ ɛɛbu a wee sira aaloo sɔ̄ nɛɛ doonu nɛ pya dɔɔ̄na. (Doonu 20:35) Jɛhova bee nɛ  leelee dɛ̄dɛɛ̄ aba nyɔɔbee ba bee kwabahloo wa tɔɔ̄dum sɔ̄ kɛ̄tɔɔ̄ nyaa.

14. Ena a bee siraloo Banabas le Pɔɔl a, e ena a bee sira aabu a? (Doonu 14:21, 22)

¹⁴ Wee lu etɛ̄ŋaloo Pya Nɛɛ Kraist bu tua sɔ̄ o’oo tup zua, pio sɔ̄ taɛ sɔ̄ ba naa bee ɛmadɛɛ̄. Naa kɛɛrɛ nu a bee siraloo Banabas le nɛɛ lɛɛratam Pɔɔl sɔ̄ ba bee le aa zue ue bie Listra. Tua sɔ̄, pya lo nɛɛ bee wa su baɛbah suā sa wa gbaɛ̄tɔ̄loo. Sɔ̄ pio sɔ̄ etɛ̄na, sɔ̄ pya gbanasī “ezuā pya nɛɛ” a, pio pya nɛɛ a bee le aa wa gbaɛ̄tɔ̄ bee tobo dɛm Pɔɔl sa ye lɛɛbahloo kɔ a u. (Doonu 14:19) Mɛ Banabas le Pɔɔl bee kiisī lo ezue ue dɔɔ̄na kɛ̄. Ena a bee sira aabu a? Ba bee doo kɔ “booboo nɛɛ a nyɔɔnɛ dumɛ Jizɔs,” sa wa ekɔaue le wa edoba bee yere mɛm loo pya wa wuga bu yira. (Buū Doonu pya Nɛɛ lɛɛratam 14:21, 22.) Booboo nɛɛ bee ɛrɛ biī nyɔnɛbee Banabas le Pɔɔl naa bee pee beenyiɛ sɔ̄ ba bee kpesī tɛ̄ŋaloo. Lo i kiisī lo esi pya tam Jɛhova i nɛ kɔ i si, e nɛ i leelee.

15. Ena o nɔ aāloo edoba Wuga nɛɛdam A. H. Macmillan a?

¹⁵ Lɛɛ a elu bu zua 1914, pya nɛɛ Jɛhova bee le aa ɛmadɛɛ̄ gbɛnɛ nyɛŋia nu esira. Bu edoba, naa kɛɛrɛ nu akiiloo Wuga nɛɛdam A. H. Macmillan. Doodoo kɛ̄ pya dɔɔ̄na a bee le lo sɔ̄ bee kɛɛrɛnage doo, Wuga Macmillan bee kɛɛrɛ kɔ e’ɛrɛ ye ekpɛanu lo ekii bunyɔɔ taɛ lo sɔ̄ ama. Bu ziī ekɔaue a bee nɛ bu Ɛrɛnia Enɔɔ̄ bu zua 1914, a bee kɔ: “Naadaba elu kpɛdumɛ ekɔaue m nɛ na ama.” Kerewo, lo ekɔaue naa bee lu ye kpɛdumɛ ekɔaue. Wuga Macmillan bee sikɛ̄ ɛm kɔ: “Pio sɔ̄ booboo ii bee le aa gbara gbɛnɛ lo ekɛɛrɛ kɔ i aa kiie bunyɔɔ aba sɔ̄.” A bee kɔ gbaāloo kɔ: “Nu alu ebɛɛ̄ kɔ i doo na lo ekiisī lu kirikiri bu esiatam Nɛɛ-a-i-ɛrɛ.” Wuga Macmillan bee kiisī lo elu kirikiri bu ye esiatam. A bee kiisī lo e’ɛrɛ mɛm bu tam zue ue. A bee ɛrɛ dee lo eyere mɛm loo gbɛnɛ-edo pya wuga nɛɛdam a bee lu eyere kpɔgɔrɔ nyɔɔ wa yira le kɔ ba tɔɔ̄ kee aāloo nyɔuwe. E Wuga Macmillan bee kiisī lo esi enɔānu eree sɔ̄ loo kere sɔ̄ e’ana. Bu mɛ sīdee na Wuga Macmillan bee su sɔ̄ a ye le bah daānu leere bu sɔ̄ aa yira baɛ sɔ̄ elu enɛ ye ekpɛanu loo ye tam a? Bu nwīkere sɔ̄ lɛɛ a gae u bu zua 1966, a bee kɔ: “Na yira sii ɔloo.” Alu kaāna le edoba a bɔloo kɔ dɛ̄dɛɛ̄ ii i nɔ nu aāloo eetɔɔ̄ na sɔ̄ i e’egerebu nyɔɔnyɔɔ sɔ̄ bu doā-ɛp eekɛ̄ i bee ɛmadɛɛ̄ doo!—Hib 13:7.

16. Amunu nu finiabah na a bee bugia siraloo Herbert Jennings le ye wa a? (Jemes 4:14)

¹⁶ Booboo pya nɛɛ Jɛhova gaa egerebu kɛ̄ bah keekee eyɔloo ba naa bee ɛmadɛɛ̄. Bu edoba, Wuga nɛɛdam Herbert Jennings bee kɔ nu akiiloo dua ɛɛbu alɛ le ye wa bee ɛrɛ sɔ̄ ba aa bee si tam dɔɔ̄na edo bie Ghana. Kerewo, sɔ̄ sɔ̄ aa kiisī, bee lu emuɛ kɔ a ɛrɛ dumɛloo a kura mood disorder, a wee doo kɔ bu nɛɛ a biira sɔ̄ lɔgɔ nu naa nua. Dɛɛa nyɔɔ nu a le bu kpa Jemes 4:14, Wuga Jennings bee su kɛ̄tɔɔ̄ ama kure “‘nyɔɔ’ee’ lo ii bee ɛmadɛɛ̄.” (Buū.) A bee ɛm kɔ: “I bee aa kpaɛ̄ pya gbo a bee i tɔɔ̄ waɛloo kaāna a bee le Ghana sa obia kii Canada, lo ebo lo dumɛloo.” Jɛhova bee yerebah nɛ Wuga nɛɛdam Jennings le ye wa kɔ ba a kiisī lo etaāŋa ye bah kaɛlɛɛ pya kɛ̄tɔɔ̄ ba bee kpesī.

17. Bu mɛ sīdee na edoba Wuga Jennings yerebah nɛ pya i wuga bu yira a?

 ¹⁷ Pya ue Wuga Jennings b bee kɔ, sɔ̄ aa kɔ taɛ nu a bee ye siraloo bee yerebah nɛ gbɛnɛ-edo nɛɛ. Ziī wuga nɛɛwa bee ɛm kɔ: “Ekobee ue ama bee mɛ zū gbɛnɛ. . . . Buū nu akiiloo kɛ̄ Wuga Jennings bee dap lɛɛbahloo ye esiatm lo ekuūdɛɛ̄loo ye kɛ̄tɔɔ̄ nwanaloo doo, bee doo kɔ m dap ɛp na kɛ̄tɔɔ̄ bu sīdee a kuūnadɛɛ̄.” Ziī wuga nɛɛdam bee ɛmnage nu a bee wo, kɔ: “Sɔ̄ m esiatam bu lop zua doodoo nɛɛ kanɛɛ, m bee ɔbɛ nyɔɔbee dumɛloo a bee nɛ taāŋa na puī. Kɛ̄ m bee ɛmadɛɛ̄ na kɛ̄tɔɔ̄ doo bee mɛ ɔɛloo gbɛnɛ sa mm bee dapna buū pya nu a bee sira loo pya i Wuga alu e’ɛm bu pya i kpa. . . . Mɛ kɛ̄ Wuga Jennings bee egerebu doo, bee mɛ yere mɛm loo.” Lo ama doo kɔ i suā kɔ, sɔ̄ i kpesī pya taāŋa ii bee ɛmadɛɛ̄, i dap su lo sɔ̄ yeā mɛm loo pya dɔɔ̄na. Kere sɔ̄ dum naa mɛa i loo dookɛ̄ i bee ɛmadɛɛ̄ doo, i dapnage tɔgɛ le edoba bu egerebu lo pya dɔɔ̄na edap nɔ nu aāloo.—1 Pit 5:9.

18. Dookɛ̄ edoba alu etɔgɛ bu pya foto ayah tɔgɛ doo, ena o nɔ aāloo edoba ziī wa alu Nigeria ye dam e’ua a?

¹⁸ Bugia siranu a doodoo COVID-19 e’ɛrɛ pah nyɔɔ gbɛnɛ-edo pya nɛɛ Jɛhova. Bu edoba, ziī wa ye dam e’ua alu Nigeria bee le bu kaāna naɛ nu. Ziī lɔɔrɛ, ye nwiī nɛɛwa bee ye bip nu ba ede sɔ̄ ba edea aba ziī kɔp elɔɔsi a bee wa siga bah sah. I wuga nɛɛwa bee kɔ nɛ ye nwiīnɛɛwa kɔ ba naa ɛrɛnae lɔgɔ kpugi ale ziā a siga, kerewo ba enyɔɔnɛ edoba wa ua dam Zarɛfat lo edɛrɛ nyiɛ nyɔɔ Jɛhova sɔ̄ ba edea wa kpɛdumɛ nuede sah. (1 Mɛnɛ 17:8-16) Lɛɛ ba gae kɛɛrɛbu loo nu ba ede ye sɔɔ̄pie lo dee, pya wuga bee wa dɔɔ̄nu ma. Nu ba bee wa dɔɔ̄nɛ ama  bee le ziā lo ba edap de bu nu a eeloo baɛ kaɛ. Lo wuga nɛɛwa bee kɔ, a naa bee suāe kɔ Jɛhova aa bee ye gbaɛ̄tɔ̄ kaāna sɔ̄ aa bee kɔ ue nɛ ye nwiīnɛɛwa. Bu kaka, sɔ̄ i dɛɛa nyɔɔ Jɛhova, pya taāŋa i kpesī edoo kɔ i agɛrɛbah ye tɔɔ̄ waɛloo.—1 Pit 5:6, 7.

19. Amunu tɛ̄ŋaloo na Aleksey Yershov bee kpesī a?

¹⁹ Bu ilii sɔ̄ ama, pya i wuga nɛɛdam le nɛɛwa e’egerebu bu pya tɛ̄ŋaloo ba naa bee ɛmadɛɛ̄. Naa kɛɛrɛbu edoba Wuga Aleksey Yershov lo a tɔɔ̄ Russia. Sɔ̄ Wuga Yershov bee liamaā bu zua 1994, pya nɛɛ Jɛhova a bee tɔɔ̄ lo barasī bee ɛrɛ dee lo ezue ue sa lɔgɔ nɛɛ naa kpaɛ̄ wa. Bu pya zua a nyɔɔnɛ, kɛ̄tɔɔ̄ bee nyaa bie Russia. Bu zua 2020 a, pya nɛɛ bee yii ye be sa gbī nu ye tɔ, e gbɛnɛ-edo nu a bee ɛrɛ bee lu esu. Sɔ̄ gbɛnɛ-edo enɔɔ̄ etɛ̄na, pya bɛbɛɛ bee ye dɛrɛ ue. Lo a sikɛ̄ gbasu na kɔ, ue a bee lu edɛrɛ ye ama bee dɛɛa nyɔɔ vidio ziī nɛɛ a bee sereloo doodoo bee a gaa nɔe Baibol bu nu a eeloo ziī zua bee wa tɔgɛ. Mɛ dua tɛ̄ŋaloo sɛh!

20. Bu mɛ sīdee na Wuga Yershov agɛrɛtɛ̄ ye gbanialoo kumaloo Jɛhova a?

²⁰ Ekɔ ziī nu a lee bee aage bu tɛ̄ŋaloo Wuga Yershov bee kpesī ama ni? Aiī. Ye gbanialoo a bee nyɔɔnɛ Jɛhova ɛnia bee nyim agaloo. A bee kɔ: “Na wa le mm bee gbaa yere kara dɛ̄dɛɛ̄ sɔ̄. M bee muɛ kɔ lo Jɛhova naa bee i le loo ii le ebee dap egerebu bu taāŋa ama.” A bee kɔ gbaāloo kɔ: “Nɔnu nyɔɔ na loo bee doo kɔ m dap be eebah e’ɔaloo. M bee ɛrɛ ekɛɛrɛ nyɔɔ pya zooro Jɛhova a bee bɔ ture nyiɛ loo sɔ̄ akii adumɛ. A ɛrɛ gbɛnɛ-edo dɔ Kpa Kaɛ a kɔ nu akiiloo kɛ̄ alu gbɛnɛ doo kɔ i fɛɛrɛloo sa ture nyiɛ loo Jɛhova.”

21. Ena i enɔā bu ekobee ue ama a?

²¹ Ena i enɔā bu ekobee ue ama a? Pio sɔ̄, i kpesī taāŋa ii bee ɛmadɛɛ̄ bu nyɔuwe ama. Kerewo, Jɛhova wee yerebah nɛ pya ye zooro a ye dɛɛa nyɔɔ. Dookɛ̄ dɔ Kpa Kaɛ a bɛɛ ekobee ue ama kɔ doo, “booboo etɛɛrɛloo le nɛ nɛɛ kaāna dogo; mɛ Jɛhova zuura ye lɛɛ bu dɛ̄dɛɛ̄ aba.” (Yɔɔ 34:19) Doraa i kiisī lo ebie ekɛɛrɛ nyɔɔ ekpo Jɛhova i nɛ taā i bie ekɛɛrɛ nyɔɔ pya i e’aga kɛ̄tɔɔ̄. E doodoo nɛɛ lɛɛratam Pɔɔl, i dap kɔ: “M dap doo dɛ̄dɛɛ̄ nu bu nɛɛ a mɛ nɛ e’agaloo.”—Fil 4:13.