1. E na anua Jɛhova gbī kɔ i taāŋabah aba alɛ a?

JƐHOVA gbī kɔ i taāŋae bah aba alɛ nyɔnɛbee alɛ na a bee i Dɛm sa i nɛ Dum a. (Mum 4:11) Kerewo, ɛrɛ nu finiabah a le. Kere i wereloo Jɛhova sa ye nɛ enwadɛɛ̄, pya dɔɔ̄na nu a i kuī loo dap doo kɔ i aa taāŋa na bah aba alɛ dookɛ̄ a gbī doo. Lu ebɛɛ̄ kɔ i dābeeloo kɛ̄ lo ama dap sira doo. Kerewo, i dasī kɔ nu akiiloo nu taāŋabah aba Jɛhova kura.

2. Dookɛ̄ A’aa 34:14 tɔgɛ doo, e na i doo lo i gaa taāŋabah aba Jɛhova a?

² Bu Baibol, nu taāŋabah Bari kura na ɛ’ɛrɛ togatoga wereloo ye kumaloo. Sɔ̄ i taāŋabah aba Jɛhova, aba alɛ na i si tam nɛ a. Ii le elɛɛbaloo kɔ lɔgɔ nɛɛ ale nu a su ye dɔ bu i beenyiɛ.​—Buū A’aa 34:14.

3. E na anua i taāŋabah Jɛhova aābu dɛ̄dɛɛ̄ i beenyiɛ a?

³ Ii ɛrɛ baɛbaɛ beenyiɛ kumaloo i taāŋabah Jɛhova. E na anua a? Nyɔnɛbee i taāŋa ye bah nyɔɔ pya nu i suā a ye kiiloo. I enɔā nu akiiloo pya ye lele elap dogo. I suā nu a ye nia le nu a ye bɛā, e i wereloo nu a ye nia sa baaloo nu a ye bɛā. I suā sa yere kpotɛ̄ nu alu ye ekɛɛrɛ kumaloo miɔŋɔ nɛɛ. I buū nua nu ka kɔ a lɛɛ i baloo kɔ i lu ye gbo. (Yɔɔ 25:14) Dɛ̄dɛɛ̄ nu i nɔ akiiloo i nɛɛ Dɛmnu doo kɔ i tɔɔ̄ ye waɛloo.​—Jem 4:8.

4. (a) E na pɔrɔ-edɔɔ̄ su siātam lo edoo kɔ i aa taāŋa na bah aba Jɛhova a? (b) E na i gaa le nɔ bu ekobee ue ama a?

 ⁴ Pɔrɔ-edɔɔ̄ na a gaa baɛbee lo sɔ̄ eku ama a, e a doo kɔ pya nu a le bu nyɔuwe ama a nia i gbɛnɛ sa ii dap amana i taɛ namloo. (Ɛfɛs 2:1-3; 1 Jɔn 5:19) Nu a gaa gbī na kɔ i wereloo pya dɔɔ̄na nu lokwa ii taāŋa na bah aba Jɛhova. Doraa i kɔ nu akiiloo baɛ sīdee Pɔrɔ-edɔɔ̄ dap doo lo ama. Tuatua, a gbī kɔ i gbī e’ɛrɛ gbɛnɛkpo zɔ le kpugi, eree baɛ, a gbī kɔ i sagɛ sīdee ɛrɛ ekpeloo a bee piya.

5. E na anua i nwaɛ̄dɛɛ̄ kiiloo wereloo kpugi a?

⁵ Dɛ̄dɛɛ̄ ii wee gbī e’ɛrɛ nuede a i gbɔɛ̄loo, nu eyaa a bɔloo, le ekpedɛɛ̄ kɛ̄ etɔɔ̄. Kerewo, i ɛrɛ enwaɛ̄dɛɛ̄ lokwa ii bɔātɛ̄ wereloo kpugi. Gbɛnɛkpo pya a le bu nyɔuwe Setan lu pya a “wereloo kpugi” sa were nage loo nu kpugi dap yaɛ. (2 Tim 3:2) Jizɔs bee suā kɔ edap lu edoā-ɛp pya a wee ye nyɔɔnɛ dumɛ kɔ ba a ɛrɛ lo wereloo ama. Jizɔs bee kɔ: “Lɔgɔ nɛɛ naa dap lu zooro nɛ baɛ tɛ, nyɔnɛbee a ebaaloo ziī sa wereloo elua, ale a esu ziī sa ɛp elua kuma kɛ̄. Buii le edap lu zooro nɛ Bari le Zɔ.” (Mat 6:24) Nɛɛ a gaa taāŋabah Jɛhova sa gaa sunage nyɔɔnyɔɔ sɔ̄ gbiā kɛ̄ edoo lu mɛnɛ bu nyɔuwe ama, ekura kɔ a gaa si tam nɛ baɛ tɛ. Naale edap taāŋabah aba Jɛhova.

6. E na i dap nɔ aāloo nu Jizɔs bee kɔ nɛ pya bɔŋanaloo li Leodisia a?

⁶ Sɔ̄ tua sɔ̄ o’oo tup zua C.E. ebee saa e’ina kuma, pya a bee le bu bɔŋanaloo a bee le gbɛnɛ buɛ̄ Leodisia bee bɔātɛ̄ ekaaga kɔ: “M lu mɛnɛ, e a elua edoo kɔ m ɛrɛ zɔ, sa lɔgɔ nu naa bɛɛ̄na  mɛ.” Mɛ Jɛhova le Jizɔs bee muɛ̄ kɔ ba lu pya “nɛɛ a bee muɛ̄ lɛadɛɛ̄, nɛɛ a bɔloo toesaɛ̄, le nwī gbɔɔni, le nɛɛ zima dɛɛ̄, sa kiātɛ̄.” Jizɔs bee wa zuurabahtɔ̄, naale nyɔɔ zɔ ba bee ɛrɛ, mɛ nyɔɔ kɛ̄ wereloo zɔ gaa bee gbee gbanialoo ba nyɔɔnɛ Jɛhova ɛrɛ doo. (Mum 3:14-17) Lo i muɛ̄ kɔ i e’ina gaa wereloo zɔ, i ɛrɛ edoo dogo bu nwaanwaabah lo enyaana i ekɛɛrɛ. (1 Tim 6:7, 8) Lo ii doo wo, i bɔātɛ̄ ewereloo pya dɔɔ̄na nu sa Jɛhova naale esu i taāŋabah. Alu “Bari wiibu.” (Deut 4:24) Kpugi dap i bɔātɛ̄ kuīloo doodoo wa ni?

7-9. E na o nɔ aāloo nu a bee siraloo nɛɛ kanɛɛ a kura Devid a?

⁷ Naa kɛɛrɛ nu a bee siraloo ziī nɛɛ kanɛɛ alu United States a kura Devid lo a wee su mɛm siātam. A bee kɔ a wee sie gbɛnɛkpo tam nɛ ye tɛtam. Bee lu eyere ye dɔ loo bie lo betam, e pya nɛɛ alu lo edo bee ye suā nage loo kɔ a para lo tam gbɛnɛ. Devid kɔ: “Lo sɔ̄ m bee kɛɛrɛ kɔ pya ekpɛanu ama lu leelee a aabah Jɛhova,” mɛ bu kaka, ye kiisī leere bee aage bah Jɛhova ni?

⁸ Kina kina, Devid bee bɔātɛ̄ muɛ̄ kɔ ye tam gaa gbee e ye gbanialoo loo Jɛhova. A bee kɔ: “Kere sɔ̄ m le enɔānu bu bɔŋanaloo le bie uwe zue ue, m bee le gaa kɛɛrɛ nu akiiloo taāŋa a le kɛ̄tam, m gaa bee ɛrɛ gbɛnɛkpo kpugi, mɛ tɛɛ bee mɛ eeloo nyɔɔ, e taāŋa bee bɔātɛ̄ yii bu na tɔ.”

⁹ Devid bee muɛ̄ kɔ alu ebɛɛ̄ kɔ a sikɛ̄ kɛɛrɛ nu a ye kuī loo gbɛnɛ. A bee kɔ: “M bee biaɛfii lo enyaana na kɛ̄tɔɔ̄,”  Devid gbī enyaana kɛ̄ a gaa si tam doo sa a bee kɔ nɛ ye tɛtam. E na a bee sira aabu ani? Bee lu elɛɛ Devid loo tam! E na a bee doo kumaloo ani? A bee kɔ: “Ye nyɔɔ’ee, m bee yere bee lo esitam sɛmdee nwī kere sɔ̄ bu booboo enɔɔ̄.” Lo ekuūdɛɛ̄loo aba aba, Devid le ye wa gaa si tam kwakɛ̄. Sɔ̄ pio sɔ̄ etɛ̄na, a bee bɔātɛ̄ si tam sɛmdee dɛ̄dɛɛ̄ sɔ̄, e ye wa bee ye sikɛ̄ nyɔɔnɛ sɛmdee. Dam le wa ama gaa si tam a kiikɛ̄ lo edo nɛɛ naale eyiga esi, mɛ lo tam naa kuī wa loo gbɛnɛ. Kere kpugi ba wa kpɛ tera kaāna sɔ̄ alu edoloo nu a wee lu ekpɛ wa bie wa tua kɛ̄tam, ba ɛrɛ kuma kpugi ba ekpɛloo nu a wa bɛɛ̄ bu ziī ziī enɔɔ̄. Ba gbī esu Jɛhova nua tuatua, e ba suā kaāna kɔ a wee kuūdɛɛ̄loo pya ba gbī ye Buɛ̄-mɛnɛ nua tuatua.​—Mat 6:31-33.

10. I dap baɛloo i beenyiɛ doodoo wa?

¹⁰ Kere i ɛrɛ gbɛnɛkpo kpugi ale ii ɛrɛ, lu ebɛɛ̄ kɔ i baɛloo i beenyiɛ. Doodoo wa? O aa nyimɛ taɛ wereloo kpugi bu a. E o aa yiga kɔ o gbora alu tuatua loo o taāŋabah Jɛhova. O doodoo wa suā lo lo ama e ina gaa a siraloo? O dap bip pio ebip ama aba ɔɔ: ‘M wee bialoo kɛɛrɛ nu akiiloo na gbora kere sɔ̄ m le bu enɔānu ale bie uwe zue ue ni? M wee bialoo kɛɛrɛ sɛh m ɛrɛge kpugi deesī li ni? Ekɔ kpugi le zɔ gaa nua taāŋa bu na iya dam le wa? Eniage mɛ esitam pya dɔɔ̄na ɛp kɔ a kiikɛ̄ lo a doo kɔ m dap su gbɛnɛkpo sɔ̄ taāŋabah Jɛhova ni?’ (1 Tim 6:9-12) Sɔ̄ i gaa kɛɛrɛbu pya ebip ama, i ɛrɛ enyɛŋiabu kɔ Jɛhova were i loo sa a yira yii ama nɛ pya a taāŋabah aba alɛ kɔ: “Mm le elɛɛ a baloo, e mm le ebie a.” Nu anua a lo, nɛɛ lɛɛratam Pɔɔl bee ɛm kɔ: “Seraa bui dum lɛɛ loo wereloo kpugi.”​—Hib 13:5, 6.

11. E na nu ɛā ekpeloo dap doo loo nɛɛ a?

¹¹ Jɛhova gbī kɔ dum a kpe i loo, e nu i si ee dap doo kɔ i ɛrɛ dua ekpeloo ama. Muɛ̄ Ue Bari muūna kɛ̄ lo ama lu kaka doo kɔ “lɔgɔ nu a lee ee bee nɛɛ de sa ɔ̄ naale, sa ɛrɛ ɛɛbu bu ye epiaga tam.” (Eklis 2:24) Kerewo, booboo nu ɛā ekpeloo a le bu nyɔuwe ama dap i ɛrɛ pɔrɔ pah nyɔɔ. Doo kɔ pya nɛɛ a ɛp kɔ, ɔ̄ sɔɔ̄, kunagā, ale pya dɔɔ̄na dogo a  naa ɛɛ lee, a doo nage kɔ pya nɛɛ a ɛp nu Muɛ̄ Ue Bari kɔ a bee piya tɛrɛ sa were nage loo edoo pya lo nu.

12. Dookɛ̄ 1 Pya Kɔrint 10:21, 22 kɔ doo, e na anua i nwaɛ̄dɛɛ̄ sɔ̄ i gaa sagɛ nu i su ɛā ekpeloo a?

¹² I gbī etaāŋabah aba Jɛhova, nyɔɔwo, ii le edap denu aā nyɔɔ “kasi [Jɛhova]” le nyɔɔ “kasi pya pɔrɔ edɔɔ̄.” (Buū 1 Pya Kɔrint 10:21, 22.) Nyɔɔnɛ nɛɛ denu wee tɔgɛ kɔ i lu gbo. Lo i sagɛ nu ɛā ekpeloo a tɔgɛ dogo lumiī, doo edɔɔ̄, kunagā, pya dɔɔ̄na taɛ namloo ale dogo a naa ɛɛ, a le doodoo bee i gaa nyɔɔnɛ pya nɛɛbaa Bari de nu ale de nu ba i bui nɛ. E nu esira aabu na bee, egbee i sa gbee nage gbanialoo i ɛrɛ loo Jɛhova.

13-14. Aāloo nu kpa Jemes 1:14, 15 kɔ, e na anua a lee kɔ i nwaɛ̄dɛɛ̄ loo bie i ekɛɛrɛ nyɔɔ pɔrɔ pɔrɔ nu a? Naa nɛ edoba.

¹³ Naa ɛp pio kɛ̄tɔɔ̄ i dap su ɛrɛ ekpeloo doloo nuede ama. Sɔ̄ i de nu i sagɛ nu i yaa bu egā. Mɛ aba sɔ̄ i yɔgara lo ziā a, ii le edapna sagɛ kɛ̄ lo ziā esi i tam bu ekpaloo doo. Le nuede dap doo kɔ i le bu kaāna nwanaloo; pɔrɔ nuede edoo kɔ loo i a dumɛ. Ii le emuɛ̄ nu esira aabu aba sɔ̄, mɛ sɔ̄ sɔ̄ etɛ̄na i bɔātɛ̄ muɛ̄.

¹⁴ Bu aba lo sīdee, sɔ̄ i sagɛ nu i su ɛā ekpeloo, i dap sagɛ nu i bie bu nyiɛ i. Mɛ sɔ̄ lo sɔ̄ etɛ̄na, lo ekpeloo e ɛrɛ pah nyɔɔ kɛ̄ i kɛɛrɛ nu sa doo dogo doo. Ɛrɛ ekpeloo a lee dap i lee loo; ɛrɛ ekpeloo a bee piya egbee i nu loo. (Buū Jemes 1:14, 15.) Pah a aaloo pɔrɔ sīdee ɛrɛ ekpeloo naa dap sira aba sɔ̄, mɛ esira sɔ̄ sɔ̄ etɛ̄na. Nu anua lo Baibol zuura i bahtɔ̄ kɔ: “Bui aa doo kɔ alu edag i: Bari naale nɛɛ ebɔbɛɛ kɛɛ, nyɔnɛbee ɛrɛgeba nu nɛɛ egara, lo nu ama na a efiinage a; nyɔnɛbee nɛɛ a egara nɛ ye namloo aāloo ye namloo efiinage nu a bɛm.” (Gal 6:7, 8) Naa ɛp kɛ̄ alu ebɛɛ̄ kɔ i kiī dɛ̄dɛɛ̄ sīdee ɛrɛ ekpeloo a yere kpotɛ̄ pya nu Jɛhova baaloo doo a!​—Yɔɔ 97:10.

15. Amunu dɔɔ̄nu na Jɛhova i nɛ kɔ i ɛā ekpeloo a?

¹⁵ Booboo pya nɛɛ Jɛhova wereloo e’ɛp JW Broadcasting^®, lo alu i kɛ̄ si ee nu nyɔɔ intanɛt ale TV a naa bee piya. Ziī wuga nɛɛwa a kura Marilyn bee kɔ: “JW Broadcasting eyerebah mɛ nɛ kɔ m kɛɛrɛ nu a bɔloo anyaawo ee tua sɔ̄, e mm sagɛ lo m ɛp ale lo mm le e’ɛp. Sɔ̄ a bee kɔ alu egba mɛ bie ale loo mɛ ɔ, m wee gbī ziī ekɔaue a nɛ agɛrɛloo ale nu a bee lu ekɔ bu Nu a le nɛ Dee sa si ee. Lo ama wee doo kɔ m agɛrɛbah tɔɔ̄ waɛloo Jɛhova le ye bɔŋanaloo. JW Broadcasting enyaana na dum.” Olo gaa ɛrɛge biī aāloo dɔɔ̄nu a aabah Jɛhova ama ni? JW Broadcasting ɛrɛ lo a gaa lu elɛɛ tɔ bu ziī ziī enɔɔ̄, a ɛrɛ nage booboo lo alu edā aba muɛ̄ le vidio, gbaā nage loo pya yɔɔ a i yere mɛm loo lo o dap si ee sa gbaɛ̄tɔ̄ ɛrɛgeba sɔ̄.

16-17. E na anua i ɛrɛ enwaɛ̄dɛɛ̄ kaāna loo kuma sɔ̄ i su ɛā ekpeloo a, e i dap doo wo doodoo wa?

¹⁶ Naale aba dua sīdee i ɛā ekpeloo na i nwaɛ̄dɛɛ̄ loo a, mɛ kuma sɔ̄ i su ɛā lo ekpeloo. Lo ii nwaɛ̄dɛɛ̄ loo lo ama, i dap su gbɛnɛkpo sɔ̄ ɛā ekpeloo ee kɛ̄ i su gbɛnɛkpo sɔ̄ taāŋabah Jɛhova doo. Booboo nɛɛ muɛ̄ kɔ a agae wa bah lo ebaɛbee kuma sɔ̄ ba esu ɛā ekpeloo. Ziī wuga nɛɛwa elua 18 zua a kura Abigail kɔ: “Si ee TV doo  kɔ m ɛrɛ iinaloo sɔ̄ m etɛɛra lo biradee sah. Mɛ lo mm nwaɛ̄dɛɛ̄, m dap su gbɛnɛkpo awa ɛma.” Ziī zege wuga nɛɛdam elua 21 zua a kura Samuel kɔ: “M wee si ee pya vidio a naa nyɔɔ dɛɛ̄ gbɛnɛ bie nyɔɔ intanɛt. M wee bɔātɛ̄ aāloo ziī ka, elɛɛ m gae suā, 3 ale 4 awa etɛ̄na.”

¹⁷ O dap baɛbee kuma sɔ̄ o su ɛā ekpeloo doodoo wa? Tua nu edasī doo na dasī suā kuma sɔ̄ o gaa su daā. O dap ɛm kɛ̄ o gaa doodoo bu ziī kaɛ. Ɛm kuma awa o gaa su ɛma TV, tɔma nyɔɔ intanɛt, le kuma sɔ̄ o su biā vidio game nyɔɔ o calendar. Lo o kɛɛrɛ kɔ o gaa sue gbɛnɛkpo sɔ̄ daā, piiga lo ekwa kɛ̄ o nɔɔ doo. Nɔɔ lo edasī doo pya nu a a kuī loo kaāna, lɛɛ o nɔɔ sɔ̄ o su ɛā ekpeloo. Gbaāloo wo, bara kɔ Jɛhova a yerebah a nɛ lokwa o dap doo nu o nɔɔ. Dodoo pya nu ama edoo kɔ o dap ɛrɛ sɔ̄ esu nɔā Baibol nyɔɔ oloo, ɛrɛ enɔānu butɔ, si enɔānu bu bɔŋanaloo, le lo etaāŋabah Jɛhova bu tam tɔgɛnu le zue le yereue. Sɔ̄ o su ɛā ekpeloo edap sikɛ̄ a nia kaāna nyɔɔbee o su Jɛhova nua tuatua.

18-19. I tɔgɛ kɔ i taāŋae bah aba Jɛhova doodoo wa?

¹⁸ Sɔ̄ nɛɛ lɛɛratam Pita e’ɛma nu akiiloo kɛ̄ nyɔuwe Pɔrɔ-edɔɔ̄ e’ina kuma doo le aā nyɔuwe a gaa lu, a bee kɔ: “Pya wereloo, kɛ̄ bui tɔɔ̄baɛ pya lo nu ama doo, agɛrɛaloo lokwa a lu emuɛ̄ i bu efɛɛloo, pya a naa ɛrɛ kpu ale beebee ye kɛ̄sī.” (2 Pit 3:14) Sɔ̄ i gbaɛ̄tɔ̄ zuurabahtɔ̄ ama, doo kuma nu i dap lo etɔɔ̄ ɛɛ bu dogo sa si tam nɛ Jɛhova dookɛ̄ a gbī doo, i tɔgɛ kɔ aba alɛ na i gaa taāŋae bah a.

¹⁹ Pɔrɔ-edɔɔ̄ le ye nyɔuwe ele gaa i doā-ɛp kɔ i su pya dɔɔ̄na nu nua tuatua sa lɛɛbaloo etaāŋabah aba Jɛhova. (Luk 4:13) Mɛ kaɛlɛɛ ɛrɛgeba doā-ɛp i kpesī, ii le elɛɛbaloo kɔ lɔgɔ nɛɛ ale nu a su dɔ Jɛhova bu i beenyiɛ. I biaɛfii lo esu nu a kuu aba Jɛhova ye nɛ, lo a le i taāŋabah!