DƐ̄DƐƐ̄ ii yiga kɔ Jɛhova gaa lere dee bah sa nɛ nuede bu edɔɔ̄ pya ye nɛɛ bu “kpɛdumɛ dee” ama. (2 Tim 3:1) A kuu ziī ziī ii lo egbaɛ̄tɔ̄loo Jɛhova. I dap su i kɛ̄tɔɔ̄ dooreloo lo pya Izrɛl sɔ̄ ba bee le bu kpo-sagara wii. Bee lu ebɛɛ̄ kɔ ba a doo dogo kumaloo lo muɛ̄ dɔɔ̄ni.

Jɛhova bee kɔ nɛ Mozis kɔ a kwa baɛ dɔɔ̄ni silver lokwa a “lu nu koma bɔŋanaloo a, le sɔ̄ lubara tɔ-kpo.” (Buā 10:2) Wee lu ekɔ pya wɔp zɔɔ a fuuri pya lo dɔɔ̄ni bu keekee sīdee lokwa pya nɛɛ suā nu alu ebɛɛ̄ kɔ ba a doo. (Buā 10:3-8) Nii’ee, pya nɛɛ Bari ɛrɛ nage zuurabahtɔ̄ bu keekee sīdee. Naa ɛp taa sīdee a i nyɛŋiabu dɔɔ̄ni a wee lu ekoma kue a dee kere. Wee lu ekue pya nɛɛ Bari anii’ee loo keekee gbɛnɛ bɔŋanaloo, e pya alu etubobaloo kɔ ba a kuūdɛɛ̄loo wee lu ekpɔā sa a wee lunage enyaana ale kwabaloo pya nɔɔnɔɔnu bu bɔŋanaloo.

Sɔ̄ Jɛhova gbī kɔ “dɛ̄dɛɛ̄ bɔŋanaloo” a gbaa bɔŋia naɛsī kɛ̄ enaani wee sira aa loo kɛ̄ tɛ̄ma yima tɔkpo, pya wɔp zɔɔ wee fuuri baɛ lo dɔɔ̄ni. (Buā 10:3) Dɛ̄dɛɛ̄ pya ba tɔɔ̄ tɛɛ̄ ɛŋɛnɛ lo tɔkaɛ lo ba le bu nia eku wee dā muɛ̄ a. Pya ba tɔɔ̄ kɛ̄ a waɛloo nudee wee dasī ina kɛ̄. Wee su sɔ̄ le epiaga bah pya ba le kɛ̄ a binia lo e’ina kɛ̄. Kaɛlɛɛ ɛrɛgeba kɛ̄ ba le, Jɛhova wee gbī kɔ dɛ̄dɛɛ̄ nɛɛ a bɔŋia sa dā ye zuurabahtɔ̄.

Nii’ee, ii bɔŋia na bu tɔkpo, mɛ alu ekue i loo bɔŋanaloo pya nɛɛ Bari. Lo ama na pya i kɔnvɛnsɔn ziī ziī barasī, le pya dɔɔ̄na keebee doonu, kɛ̄ i wee ɛrɛ pya zuurabahtɔ̄ le yereue a kuī. Bu keekee edo tɛɛ̄ ɛŋɛnɛ nyɔuwe, pya nɛɛ Jɛhova ɛrɛ nage ekpeloo loo aba doonu ama. Nyɔɔwo, pya a si lo kue wee le yɛɛ eku pya nɛɛ a ɛrɛ ɛɛbu. Pio aba wee aa kɛ̄ a binia gbɛnɛ. Kerewo, pya a si wee muɛ̄ kɔ biī ba ɛrɛ wee kuī ee ɛrɛgeba epiaga ba bee doo lo esi.

E pya a le kɛ̄ a binia aāloo kɛ̄ lo bɔŋanaloo gaa le sudɔ a? Aāloo pya aā nu elua ekwa anii’ee, gbɛnɛ-edo pya a le doowo wee ɛrɛ biī aāloo lo doonu sa a bee kɔ ba le taɛ lo kɛ̄. Bu edoba, ziī sɔ̄ a bee lu eyere nɛɛ aā i bee kɛ̄, tɔ naa tam a le Benin bee doo kɔ pya a le Arlit, Niger alu ziī buɛ̄ a aaloo Sahara Desert a gbaa wa loo tɛ̄maloo e’ɛp aā nyɔɔ TV. Tup le ziī pya wuga nɛɛdam le nɛɛwa le pya a si enɔānu aā bee wa gbaaloo. Kaɛlɛɛ kɔ ba bee le kaāna kɛ̄ a binia, a bee wa tɔɔ̄loo kɔ ba lenage  yɛɛ 44,131 pya a bee si. Ziī wuga nɛɛdam bee ɛm kɔ: “M doo i yaa aā taɛ bu na beenyiɛ kɔ bui doo kɔ i ɛp lo doonu ama. A tɔgɛ i dua kɛ̄ bui gaa i kɛɛrɛbu loo doo.”

Sɔ̄ pya wɔp zɔɔ li Izrɛl wee fuuri aba ziī ka lo dɔɔ̄ni, aba “pya nɛɛ-bee, pya tɛ edo” na a wee lu bu tɔkpo zɔzɔŋia a. (Buā 10:4) Lo kɛ̄ na ba wee dap ɛrɛ yereue le kpɔā aābah Mozis a. Lo ama eyerebah wa nɛ kɔ ba a dap si wa tam bu ziī ziī wa edo. Lo o bee lu ziī pya lo nɛɛ-bee, o bee dooge kuma kɛ̄ o dap doo lo ele kɛ̄ sa ɛrɛ biī aāloo ni?

Nii’ee, pya kanɛɛ bu bɔŋanaloo naa le pya “nɛɛbee,” e ba naa bɛɛ pya naana pee Bari a wa le kɛ̄bah. (1 Pit 5:1-3) Mɛ ba piiga kuma kɛ̄ ba dap doo lo ekuūdɛɛ̄loo gbo naana a wa le kɛ̄bah. Wo doo kɔ ba a le kɛ̄ sɔ̄ alu ekue wa kɔ ba a si tɔkpa Kingdom Ministry School kɛ̄ alu ekpɔā wa. Bie lo kɛ̄, pya kanɛɛ wee nɔ yereloo kɛ̄ ba dap kuūdɛɛ̄loo pya kɛ̄tɔɔ̄ a le bu bɔŋanaloo doo. Lo ama wee doo nage kɔ ba a sikɛ̄ tɔɔ̄ waɛloo Jɛhova kaāna. Kere o sii si lɔgɔ tɔkpa ama, alu kaka kɔ o gaa ɛrɛ biī aāloo pya nɛɛ ba ebee si.

Pio sɔ̄ pya wɔp zɔɔ li Izrɛl wee nyania muɛ̄ sɔ̄ ba gaa fuuri dɔɔ̄ni. Sɔ̄ alu edoo wo, a gaa lu enɛ muɛ̄ kɔ Jɛhova gbī kɔ dɛ̄dɛɛ̄ nɛɛ a kiā kiisī. (Buā 10:5, 6) Sɔ̄ a gaa lu edana pya lo tɔkpo kuma sī, ba wee doo nyɔɔ etaā, kerewo a wee lu kaāna tam lo edoo wo. Wee agabah pio aba edana wa tɔkpo lɛɛ dɔ kuma dɔɔ̄na kɛ̄. E na anua a?

Siga sɔ̄, pio aba wee kɔ ba edorae wo gbɛnɛ-edo sɔ̄, e pio sɔ̄ lu sɔ̄ ba naa wee ɛmadɛɛ̄. “Pio sɔ̄ biira-bunyɔɔ bee tɔɔ̄ aāloo sɔ̄ uunɛ mmɛ sɔ̄ lɔɔrɛ.” Siga sɔ̄, a wee wa su “baɛ bira dee, ale ziī enɔɔ̄, ale ee wo” bah lo edana wa tɔkpo. (Buā 9:21, 22) Ku sɔ̄ na a wee lu edana pya tɔkpo ama a? Kpa Buā 33 ekobee kɔ nu alu 40 keekee kɛ̄ pya Izrɛl bee tɔɔ̄.

Siga sɔ̄, pio aba wee dap gbī kɛ̄ alu ekoo tɔɔ muɛ̄. Bee lee kaāna lo edap muɛ̄ kɛ̄ ekoo tɔɔ bie bu “gbɛnɛ kpo-sagara-wii a lu bɔɔ” ama. (Deut 1:19) Wo bee doo kɔ pio aba a kɛɛrɛ kɔ lo ba aae lo kɛ̄, e’aga emuɛ̄ kɛ̄ esikɛ̄ wa lee loo.

Aba sɔ̄ ba ebɔātɛ̄ e’aa lo kɛ̄, wee dap agabah pio aba etɔɔ̄ baɛ mmɛ sɔ̄ elu ekɔ ba a dana wa tɔkpo. Dɛ̄dɛɛ̄ nɛɛ wee dā sɔ̄ lo dɔɔ̄ni siā muɛ̄, mɛ dɛ̄dɛɛ̄ aba naale edap gbaa kiā aba sɔ̄. Tua sɔ̄ alu efuuri lo dɔɔ̄ni agɛrɛ muɛ̄ pya lo gā a le dee kɛ̄ enaani wee sira aa lo a le gā Juda, Isaka, le Zebulun ebɔātɛ̄ ekiā. (Buā 2:3-7; 10:5, 6) Sɔ̄ ba ekiā kiisī, pya wɔp zɔɔ wee sikɛ̄ fuuri lo dɔɔ̄ni agɛrɛ muɛ̄ lo eree baɛ sɔ̄ lo ekɔ nɛ pya lo gā a le dee kerekɛ̄ kɔ ba a kiā. Pya wɔp zɔɔ wee kiisī lo edoo wo mmɛ sɔ̄ dɛ̄dɛɛ̄ lo bɔŋanaloo e’aara lo kɛ̄.

Dap lu kɔ a aga a loo enyɔɔnɛ pio kwabaloo nu alu edoo bu bɔŋanaloo. Dap a mma-dɛɛ̄ sɔ̄ o muɛ̄ pio nyaa alu edoo lo oo bee ɛmadɛɛ̄. Ale bee pio nɔɔnɔɔnu ebee a suloo sa oo gbī kɔ alu enyaana. Lo o gaa kpesī ɛrɛgeba kɛ̄tɔɔ̄ ama, dap a agabah enyaa sa nɔ lo aā sīdee kɛ̄ alu enɔɔ nu doo. Kerewo, lo i piiga lo edoo dogo kumaloo dookɛ̄ a bɔloo doo, i muɛ̄ kɔ Jɛhova gaa i nɛ leelee.

Bu dee Mozis, Jɛhova bee baɛloo gbɛnɛ-edo miliɔn pya nɛɛdam, nɛɛwa le gbomiɔŋɔ tɛ̄mabu kpo-sagara wii. Lo a naa bee wa kuūdɛɛ̄loo sa wa leredee bah, ba naale ebee dap tɛɛ̄ yeebah. Nii’ee, i kiisī leere bu edɔɔ̄ tɛ̄maloo yerebah a aabah Jɛhova. A doo kɔ i nyim kiisī leere! Nyɔɔwo, doraa dɛ̄dɛɛ̄ ii i biaɛfii lo edoo dogo kumaloo muɛ̄ dɔɔ̄ni dookɛ̄ pya Izrɛl a bee yira agɛrɛ a, bee doo!