KƐƐ̄ Lok Mozis, Jɛhova wee su baɛ bah suā sɔ̄ alu esu bɛmaakuku le kūkumkɛ̄ ye wɔma zɔɔ nɛ. Gbɛnɛ-edo sɔ̄, wee lu ekɔ nu akiiloo baɛ pya enuɛ̄ ama bu pya lok a ɛrɛ nu edoo kiiloo waara zɔɔ, le kɔ ba dap su ɛrɛgeba aba wɔma zɔɔ. (Lev 1:14; 12:8; 14:30 NWT) Ena anua lo ama bee lu nu a dɔbiī a? Ziī nu anua na bee bɛmaakuku naa wee bokɛ̄ dɛ̄dɛɛ̄ sɔ̄. Ena anua ba naa wee bokɛ̄ ani?

Bɛmaakuku lu enuɛ̄ a wee pɛɛ aa ziī barasī yii ziī, e ba wee le naɛsīloo Izrɛl bu sɔ̄ alu sɔ̄ zue bu lo barasī. Bu dɛ̄dɛɛ̄ Lop Enɔɔ̄, ba wee pɛɛ tɛɛ̄ dee kerekɛ̄ loo buɛ̄ Izrɛl kii pya dɔɔ̄na barasī a aramia, lɛɛ ba sikɛ̄ obia kii Izrɛl sɔ̄ elua sɔ̄ zue bu buɛ̄ Izrɛl. (Yɔɔ Sol 2:11, 12; Jer 8:7) Lo ama kura kɔ, sɔ̄ alu sɔ̄ tɔɔ̄, a wee agaloo pya Izrɛl a dee kere lo e’ɛrɛ bɛmaakuku lo ba edap su wɔma zɔɔ.

Kerewo, kūkumkɛ̄ naa lu enuɛ̄ a wee aa ziī kɛ̄ kii ziī, nyɔɔwo ba wee le kɛ̄ ɛrɛgeba sɔ̄ bu buɛ̄ Izrɛl. E dɔɔ̄na nu na kɔ kūkumkɛ̄ wee dap lu ekpɔā. (Dooreloo Jɔn 2:14, 16 NWT) Dookɛ̄ kpa a kura Bible Plants and Animals kɔ doo, “dɛ̄dɛɛ̄ nwī-esɔgɔ buɛ̄ le gbɛnɛ buɛ̄ a le barasī Palestine bee ɛrɛ kūkumkɛ̄ ba gaa kpɔā. Ziī ziī tɛ ɛrɛ tɔ wee ɛrɛ alɛɛ tɔ enuɛ̄ ale edee a le bu ekpadaɛ̄ loo ye tɔ, lo pya lo enuɛ̄ dap tɔɔ̄bu.”—Dooreloo Aisaia 60:8.

Jɛhova tɔgɛ kɔ a lue nɛɛ a ɛrɛ wereloo sa dābeeloo kɛ̄tɔɔ̄ nɛɛ le bu tɛ̄maloo esu baɛbah suā waara zɔɔ alu esu pya enuɛ̄ a waɛ e’ɛrɛ ziī ziī sɔ̄ bu zua daā.