1. Pio e na a dap ɛrɛ pah nyɔɔ kɛ̄ pya nɛɛdam aara wa wa le pya wa miɔŋɔ doo ani?

E NA o kɛɛrɛ kɔ lulu “ekobee” kura ani? Siga pya nɛɛdam elɛrabaloo kɔ doonu kɛnɛkɛ̄, kɛ̄ pya wa barasī wee doonu doo, ale kɛ̄ wa butɔ wee doonu doo a ɛrɛ pah nyɔɔ kɛ̄ ba aara wa wa le pya wa miɔŋɔ doo. Yere nukuādɛɛ̄ loo nu ziī wuga nɛɛwa a kura Yanita a wee tɔɔ̄ Europe kɔ ama, a kɔ: “Bie kɛ̄ m tɔɔ̄, ba wee ɛp kɔ pya nɛɛwa kiikɛ̄ loo pya nɛɛdam sa alu e’ɛp wa nua zooro.” E ziī wuga nɛɛdam a kura Luke a tɔɔ̄ United States kɔ: “Pio tɛ tɔgɛ pya wa miɔŋɔ nɛɛdam kɔ, pya nɛɛwa dap le kɛ̄ loo ɛrɛgeba nu mɛ aa lu ebuū wa ue yere dɛɛ̄ lɔgɔ nu, lo a kura kɔ wa ekɛɛrɛ naa lu nu a kuī.” Kerewo, dua elap dogo ama naa gbaaloo sīdee Jɛhova gbī kɔ pya nɛɛdam a su wa ekpo daānu. (Dooreloo Maak 7:13.) Nyɔɔwo, mɛ sīdee na nɛɛdam enɔ lo elu le tɛ bee tɔ a?

2. E na nɛɛ alu tɛ bee tɔ ɛrɛ esuā a, e e na anua a?

² Nɛɛ a gbī elu kaāna tɛ bee tɔ, ɛrɛ edasī dābeeloo nu Jɛhova ye gbī aābah. A lunage ebɛɛ̄ kɔ a suā nu anua Jɛhova bee nɛ ekpo pio nɛɛ kɔ ba a baɛbee pya dɔɔ̄na, le kɛ̄ a dap nɔ edoba Jɛhova le Jizɔs doo. E na anua alu ebɛɛ̄ kɔ nɛɛdam a suā pya nu ama ani? Nyɔnɛbee Jɛhova enɛa ekpo pya alu tɛ bee tɔ, e a ɛmadɛɛ̄ kɔ ba a su lo ekpo daānu leere.—Luk 12:48b.

3. Aāloo nu a le bu 1 Pya Kɔrint 11:3, e na i nɔ akiiloo lu tɛ bee tɔ a?

³ Buū 1 Pya Kɔrint 11:3. Dɔ ama tɔgɛ sīdee Jɛhova nɔɔ pya ye butɔ a le bunyɔɔ le kɛnɛkɛ̄. A ɛrɛ baɛ gbɛnɛ nu a le bu lulu tɛ bee tɔ, ɛɛ na nɛɛ a ɛrɛ ekpo le nɛɛ e’agara ebip bee pya ye butɔ. Jɛhova na alu “ekobee  dɛ̄dɛɛ̄ nɛɛ” a, alɛ na nɛɛ a ɛrɛ ekpo eera, sa enɛa siga ekpo pya miɔŋɔ nɛɛ le pya ɛnjɛl, e dɛ̄dɛɛ̄ aba ekɔ kɛ̄ ba su lo ekpo daānu doo ye nɛ. (Rom 14:10; Ɛfɛs 3:14, 15) Jɛhova enɛa ekpo Jizɔs kɔ a baɛbee bɔŋanaloo, kerewo Jizɔs e’agara ebip bee kɛ̄ a i aara doo. (1 Kɔr 15:27) Jɛhova enɛanage ekpo dam kɔ alu ekobee loo ye wa le pya ye miɔŋɔ, mɛ dam e’agara ebip nɛ Jɛhova le Jizɔs loo kɛ̄ a aara pya ye butɔ doo.—1 Pit 3:7.

4. Amunu ekpo na a le bah Jɛhova le Jizɔs a?

⁴ Doodoo nɛɛ alu ekobee loo dɛ̄dɛɛ̄ butɔ a le bu nyɔuwe, Jɛhova ɛrɛ ekpo lo enɛ lok kiiloo kɛ̄ pya ye miɔŋɔ etɔɔ̄ dum doo, e a dap doo kɔ ba a doo dookɛ̄ a gbī doo. (Ais 33:22) Doodoo nɛɛ alu ekobee loo bɔŋanaloo, Jizɔs ɛrɛ ekpo lo enɛ lok sa a muɛ̄ kɔ alu enyɔɔnɛ.—Gal 6:2; Kɔl 1:18-20.

5. Amunu ekpo na Nɛɛ Kraist alu tɛ bee tɔ ɛrɛ a, e mɛ kɛ̄ na ye ekpo ina yira a?

⁵ Bu nyɔnyɔɔnɛ edoba Jɛhova le Jizɔs, Nɛɛ Kraist alu tɛ bee tɔ ɛrɛ ekpo lo ebiaɛfii nu pya ye tɔ edoo. (Rom 7:2; Ɛfɛs 6:4) Kerewo, ye ekpo ɛrɛ kɛ̄ a ina yira. Bu edoba, lok a nɛ ɛrɛ edɛɛa nyɔɔ pya daakuu a le bu Muɛ̄ Ue Bari. (Kam 3:5, 6) E nɛɛ alu tɛ bee tɔ naa ɛrɛ ekpo enɛ lok pya a naa nuuna ye butɔ. (Rom 14:4) Gbaāloo wo, sɔ̄ pya ye miɔŋɔ nɛɛdam le miɔŋɔ nɛɛwa enyima tura nɛɛ sa ba naa ye lena kpaɛ̄ tɔ, ba ekiisī lo enwa ye dɛɛ̄, mɛ ba naa ye lena kɛɛ̄.—Mat 19:5.

6. E na anua Jɛhova bee nɔɔ nɛɛ elu ekobee a?

⁶ Jɛhova bee nɔɔ nɛɛ elu ekobee nyɔɔbee a wereloo pya ye butɔ. Alu dɔɔ̄nu a ye aabah. Ɛ’ɛrɛ nɛɛ alu ekobee doo kɔ butɔ Jɛhova a le bu efɛɛloo sa le nyɔɔ etaā. (1 Kɔr 14:33, 40) Lo a naa bee lu edābeeloo nɛɛ a bɔloo kɔ alu ekobee, butɔ Jɛhova ebee lagara sa naale bu ɛɛbu. Bu edoba, lɔgɔ nɛɛ naale ebee suā nɛɛ a bɔloo kɔ a nɛ kpɛdumɛ biaɛfii le nɛɛ emuɛ̄ kɔ alu edoo pya nu a bee lu ebiaɛfii a.

7. Dookɛ̄ Pya Ɛfɛsɔs 5:25, 28 kɔ doo, Jɛhova gbī kɔ pya dam a aara wa wa doodoo wa?

⁷ Lo a le nɔɔnɔɔnu Bari kɔ nɛɛdam alu ekobee lu nu a lee, e na anua gbɛnɛ-edo pya nɛɛwa kɛɛrɛ kɔ wa dam gaa wa biinɛ nɛkɛ̄ sa wa baɛbee yeekɛ̄ ani? Nu anua na bee gbɛnɛ-edo pya nɛɛdam kiī pya daakuu Jɛhova akiiloo butɔ sa sagɛ lo enyɔɔnɛ wa doonu kɛnɛkɛ̄ ale doonu wa barasī. Ba dapnage aara wa wa bu pɔrɔ sīdee lo emmɛɛ̄ alaba pɔrɔ taɛ. Bu edoba, dam dap su e’agabah aā ye wa lo etɔgɛ pya dɔɔ̄na kɔ alue “kagbara nɛɛ.” A dap kɛɛrɛ kɔ a naale edabe su bah ekpo aā ye wa kɔ a weree ye loo, mɛ a dabe doo kɔ a ɛrɛe ye bɔɔ loo. E a dap su bɔɔ ye wa ye ɛrɛ loo a, nua sīdee a ye su aāna. * Dua ekɛɛrɛ le dogo ama naa doo kɔ pya nɛɛwa a ɛrɛ ka le enwadɛɛ̄ a wa kuu, e alu kiiyasī loo nu Jɛhova gbī.—Buū Pya Ɛfɛsɔs 5:25, 28.

8. Bu mɛ sīdee na nɛɛdam dap nɔ lo elu le tɛ bee tɔ a?

⁸ Nɛɛdam dap nɔ lo elu le tɛ bee tɔ tɛ̄maloo enɔ sīdee Jɛhova le Jizɔs su  wa ekpo daānu. Naa kɛɛrɛbu baɛ elap dogo Jɛhova le Jizɔs bee tɔgɛ, sa yere nukuādɛɛ̄ loo kɛ̄ nɛɛ alu tɛ bee tɔ dap tɔgɛ lo ba ama sɔ̄ a gaa nyɔɔnɛ ye wa le pya ye miɔŋɔ danianu doo.

9. Mɛ sīdee na Jɛhova tɔgɛ kumalookɛ̄ a?

⁹ Kumalookɛ̄. Jɛhova na Nɛɛ a suā nu ee dɛ̄dɛɛ̄ nɛɛ a; kerewo, a gbaɛ̄tɔ̄loo nu alu ekɛɛrɛ pya ye zooro. (Jɛn 18:23, 24, 32) A lɛɛnage baloo pya a ye le kɛɛ̄ kɔ ba a kɔ nu ba kɛɛrɛ. (1 Mɛnɛ 22:19-22) Jɛhova lu nɛɛ a mmana, kerewo a naa ɛmadɛɛ̄ kɔ i doonu doodoo pya a mmana anyaawo. Taāwo, a yerebah nɛ pya nɛɛ a naa mmana ba ye taāŋabah kɔ ba a kiisī leere. (Yɔɔ 113:6, 7) Bu kaka, Baibol kɔ Jɛhova lu “nɛɛ yerebah.” (Yɔɔ 27:9; Hib 13:6) Mɛnɛ Devid kɔ a bee dabe si gbɛnɛ tam a bee lu enɛe ye nyɔnɛbee Jɛhova bee kumalookɛ̄ sa ye yereebah nɛ.—2 Sam 22:36.

10. Bu mɛ sīdee na Jizɔs tɔgɛ kumalookɛ̄ a?

¹⁰ Naa kɛɛrɛbu edoba Jizɔs. Kereadoo alɛ na a bee lu Tɛtɔ pya a wee ye nyɔɔnɛ dumɛ a, a bee wa log tɔ. Ziī e na anua Jɛhova ɛm lo ama sere bu Baibol ani? Lɔgɔ baɛbaɛ beenyiɛ naale loo kɔ a gbī kɔ dɛ̄dɛɛ̄ nɛɛ gbaānage loo pya alu tɛ bee tɔ a nyɔɔnɛ edoba ama. Jizɔs bee kɔ: “M enɛa i edoba, lokwa bui doo dookɛ̄ m edoora i nɛ doo.” (Jɔn 13:12-17) Kereadoo Jizɔs ɛrɛ gbɛnɛ ekpo, a naa bee ɛmadɛɛ̄ kɔ pya dɔɔ̄na a sie tam ye nɛ. Taāwo, a wee si tam nɛ pya dɔɔ̄na.—Mat 20:28.

11. E na tɛ bee tɔ dap nɔ akiiloo kumalookɛ̄ aābah Jɛhova le Jizɔs a?

¹¹ Nu i nɔ aāloo. Nɛɛ alu tɛ bee tɔ dap tɔgɛ kumalookɛ̄ bu gbɛnɛ-edo sīdee. Bu edoba, a naale e ɛmadɛɛ̄ kɔ ye wa le pya ye miɔŋɔ naale etɛɛ̄ ekwɔ. A gbaɛ̄tɔ̄loo sɔ̄ pya ye butɔ tura ekɛɛrɛ, kere a naale taɛ kɛ̄ alɛ kɛɛrɛ doo. Marley a wee tɔɔ̄ United States bee kɔ: “Pio sɔ̄ na dam le mm ii wee yiga aba nu. Mɛ m muɛ̄ kɔ a tɔgɛ mɛ nia loo sa mɛ nwadɛɛ̄, nyɔɔbee a wee bip nu m kɛɛrɛ sa sueloo kɛ̄ kɛɛrɛbu loo kaāna lɛɛ a gae biaɛfii.” Gbaāloo wo, dam a kumalookɛ̄ ekpɛ̄naloo esitam butɔ, kereadoo pya ye buɛ̄ wee ɛp kɔ ɛɛ tam pya nɛɛwa. Lo ama  dap aga edoo. E na anua a? Ziī wuga nɛɛwa a kura Rachel kɔ: “Bu buɛ̄ m aa, lo a le dam yerebah nɛ ye wa sa log bu fɛrɛ ale kpaɛ kɛ̄tɔ, pya ye nɛɛ kɛ̄ zɔŋɔ le pya ye manamana wee ɛp kɔ ɛɛ ‘faa nɛɛdam.’ Ba wee kɛɛrɛ kɔ ye wa ɛrɛ ye bah ekpo loo.” Lo a le pya a le kɛ̄ o tɔɔ̄ ɛp doo wo, nyɛŋiabu kɔ Jizɔs bee log tɔ pya a wee ye nyɔɔnɛ dumɛ kereadoo alu tam pya zooro wee si. Nɛɛ alu kaāna tɛ bee tɔ naa wee kɛɛrɛ nu elee loo aba ɛɛ, mɛ a wee kɛɛrɛ nu edoo sa ye wa le pya ye miɔŋɔ le bu ɛɛbu. Gbaāloo kumalookɛ̄, dɔɔ̄na amunu elap na alu ebɛɛ̄ kɔ kaāna tɛ bee tɔ a ɛrɛ ani?

12. Wereloo zū Jɛhova le Jizɔs kɔ ba a doo wa?

¹² Wereloo. Wereloo na a zū Jɛhova bu dɛ̄dɛɛ̄ nu a doo a. (1 Jɔn 4:7, 8) A nɛ i pya nu a i bɛɛ̄ bu edɔɔ̄ tɛ̄maloo ye Muɛ̄ Ue lo a le Baibol, le ye bɔŋanaloo. A kuū i dɛɛ̄loo sa doo kɔ i suā kɔ a weree i loo. E pya i ebɛɛ̄ bu namloo ni a? Jɛhova “nɛ [i] dɛ̄dɛɛ̄ nu zɔ kɔ i ɛɛŋa nyɔɔ.” (1 Tim 6:17) A kɔgara i ue sɔ̄ i tɛɛ̄ ekwɔ, mɛ a naa ɔbɛ ewere i loo. Jɛhova nɔɔ kɔ alu e’agara i nyɔɔbee a were i loo. E Jizɔs were i loo kaāna mmɛ lo dɔ a i u bee. (Jɔn 3:16; 15:13) Lɔgɔ nu naa dap kpaɛ̄ Jɛhova le Jizɔs lɛɛ loo ewereloo pya a wa tɔɔ̄ nɛ.—Jɔn 13:1; Rom 8:35, 38, 39.

13. E na anua alu ebɛɛ̄ kɔ tɛ bee tɔ a wereloo ye butɔ a? (Buū ekpo a kura “ E na Nɛɛ A Ii Wa Aā Edoo Lokwa Ye Wa Ye Nɛ Enwadɛɛ̄ A?”)

¹³ Nu i nɔ aāloo. Lee kɔ wereloo a zū tɛ bee tɔ bu ɛrɛgeba nu aa doo. E na anua lo ama lu ebɛɛ̄ ani? Nɛɛ lɛɛratam Jɔn ture kɔ: “Nɛɛ a naa wereloo ye wuga [ale butɔ] lo a emɔna, naale edap wereloo Bari lo a naa bee muɛ̄ lɔgɔ sɔ̄.” (1 Jɔn 4:11, 20) Lu kaka kɔ nɛɛ a wereloo pya ye butɔ sa gbī enɔ Jɛhova le Jizɔs enɛ nu alu ebɛɛ̄ bu edɔɔ̄ le bu namloo pya ye butɔ, sa doo kɔ loo wa a sukɛ̄. (1 Tim 5:8) Ekpɔā pya ye miɔŋɔ sa wa zuurabahtɔ̄ sɔ̄ a bɔloo. E kiinage  sī bu enɔ lo ebiaɛ nu fii bu sīdee enɛ ka Jɛhova sa dɔbiī nɛ ye butɔ. Doraa i kɛɛrɛbu ziī ziī nu alu egbī ye aābah sa ɛp kɛ̄ nɛɛ alu tɛ bee tɔ edap nɔ Jɛhova le Jizɔs doo.

14. Bu mɛ sīdee na tɛ bee tɔ enɛ nu alu ebɛɛ̄ bu edɔɔ̄ pya ye butɔ a?

¹⁴ Nɛ nu alu ebɛɛ̄ bu edɔɔ̄ pya ye tɔ. Bu nɔnɔ ye Tɛ, Jizɔs bee gbī muɛ̄ kɔ pya a ye le kɛ̄ bah a le bu nwanaloo bu edɔɔ̄. (Mat 5:3, 6; Maak 6:34) Bu aba lo sīdee, tua nu tɛ bee tɔ esu seea sī na nɛnɛ nu alu ebɛɛ̄ bu edɔɔ̄ pya ye butɔ. (Deut 6:6-9) E doo lo ama tɛ̄maloo enyɔɔnɛ pya ye butɔ buū sa nɔ Muɛ̄ Ue Bari, si enɔānu, zue le yereue, wu sa agɛrɛtɛ̄ wa gbanialoo kumaloo Jɛhova.

15. Ziī amunu sīdee na tɛ bee tɔ etɔgɛ kɔ a kɛɛrɛe kɛ̄ nu tɔɔ̄loo pya ye tɔ doo a?

¹⁵ Kɛɛrɛ kɛ̄ nu tɔɔ̄loo pya ye tɔ doo. Jɛhova bee kɔ bie taɛkɛ̄ kɔ a wereeloo Jizɔs. (Mat 3:17) Jizɔs bee tɔgɛ kɔ a wereeloo pya a wee ye nyɔɔnɛ dumɛ tɛ̄maloo nu a kɔ le nu a doo. E pya a wee ye nyɔɔnɛ dumɛ bee tɔgɛnage kɔ ba weree ye loo. (Jɔn 15:9, 12, 13; 21:16) Tɛ bee tɔ dapnage tɔgɛ ye wa le pya ye miɔŋɔ kɔ a weree wa loo tɛ̄maloo nu a doo, lo a le nyɔɔnɛ wa nɔ Baibol. A bɔnage loo kɔ a kɔ wa nɛ kɔ a weree wa loo sa wa tɔgɛ nia loo, e sɔ̄ a bɔloo, a kaɛgɛ nage wa bie kɛ̄sī pya dɔɔ̄na.—Kam 31:28, 29.

16. Dɔɔ̄na e na nɛɛ alu tɛ bee tɔ edoo a, e mɛ sīdee na edap doo bu kuūnadɛɛ̄ a?

¹⁶ Nɛ nu alu ebɛɛ̄ bu namloo pya ye tɔ. Jɛhova bee nɛ nu a bɛɛ̄ pya Izrɛl, kere sɔ̄ a bee wa kpɔteloo nyɔɔ wa lɛɛbeekɛɛ̄. (Deut 2:7; 29:5) A nɛnage i pya nu alu i ebɛɛ̄ anii’ee. (Mat 6:31-33; 7:11) Bu aba lo sīdee Jizɔs bee nɛ nuede pya a wee ye nyɔɔnɛ dumɛ. (Mat 14:17-20) A bee bonage pya loo naa nwaɛ̄. (Mat 4:24) Lo edoo nu enia Jɛhova, tɛ bee tɔ ɛrɛ enɛ nu alu ebɛɛ̄ bu namloo pya ye butɔ. Kerewo, a ɛrɛ edoo bu sīdee a kuūnadɛɛ̄. Aa su dɛ̄dɛɛ̄ ye sɔ̄ siātam lo enɛ nu bu namloo pya ye tɔ mmɛ kɛ̄ a naa kuūnadɛɛ̄ loo wa ebɛɛ̄ bu edɔɔ̄ le kɛ̄ nu wa tɔɔ̄loo doo.

17. Amunu edoba na Jɛhova le Jizɔs sere kɛ̄ bu sīdee ba i kpɔā sa i zuurabahtɔ̄ a?

¹⁷ Kpɔā wa. Jɛhova kpɔā i sa i zuurabahtɔ̄ nyɔɔbee a gbī kɔ nu a lee i loo. (Hib 12:7-9) Doodoo ye Tɛ, Jizɔs kpɔā pya a ye le kɛɛ̄ bu sīdee wereloo le loo. (Jɔn 15:14, 15) Wee wa zuurabahtɔ̄ kaāna bu sīdee alu fɛgɛ. (Mat 20:24-28) A dābeeloo kɔ ii mmana sa i wee nwaabah tɛɛ̄ ekwɔ.—Mat 26:41.

18. E na nɛɛ alu le tɛ bee tɔ ɛrɛ enyɛŋiabu a?

¹⁸ Tɛ bee tɔ a nɔ Jɛhova le Jizɔs ɛrɛ  enyɛŋiabu kɔ ye wa le pya ye miɔŋɔ naa mmana. A naale esi “saŋ” yeekɛ̄ pima ye wa le pya ye miɔŋɔ. (Kɔl 3:19) Taāwo, e su zuurabahtɔ̄ a le bu Pya Galetia 6:1 daānu sa a piiga lo elere wa dee bah “bu edɔɔ̄ fɛgɛ dogo,” lɛɛ a nyɛŋianage bu kɔ alɛ naa mmanae. Doodoo Jizɔs, a suā kɔ kaāna sīdee etɔgɛ nu na tɛ̄maloo sere edoba.—1 Pit 2:21.

19-20. Sɔ̄ tɛ bee tɔ aa biaɛ nu fii, bu mɛ sīdee na e nɔ Jɛhova le Jizɔs ani?

¹⁹ Biaɛ nu fii bu sīdee wiibu naale loo. Jɛhova wee biaɛ nu fii bu sīdee elee loo pya dɔɔ̄na. Bu edoba, a bee biaɛfii lo edɛm pya nu a le dum naale nyɔɔ alɛɛ leeloo, mɛ lokwa i ye yɔ ɛrɛ ekpeloo loo dum. Lɔgɔ nɛɛ naale ebee ye dap su bah ekpo aā kɔ a nɛ ye Nwiīnɛɛdam kɔ a u i bee lo e’uu i pɔrɔ. Mɛ a bee doo wo nyɔɔbee a gbī kɔ i ɛrɛ biī aāloo lo waara zɔɔ. Jizɔs bee biaɛnage nu fii bu sīdee a dɔbiī nɛ pya dɔɔ̄na. (Rom 15:3) Bu edoba, kere loo ye bee le e’ɔ, a bee biaɛfii lo etɔgɛ nu gbɛnɛ eku nɛɛ taā a seea.—Maak 6:31-34.

²⁰ Kaāna tɛ bee tɔ wee suā kɔ ziī gbɛnɛ nu a aga edoo na biaɛ nu fii bu sīdee elee loo pya ye butɔ, e a naa wee su biā bii. A naa wee biaɛ nu fii dɛɛa nyɔɔ aba alɛɛ ekɛɛrɛ ale kɛ̄ nu ye tɔɔ̄loo doo. Taāwo, a lɛɛbaloo kɔ Jɛhova a tɔgɛe ye nu. * (Kam 2:6, 7) Bu lo sīdee, ekɛɛrɛbu lo edoo nu elee loo pya dɔɔ̄na, e a naale aba ɛɛ.—Fil 2:4.

21. E na i gaa le nɔ bu ekobee ue enyɔɔnɛ a?

²¹ Jɛhova enɛa gbɛnɛ tam pya tɛ bee tɔ, e ba e’agara ebip bee kɛ̄ ba si doo. Mɛ lo dam piiga lo enyɔɔnɛ edoba Jɛhova le Jizɔs, elu kaāna tɛ bee tɔ. E lo ye wa doo nu a ye kuu, wa iya dam le wa ele bu ɛɛbu. Wa e’ɛp ye dam doodoo nɛɛ alu ekobee loo butɔ doodoo wa, e amunu nu finiabah na a le bu ani? Elu e’agara pya ebip ama bu ekobee ue enyɔɔnɛ.