1. E na a bee lu ekɔ nɛ gbɛnɛ eku nɛɛ bu tua sɔ̄ o’oo tup zua kɔ ba a doo a?

GBƐNƐ eku pya nɛɛdam le nɛɛwa ba aa keekee edonyɔɔ sa kɔ keekee muɛ̄ ue bee gbaa bɔŋana. Ziī gbɛnɛ keebee nu bee sira lo dee. Bu bugia, pio pya Juu bee kɔ keekee muɛ̄ ue pya lo nɛɛ ama! Lo ama bee wa ɔbɛ kaāna, e nu pya Juu ama bee wa kɔ nɛ le nu nɛɛ lɛɛratam Pita bee kɔ bee wa lu nyɛŋia loo. Bee lunage ekɔ wa nɛ kɔ ba dap ɛrɛ kpɔā tɛ̄maloo e’ɛrɛ yira bu Jizɔs Kraist. Lo yereue bee tɔaloo gbɛnɛ eku nɛɛ ama kaāna. A bee zū pya lo nɛɛ mmɛ kɛ̄ ba bip kɔ: “E na i doo ani?” Pita bee wa agara nɛ kɔ: “Ziī ziī bui [ɛrɛaa baptism.]”—Doonu 2:37, 38.

2. E na i gaa le nɔ bu ekobee ue ama a? (Ɛp foto a le nyɔɔ eko.)

² Nu a bee sikɛ̄ sira bee lu nyɛŋia. Nu aluge 3,000 pya nɛɛ bee liamaā lo dee sa lu pya aa nyɔɔnɛ dumɛ Kraist. Lo ama bee le bɔātɛ̄ gbɛnɛ esiatam lo Jizɔs bee nɛ pya a wee ye nyɔɔnɛ dumɛ bu lok. Lo tam aa kiigesī mmɛ anii’ee. Bu ilii dee ama, ii dap su aba pio awa daā kɔ nɛɛ a nyim tura inaloo liamaā. A dap su pio enɔɔ̄, zua ale eewo bah nɛɛ aa nɔnu lɛɛ a edap liamaā. Dodoo kɔ ziī nɛɛ a nyɔɔnɛ dumɛ Jizɔs lu tam a gbī gbɛnɛ epiaga, o dap suā lo ama lo o gaa nyɔɔnɛ nɛɛ nɔ Baibol anyaawo. Bu ekobee ue ama, i gaa le nɔ nu o dap doo lo eyerebah nɛ nɛɛ o gaa nɔɛ̄ Baibol kɔ alu nɛɛ a nyɔɔnɛ dumɛ Jizɔs a eliamaā.

3. Dookɛ̄ Matiu 28:19, 20 kɔ doo, e na nɛɛ a gaa nɔnu ɛrɛ edoo lɛɛ a gae liamaā a?

³ Lɛɛ a gae liamaā, nɛɛ aa nɔ Baibol ɛrɛ esu nu Baibol tɔgɛ yerebu dogo. (Buū Matiu 28:19, 20.) Sɔ̄ nɛɛ a gaa nɔnu su nu aa nɔ yerebu dogo, a le doodoo “nɛɛ suānu” a le bu kam Jizɔs lo a bee dɔɔra kɛ̄ lo ewu ye tɔ nyɔɔ dɛm. (Mat 7:24, 25; Luk 6:47, 48) Mɛ sīdee na i dap yerebah nɛ nɛɛ a gaa nɔnu kɔ a su nu aa nɔ yerebu dogo ani? Doraa i naa ɛp taa nu i dap doo.

4. Bu mɛ sīdee na i dap yerebah nɛ nɛɛ a gaa nɔnu kɔ a nyim inaloo liamaā a? (Ɛp ekpo a kura “ Yerebah Nɛ Nɛɛ O Gaa Nɔɛ̄nu Kɔ A Ɛrɛ Nu A Seeasī Sa Nyim inaloo.”)

⁴ Yerebah nɛ nɛɛ o gaa nyɔɔnɛ nɔ Baibol kɔ a ɛrɛ nu a seeasī. E na anua o doo wo a? Naa kɛɛrɛbu edoba ama: Lo a le o gaa si nyɔɔnyɔɔ dɛɛ̄ kiā, o dap yira kina sa seea bie nyɔɔ dee. Lo sɔ̄ kɛ̄ o gaa kii naale ebinia a dɛɛ̄. Bu aba lo sīdee, sɔ̄ nɛɛ aa nɔnu ɛrɛ nu a seeasī bu nwī kere sɔ̄ sa a dap doo lo nu, edoo kɔ a muɛ kɔ a dabe nyim inaloo liamaā lo a seeasī lo edoo wo. Su kɛ̄ a kɔ “Nu Edoo” a le bu kpa a kura Ɛrɛ Ekpeloo Dum Mmɛ Deedee! yeābah nɛ nɛɛ o gaa nɔɛ̄ Baibol kɔ a ɛrɛ nu a seeasī. Sɔ̄ elua enɔ ziī ziī ekobee ue sah, bui kɔniaa kɛ̄ lo nu seeasī ɛrɛ nu edoo kiiloo nu lo nɛɛ enɔā doo. Lo a le o kɛɛrɛbu dɔɔ̄na nu seeasī nɛ nɛɛ aa nɔnu a, ɛm ye kɛ̄ a kɔ “Lo Dɔɔ̄na.” Wee su lo naɛsī ama nyɔɔnɛ nɛɛ aa nɔnu a kɔnia kɛ̄ a dap inaloo ye nu seeasī bu nwī kere sɔ̄ le lo a nyɔɔ dɛɛ̄ doo.

5. Dookɛ̄ alu e’ɛm bu Maak 10:17-22 doo, ena Jizɔs bee kɔ nɛ nɛɛ mɛnɛ kɔ a doo a, e e na anua a?

⁵ Yerebah nɛ nɛɛ o gaa nɔɛ̄nu kɔ a nyaana pya ye elap dogo. (Buū Maak 10:17-22.) Jizɔs bee suā kɔ e’agabah nɛɛ  mɛnɛ lo e oo dɛ̄dɛɛ̄ nu a ɛrɛ. (Maak 10:23) Kerewo, Jizɔs bee kɔ nɛ lo nɛɛ kɔ anyaana baloo nu a aga edoo ama. E na anua ani? Nyɔnɛbee Jizɔs were ye loo. Pio sɔ̄ a wee i dap agaloo eyere mɛm loo nɛɛ a gaa nɔnu kɔ a su nu aa nɔ a yerebu dogo, nyɔɔbee i kɛɛrɛ kɔ a sii kpɛ̄naloo lo edoo wo. A dap su sɔ̄ bah pya nɛɛ lo elɛa wa nama dee dum loo. (Kɔl 3:9, 10) Mɛ kɛ̄ o nwaabah ye nyɔɔnɛ kɔnia doo, kɛ̄ nɛɛ aa nɔnu a enwaanage bah nyaana baloo ye elap dogo doolo. Tɛ̄maloo enyɔɔnɛ ye kɔnia nu a le doo wo, o tɔgɛ kɔ o kuū ye dɛɛ̄ loo.—Yɔɔ 141:5; Kam 27:17.

6. E na anua i su ebip a tɔgɛ kɛ̄ nɛɛ kɛɛrɛ nu doo daānu a?

⁶ Alu ebɛɛ̄ kɔ i bip nɛɛ i gaa nyɔɔnɛ nɔnu nu a kɛɛrɛ kiiloo lo ekobee ue. Susu ebip a le doo wo daānu edoo kɔ alu esuā nu nɛɛ aa nɔnu a dābeeloo le nu a yiga. Lo o doo wo dɛ̄dɛɛ̄ sɔ̄, ewaɛ a bah lo enyɔɔnɛ ye kɔnia ue a naale ebee waɛ enyɔɔnɛ ye kɔnia. Kpa a kura Ɛrɛ Ekpeloo Dum Mmɛ Deedee! aara pya ebip nɛɛ dap ɛrɛ ekɛɛrɛ nyɔɔ. Bu edoba ye 04 nuenɔ bip kɔ: “O kɛɛrɛ kɔ a tɔɔ̄loo Jɛhova doodoo wa sɔ̄ o ye kue bee ni?” Ye 09 nuenɔ bip kɔ: “Pio e na enia a eyere kara kumaloo a?” Tua sɔ̄ a dap agaloo nɛɛ o gaa nɔɛ̄nu lo e’agara pya ebip ama. O dap ye yerebah nɛ tɛ̄maloo ekpɔā ye kɔ a ɛrɛ ekɛɛrɛ nyɔɔ pya dɔ kpa kaɛ le foto a le bu lo kpa.

7. Bu mɛ sīdee na i dap su pya nu a bee sira loo pya dɔɔ̄na daānu leere a?

⁷ Aba sɔ̄ nɛɛ o gaa nɔɛ̄nu dābeeloo nu alu ebɛɛ̄ kɔ a doo, su pya nu a bee sira loo pya dɔɔ̄na ye yeā mɛm loo kɔ a doo wo. Bu edoba, lo a agabah nɛɛ aa nɔnu lo esi enɔānu dɛ̄dɛɛ̄ sɔ̄, o dap ye tɔgɛ vidio a kura Jɛhova Kuū Mɛ Dɛɛ̄loo a le ye 14 nu enɔ kɛɛ̄ kɛ̄ a kura “Gbītɛ̄ Nu.” Bu gbɛnɛ-edo nuenɔ a le bu kpa a kura Ɛrɛ Ekpeloo Dum Mmɛ Deedee!, o muɛ pya nu a bee sira a le kɛ̄ a kɔ “Nɔ Yereloo” ale lo a kɔ “Gbītɛ̄ Nu.” * Mɛ nwaɛ̄dɛɛ̄ lokwa oo su nɛɛ aa nɔnu a dooreloo dɔɔ̄na nɛɛ tɛ̄maloo ekɔ: “Lo alɛ bee dap doo, olo dapnage doo.” Lɛɛbaloo nɛɛ aa nɔnu a kɔ a biaɛfii nyɔɔ ye loo. Taāwo, tubobaloo pya kpog-bee ue a bee yerebah nɛ nɛɛ a le bu lo vidio kɔ a dap su pya nu Baibol tɔgɛ yerebu dogo. Naa daba o dap tubobaloo ziī kpog-bee dɔ kpa kaɛ a le bu ale dɔɔ̄na nu a bee lu edoo. Lo a waɛ, o baatɛ̄ kɛ̄ Jɛhova bee yerebah nɛ lo nɛɛ doo.

8. Bu mɛ sīdee na i dap yerebah nɛ nɛɛ i gaa nɔɛ̄nu kɔ a wereloo Jɛhova a?

⁸ Yerebah nɛ nɛɛ o gaa nɔɛ̄nu kɔ a wereloo Jɛhova. Bu mɛ sīdee? Gbī sɔ̄ a bɔloo lo etɔgɛ ye nu akiiloo pya elap dogo Jɛhova. Yerebah nɛ nɛɛ o gaa nɔɛ̄nu kɔ a ɛp Jɛhova doodoo Bari ɛɛbu lo a yerekpotɛ̄ pya a ye wereloo. (1 Tim 1:11; Hib 11:6) Tɔgɛ nɛɛ aa nɔnu kɔ e’ɛrɛ biī lo a le a su nu a dā yerebu dogo, sa o baatɛ̄ ye nɛ kɔ lo ama tɔgɛ kɛ̄ Jɛhova ye wereloo doo. (Ais 48:17, 18) Nɛɛ o gaa nɔɛ̄nu egbī enwaabah nyaana baloo ɛrɛgeba nu a naa lee, kuma sɔ̄ wereloo a ɛrɛ kumaloo Jɛhova agatɛ̄.—1 Jɔn 5:3.

9. Dɛɛa nyɔɔ nu a le bu Maak 10:29, 30, e na a dap yerebah nɛ nɛɛ kɔ a lɛɛbaloo pio nu sa lu nɛɛ aa nyɔɔnɛ dumɛ Jizɔs a eliamaā a?

⁹ Lɛɛ nɛɛ a gaa nɔ Baibol gae liamaā, a ɛrɛ elɛɛbaloo pio nu. Doodoo nɛɛ mɛnɛ i  bee kɔ nu akiiloo tua sɔ̄ a, dap lu ebɛɛ̄ kɔ pio pya aa nɔnu a lɛɛbaloo pio nu nyɔuwe. Lo a le wa tam naa gbaaloo daakuu Baibol, alu ebɛɛ̄ kɔ ba a nyaana. Dap lu ebɛɛ̄ kɔ ba a lɛɛbaloo pya gbo a naa wereloo Jɛhova. Siga aba lo pya wa butɔ naa wereloo Pya Ekeebee Jɛhova elɛra wa baloo. Jizɔs bee suā kɔ e’agabah pio nɛɛ lo elɛɛbaloo pya nu a le doo wo. Mɛ a bee yira yii kɔ a naale elu elɔgara pya a ye nyɔɔnɛ dumɛ. Ba e’ɛrɛ ekpɛanu sa elu enɛ wa pya butɔ bu bɔŋanaloo lo ba wa wereloo. (Buū Maak 10:29, 30.) Bu mɛ sīdee na o dap yerebah nɛ nɛɛ o gaa nɔɛ̄ Baibol kɔ a ɛrɛ biī aāloo gbɛnɛ le dɔɔ̄nu ama a?

10. E na o nɔ aāloo nu a bee sira loo Manuel a?

¹⁰ Yii gbo nɛɛ o gaa nɔɛ̄nu. Alu ebɛɛ̄ kɔ nɛɛ o gaa nɔɛ̄nu a muɛ̄ kɔ o kuūe ye dɛɛ̄loo. E na anua ani? Naa yere nukuādɛɛ̄ loo nu Manuel a wee tɔɔ̄ Mexico kɔ ama. Sɔ̄ a nyɛŋiabu sɔ̄ aa bee nɔge Baibol lɛɛ a gae liamaā, a bee kɔ: “Lɛɛ i gae bɔātɛ̄ ɛrɛgeba i enɔānu, nɛɛ a wee mɛ nɔɛ̄nu wee mɛ bip kɛ̄ loo mɛ le doo. A wee doo kɔ loo mɛ a sukɛ̄ lɛɛ a nɛ mɛ dee kɔ m kɔ ɛrɛgeba nu m gbī ekɔ ye nɛ. M wee muɛ kɔ a kuū mɛ dɛɛ̄ loo kaāna.”

11. Pya i wee nɔɛ̄nu edap ɛrɛ biī doodoo wa sɔ̄ i wa su sɔ̄ tɔ̄ma kpaɛ̄?

¹¹ Su sɔ̄ tɔ̄ma kpaɛ̄ pya o gaa nɔɛ̄nu dookɛ̄ Jizɔs bee doo loo pya a wee ye nyɔɔnɛ dumɛ. (Jɔn 3:22) Lo a bɔloo, kue nɛɛ o gaa nɔɛ̄nu nua o be kɔ a nyɔɔnɛ a ɛrɛ ekpeloo, denu ale nyɔɔnɛ a ɛp broadcasts alu e’ɛrɛ bu ziī ziī enɔɔ̄. Enia nɛɛ o wee nɔɛ̄nu kaāna lo o kue ye sɔ̄ ba kpaɛ̄ tɔkpa ale tam, sɔ̄ ebee dap le bu e’ɔloo. Kazibwe a wee tɔɔ̄ Uganda bee kɔ: “M kɛɛrɛ kɔ m nɔ gbɛnɛ-edo nu akiiloo Jɛhova aāloo tɔɔ̄ kpaɛ̄ nɛɛ a wee mɛ nɔɛ̄nu dookɛ̄ m wee doo sɔ̄ m wee le aa nɔnu. M bee muɛ kɛ̄ Jɛhova kuūdɛɛ̄loo pya ye nɛɛ le kɛ̄ ba ɛrɛ ɛɛbu doo. Taɛ nu m bee gbī bu na dum lo.”

12. E na anua i aara keekee pya zue ue siā sɔ̄ i gaa si wee tɔgɛ Baibol nɛɛ a?

 ¹² Aara keekee pya zue ue siā uwe sere enɔānu Baibol. Pio sɔ̄, i dap kɛɛrɛ kɔ a waɛ kɔ aba ii i si ale bialoo aara aba ziī nɛɛ zue ue siā dɛ̄dɛɛ̄ sɔ̄. Kereadoo a su i loo lo edoo wo, nɛɛ i gaa nɔɛ̄nu e’ɛrɛ kaāna biī lo i aara keekee pya zue ue siā. Dmitrii a tɔɔ̄ Moldova kɔ: “Ziī ziī pya zue ue alu wee nɔɛ̄ mɛ nu wee baatɛ̄ nu bu keebee sīdee. Lo ama bee mɛ yerebah nɛ kɔ m dap suā kɛ̄ esu nu m gaa nɔ daānu bu keekee sīdee doo. E a doonage kɔ kɛɛ aa mɛ aadee bɔp tua dee m si enɔānu, kuma sɔ̄ m ebee muɛ gbɛnɛ-edo pya wuga nɛɛdam le nɛɛwa a.”

13. E na anua i yerebah nɛ nɛɛ i gaa nɔɛ̄nu kɔ a si enɔānu a?

¹³ Yerebah nɛ nɛɛ o gaa nɔɛ̄nu kɔ a si enɔānu. E na anua ani? Nyɔnɛbee Jɛhova nɛ lok pya a gaa ye taāŋabah kɔ ba a wee gbaa zɔ̄ŋia, lo alu ziī gah loo i taāŋabah. (Hib 10:24, 25) Gbaāloo wo, pya i wuga nɛɛdam le nɛɛwa bu bɔŋanaloo le doodoo pya i butɔ. Sɔ̄ i wa le kpaɛ̄ bie enɔānu, a le doodoo bee i le tɔ sa aa gbaa denu. Sɔ̄ o yerebah nɛ nɛɛ o gaa nyɔɔnɛ nɔnu kɔ a si enɔānu, o yerebah ye nɛ kɔ a doo ziī gbɛnɛ nu edoo kɔ a dap liamaā. Kerewo a dap ye agaloo edoo wo. Bu mɛ sīdee na kpa a kura Ɛrɛ Ekpeloo Dum Mmɛ Deedee! eyerebah nɛ nɛɛ o gaa nɔɛ̄nu kɔ a be eebah ɛrɛgeba nu finiabah a dap kpesī a?

14. Bu mɛ sīdee na i dap yerebah nɛ nɛɛ i gaa nɔɛ̄nu kɔ a si enɔānu a?

¹⁴ Su eree 10 nuenɔ bu kpa a kura Ɛrɛ Ekpeloo Dum Mmɛ Deedee! yeābah nɛ nɛɛ o gaa nyɔɔnɛ nɔnu. Lɛɛ a gae lu elɛɛ kpa ama tɔ, bee dasī lu ekɔ nɛ pio pya zue ue kɔ ba a su lo eree 10 nuenɔ bu kpa ama siātam, ba bee muɛ kɔ a lee kaāna lo esu yeābah nɛ pya ba gaa nɔɛ̄nu kɔ ba a si enɔānu. Kerewo, o aa baɛ sɔ̄ bui e’ina ye 10 nuenɔ lɛɛ o gae kue nɛɛ o gaa nɔɛ̄nu nua enɔānu. Nwaabah ye kue kɔ a si sa kiisī lo edoo wo dɛ̄dɛɛ̄ sɔ̄. Ziī ziī pya a gaa nɔnu kpesī keekee taāŋa. Nyɔɔwo suā nu alu ebɛɛ̄ nɛɛ o gaa nyɔɔnɛ nɔnu, sa ɛp pya sīdee o ye dap yerebah nɛ. Loo a aa ɔ lo a naa nwaabah si. Egerebu sa kiisī lo ekue ye.

15. Mɛ dua bɔɔ na a dap aa nɛɛ i gaa nɔɛ̄ Baibol a?

¹⁵ O nyɛŋiage bu kɛ̄ bɔɔ bee a dap aa doo lo elu nɛɛ Ekeebee Jɛhova ni? Naa daba o bee kɛɛrɛ kɔ oo le edabe zue ue aā ziī tɔ yii ziī. Ale bɔɔ bee a aa kɔ pya o butɔ ale pya o gbo dap a gbanasī. Lo a le doo wo, o dap dābeeloo nu nɛɛ o gaa nɔɛ̄ Baibol gaa tɛɛ̄ bu. Jizɔs bee suā kɔ nɛɛ dap ɛrɛ dua bɔɔ a le doo wo. Kerewo, a bee kɔ nɛ pya a ye nyɔɔnɛ dumɛ kɔ ba aa yiga kɔ bɔɔ a ɔbɛ wa lɛɛ loo esitam nɛ Jɛhova. (Mat 10:16, 17, 27, 28) Bu mɛ sīdee na Jizɔs bee yerebah nɛ pya a wee ye nyɔɔnɛ dumɛ kɔ ba a be eebah bɔɔ ani? E mɛ sīdee na o dap nɔ ye edoba a?

16. Bu mɛ sīdee na i dap kpɔā nɛɛ i gaa nɔɛ̄nu kɔ a kɔ nu a yiga a?

¹⁶ Tɔgɛ nɛɛ o gaa nɔɛ̄nu kɔ a kɔ nu a yiga nɛ pya dɔɔ̄na. Pya a wee nyɔɔnɛ dumɛ Jizɔs bee dap ɛrɛ bɔɔ sɔ̄ a bee wa lɛɛra kɔ ba a si uwe zue ue. Mɛ Jizɔs bee wa yerebah nɛ tɛ̄maloo ekɔ kɛ̄ ba ezue ue le nu ba ezue. (Mat 10:5-7) Bu mɛ sīdee na o dap nɔ Jizɔs a? Yerebah nɛ nɛɛ o gaa nɔɛ̄nu kɔ a suā kɛ̄ a dap zue ue. Bu edoba, bip ye lo a le a suāloo ziī nɛɛ a dap ɛrɛ biī aāloo nɔnɔ ziī kaka ue a le bu Baibol.  Lɛɛ o yerebah ye nɛ kɔ a kpɛ̄naloo nu ekɔ tɛ̄maloo etɔgɛ ye sīdee edap ye waɛloo enyɔɔnɛ pya dɔɔ̄na ponia lo kaka ue. Sɔ̄ a bɔloo, o dap su lo kɛ̄ a kɔ: “Pio Nɛɛ Kɔ” le “Ziī Nɛɛ Dap Bip Kɔ,” lo a le bu kpa a kura Ɛrɛ Ekpeloo Dum Mmɛ Deedee!. Sɔ̄ o gaa doo wo, sere ekɛɛrɛ nyɔɔ lo ekpɔā nɛɛ o gaa nɔɛ̄nu kɔ a su kari nɛa ture a waɛ edābeeloo a aabu Baibol.

17. I su Matiu 10:19, 20, 29-31 yeābah nɛ nɛɛ i wee nɔɛ̄nu kɔ a ture nyiɛ loo Jɛhova doodoo wa?

¹⁷ Yerebah nɛ nɛɛ o gaa nɔɛ̄nu kɔ a ture nyiɛ loo Jɛhova. Jizɔs bee kɔ nɛ pya a wee ye nyɔɔnɛ dumɛ kɔ Jɛhova eyerebah wa nɛ nyɔɔbee a were wa loo. (Buū Matiu 10:19, 20, 29-31.) Doo kɔ nɛɛ o gaa nɔɛ̄nu a suā kɔ Jɛhova eyerenage bah ye nɛ. O dap ye yerebah nɛ kɔ a dɛɛa nyɔɔ Jɛhova tɛ̄maloo enyɔɔnɛ ye yere kara kiiloo pya nu a seeasī. Ziī wuga nɛɛdam a kura Franciszek a tɔɔ̄ Poland bee kɔ: “Na nɛɛ tɔgɛnu wee kue bee pya na nu seeasī bu ye kara gbɛnɛ-edo sɔ̄. Sɔ̄ m muɛ kɛ̄ Jɛhova agara kara na nɛɛ tɔgɛnu doo, m bee bɔātɛ̄ eyere kara. Bie na aā kɛ̄tam, m muɛ kɔ Jɛhova yerebah mɛ nɛ sɔ̄ m bee ye bara kɔ a doo kɔ alu enɛ mɛ sɔ̄ lo esiā pya i enɔānu le kɔnvɛnsɔn.”

18. Tam tɔgɛnu pya Nɛɛ Kraist aa si tɔɔ̄loo Jɛhova doodoo wa?

¹⁸ Jɛhova kuūdɛɛ̄loo nɛɛ i gaa nɔɛ̄ Baibol kaāna. A tɔgɛ kaāna nia loo kɛ̄ pya Nɛɛ Kraist a gaa tɔgɛnu aa piiga lo eyerebah nɛ pya nɛɛ kɔ ba a tɔɔ̄ ye waɛloo doo, e a were wa loo. (Ais 52:7) Lo a le oo gaa nɔɛ̄ Baibol lɔgɔ nɛɛ anyaawo, o dapnage yerebah nɛ pya a gaa nɔ Baibol kɔ ba a nyim inaloo liamaā tɛ̄maloo enyɔɔnɛ pya dɔɔ̄na nɛɛ zue ue si wee nɔɛ̄ wa nu.