1. Ena anua i wee ture ebip bie enɔānu a?

 ENA anua i wee si enɔānu a? Ziī gbɛnɛ nu anua na lo eleera Jɛhova. (Yɔɔ 26:12; 111:1) I wee sinage enɔānu lokwa i dap yere mɛm loo ɛnia ii bu sɔ̄ kɛ̄tɔɔ̄ aga ama. (1 Tɛs 5:11) Sɔ̄ i ture ebip bie enɔānu, i aa doo baɛ nu ama.

2. Mɛ sɔ̄ na i dap ɛrɛ dee lo eture ebip bie i enɔānu a?

² Bu ziī ziī kaɛ, i ɛrɛ dee lo eture ebip bie enɔānu. Bu edoba, bu enɔānu tah kaɛ, i dap ture ebip sɔ̄ aa lu enɔ Tɔ Baɛloo. Bie enɔānu taɛyɛɛ kaɛ, i dap ture ebip sɔ̄ aa lu e’aabaloo Gbītɛ̄ Suā Pya Nu A Kuī A Le Bu Baibol, Enɔānu Baibol Bu Bɔŋanaloo, le pya dɔɔ̄na gah alu kɔnia sɔh.

3. Amunu finiabah na i dap kpesī a, e bu mɛ sīdee na Pya Hibru 10:24, 25 i dap yerebah nɛ a?

³ Dɛ̄dɛɛ̄ ii gbī eleera Jɛhova sa yere mɛm loo pya i wuga bu bɔŋanaloo. Mɛ i dap kpesī nu finiabah sɔ̄ i aa gbī eture ebip. Bɔɔ dap i aa lo eture ebip. Ale i dap ɛrɛ kaāna taɛ lo eture ebip, mɛ a naa lu etubo i bah loo gbɛnɛkpo sɔ̄ dookɛ̄ i bee ɛmadɛɛ̄ doo. Ena eyerebah i nɛ kɔ i dap be eebah pya finiabah ama? I dap ɛrɛ ye ture aābu ue nɛɛ lɛɛratam Pɔɔl bee ɛm ma pya Hibru. Sɔ̄ aa bee kɔ nu anua alu ebɛɛ̄ lo egbaa bɔŋia, a bee kɔ nu i sere ekɛɛrɛ nyɔɔ na “nɛ e’aga nyiɛ ɛnia i.” (Buū Pya Hibru 10:24, 25.) Sɔ̄ i muɛ kɔ i ture yere mɛm loo  pya dɔɔ̄na edoo kɔ bɔɔ aa i aa lo eture ebip. E lo a naa lu etubo i bah loo gbɛnɛkpo sɔ̄, bu i e’ɛɛnage sɔ̄ i suā kɔ pya dɔɔ̄na ɛrɛnage dee lo eture ebip.—1 Pit 3:8.

4. Taa e na i kɔnia bu ekobee ue ama a?

⁴ Bu ekobee ue ama, i dasī kɔnia kɛ̄ i dap yere mɛm loo ɛnia ii doo lo i le bu bɔŋanaloo nɛɛ naa mma bu. Lɛɛ i kɔnia sīdee i dap yere mɛm loo pya dɔɔ̄na bie bu bɔŋanaloo nɛɛ mma, kɛ̄ gbɛnɛ-edo nɛɛ wee toore bah nyɔɔ lo eture ebip. Sa bu kpɛdumɛ, i kɔ nu i doo lo edoo kɔ nu i kɔ sɔ̄ i gaa ture ebip a yere mɛm loo pya dɔɔ̄na.

5. Bu mɛ sīdee na i dap yere mɛm loo ɛnia ii bu bɔŋanaloo pya nɛɛ naa mma a?

⁵ Nɛɛ a gaa baɛbee enɔānu naa wee ɛrɛ gbɛnɛ-edo nɛɛ etubobahloo bie bu bɔŋanaloo nɛɛ naa mma. Pio sɔ̄, a wee dasī yira kina mmɛ sɔ̄ ziī nɛɛ etoore bah nyɔɔ. Pio sɔ̄ lo enɔānu dap bee kɔ a zura sa ɔloo. Ena o dap doo a? Kpɛ̄naloo etoore bah nyɔɔ gbɛnɛ-edo sɔ̄. Tɛ̄maloo edoo wo, o dap zū pya dɔɔ̄na kɔ ba a gbīnage e’agara ebip kaāna.

6-7. Ena i dap doo lo edoo kɔ bɔɔ aa i aanadee aa lo eture ebip a?

⁶ Ena o dap doo lo bɔɔ aa a lo eture ebip a? Bɔɔ wee aanage gbɛnɛ-edo nɛɛ. Kerewo, lokwa o dap yere mɛm loo pya o wuga nɛɛdam le nɛɛwa, o dap kɛɛrɛ pya nu o doo lokwa bɔɔ naa aadee a aana lo eture ebip? O doo lo ama doodoo wa?

⁷ O dap muɛ nu eyerebah a nɛ aāloo e’ɛp pya lɛra ekɛɛrɛ a le bu pya Tɔ Baɛloo i bee nɔ sɔ̄ akii adumɛ. b Bu edoba, kpɛ̄naloo leere. (Kam 21:5) Kɛ̄ o dābeeloo nu a le bu lo kpa doo, kɛ̄ bɔɔ naale e’aanage a lo eture ebip doo lo. Doonage kɔ o ture a kpuria. (Kam 15:23; 17:27) Sɔ̄ o ture naa nyɔɔ dɛɛ̄ bɔɔ naale e’aa a lo etoore bah nyɔɔ. Ekpurubah ture alu ziī ale baɛ etaā ue edoo kɔ pya o wuga nɛɛdam le nɛɛwa a dābeeloo nu o gaa kɔ leere, ee ture a nyɔɔ dɛɛ̄. Sɔ̄ o doo kɔ o ture a kpuria sa oo buū aābu kpa tɔgɛ kɔ o bee kpɛ̄naloo sa dābeeloo nu aa lu enɔ leere.

8. Tɔɔ̄loo Jɛhova doodoo wa sɔ̄ i piiga kaāna kumakɛ̄ i dap doo?

⁸ E lo o edoora pio nu alu ekɔ ama sa bɔɔ lege aa a aa lo e’agara ebip nu a eeloo ziī ale baɛ sɔ̄ ni a? Suā leere kɔ lo o doo kumakɛ̄ o dap doo, bu Jɛhova e’ɛɛ kaāna. (Luk 21:1-4) Jɛhova naa kɔ i doo nu ii le edap doo. (Fil 4:5) Kɛɛrɛbu pya nu o dap doo, nɔɔ lo edoo pya lo nu, sa o yere kara nɛ Jɛhova kɔ a nɛ a efɛɛloo beenyiɛ. Tua sɔ̄, o dap seeasī lo e’agara ziī ebip bu sīdee a kpuria.

9. Amunu taāŋa na a dap le bu bɔŋanaloo nɛɛ mma a?

⁹ Lo gbɛnɛ-edo pya zue ue le bu o bɔŋanaloo, o dap kpesī dɔɔ̄na nu finiabah. Dap lu kɔ gbɛnɛ-edo pya wuga nɛɛdam le nɛɛwa wee toore bah nyɔɔ sa naa wee lu etubo a bah loo gbɛnɛkpo sɔ̄. Bu edoba, bu Danielle  wee ɛɛ kaāna lo e’agara ebip bie enɔānu. c A wee ɛp nua ziī gah loo ye taāŋabah, sīdee eyeā mɛm loo pya dɔɔ̄na, le sīdee esu aŋɛnɛtɛ̄ kɛ̄ a dɛrɛ nyiɛ nyɔɔ kaka ue Baibol doo. Mɛ sɔ̄ a bee kii bɔŋanaloo pya nɛɛ mma, naa bee luna etubo ye bah loo gbɛnɛ-edo sɔ̄, e pio sɔ̄ naa wee lu etubo ye bah loo mmɛ sɔ̄ enɔānu ekpɛ̄na. A bee kɔ: “Bu mɛ bee biira gbɛnɛ. M bee kɛɛrɛ kɔ m epeere dee a bee mɛ kpaānɛ. Sɔ̄ a bialoo sira doo wo, a bee mɛ tɔɔ̄loo kɔ ba ɛmɛnɛbee naa gbī etubo mɛ bah loo.”

10. Bu mɛ sīdee na i dap kpɛ̄naloo lokwa i dap ɛrɛ dee lo e’agara ebip a?

¹⁰ Nu ebee a tɔɔ̄geloo dookɛ̄ a bee tɔɔ̄loo Danielle doo ni? Lo a le doo wo, loo a dap ɔ sa o aadee gbaɛ̄tɔ̄ pya nu aa lu ekɔ sa oo le egbīna e’agara ebip bie enɔānu. Mɛ o aa ɔbɛ e’agara ebip. Ena o dap doo a? Lo o kpɛ̄naloo lo e’agara gbɛnɛkpo ebip eyerebah a nɛ. Lo sɔ̄, lo a naa lu ebagara a tubobahloo, o ɛrɛnage dee lo e’agara ebip sɔ̄ lo enɔānu aa kiisī. Sɔ̄ o aa kpɛ̄naloo loo enɔānu Tɔ Baɛloo, wee kɛɛrɛ kɛ̄ ziī ziī barakpaɛ̄ gbaaloo lo ekobee ue doo. Lo o doo wo, o ɛrɛ ue a yere mɛm loo nɛɛ lo o dap ture bie enɔānu. Gbaāloo wo, o dap kpɛ̄naloo lo e’agara pya ebip a aga lo a baatɛ̄ kaka ue Baibol a le bu lo enɔānu. (1 Kɔr 2:10) Ena anua a? Nu anua na bee gbɛnɛkpo nɛɛ naale etoore bah nyɔɔ loo taɛ lo ebip ama. E lo alu kɔ o edoora pya nu ama, kerewo o sii ɛrɛge dee lo e’agara ebip a? O dap zɔ̄ŋia nɛɛ esere lo enɔānu sa ye kɔ nɛ taɛ ebip o gbī e’agara.

11. Ena ue a le bu Pya Filipai 2:4 i yere mɛm loo kɔ i doo a?

¹¹ Buū Pya Filipai 2:4. Tɛ̄maloo kaɛ edɔɔ̄ Bari, nɛɛ lɛɛratam Pɔɔl bee yere mɛm loo Pya Nɛɛ Kraist kɔ ba a ɛpnage nu elee loo pya dɔɔ̄na. Bu mɛ sīdee na i dap su zuurabahtɔ̄ ama daānu bie enɔānu a? Ɛɛ na susuā kɔ pya dɔɔ̄na gbīnage e’agara ebip sa su dɔ bu.

12. Ziī amunu sīdee a lee kaāna na i dap yere mɛm loo pya i wuga bie enɔānu a? (Ɛpnage foto.)

 ¹² Naa kɛɛrɛ doo wo ama. Sɔ̄ o gaa nyɔɔnɛ pya o gbo kɔnia ue, ekɔ aba ɔɔ o kɔge ue sa oo wa lɛɛbaloo kɔ ba a kɔ lɔgɔ nu ni? Eeye doo pippip! O gbī kɔ ba a nyɔɔnɛ a kɔnia sɔh. Bu aba lo sīdee, bie enɔānu, i gbī elɛɛbaloo kɔ dɛ̄dɛɛ̄ nɛɛ a agara ebip. Ziī gbɛnɛ sīdee i dap yere mɛm loo pya i wuga nɛɛdam le nɛɛwa na elɛɛ wa bah loo kɔ ba a kɔ nu ba yira. (1 Kɔr 10:24) Doraa i naa ɛp kɛ̄ i dap doo lo ama doo.

13. Bu mɛ sīdee na i dap doo kɔ pya dɔɔ̄na a le enɔānu a agara ebip a?

¹³ Ziī nu i dap doo na edoo kɔ i ture a kpuria sa doo kɔ pya dɔɔ̄na a ɛrɛnage dee lo e’agara ebip. Pya kanɛɛ le pya dɔɔ̄na wuga nɛɛdam le nɛɛwa edaābeeloo nu dap sere le edoba bu doo lo ama. Kere sɔ̄ o aa doo kɔ o ture a kpuria, o aa gba yube ue a le lo kɛ̄ gba kɔ. Lo o gba yube nu a le lo barakpaɛ̄ kɔ lɛɛ, lo sɔ̄ pya dɔɔ̄na naale e’ɛrɛna nu ekɔ. Bu edoba, lu elɛra baɛ ekɛɛrɛ bu barakpaɛ̄ ama, lo a le doo kɔ o ture a kpuria sa o aa gba yube gah a le loo kɔ. Lo olo na tua nɛɛ alu etubobahloo kɔ o agara ebip bu barakpaɛ̄ ama, o dap kɔ ue nyɔɔ aba ziī gah.

14. Ena eyerebah i nɛ kɔ i suā sɔ̄ a bɔloo kɔ i toore bah nyɔɔ bie enɔānu a? (Ɛpnage foto.)

¹⁴ Su suānu saŋɛ pya sɔ̄ o agara ebip. Lo i tɔɔ̄giloo toore bah nyɔɔ edoo kɔ nɛɛ a gaa baɛbee lo enɔānu a tubo i bah loo gbɛnɛkpo sɔ̄ kere sɔ̄ pya dɔɔ̄na ba sii agara ebip le kɛ̄. Lo ama dap ɔɛloo pya dɔɔ̄na sa doo kɔ ba aa toorena bah nyɔɔ.—Eklis 3:7.

15. (a) Ena i doo sɔ̄ a naa lu etubo i bah loo a? (b) Bu mɛ sīdee na pya a gaa baɛbee enɔānu edap kɛɛrɛbu dɛ̄dɛɛ̄ nɛɛ a? (Ɛp ekpo a kura “ Lo O Gaa Baɛbee Enɔānu.”)

¹⁵ Sɔ̄ gbɛnɛ-edo pya wuga toore bah  nyɔɔ bie enɔānu, edoo kɔ i aa ɛrɛ dee lo e’agara gbɛnɛkpo ebip dookɛ̄ i bee ɛmadɛɛ̄ doo. Pio sɔ̄, nɛɛ a gaa baɛbee lo enɔānu naale edap i tubobahloo mmɛ sɔ̄ lo enɔānu ekpāna. Lo ama dap i biire bu, mɛ i piiga sa ii biire bu sɔ̄ a naa lu etubo i bahloo.—Eklis 7:9.

16. Bu mɛ sīdee na i dap yere mɛm loo pya dɔɔ̄na a agara ebip a?

¹⁶ Lo oo dap agara ebip dookɛ̄ o bee ɛmadɛɛ̄ doo, o dap gbaɛ̄tɔ̄loo pya dɔɔ̄na kaāna sɔ̄ ba gaa agara ebip sa wa kaɛgɛ sɔ̄ enɔānu ekpɛ̄na. Lo o kaɛgɛ pya o wuga nɛɛdam le nɛɛwa eyere wa mɛm loo kaāna, dookɛ̄ o ture ebee wa yere mɛm loo doo. (Kam 10:21) Kakaɛgɛ pya i wuga lu dɔɔ̄na sīdee i dap yere mɛm loo ɛnia ii.

17. (a) Bu mɛ sīdee na pya tɛ ale ka edap yerebah nɛ wa miɔŋɔ kɔ ba a kpɛ̄naloo pya ebip a wa bɔloo a? (b) Dɛɛa nyɔɔ lo vidio, nia ena i doo lo ekpɛ̄naloo e’agara ebip a? (Ɛpnage ue a le kɛɛ̄.)

¹⁷ Amunu dɔɔ̄na sīdee na i dap yere mɛm loo ziī bie enɔānu a? Lo o lu tɛ ale ka, yerebah nɛ pya o miɔŋɔ kɔ ba a kpɛ̄naloo ebip dɛɛa nyɔɔ wa zua. (Mat 21:16) Pio sɔ̄ wee lu ekɔ nu akiiloo taāŋa a le bu iya dam le wa ale kiiloo dogo a naa ɛɛ bie enɔānu, kerewo,  a wee ɛrɛnage dɔɔ̄na ziī ale baɛ ebip lo pya miɔŋɔ edap agara. Doonage kɔ pya o miɔŋɔ a suā nu anua pio sɔ̄ a naale elu etubo wa bahloo sɔ̄ ba toore bah nyɔɔ. Kɔkɔ pya nu ama wa nɛ edoo kɔ bu wa aa biira sɔ̄ alu etubobahloo pya dɔɔ̄na sa naa lu etubo wa bahloo.—1 Tim 6:18. d

18. Ena i doo lokwa ii kue ekɛɛrɛ kumaloo aba ii sɔ̄ i gaa agara ebip a? (Kam 27:2)

¹⁸ Dɛ̄dɛɛ̄ ii dap kpɛ̄naloo sa agara ebip bu sīdee enɛ ka bee Jɛhova sa yere mɛm loo pya i wuga. (Kam 25:11) I dap kɔ nu akiiloo nu i etɛ̄na bu, kerewo, i nwaɛ̄dɛɛ̄ lokwa ii kɔ nu akiiloo aba ii yeekɛ̄. (Buū Kam 27:2; 2 Kɔr 10:18) Taāwo, nu i bie ekɛɛrɛ nyɔɔ na Jɛhova, ye Muɛ̄ Ue le dɛ̄dɛɛ̄ pya ye nɛɛ. (Mum 4:11) Kɛādoo, lo ebip a nyɔɔnɛ ziī barakpaɛ̄ gbī kɔ i kɔ nu akiiloo aba ii, a bɔloo kɔ i doo wo. Bu edoba, dua ebip ama sira bu 19 ebip bu ekobee ue ama.

19. (a) Ena esira aabu lo i kɛɛrɛbu pya dɔɔ̄na bie enɔānu a? (Rom 1:11, 12) (b) Ena a wee a nia akiiloo agara ebip bie enɔānu a?

¹⁹ Kereadoo ii ɛrɛ lɔgɔ lok a baɛbee kɛ̄ e’agara ebip doo, dɛ̄dɛɛ̄ ii dap agara ebip bu sīdee eyere mɛm loo nɛɛ. Lo ama dap kura kɔ i kpɛ̄naloo e’agara ebip eekɛ̄ i wee doo. Ale a dap kura kɔ kere a naa lu etubo i bah loo dɛ̄dɛɛ̄ sɔ̄, i kiisī lo e’ɛrɛ ɛɛbu sa ɛrɛnage ɛɛbu sɔ̄ pya dɔɔ̄na agara ebip. Lo i sere ekɛɛrɛ nyɔɔ nu elee loo pya dɔɔ̄na sɔ̄ i le enɔānu, dɛ̄dɛɛ̄ nɛɛ ele bu ɛɛbu sa “i gbaa ɛrɛ e’aga beenyiɛ tɛ̄maloo yira i muɛ bu ɛnia ii.”—Buū Pya Rom 1:11, 12.