M bee kɛgɛ nyɔɔbee mm bee suā kɔ na gbo wee taāŋabah Bari. M bee ye bip kɔ: “Ena o suā akiiloo Baibol a?” A naa bee nwaabah agara. Bu kpɛdumɛ, a bee mɛ kɔ nɛ kɔ ye ka lu ziī yɛɛ Pya Ekeebee Jɛhova; sa ebee nɔ pio nu ye aābah. A bee mɛ taɛ esuā, e m bee kɔ a doolo m dābeeloo leere.

I bee su gbɛnɛkpo sɔ̄ kɔnia ue ama lo uunɛ. Na gbo bee mɛ kɔ nɛ kɔ Baibol tɔgɛ kɔ Setan na a gaa bɛɛ nyɔuwe ama a. (Jɔn 14:30) Naadaba o ebee suā doo wo aa dee, mɛ kiikɛ̄ mda le, ue ama lu mɛ aā loo sa lu keebee. Nu m wee dā na kɔ Bari alu fɛgɛ sa i wereloo na a gaa baɛbee nyɔuwe ama a. Mɛ nu m emɔna bu dum naa tɔgɛ doo wo. Kere m ebee lu aba 26 zua, m emɔna gbɛnɛ-edo nu a mɛ taɛ̄ŋɛ.

Na tɛ wee ɔp fah bunyɔɔ Pya Nɔ̄ United States. Nyɔɔwo, sɔ̄ m bee le zege, m bee suā leere kɔ nɔ̄ dap dɔ ɛrɛgeba sɔ̄ sa pya nɔ̄ tɛrɛ bɔmb. Nɔ̄ bee dɔ Vietnam sɔ̄ m bee le secondary school li California. M bee nyɔɔnɛ pya miɔŋɔ tɔkpa aara kpa tɛ̄ma yah kɔ ii yiga. Pya polis bee su nwītum i kpoā, sa i teera, nyɔɔbee tear gas ba bee tā bee i bɛ dɛɛ̄ sa i ture piogi. Bee le sɔ̄ pya nɛɛ aa bee doo taāŋa sa lɛɛbeekɛɛ̄. Bee lu efɛ pya a gaa bɛɛ, e pya nɛɛ bee aaragi kpa tɛ̄ma yah kɔ ba naa yigae, sa gbeegisī nu. Dɛ̄dɛɛ̄ nɛɛ bee ɛrɛ keekee ekɛɛrɛ kiiloo kɛ̄ elu edoo nu doo. Dɛ̄dɛɛ̄ nɛɛ bee kwɔɔga.

Bu zua 1970, m bee yii loo tam bie barasī mmnyɔɔ a le bee maā li Alaska sa m bee ɛrɛ gbɛnɛkpo kpugi. Lɛɛ m yii bu fah bunyɔɔ kii London, yaɛ nwītoptop sa wee aadee ɔp kuma ɛrɛgeba kɛ̄ a mɛ nia a le dee kerekɛ̄. Sɔ̄ pio enɔɔ̄ etɛ̄na, m bee ina Africa. Sɔ̄ m gaa bee kii li, m bee zɔ̄ŋia pya nɛɛ a bee gbīnage eteera aabu taāŋa.

 Nyɔɔwo, aāloo nu m edaā sa muɛ, m yiga kɔ suānu le bu tɔgɛnu Baibol a kɔ pɔrɔ-edɔɔ̄ na a gaa baɛbee nu a gaa sira bu nyɔuwe a. Mɛ lo a le Bari naa gaa baɛbee nyɔuwe a, ena a gaa bee doo a? M bee gbī esuā.

M bee ɛrɛ ye ture sɔ̄ pio enɔɔ̄ etɛ̄na. E sɔ̄ sɔ̄ aa kiisī, m bee suāloo sa werenage loo gbɛnɛ-edo pya nɛɛdam le nɛɛwa ba bee tɔɔ̄ agara nɛ aba lo kaka Bari kɛ̄bah ɛrɛgeba kɛ̄tɔɔ̄.

Sɔ̄ m bee obia kii London, m bee zɔ̄ŋia ka na gbo, e a bee mɛ nɛ ziī ekpo Baibol. Sɔ̄ esaa, sɔ̄ m bee si Amsterdam a le barasī Netherland, ziī nɛɛ Ekeebee bee mɛ muɛ m gaa buū lo Baibol kɛɛ̄ miā a le loo dee, e a bee mɛ yerebah nɛ kɔ m dābeeloo. M bee sikɛ̄ kii Dublin, li Ireland, sa bee gbī tɔ-naatam Pya Ekeebee Jɛhova muɛ. M bee kpoga bū sī-ee. Lo kɛ̄ na m bee zɔ̄ŋia ziī wuga nɛɛdam edaābeeloo nu a kura Arthur Matthews bie a. M bee bara kɔ a nyɔɔnɛ mɛ nɔ Baibol, e a bee yiga lo enɔɛ̄ mɛ nu.

M bee su loo nɛ na enɔānu, sa su mɛm būma keekee kpa le ekpo ekpo kpa a bee lu e’ɛm tɛ̄mabah Pya Ekeebee. Sa m bee buūnage Baibol. A bee mɛ kpeloo kaāna! Bie enɔānu bu bɔŋanaloo, m bee muɛ pya miɔŋɔ a gaa ture pya ebip lo pya enɔā gbɛnɛ kpa naa suā ye ture, doodoo lo a kɔ: ‘Ena anua pɔrɔ nu gaa sira a? Mɛɛ na Bari a? Ena a sira sɔ̄ nɛɛ u a?’ Aba pya m wee yii gbo na pya Ekeebee. A bee waɛ doo wo nyɔnɛbee mm bee suāloo lɔgɔ nɛɛ a le lo edo. Ba bee mɛ yerebah nɛ kɔ m wereloo Jɛhova sa doo nu a ye nia.

M bee liamaā bu zua 1972. Sɔ̄ ziī zua etɛ̄na, m bee bɔātɛ̄ si tam sɛmdee sa gbaaloo ziī nwīgbagbara bɔŋanaloo a bee le Newry, li Northern Ireland. M bee bara ziī tɔ-dɛm a le kpaɛ̄ egu. Nama wee legara bu uwe a le kpaɛ̄ lo kɛ̄, sa m wee wa yira kɛ̄sī nɛ ekɔaue sɔ̄ m gaa kpɛ̄naloo ekɔaue m nɛ. A wee bee kɔ ba gaa gbaɛ̄tɔ̄ kaāna sɔ̄ ba gaa taa ebie. Ba naa wee dap kɔ kɛ̄ mm aabah loo leere, kerewo ba wee mɛ yerebah nɛ kɔ m dap bie dɛɛ̄ sī pya m gaa kɔ ue nɛ. A bee lu etubo mɛ bah loo nua nɛɛ sɛmdee bu keebee sīdee a bu zua 1974, e Nigel Pitt lo a bee lu na kaāna gbo bee mɛ gbaaloo.

Taɛ lo sɔ̄ ama, “gbɛnɛ-edo be le taāŋa” bee le barasī Northern Ireland. Pio nɛɛ wee su Northern Ireland kure “buɛ̄ bɔmb le eyuu  naā.” Pya nɛɛ wee begara be nyɔɔdee, tāŋi nɛɛ, sa tɛrɛgi bɔmb bu fah gbɛnɛkpo sɔ̄. Pya bira bɛbɛɛ le pya yigabari na a wee tɛrɛ taāŋa ama a. Kerewo, pya tɔbari fada le pya dɔɔ̄na tɔbari bee suā kɔ Pya Ekeebee naa wee yerekpotɛ̄ bira bɛbɛɛ. Nyɔɔwo, i bee dap kiā zue ue sa ba naa doo i lɔgɔ nu. Pya i wee zue ue nɛ wee suā sɔ̄ le kɛ̄ be aa gbī edɔ, sa ba kɔ i nɛ lokwa ii yiibu taāŋa.

Kerewo, a ɛrɛ pya kɛ̄tɔɔ̄ alu gɛɛgɛɛloo a bee le. A ɛrɛ dee Denis Carrigan a wee sɛmnage dee le mm bee le gaa zue ue bie ziī buɛ̄ a i waɛloo lo lɔgɔ Nɛɛ Ekeebee naale, lo i ebee si aba ziī sɔ̄. Ziī wa bee i dɛrɛ ue kɔ i lu pya nɔ̄ pya Britain lɛɛra kɔ i gɔā ɛp wa buɛ̄, naadaba nyɔɔbee ii kɔ ue doodoo pya Ireland. Bɔɔ bee i aa loo ue a i dɛrɛ ama. Lo o yii gbo pya nɔ̄ ba dap a taā fɛ, ale ba esu naā a taā tɔ. Kuma sɔ̄ aba ii bee le eyira kɛ̄-ee bu tɔɔ sa gaa tɔɔ̄baɛ fah, ziī fah bee teera yira deesī tɔ oo nuede a le kɛ̄ lo wa bee i dɛrɛ ue bie a. Lo wa bee aa tɔ sa kɔ ue i nyiɛ̄ bah nɛ baɛ gbara a bee le bu lo fah. Baɛ lo gbara bee kɛɛrɛloo ɔp fah i yiākpaɛ̄ sa i bip pio ebip akiiloo sɔ̄ fah ɔp dee elu. Sɔ̄ lo fah bee lu, ba bee kɔ ue nɛ nɛɛ a gaa ɔp. Ii bee suā nu ba gaa bee ye kɔ nɛ. Lɔgɔ dɔɔ̄na nɛɛ naa bee le lo eyii bu lo fah, nyɔɔwo i bee kɛɛrɛ kɔ ba enɔɔna lo edoo i piya nu loo sɔ̄ i e’aara bu lo buɛ̄. Mɛ a naa bee sira doo wo. Aba sɔ̄ m bee aabu lo fah, m bee bip nɛɛ a gaa bee ɔp kɔ: “Baɛ gbara i aaloo ama, ba gaa bee bip nu a i kiiloo ni?” A bee ture kɔ: “M bee wa kɔ nɛ kɔ m suā i loo. Bɔɔ aa i aa. Ba naale edoo i lɔgɔ nu.”

Bie distrit asɛmbli a bu zua 1976 li Dublin, m bee zɔ̄ŋia Pauline Lomax, a wee sɛmdee bu keebee sīdee lo a bee aa England lu lo distrit asɛmbli. A bee le wuga nɛɛwa a ɛrɛ yira, kumalookɛ̄, sa kpedɛɛ̄. Alɛ le ye gbagbara wuga nɛɛdam a kura Ray bee suā kaka ue aā sɔ̄ ba bee mɛā. Sɔ̄ ziī zua etɛ̄na, Pauline le mm bee iya ziī, sa i bee kiisī lo esitam sɛmdee bu keebee sīdee bie Ballymena, li Northern Ireland.

A ɛrɛ sɔ̄ i bee si tam kuūdɛɛ̄loo sɛkiut, sa nyɔɔnɛ pya i wuga a le Belfast, Londonderry, le dɔɔ̄na kɛ̄ pya pɔrɔ wee le siniatam. Yira pya i wuga nɛɛdam le nɛɛwa lo ba elɛrabaloo keekee sīdee taāŋabah, ɛp sī nɛɛ, le baaloo pya dɔɔ̄na, lo etaāŋabah Jɛhova bee i yere mɛm loo. Bu kaka, Jɛhova bee wa nɛ leelee sa wa kpega!

M bee tɔɔ̄ Ireland loo lop zua. Lɛɛ alu ekue i kɔ i si lo eree 72 tɔkpa Gilɛd bu zua 1981. Sɔ̄ i bee aa lo tɔkpa, bee lu eyere i ture Sierra Leone a le barasī West Africa.

I bee nyɔɔnɛ 11 pya i wuga nɛɛdam le nɛɛwa ba ɛrɛ le dum tɔɔ̄ kɛ̄ a wee lu esere pya zue ue ba aa dɔɔ̄na edo. I wee ɛrɛ ziī kɛ̄ bui nu, taa kɛ̄ si bu uwe, baɛ ka tɔ-maā, ziī ka tɛlɛfon, ziī ka machine loŋa nu, le ziī ka machine a wee kagɛrɛ bɛ. Ba naa wee aadee nua miā lo kɛ̄. Nuū wee yii bu silin, sa yɔɔ wee nim yii tɔ.

Kere kɛ̄ i tɔɔ̄ naa bee lee, tam zue ue wee i nɛ ɛɛbu. Pya nɛɛ wee nwadɛɛ̄ Baibol sa ba wee i gbaɛ̄tɔ̄loo kaāna. Gbɛnɛ-edo aba bee nɔ Baibol sa lu Pya Ekeebee. Pya a le lo kɛ̄ wee mɛ kure “Mister Robert.” E ba wee su  Pauline kure “Missus Robert.” Kerewo, sɔ̄ pio sɔ̄ etɛ̄na, sɔ̄ tam tɔ-naatam bee doo kɔ m aa ɛrɛna gbɛnɛkpo sɔ̄ lo ezuema ue, pya nɛɛ bee bɔātɛ̄ esu Pauline kure “Missus Pauline.” E ba bee mɛ kure “Mister Pauline.” A bee nia Pauline kaāna sɔ̄ ba mɛ kure wo!

Gbɛnɛ-edo pya i wuga bee lu kporo, kerewo, Jɛhova wee wa nɛ nu a wa bɛɛ̄, siga sɔ̄ bu sīdee alu nyɛŋia. (Mat 6:33) M nyɛŋiabu sɔ̄ ziī wuga nɛɛwa lo aba kpugi a bee ye siga bah na kpugi eyaā nuede pya ye miɔŋɔ le ɛɛ ede lo biradee, lo a bee su dɛ̄dɛɛ̄ lo kpugi nɛ ziī wuga nɛɛdam lo loo ye aa bee dumɛ a naa bee ɛrɛ kpugi eyaā pie akɔm. Sɔ̄ esaa taɛ lo dee, ziī wa bee lu loo lo wuga nɛɛwa sɔ̄ a naa bee ɛmadɛɛ̄ sa ye kpɛ kpugi nɛ kɔ a loe ye bee. A ɛrɛ gbɛnɛ-edo sɔ̄ nu wee siragi doo wo.

I bee tɔɔ̄ Sierra Leone loo ɛrɛnia zua. Lɛɛ alu enyaana i ture Bɛtɛl a le Nigeria. Taɛ lo sɔ̄ ama, i bee le tɔ-naatam a kuī. M gaa bee si aba tam m bee le aa si bie Sierra Leone, kerewo, tam Pauline bee lu nu finiabah sa aga. A wee su 130 awa zuema ue bu dɛ̄dɛɛ̄ enɔɔ̄, sa a bee ɛrɛ pya nɛɛ a gaa bee nɔɛ̄ Baibol lo ba aa bee kiisī leere. Nyaawo, alu ekɔ a si tam kɛ̄ gbanu, kɛ̄ a wee gba bɛloo a baara. A bee ye su pio sɔ̄ bah lɛɛ a gae su ye loo, kerewo, a bee muɛ kɔ pya nɛɛ tɔgɛ nialoo tam a gaa si kaāna, e a su dee a ye kpaānɛ ama yeā mɛm loo pya le ɛɛ aa si tam Bɛtɛl.

Kɛ̄ pya Nigeria wee doonu doo bee i lu aā loo, sa i bee ɛrɛ gbɛnɛ-edo nu enɔ. A ɛrɛ dee ziī wuga nɛɛdam bee lu na kɛ̄tam sa aara ziī wuga nɛɛwa lo a bee yiiloo tam Bɛtɛl aā lo esu ye mɛ tɔgɛ. Sɔ̄ m bee niinabah lo esu ye bah bu, a bee dɔ uusī kɛ̄ loo baɛ tɔ mɛ. A bee mɛ lu ziī dua loo! Aba lo sɔ̄ m bee nyɛŋiabu baɛ dɔ Kpa Kaɛ, lo a le: Kpa Doonu 10:25, 26 le kpa Mumuuna 19:10. M bee bip aba mm kɔ, ‘M kɔge ye nɛ kɔ aa doo wo ni?.’ Kerewo, aba lo sɔ̄ m bee nyɛŋiabu kɔ elua esu ye loo tam Bɛtɛl, sa m suā kɔ a suā nu Baibol tɔgɛ.

Kɛɛ bee mɛ bɔp sa mm suā nu edoo sɔ̄ i aa bee kɔnia ue, e m bee gbītɛ̄ nu akiiloo sɔ̄ esaa. M bee suā kɔ lo wuga nɛɛwa aa bee nyɔɔnɛ doonu lo pio nɛɛ aa bee doo bie lo barasī lo sɔ̄. E pya nɛɛdam wee dɔnage uusī kɛ̄ doo wo. A bee lu sīdee etɔgɛ enwadɛɛ̄. A naale taāŋabah, a ɛrɛnage pya edoba a le doo wo a le bu Baibol. (1 Sam 24:8) Bu mɛ  bee ɛɛ kɔ mm bee kɔ lɔgɔ nu ebɔbɛɛ kɛɛ na wuga nɛɛwa tɛ̄maloo kɛ̄ m ɛp nu doo.

I bee zɔ̄ŋia gbɛnɛ-edo pya Nigeria lo ba ekirasī lo ebɔ ture nyiɛ loo bu gbɛnɛ-edo zua. Naa kɛɛrɛ nu akiiloo nɛɛ ye bee kura Isaiah Adagbona. b A bee nɔ kaka ue sɔ̄ a bee le zege, kerewo, dumɛloo ebiakpaŋ bee ye yii loo. A bee lu eture ye kɛ̄ ba wee sere pya ebiakpaŋ, e aba alɛ na a bee lu Nɛɛ Ekeebee a bee le lo kɛ̄ a. Kaɛlɛɛ gbanasī, a bee yerebah nɛ nu a eeloo 30 pya ebiakpaŋ kɔ ba a su kaka, sa a bee lu eyere bɔŋanaloo bie lo kɛ̄.

Bu zua 1996 bee lu eyere i ture tɔ-naatam a le Kenya. Lo ama na alu tua sɔ̄ m bee obia ina lo edonyɔɔ aā sɔ̄ m bee aa lo kɛ̄ dookɛ̄ m bee kɔ doo aā bɔātɛ̄ a. I bee tɔɔ̄ Bɛtɛl. E nwīni bee legara kɛ̄ pya saanɛɛ bee le ama. E sɔ̄ pya wuga nɛɛwa gaa aara bee-te tɛ̄ma, pya lo nwīni wee wa “su” lɛɛbah. A ɛrɛ dee ziī wuga nɛɛwa naa bee kpaɛ̄ ye window bie Bɛtɛl. Sɔ̄ a bee obia ina tɔ, a bee muɛ gbɛnɛ-edo nwīni ba le ye tɔ aa de pya nuede a bee le tɔ. A bee wiikpā sa teera kii ee. Pya lo nwīni bee wiagi-kpā sa pɛgi tɛɛ̄ nu window.

Pauline le mm bee gbaaloo bɔŋanaloo a kɔ muɛ̄ ue Swahili. Sɔ̄ ziī nwī sɔ̄ etɛ̄na, a bee lu etubo mɛ baloo kɔ m sere Enɔānu Baɛ Deelookaɛ (lo alu ekure Enɔānu Baibol Bu Bɔŋanaloo anyaawo). Kerewo, m sii bee dap kɔ lo muɛ̄ ue leere. M wee dasī tɛɛ̄nyɔɔ nu i nɔ sere kɛ̄, lokwa m dap buū pya ye ebip. Mɛ lo alu kɔ pya a le kɛ̄ agara nu alu kina kee aaloo nu a le bu kpa mm wee suāna nu ba gaa kɔ. A bee aga gbɛnɛ! Pya wuga nɛɛdam le nɛɛwa ama bee mɛ lu esaɛ̄ bu. A bee mɛ nia kaāna kɔ ba su egerebu le kumalookɛ̄ su suā lo nɔɔnɔɔnu.

I bee tɔɔ̄ Kenya bu nu a waɛloo ziī zua. Sa bu zua 1997 bee lu ekue i kuma Bɛtɛl a le Brooklyn, li New York. Nyaawo i tɔɔ̄ edo ba ɛrɛ gbɛnɛ zɔ, lo a dap nua gbɛnɛ doā-ɛp. (Kam 30:8, 9) E kunɛ pya i wuga nɛɛdam le nɛɛwa a tɔɔ̄ edo ama aa tɔgɛnage e’agatɛ̄ yira. Ba naa su wa sɔ̄ le nu ba ɛrɛ gbiā zɔ nɛ wa loo, taāwo ba su yeākpotɛ̄ tam bɔŋanaloo Jɛhova.

Bu gbɛnɛ-edo zua i emɔna kɛ̄ pya i wuga bu bɔŋanaloo ɛrɛ yira doo bu keekee kɛ̄tɔɔ̄. Bu Ireland, i bee muɛ kɛ̄ pya i wuga ɛrɛ yira doo kaɛlɛɛ nɔ̄ le taāŋa ba gaa bee kpesī. Pya wuga a le Africa ɛrɛ yira kere ba lu kporo sa pya dɔɔ̄na Ekeebee naa le kɛ̄ ba le. E pya United State bee ɛrɛ yira le zɔ. Naa ɛp kɛ̄ bu Jɛhova ɛɛ doo sɔ̄ a muɛ pya nɛɛ a tɔgɛ wereloo ye kumaloo bu dɛ̄dɛɛ̄ kɛ̄tɔɔ̄ ba le bu doo a!

Zua nwaabah tɛɛ̄, a “nwaɛloo eenyɔɔ nu nɔā bɛ.” (Job 7:6) Nyaawo i gaa nyɔɔnɛ pya wuga a le i beekɛ̄ li Warwick, New York siniātam, e bu i ɛɛ lo enyɔɔnɛ pya nɛɛ ba wereloo ziī kaāna ama siniātam. Bu i ɛɛ lo edoo kuma kɛ̄ i dap doo, lo eyerekpotɛ̄ i Mɛnɛ Kraist Jizɔs, lo alu nɛɛ enɛ leelee dɛ̄dɛɛ̄ pya a bɔ ture nyiɛ loo sɔ̄ sɔ̄ naa binia.—Mat 25:34.