1. Ziī e na a doo kɔ pya butɔ Jɛhova a le bu gbaaloo a?

BU I ɛɛ kɔ i nuunae butɔ Jɛhova. E na anua i butɔ le bu efɛɛloo le gbaaloo a? Ziī nu anua na bee dɛ̄dɛɛ̄ ii nwadɛɛ̄ nɔɔnɔɔnu Jɛhova akiiloo nɛɛ elu ekobee. Bu kaka, kɛ̄ i dābeeloo nɔɔnɔɔnu akiiloo nɛɛ elu ekobee doo, kɛ̄ i bianage bu gbaaloo doolo.

2. Pya amunu ebip na i agara bu ekobee ue ama a?

² Bu ekobee ue ama, i nɔ nu akiiloo dɔ a legara bah ziī ziī nɛɛ bu bɔŋanaloo. E sɔ̄ i gaa kiisī, i agara pya ebip a doodoo: E na alu tam pya nɛɛwa bu bɔŋanaloo a? Luge kaka kɔ dɛ̄dɛɛ̄ nɛɛdam lu ekobee loo dɛ̄dɛɛ̄ nɛɛwa ni? Lege dua ekpo pya tɛ bee tɔ ɛrɛ bee wa butɔ na pya kanɛɛ ɛrɛ bee bɔŋanaloo a? I dasī kɔ nu akiiloo kɛ̄ i ɛp pya wuga nɛɛwa doo.

3. Bu mɛ sīdee na i dap agɛrɛtɛ̄ nia i tɔgɛ loo tam pya i wuga nɛɛwa gaa si a?

³ I tɔgɛ nia loo pya wuga nɛɛwa nyɔɔ tam ba si lo ekuūdɛɛ̄loo pya wa butɔ, lo ezue le yereue, sa yerekpotɛ̄ bɔŋanaloo. I dap agɛrɛtɛ̄ nia i wa tɔgɛ loo tɛ̄maloo e’ɛp wa dookɛ̄ Jɛhova le Jizɔs wa ɛp doo. I ɛrɛnage biī aāloo kɛ̄ nɛɛ lɛɛratam Pɔɔl bee aara pya nɛɛwa doo.

4. Bu mɛ sīdee na Baibol tɔgɛ kɔ Jɛhova tɔgɛ nia loo pya nɛɛwa gbaāloo pya nɛɛdam a?

⁴ Baibol tɔgɛ kɔ Jɛhova tɔgɛ nia loo pya nɛɛwa gbaānage  loo pya nɛɛdam. Bu edoba, a tɔgɛ kɔ Jɛhova bee nɛ ye kaɛ edɔɔ̄ pya nɛɛwa gbaānage loo pya nɛɛdam bu tua sɔ̄ o’oo tup zua kɔ ba a siā nyɛŋia tam, doodoo kɔā keekee muɛ̄ ue. (Doonu 2:1-4, 15-18) Bee lu esu kaɛ edɔɔ̄ tɔā nɔɔ̄ bee baɛ eku nɛɛ ama sa wa nɛ bɛābu lo enyɔɔnɛ Kraist bɛɛ. (Gal 3:26-29) Pya nɛɛwa gbaānage loo pya nɛɛdam e’ɛrɛ ekpɛanu tɔɔ̄ a kɛnɛkɛ̄ mmɛ deedee. (Mum 7:9, 10, 13-15) E alu enɛ tam zue le yereue pya nɛɛdam le pya nɛɛwa. (Mat 28:19, 20) Bu kaka, kpa doonu pya nɛɛ lɛɛratam kɔ nu akiiloo tam ziī wuga nɛɛwa a kura Prisila gbaāloo ye dam Aquila bee si, lo a le baatɛ̄ kaka ue Baibol leere nɛ nɛɛ a bee suā gbɛnɛ kpa a kura Apɔlɔs.—Doonu 18:24-26.

5. E na kpa Luk 10:38, 39, 42 kɔ akiiloo kɛ̄ Jizɔs bee aara pya nɛɛwa doo a?

⁵ Jizɔs yere ka loo pya nɛɛwa sa wa nɛ enwadɛɛ̄. A naa bee nyɔɔnɛ sīdee doonu pya Farisii lo ba wee ɛp pya nɛɛwa kumakɛ̄ sa naa wee wa kɔ ue nɛ bie taɛkɛ̄, a sii sɛ nɔɛ̄ wa nu a le bu Kpa Kaɛ. Taāwo, a bee tɔgɛ kaka ue Baibol pya nɛɛwa sɔ̄ a gaa tɔgɛ nu pya a wee ye nyɔɔnɛ dumɛ. * (Buū Luk 10:38, 39, 42.) A bee lɛɛnage baloo kɔ pya nɛɛwa a nyɔɔnɛ ye kii uwe zue ue. (Luk 8:1-3) E Jizɔs bee wa nɛnage dee kɔ ba a kɔ nɛ pya nɛɛ lɛɛratam kɔ elua elɛɛe ye kɛ̄ bu luh.—Jɔn 20:16-18.

6. Bu mɛ sīdee na nɛɛ lɛɛratam Pɔɔl bee tɔgɛ kɔ a nɛe enwadɛɛ̄ pya nɛɛwa a?

⁶ Nɛɛ lɛɛratam Pɔɔl bee kɔ nɛ Timoti kɔ a nwadɛɛ̄ pya nɛɛwa. Pɔɔl bee ye kɔ nɛ kɔ a aara pya “gbobia a [ye] nama doodoo ka” lɛɛ a aara “pya emuā doodoo pya [ye] wuga gbobia.” (1 Tim 5:1, 2) Pɔɔl bee piiga kaāna lo eyerebah nɛ Timoti kɔ alu Nɛɛ Kraist a nyim tura, mɛ a bee suā kɔ ɛɛ ka Timoti le ye kaāma na a bee ye dasī tɔgɛ pya “nu a le bu kpa kaɛ” a. (2 Tim 1:5; 3:14, 15) Pɔɔl bee kana muɛ̄ pya wuga nɛɛwa sa kue bee ziī ziī aba bu lɛta a bee ɛm ma pya wuga li Rom. A naa bee aadee yere nukuādɛɛ̄ loo tam pya wuga nɛɛwa bee si, mɛ a bee kɔnage siā kɛ̄ tam ba si doodoo pya nɛɛtam Kraist ye nia doo.—Rom 16:1-4, 6, 12; Fil 4:3.

7. Pya amunu ebip na i gaa le kɛɛrɛbu loo anyaawo a?

⁷ Dookɛ̄ pya barakpaɛ̄ i aa a tɔgɛ doo, lɔgɔ kɛ̄ a le bu Kpa Kaɛ naa kɔ pya nɛɛwa kiikɛ̄ loo pya nɛɛdam. Pya i wuga nɛɛwa gaa dɔ kaāna biī nɛ bɔŋanaloo, e ba yerebah nɛ pya kanɛɛ lo edoo kɔ efɛɛloo le gbaaloo a le bu bɔŋanaloo. Mɛ alu ebɛɛ̄ kɔ i agara pya ebip a doodoo: E na anua Jɛhova kɔ pya wuga nɛɛwa a bɔba bee bu pio kɛ̄tɔɔ̄ a? Kuma sɔ̄ alu aba pya wuga nɛɛdam na a wee lu etubobaloo nua nɛɛ yerebah tam le nɛɛ kanɛɛ a, wo kurage kɔ dɛ̄dɛɛ̄ pya wuga nɛɛdam lu ekobee loo dɛ̄dɛɛ̄ pya wuga nɛɛwa bu bɔŋanaloo ni?

8. Dookɛ̄ Pya Ɛfɛsɔs 5:23 kɔ doo, lege dɛ̄dɛɛ̄ wuga nɛɛdam na alu ekobee loo dɛ̄dɛɛ̄ wuga nɛɛwa a? Naa baatɛ̄.

⁸ Ye ture na eeye. Naale dɛ̄dɛɛ̄ nɛɛdam na alu ekobee loo dɛ̄dɛɛ̄ nɛɛwa a, mɛ ɛɛ Kraist. (Buū Pya Ɛfɛsɔs 5:23.) Dam ɛrɛ ekpo bee ye  wa bie butɔ. Nwiī nɛɛdam eliamaā naa lu ekobee loo ye ka. (Ɛfɛs 6:1, 2) Ɛrɛ kɛ̄ ekpo pya kanɛɛ ɛrɛ bee pya wuga nɛɛdam le nɛɛwa bu bɔŋanaloo ina yira. (1 Tɛs 5:12; Hib 13:17) Pya wuga nɛɛwa a sii iya dam sa naa lena kpaɛ̄ wa tɛ le ka kiisī lo enɛ wa enwadɛɛ̄ sa nwanagedɛɛ̄ pya kanɛɛ. Kerewo, aba Jizɔs na alu wa ekobee dookɛ̄ alunage ekobee loo pya nɛɛdam doo a.

9. E na anua alu ebɛɛ̄ kɔ pya wuga nɛɛwa a bɔba bee pio sɔ̄ a?

⁹ Lu kaka kɔ Jɛhova etubobaloo pya nɛɛdam kɔ ba a zaāsī bu tɔgɛnu le taāŋabah Bari bu bɔŋanaloo, e a naa nɛ ekpo ama pya nɛɛwa. (1 Tim 2:12) E na anua a? Aba nu a bee doo kɔ a tubobaloo Jizɔs kɔ alu ekobee loo pya nɛɛdam na a anua a tubonage baloo pya nɛɛdam kɔ ba a kuūdɛɛ̄loo bɔŋanaloo a, lokwa bɔŋanaloo kiā nyɔɔ etaā. Lo a le kɛ̄tɔɔ̄ doo kɔ wuga nɛɛwa a si tam wuga nɛɛdam ebee si, Jɛhova kɔ lo nɛɛwa a bɔba nu bee. * (1 Kɔr 11:4-7) Jɛhova kɔ ba a doo lo ama nyɔnɛbee a gbī kɔ ba a nɛ enwadɛɛ̄ nɔɔnɔɔnu akiiloo nɛɛ elu ekobee, naale nyɔɔbee a ɛp wa kumakɛ̄. Susuā lo ama edoo kɔ i agara ebip a kɔ: Mɛ dua ekpo na pya tɛ bee tɔ le pya kanɛɛ ɛrɛ a?

10. E na anua nɛɛ kanɛɛ dap gbī enɛ lok bu bɔŋanaloo a?

¹⁰ Pya kanɛɛ wereloo Kraist, e ba werenage loo pya “naana pee” Jɛhova le Jizɔs wa yere kɛ̄bah kɔ ba a kuūdɛɛ̄loo. (Jɔn 21:15-17) Nyɔɔbee nɛɛ kanɛɛ  kuūdɛɛ̄loo bɔŋanaloo a, a dap ɛp kɔ a le e doodoo tɛ bu bɔŋanaloo. A dap kɛɛrɛ kɔ lo tɛ bee tɔ ɛrɛ ekpo enɛa pya lok ekpega pya ye butɔ, nɛɛ kanɛɛ dapnage nɛ pya lok a kɛɛrɛ kɔ ekpega naana pee Bari. E pio pya wuga nɛɛdam le nɛɛwa dap su pya kanɛɛ nua pya a wa baɛbee bu edɔɔ̄ tɛ̄maloo ekɔ ba a wee biaɛ nu fii wa nɛ. Mɛ ekpo pya kanɛɛ bu bɔŋanaloo le pya tɛ bee tɔ ɛrɛ luge aba etɛɛnɛ ni?

11. Mɛ sīdee na ekpo a le bah pya tɛ bee tɔ le pya kanɛɛ bee ziī a?

¹¹ Nɛɛ lɛɛratam Pɔɔl bee kɔ ekpo a le bah pya tɛ bee tɔ le pya kanɛɛ bee ziī bu pio sīdee. (1 Tim 3:4, 5) Bu edoba, Jɛhova gbī kɔ ziī ziī nɛɛ a le butɔ a gbaɛ̄tɔ̄loo tɛ bee tɔ. (Kɔl 3:20) E a gbīnage kɔ pya a le bu bɔŋanaloo a gbaɛ̄tɔ̄loo pya kanɛɛ. Jɛhova gbī kɔ pya tɛ bee tɔ le pya kanɛɛ a muɛ̄ kɔ ba kuūdɛɛ̄loo ebɛɛ̄ bu edɔɔ̄ pya a wa le kɛ̄bah. Ba ekɛɛrɛ nage kɛ̄ nu tɔɔ̄loo pya a wa le kɛ̄bah doo. E doodoo kaāna tɛ bee tɔ, pya kanɛɛ ɛrɛ eyerebah nɛ pya a wa le kɛ̄bah sɔ̄ taāŋa sira. (Jem 2:15-17) Gbaāloo wo, Jɛhova ɛmadɛɛ̄ kɔ pya kanɛɛ le pya tɛ bee tɔ a gbaɛ̄tɔ̄loo ye lok, sa “tɔɔ̄dum dookɛ̄ kpa kaɛ kɔ doo.”—1 Kɔr 4:6.

12-13. Dookɛ̄ Pya Rom 7:2 tɔgɛ doo, bu mɛ sīdee na ekpo a le bah pya tɛ bee tɔ lu kee loo lo pya kanɛɛ a?

 ¹² Kerewo, kaāna kee le yɛɛ ekpo a le bah nɛɛ kanɛɛ le nɛɛ alu ekobee loo butɔ. Bu edoba, Jɛhova etubobaloo pya kanɛɛ kɔ ba a si tam doodoo pya biaɛ, e a enɛa wa ekpo lo elɛɛ pya a si pɔrɔ sa naa gbī ekiiya bu bɔŋanaloo.—1 Kɔr 5:11-13.

¹³ Mɛ a ɛrɛ ekpo Jɛhova nɛ pya tɛ bee tɔ lo a naa nɛ pya kanɛɛ. Bu edoba, a nɛ ekpo tɛ bee tɔ kɔ a nɛ lok pya ye butɔ, sa muɛ̄ kɔ ba sere pya lo lok. (Buū Pya Rom 7:2.) Bu edoba, tɛ bee tɔ ɛrɛ ebiaɛfii sɔ̄ a gbī kɔ pya ye miɔŋɔ eyii tɔ uunɛ. A ɛrɛnage ekpo ekāmɛnɛ pya ye miɔŋɔ sɔ̄ ba naa tɔɔ̄ kɛɛ̄ ye lok. (Ɛfɛs 6:1) Bu kaka, tɛ bee tɔ a ɛrɛ wereloo wee dasī nyɔɔnɛ ye wa kɔnia pya lok aa gbī enɛ bie butɔ; e nu anua na bee baɛ aba elua “aba namloo.” *—Mat 19:6.

14. (a) Aāloo nu a le bu kpa Maak 10:45, e na anua a lee kɔ Jɛhova tubobaloo Jizɔs nua ekobee loo bɔŋanaloo a? (b) E na alu tam Eku A Baɛbee a? (Ɛp ekpo a kura “ Tam Eku A Baɛbee.”)

¹⁴ Tɛ̄maloo waara zɔɔ a’agara, Jɛhova bee yaɛ dum ziī ziī nɛɛ a le bu bɔŋanaloo, le dɛ̄dɛɛ̄ pya dɔɔ̄na miɔŋɔ nɛɛ ba esa ba ɛrɛ yira bu Jizɔs. (Buū Maak 10:45; Doonu 20:28; 1 Kɔr 15:21, 22) Nyɔɔwo, lee kɔ a tubobaloo Jizɔs nɛɛ a bee su ye dum i aŋana kɔ alu ekobee loo bɔŋanaloo. Doodoo i nɛɛbee, Jizɔs ɛrɛ ekpo lo enɛ lok sa muɛ̄ kɔ alu esere  lok ebaɛloo ziī ziī nɛɛ, pya butɔ, le dɛ̄dɛɛ̄ bɔŋanaloo. (Gal 6:2) Mɛ a naale aba tɔ̄ lok na Jizɔs doo a. A wereloo sa kuūdɛɛ̄loo ziī ziī ii.—Ɛfɛs 5:29.

15-16. E na o nɔ aāloo pya ue wuga nɛɛwa a kura Marley le wuga nɛɛdam a kura Benjamin kɔ a?

¹⁵ Pya wuga nɛɛwa tɔgɛ kɔ ba nɛe enwadɛɛ̄ Kraist tɛ̄maloo enyɔɔnɛ tɔgɛ dee a aabah pya wuga nɛɛdam alu etubobaloo bu bɔŋanaloo kɔ ba a kuū wa dɛɛ̄ loo. Ziī wuga nɛɛwa a kura Marley a tɔɔ̄ United States su kɛ̄tɔɔ̄ pya dɔɔ̄na yere bu ye ekɛɛrɛ sɔ̄ a kɔ: “M tɔgɛ nia loo dɔ m ɛrɛ doodoo wa le wuga nɛɛwa bu bɔŋanaloo. M kiisī lo enwadɛɛ̄ nɔɔnɔɔnu Jɛhova akiiloo nɛɛ elu ekobee. Mɛ na dam le pya wuga nɛɛdam a le bu bɔŋanaloo doo kɔ lo ama a waɛ, nyɔnɛbee ba nɛ mɛ enwadɛɛ̄ sa tɔgɛ nia loo tam m si.”

¹⁶ Pya wuga nɛɛdam tɔgɛ kɔ ba dāebeeloo nɔɔnɔɔnu akiiloo nɛɛ elu ekobee tɛ̄maloo enɛ enwadɛɛ̄ sa yere ka loo pya wuga nɛɛwa. Ziī wuga nɛɛdam a kura Benjamin a tɔɔ̄ England bee kɔ: “M enɔā gbɛnɛ-edo nu aāloo ebip pya wuga nɛɛwa agara bie enɔānu le pio ue ba kɔ akiiloo kɛ̄ enɔnu sa zue ue leere doo. M muɛ̄ kɔ tam ba si dɔbiī kaāna.”

17. E na anua i nɛ enwadɛɛ̄ nɔɔnɔɔnu akiiloo nɛɛ elu ekobee a?

¹⁷ Sɔ̄ dɛ̄dɛɛ̄ nɛɛ a le bu bɔŋanaloo, lo a le pya nɛɛdam, pya nɛɛwa, pya tɛ bee tɔ, le pya kanɛɛ dābeeloo sa nɛ enwadɛɛ̄ nɔɔnɔɔnu akiiloo nɛɛ elu ekobee, dɛ̄dɛɛ̄ bɔŋanaloo egbaa le bu efɛɛloo. E lo a kuī eera, i su ka nua loo Jɛhova, i wereloo Tɛ a le li bunyɔɔ.—Yɔɔ 150:6.