25 EKOBEE UE ENƆ
“Mda, Mdaa Loo Gaa Le Gbī Na Gbo Naana”
“Mda mdaa loo gaa le gbī na gbo naana, sa gaa le gbī wa muɛ̄.”—EZEK 34:11.
YƆƆ 105 “Bari Na Wereloo”
DASĪ TƐƐ̄NYƆƆ *
1. Bu mɛ sīdee na Jɛhova le doodoo ka a gaa nɛ mah nwiī a?
“ZIĪ wa dapge ibere ye nwiī a gaa ɔ̄ mah ni?” Jɛhova bee bip ebip ama bu dee nɛɛ mɔmanudɛɛ̄ Aisaia. (Ais 49:15) Bari bee kɔ nɛ pya ye nɛɛ kɔ, “Kere pya lo ba ama ibere mɛ, mm lee ibere a.” A naa wee bialoo su ye loo dooreloo ka. Kerewo, a bee doowo taɛ lo sɔ̄ ama. Jɛhova bee su gbaaloo a le yɛɛ nwiī le ka dooreloo gbaaloo a ɛrɛ kumakɛ̄ pya ye zooro le. Gbɛnɛ-edo pya ka dap kɛɛrɛ nu dookɛ̄ ziī wuga nɛɛwa a kura Jasmin bee doo lo a kɔ, “Sɔ̄ o nɛ mah o nwiī, o nyɔɔnɛ ye ɛrɛ gbaaloo a etɔɔ̄ dɛ̄dɛɛ̄ ye dee tɔɔ̄dum.”
2. Tɔɔ̄ loo Jɛhova doodoo wa sɔ̄ ziī ye zooro ye aaloo ni?
2 Jɛhova wee suā sɔ̄ ziī ye zooro ɔbɛ si enɔānu le si uwe zue ue. Naa kɛɛrɛ kɛ̄ a ziloo Jɛhova doo sɔ̄ gbɛnɛ-edo pya ye zooro ɔloo * bu ziī ziī zua.
3. E na Jɛhova gbī a?
3 Gbɛnɛkpo pya i wuga nɛɛdam le nɛɛwa ba bee ɔloo wee obia lu bu bɔŋanaloo, sa a wee lu esu baɛ bah wa suā! Jɛhova gbī kɔ ba a obia lu, e nu ili gbī nage lo. (1 Pit 2:25) Bu mɛ sīdee na i dap yerebah kɔ ba a obia lu ani? Lɛɛ i gae agara ebip ama, elee i suā nu anua pio aba ɔbɛ esi enɔānu le si uwe zue ue.
E NA ANUA PIO NƐƐ ƆBƐ ESITAM NƐ JƐHOVA A?
4. Bu mɛ sīdee na tam ɛrɛ pah nyɔɔ pio nɛɛ a?
4 Pio nɛɛ esua wa tam nua gbɛnɛ ee ɛrɛgeba dɔɔ̄na nu bu dum. Ziī wuga nɛɛdam a kura Hung lo a wee tɔɔ̄ Southeast Asia * bee kɔ: “M bee si tam yeekɛ̄ ee kɛ̄ a bɔloo doo, m bee doo nu ezu tɛ̄maloo ekɔ nɛ aba mm kɔ lo m ɛrɛ gbɛnɛkpo kpugi, m dap si tam nɛ Jɛhova leere. Nyɔɔwo m bee su gbɛnɛkpo sɔ̄ siātam. E m bee bɔātɛ̄ ewee lɔɛ enɔānu mmɛ sɔ̄ mm bee sina doo pippip. A bee kɔ Setan su nyɔuwe zuūna pya nɛɛ lɛɛloo Bari kinakina.”
5. Pya amunu keekee taāŋa na a bee zia ziī i wuga nɛɛwa a?
5 Pio pya i wuga nɛɛdam le nɛɛwa gaa tɛɛ̄ bu gbɛnɛkpo taāŋa lo a wa ɔɛloo. Anne alu Britain ɛrɛ o’oo bee nwiī. A bee kɔ, “Ziī na nwiīnɛɛdam bee ɛrɛ boh sɔ̄ a bee mɛā. Sɔ̄ sɔ̄ etɛ̄na, bee lu ekpo ziī na nwiīnɛɛwa lɛɛ bu bɔŋanaloo, e na saaro bee bɔdaa. A bee mɛ taɛ̄ŋɛ mmɛ sɔ̄ m ɔbɛ si enɔānu le uwe zue ue. Bu kpɛdumɛ, m bee ɔloo.” I to esaɛ̄ Anne le pya ye butɔ gbaāloo dɛ̄dɛɛ̄ pya a gaa tɛɛ̄ bu dua taāŋa ama!
6. E na anua nɛɛ dap dɔ aaloo Jɛhova sɔ̄ a naa su nu a le bu kpa Pya Kɔlɔsi 3:13 daānu a?
6 Buū Pya Kɔlɔsi 3:13. Pio pya zooro Jɛhova e’ɛrɛ biirabu nyɔɔ nu pya dɔɔ̄na wuga wa doo loo. Nɛɛ lɛɛratam Pɔɔl bee yere nukuādɛɛ̄ loo lo ama, sɔ̄ a bee kɔ pya i wuga nɛɛdam ale nɛɛwa dap i “pima ue.” Dap lu kɔ elua ebiaɛ i bu pɔrɔ sīdee. Lo ii nwaɛ̄dɛɛ̄, i dap ɛrɛ biirabu yeekɛ̄. Biirabu dap doo kɔ nɛɛ a lɛɛbaloo etaāŋabah Jɛhova. Naa kɛɛrɛbu nu a bee sira loo wuga nɛɛdam a kura Pablo a wee tɔɔ̄ South America. Bee lu edɛrɛ ye ue kɔ a bee doo pɔrɔ nu sa a lu elɛɛ ye dɔtam bah bu bɔŋanaloo. E na a bee doo ani? Pablo bee kɔ, “Bu mɛ bee biira, e kina kina m bee dɔ aabu bɔŋanaloo.”
7. E na a dap siraloo nɛɛ ye ekɛɛrɛ beenyiɛ ye bege ue a?
7 Ekɛɛrɛ beenyiɛ nɛɛ dap le gaa ye bege ue nyɔɔbee a ebee dɔ lok Bari sɔ̄ akii adumɛ, sa kɛɛrɛ kɔ Bari naa werenae ye loo. Kere ekiiya sa elua e’aaloo ye nɛ, a dap kɛɛrɛ kɔ a naa bɔnaeloo ele yɛɛ pya nɛɛ Bari. Kɛ̄ a bee tɔɔ̄ loo ziī wuga a kura Francisco doolo. A bee kɔ, “bee lu ekamɛnɛ mɛ nyɔɔ kunagā. Kere m bee kiisī lo esi enɔānu tua sɔ̄, loo mɛ bee bɔātɛ̄ e’ɔ sa m bee kɛɛrɛ kɔ mm bɔnaloo etɔɔ̄ yɛɛ pya nɛɛ Jɛhova. Na ekɛɛrɛ beenyiɛ bee mɛ taɛ̄ŋɛ, sa m bee kɛɛrɛ kɔ Jɛhova sii mɛ aaloo nɛ. Sɔ̄ sɔ̄ gaa kiisī, m bee ɔbɛ si enɔānu le si uwe zue ue.” Pya kɛ̄tɔɔ̄ alu ekɔ lo pya wuga nɛɛdam le nɛɛwa bee tɛɛ̄bu ama tɔɔ̄ a loo doodoo wa? O toge wa esaɛ̄ ni? Lo a kuī na bee Jɛhova ɛp wa doodoo wa ni?
JƐHOVA WERELOO PYA YE NAANA PEE
Nɛɛ Izrɛl a gaa kuūdɛɛ̄loo ye naana pee a bee pe (Ɛp 8-9 barakpaɛ̄) *
8. Ekɔ Jɛhova ibere pya a bee ye sitam nɛ sɔ̄ akii adumɛ ni? Naa baatɛ̄.
8 Jɛhova naa ibere pya a bee ye sitam nɛ sɔ̄ akii adumɛ lo ba naa gaa bee ye sina tam nɛ bu pio sɔ̄ lo. E a naa ibere tam ba bee ye si nɛ. (Hib 6:10) Nɛɛ mɔmanudɛɛ̄ Aisaia bee ɛm ziī le nu edoba a tɔgɛ kɛ̄ Jɛhova kuūdɛɛ̄loo pya ye nɛɛ doo. Aisaia bee ɛm kɔ, “a gaa le nɛ nuede ye gbo naana doodoo nɛɛ tɔɔ̄loo naana pee, a ebɔŋɛnɛloo miɔŋɔ naana bu bah ye, a gaa le taba wa loo beenyiɛ ye sa kɛɛrɛloo ture pya a gaa nɛ mah miɔŋɔ.” (Aisaia 40:11) A tɔɔ̄loo Gbɛnɛ nɛɛ Tɔɔ̄loo naana doodoo wa sɔ̄ ziī ye naana dag aa yɛɛ ye gbo naana ni? Jizɔs bee tɔgɛ kɛ̄ nu tɔɔ̄loo Jɛhova doo sɔ̄ a bee bip pya a wee ye nyɔɔnɛ dumɛ kɔ: “E na bui kɛɛrɛ ani? Lo a le ziī nɛɛ ɛrɛ o’oo tup naana pee, sa ziī aba bee dag aaloo, naale elɛɛbaloo nia tup le lop le ɛrɛnia bie nyɔɔ kpokɛ̄ sa kii wee gbī lo a bee dag ni? E lo a le a gbī ye muɛ, kaka, m kɔ i nɛ, a e ɛɛŋa ye nyɔɔ eenyɔɔ nia tup le lop le ɛrɛnia a naa bee dag” a.—Mat 18:12, 13.
9. Bu sɔ̄ a bee lu e’ɛm Baibol, le nɛɛ tɔɔ̄loo naana pee wee aara ye gbo naana doodoo wa? (Ɛp foto a le nyɔɔ eko.)
9 E na anua a bɔloo esu Jɛhova dooreloo nɛɛ tɔɔ̄loo naana pee a? Nyɔnɛbee bu sɔ̄ a bee lu e’ɛm Baibol, le nɛɛ tɔɔ̄loo naana pee wee kuūdɛɛ̄loo ye naana leere. Bu edoba, Devid bee bebe loo sasa-ekpo le bear lo ekpega ye gbo naana. (1 Sam 17:34, 35) Le nɛɛ tɔɔ̄loo naana pee wee suā sɔ̄ ziī ye naana pe. (Jɔn 10:3, 14) Dua nɛɛ tɔɔ̄loo naana pee ama elɛɛbaloo 99 naana bie bu gɔh ale bie kpaɛ̄ dɔɔ̄na nɛɛ tɔɔ̄loo naana pee sa a kii wee gbī lo a bee pe a. Jizɔs bee su lo nu edoba tɔŋɛ ziī gbɛnɛ nu a kuī, a bee kɔ: “Lu nu a naa lee kɛ̄ sī bui Tɛ li bunyɔɔ kɔmɛ ziī yɛɛ pya lo nwīgbagbara ama a pe.”—Mat 18:14.
Ziī nɛɛ a wee tɔɔ̄loo naana pee bie Izrɛl a dee kere gaa kuūdɛɛ̄loo ye naana pee a bee pe (Ɛp 9 barakpaɛ̄)
JƐHOVA GBĪ PYA YE NAANA PEE
10. Dookɛ̄ kpa Ezekiel 34:11-16 kɔ doo, amunu yii na Jɛhova yira nɛ ye naana pee a bee pe a?
10 Jɛhova wereloo ziī ziī ii, gbaāloo pya “lo nwīgbagbara” lo ba edaga aa yɛɛ ye gbo naana pee. Tɛ̄maloo nɛɛ mɔmanudɛɛ̄ Ezekiɛl, Bari bee kɔ a egbī pya naana pee a bee pe sa wa yerebah nɛ kɔ ba a ɛrɛ nwanaloo bu edɔɔ̄. E a kɔ pya nu edoo lo e’agara wa, lo alu nu nɛɛ tɔɔ̄loo naana pee li Izrɛl wee doo sɔ̄ ziī ye naana pee pe. (Buū Ezekiel 34:11-16.) Bu tua dɔ, nɛɛ tɔɔ̄loo naana pee wee gbī ye naana pee, lo a dap ye su gbɛnɛkpo sɔ̄ le epiaga bah. Sɔ̄ emɔna lo a bee pe a, nɛɛ tɔɔ̄loo naana pee a wee ye obara sere yɛɛ gbo naana pee a le bu gɔh a. Sɔ̄ esaa, lo muū yii ye loo ale loo ye lɛɛ, nɛɛ tɔɔ̄loo naana pee wee yerebah nɛ lo nam, bo ye muū, ye dana, sa ye nɛ nuede. Lu ebɛɛ̄ kɔ pya kanɛɛ, lo ba lu pya tɔɔ̄loo “naana pee Bari” a doo nage wo lo eyerebah nɛ ɛrɛgeba aba edaga aabu bɔŋanaloo. (1 Pit 5:2, 3) Pya kanɛɛ gbī wa, wa yerebah nɛ kɔ ba a obia lu bu bɔŋanaloo, sa wa tɔgɛ wereloo tɛ̄maloo eyerebah wa nɛ kɔ ba alu gbo Jɛhova. *
11. E na le nɛɛ tɔɔ̄loo naana pee wee dābeeloo a?
11 Le nɛɛ tɔɔ̄loo naana pee wee dābeeloo kɔ naana dap pe. E lo ziī naana dag aa yɛɛ gbo naana pee, nɛɛ tɔɔ̄loo naana pee naa wee ye aara bu pɔrɔ sīdee. Naa kɛɛrɛbu edoba Bari sere kɛ̄ i nɛ, sɔ̄ a bee yerebah nɛ pio pya ye zooro lo ba bee ye aaloo bu pio sɔ̄.
12. Jɛhova bee nyɔɔnɛ Jona dania nu doodoo wa ni?
12 Nɛɛ mɔmanudɛɛ̄ Jona bee teera aaloo tam a bee lu enɛ ye. Kerewo, Jɛhova naa bee nwaabah lɛɛbaloo Jona. Doodoo le nɛɛ tɔɔ̄loo naana pee, Jɛhova bee ye agara sa ye yerebah nɛ kɔ a ɛrɛ mɛm lo edap si tam a bee lu enɛ ye. (Jona 2:7; 3:1, 2) Sɔ̄ esaa, Bari bee su zu ekɔp te yeābah nɛ Jona kɔ a dābeeloo kɛ̄ dum ziī ziī nɛɛ kuī doo. (Jona 4:10, 11) E na lo ama i tɔgɛ ani? Pya kanɛɛ aa nwaabah lɛɛbaloo pya a ɔloo. Taāwo, pya kanɛɛ epiiga lo esuā nu anua sa ziī naana pee dag aa yɛɛ eku naana pee a. E sɔ̄ lo naana pee obia lu loo Jɛhova, pya kanɛɛ ekiisī lo etɔgɛ ye wereloo.
13. E na i dap nɔ aāloo sīdee Jɛhova bee nyɔɔnɛ nɛɛ a bee ɛm kpa Le-yɔɔ 73 ekobee dania nu a?
13 Nɛɛ a bee ɛm kpa Le-yɔɔ 73 ekobee bee ɛrɛ e’ɔaloo sɔ̄ a bee muɛ̄ kɛ̄ pya bag dogo gaa kiisī doo. A bee bɔātɛ̄ ekɛɛrɛ lo a le doo nu Bari gbī dɔge biī naa e. (Yɔɔ 73:12, 13, 16) E na Jɛhova bee doo ani? A naa bee kiī lo nɛɛ. Bu kaka, Bari bee doo kɔ alu e’ɛm pya ue ama bu Baibol. A bee sira kɔ, lo nɛɛ ɛm le-yɔɔ bee suā kɔ ɛrɛ le gbanialoo kumaloo Jɛhova lee eenyɔɔ ɛrɛgeba nu, a doo kɔ dum a dɔbiī. (Yɔɔ 73:23, 24, 26, 28) E na i nɔ aāloo a? Pya kanɛɛ aa nwaabah biaɛ pya a ɛrɛ baɛbaɛ beenyiɛ loo sisi tam nɛ Jɛhova. Taā ba wa gbɛ, pya kanɛɛ epiiga lo esuā nu anua ba kɔ ue sa doo dogo bu sīdee a le doowo. Lo sɔ̄ na pya kanɛɛ edap su Kpa Kaɛ wa yeābah nɛ bu sīdee a bɔloo a.
14. E na anua Elaija bee gbī yerebah a, e bu mɛ sīdee na Jɛhova bee ye yerebah nɛ a?
14 Nɛɛ mɔmanudɛɛ̄ Elaija bee teera aaloo Jezibɛl. (1 Mɛnɛ 19:1-3) A bee kɛɛrɛ kɔ lɔgɔ nɛɛ naa gaa bee sina tam nɛ Jɛhova doodoo nɛɛ mɔmanudɛɛ̄, sa bee bura kɔ ye esiatam naa dɔna lɔgɔ biī. Kɛ̄tɔɔ̄ ama bee nɛ taāŋa Elaija mmɛ lo dɔ a gbī e’u. (1 Mɛnɛ 19:4, 10) Taā Jɛhova gbɛ Elaija, a bee ye kɔ nɛ kɔ a naa le aba ɛɛ, e a dap dɛɛa nyɔɔ ekpo a aabah Jɛhova, le kɔ a ɛrɛ gbɛnɛ-edo tam esi. Jɛhova bee gbaɛ̄tɔloo Elaija bu fɛgɛ sa ye nɛ aā tam esi. (1 Mɛnɛ 19:11-16, 18) E na i nɔ aāloo ani? Dɛ̄dɛɛ̄ ii ɛrɛ e’aara pya zooro Jɛhova bu sīdee a lee, eetɔɔ̄ na pya kanɛɛ. Kere bu ziī nɛɛ biira ale a kɛɛrɛ kɔ Jɛhova naale e’aanae loo ye nɛ, pya kanɛɛ ɛrɛ egbaɛ̄ ye tɔ̄loo kuma sɔ̄ a gaa kɔ kɛ̄ nu ye tɔɔ̄loo doo. Lo sɔ̄ na ba edap yerebah nɛ nɛɛ a ebee dag aaloo Jɛhova a kɔ a suā kɔ Jɛhova weree ye loo a.
I ƐP NAANA PEE BARI A BEE PE DOODOO WA NI?
15. Dookɛ̄ kpa Jɔn 6:39 kɔ doo, Jizɔs bee ɛp pya naana pee ye Tɛ doodoo wa?
15 Jɛhova gbī kɔ i ɛp pya ye naana pee a bee pe doodoo wa ni? Jizɔs bee i sere edoba kɛ̄ nɛ. A suā kɔ dɛ̄dɛɛ̄ naana pee Bari kuī ye loo, nyɔɔwo Jizɔs bee doo dɛ̄dɛɛ̄ nu a dap doo lo eyerebah nɛ “naana pee a bee pe loo tɔ Izrɛl” kɔ a obia lu loo Jɛhova. (Mat 15:24; Luk 19:9, 10) Doodoo le nɛɛ tɔɔ̄loo naana pee, Jizɔs bee doo dɛ̄dɛɛ̄ nu a dap doo lokwa a naa lu epeere lɔgɔ naana pee.—Buū Jɔn 6:39.
16-17. Pya kanɛɛ e’ɛp yerebah nɛ pya ebee dag doodoo wa ni? (Buū ekpo a kura “ Kɛ̄ Nu Dap Tɔɔ̄loo Naana Pee A Bee Pe Doo.”)
16 Nɛɛ lɛɛratam Pɔɔl bee zū pya kanɛɛ a bee le bu bɔŋanaloo li Ɛfɛsɔs kɔ ba a nɔ edoba Jizɔs. A bee kɔ: “Bui ɛrɛ eyerebah nɛ pya loo ɔ, kɛɛrɛbu loo dɛ̄dɛɛ̄ ue lo Nɛɛ-a-i-ɛrɛ Jizɔs, kɛ̄ a bee kɔ doo, ‘Lu le eenyɔɔ lo enɛ ee susu.’ ” (Doonu pya Nɛɛ lɛɛratam 20:17, 35) Dɔ Kpa Kaɛ ama tɔgɛ kɔ alu toh a le bee pya kanɛɛ lo ekuūdɛɛ̄loo pya zooro Bari anii’ee. Ziī nɛɛ kanɛɛ a kura Salvador a le Spain bee kɔ: “Sɔ̄ m kɛɛrɛbu kɛ̄ Jɛhova kuūdɛɛ̄loo ye naana pee a bee pe doo, a zū mɛ kɔ m doo kuma kɛ̄ m dap doo lo eyerebah wa nɛ. M suā kɔ Jɛhova gbī kɔ m kuū wa dɛɛ̄loo.”
17 Bee lu eyerebah nɛ dɛ̄dɛɛ̄ pya alu ekɔ nu kumaloo bu ekobee ue ama lo ba bee aaloo Jɛhova kɔ ba a obia ye pii. Taɛ nyaawo, gbɛnɛ-edo pya a bee dag gaa gbī e’obia lu. Bu lo ekobee ue a za nyɔɔnɛ, i gaa le nɔ nu i dap doo lo eyerebah wa nɛ kɔ ba a obia pii Jɛhova.
YƆƆ 139 Ɛp Oloo Sɔ̄ Dɛ̄dɛɛ̄ Nu Elua Aā
^ bar. 5 E na anua pio pya etaāŋabah Jɛhova bu gbɛnɛ-edo zua wee aabu bɔŋanaloo a? Bari kɛɛrɛ wa bu doodoo wa ni? Ekobee ue ama agara pya ebip ama. Ekɔ nage nu i dap nɔ aāloo kɛ̄ Jɛhova bee yerebah nɛ pya ye nɛɛ ba bee ɔbɛ etaāŋa ye bah bu sɔ̄ a bee lu e’ɛm Baibol doo.
^ bar. 2 UE ALU EKƆ BAATƐ̄: Nɛɛ a ɔloo na nɛɛ a naa nɛna lɔgɔ kpɛa tam zue ue loo ini’ī enɔɔ̄ ale eewo. Kerewo, pya a ɔloo ama lege gaa lu pya i wuga nɛɛdam le nɛɛwa, sa i were wa loo.
^ bar. 4 Elua enyaana pio bee a le bu ekobee ue ama.
^ bar. 10 Elua ekobee ue li ekɔ ue nyɔɔ sīdee pya kanɛɛ edoo lo ama.
^ bar. 60 UE A BAATƐ̄ FOTO: Sɔ̄ ziī naana pee pe, nɛɛ tɔɔ̄loo naana pee bu Izrɛl a dee kere wee ye gbī sa ye obara sere yɛɛ eku naana pee. Nii’ee pya nɛɛ tɔɔ̄loo naana pee Bari gaa doo nage wo.
^ bar. 64 UE A BAATƐ̄ FOTO: Sɔ̄ ziī wuga nɛɛwa lo ebee ɔbɛ etaāŋabah Jɛhova gaa yira kɔ fah a le bu a aadɔ, a bee muɛ̄ baɛ pya Ekeebee ba gaa su ɛɛbu zuema ue nɛ ziī gbara.
