1. (a) Amunu bɛābu na Jɛhova enɛa i a? (b) Ena tɔɔ̄ “baɛ Jɛhova” kura a? (Buū “Ue Alu Ekɔ Baatɛ̄.”)

 JƐHOVA enɛa kaāna bɛābu dɛ̄dɛɛ̄ pya a ye wereloo. Sɔ̄ sɔ̄ naa binia, a gaa le mmɛ kuma loo eyɔloo, ekiɛ̄nu le luh. (Mum 21:3, 4) A gaa le yerebah nɛ pya a “kuma nyiɛ kɛ̄” lo ba aa tɔɔ̄ baɛ sɔ̄ ekwa kɛnɛkɛ̄ ama nua paradais. (Yɔɔ 37:9-11) E a gaa le doo kɔ a waɛbah ziī ziī ii lo etɔɔ̄ ye waɛloo kaāna, sa ye nyɔɔnɛ ɛnia gbanialoo lo ekpe i loo ee lo i ye nyɔɔnɛ ɛnia anyaawo. Mɛ dua le bɛābu i ɛrɛ sɛh! Mɛ ena i yira nyɔɔ sa yiga kɔ pya yii Bari eyira edooa ani? Jɛhova naa wee lɔɛ edoo gbɔ̄mɛɛ pya ye yii. Nyɔɔwo, i ɛrɛ kaāna nu anua i tɔɔ̄ “baɛ Jɛhova.” * (Yɔɔ 27:14) I tɔgɛ kɔ i tɔɔ̄e ye baɛ tɛ̄maloo eyira ye baɛ bu egerebu le bu ɛɛbu mmɛ sɔ̄ ilii Bari edoo pya ye yii gbɔ̄mɛɛ.—Ais 55:10, 11.

2. Ena Jɛhova edoora a?

² Jɛhova tɔgɛ kɔ alue nɛɛ a wee doo nu a bee yira. Naa ɛp ziī edoba alu keebee ama. Bu kpa Mumuuna, Jɛhova bee yira yii kɔ bu ilii dee ama, a gaa le dooe kɔ pya nɛɛ a aabu dɛ̄dɛɛ̄ edonyɔɔ, edo le muɛ̄ ue a gbaaloo ziī lo etaāŋa ye bah bu sīdee a loga. Nii’ee, lu esuāloo keebee eku nɛɛ ama nua “gbɛnɛ [eku] nɛɛ.” (Mum 7:9, 10) Gbɛnɛ eku nɛɛ ama gbaaloo ziī, sa lu ziī gā wuga ba le tɛɛ̄ ɛŋɛnɛ nyɔuwe kereadoo ba aa keekee edo, kɔ keekee muɛ̄ ue sa ɛrɛ keekee sīdee doonu wa barasī, le kɔ pio aba lu pya nɛɛdam, pya nɛɛwa gbaāloo gbomiɔŋɔ. (Yɔɔ 133:1; Jɔn 10:16) Pya gbɛnɛ eku nɛɛ ama sunage mɛm zuema le yereue. Dɛ̄dɛɛ̄ sɔ̄ ba kpɛ̄naloo  enyɔɔnɛ ɛrɛgeba nɛɛ a gbī egbaɛ̄tɔ̄ ponia bɛābu ba ɛrɛ akiiloo ziī le nyɔuwe a gaa lu sī. (Mat 28:19, 20; Mum 14:6, 7; 22:17) Lo o nuūna gbɛnɛ eku nɛɛ, baɛbaɛ beenyiɛ naale loo kɔ o bɛābu akiiloo pya lele nu a gaa lu sī lu nu a a kuīloo kaāna.

3. Ena Setan seeasī lo edoo a?

³ Pɔrɔ-edɔɔ̄ naa gbī kɔ o ɛrɛ lɔgɔ bɛābu akiiloo deesī. Nu a seeasī na lo edoo kɔ o yiga kɔ Jɛhova naa gaa a kuuedɛɛ̄loo le kɔ a naale edoo pya yii a bee yira lo edoo. Lo a le Setan doo nu a seeasī ama, nu esira aabu na kɔ loo i e’ɔ, e i dapnage ɔbɛ etaāŋabah Jɛhova. Dookɛ̄ i sa i muɛ doo, Pɔrɔ-edɔɔ̄ bee piiga lo edoo kɔ Job aa ɛrɛna bɛābu sa ɔbɛ etaāŋabah Jɛhova.

4. Ena i nɔ bu ekobee ue ama a? (Job 1:9-12)

⁴ Bu ekobee ue ama, i gaa le nɔ nu akiiloo pya kiaŋana lo Setan bee su daānu lo edoo kɔ Job a anna ye yira. (Buū Job 1:9-12.) I gaa le muɛnage nu i dap nɔ aāloo edoba Job, le nu anua alu ebɛɛ̄ kɔ i nyɛŋiabu kɔ Bari were i loo sa a gaa le doo pya yii a bee yira.

5-6. Ena a bee siraloo Job bu kunɛ nwīkere sɔ̄ a?

⁵ Dum aa bee kiā leere loo Job. A bee yii gbo Jɛhova sa ye nyɔɔnɛ ɛnia kaāna gbanialoo. A bee ɛrɛ gbɛnɛ-edo miɔŋɔ sa ye butɔ bee le bu gbaaloo, e a bee ɛrɛ gbɛnɛkpo zɔ. (Job 1:1-5) Mɛ bia kina, Job peere dɛ̄dɛɛ̄ nu a bee ɛrɛ bu aba ziī biradee. Tuatua, a bee peere pya ye zɔ. (Job 1:13-17) Lɛɛ dɛ̄dɛɛ̄ pya ye miɔŋɔ a bee wereloo u. Naa su kina sɔ̄ ɛā ekɛɛrɛ nyɔɔ nu a bee ye siraloo ama. Pya tɛ le ka wee ɛrɛ gbɛnɛ ekiɛ̄nu sɔ̄ ziī wa nwiī u. Nyɔɔwo, naa kɛɛrɛ dua dɔ̄nia beenyiɛ, bura le ekiɛ̄nu lo Job le ye wa bee ɛrɛ, le kɛ̄ a bee wa ɔbɛ doo sɔ̄ ba bee dā kɔ lop pya wa miɔŋɔ e’ua. Kɛādoo Job bee bagi ye bɛloo sa to kigia kɛ̄ lo!—Job 1:18-20.

⁶ Dɔɔ̄na nu Setan bee doo na lo etɛrɛ ziī gbɛnɛ eyɔloo a nua kɛɛ loo Job. (Job 2:6-8; 7:5) Lɛɛ a gae lu lo sɔ̄, pya nɛɛ wee nwadɛɛ̄ Job kaāna bu ye buɛ̄. Pya nɛɛ wee ye si loo kɔ a nɛe wa zuurabahtɔ̄. (Job 31:18) Mɛ nyaawo, pya nɛɛ eteera ye. Pya ye wuga, pya ye gbo le kunɛ pya ye zooro bee ye kiīnage!—Job 19:13, 14, 16.

7. (a) Job bee kɛɛrɛ kɔ ye tɔga aa bah mɛɛ, kerewo ena a naa bee doo a? (b) Bu mɛ sīdee na ziī Nɛɛ Kraist edap kpesī dua taāŋa a bee lo a le bu foto a nyɔɔnɛ barakpaɛ̄ ama a?

⁷ Setan bee gbī kɔ Job a yiga kɔ nu anua a gaa tɔgae na nyɔɔ kɔ Jɛhova naa yerena ye kpotɛ̄. Bu edoba, Setan bee su gbɛnɛ fii efɔp gbemasī tɔ lop pya miɔŋɔ Job bee le bu aa gbaa de nu sa ɛrɛ ekpeloo. (Job 1:18, 19) A bee doonage kɔ miā a aa bunyɔɔ sa taa pya ye nam gbaānage loo pya ye zooro a gaa bee kuūdɛɛ̄loo pya lo nam. (Job 1:16) Nyɔɔbee lo efɔp le lo miā bee aa bunyɔɔ a, Job bee kɛɛrɛ kɔ Jɛhova na a aabah a. E wo bee doo kɔ Job a kɛɛrɛ kɔ edorae nu a biirebu Jɛhova. Kerewo, Job naa bee kaɛnu nɛ ye Tɛ a le li bunyɔɔ. Job bee suā kɔ Jɛhova enɛāe ye gbɛnɛ-edo lele nu bu pya zua akii adumɛ. Nyɔɔwo, a bee kɛɛrɛ kɔ lo a bee sue ɛɛbu suā pya lo lele nu a bee ye nɛ, eleenage kɔ a kpɛnaeloo esu baɛbah suā pya lo pɔrɔ. Nyɔɔbee wo, a bee kɔ: “Leelee a le nɛ bee Jɛhova.” (Job 1: 20, 21; 2:10) Kereadoo Job epeere ye zɔ, pya ye miɔŋɔ le ye kɛ̄tɔɔ̄ nwanaloo, a lege aa kiisī lo ebɔ ture nyiɛ loo nɛ Jɛhova. Kerewo, Setan naa aage ye loo e.

8. Dɔɔ̄na amunu kiāŋana na Setan bee siāloo Job a?

⁸ Dɔɔ̄na kiāŋana Setan bee siāloo Job na dodoo kɔ taa pya nɛɛ a sereloo doodoo bee ba lue ye kaāna gbo a kɔ nu edoo kɔ Job a kɛɛrɛ kɔ a naa lenae dɛɛ̄ lɔgɔ nu. Pya nɛɛ ama bee kɔ tɔga Job aa tɛɛ̄ bu tɔgɛ kɔ a ɛrɛ pya piya nu edora. (Job 22:5-9) Ba bee piiga lo edoo kɔ a kɛɛrɛ kɔ kere alu nɛɛ kaāna dogo lɔgɔ epiaga a gaa doo lo edoo nu a nia Bari naa dɔ lɔgɔ biī. (Job 4:18; 22:2, 3; 25:4) Nu ba gaa bee doo ama na dodoo kɔ Job a ɛrɛ baɛbaɛ ekɛɛrɛ akiiloo wereloo Bari ye ɛrɛ kumaloo, le kɔ Bari naale ekuū ye dɛɛ̄loo sa lɔgɔ biī naale bu sisitam nɛ Bari. Pya wa ue ama ebee dap doo kɔ a tɔɔ̄loo Job kɔ lɔgɔ bɛābu naale loo ye kɛ̄tɔɔ̄.

9. Ena a bee yerebah nɛ Job kɔ a ɛrɛ mɛm le e’agaloo a?

⁹ Naa kɛɛrɛ siranu ama. Job le bu gbɛnɛ ezialoo sa le ɛŋɛtɛ̄ bu tɔ̄. (Job 2:8) Pya ye gbo ama bialoo wee ye gbɛ sa ye gbee bee. Pya ye taāŋa dɔnia bee gbɛnɛ gbɛnɛ ekpodɛm, e a le bu gbɛnɛ ekiɛ̄nu nyɔɔ luh pya ye miɔŋɔ. Tua sɔ̄, Job bee ɔbɛpiī. (Job 2:13–3:1) Lo alu kɔ pya gbo Job aa bee kɛɛrɛ kɔ nu anua Job ɔbɛpiī na nyɔɔbee esaa e’anna Nɛɛ a bee ye dɛm, ba tɛɛ̄ kaāna ekwɔ. Sɔ̄ sɔ̄ aa kiisī, a ɛrɛ sɔ̄ Job bee kiirasī kpe pya a sereloo doodoo bee ba lue ye kaāna gbo ama sa kɔ: “Mmɛ dee m u mm le kpo na kaāna yira lɛa loo.” (Job 27:5) Ena a bee yerebah nɛ Job kɔ a ɛrɛ mɛm le e’agaloo kaɛlɛɛ dɛ̄dɛɛ̄ kɛ̄ a gaa bee tɔga doo a? Kere sɔ̄ loo ye  ebee ɔ, a naa biewo e’ɛrɛ bɛābu kɔ ye Bari a ye wereloo e’mmɛ kuma loo ye tɔga. A bee suā kɔ kere a u, Jɛhova elɛɛe ye kɛ̄ bu luh.—Job 14:13-15.

10. Ena nu a bee siraloo Job i tɔgɛ a?

¹⁰ Nu a bee siraloo Job tɔgɛ kɔ Setan naale edap su bah ekpo i aā kɔ i lɛɛbaloo Jɛhova le kɔ Jɛhova suā dɛ̄dɛɛ̄ nu aa i siraloo. Nu a bee siraloo Job ama dapnage i yerebah nɛ kɔ i dābeeloo pya nu a bee le bu lo ue. Naa ɛp pio nu i dap nɔ aāloo Job ama.

11. Lo i kiisī lo edɛɛa nyɔɔ Jɛhova, ena i suā leere kɔ esira a? (Jemes 4:7)

¹¹ Job bee tɔgɛ kɔ lo i kiisī lo edɛɛa nyɔɔ Jɛhova, i dap egerebu bu ɛrɛgeba taāŋa sa gbanasī Setan. Ena a gaa le sira aabu ani? Kpa Kaɛ nɛ i agɛrɛ nyiɛ kɔ Pɔrɔ-edɔɔ̄ eteera i aaloo.—Buū Jemes 4:7.

12. Bu mɛ sīdee na bɛābu aakɛ̄ bu luh bee yere mɛm loo Job a?

¹² Alu ebɛɛ̄ kɔ i ɛrɛ e’agatɛ̄ yira bu aakɛ̄ bu luh. Dookɛ̄ i bee kɔ doo bu ekobee ue i aa a, gbɛnɛ-edo sɔ̄ Setan wee piiga lo esu bɔɔ i ɛrɛ loo luh daā kɔ i anna i yira. Bu nu a bee siraloo Job ama, Setan bee kɔ Job edoo ɛrɛgeba nu lo ekpɔā ye dum, kere alu kɔ a anna ye yira. Nu a bee kɔ ama bee lu esah. Kere sɔ̄ a bee bee kɔ Job e’ina aa u, a naa bee anna ye yira. Nu a bee ye yerebah nɛ kɔ a egerebu na kɛ̄ a dɛrɛ nyiɛ nyɔɔ ledogo Jɛhova doo, le e’agatɛ̄ bɛābu a bee ɛrɛ kɔ Jɛhova edoo kɔ nu a lee sɔ̄ esaa. Job bee ɛrɛ yira kɔ lo a le Jɛhova naa doo kɔ ye kɛ̄tɔɔ̄ a lee bu sɔ̄ a lege dum, mɛ elɛɛe ye kɛ̄ bu luh li deesī. Job bee ɛrɛ bɛābu kɔ aakɛ̄ bu luh lu kaka nu edooa. Lo i ɛrɛ bɛābu kɔ aakɛ̄ bu luh lu kaāna nu edooa, kere bɔɔ luh naale edap doo kɔ i anna i yira.

13. Ena anua alu ebɛɛ̄ kɔ i nwaɛ̄dɛɛ̄loo pya kiāŋana lo Setan bee su siāloo Job a?

¹³ I ɛrɛ enwaɛ̄dɛɛ̄ loo pya kiaŋana lo Setan bee su siāloo Job, nyɔnɛbee aa sunage pya lo kiaŋana i siāloo anii’ee. Yere nukuādɛɛ̄ loo dɛrɛ ue lo Setan bee kɔ: “Dɛ̄dɛɛ̄ nu nɛɛ ɛrɛ [naale aba Job] a gaa le nɛ nyɔɔ ye dum.” (Job 2:4, 5) Nyɔɔwo, nu Setan aa kɔ na bee ii aadee wereloo Jɛhova Bari kaāna, le kɔ i dap ye kiira dumɛ kpe lo a le i aa gbī ekpɔā i dum. Dɔɔ̄na nu Setan aa bee kɔnage na kɔ Bari naa were i loo, le kɔ a naale eyere nukuādɛɛ̄ loo lɔgɔ epiaga i doo lo edoo nu a ye nia. Nyɔɔbee i suā pya nu Satan aa gbī edoo a, ii le eyiga pya esah Satan.

14. Ena pya i doā-ɛp dap muuna a i kiiloo a? Naa nɛ edoba.

¹⁴ Alu ebɛɛ̄ kɔ i ɛp pya i doā-ɛp nua dee a i kpaānɛ lo enɔ nu akiiloo aba ii. Pya doā-ɛp Job bee kpesī bee ye yerebah nɛ kɔ a dap muɛ kɛ̄ a ɔloo sa si tam nyɔɔ pya lo nu. Bu edoba, a bee muɛ kɔ alu ebɛɛ̄ kɔ a sikɛ̄ nyimɛ ye elap dogo kumalookɛ̄ yereloo. (Job 42:3) Ili dapnage nɔ gbɛnɛ-edo nu akiiloo aba ii sɔ̄ i le kɛ̄bah doā-ɛp. Ziī wuga nɛɛdam a kura Nikolay, * lo a bee lu eyere ye tɔ-kpɔgɔrɔ kere a bee le bu gbɛnɛ dumɛloo, bee kɔ: “Tɔ-kpɔgɔrɔ le doodoo X-ray, lo a tɔgɛ pya elap dogo a le bu Nɛɛ Kraist.” Aba sɔ̄ i muɛ pya kɛ̄ i ɔloo, i piiga lo esitam nyɔɔ.

15. Mɛɛ na i gbaɛ̄tɔ̄loo a, e ena anua a?

¹⁵ Alu ebɛɛ̄ kɔ i gbaɛ̄tɔ̄loo Jɛhova, e  a naale pya i nɛɛ baa. Job bee gbaɛ̄tɔ̄ sɔ̄ Jɛhova bee ye kɔ ue nɛ. Bari bee nyɔɔnɛ Job ɛrɛ ekɛɛrɛ, e a bee le doodoo bee Bari aa ye kɔ nɛ kɔ: ‘O muɛge na ekpo m bee su dɛma nu ni? M suā dɛ̄dɛɛ̄ nu a bee a siraloo. Ekɔ o kɛɛrɛ kɔ mm le edap a kuūdɛɛ̄loo ni?’ Bu kumalookɛ̄, Job bee agara pya lo ebip sa tɔgɛ kaāna nia loo ledogo Jɛhova. A bee kɔ: “M bee dā nu a akiiloo, tɛ̄maloo daā tɔ̄, mɛ nyaawo na dɛɛ̄ emɔna a.” (Job 42:5) Naadaba Job bee lege e’ɛŋɛtɛ̄ bu tɔ̄, e muū bee le e’mma ye loo, sa pya ye miɔŋɔ lege bu bana luh, sɔ̄ a bee kɔ pya ue ama. Kerewo, Jɛhova bee tɔgɛ kɔ a wereeloo Job sa bee doo kɔ a suā kɔ a yeree ye kpotɛ̄.—Job 42:7, 8.

16. Dookɛ̄ ue a le bu kpa Aisaia 49:15, 16 kɔ doo, ena a bɔloo kɔ i seea nyiɛ sɔ̄ i kpesī doā-ɛp a?

¹⁶ Nii’ee, gbɛnɛ-edo nɛɛ dapnage i gbɛ sa i aara bu pɔrɔ sīdee sa bee kɔ ii le dɛɛ̄ lɔgɔ nu. Ba dap gbī egbee i bee ale gbee bee i bɔŋanaloo sa “kɔnage dɛ̄dɛɛ̄ piya nu alu keekee i pima.” (Mat 5:11) Aāloo nu a bee siraloo Job, i nɔ kɔ Jɛhova dɛrɛ i nyiɛ nyɔɔ kɔ i gaa le yira agɛrɛ ye nɛ sɔ̄ i kpesī doā-ɛp. Jɛhova were i loo sa a naale elɛɛbaloo pya a ye dɛrɛ nyiɛ nyɔɔ. (Buū Aisaia 49:15, 16.) O aa gbaɛ̄tɔ̄loo lɔgɔ dɛrɛ ue esah lo pya nɛɛ baa Bari aa kɔ! Ziī wuga nɛɛdam a kura James alu Turkey lo pya ye butɔ ekpeasī keekee e’agabah doā-ɛp bee kɔ: “I bee dābeeloo kɔ gbāgbaɛ̄tɔ̄loo pya esah alu ekɔ kumaloo  pya nɛɛ Bari dap i ɔɛloo. Nyɔɔwo, i bee bie ekɛɛrɛ nyɔɔ i bɛābu akiiloo Buɛ̄-mɛnɛ sa kiisī lo ebɛamiā bu i esiatam nɛ Jɛhova. Wo bee doo kɔ i aa peere i ɛɛbu.” Doodoo Job, i gbaɛ̄tɔ̄loo Jɛhova! Pya esah lo pya i nɛɛ baa kɔ naale edap doo kɔ i aa ɛrɛna bɛābu.

17. Ena o nɔ aāloo lele edoba pya nɛɛdam le nɛɛwa a bee bɔ ture nyiɛ loo alu ekɔ nu a wa kiiloo bu Pya Hibru 11 ekobee a?

¹⁷ Job lu ziī yɛɛ pya zooro Jɛhova lo ba bee ɛrɛ mɛm le e’agaloo sɔ̄ ba bee kpesī keekee e’agabah doā-ɛp. Bu kpa nɛɛ lɛɛratam Pɔɔl bee ɛm ma pya Hibru, a bee kɔ nu akiiloo gbɛnɛ-edo aba, sa wa kure “gbɛnɛkpo pya ekeebee a kuī gbɛnɛ.” (Hib 12:1) Dɛ̄dɛɛ̄ aba bee kpesī keekee e’agabah doā-ɛp; kerewo, ba bee sere le edoba tɛ̄maloo ebia bu bɔ ture nyiɛ loo nɛ Jɛhova bu yubeloo wa tɔɔ̄dum. (Hib 11:36-40) Ekɔ wa egerebu le e’aga tam ba bee si ama lu yɔrɔ ni? Eeye doo pippip! Kereadoo ba naa bee muɛ dooa gbɔ̄mɛɛ dɛ̄dɛɛ̄ pya yii Bari bu sɔ̄ ba bee lege dum, ba bee kiisī lo e’ɛrɛ bɛābu bu Jɛhova. E nyɔɔbee ba bee suā leere kɔ ba ɛrɛe yerekpotɛ̄ a aabah Jɛhova a, ba bee ɛrɛ kaāna dɛrɛ nyiɛ nyɔɔ kɔ ba gaa le muɛe sɔ̄ pya lo yii edooa gbɔ̄mɛɛ. (Hib 11:4, 5) Wa le edoba ama dap i yere mɛm loo kɔ i kiisī lo e’ɛrɛ bɛābu bu Jɛhova.

18. Ena o biaɛfii lo edoo a? (Pya Hibru 11:6)

¹⁸ Nii’ee, i tɔɔ̄ bu nyɔuwe a bee piya sa gaa gbasu yiiloo. (2 Tim 3:13) Setan sii biewo edoā-ɛp pya nɛɛ Bari. Kaɛlɛɛ ɛrɛgeba nu finiabah i kpesī li deesī, dooraa i biaɛfii lo ebiibahkɛ̄ si tam nɛ Jɛhova, sa suā leere kɔ “i ɛrɛ i bɛābu sa sere nyɔɔ Bari a le dum.” (1 Tim 4:10) Nyɛŋiabu kɔ ekpɛanu Bari bee nɛ Job tɔgɛ kɔ “[Jɛhova] ɛrɛ le beenyiɛ le toesaɛ̄.” (Jem 5:11) Doraa i kiisī lo etɔɔ̄ agara nɛ Jɛhova dookɛ̄ Job bee doo, sa suā leere kɔ a gaa le nɛ ekpɛanu “pya a ye gbī.”—Buū Pya Hibru 11:6.