YOMARA le pya ye wuga nɛɛdam Marcelo le Hiver wee tɔɔ̄ bu ziī nwīgbagbara buɛ̄ a kura Guatemala. Yomara bee bɔātɛ̄ enyɔɔnɛ Pya Ekeebee nɔ Baibol, e sɔ̄ esaa, pya ye wuga nɛɛdam bee ye nyɔɔnɛ nɔ. Mɛ a ɛrɛ ziī nu alu taāŋa a le. Taa aba bee le pya zimadɛɛ̄ sa ba naa dap buū kpa pya zimadɛɛ̄. Nyɔɔwo, nɛɛ a wee wa nɔɛ̄ Baibol wee buū kpa ba aa nɔ nu aābu le pya dɔ Baibol a le bu wa nɛ.

Si enɔānu bee wa nua dɔɔ̄na nu finiabah loo. Ba naale edap kiā nyɔɔ wa loo bu 40 minit kii lo Tɔ Nɔnu Buɛ̄-mɛnɛ a wa waɛloo. Mɛ pya wuga a le bu lo bɔŋanaloo bee nɔɔ lo e’aara wa siā dɛ̄dɛɛ̄ enɔānu. E sɔ̄ ba bɔātɛ̄ e’ɛrɛ nu edoo bie enɔānu taɛyɛɛ kaɛ, pya wuga wee wa yerebah nɛ kɔ ba a aa wa nu edoo biea bee wa.

Bee lu ebɔātɛ̄ sere enɔānu bu bɔŋanaloo bie wa buɛ̄ bu O’oo Enɔɔ̄ bu zua 2019. Lɛɛ a elu lo sɔ̄, ziī dam le wa a le bu tam sɛmdee dɛ̄dɛɛ̄ sɔ̄ ebee lu wa buɛ̄. Nu lo dam le wa bee seeasī na lo etɔgɛ taa aba kɔ ba a dap buū kpa pya zimadɛɛ̄ sa paranage e’ɛm, kereadoo dam le wa ama naa bee para. Ba bee kii kɛ̄ a wee lu ekpooge kpa wee nɔ braille lo a le eyuu kpa pya zimadɛɛ̄ le kɛ̄ etɔgɛ pya dɔɔ̄na doo.

Sɔ̄ pio enɔɔ̄ etɛ̄na, taa wuga ama bee dap buū braille leere, e lo ama bee doo kɔ ba a nyim kiisī leere bu edɔɔ̄. a Nyaawo, Yomara, Marcelo, le Hiver gaa si tam sɛmdee dɛ̄dɛɛ̄ sɔ̄. Marcelo elua nɛɛ yerebahtam. E dɛ̄dɛɛ̄ kaɛ, ba aa lu kirikiri bu esiatam Jɛhova. Kɛ̄ ba su mɛm siātam nɛ Jɛhova doo yere mɛm loo pya dɔɔ̄na.

Taa wuga ama tɔgɛ nia loo kɛ̄ bɔŋanaloo wa yerebah nɛ bu wereloo doo. Yomara kɔ: “Aā tua sɔ̄ i bee zɔ̄ŋia Pya Ekeebee Jɛhova, ba etɔgɛ wereloo pya kaka Nɛɛ Kraist i kuma loo.” Marcelo kɔ gbaāloo kɔ: “I ɛrɛ pya lele gbo bu i bɔŋanaloo, e i nuūna pya wuga nɛɛdam le nɛɛwa a le tɛɛ̄ ɛŋɛnɛ nyɔuwe a gbaaloo ziī bu bɔp wereloo.” A gaa taɛ Yomara le baɛ pya ye wuga nɛɛdam kaāna lo esu dɛɛ̄ wa mɔma sɔ̄ elu ekwa kɛnɛkɛ̄ ama nua paradais.—Yɔɔ 37:10, 11; Ais 35:5.