1. Ena anua Baibol nia a a?

 BU I ɛɛ kaāna kɔ Jɛhova Bari nɛ i Baibol! A aara pya ue zuurabahtɔ̄ suānu le loo lo a dap doo kɔ i tāma pya taāŋa i kpesī anii’ee. A nɛnage i ziī bɛābu alu nyɛŋia kiiloo deesī. Lo a kuī eera na bee Jɛhova doonage kɔ i suā gbɛnɛ-edo pya ye elap dogo aābu Baibol. Kuma sɔ̄ i gaa ɛrɛ ekɛɛrɛ nyɔɔ pya ye lele elap dogo ama, a nɛ i ɛɛbu sa i zū kɔ i tɔɔ̄ waɛloo i Bari tɛ̄maloo eyii ye gbo.—Yɔɔ 25:14.

2. Bu pya amunu sīdee na Jɛhova emuuna ye loo siā nɛ pya nɛɛ a?

² Jɛhova gbī kɔ pya nɛɛ a suā ye loo. Sɔ̄ akii adumɛ, a wee doo kɔ pya nɛɛ a suā ye loo tɛ̄maloo zagara, mɔmanudɛɛ̄, le tɛ̄ma bah pya ɛnjɛl. (Buā 12:6; Doonu 10:3, 4) Mɛ ebee tɛɛ̄ doodoo wa lu esuā pya zagara, mɔmanudɛɛ̄ ale pya yereue a aabah pya ɛnjɛl ama lo a naa bee lu e’ɛm sere kɛ̄ ni? Ɛɛ na anua Jɛhova bee doo kɔ pya nɛɛ a ɛm pya nu a gbī kɔ i suā sere kɛ̄ “bu ziī kpa” a. (Jer 30:2) Nyɔnɛbee “ye dee lu kaāna” a, i dap dɛrɛ nyiɛ nyɔɔ kɔ sīdee a i kɔā ue nɛ ama lee eera sa dɔbiī.—Yɔɔ 18:30.

3. Bu mɛ sīdee na Jɛhova doo kɔ Baibol a lege mmɛ anii’ee a? (Aisaia 40:8)

³ Buū Aisaia 40:8. Muɛ̄ Ue Bari ebaɛraloo sa nɛ suānu pya nɛɛdam le nɛɛwa ba bee ɛrɛ yira bu booboo zua akii adumɛ. Lo ama bee waɛ doodoo wa ni? Nyɔɔbee Kpa Kaɛ bee lu e’ɛm nyɔɔnyɔɔ sɔ̄ akii adumɛ nyɔɔ nu a dap gbe a, lɔgɔ tua nu a bee lu e’ɛm nyɔɔ naa lena anii’ee. Mɛ Jɛhova bee doo kɔ alu esikɛ̄ ɛm ye ue a le kaɛ aāloo lo tuatua kpa yere bu pya dɔɔ̄na kpa. Kereadoo  pya a bee sikɛ̄ ɛm naa bee mmana, ba bee nwaɛ̄dɛɛ̄ kaāna sɔ̄ ba gaa ɛm. Bu edoba ziī nɛɛ enɔā gbɛnɛ kpa bee kɔ nu akiiloo naɛsī Kpa Kaɛ a bee lu e’ɛm bu muɛ̄ ue Hibru kɔ: “I suā leere kɔ lɔgɔ dɔɔ̄na nama kpa alu esikɛ̄ ɛm taɛ kɛ̄ a bee le doo i sere kɛ̄ sɛɛ a doodoo Baibol naale.” Nyɔɔwo, kaɛlɛɛ kɔ sɔ̄ etɛ̄naloo sa a bee lu e’ɛm nyɔɔ nu a gbe le kɔ pya nɛɛ a naa mmana na a bee sikɛ̄ ɛm a, i suā leere kɔ pya ue i buū aābu Baibol anii’ee aara pya nu alu ekɛɛrɛ nɛɛ lo ue aabah, lo a le Jɛhova.

4. Ena i aa le kɔnia bu ekobee ue ama a?

⁴ Jɛhova na nɛɛ “dɛ̄dɛɛ̄ le dɔɔ̄nu le dɛ̄dɛɛ̄ gbɛnɛ dɔɔ̄nu a mma” tɛɛ̄ aabah a. (Jem 1:17) Baibol lu ziī yɛɛ pya dɔɔ̄nu a lee eera lo Jɛhova i nɛ. Sɔ̄ nɛɛ i dɔɔ̄ ziī nu nɛ, a tɔgɛ kɛ̄ lo nɛɛ i suāloo leere doo le nu alu i ebɛɛ̄. Kɛ̄ a lenage doolo kiiloo Jɛhova Nɛɛ a bee i nɛ Baibol. Sɔ̄ i gbītɛ̄ nu akiiloo dɔɔ̄nu ama doo kɔ i suā gbɛnɛ-edo nu akiiloo Jɛhova. I suā kɛ̄ a i suāloo leere le nu alu i ebɛɛ̄ doo. Bu ekobee ue ama, i kɔnia kɛ̄ Baibol tɔgɛ taa gbɛnɛ elap dogo Jɛhova lo a le: ye suānu, ye kaāna biaɛ, le ye wereloo doo. Tuatua, doraa i naa kɔ pya sīdee Baibol tɔgɛ kɔ Bari ɛrɛ suānu.

5. Ena alu ziī sīdee Baibol tɔgɛ kɔ Bari ɛrɛ suānu a?

⁵ Jɛhova suā kɔ ye zuurabahtɔ̄ suānu le loo bɛɛ̄ i. E ye suānu mma bu Baibol. Zuurabahtɔ̄ Baibol wee yerebah nɛ pya nɛɛ. Baibol wee nyaana dum pya nɛɛ. Sɔ̄ a gaa bee lu e’ɛm pya tua kpa a le bu Baibol, Mozis bee kɔ nɛ pya nɛɛ Bari lo a le pya Izrɛl kɔ: “Nyɔnɛbee a naa lu nwīgbagbara nu i nɛ, mɛ alu bui dum.” (Deut 32:47) Pya a gbaɛ̄tɔ̄loo ue a le bu Kpa Kaɛ dap kiisī leere sa le bu ɛɛbu. (Yɔɔ 1:2, 3) Kɔ Baibol etɔ̄na nyɔɔnyɔɔ sɔ̄ naa doo kɔ ye ue aa dɔna biī nɛ pya nɛɛ. Bu edoba, bu pya ekobee ue a le nyɔɔ jw.org a kura “Baibol Nyaana Dum,” o muɛ nu a eeloo 50 edoba pya nɛɛ a tɔgɛ kɛ̄ Baibol “si tam bu . . . pya a yira” doo anii’ee.—1 Tɛs 2:13.

6. Ena anua i dap kɔ lɔgɔ dɔɔ̄na kpa a le doodoo Baibol naale a?

⁶ Lɔgɔ dɔɔ̄na kpa a bee Muɛ̄ Ue Bari naale. Ena anua a? Nyɔnɛbee Jɛhova Bari nɛɛ ue a le bu lo kpa aabah lu nɛɛ a eenyɔɔ dɛ̄dɛɛ̄ nu, nɛɛ a tɔɔ̄dum mmɛ deedee, sa ɛrɛ suānu ee dɛ̄dɛɛ̄ nɛɛ. Gbɛnɛ-edo pya dɔɔ̄na kpa wee le kere pya a bee wa ɛm e’ua. Kerewo, ue a le bu pya kpa ama naa wee dɔna biī sɔ̄ gbɛnɛ-edo zua etɛ̄na. Pya ue suānu alu egbī muɛ bu Baibol tɔɔ̄ ina deedee; a dɔbiī nɛ pya nɛɛ a tɔɔ̄dum dɛ̄dɛɛ̄ sɔ̄ eku. Kuma sɔ̄ i gaa buū kpa a le kaɛ ama sa ɛrɛ ekɛɛrɛ nyɔɔ nu i nɔ aābu a, Nɛɛ a ɛrɛ ue a le bu gaa su ye kaɛ edɔɔ̄ i yeābah nɛ kɔ i muɛ kɛ̄ i dap su pya zuurabahtɔ̄ a le bu Baibol yere bu i dogo doo. (Yɔɔ 119:27; Mal 3:16; Hib 4:12) Aiī, Nɛɛ a ɛrɛ ue a le bu Baibol ama le ekpɛ̄naloo lo eyerebah i nɛ. Ɛp kɛ̄ lo ama i zū kɔ i wee buū Baibol dɛ̄dɛɛ̄ sɔ̄ doo a!

7. Bu mɛ sīdee na Baibol bee su pya nɛɛ Bari gbaloo ziī sɔ̄ akii adumɛ a?

⁷ Dɔɔ̄na keebee sīdee lo Baibol tɔgɛ suānu Bari ɛrɛ na kɛ̄ a su pya nɛɛ Bari gbaloo ziī doo. Sɔ̄ pya Izrɛl bee yii bu Buɛ̄ A Bee Lu Eyira Yii Loo wa nɛ, ba bee tɔɔ̄ keekee kɛ̄ a le bu. Pio nɛɛ bee lu pya fɛ bari, pya dɔɔ̄na bee kpɔā nam, e  pya dɔɔ̄na bee foh nu wii. Pya Izrɛl a tɔɔ̄ ziī barasī dap bɔātɛ̄ ɔbɛ e’ɛrɛ nia bu pya lo a tɔɔ̄ dɔɔ̄na barasī bu lo edo. Mɛ Jɛhova bee nɔɔ kɔ pya Izrɛl a gbaa bɔŋia lo edā sɔ̄ elu ebuū sa baātɛ̄ ye Muɛ̄ Ue a bee lu e’ɛm sere kɛ̄. (Deut 31:10-13; Neh 8:2, 8, 18) Naa kɛɛrɛ kɛ̄ etɔɔ̄loo nɛɛ Izrɛl a kaāna sɔ̄ e’ina Jerusalɛm sa muɛ gbɛnɛkpo miliɔn pya le ɛɛ aa gbaa taāŋabah Jɛhova ba aa dɛ̄dɛɛ̄ barasī bu lo edo doo a! Bu lo sīdee Jɛhova gaa yerebah nɛ pya ye nɛɛ kɔ ba a kiisī lo e’ɛrɛ gbaaloo. Sɔ̄ esaa, bee lu e’ɛrɛ bɔŋanaloo Pya Nɛɛ Kraist lo pya nɛɛdam le nɛɛwa a le bu aa keekee kɛ̄, sa kɔ keekee muɛ̄ ue. Pio aba bee le pya a kiikɛ̄, pio aba bee le gbɛnɛ nɛɛ, pio aba bee le pya kporo, sɔ̄ pio aba bee le pya mɛnɛ. Mɛ nyɔɔ wereloo ba ɛrɛ loo Kpa Kaɛ ba bee gbaaloo bu taāŋabah kaka Bari. Pya a bee yira bee dābeeloo Muɛ̄ Ue Bari tɛ̄maloo yerebah a aabah pya le aba gaa gbaa taāŋabah Bari le tɛ̄maloo egbaa wa loo bu enɔānu.—Doonu 2:42; 8:30, 31.

8. Mɛ sīdee na Baibol doo kɔ pya nɛɛ Jɛhova a gbaaloo ziī anii’ee a?

⁸ I Bari a suānu gaa kiisī lo etɔgɛ nu pya ye nɛɛ sa wa su gbaloo ziī tɛ̄maloo Baibol. Baibol aara pya kaka ue akiiloo Jɛhova a i bɛɛ̄ kɔ i suā. I wee gbaa bɔŋana bie pya i enɔānu, pya i asɛmbli le pya i kɔnvɛnsɔn lo egbaɛ̄tɔ̄ sɔ̄ aa  lu ebuū, baatɛ̄ sa kɔ ue nyɔɔ Kpa Kaɛ. Nyɔɔwo, Baibol lu ziī gbɛnɛ nu Jɛhova su yeābah nɛ pya ye nɛɛ kɔ ba a si tam ye nɛ “bu aba beenyiɛ.”—Zef 3:9.

9. Amunu elap dogo na alu ebɛɛ̄ kɔ i ɛrɛ lokwa i dap dābeeloo yereue a le bu Baibol a? (Luk 10:21)

⁹ Naa kɛɛrɛ dɔɔ̄na nu a tɔgɛ kɔ Jɛhova ɛrɛ suānu. A bee doo kɔ alu e’ɛm gbɛnɛ-edo dɔ a le bu Kpa Kaɛ bu sīdee ewaɛbah aba pya ba kumalookɛ̄ lo edābeeloo sɔ̄ ba buū. (Buū Luk 10:21.) Pya nɛɛ a aa dɛ̄dɛɛ̄ kɛ̄ gaa buū Baibol. Ziī nɛɛ enɔā gbɛnɛ kpa kɔ kumaloo Baibol kɔ, “naale aba bee alu kpa alu ebuū ee dɛ̄dɛɛ̄ kpa, mɛ alu kpa alu enwaɛ̄dɛɛ̄ kaāna sɔ̄ a gaa lu ebuū, ee dɛ̄dɛɛ̄ kpa.” Mɛ aba pya a kumalookɛ̄ na a dap dābeeloo nu a kɔ sa su yere bu wa dum a.—2 Kɔr 3:15, 16.

10. Amunu dɔɔ̄na sīdee na Baibol tɔgɛ kɔ Jɛhova lu nɛɛ a ɛrɛ suānu a?

¹⁰ Ɛrɛ dɔɔ̄na sīdee i muɛnage suānu Jɛhova aābu Baibol. Naale aba sɔ̄ i gbaa bɔŋia na Jɛhova i su Kpa Kaɛ tɔŋɛnu a, mɛ a sunage tɔŋɛnu ziī ziī ii sa i su gbɔā nyiɛ. Dɛ̄dɛɛ̄ ii dap muɛ kɛ̄ Jɛhova tɔgɛ nia bu ziī ziī ii doo sɔ̄ i buū ye Muɛ̄ Ue. (Ais 30:21) Sɔ̄ o kpesī taāŋa, ku sɔ̄ na o esia bu Kpa Kaɛ sa muɛ kɔ a bee kɔ a bee lu e’ɛm nɛ taɛ olo a? Kerewo, Baibol dɔbiī nɛ gbɛnɛ-edo miliɔn pya nɛɛ. Tɛɛ̄ doodoo wa na a aara pya ue akiiloo taɛ oloo kɛ̄tɔɔ̄ a? Taɛ nu anua na bee ue a le bu Baibol aabah Nɛɛ a suānu bu sīdee alu keebee.—2 Tim 3:16, 17.

11. Bu mɛ sīdee na Jɛhova tɔgɛ kɔ a naa wee ɛbe sī nɛɛ sɔ̄ a gaa bee lu e’ɛm Baibol a?

¹¹ Kaāna biaɛ lu dɔɔ̄na elap dogo Jɛhova ɛrɛ. (Deut 32:4) Nɛɛ a biaɛ kaāna biaɛ naa wee ɛp sī nɛɛ, e Jɛhova naa wee ɛp sī nɛɛ. (Doonu 10:34, 35; Rom 2:11) I dap muɛ kɔ a naa ɛp sī nɛɛ nyɔnɛbee a bee lu e’ɛm Baibol bu muɛ̄ ue gbɛnɛ-edo nɛɛ bee kɔ lo sɔ̄. Tuatua 39 kpa a le bu Baibol bee lu e’ɛm bu muɛ̄ ue Hibru lo a bee waɛbah pya nɛɛ Bari lo sɔ̄ lo edābeeloo. Kerewo, bu tua sɔ̄ o’oo tup zua a, gbɛnɛ-edo nɛɛ bee kɔ muɛ̄ ue Grik, nyɔɔwo lo kpɛdumɛ 27 kpa a le bu Baibol bee lu e’ɛm bu lo muɛ̄ ue. Jɛhova naa doo kɔ Baibol alu e’ɛm bu aba ziī muɛ̄ ue. Nii’ee, pya nɛɛ a le a kɛnɛkɛ̄ a bia kina alu ɛrɛtaa biliɔn gaa kɔ gbɛnɛkpo muɛ̄ ue. Bu mɛ sīdee na gbɛnɛ-edo nɛɛ dap nɔ nu akiiloo Jɛhova a?

12. Ziī amunu sīdee na Daniel 12:4 edooa gbɔ̄mɛɛ bu kpɛdumɛ dee ama a?

¹² Tɛ̄maloo nɛɛ mɔmanudɛɛ̄ Daniɛl, Jɛhova bee yira yii kɔ bu sɔ̄ kpɛdumɛ, “suānu” a le bu Baibol “gaa le yii loo.” Gbɛnɛ-edo nɛɛ esah ba dābeeloo suānu ama. (Buū Daniel 12:4.) Ziī sīdee lo suānu eyiraloo na tɛ̄maloo tatap, kukuɛ̄, le dɔɔ̄ Baibol le pya kpa a dɛɛa nyɔɔ Baibol yaari. Elua etap Baibol sa dɔɔ̄ yaari ee dɛ̄dɛɛ̄ pya dɔɔ̄na kpa a le bu nyɔuwe. Pio sɔ̄, pya Baibol alu e’oo tɛ̄mabah pya uradu si du gbɛnɛ. Pya nɛɛ Jɛhova etaba gbɛnɛ-edo ekpo Baibol ale sigaloo bu nu alu 240 muɛ̄ ue, sa o dap ɛrɛ ziī ekpo lo oo kpɛ kpugiloo. E nu a sira aabu na bee, pya nɛɛ a aabu dɛ̄dɛɛ̄ edonyɔɔ aa gbaɛ̄tɔ̄loo “leyere ue ama lo Buɛ̄ mɛnɛ” lɛɛ kuma gae lu. (Mat 24:14) I Bari alu nɛɛ kaāna biaɛ gbī kɔ lo a waɛ dɛ̄dɛɛ̄ nɛɛ a ɛrɛ dee lo esuā ye loo tɛ̄maloo buū Baibol. Nu anua na kɔ a wereloo dɛ̄dɛɛ̄ ii kaāna.

13. Ena anua i dap kɔ Baibol tɔgɛ kɔ Bari ɛrɛ wereloo a? (Jɔn 21:25)

¹³ Baibol muūna ziī elap dogo a kuī kaāna lo nɛɛ a ɛrɛ ue a ye le bu ɛrɛ, lo a le wereloo. (1 Jɔn 4:8) Naa kɛɛrɛ bu pya nu Jɛhova yerebu Baibol le pya nu a naa yerebu. A doo kɔ i ɛrɛ taɛ pya nu a i bɛɛ̄ lokwa i dap ye nyɔɔnɛ ɛrɛ le gbanialoo, ɛrɛ ɛɛbu bu dum, sa ɛrɛ dum a naatah. Kerewo, Nyɔɔbee Jɛhova were i loo a, a naa ɛm pya ue a naa bɛɛ̄ i.—Buū Jɔn 21:25.

14. Bu amunu dɔɔ̄na sīdee na pya ue a le bu Baibol tɔgɛ kɔ Bari were i loo a?

¹⁴ Jɛhova tɔgɛnage kɔ a weree i loo tɛ̄maloo ekɔ ue i nɛ bu sīdee a i yere ka loo. A naa nɛ i lok a yeekɛ̄ bu Baibol, sa baɛbee dɛ̄dɛɛ̄ nu i doo bu dum. Taāwo, a yerebah i nɛ kɔ i biaɛfii nu a lee tɛ̄maloo pya nu a bee sira, pya mɔmanudɛɛ̄ a zū nɛɛ, le pya zuurabahtɔ̄ elee i loo. Bu pya sīdee ama, Muɛ̄ Ue Bari zū i kɔ i wereloo sa gbaɛ̄tɔ̄loo Bari aā taɛ bu i beenyiɛ.

15. (a) Bu mɛ sīdee na Jɛhova etɔgɛ kɔ a wereeloo pya a buū ye Muɛ̄ Ue a? (b) Bu foto a yah, ba mɛɛ a le bu Baibol na zege wuga nɛɛwa le zege wuga nɛɛdam gbaāloo wuga nɛɛwa e’ana aa ɛrɛ ekɛɛrɛ nyɔɔ a? (Jɛn 39:1, 10-12; 2 Mɛnɛ 5:1-3; Luk 2:25-38)

¹⁵ Baibol tɔgɛ kɔ Jɛhova were i loo kaāna. Bu mɛ sīdee? Ye Muɛ̄ Ue aara pya nu a bee sira lo a kɔ taɛ kɛ̄ nu wee tɔɔ̄loo nɛɛ doo. I dap dābeeloo kɛ̄ nu bee tɔɔ̄loo pya nɛɛ Baibol kɔ ue kumaloo doo, nyɔɔbee ba “bee i bee bu namloo.” (Jem 5:17) Lo a eewo na bee ɛ’ɛp pya sīdee a bee nyɔɔnɛ pya dɔɔ̄na lo ba bee i bee dania nu, edora kɔ i muɛ leere kɛ̄  Jɛhova lu nɛɛ a “ɛrɛ le beenyiɛ le toesaɛ̄ doo.”—Jem 5:11.

16. Sɔ̄ i buū nu akiiloo pya nɛɛ a bee tɛɛ̄ ekwɔ aābu Baibol, ena a i tɔgɛ akiiloo Jɛhova a? (Aisaia 55:7)

¹⁶ Baibol tɔgɛ kɔ Bari were i loo bu dɔɔ̄na sīdee. Baibol doo kɔ i suā leere kɔ i Bari naale elɛɛ i bah loo bie sɔ̄ i tɛɛ̄ ekwɔ. Pya Izrɛl bee si pɔrɔ pima Jɛhova aā ziī sɔ̄ yii ziī; kerewo, sɔ̄ ba bee kiiya aā bu wa beenyiɛ a bee wa aaloo nɛ. (Buū Aisaia 55:7.) Pya Nɛɛ Kraist a bee le bu tua sɔ̄ o’oo tup zua bee suānage leere kɔ Bari weree wa loo kaāna. Tɛ̄maloo edɔɔ̄ Bari, nɛɛ lɛɛratam Pɔɔl bee zuurabahtɔ̄ pya wuga kumaloo ziī nɛɛ a bee si gbɛnɛ pɔrɔ sa ekiiya kɔ ba a “aaloo [ye nɛ] sa ye agɛrɛ beenyiɛ.” (2 Kɔr 2:6, 7; 1 Kɔr 5:1-5) Naa ɛp kɛ̄ a lee doo kɔ Jɛhova naa kiī pya a ye taāŋabah aba nyɔɔbee ba bee tɛɛ̄ ekwɔ a! Taāwo, bu wereloo a yerebah wa nɛ, wa leredee bah, sa wa kue kɔ ba a lue ye gbo. A yira yii kɔ edoonage wo nɛ dɛ̄dɛɛ̄ pya pɔrɔ dogo a kiiya anii’ee.—Jem 4:8-10.

17. Ena anua Baibol lu gbɛnɛ le dɔɔ̄nu a?

¹⁷ Jɛhova enɛa i ziī gbɛnɛ le dɔɔ̄nu. Ena anua ye Muɛ̄ Ue lu keebee ani? Dookɛ̄ i enɔā doo, Baibol muūna pya elap dogo Bari doodoo ye suānu, ye kaāna biaɛ, le ye wereloo. Kpa ama tɔgɛ kɔ Jɛhova gbī kɔ i suā ye loo. A gbī kɔ i lu ye gbo.

18. Bu mɛ sīdee na i dap tɔgɛ nia loo Baibol alu “le dɔɔ̄nu” Jɛhova i nɛ a?

¹⁸ Ii gbī e’ɛp Muɛ̄ Ue Bari alu “le dɔɔ̄nu” tɛrɛ. (Jem 1:17) Nyɔɔwo, dooraa i kiisī lo etɔgɛ nia loo. I dap doo wo tɛ̄maloo ebuū Baibol sa ɛrɛ ekɛɛrɛ nyɔɔ. I suā leere kɔ lo i doo wo, taɛ Nɛɛ a ɛrɛ ue a le bu enɛ leelee i epiaga sa i “gbīnage suānu Bari muɛ.”—Kam 2:5.