1. E na anua i suā leere kɔ i gaa tɔɔ̄dum bu “kpɛdumɛ dee a”?

EKƆ o bee mɛā sɔ̄ zua 1914 etaa ni? Lo a le wo, o etɔ̄na dum bu “kpɛdumɛ dee” loo lo sɔ̄ nyɔuwe ama. (2 Tim 3:1) Dɛ̄dɛɛ̄ ii emɔna ale i edaā nu akiiloo pya nu Jizɔs bee kɔ esira bu ilii sɔ̄ ama. Pya lo nu na nɔ̄, kii, nyɔŋa kɛnɛkɛ̄, pɔrɔ dumɛ nu, nyinyim doo gbee, le tɛ̄ŋaloo pya nɛɛ Jɛhova. (Mat 24:3, 7-9, 12; Luk 21:10-12) I emɔna kɔ pya nɛɛ gaa tɔɔ̄dum dookɛ̄ nɛɛ lɛɛratam Pɔɔl bee kɔ sere kɛ̄ kɔ ba edoo. (Ɛp ekpo a kɔ “Kɛ̄ Pya Nɛɛ Le Doo Anyaawo.”) Doodoo pya a gaa taāŋabah Jɛhova, i suā leere kɔ i gaa tɔɔ̄dum bu “kpɛdumɛ dee.”​—Maika 4:1.

2. Pya amunu ebip na a lee kɔ i suā ye ture a?

² Nyɔnɛbee gbɛnɛ-edo zua etɛ̄na aābu zua 1914 a, i suā leere kɔ i e’ina gaa tɔɔ̄dum bu kpɛdumɛ loo “kpɛdumɛ dee.” Sɔ̄ i etɔ̄na waɛloo kuma lo sɔ̄ nyɔuwe ama a, lu ebɛɛ̄ kɔ i suā ture loo pya ebip ama: E na a gaa le sira bu kpɛdumɛ loo “kpɛdumɛ dee” ama a? E e na Jɛhova gbī kɔ i doo kuma sɔ̄ i gaa ɛmadɛɛ̄ pya siranu ama a?

3. Dookɛ̄ mɔmanudɛɛ̄ a le bu 1 Pya Tɛsalɔnaika 5:1-3 kɔ doo, amunu kɔsiā na pya edonyɔɔ ekɔ a?

³ Buū 1 Pya Tɛsalɔnaika 5:1-3. Pɔɔl bee kɔ ue kumaloo “dee Jɛhova.” Dookɛ̄ dɔ kpakaɛ ama kɔ doo,  dee Jɛhova kiiloo bɔātɛ̄ sɔ̄ elu ebebe loo “Babilɔn lo Gbɛnɛ,” dɛ̄dɛɛ̄ ekwɔ sīdee taāŋabah, sa ina kuma bu nɔ̄ Amagidɔn. (Mum 16:14, 16; 17:5) Lɛɛ lo “dee” gae bɔātɛ̄, pya edonyɔɔ ekɔ “Efɛɛloo le Kpɔā!” (Pio tatap Baibol kue: “Efɛɛloo le kpoogaloo.”) Pya bɛbɛɛ wee kɔnage dua ue ama pio sɔ̄ sɔ̄ ba gaa kwa ue a le yɛɛ baɛ edonyɔɔ. * Kerewo, kɔ siā “efɛɛloo le kpɔā” lo Baibol kɔ nu kumaloo elu kee. E na anua a? Sɔ̄ lo ama esira, gbɛnɛ-edo nɛɛ ekɛɛrɛ kɔ pya bɛbɛɛ edoora kɔ nyɔuwe a le bu kpoogaloo, sa le bu efɛɛloo. Mɛ bu kaka, “gbɛnɛ etɛɛrɛloo” gaa le bɔātɛ̄, sɔ̄ a esaa “bugere gbegbee” nyɔɔnɛ.​—Mat 24:21.

4. (a) E na a bɔloo kɔ i suā akiiloo kɔ siā “efɛɛloo le kpɔā” a? (b) E na i esuā akiiloo lo kɔsiā a?

⁴ I suā pio nu akiiloo kɔ siā “efɛɛloo le kpɔā,” kerewo a ɛrɛ nage pya nu ii suā. Ii suā nu esira lɛɛ lo kɔ siā ama lu ekɔ, e ii suā nage kɛ̄ elu esere baloo lo kɔ siā ama doo. E ii suā sɛh lo kɔsiā elu edoo bu keekee sīdee ale elu edoo tɛ̄mabah aba ziī nɛɛ. Kaɛlɛɛ ɛrɛgeba kɛ̄ esira doo, nu i suā na kɔ: Ii le eyiga kɔ a lu edag i kɔ pya bɛbɛɛ edoo kɔ efɛɛloo a le bu nyɔuwe. Taāwo, i suā kɔ ɛɛ lo kɔsiā na Baibol ebee i kɔ nu akiiloo nɛ a. E a tɔgɛ kɔ “dee Jɛhova” esaa ebɔātɛ̄!

5. E na 1 Pya Tɛsalɔnaika 5:4-6 i kɔ nɛ kɔ i doo lo etɔgɛ kɔ i gaa kpɛ̄naloo baɛ “dee Jɛhova” a?

⁵ Buū 1 Pya Tɛsalɔnaika 5:4-6. Ue Pɔɔl ama kɔ nu i doo i nɛ lo etɔgɛ kɔ i gaa tɔɔ̄e baɛ “dee Jɛhova.” Ii le e “daa doodoo pya dɔɔ̄na nɛɛ.” I ɛrɛ e “tɔɔ̄ baɛ” sa nwaɛ̄dɛɛ̄. Bu edoba, lu ebɛɛ̄ kɔ i nwaɛ̄dɛɛ̄ i sa tɔɔ̄ kee aaloo nyɔuwe ale ɛrɛ bah bu bira bɛbɛɛ. Lo i su loo yere loo pya nu ama, a tɔgɛ kɔ i “le loo nyɔuwe.” (Jɔn 15:19) I suā kɔ aba Buɛ̄-mɛnɛ Bari na esu efɛɛloo nua bu nyɔuwe a.

6. E na i gbī eyerebah nɛ pya dɔɔ̄na kɔ ba a doo a, e e na anua a?

⁶ Naale aba bee kɔ ili i tɔɔ̄ baɛ, mɛ i yere nage bah nɛ pya dɔɔ̄na kɔ ba a nɔ nu Baibol ebee kɔ sere kɛ̄ kɔ esira bu nyɔuwe. Lee kɔ i suā kɔ aba sɔ̄ gbɛnɛ etɛɛrɛloo bɔātɛ̄, pya nɛɛ naale edapna nɔ nu akiiloo Jɛhova. Nu anua i tam zue ue lu gbaragbara lo! *

7. E na Jɛhova gbī kɔ i doo anyaawo a?

⁷ Bu nwīgbagbara sɔ̄ a siga lɛɛ “dee” Jɛhova bɔātɛ̄ ama, a gbī kɔ i kiisī bu tam zue ue. I ɛrɛ emuɛ̄ kɔ i “si tam  Nɛɛ-a-i-ɛrɛ eenyɔɔ dɛ̄dɛɛ̄ sɔ̄.” (1 Kɔr 15:58) Jizɔs ebee kɔ nu i doo sere kɛ̄. Sɔ̄ a gaa bee kɔ pya nu esira sa a tɔgɛ kɔ i e’ina bu kpɛdumɛ dee, a bee kɔ: “E le yereue edasī lu ezue loo dɛ̄dɛɛ̄ edo nyɔuwe.” (Maak 13:4, 8, 10; Mat 24:14) Naa kɛɛrɛ kɔ: Dɛ̄dɛɛ̄ sɔ̄ o si uwe zue ue, o gaa yerebah lo edoo gbɔ̄mɛɛ̄ mɔmanudɛɛ̄ Baibol.

8. I tɛɛ̄ doodoo wa suā kɔ tam zue ue gaa kiisī leere ni?

⁸ E na i dap kɔ akiiloo kɛ̄ tam zue ue gaa nyim kiisī doo a? Bu dɛ̄dɛɛ̄ zua, pya nɛɛ gaa dā le yereue akiiloo Buɛ̄-mɛnɛ Bari. Bu edoba, naa kɛɛrɛ nu akiiloo kɛ̄ pya zue ue gaa nyim yiiloo doo bu kpɛdumɛ dee ama. Bu zua 1914 a, buā pya zue ue bee le 5,155 bie 43 edo. Mɛ nii’ee, pya zue ue elua 8.5 miliɔn bie 240 edo! Kerewo, i tam sii ina kuma. I ɛrɛ ekiisī lo ekɔ nɛ pya nɛɛ kɔ aba Buɛ̄-mɛnɛ Bari na ekwa wa taāŋa a.​—Yɔɔ 145:11-13.

9. E na anua i kiisī lo ezue le yereue akiiloo Buɛ̄-mɛnɛ Bari a?

⁹ I le gaa zue le yereue akiiloo Buɛ̄-mɛnɛ mmɛ sɔ̄ Jɛhova ekɔ eleera. Kuma mɛ sɔ̄ na a siga nɛ pya nɛɛ kɔ ba alu wee suāloo Jɛhova Bari le Jizɔs Kraist ani? (Jɔn 17:3) Ii suā. Mɛ i suā kɔ i le gaa si mmɛ sɔ̄ gbɛnɛ etɛɛrɛloo ebɔātɛ̄, e pya nɛɛ a “lu esere loo dum a naa tah” ele gaa dā le yereue sa lu wee taāŋabah Jɛhova. (Doonu pya Nɛɛ lɛɛratam 13:48) Bu mɛ sīdee na i yerebah nɛ pya nɛɛ ama lɛɛ sɔ̄ gae tah ani?

10. E na Jɛhova enɛā i lokwa i dap tɔgɛ kaka ue pya nɛɛ a?

¹⁰ Jɛhova gaa tɛ̄maloo ye bɔŋanaloo i nɛ dɛ̄dɛɛ̄ nu i gbī lokwa i dap tɔgɛ kaka ue. Bu edoba, lu etɔgɛ i nu dɛ̄dɛɛ̄ kaɛ bie enɔānu taɛyɛɛ kaɛ. Enɔānu ama yerebah i nɛ kɔ i suā nu i kɔ nɛ pya nɛɛ tua sɔ̄ i wa ina kpaɛ̄ le sɔ̄ i wa obia si loo. E a tɔgɛ nage i kɛ̄ i dap sere enɔānu Baibol doo. Bɔŋanaloo Jɛhova enɛā nage i pya nu a le bu i Ekpo Tam Tɔgɛnu. Pya nutam ama yerebah i nɛ kɔ i . . .

• bɔātɛ̄ kɔnia sɔh,

• dana taɛ pya nɛɛ,

• zū pya nɛɛ kɔ ba a gbī enɔ nu a le bu Baibol,

•   tɔgɛ kaka ue sɔ̄ i gaa nyɔɔnɛ nɛɛ nɔ Baibol, le

• kɔ nɛ pya nɛɛ a ɛrɛ taɛ kɔ ba a si i dɔ intanɛt, le kɔ ba a lu i Tɔ Nɔnu Buɛ̄-mɛnɛ.

Bu kaka, ɛrɛ pya nutam ama naa gbɔɛ̄. I ɛrɛ esuā kɛ̄ esu wa siātam doo. * A lu toh a le bee ziī ziī ii lo ezue le yereue akiiloo Buɛ̄-mɛnɛ Bari.

11. E na anua a lu ekwa Online Bible Study Lessons a?

¹¹ Online Bible Study Lessons a le nyɔɔ jw.org lu dɔɔ̄na sīdee Jɛhova yerebah nɛ pya nɛɛ kɔ ba a nɔ kaka ue. (Ɛp kɛɛ̄ BIBLE TEACHINGS > ONLINE LESSONS.) E na anua a lu ekwa pya nu ama a? Ziī ziī enɔɔ̄, gbɛnɛ-edo nɛɛ a aa dɛ̄dɛɛ̄ barasī nyɔuwe gaa si i dɔ intanɛt wee nɔ Baibol. Pio pya nɛɛ o kɔ ue nɛ naale egbī kɔ o nyɔɔnɛe wa nɔ Baibol. Lo a le wo, tɔgɛ wa kɛ̄ a kura Online Bible Study Lessons a le i dɔ intanɛt ale o yere nu a aara pya lo nu enɔ wa ma. *

12. E na nɛɛ dap nɔ aā kɛ̄ a lu ekue Online Bible Study Lessons a?

¹² I Online Bible Study Lessons aara pya ekobee ue ama: “Baibol le nɛɛ a ɛrɛ ue a le bu,” “Pya nɛɛ a lu ekɔ nu kumaloo bu Baibol,” le “Yereue Baibol a nɛ Bɛābu.” Nɛɛ enɔ kaāna nu aāloo nɔnɔ pya ekobee ue ama:

• Sīdee Baibol dap yerebah nɛ nɛɛ

• Nɛɛ Jɛhova, Jizɔs, le pya ɛnjɛl lu

• Nu anua Bari bee dɛm nɛɛ

• Nu anua mɔna tɔga le bag dogo le

Pya lo ekobee ue kɔnage nu akiiloo sīdee Jɛhova e . . .

• lɛɛ tɔga le luh,

• lɛɛ pya e’ua kɛ̄ bu luh sere dum, le

• lɛɛ bɛbɛɛ pya nɛɛ sa wu ye Buɛ̄-mɛnɛ.

13. Ekɔ online lesson tɔɔ̄ge dɔ enɔānu Baibol ni? Naa baatɛ̄.

¹³ Pya online lesson ama naa tɔɔ̄dɔ enɔānu Baibol. Jizɔs enɛa i tam edoo kɔ pya nɛɛ a nyɔɔnɛ ye dumɛ. I ɛrɛ bɛābu kɔ pya nɛɛ a ɛrɛ taɛ enɔ pya ekobee ue a le nyɔɔ, tɔgɛ nia loo nu ba nɔ, sa gbī nage enɔ yereloo. Naa daba lo ba doo wo, ba dap yiga kɔ a lu enyɔɔnɛ wa nɔ Baibol. Sɔ̄ ziī lo nuenɔ e’ina kuma, lu ekɔ nɛɛ a gaa nɔ nu a ɛm kɔ ziī nɛɛ a lu wee ye enyɔɔnɛ nɔ Baibol. Ziī ziī dee, bɔŋanaloo ɛrɛge nu a yeeloo 230 pya nɛɛ ba gaa bara kɔ a lu enyɔɔnɛ wa nɔ Baibol aā i dɔ intanɛt tɛɛ̄ ɛŋɛnɛ nyɔuwe! Lo kɔnia ue sī le sī ama lu ebɛɛ̄!

14. Dookɛ̄ zuurabahtɔ̄ Jizɔs a le bu kpa Matiu 28:19, 20 kɔ doo, e na i piiga lo edoo a, e e na anua a?

¹⁴ Buū Matiu 28:19, 20. Sɔ̄ i nyɔɔnɛ pya nɛɛ nɔ Baibol, i ɛrɛ epiiga kuma kɛ̄ i dap doo lo e “doo kɔ [ba] a nyɔɔnɛ dumɛ [Jizɔs] . . . , wa tɔgɛ kɔ ba [a] sere dɛ̄dɛɛ̄ nu a bee wa nɛ bu lok.” Lu ebɛɛ̄ kɔ i yerebah nɛ pya nɛɛ kɔ ba a su taāŋabah Jɛhova nua nu a kuī sa yere kpotɛ̄ ye Buɛ̄-mɛnɛ. Lo ama kura kɔ i zū wa kɔ ba a su kaka ue ba enɔā yere bu wa dum, kiīloo wa nɛ Jɛhova sa liamaā. Aba nu edoo kɔ ba a tɛɛ̄ yeebah dee Jɛhova lo.​—1 Pit 3:21.

15. E na ii le edoo a, e e na anua a?

 ¹⁵ Dookɛ̄ i bee kɔ doo tua sɔ̄ a, sɔ̄ sɔ̄ naa binia lo nyɔuwe ama gaa le ina kuma. Nyɔɔwo, ii le enyɔɔnɛ pya nɛɛ a naa ɛrɛ taɛ lo enyɔɔnɛ dumɛ Jizɔs nɔ Baibol. (1 Kɔr 9:26) I tam lu gbaragbara! Ɛrɛ gbɛnɛ-edo pya nɛɛ ba gbī edā yereue akiiloo Buɛ̄-mɛnɛ lɛɛ sɔ̄ gae tah.

16. Dookɛ̄ kpa Mumuuna 18:2, 4, 5, 8 kɔ doo, e na i doo a?

¹⁶ Buū Mumuuna 18:2, 4, 5, 8. Pya dɔ Baibol ama tɔgɛ kɔ a ɛrɛ nu Jɛhova gbī aābah pya a ye taāŋabah. Dɛ̄dɛɛ̄ pya Nɛɛ Kraist ɛrɛ ekpooraloo aaloo Babilɔn lo Gbɛnɛ. Lɛɛ ziī nɛɛ gae nɔ kaka, a bee dap le yɛɛ ziī sīdee yigabari. Naa daba, a bee le gaa si tɔbari sa wee ɛrɛ nage bah bu pya nu a wee lu edoo bie tɔbari. Ale a ebee dap tura kpugi bie lo tɔbari. Lɛɛ nɛɛ a gaa nɔ Baibol gae nyim tura lo elu nɛɛ zue ue a sii liamaā, a ɛrɛ ekpooraloo lɛɛloo ekwɔ sīdee yigabari kaāna. A ɛrɛ e’ɛm kpa ma tɔbari a gaa bee si a, ale ɛrɛgeba ekwɔ bɔŋanaloo a ɛrɛ nu edoo kiiloo Babilɔn lo Gbɛnɛ kɔ a naa wa lenae yɛɛ. *

17. Mɛ dua tam na pya Nɛɛ Kraist naale esi a, e e na anua a?

¹⁷ Kaka Nɛɛ Kraist naale esitam a ɛrɛ lɔgɔ nu edoo loo ekwɔ sīdee yigabari. (2 Kɔr 6:14-17) Bu edoba, a naale esitam bie bu tɔbari. Gbaāloo wo, Nɛɛ Kraist a wee wube alu eyere loo dɔɔ̄na tam naa le egbī esitam loo tɔ elu esu daā ekwɔ sīdee taāŋabah. E lo a para batam, a naale ebip tam aābah ale gbī esitam nɛ pya ekwɔ sīdee yigabari. E na anua lo ama kuī i loo kaāna a? Nyɔnɛbee ii gbī e ɛrɛ epoo bu tam le pɔrɔ pya ekwɔ sīdee yigabari gaa si lo a naa nia Bari.​—Ais 52:11. *

18. Bu mɛ sīdee na ziī wuga nɛɛdam bee su zuurabahtɔ̄ a le bu Baibol daānu sɔ̄ a gaa si tam a?

¹⁸ Pio zua akii adumɛ a, ziī nɛɛ a lu e nɛ tam bee kɔ nɛ ziī nɛɛ kanɛɛ kɔ a lu wa tɔbari wee sitam kanu. Lo nɛɛ a ɛrɛ lo tam ama a suā kɔ lo nɛɛ kanɛɛ naa wee yiga esitam bie tɔbari. Mɛ lo sɔ̄ lo nɛɛ gaa bee gbī nɛɛ esi lo tam bu gbaragbara. Kerewo, lo wuga  bee doo dogo gbanialoo zuurabahtɔ̄ a le bu Baibol sa naa bee si lo tam. Lo kaɛ a nyɔɔnɛ, bee lu eyere foto dɔɔ̄na nɛɛ kanu a bee ka cross pya lo tɔbari bu niuzpaper. Naa ɛp kɛ̄ lo ama ebee su pɔrɔ bee nua loo lo wuga ama le pya ye wuga bu yira doo a! Naa kɛɛrɛ kɛ̄ ebee tɔɔ̄ nage loo Jɛhova doo.

19-20. (a) E na i enɔā a? (b) E na i gaa le sikɛ̄ nɔ a?

¹⁹ Dookɛ̄ mɔmanudɛɛ̄ Baibol kɔ doo, nu esikɛ̄ sira sɔ̄ sɔ̄ naa binia na sɔ̄ pya bɛbɛɛ ekɔ siā “efɛɛloo le kpɔā.” I doo yaa Jɛhova loo nu a etɔgɛ i, i suā kɔ pya edonyɔɔ naale e’ɛrɛ kaāna efɛɛloo. E na i doo lɛɛ lo siranu gae sira sa bugere gbegbee nyɔɔnɛ a? Jɛhova gbī kɔ i kiisī lo ezue yereue Buɛ̄-mɛnɛ sa doo kɔ pya nɛɛ a nyɔɔnɛ dumɛ Jizɔs. E a bɔnage loo kɔ i kpooraloo lɛɛloo ekwɔ sīdee taāŋabah. Lo ama lu yii bu tɔɔ̄ aaloo ɛrɛgeba nu a ɛrɛ edoo kiiloo Babilɔn lo Gbɛnɛ ale si tam bie wa tɔbari.

²⁰ Ɛrɛ nage pya dɔɔ̄na siranu a gaa le sira bu kpɛdumɛ loo “kpɛdumɛ dee.” A ɛrɛ nage pya dɔɔ̄na nu Jɛhova gbī kɔ i doo. Pya lo nu ama na e, e bu mɛ sīdee na i dap kpɛ̄naloo baɛ dɛ̄dɛɛ̄ pya nu a gaa le sira li deesī ama a? I nɔ lo ama bu elua ekobee ue li.