1. Ena a tɔgɛ kɔ pya ue a le bu Kpa Kaɛ bee kuī loo Jizɔs kaāna a?

 NAA kɛɛrɛ kɛ̄ a bee mɛā doo lo egbaɛ̄tɔ̄ Jizɔs sɔ̄ aa tɔgɛ nu, le kɛ̄ a wee kɔ ue a le bu Baibol gbɛnɛkpo sɔ̄ aābu bee ye doo a! Bu pya ue a bee kɔ sɔ̄ eliamaā sah le pya kpɛdumɛ ue a bee kɔ lɛɛ a lu efɛ ye, a bee kɔ ue tubogi bahloo pya ue a le bu Kpa Kaɛ. b (Deut 8:3; Yɔɔ 31:5; Luk 4:4; 23:46) E bu taa zua le siga aā sɔ̄ a bee liamaā mmɛ sɔ̄ a u, a wee buū, tubobahloo ue a le bu Kpa Kaɛ sa baatɛ̄ nɛ pya nɛɛ bie kɛ̄ pya nɛɛ mma.—Mat 5:17, 18, 21, 22, 27, 28; Luk 4:16-20.

2. Sɔ̄ Jizɔs aa bee nyim aakɛ̄, ena a bee ye yerebah nɛ kɔ a dābeeloo Kpa Kaɛ leere a? (Ɛp foto a le nyɔɔ eko.)

² Gbɛnɛ-edo zua lɛɛ Jizɔs gae bɔātɛ̄ ye tam zue ue, a wee buū sa dā Muɛ̄ Ue Bari aā ziī sɔ̄ yii ziī. Baɛbaɛ beenyiɛ naale loo kɔ sɔ̄ a wee le tɔ, a wee dā sɔ̄ Meri le Josɛf aa kɔ ue a aabu Kpa Kaɛ sɔ̄ ba aa kɔnia sɔh. c (Deut 6:6, 7) I suā leere kɔ Jizɔs wee nyɔɔnɛ pya ye butɔ si tɔ bɔŋanaloo dɛ̄dɛɛ̄ dee fɛɛrɛloo. (Luk 4:16) Sɔ̄ a wee le lo kɛ̄, a wee gbaɛ̄tɔ̄loo kaāna sɔ̄ aa lu ebuū Baibol. Sɔ̄ sɔ̄ aa kiisī, Jizɔs bee nɔ ebuū pya lo e’ɛma nu a le kaɛ nyɔɔ ye loo. E lo ama bee doo kɔ Jizɔs a suā Kpa Kaɛ kaāna, wereloo pya nu a  le bu sa doonage kɔ a ɛrɛ pah nyɔɔ ye dum. Bu edoba, naa kɛɛrɛ bu nu a bee sira bie tɔkaɛ sɔ̄ Jizɔs bee le 12 zua. Pya nɛɛ tɔgɛnu lo ba ebee suā lok Mozis kaāna bee ɛrɛ “nyɛŋia . . . [lo edā Jizɔs] loo ye suānu le ye tuture ebip.”—Luk 2:46, 47, 52.

3. Ena i nɔ bu ekobee ue ama a?

³ Lo ili buū Kpa Kaɛ dɛ̄dɛɛ̄ sɔ̄ i dānage beeloo Muɛ̄ Ue Bari sa ye wereloo. Bu mɛ sīdee na i dap ɛrɛ gbɛnɛ biī aāloo nu i buū a? I dap nɔ nu aāloo nu Jizɔs bee kɔ nɛ pya a suā Lok doodoo pya ɛm kpa, pya Farisii le pya Sadusii. Pya zaāsī yigabari ama wee buū Baibol dɛ̄dɛɛ̄ sɔ̄ mɛ ba naa ɛrɛ biī aāloo nu ba buū. Jizɔs bee baatɛ̄ taa nu a doo kɔ ba aa ɛrɛ biī aāloo wa būbuū Kpa Kaɛ. Ue Jizɔs bee wa kɔ nɛ ama edoo kɔ (1) i dap dābeeloo nu i buū, (2) gbī pya zɔ a kuī aābu Baibol sa (3) lɛɛbahloo kɔ Muɛ̄ Ue Bari a ɛrɛ i pah nyɔɔ.

4. Ena Luk 10:25-29 i tɔgɛ akiiloo būbuū Muɛ̄ Ue Bari a?

⁴ I gbī edābeeloo nu i buū aābu Muɛ̄ Ue Bari. Lo ii doo wo ii le e’ɛrɛ biī aāloo nu i buū. Bu edoba, naa kɛɛrɛbu nu Jizɔs bee nyɔɔnɛ “ziī nɛɛ Lok” kɔnia. (Buū Luk 10:25-29.) Sɔ̄ lo gbara bee bip nu alu ebɛɛ̄ kɔ a doo lokwa a dap ɛrɛ dum a naatah, Jizɔs bee kue ye ekɛɛrɛ kumaloo Muɛ̄ Ue Bari tɛ̄maloo ebip ye kɔ: “Ena a bee lu e’ɛm bu lok ani? O buū doodoo wa?” Lo gbara bee kɔ taɛ ye ture tɛ̄maloo ekɔ ue a le bu Baibol akiiloo wereloo Bari le wereloo nɛɛ yɔrɔ le. (Lev 19:18; Deut 6:5) Mɛ yere nukuādɛɛ̄ loo nu a bee sikɛ̄ kɔ nyɔɔnɛ kɔ: “Mɛɛ na alu na nɛɛ nyini le a?” Lo gbara muūna siā kɔ a sii dāebeeloo taɛ nu nu a bee buū a kura. Sa wo bee doo kɔ aa dap su nu a buū aābu pya dɔ Kpa Kaɛ ama yere bu dogo leere.

5. Bu mɛ sīdee na yere kara le lɛlookɛ̄ buū nu eyerebah i nɛ kɔ i dābeeloo nu i gaa buū a?

⁵ I dap nyimɛ kɛ̄ i dābeeloo Muɛ̄ Ue Bari doo tɛ̄maloo elu nɛɛ a para buū nu. Pio nu a a dap yerebah nɛ na ama. Yere kara lɛɛ o gaɛ bɔātɛ̄ ebuū. I gbī yerebah Jɛhova lokwa i dap dābeeloo Kpa Kaɛ, nyɔɔwo i dap ye bara kɔ a nɛ i ye Kaɛ Edɔɔ̄ lokwa i dap sere ekɛɛrɛ nyɔɔ nu i gaa buū. O aa gbara sɔ̄ o waa buū. Lo ama eyerebah a nɛ kɔ o dābeeloo nu o gaa buū. Elee lo o buū siā nyɔɔ ale o gbaɛ̄tɔ̄ sa nyɔɔnɛ lo ebee lu ebuū yerebu gama. Lo ama edoo kɔ dɛ̄dɛɛ̄ o ekɛɛrɛ a le nyɔɔ nu o gaa buū, sa doo kɔ Muɛ̄ Ue Bari o gaa buū a ɛrɛ a pah nyɔɔ kaāna. (Josh 1:8) Sɔ̄ o ebūna sah, yere kara dɔɔ̄na sɔ̄ nɛ Jɛhova loo ye Muɛ̄ Ue alu dɔɔ̄nu sa ye bara kɔ a yerebah a nɛ kɔ o dap su pya nu o buū yere bu dogo.

6. Ena anua bip ebip aba ɔɔ sa ɛm pio nu o dābeeloo edap a yerebah nɛ sɔ̄ o gaa buū nu a? (Ɛpnage foto.)

⁶ Baɛ dɔɔ̄na nu a a dap yerebah nɛ kɔ o dābeeloo Baibol na ama. Bip ebip aba ɔɔ kiiloo nu o buū. Sɔ̄ o aa buū ziī kɛ̄ a le bu Baibol, bip aba ɔɔ kɔ: ‘Taɛ ba mɛɛ na kɛ̄ ama aa kɔ ue kumaloo a? Mɛɛ na aa kɔ ue a? Mɛɛ na lo nɛɛ aa kɔ ue nɛ a, e ena anua a kɔ lo ue a? Mɛ kɛ̄ le mɛ sɔ̄ na lo nu bee dooa a?’ Dua ebip ama eyerebah a nɛ kɔ  o dap kɛɛrɛ sa dābeeloo taɛ nu a le bu kɛ̄ o waa buū a. Ɛmnage pio nu o dābeeloo sɔ̄ o gaa buū. Sɔ̄ o ɛm nu o dābeeloo sɔ̄ o gaa buū nu, edoo kɔ o kɛɛrɛ nu akiiloo nu o gaa buū a kaāna sa wo edoo kɔ o dābeeloo leere. Ɛm nu doonage kɔ o dap sikɛ̄ nyɛŋiabu nu o bee buū. O dap ɛm pya ebip, pya nu o enɔā aābu, pya kpog-bee nu a le bu nu o gaa buū le kɛ̄ o dap su nu o gaa buū yerebu dogo doo ale nu o kɛɛrɛ kumaloo nu o gaa buū. Ɛ’ɛm pya nu a le doo wo eyerebah doo kɔ o muɛ kɔ Muɛ̄ Ue Bari lu zuurabahtɔ̄ a le nɛ taɛ olo.

7. Amunu elap dogo na a i bɛɛ̄ sɔ̄ i gaa buū nu a, e ena anua a? (Matiu 24:15)

⁷ Jizɔs bee yere nukuādɛɛ̄ loo ziī elap dogo a bɔloo kɔ i ɛrɛ lo i gbī edābeeloo Muɛ̄ Ue Bari leere, lo a le suā bukɛ̄ ue. (Buū Matiu 24:15.) Ena suā bukɛ̄ ue a? Ɛɛ susuā kɛ̄ ziī nu ɛrɛ nu edoo kiiloo ziī doo, le kɛ̄ ba lu kee loo ziī doo, le lo edābeeloo nu a naa aadee waɛ esuā. Gbaāloo wo, alu ebɛɛ̄ kɔ i ɛrɛ suā bukɛ̄ ue dookɛ̄ Jizɔs bee kɔ doo, lokwa i suā pya nu a tɔgɛ kɔ mɔmanudɛɛ̄ Baibol aa dooa gbɔ̄mɛɛ. A lunage ebɛɛ̄ kɔ i ɛrɛ pya elap ama lokwa i dap ɛrɛ kaāna biī aāloo nu i buū aābu Baibol.

8. Bu mɛ sīdee na i dap buābee nyɔɔ pya nu i buū a?

⁸ Jɛhova wee yerebah nɛ pya ye zooro kɔ ba a suā bukɛ̄ ue. Nyɔɔwo, yere kara bara kɔ a yerebah a nɛ kɔ o dap ɛrɛ lo elap dogo. (Kam 2:6) Bu mɛ sīdee na o dap doo nu a gbaaloo kara o yere a? Buābee nyɔɔ pya nu o buū, sa yere nukuādɛɛ̄ loo kɛ̄ a gbaaloo pya dɔɔ̄na nu o suā doo. O dap gbītɛ̄ nu aābu pya kpa i wee su nɔā Baibol doodoo lo a kura Research Guide for Jehovah’s Witnesses, lokwa o dap dābeeloo pio nu yereloo. Kpa gbiātɛ̄ nu  ama eyerebah a nɛ kɔ o dap suā nu ziī dɔ Kpa Kaɛ aa kɔ le pya kɛ̄ o dap su yere bu dogo doo. (Hib 5:14) Lo o ɛrɛ ekɛɛrɛ nyɔɔ pya nu o buū, o dābeeloo Baibol kaāna.

9. Amunu kpog-bee kaka ue a le bu Baibol na pya Sadusii bee ɛp tɛrɛ a?

⁹ Pya Sadusii bee suā pya nu a le bu o’oo tuatua kpa a le bu Kpa Kaɛ a bee lu e’ɛm bu muɛ̄ ue Hibru kaāna, mɛ ba naa bee su pya kpog-bee kaka ue a le bu pya kpa a aabah Bari ama yerebu dogo. Bu edoba, naa kɛɛrɛ nu akiiloo nu Jizɔs bee kɔ sɔ̄ pya Sadusii bee ye bip nu akiiloo aakɛ̄ bu luh lo edoā ye ɛp. A bee wa bip kɔ: “Bui sii bee buūge bu kpa Mozis, bee ue akiiloo nwī te, kɛ̄ Bari bee ye kɔ nɛ doo, ‘Mda na Bari Abraham, le Bari Aizik, le Bari Jekɔb?’” (Maak 12:18, 26) Kaɛlɛɛ kɔ pya Sadusii ebee buū nu akiiloo dɔ ama gbɛnɛ-edo sɔ̄, ebip Jizɔs wa bip tɔgɛ kɔ ba bee ɛp ziī kpog-bee kaka ue a le bu Baibol tɛrɛ, lo a le tɔgɛ nu akiiloo aākɛ̄ bu luh.—Maak 12:27; Luk 20:38. d

10. Ena i yere nukuādɛɛ̄ loo sɔ̄ i gaa buū nu a?

¹⁰ Ena i nɔ aāloo a? Sɔ̄ i gaa buū nu, i yere nukuādɛɛ̄ loo dɛ̄dɛɛ̄ pya ue a le bu lo barakpaɛ̄ ale nu lo dɔ Baibol aa i tɔgɛ. Naale aba esuā pya tɔgɛnu a waɛ edābeeloo, mɛ i dānage beeloo pya nu a naa aadee waɛ esuā, lo a lu pya zɔ a gɔā.

11. Dookɛ̄ a le bu 2 Timɔti 3:16, 17 doo, mɛ sīdee na o dap ɛrɛ pya nu a kuī aābu Baibol a?

¹¹ Bu mɛ sīdee na o dap gbī pya nu a kuī sɔ̄ o gaa buū Baibol a? Naa kɛɛrɛ nu 2 Timɔti 3:16, 17 kɔ. (Buū.) Yere nukuādɛɛ̄ loo kɔ dɔ ama kɔ “dɛ̄dɛɛ̄ nu a bee lu e’ɛm bu Kpa Kaɛ . . . ɛrɛ biī lo” (1) etɔgɛ nu, (2) lo esu pɔrɔ pya doo gbee wa kɔ sī, (3) lo edoo kɔ ekɛɛrɛ nɛɛ a lera, le (4) lo ezuura i bah tɔ̄. O dap ɛrɛ nia pya biī elua ekɔ ama aābu pya kpa a le bu Baibol lo oo wee aadee su daānu dɛ̄dɛɛ̄ sɔ̄. Ɛp lo e’ɛma leere lokwa o muɛ nu a a tɔgɛ kiiloo Jɛhova, ye nɔɔnɔɔnu, ale nu akiiloo pya daakuu Baibol. Ɛp kɛ̄ a dap lu esu lo ama kāmɛnɛ nɛɛ doo. Doo wo tɛ̄maloo e’ɛp kɛ̄ pya dɔ ama a yerebah nɛ kɔ o dap yere nukuādɛɛ̄ loo pɔrɔ taɛ, ale pɔrɔ dogo sa bia bu bɔloo ture nyiɛ loo. Ɛp kɛ̄ o dap su dɔ ama lere ekɛɛrɛ, ale kwaābaloo kɛ̄ alu e’ɛp nu bu ekwɔ sīdee doo, naadaba sɔ̄ o le uwe zue ue. Sa ɛp ɛrɛgeba zuurabahtɔ̄ lo dɔ nɛ lo a a dap yerebah nɛ kɔ o ɛp nu dookɛ̄ Jɛhova ɛp nu doo. Lo o kɛɛrɛbu loo nia biī ama, o ɛrɛ biī aāloo o buū Baibol.

12. Ena anua Jizɔs bee bip pya Farisii kɔ “Bui sii bee buū” a?

¹² Jizɔs bee bip kɔ: “Bui sii bee buū” ni? lo etɔgɛ kɔ pya Farisii bee dābeeloo Kpa Kaɛ bu ekwɔ sīdee. (Mat 12:1-7) e Taɛ sɔ̄ aa bee kɔ lo ue, pya Farisii bee dɛrɛ ue pya a wee nyɔɔnɛ dumɛ Jizɔs kɔ ba naa sere Dee Fɛɛrɛloo. Jizɔs bee ture tɛ̄maloo enɛ baɛ edoba a le bu Baibol, sa kɔ ue kumaloo ziī dɔ a le bu kpa Hosea lo etɔgɛ kɔ pya Farisii naa bee dābeeloo nu anua a bee lu esere lok Dee Fɛɛrɛloo sa ba naa tɔgɛ toesaɛ̄. Ena anua nu pya nɛɛ ama bee buū aābu Baibol naa bee wa ɛrɛ pah nyɔɔ a? Nyɔnɛbee ba bee ɛrɛ edɔɔ̄ eeloo nɛ nyɔɔ sa kɛɛrɛ kɔ ba lee ee pya dɔɔ̄na. Wa dogo ama bee doo kɔ ba aa dap dābeeloo nu ba bee buū.—Mat 23:23; Jɔn 5:39, 40.

13. Amunu elap dogo na a bɔloo kɔ i ɛrɛ sɔ̄ i gaa buū Baibol a, e ena anua a?

¹³ I nɔ aāloo pya ue Jizɔs kɔ a lee kɔ i su le ekɛɛrɛ buŋa Baibol. Bu sīdee alu kee loo pya Farisii, i ɛrɛ elu pya a kumalookɛ̄ sa kpɛ̄naloo enɔnu. I ɛrɛ “[esu] kuma nyiɛ kɛ̄ suā bee ue a bee lu efoh i bu.” (Jem 1:21) Lo i kuma nyiɛ kɛ̄, i lɛɛbaloo kɔ Muɛ̄ Ue Bari a nyaana dua nɛɛ i lu. Aba lo a le ii eeloo nɛ nyɔɔ sa gbɛ pya dɔɔ̄na, na edoo kɔ nu Baibol tɔgɛ akiiloo toesaɛ̄, fɛgɛ dogo, le wereloo a ɛrɛ i pah nyɔɔ a.

14. I dap doodoo wa suā lo a le i aa lɛɛgebaloo pya nu i buū aābu Baibol kɔ a ɛrɛ i pah nyɔɔ ni? (Ɛpnage foto.)

¹⁴ Kɛ̄ i aara pya dɔɔ̄na doo etɔgɛ lo a le  i aa lɛɛbaloo Muɛ̄ Ue Bari kɔ a nyaana i. Pya Farisii naa bee lɛɛbaloo kɔ Muɛ̄ Ue Bari a ɛrɛ wa pah nyɔɔ, e lo ama bee doo kɔ ba a “begee ue pya ue naa bee.” (Mat 12:7) Bu aba lo sīdee, kɛ̄ i ɛp pya dɔɔ̄na sa wa aara doo tɔgɛ lo a le Muɛ̄ Ue Bari ɛrɛge i pah nyɔɔ. Bu edoba, i wee kɔge lenu i muɛ bu pya dɔɔ̄na, sɛh i wee nwaabah kɔ pɔrɔ nu i wa muɛ bu ni? I wee luge fɛgɛ sa kpɛ̄naloo e’aaloo pɔrɔ, sɛh i wee agabah sa aa saŋ biea bu nyiɛ ni? Kɛ̄ i ture pya ebip ama doo etɔgɛ lo a le i aa lɛɛbaloo kɔ pya nu i buū aābu Baibol a ɛrɛ pah nyɔɔ i ekɛɛrɛ, kɛ̄ nu i tɔɔ̄loo doo, le i elap dogo.—1 Tim 4:12, 15; Hib 4:12.

15. Muɛ̄ Ue Bari bee tɔɔ̄loo Jizɔs doodoo wa?

¹⁵ Jizɔs bee wereloo Kpa Kaɛ kaāna, e ue a le bu kpa Le-yɔɔ 40:8 bee kɔ kɛ̄ Jizɔs ɛp Muɛ̄ Ue Bari doo sɔ̄ a kɔ: “Nia mɛ lo edoo nu o gbī, Aa na Bari; o lok le bu na beenyiɛ.” Lo ama bee doo kɔ a ɛrɛ ɛɛbu sa kiisī lo esitam nɛ Jɛhova. Ili dapnage ɛrɛ ɛɛbu sa kiisī leere, lo a le i buū sa nɔ lo ewereloo Muɛ̄ Ue Bari.—Yɔɔ 1:1-3.

16. Ena o doo lokwa o ɛrɛ biī aāloo buū Muɛ̄ Ue Bari a? (Buū ekpo a kɔ “ Pya Ue Jizɔs Dap A Yerebah Nɛ Kɔ O Dābeeloo Nu O Buū.”)

¹⁶ Dookɛ̄ pya ue Jizɔs le ye edoba tɔgɛ doo, doraa i nyimɛ i kari bu ebuū Baibol yereloo. I dap nyimɛ kɛ̄ i dābeeloo ziī ziī dɔ Baibol doo tɛ̄maloo eyere kara, kɛɛrɛloo buū, bip ebip aba ii, sa ɛm pio nu i dābeeloo sere kɛ̄. I dap su buābee daānu leere tɛ̄maloo esu pya i kpa a dɛɛa nyɔɔ Baibol ɛma pya nu i buū. I dap yɛgɛ kɛ̄ i su Kpa Kaɛ daānu doo, kere alu pya dɔ ii aadee dābeeloo leere, tɛ̄maloo egbītɛ̄ pya zɔ a kuī a le bu lo e’ɛma. Sa i dap lɛɛbahloo kɔ Muɛ̄ Ue Bari a ɛrɛ i pah nyɔɔ tɛ̄maloo e’ɛrɛ ekɛɛrɛ a bɔloo sɔ̄ i aa buū Baibol. Lo i piiga lo edoo pya nu ama, i ɛrɛ biī aāloo i buū Baibol sa i agɛrɛbah tɔɔ̄ waɛloo Jɛhova.—Yɔɔ 119:17, 18; Jem 4:8.