ZIĪ ziī zua, aa lu e’obia su gbɛnɛ-edo pya a bee lu ekpo yima bu bɔŋanaloo Pya Nɛɛ Kraist. Naa ɛp dua “ɛɛŋa ele li bunyɔɔ” sɔ̄ ziī ziī aba obia lu a! (Luk 15:​7, 10) Lo ebee lu e’obia a su, o dap suā leere kɔ Jizɔs, pya ɛnjɛl, le Jɛhova ɛrɛ ɛɛbu lo emuɛ kɔ o esiakɛ̄ obia lu bu ye bɔŋanaloo. Kerewo, o dap kpesī pio finiabah kuma sɔ̄ o gaa obia wu o gbanialoo kumaloo Jɛhova. Pio amunu nu finiabah na o dap kpesī a, e ena edap a yerebah nɛ a?

Nyiɛ gbɛnɛ-edo nɛɛ wee lege aa wa bege ue kereadoo ba e’obia lu bu bɔŋanaloo. Dap lu kɔ o dābeeloo kɛ̄ nu bee tɔɔ̄loo Mɛnɛ Devid doo. Kere sɔ̄ ebee lu e’aaloo ye pɔrɔ ye nɛ, a bee kɔ: “Na doo gbee etura mɛ.” (Yɔɔ 40:12; 65:⁠3) Sɔ̄ ziī nɛɛ a bee lu ekpo lɛɛ bu bɔŋanaloo e’obia lu loo Jɛhova, a wee lege aa ɛrɛ ekiɛ̄nu le bɔp kɛɛ bu pio zua. Isabelle * a bee lu ekpo bu nu a eeloo 20 zua bee kɔ: “A aga mɛ bah lo eyiga kɔ Jɛhova dap mɛ aaloo nɛ.” Lo o ɛrɛ e’ɔaloo, o dapnage sikɛ̄ ɔloo bu edɔɔ̄. (Kam 24:10) Piiga lo edoo kɔ lo ama aa a sira loo.

A tɔɔ̄loo pya dɔɔ̄na kɔ pya nu alu e’ɛmadɛɛ̄ wa aābah lo e’obia kwa wa gbanialoo kumaloo Jɛhova eeloo. Sɔ̄ a bee lu e’obia su Antoine, a bee kɔ: “A tɔɔ̄ mɛ loo kɔ m e’ibere dɛ̄dɛɛ̄ nu m ebee nɔ doodoo Nɛɛ Kraist.” Dua ekɛɛrɛ ama wee kpaɛ̄ pio nɛɛ lɛɛ loo esu wa loo nɛ esiatam Bari.

Bu edoba, lo a le gbɛnɛ fii efɔp gbee tɔ ziī nɛɛ, lo nɛɛ dap ɛrɛ e’ɔaloo sɔ̄ a kɛɛrɛ dua sɔ̄ le epiaga esue ye bah lo esikɛ̄ wu lo tɔ. Bu aba lo sīdee, lo o gbanialoo kumaloo Jɛhova egbea nyɔɔbee ziī gbɛnɛ pɔrɔ o bee si, o dap  kɛɛrɛ kɔ esu a gbɛnɛ epiaga bah lo esikɛ̄ kwa o kɛ̄tɔɔ̄ bu edɔɔ̄. Mɛ a dap lu eyerebah a nɛ.

Jɛhova kue i kɔ: “Bui lua anyaawo, doraa i gbaa yii bira.” (Ais 1:18) O epiiga kaāna lo e “yii bira.” Bu Jɛhova ɛɛ a loo kɔ o doo pya epiaga ama. Naa kɛɛrɛ: O edora kɔ Jɛhova a ɛrɛ kaāna nu a dap yira nyɔɔ agara ue nɛ Setan a ye bege ue!​—⁠Kam 27:⁠11.

Dodoo wo tɔgɛ kɔ o etɔ̄na waɛloo Jɛhova, sa a yira yii lo etɔɔ̄nage a waɛloo. (Jem 4:⁠8) Kerewo, naale aba bee kɔ pya nɛɛ muɛ i kɔ i e’obia lu bu bɔŋanaloo na alu ebɛɛ̄ a, mɛ a ɛrɛ gbɛnɛ-edo nu a le bu. Alu ebɛɛ̄ kɔ o kiisī lo e’agɛrɛtɛ̄ wereloo o ɛrɛ kumaloo o Tɛ le o Gbo, lo a le Jɛhova. Bu mɛ sīdee na o dap doo lo ama a?

Piiga lo e’ɛrɛ pya nu seeasī a bɔloo. Naadaba o lege aa nyɛŋiabu pya kpog-bee nu o ebee nɔ akiiloo Jɛhova le pya yii a yira kiiloo deesī. Mɛ a lee kɔ o kwabaloo o sīdee tɔɔ̄dum doodoo Nɛɛ Kraist, lo a ɛrɛ nu edoo kiiloo si uwe zue ue le gbaaloo pya o wuga nɛɛdam le nɛɛwa bu bɔŋanaloo dɛ̄dɛɛ̄ sɔ̄. Ɛp pio nu o dap seeasī ama.

Wee kɔ ue nɛ Jɛhova dɛ̄dɛɛ̄ sɔ̄. O Tɛ dābeeloo kɔ kɛ̄ nu o bee doo a bialoo kiɛ̄ doo dap doo kɔ a aga a bah eyere kara ye nɛ. (Rom 8:26) Kaɛlɛɛ wo, “agɛrɛloo bialoo yere kara,” sa kɔ nɛ Jɛhova kɛ̄ a a taɛ lo eyii ye gbo doo. (Rom 12:12) Sɔ̄ Andrej bee nyɛŋiabu nu a bee ye sira loo, a bee kɔ: “M bee bege ue aba mm gbɛnɛ sa kɛɛ bee mɛ bɔp. Mɛ ɛrɛgeba sɔ̄ m yere kara sah, loo mɛ wee sukɛ̄. M bee sikɛ̄ ɛrɛ efɛɛloo beenyiɛ.” Lo oo suā nu ekɔ bu kara, nɔ nu akiiloo kara Mɛnɛ Devid bee yere sɔ̄ a bee kiiya alu e’ɛm bu kpa Le-yɔɔ 51 le 65 ekobee.

Nɔ Baibol dɛ̄dɛɛ̄ sɔ̄. Lo ama edoo kɔ o ɛrɛ e’agatɛ̄ yira sa eyerebah a nɛ kɔ wereloo o ɛrɛ loo Jɛhova a nyim. (Yɔɔ 19:​7-11) Felipe bee kɔ: “Nyɔnɛbee mm wee buū sa nɔ Baibol dɛ̄dɛɛ̄ sɔ̄ a, m bee ɔloo sa lɛɛbaloo etaāŋabah Jɛhova. Mm bee gbīna esikɛ̄ tɛɛ̄ dua ekwɔ ama, nyɔɔwo m bee biaɛfii lo enɔ nu nyɔɔ na loo dɛ̄dɛɛ̄ sɔ̄.” Olo dapnage doo wo. Lo o gbī esuā pya ekobee ue o dap su nɔānu nyɔɔ oloo, o dap bip ziī o gbo a nyim tura kɔ a yerebah a nɛ.

Obia kwa o gbanialoo kumaloo pya o wuga nɛɛdam le nɛɛwa. Siga pya a bee obia lu bu bɔŋanaloo kɛɛrɛ kɔ pya dɔɔ̄na e’ɛbe wa bu pɔrɔ sīdee. Ziī nwiīnɛɛwa a kura Larissa bee kɔ: “Kɛɛ bee mɛ bɔp. A bee mɛ tɔɔ̄loo kɔ m elɔgara pya wuga bu bɔŋanaloo. M bee kɛɛrɛ doo wo bu nyɔɔnyɔɔ sɔ̄.” Suā leere kɔ pya kanɛɛ le pya dɔɔ̄na a nyim tura le ekpɛ̄naloo lo eyerebah a nɛ kɔ o kwa o gbanialoo kumaloo Jɛhova. (Ɛp ekpo a kɔ “ Ena Pya Kanɛɛ Dap Doo A?”) Bu wa ɛɛ kaāna kɔ o e’obia lu, sa ba gbī kɔ o doo leere!​—⁠Kam 17:⁠17.

Ena edap a zuura waɛma loo bɔŋanaloo ani? Doo nu pya o wuga nɛɛdam le nɛɛwa aa doo, lo a le nyɔɔnɛ wa si pya i enɔānu le uwe zue ue dɛ̄dɛɛ̄ sɔ̄. Bu mɛ sīdee na lo ama eyerebah a nɛ a? Ziī wuga nɛɛdam a kura Felix kɔ: “Dɛ̄dɛɛ̄ pya wuga a le bu bɔŋanaloo bee le aa ɛmadɛɛ̄ sɔ̄ m obia lu. M bee muɛ kɔ alu ewere mɛ loo. Dɛ̄dɛɛ̄ aba bee mɛ yerebah nɛ kɔ m obia sueloo kɛ̄ bu bɔŋanaloo, le kɔ Jɛhova e’aaraloo mɛ nɛ sa m dap kiisī lo etaāŋa ye bah.”​—⁠Ɛp ekpo a kɔ “ Ena O Dap Doo Ani?”

Setan ekiisī lo esu “keekee taāŋa” a nua loo lo e’ɔɛ a loo kuma sɔ̄ o gaa kwa o gbanialoo kumaloo Jɛhova. (Luk 4:13) Kpɛ̄naloo tɛ̄maloo e’agɛrɛtɛ̄ o gbanialoo kumaloo Jɛhova anyaawo.

Jɛhova yira yii ama kumaloo pya ye naana pee kɔ: “M gaa le gbī pya a bee pe, e m gaa le obara pya a bee kiā pe, m gaa le bɔp pya ekpo bee buna, e m gaa le agɛrɛ loo pya loo ɔ.” (Ezek 34:16) Jɛhova eyerebah nɛ gbɛnɛ-edo pya a bee dɔ kii dumɛ kɔ ba a obia ɛrɛ le gbanialoo ye kumaloo. Suā leere kɔ a gbī kɔ o kiisī lo e’ɛrɛ e’agatɛ̄ gbanialoo ye kumaloo.