BU SƆ̄ Baibol, pya nu a wee lu ekpɛ loo wa wee lu enɛ pya butɔ lo nwiīnɛɛwa sɔ̄ aalu e’ii lo wa. Pio nu a wee dap lu ekpɛ loo wa na pya nu a si gbɛnɛ du, nam, ale kpugi. Pio sɔ̄, a wee lu ekpɛ tɛ̄maloo esitam dɛɛ̄, dookɛ̄ Jekɔb bee doo, lo a bee yiga kɔ esietam nɛ tɛ Rachel loo ɛrɛba zua, lokwa a dap ii Rachel nua ye wa. (Jɛn 29:17, 18, 20) Ena a bee lu ekɛɛrɛ a bee le dumɛ kpɛ nu loo wa a?

Ziī wa enɔā gbɛnɛ kpa lo a wee nɔ Baibol a kura Carol Meyers kɔ: “Pya nu a wee lu ekpɛ loo wa dap yiidɛɛ̄ pya tam lo nwiīnɛɛwa naale edapna si nɛ pya ye tɔ, lo a eera na pya butɔ ba wee yii wii.” Pya nu a wee lu ekpɛ loo wa ama wee yerenagebah lo e’agɛrɛtɛ̄ gbanialoo a le yɛɛ baɛ butɔ lo pya wa miɔŋɔ iya ziī ama. E’agatɛ̄ gbanialoo ama dap doo kɔ pya lo butɔ a yerebah nɛ ziī sɔ̄ nu wa agaloo. Gbaāloo wo, pya nu a wee lu ekpɛ loo wa ama tɔgɛ kɔ lo nwiīnɛɛwa ebee yiga kɔ e’iyae dam le kɔ a naale elena kɛɛ̄ ye tɛ mɛ ele kɛɛ̄ ye dam.

Sɔ̄ alu ekpɛ nu loo wa naa kura kɔ lo wa lu nu alu e’oo ale nu alu eyaɛ. Kpa a kura Ancient Israel—Its Life and Institutions kɔ: “Bu doonu ii’ii wa lo pya Izrɛl, sɔ̄ a wee lu ekɔ alu ekpɛ nu loo wa nɛ butɔ lo nwiīnɛɛwa aa, wee doo kɔ a bee kɔ alu eyaɛ lo nwiīnɛɛwa. Kerewo, a bee kɔ pya nu alu ekpɛ loo wa ama wee lu ekpɛ loo pya tam lo nwiīnɛɛwa ebee le aa si nɛ pya ye butɔ, e a naale nu alu ekpɛ lo eyaɛ lo nwiīnɛɛwa.”

Nii’ee, bu pio barasī, pya nɛɛ lege aa kpɛ nu loo wa. Sɔ̄ tɛ le ka alu Nɛɛ Kraist kɔ alu ekpɛ nu loo wa nwiīnɛɛwa, ba edoo kɔ “dɛ̄dɛɛ̄ nɛɛ a suā [wa] le beenyiɛ,” tɛ̄maloo sɔ̄ ba naa bip nu a yeekɛ̄ eekɛ̄ a bɔloo doo. (Fil 4:5; 1 Kɔr 10:32, 33) Dodoo wo etɔgɛ kɔ ba lu pya a naa “wereloo kpugi” ale pya a naa ɛrɛ yɔgɔ oo. (2 Tim 3:2) Gbaāloo wo, sɔ̄ tɛ le ka alu Nɛɛ Kraist naa bip kɔ alu ekpɛ nu a yeekɛ̄ loo wa nwiīnɛɛwa, lo ama eyerebah doo kɔ nɛɛ aa bee gbī e’ii wa nwiīnɛɛwa a, aa lɛɛ lo doonu ii’ii wa kɛ̄, mmɛ sɔ̄ e’ɛrɛ gbɛnɛkpo kpugi lo edap kpɛloo lo wa. Ale a naale edoonage kɔ nɛɛ aa bee gbī e’ii wa nwiīnɛɛwa a lɛɛbaloo tam sɛmdee lokwa a ɛrɛ sɔ̄ egbiā kpugi lo edoo kɔ a ɛrɛ gbɛnɛkpo kpugi lo edap kpɛloo wa.

Bu pio barasī nyɔuwe, nu a wee lu ekpɛloo wa wee lu enɛ bu lok. Bu pya barasī a le doo wo, tɛ le ka alu Nɛɛ Kraist egbaɛ̄tɔ̄loo lo lok. Ena anua a? Nyɔnɛbee Muɛ̄ Ue Bari kɔ Pya Nɛɛ Kraist a “tɔɔ̄ kɛɛ̄ pya a ɛrɛ gbɛnɛ ekpo ebɛɛ” le kɔ ba a gbaɛ̄tɔ̄ pya lok a naa be lok Bari.—Rom 13:1; Doonu 5:29.