PIO sɔ̄ pya a bee ɛm Baibol wee kɔ ziī etaā ue tɛɛ̄ nyɔɔ nu a eeloo ziī sɔ̄. Naa kɛɛrɛbu taa nu a dap doo kɔ pya a bee ɛm a doo wo:

Sɔ̄ a bee lu e’ɛm. Bie Izrɛl a dee kere, gbɛnɛ-edo nɛɛ naa wee ɛrɛ kpa Lok a wa le bah wa tɔ. Gbɛnɛ-edo sɔ̄ ba wee gbaɛ̄tɔ̄ sɔ̄ edonyɔɔ Izrɛl bɔŋanaloo bie tɔkpo zɔ̄zɔ̄ŋia sɔ̄ a gaa lu ebuū lo Lok. (Deut 31:10-12) Naadaba, kɔma le pya dɔɔ̄na nu wee dap dabara ekɛɛrɛ nɛɛ sɔ̄ ba bɔŋana bu gbɛnɛ eku lo egbaɛ̄tɔ̄loo lo Lok bu pio awa. (Neh 8:2, 3, 7) Bu pya sɔ̄ ama, kɔkɔ ziī ue a kuī tɛɛ̄nyɔɔ nu a eeloo ziī sɔ̄ wee doo kɔ a waɛbah pya nɛɛ enyɛŋiabu lo dɔ Kpa Kaɛ sa su yere bu dogo. Kɔkɔ ziī ue nu a eeloo ziī sɔ̄ wee yerebah nɛ pya lo nɛɛ kɔ ba a dap nyɛŋiabu pya ue a le doodoo pya daakuu Bari le ye biaɛfii.—Lev 18:4-22; Deut 5:1.

Kɛ̄ a bee lu esere bahloo lo e’ɛma nu doo. Pio gah a le loo Baibol lu e’ɛm nua yɔɔ, doodoo kpa Le-yɔɔ, Yɔɔ Solomon, le Yɔɔ-To. Pio sɔ̄, yɔɔ wee ɛrɛ bee ue ale etaā ue a wee lu esikɛ̄ tɛɛ̄nyɔɔ nu a eeloo ziī sɔ̄ lokwa a yerebah nɛ pya a gaa gbaɛ̄tɔ̄ kɔ ba a dap nyɛŋiabu pya lo ue. Bu edobah, naa ɛp pya ue a le bu kpa Le-yɔɔ 115:9-11 ama, a buū kɔ: “Aa Izrɛl, ture nyiɛ loo Jɛhova!—Alɛ na wa nɛɛ yerebah le wa kpega a. Aā tɔ Erɔn tureaa nyiɛ loo Jɛhova!—Alɛ na wa nɛɛ yerebah le wa kpega a. Bɔɔlo pya bui ɛrɛ bɔɔ loo Jɛhova, tureaa nyiɛ loo Jɛhova!—Alɛ na wa nɛɛ yerebah le wa kpega a.” O yerege nukuādɛɛ̄ loo kɛ̄ pya ue alu ekɔ tɛɛ̄nyɔɔ ama bee dap yerebah doo kɔ pya a gaa bee uɛ lo yɔɔ a dap su pya lo kaka ue a kuī ama seea nyiɛ doo ni?

Ebɛɛ̄ lo ekɔ siībahdɛɛ̄ pya ue a kuī. Pio sɔ̄, pya a bee ɛm Baibol bee ɛm pya etaā ue a kuī nu a eeloo ziī sɔ̄. Bu edobah, sɔ̄ Jɛhova bee nɛ lok pya Izrɛl kɔ ba aa ɔ̄ miī, a bee kɔ nɛ Mozis kɔ a kɔ nu anua wa nɛ gbɛnɛkpo sɔ̄. Bari bee gbī kɔ a baatɛ̄ leere wa nɛ kɔ dum namloo le bu miī, lo a kura kɔ miī tɔɔ̄dɔ dum. (Lev 17:11, 14) Sɔ̄ esaa, sɔ̄ pya nɛɛ lɛɛratam le pya kanɛɛ a bee le Jerusalɛm bee ɛm nu Pya Nɛɛ Kraist naale edoo lokwa ba naa biirebu Bari, ba bee kɔnage siībahdɛɛ̄ nu anua alu ebɛɛ̄ kɔ i tɔɔ̄ aaloo miī.—Doonu 15:20, 29.

Kereadoo alu ekɔ pio ue a le bu Baibol sa sikɛ̄ tɛɛ̄nyɔɔ pio sɔ̄, lo ama naa kura kɔ Jɛhova gbī kɔ i wee kɔ ziī etaā ue a le bu Baibol tɛɛ̄nyɔɔ gbɛnɛkpo sɔ̄. Bu edobah, Jizɔs bee kɔ: “Mɛ sɔ̄ bui taāŋa bui aa su yɔrɔ ue dɛrɛ nyɔɔ ziī.” (Mat 6:7) Lɛɛ a bɔātɛ̄ ekɔ pya nu i dap yere kara kumaloo lo a gbaaloo ekɛɛrɛ Bari. (Mat 6:9-13) Nyɔɔwo, kere ii le ekɔ ziī ue ale etaā ue tɛɛ̄nyɔɔ gbɛnɛkpo sɔ̄ sɔ̄ i gaa yere kara, i dap yere kara kumaloo aba ziī nu gbɛnɛ-edo sɔ̄.—Mat 7:7-11.

A lee kɔ Muɛ̄ Ue Bari tɛɛ̄nyɔɔ ziī ue ale etaā ue gbɛnɛkpo sɔ̄. Alu ziī yɛɛ pya keekee sīdee lo i Nɛɛ-tɔgɛ-nu gaa i su tɔ̄ŋɛ kɛ̄ e’ɛrɛ biī doo.—Ais 48:17, 18.