Ebip Pya A Buū Bip
Ekɔ bee ue akura “Kpega i,” a le bu kpa Le-yɔɔ 12:7, na “pya gbɔɔni” bu ye (5 barakpaɛ̄) ale “yira nu loo Jɛhova” bu ye (6 barakpaɛ̄) ni?
Pya ue a le kpaɛ̄ dɔ ama tɔgɛ kɔ a gaa kɔ nu akiiloo pya nɛɛ.
Kpa Le-yɔɔ 12:1-4 kɔ “pya a bɔloo eture nyiɛ loo epea aa yɛɛ pya miɔŋɔ nɛɛ.” Nyaawo kɛɛrɛbu loo Le-yɔɔ 12:5-7, lo a kɔ.
“‘A lu esu nu lɛɛ bah pya gbɔɔni,
Nyɔnɛbee pya nu bɛɛ̄ gaa nuumi num,
Jɛhova kɔ,’ m gaa le aakɛ̄ anyaawo.
‘M gaa le sere ye kɛ̄ bɔɔ naale.’
Dɛ̄dɛɛ̄ yira nu Jɛhova lu yii a ɛɛ;
Ba doodoo silver a lu eyere bu gbɛnɛ bā-miā nyɔɔ kɛnɛkɛ̄, alu e’ɛɛrɛ ɛrɛba sɔ̄.
Olo, Aa Jɛhova kpega i;
Baɛ i loo dɛ̄dɛɛ̄ sɔ̄ aāloo sɔ̄ eku ama.”
Ye 5 barakpaɛ̄ kɔ nu Bari gaa le doo nɛ pya “gbɔɔni.” A gaa le kpɔā wa.
Ye 6 barakpaɛ̄ kɔ yereloo kɔ “dɛ̄dɛɛ yira nu Jɛhova lu nu a ɛɛ,” ‘doodoo silver alu eyere bu gbɛnɛ bā-miā.’ Ue ama tɔgɛ kɛ̄ pya ue Jɛhova tɔɔ̄loo Pya Nɛɛ Kraist doo.—Yɔɔ 18:30; 119:140.
Naa kɛɛrɛbu loo dɔɔ̄na barakpaɛ̄ a nyɔɔnɛ, Le-yɔɔ 12:7: “Olo Aa Jɛhova, Kpega i; baɛ i loo dɛ̄dɛɛ̄ sɔ̄ aābu sɔ̄ eku ama.” Ena bee ue akura “i” gaa kɔ nu kiiloo a?
Nyɔnɛbee ye 7 barakpaɛ̄ a nyɔɔnɛ ye 6 barakpaɛ̄ kɔ “dɛ̄dɛɛ̄ yira nu Jɛhova,” doo kɔ pio nɛɛ a kɛɛrɛ kɔ “i” gaa kɔ nu a kiiloo yira nu Bari. E i suā kɔ kaɛlɛɛ epiaga pya nɛɛ doo lo egbeesī Baibol a le ɔbɛ ye, Jɛhova ekiirasī loe baɛloo Baibol lo a le ye Muɛ̄ Ue.—Ais 40:8; 1 Pit 1:25.
Mɛ alunage kaka kɔ Jɛhova gaa kpega pya ye nɛɛ dookɛ̄ ye 5 barakpaɛ̄ kɔ doo. Jɛhova gaa kpega pya ye nɛɛ e a gaa le kiinagesī lo eyerebah sa kpɔā “pya gbɔɔni” le pya a lu “esu nu lɛɛ bah.”—Job 36:15; Le-yɔɔ 6:4; 31:1, 2; 54:7; 145:20.
Nyɔɔwo, ena “i” alu ekɔ bu ye 7 barakpaɛ̄ gaa kɔ nu kiiloo a?
Nu alu e’ɛm bu kpa le-yɔɔ ama tɔgɛ kɔ “i” alu esu kɔā ue ama aa kɔ nu akiiloo pya nɛɛ.
Bɔātɛ̄ loo kpa Le-yɔɔ 12:1 Devid bee kɔ nu kumaloo “pya nɛɛ a bɔ ture nyiɛ loo” lo pya bag dogo ekɔa esah wa nɛ. I buū ue akɔ Jɛhova gaa le aakɛ̄ lo edoo pya a kɔ esah ale pɔrɔ ue. Nɛɛ ɛm le-yɔɔ nɛ i bɛābu kɔ i dap dɛrɛ nyiɛ nyɔɔ kɔ Bari gaa le aakɛ̄ lo edoo dogo nyɔɔ pya ye nɛɛ nyɔnɛbee a kɔ, pya ye yira nu ɛɛ.
Nyɔɔwo ye 7 barakpaɛ̄ kɔ Jɛhova gaa le kpega “i,” sa baɛ loo pya gbɔɔni, alu e biī nɛ kɛ̄ tɛ̄mabah pya bag dogo.
Bee ue akura “i” alu esu kɔa ue bu dɔ ama bee lunage esu kɔa ue bu pya kpa alu edɛrɛ nyiɛ nyɔɔ lo a bee lu esu muɛ̄ ue Hibru ɛma. Lo tatap Baibol akura, Grik Septuagint su “i” kɔa ue baɛ sɔ̄ bu 7 barakpaɛ̄, lo a kɔ nu akiiloo pya a bɔ ture nyiɛ loo, lo a le pya gbɔɔni alu ebiī nɛ kɛ̄. Bu ye kpɛdumɛ, ye 7 barakpaɛ̄ kɔ “ziī ziī nɛɛ yɛɛ” pya a bɔture nyiɛ loo elu ekpega wa aābu lo “sɔ̄ eku ama,” aābah pya bag dogo. (Yɔɔ 12:7, 8) Ye 7 barakpaɛ̄ bu lo tatap alu e’ɛm aābu muɛ̄ ue Hibru kuma bu muɛ̄ ue Aramaic buū kɔ: “Olo, Aa Nɛɛ-a-i-ɛrɛ, gaa le kpega pya kaāna dogo, o gaa le baɛ wa loo aābu lo pɔrɔ sɔ̄ eku ama mmɛ deedee. Pya bag dogo kiāŋa kiisī nɛ dumɛ, doodoo zī a wee ɔ̄ mii loo nɛɛ.” Lo ama tɔgɛnage i kɔ kpa Le-yɔɔ 12:7 naa gaa kɔ nu a kiiloo pya yira nu Bari.
Nyɔɔwo, lo ama nɛ bɛābu “pya a bɔ ture nyiɛ loo,” kɔ Bari gaa le kpega wa.
