23 EKOBEE UE ENƆ
YƆƆ 28 Nɛɛ A Dap Yii Gbo Jɛhova
Jɛhova Kue I Kɔ I Lu Saanɛɛ Bu Ye Tɔ
“Na kɛ̄ etɔɔ̄ gaa le le wa loo; e m gaa le lu wa Bari.”—EZEK 37:27.
NU I NƆ
Eyerebah i nɛ kɔ i dābeeloo nu yii bu tɔ-kpo Jɛhova a tɔɔ̄dɔ nu kura, le pya sīdee alɛ i kuudɛɛ̄loo doodoo Tɛ-ɛrɛ-tɔ.
1-2. Amunu kue na Jɛhova yɛgɛ mmɛ loo pya a ye taāŋabah bu bɔture nyiɛ loo a?
LO ZIĪ nɛɛ bip a kɔ, ena Jɛhova lu kiikɛ̄ o le a? O dap agara kɔ, ‘Jɛhova lu na tɛ, na Bari, le na gbo.’ O dapnage kɛɛrɛbu loo pya dɔɔ̄na nu o dap kure Jɛhova. Kerewo, o ɛpge Jɛhova doodoo Tɛ-ɛrɛ-tɔ ni?
2 Mɛnɛ Devid bee su gbaniāloo a le yɛɛ Jɛhova le pya a ye taāŋabah bu bɔture nyiɛ loo, dooreloo gbaniāloo a le yɛɛ tɛ-ɛrɛ-tɔ le nɛɛ saanɛɛ. A bee bip kɔ: “Aa Jɛhova, mɛɛ na a etɔɔ̄ doodoo saanɛɛ bu o tɔ̄-kpo a? Mɛɛ na a etɔɔ̄ nyɔɔ o kpokɛ̄ kaɛ a?” (Yɔɔ 15:1) Aāloo e’ɛma ama, i nɔ kɔ i dap lu pya saanɛɛ bu tɔ Jɛhova lo a le lu ye gbo. Ekɔ lo ama naa lu kue a kuī lo a aabah Jɛhova ni?
JƐHOVA GBĪ KƆ I LU SAANƐƐ BU YE TƆ
3. Tua mɛɛ na Jɛhova bee kue nua ye tɔ a, e ena lo ama bee nua loo baɛ aba a?
3 Lɛɛ Jɛhova gae bee bɔātɛ̄ edɛm dɛ̄dɛɛ̄ nu, alɛ bee le aba ɛɛ. Mɛ sɔ̄ a esaa, a bee dɛm ye tua nwiīnɛɛdam yere bu ye tɔ-kpo a tɔɔ̄dɔ nu. Jɛhova bee le doodoo Tɛ-ɛrɛ-tɔ lo a kue pya nɛɛ nua ye tɔ, e bu ye bee ɛɛ loo ekue pya nɛɛ nua ye tɔ. Baibol bee kɔ ye nwiīnɛɛdam “bee lu ye nu ɛɛbu.” Tua nɛɛ a bee kue nua ye tɔ ama, bee sikɛ̄ “ɛɛŋa kɛ̄ sī [Jɛhova] dɛ̄dɛɛ̄ sɔ̄.”—Kam 8:30.
4. Ba mɛɛ na Jɛhova bee sikɛ̄ kue kɔ ba alu saanɛɛ bu ye tɔ a?
4 Jɛhova bee sikɛ̄ dɛm pya dɔɔ̄na ɛngɛl, sa wa kuenage kɔ ba alu saanɛɛ bu ye tɔ. Pya ye ɛngɛl bee lu ekure “miɔŋɔ Bari” lo a tɔgɛ kɔ ba nyɔɔnɛ Jɛhova le bu ɛɛbu. (Job 38:7; Dan 7:10) Tua sɔ̄, pya a bee lu ye gbo na aba pya atɔɔ̄ bunyɔɔ kɛ̄ alɛ le. Sɔ̄ a esaa a bee yɛgɛ ye butɔ mmɛ loo pya miɔŋɔ nɛɛ a nyɔɔ kɛnɛkɛ̄. Pio pya a bee lu ye gbo na Enok, Noa, Abreham, le Job. Pya a bee ye taāŋabah bu kaka sīdee ama bee lu ekure wa gbo Bari, ale pya a bee nyɔɔnɛ “Bari gbaa kiaŋa.”—Jɛn 5:24; 6:9; Job 29:4; Ais 41:8.
5. Ena i dap nɔ aāloo mɔmanudɛɛ̄ a le bu Ezekiel 37:26, 27 a?
5 Aāge lo sɔ̄, Jɛhova gaa kiisī lo ekue pya ye gbo kɔ ba a lu saanɛɛ bu ye tɔ. (Buū Ezekiel 37:26, 27.) Bu edobah, i nɔ aāloo mɔmanudɛɛ̄ Ezekiel kɔ Bari gbī kɔ pya a ye taāŋabah a ɛrɛ kaāna le gbaniāloo kii kɛ̄ a le. A yira yii lo e “yɔ wa doo yii-bɔma-dum efɛɛloo.” Mɔmanudɛɛ̄ ama kɔ nu akiiloo sɔ̄ pya a ɛrɛ bɛābu lo ekii bunyɔɔ le pya a ɛrɛ bɛābu loo etɔɔ̄ a nyɔɔ kɛnɛkɛ̄ egbaa lu ziī bu tɔ Jɛhova doodoo “ziī eku naana pee.” (Jɔn 10:16) Taɛ lo sɔ̄ na ama!
BARI KUŪ I DƐƐ̄LOO ƐRƐGEBAH KƐ̄ I LE
6. Bu mɛ sīdee na nɛɛ dap yii bu tɔ-kpo Jɛhova a, e mɛ kɛ̄ na Ye tɔ le a?
6 Bu sɔ̄ Baibol, tɔ-kpo ziī ziī nɛɛ wee le kɛ̄ nɛɛ wee seea sa ɛrɛ kpega aāloo zue ale boo. Nɛɛ saanɛɛ a yii bu lo tɔ-kpo wee ɛmadɛɛ̄ kɔ tɛ-ɛrɛ tɔ ekuū ye dɛɛ̄loo leere. Sɔ̄ i kiīloo nɛ Jɛhova sa liamaā i lu saanɛɛ bu ye tɔ-kpo a tɔɔ̄dɔ nu. (Yɔɔ 61:4) I ɛrɛ dɛ̄dɛɛ̄ nu i gbī lo edoo kɔ i gbaniāloo kii kɛ̄ Jɛhova le a agatɛ, sa gbaaloo pya dɔɔ̄na lo ba eyiranage bu tɔ Jɛhova. Tɔ a tɔɔ̄dɔ nu lo Jɛhova i kue nua ama naale aba ziī dɔ, mɛ dɛ̄dɛɛ̄ nɛɛ a le bu dɛ̄dɛɛ̄ nyɔuwe dap yii bu. Pio sɔ̄ o edaba kii dɔɔ̄na edo sa si i kɔnvɛnsɔn, sa zɔŋia pya dɔɔ̄na bu wa gaa ɛɛ lo ele bu tɔ-kpo Jɛhova. Tɔ ama le ɛrɛgebah kɛ̄ pya nɛɛ a ye taāŋabah bu bɔture nyiɛ loo le.—Mum 21:3.
7. Ena a nua i dap kɔ pya a bɔture nyiɛ loo lo ba e’ua lenage aa lu sanɛɛ bu tɔ Jɛhova a? (Ɛpnage foto.)
7 Kiiloo pya a bɔture nyiɛloo lo ba e’ua ni a? A bɔgeloo lo ekɔ ba le bu tɔ Jɛhova ni? Aii! Ena anua i kɔ doo wo a? Nyɔɔnɛbee dua pya nɛɛ ama le dum bu ekɛɛrɛ Jɛhova. Jizɔs bee baatɛ̄ kɔ: “A bee lu edana pya a bee u lɛɛ kɛ̄, kunɛ Moses bee tɔgɛ bu etaā akiiloo nwīgbagbara te, sɔ̄ a bee kue Nɛɛ-a-i-ɛrɛ, Bari lo Abreham, le Bari lo Aisak, le Bari lo Jekob.’ Mɛ a naale Bari pya a e’ua, mɛ loo pya a le dum; nyɔɔnɛbee kɛ̄ a le dɛ̄dɛɛ̄ nɛɛ le dum.”—Luk 20:37, 38.
Kere pya a bɔ ture nyiɛ loo ba e’ua, dapnage lu e’ɛma wadɛɛ̄ doodoo saanɛɛ bu tɔ-kpo Jɛhova (Ɛp 7 barakpaɛ̄)
A MUNU BIĪ NA I ƐRƐ A, E ENA I DOO LO EYII BU TƆ JƐHOVA
8. A munu biī na i ɛrɛ sɔ̄ i lu saanɛɛ bu tɔ Jɛhova a?
8 Dookɛ̄ tɔ wee lu kɛ̄ etɔɔ̄ seea sa kpega pya nɛɛ doo, kɛ̄ tɔ Jɛhova kpeganage pya nɛɛ lɛɛ loo ɛrɛgɛbah nu egbee wa gbaniāloo kiikɛ̄ a le sa wa nɛ bɛābu li deesī doolo. Sɔ̄ i kiisī lo etɔɔ̄ waɛloo Jɛhova, Satan naale edap doo lɔgɔ nu egbee i mmɛ deedee. (Yɔɔ 31:23; 1 Jɔn 3:8) Bu aā nyɔuwe, Jɛhova gaa le kiisī lo ekpega pya a ye taāŋabah bu bɔture nyiɛ loo, naale aba bu edɔɔ̄ mɛ ekpeganage wa lɛɛ bah luh.—Mum 21:4.
9. Ena Jɛhova gbī aābah pya a le bu ye tɔ a?
9 A lu kaāna nu ka i nɛ lo e le bu tɔ Jɛhova, a doo kɔ i le bu ɛɛbu sa ye nyɔɔnɛ ɛrɛ le gbaniāloo. Ena i doo lokwa i kiisī lo ele bu tɔ Jɛhova a? Lo a le ziī nɛɛ kue a nua ye tɔ, o gbī esuā nu a a gbī aābah. Bu edobah, a dap gbī kɔ o lɛa kpa tɔ lɛɛ o gae yii tɔ, e o doo wo. Bu aba lo sīdee, i gbī esuā nu Jɛhova i gbī aābah lokwa i tɔɔ̄ bia bu ye tɔ. Wereloo i ɛrɛ loo Jɛhova zū i kɔ i doo dɛ̄dɛɛ̄ nu i dap “lo edoo nu a ye niā leere.” (Kɔl 1:10) Alu kaka kɔ Jɛhova lu i gbo, kerewo alunage i Bari le i tɛ, a bɔloo kɔ i nɛ ye enwadɛɛ̄. (Yɔɔ 25:14) Kuma sɔ̄ i suā doo wo a, ii le e’ibere nu Jɛhova lu sa kiisī lo enɛ ye enwadɛɛ̄. Dua toga toga enwadɛɛ̄ ama eyerebah i nɛ kɔ i kiī pya elap ebiire ye bu. Nu i gbī edoo dɛ̄dɛɛ̄ sɔ̄ na lo “ekiā bu kumalookɛ̄” nyɔɔnɛ i Bari.—Maika 6:8.
JƐHOVA BEE AARA PYA IZRƐL BU SĪDEE A BƆLOO BIE BU KPO-SAGARA WII
10-11. Bu mɛ sīdee na Jɛhova bee aara pya miɔŋɔ Izrɛl li bu kpo-sagara wii Sinia a, e lo ama tɔgɛ kɔ a naa wee ɛpsī nɛɛ doodoo wa?
10 Jɛhova wee aara pya ye gbo a yii bu ye tɔ bu sīdee a bɔloo. (Rom 2:11) I dap nɔ kɛ̄ Jɛhova bee aara pya ye gbo doo aāloo kɛ̄ a bee aara pya miɔŋɔ Izrɛl bie bu kpo sagara-wii Sinai doo.
11 Sɔ̄ Jɛhova e bee agara pya miɔŋɔ Izrɛl lɛɛ bu zooro li Ijipt, a bee tubobahloo pya wɔp zɔɔ̄ ba esitam bu ye tɔ kaɛ. A bee tubobahloo pya livai kɔ ba a kuudɛɛ̄loo pya dɔɔ̄na esiatam bu ye tɔ kaɛ. Ekɔ Jɛhova bee kuūdɛɛ̄loo pya a sitam bu lo tɔ kaɛ, ale pya atɔɔ̄ kɛ̄ awaɛloo lo tɔ kaɛ, ee pya dɔɔ̄na ni? Eeye! Jɛhova naa wee ɛpsī nɛɛ.
12. Bu mɛ sīdee na kɛ̄ Jɛhova bee aara pya miɔŋɔ Izrɛl doo bie bu kpo-sagara wii tɔgɛ kɔ a naa wee ɛpsī nɛɛ a? (A’aa 40:38) (Ɛpnage foto.)
12 Dɛ̄dɛɛ̄ pya miɔŋɔ Izrɛl bee ɛrɛ dee lo eyii gbo Jɛhova, mɛ a naale aba pya a sitam bu lo tɔ kaɛ ale pya atɔɔ̄ kɛ̄ a waɛ kpaɛ̄ lo tɔ kaɛ. Bu edobah, Jɛhova bee doo kɔ dɛ̄dɛɛ̄ edonyɔɔ Izrɛl a muɛ nyɛŋia bā miā le biira bunyɔɔ lo a bee yira taɛ nyɔɔ lo tɔ kaɛ. (Buū A’aa 40:38.) Sɔ̄ lo biira bunyɔɔ bee kiā, kere pya a le kɛ̄ a biniā loo lo tɔ-kpo bee dap muɛ, sa bɔŋɛnɛloo dɛ̄dɛɛ̄ wa nu, lap wa tɔ kpo sa nyɔɔnɛ pya dɔɔ̄na kiā aa. (Buā 9:15-23) Dɛ̄dɛɛ nɛɛ wee dā muɛ̄ dɔɔ̄ni silver alu efuuri lo etɔgɛ kɛ̄ alu ebɛɛ̄ kɔ dɛ̄dɛɛ̄ nɛɛ a bɔātɛ̄ kiā doo. (Buā 10:2) Nyɔɔwo, kɔ nɛɛ sitam bu tɔ kaɛ, ale a tɔɔ̄ kɛ̄ a waɛloo tɔ kaɛ naa kura kɔ alɛ na alu kaāna gbo Jɛhova ee pya dɔɔ̄na a. Taāwo, dɛ̄dɛɛ̄ pya miɔŋɔ Izrɛl bee dap lu gbo Jɛhova sa suā kɔ alɛ gaa le kpegae wa. Bu aba lo sīdee anii’ee, ɛrɛgebah kɛ̄ i tɔɔ̄ a nyɔɔ kɛnɛkɛ̄, Jɛhova were i loo, i kuūdɛɛ̄loo sa i kpega.
Nɔɔnɔɔ nu Bari kiiloo tɔ-kpo tɔgɛ kɔ a naa wee ɛpsī nɛɛ (Ɛp 12 barakpaɛ̄)
BU ILII DEE AMA JƐHOVA NAA WEE ƐPSĪ NƐƐ
13. Ziī amunu sīdee anii’ee na Jɛhova tɔgɛ kɔ a naa wee ɛpsī nɛɛ a?
13 Pio pya nɛɛ Bari anii’ee tɔɔ̄ waɛ kpaɛ̄ i beekɛ̄ ale tɔ naatam Pya Ekeebee Jɛhova. Pio nɛɛ aa sitam pya kɛ̄ a le doo wo. Nyɔɔwo, pya nɛɛ a le doo wo ɛrɛ dee lo esu dɔ bu pya nu a gaa kiisī lo kɛ̄ ale nyɔɔnɛ pya a gaa zaāsī sitam. Pya dɔɔ̄na sitam doodoo pya a kuūdɛɛ̄loo bɔŋanaloo aā ziī kɛ̄ kii ziī ale pya a sitam mmɛ sɔ̄ bu keebee sīdee. Lo a le o le yɛɛ gbɛnɛ-edo nɛɛ a naa ɛrɛ dee lo esitam kɛ̄ a le doo wo, suā leere kɔ o lu gbo Jɛhova, e alɛ wereloo dɛ̄dɛɛ̄ nɛɛ. A suā a loo leere sa a nɛ pya nu a a bɛɛ̄. (1 Pit 5:7) Dɛ̄dɛɛ̄ pya a gaa taāŋabah Jɛhova anii’ee ɛrɛ nu ede bu edɔɔ̄, leredeebah le kpega.
14. Dɔɔ̄na amunu sīdee na Jɛhova doodoo i Tɛ-ɛrɛ-tɔ tɔgɛ kɔ a naa wee ɛp esī nɛɛ a?
14 Dɔɔ̄na sīdee Jɛhova tɔgɛ kɔ alue Tɛ-ɛrɛ-tɔ a naa wee ɛpsī nɛɛ na lo edoo kɔ Baibol a inaloo dɛ̄dɛɛ̄ nɛɛ aniī’ee. Kpa kaɛ bee dasī lu e’ɛm bu taa muɛ̄ ue, lo a le Hibru, Aramaic, le Grik. Ekɔ pya a bee dap buū tua muɛ ue a bee lu esu ɛma Baibol ama, bee ɛrɛ kaāna gbaniāloo kiikɛ̄ Jɛhova le ee pya dɔɔ̄na ni? Eeye, naale wo.—Mat 11:25.
15. Ena a tɔgɛ kɔ Jɛhova naa wee ɛpsī nɛɛ a? (Ɛpnage foto.)
15 Jɛhova naa kue i nua ye gbo nyɔɔbee i suānu, ale bee i dap buū lo tua muɛ̄ ue a bee lu esu ɛma Baibol. Taā Jɛhova nɛ ye suānu aba pya nɛɛ a suā kpa bu nyɔuwe, a doo kɔ ye suānu a inaloo dɛ̄dɛɛ̄ nɛɛ, kere a doo ba suā gbɛnɛ kpa ale ba naa suā. Ye Muɛ̄ Ue, lo a le Baibol elua etap yere bu booboo muɛ̄ ue; lokwa pya nɛɛ bu dɛ̄dɛɛ̄ nyɔuwe dap ɛrɛ biī aāloo ye tɔgɛnu, sa nɔ kɛ̄ ba dap lu ye gbo doo.—2 Tim 3:16, 17.
Bu mɛ sīdee na kɛ̄ Baibol elua etap yere bu gbɛnɛ-edo muɛ̄ ue doo anii’ee, tɔgɛ kɔ Jɛhova naa wee ɛpsī nɛɛ a? (Ɛp 15 barakpaɛ̄)
KIISĪ LO ETƆƆ̄DUM BU SĪDEE JƐHOVA “ESU” A
16. Dookɛ̄ a le bu kpa Doonu 10:34, 35 doo, bu mɛ sīdee na i kiisī lo etɔɔ̄dum bu sīdee Jɛhova esu i a?
16 Alu gbɛnɛ dee a i kpaā nɛ kɔ Jɛhova su i nua saanɛɛ bu ye tɔ-kpo atɔɔ̄ dɔ nu. Alu Tɛ-ɛrɛ-tɔ alu fɛgɛ, wereloo sa para aara saanɛɛ ee dɛ̄dɛɛ̄ nɛɛ. Gbaāloo wo, a naa wee ɛpsī nɛɛ, a su baɛbah suā dɛ̄dɛɛ̄ nɛɛ kaɛlɛɛ barasī o aa, o edo, buā zua o elua, ale o lu nɛɛdam ale nɛɛwa, ale o suā kpa ale oo suā. Kerewo, aba pya a sere ye lok na a su nua ye gbo a.—Buū Kpa Doonu 10:34, 35.
17. Mɛ kɛ̄ na i dap muɛ dɔɔ̄na ue a kɔ nu i doo lo elu saanɛɛ bu tɔ Jɛhova a?
17 Dookɛ̄ alu e’ɛm bu kpa Le-yɔɔ 5:1 doo, Devid bee bip kɔ: “Aa Jɛhova, mɛɛ na a etɔɔ̄ doodoo saanɛɛ bu o tɔ-kpo a? Mɛɛ na a etɔɔ̄ nyɔɔ o kpokɛ̄ kaɛ a?” Nyɔɔwo, Jɛhova bee su Devid agana pya ebip a le bu kpa le-yɔɔ ama. Bu ekobee ue enyɔɔnɛ i kɔnia pio nu i doo lo etɔɔ̄ waɛloo Jɛhova sa lu ye gbo.
YƆƆ 32 Tɔɔ̄nɛ Jɛhova!
