1-2. (a) Ena anua a’agaloo gbɛnɛ-edo nɛɛ anii’ee lo eture nyiɛ loo pya a le dɔ ekpo a? (b) Ena i nɔ bu ekobee ue ama a?

 A AGALOO gbɛnɛ-edo nɛɛ lo eture nyiɛ loo pya a le dɔ ekpo anii’ee. Ba emɔna kɔ pya biaɛ le pya bɛbɛɛ kpega pya mɛnɛ le pya a ɛrɛ ekpo sa aara pya kporo bu pɔrɔ sīdee. Baibol kɔ leere sɔ̄ a kɔ: “Nɛɛ ɛrɛ ekpo loo nɛɛ yɛrɛ le loo edoo ye.” (Eklis 8:9) Gbaāloo wo, siga pya zaāsī yigabari aa dogi pya nu a naa lee, e lo ama edora kɔ pio nɛɛ aa dapna dɛrɛ nyiɛ nyɔɔ Bari. Nyɔɔwo, sɔ̄ ziī nɛɛ yiga kɔ i nyɔɔnɛ ye nɔ Baibol, alu ebɛɛ̄ kɔ i yerebah ye nɛ kɔ a ture nyiɛ loo Jɛhova le pya a tubobaloo a nyɔɔ kɛnɛkɛ̄.

² Kɛādoo, naale aba pya a gaa nɔ Baibol na alu ebɛɛ̄ kɔ ba a ture nyiɛ loo Jɛhova sa turenage nyiɛ loo ye bɔŋanaloo a. Kere i etaāŋabah Jɛhova bu gbɛnɛ-edo zua, i ɛrɛ ekiisī lo edɛrɛ nyiɛ nyɔɔ kɔ kɛ̄ Jɛhova doo nu doo na a lee eera a. Pio sɔ̄, kɛ̄tɔɔ̄ dap doā-ɛp kɛ̄ i ye dɛrɛ nyiɛ nyɔɔ doo. Bu ekobee ue ama, i nɔ nu akiiloo taa kɛ̄tɔɔ̄ a dap doā-ɛp i yira: (1) sɔ̄ i buū pio eloh a le bu Baibol, (2) sɔ̄ bɔŋanaloo Jɛhova i nɛ leredeebah, le (3) sɔ̄ i kpesī taāŋa li deesī.

3. Bu mɛ sīdee na pio nu i buū a le bu Baibol dap doā-ɛp kɛ̄ i ture nyiɛ loo Jɛhova doo a?

 ³ Sɔ̄ i aa buū Muɛ̄ Ue Bari, i dap bip ebip loo sīdee Jɛhova bee nyɔɔnɛ pio nɛɛ danianu le siga biaɛfii a bee  doo. Bu edoba, bu kpa Buā, Jɛhova bee kɔ alu efɛ ziī nɛɛ Izrɛl a bee kpaɛ kaāni nyɔɔ Dee Fɛɛrɛloo. I muɛ bu eree baɛ kpa Samuel kɔ, sɔ̄ pio zua etɛ̄na, Jɛhova bee aaloo nɛ Mɛnɛ Devid sɔ̄ a bee kue wa sa fɛnage nɛɛ. (Buā 15:32, 35; 2 Sam 12:9, 13) I dap bura kɔ: ‘Ena anua Jɛhova bee aaloo nɛ Devid sɔ̄ a bee su wa dɔɔ̄na nɛɛ sa fɛnage nɛɛ a, kerewo, a bee kɔ alu efɛ gbara pɔrɔ a bee si bee bee kɔ a naa aadee bee piya gbɛnɛ a?’ Lo e’agara ebip ama, naa ɛp taa nu a lee kɔ i seea nyiɛ sɔ̄ i aa buū Baibol.

4. Bu mɛ sīdee na Jɛnɛsis 18:20, 21 le Deuteronomi 10:17 doo kɔ i agɛrɛbah dɛrɛ nyiɛ nyɔɔ pya biaɛ Jɛhova a?

⁴ Naale dɛ̄dɛɛ̄ sɔ̄ na Baibol wee kɔ dɛ̄dɛɛ̄ nu a bee sira bu ziī kɛ̄tɔɔ̄ a. Bu edoba, i suā kɔ Devid bee kiiya kaāna aābu ye beenyiɛ loo nu a bee doo. (Yɔɔ 51:2-4) Mɛ nɛɛ a bee dɔ lok Dee Fɛɛrɛloo bee le mɛ dua nɛɛ ni? A bee ɛrɛge ekiɛ̄nu loo nu a bee doo ni? Ekɔ ebee lɛɛbeekɛɛ̄ lok Jɛhova sɔ̄ akii adumɛ ni? Ekɔ a ɛrɛ sɔ̄ a bee ɛp tɛrɛ ale kiī zuurabahtɔ̄ a bee lu enɛ ye sɔ̄ akii adumɛ ni? Baibol naa kɔ. Kerewo, i suā leere kɔ: Jɛhova “naa ɛrɛ doo gbee.” (Deut 32:4) Ye biaɛ wee dɛɛa nyɔɔ nu alu kaka, e a naa wee dɛɛa nyɔɔ bakɔ ue, ɛp sī nɛɛ ale nyɔɔ ɛrɛgeba dɔɔ̄na nu a wee doo kɔ miɔŋɔ nɛɛ aa dap biaɛ kaāna biaɛ. (Buū Jɛnɛsis 18:20, 21; Deuteronomi 10:17.) Kɛ̄ i kiisī lo enɔ nu akiiloo Jɛhova le ye daakuu doo, kɛ̄ i dɛrɛnage nyiɛ nyɔɔ pya ye biaɛ doo lo. Kere ii ɛrɛ ture loo pya ebip i bip kiiloo pya nu i buū aābu Baibol anyaawo, a ɛrɛ gbɛnɛ-edo nu a doo kɔ i suā kɔ ilii Bari lu “nɛɛ kaāna dogo bu dɛ̄dɛɛ̄ ye dee.”—Yɔɔ 145:17.

5. Mɛ sīdee na i kɛ̄tɔɔ̄ a naa mmana ɛrɛ pah nyɔɔ kɛ̄ i biaɛ nu doo a? (Buū ekpo a kɔ “ Kɛ̄tɔɔ̄ Kɔ Ii Mmana Ɛrɛ Pah Nyɔɔ Kɛ̄ I Ɛp Kaāna Biaɛ Doo.”)

⁵ I kɛ̄tɔɔ̄ a naa mmana ɛrɛ pah nyɔɔ kɛ̄ i ɛp kaāna biaɛ doo. Bari bee i dɛm bu ye bera, nyɔɔwo i gbī kɔ alu e’aara pya nɛɛ bu sīdee a lee. (Jɛn 1:26) Kerewo, nyɔnɛbee ii mmana a, i dap biaɛ biaɛ bu sīdee a naa lee, kere sɔ̄ i kɛɛrɛ kɔ i suā dɛ̄dɛɛ̄ nu akiiloo lo ue. Bu edoba, naa kɛɛrɛ kɛ̄ Jona bee ɛrɛ saŋ doo sɔ̄  Jɛhova bee biaɛfii lo e’ɛrɛ toesaɛ̄ loo pya Neneve. (Jona 3:10–4:1) Kerewo, naa kɛɛrɛ nu a bee sira aabu. Bee lu ekpɔā dum nu a eeloo 120,000 pya Neneve lo ba bee kiiya! A bee sira kɔ Jona na a bee biaɛ pya nɛɛ bu elɔ sīdee a, e a naale Jɛhova.

6. Ena anua Jɛhova naa ɛrɛge edasī i baatɛ̄ nɛ nu anua a biaɛfii lo edoo ziī nu a?

⁶ Naa lu ebɛɛ̄ kɔ Jɛhova a dasī baatɛ̄ nɛ pya nɛɛ nu anua a biaɛfii lo edoo ziī nu. Lu kaka kɔ, sɔ̄ akii adumɛ Jɛhova wee nɛ dee pya ye zooro kɔ ba a kɔ nu alu wa ekɛɛrɛ kiiloo ziī biaɛfii a bee doo ale lo aa gbī edoo. (Jɛn 18:25; Jona 4:2, 3) E a ɛrɛ pio sɔ̄ a wee kɔ nu anua a bee doo ziī nu ale nu anua a gbī edoo ziī nu. (Jona 4:10, 11) Kerewo, a naa lu ebɛɛ̄ kɔ Jɛhova a dasī i kɔ nɛ pya nu anua a bee doo ziī biaɛfii. Doodoo Nɛɛ A Bee I Dɛm, naa lu ebɛɛ̄ kɔ a dasī bara ekpo i aābah lɛɛ a gae doo ziī nu ale sɔ̄ edora sah.—Ais 40:13, 14; 55:9.

7. Amunu nu finiabah na i dap kpesī a, e ena anua a?

⁷ I yiga kaāna kɔ Jɛhova wee doo nu a lee dɛ̄dɛɛ̄ sɔ̄. Kerewo, nu a dap i agaloo pio sɔ̄ na ture nyiɛ loo pya nɛɛ a tubobaloo. I dap bura lo pya alu etubobaloo bu bɔŋanaloo aa dooge nu dɛɛa nyɔɔ leredeebah a aabah Jɛhova sɛh ba gaa doo dookɛ̄ a wa nia doo. Naadaba kɛ̄ pio nɛɛ a bee le bu sɔ̄ a bee lu e’ɛm Baibol bee kɛɛrɛnage doolo. Naa kɛɛrɛ pya edoba a bee lu enɛ bu  3 barakpaɛ̄ loo ekobee ue ama. Ziī nɛɛ alu manamana nɛɛ a bee dɔ lok Dee Fɛɛrɛloo dap kɛɛrɛ kɔ: ‘Mozis bee dagesī bip ue aānu Jɛhova lɛɛ a gae kɔ alu etubo ye dɛm ni?’ E nɛɛ alu gbo Uria nɛɛ Het lo ye wa bee nyɔɔnɛ Devid kunagā, dap kɛɛrɛ kɔ Devid bee su ye dɔ ekpo doodoo mɛnɛ buɛ̄ daā kɔ aa lu ebiaɛ luh ye nɛ. Alu kaka kɔ, ii le edap kɔ i turee nyiɛ loo Jɛhova sɔ̄ ii ture nyiɛ loo pya nɛɛ a tubobaloo a nyɔɔ kɛnɛkɛ̄, lo ba lu pya Jɛhova dɛrɛ nyiɛ nyɔɔ.

8. Amunu bera na a le yɛɛ ue a le bu kpa Doonu 16:4, 5 le kɛ̄ bɔŋanaloo Pya Nɛɛ Kraist aa kiā doo anii’ee a?

⁸ Nii’ee, Jɛhova aa zaāsī ye bɔŋanaloo a le a kɛnɛkɛ̄ tɛ̄maloo ye “zooro a bɔloo ture nyiɛ loo sa suānu.” (Mat 24:45) Dookɛ̄ eku a baɛbee bu tua sɔ̄ o’oo tup zua wee doo, zooro ama aa kuūdɛɛ̄loo pya nɛɛ Bari bu yube nyɔuwe sa nɛ leredeebah pya kanɛɛ a le bu bɔŋanaloo. (Buū Doonu 16:4, 5.) Lɛɛ pya kanɛɛ doo nu a bee lu ekɔ ba a doo bu bɔŋanaloo. I tɔgɛ kɔ i turee nyiɛ loo sīdee Jɛhova doo nu tɛ̄maloo egbaɛ̄tɔ̄loo leredee a aabah bɔŋanaloo le pya kanɛɛ.

9. Mɛ sɔ̄ na edap i agabah egbabeebah biaɛfii pya kanɛɛ a, e ena anua a?

⁹ Pio sɔ̄, a dap i agabah egbabeebah biaɛfii pya kanɛɛ. Bu edoba, bu aā sɔ̄ ama, elua enyaana baloo gbɛnɛ-edo bɔŋanaloo le sɛkiut. Bu pio kɛ̄tɔɔ̄, pya kanɛɛ ekɔa nɛ siga pya zue ue kɔ ba a kii dɔɔ̄na bɔŋanaloo nɛɛ naa mma lokwa pio kasi a bee le ekonyɔɔ dap lu esu daānu leere bu pya i Tɔ Nɔnu Buɛ̄-mɛnɛ. Lo alu ekɔ i nɛ kɔ i kii ziī aā bɔŋanaloo, a dap i agabah lo e’aa kpaɛ̄ pya i gbo le pya i butɔ. Ekɔ Bari na a wee kɔ kɛ̄ pya kanɛɛ eyere ziī ziī nɛɛ zue ue ture ani? Eeye. E taɛ nu anua edap i agabah enyɔɔnɛ dua leredeebah a le doo wo lo. Mɛ Jɛhova dɛrɛ nyiɛ nyɔɔ pya kanɛɛ kɔ  ba dap doo pya biaɛfii a le doo wo, e a bɔloo kɔ ili i dɛrɛnage wa nyiɛ nyɔɔ. *

10. Dookɛ̄ Pya Hibru 13:17 kɔ doo, ena anua i gbabeebah pya kanɛɛ a?

¹⁰ Ena anua i gbabeebah pya kanɛɛ sa yerekpotɛ̄ wa biaɛfii kere sɔ̄ a bee kɔ wa biaɛfii naa su i loo ale a naa nia i a? Nu anua na bee, dodoo wo eyerebah doo kɔ gbaaloo a bia yɛɛ pya nɛɛ Bari. (Ɛfɛs 4:2, 3) Bɔŋanaloo wee kiisī leere sɔ̄ dɛ̄dɛɛ̄ nɛɛ a le bu gbabeebah biaɛfii pya kanɛɛ. (Buū Pya Hibru 13:17.) E lo a kuī eera na kɔ, i gaa tɔgɛ Jɛhova kɔ i dɛrɛe ye nyiɛ nyɔɔ sɔ̄ i gbabeebah pya alɛ dɛrɛ nyiɛ nyɔɔ kɔ ba a kuū i dɛɛ̄ loo.—Doonu 20:28.

11. Ena edap i yerebah nɛ kɔ i agɛrɛtɛ̄ kɛ̄ i dɛrɛ nyiɛ nyɔɔ leredeebah i ɛrɛ aābah pya kanɛɛ doo a?

¹¹ I dap agɛrɛtɛ̄ kɛ̄ i dɛrɛ nyiɛ nyɔɔ leredeebah pya kanɛɛ nɛ doo, tɛ̄maloo enyɛŋiabu kɔ ba wee dasī yere kara sa bara kaɛ edɔɔ̄ a aabah Bari sɔ̄ ba gaa kɔnia pya ue a kuu bɔŋanaloo. Ba wee kuūdɛɛ̄kɛ̄ gbī pya daakuu Baibol sa gbīnage pya leredeebah elua enɛ tɛ̄mabah bɔŋanaloo Jɛhova. Taɛ nu ba wee seeasī na lo edoo nu enia Jɛhova le nu elee loo pya ye nɛɛ kaāna. Pya nɛɛ a bɔ ture nyiɛ loo ama suā kɔ ba e’agara ebip nyɔɔ kɛ̄ ba aabaloo wa tam doo. (1 Pit 5:2, 3) Naa kɛɛrɛ lo ama: Nyɔuwe ama naa gbaaloo ziī nyɔɔbee pya nɛɛ aa keekee kɛ̄, le bu keekee yigabari sa le bu bira bɛbɛɛ, kerewo, pya nɛɛ Jɛhova gbaaloo bu taāŋabah aba lo kaka Bari. Aba nu a doo kɔ lo ama a waɛ na kɔ Jɛhova aa yerekpotɛ̄ ye bɔŋanaloo!

12. Pya amunu nu na pya kanɛɛ ɛrɛ edasī kɛɛrɛbuloo sɔ̄ ba gaa ɛp lo a le ziī nɛɛ ekiiyage kaāna a?

¹² Jɛhova esua gbɛnɛ tam a kuī nɛ pya kanɛɛ, kɔ ba a doo kɔ bɔŋanaloo a bia ɛɛ. Lo a le ziī Nɛɛ Kraist si gbɛnɛ pɔrɔ, Jɛhova ɛmadɛɛ̄ kɔ pya kanɛɛ a ɛp bu lo ue sa biaɛfii lo a le ebɔgeloo kɔ lo nɛɛ a kiisī lo ele bu bɔŋanaloo. Ziī nu ba edoo na gbītɛ̄ lo a le lo nɛɛ ɛrɛge kaāna ekiɛ̄nu loo nu a bee doo naa e. A dap doodoo bee ekiiyae, mɛ ekɔ a baageloo nu a bee doo kaāna ni? E biaɛrage fii kɔ a naale edooena lo pɔrɔ dɔɔ̄na sɔ̄ ni? Lo a le yii pɔrɔ gbo na a bee doo kɔ a si lo pɔrɔ a, a kpɛ̄nageloo elɛɛbaloo pya lo gbo ni? Pya kanɛɛ wee yere kara kiiloo lo ue, sa ɛp bu lo ue dɛɛa nyɔɔ pya nu Baibol kɔ le kɛ̄ nɛɛ a bee si pɔrɔ a doo dogo kiiloo pɔrɔ a bee si a doo. Lɛɛ ba biaɛfii lo a le ebɔgeloo kɔ nɛɛ a bee si pɔrɔ a, a kiigesī lo ele bu bɔŋanaloo. Siga sɔ̄, a ɛrɛ elu ekpo ye lɛɛ bu bɔŋanaloo.—1 Kɔr 5:11-13.

13. Ena i dap kɛɛrɛ lo alu ekpo ziī i gbo ale i manamana lɛɛ bu bɔŋanaloo a?

¹³ Bu mɛ sīdee na kɛ̄ i dɛrɛ nyiɛ nyɔɔ pya kanɛɛ doo dap lu edoā-ɛp a? Sɔ̄ nɛɛ alu ekpo naale i gbo ale ziī i manamana, a dap i waɛbah enwaabah su baɛbah suā biaɛfii pya kanɛɛ doo. Mɛ naa su kɔ lo nɛɛ alu ekpo lu nɛɛ a i tɔɔ̄ waɛloo kaāna. I dap kɛɛrɛ kɔ pya kanɛɛ naa bee dasī ɛp bu lo ue leere, ale i dap kɛɛrɛ lo pya kanɛɛ biaɛge lo ue dookɛ̄ Jɛhova ebee biaɛ doo. Ena edap i yerebah nɛ kɔ i su baɛbah suā lo biaɛfii a?

14. Ena edap i yerebah nɛ lo a le biaɛfii pya kanɛɛ doo ɛrɛ i pah nyɔɔ a?

¹⁴ Bɔloo kɔ i suā kɔ nɔɔnɔɔnu kpokpo nɛɛ lɛɛ bu bɔŋanaloo aabah Jɛhova le kɔ a wee dɔbiī nɛ bɔŋanaloo, sa edap  dɔnage biī nɛ nɛɛ a bee lu ekpo a. Lo alu e’aaloo nɛɛ a bee si gbɛnɛ pɔrɔ bie bu bɔŋanaloo sɔ̄ a naa kiiya, a dap doo kɔ pya dɔɔ̄na a sinage pɔrɔ. (Gal 5:9) Gbaāloo wo, lo a naa lu ekpo ye, a naale esuā dua kɛ̄ pɔrɔ a bee si bee piya doo, e a naale emuɛ kɔ alu ebɛɛ̄ kɔ a kwabaloo ye ekɛɛrɛ le ye dogo lokwa a dap ɛrɛ ewonu a aabah Jɛhova. (Eklis 8:11) I suā leere kɔ sɔ̄ pya kanɛɛ aa biaɛfii lo ebɔgeloo ekpo ziī nɛɛ, ba wee ɛp bu lo ue leere sa naa su biā biī. Doodoo pya biaɛ a bee le bu buɛ̄ Izrɛl a dee kere, ba suā kɔ “naale nɛɛ na [ba] biaɛ nɛ mɛ Jɛhova.”—2 Edoo 19:6, 7.

15. Ena anua alu ebɛɛ̄ kɔ i ture nyiɛ loo kaānɛdeebah a aabah Jɛhova anyaawo eekɛ̄ i wee doo a?

¹⁵ Kuma sɔ̄ nyɔuwe ama aa tɔɔ̄ waɛloo ye kuma a, lu ebɛɛ̄ kɔ i ture nyiɛ loo sīdee Jɛhova doo nu eekɛ̄ i wee doo. Ena anua a? Bu sɔ̄ gbɛnɛ etɛɛrɛloo, a dap lu enɛ i pya zuurabahtɔ̄ a bee kɔ alu aā, naa waɛ edoo ale a bee kɔ lɔgɔ suānu naale bu. Bu kaka, Jɛhova naale ekɔ ue aā bunyɔɔ i nɛ. Pio sɔ̄, a dap i kɔ nɛ nu i doo tɛ̄maloo pya nɛɛ etubobaloo. A naale elu sɔ̄ e’ɛrɛ baɛbaɛ ekɛɛrɛ kiiloo leredee a aabah pya kanɛɛ sa kɛɛrɛ kɔ: ‘Ekɔ leredeebah ama aagebah Jɛhova sɛh pya wuga lo ba gaa su zaāsī aadee kɔ nu ba kɛɛrɛ ni?’ Bu gbɛnɛ etɛɛrɛloo, o turege nyiɛ loo Jɛhova le ye bɔŋanaloo ni? Ye ture edɛɛa nyɔɔ kɛ̄ o ɛp leredeebah aa lu enɛ tɛ̄mabah pya kanɛɛ doo anyaawo. Lo o ture nyiɛ loo kaānɛdeebah aa lu enɛ i anii’ee sa nwaabah doo dookɛ̄ alu ekɔ doo, o dapnage doo wo bu sɔ̄ gbɛnɛ etɛɛrɛloo.—Luk 16:10.

16. Bu mɛ sīdee na edap lu edoā-ɛp kɛ̄ i ture nyiɛ loo biaɛ Jɛhova doo li deesī a?

¹⁶ A ɛrɛnage dɔɔ̄na nu alu ebɛɛ̄ kɔ i kɛɛrɛbu loo, ɛɛ na kɛ̄ i doo dogo doo kumaloo biaɛ Jɛhova enɛ bu sɔ̄ nyɔuwe ama e’ina kuma. Taɛ nyaawo, i ɛrɛ bɛābu kɔ gbɛnɛ-edo nɛɛ a sii taāŋabah Jɛhova gbaānage loo pya i manamana edap ye taāŋabah lɛɛ kuma gae lu. Mɛ sɔ̄ nɔ̄ Amagidɔn edɔ, tɛ̄maloo Jizɔs Jɛhova na ebiaɛ nu esira wa loo a. (Mat 25:31-33; 2 Tɛs 1:7-9) A naale ili na i biaɛfii nɛɛ Jɛhova etoesaɛ̄ ale nɛɛ a naale etoesaɛ̄ a. (Mat 25:34, 41, 46) Ekɔ i kpɛ̄nageloo eture nyiɛ loo biaɛ Jɛhova sɛh i ɔbɛ etaāŋa ye bah nyɔɔ kɔ ye biaɛfii naa nia i ni? Bu kaka, alu kaāna ebɛɛ̄ kɔ i agɛrɛtɛ̄ kɛ̄ i ture nyiɛ loo Jɛhova  doo anyaawo lokwa i dap ye ture nyiɛ loo kaāna li deesī.

17. Bu mɛ sīdee na i ɛrɛ biī aāloo biaɛ Jɛhova sɔ̄ lo pɔrɔ nyɔuwe ama e’ina kuma a?

¹⁷ Naa kɛɛrɛ kɛ̄ etɔɔ̄ i loo doo sɔ̄ i muɛ nu a sira aabu biaɛ Jɛhova bu aā nyɔuwe. Ekwɔ sīdee yigabari naale elena, pya a ziā nɛɛ bu uradu gbaāloo pya bɛbɛɛ lo ba bii pya nɛɛ kumakɛ̄ sa doo kɔ ba a tɔga naale elenanage. Dumɛloo, ana le luh naale elena. Elu eyere Setan le pya ye gbo yɔ kpɔgɔrɔ loo baɛ boo le lop tup zua. Pah a aaloo wa lɛɛbeekɛɛ̄ naale elena. (Mum 20:2, 3) Naa ɛp kɛ̄ bu i e’ɛɛ doo kɔ i bee ture nyiɛ loo sīdee Jɛhova doo nu doo a!

18. Pya ena i dap nɔ aāloo edoba pya Izrɛl dookɛ̄ alu e’ɛm bu kpa Buā 11:4-6 le 21:5 doo a?

¹⁸ Ekɔ dum bu aā nyɔuwe e’ɛrɛ pio nu finiabah lo edap doā-ɛp kɛ̄ i ture nyiɛ loo sīdee Jɛhova doo nu doo ni? Bu edoba, naa kɛɛrɛ nu a bee siraloo pya Izrɛl nwīkere sɔ̄ aā sɔ̄ a bee lu e’agara wa aābu zooro li Ijipt. Pio aba bee bɔātɛ̄ enuumi num nyɔɔbee ba naa bee ɛrɛna pio nuede ba gaa bee ɛrɛ ɛɛ̄ŋa loo bie Ijipt, e lo ama bee doo kɔ ba a ɛp manna Jɛhova bee wa nɛ tɛrɛ. (Buū Buā 11:4-6; 21:5.) Ekɔ ili i ɛrɛnage dua ekɛɛrɛ a le doo wo sɔ̄ gbɛnɛ etɛɛrɛloo e’ina kuma ni? Ii suā kuma tam i gaa le si lo elɛɛ sa kwa pya nu a bee lu egbeesī, le dua tam i si lo ekwa kɛnɛkɛ̄ ama nua Paradais. Naadaba, gbɛnɛ-edo tam elu esi, e lo ama dap doo kɔ dum aa aadee waɛ tua sɔ̄. Ekɔ i nuumi num kiiloo pya nu Jɛhova enɛ i lo sɔ̄ ni? Kaka ue a le na kɔ: Kɛ̄ i agɛrɛbah tɔgɛ nia loo pya nu Jɛhova aa i nɛ anyaawo doo, kɛ̄ i tɔgɛnage kaāna nia loo pya lo enɛ i lo sɔ̄ doo lo.

19. Bu ekpurubah, o dap kɔ pya nu i enɔā bu ekobee ue ama doodoo wa?

¹⁹ Sīdee Jɛhova wee doo nu wee lee dɛ̄dɛɛ̄ sɔ̄. A bɔloo kɔ i yiga lo ama kaāna. A bɔnage loo kɔ i dɛrɛ nyiɛ nyɔɔ pya nɛɛ Jɛhova ture nyiɛ loo kɔ ba a nɛ i ye zuurabahtɔ̄. O aa ibere pya ue Jɛhova bee kɔ tɛ̄manu nɛɛ mɔmanudɛɛ̄ Aisaia kɔ: “Bu efɛɛlootɔɔ̄ le bu ture nyiɛ loo na bui ekpo ele a.”—Ais 30:15.