1-2. (a) Ena pio pya bɛbɛɛ edora loo pya nɛɛ Jɛhova a, e pya nɛɛ Jɛhova doo dogo kumaloo doodoo wa? (b) Mɛ sīdee na tɛ̄ŋaloo dap nua kaāna ɛɛbu a? (Kɔnage ue nyɔɔ foto a le nyɔɔ eko.)

 TAƐ nyaawo, lu ekpaɛ̄ i tam bu nu a eeloo 30 edonyɔɔ bu yube nyɔuwe. Bu pio lo edo, pya bɛbɛɛ eyere pya i wuga nɛɛdam le nɛɛwa kpɔgɔrɔ. Amunu lok na ba dɔ a? Ba naa dɔ lɔgɔ lok dookɛ̄ Jɛhova suā doo. Aba nu ba doo na būbuū sa nɔ Baibol, zue ue nɛ pya dɔɔ̄na sa nyɔɔnɛ pya wa wuga bu yira si enɔānu. Ba naa yiganage eyerekpotɛ̄ bira bɛbɛɛ. Kaɛlɛɛ kɛ̄ ba wa tɛ̄ŋaloo doo, pya zooro Bari ama ekirasī lo eyira agara * sa tɔgɛ kɔ ba tɔɔ̄e nɛ Jɛhova. E bu wa ɛɛ lo edoo taɛ wo!

² Naadaba o emuɛna foto a tɔgɛ Pya Ekeebee a ɛrɛ e’agaloo ama le kɛ̄ ba le aa kɛgɛ doo. Ba ɛrɛ ɛɛbu nyɔɔbee ba suā kɔ bu Jɛhova ɛɛ wa loo nyɔɔ kɛ̄ ba kiisī lo eyira agɛrɛ ye nɛ doo. (1 Edoo 29:17a) Jizɔs bee kɔ: “[Ɛɛbu] a le nɛ pya ba tɛ̄ŋaloo nyɔɔbee kaāna dogo . . . ɛɛŋa sa ɛrɛ gbɛnɛ ɛɛbu, nyɔnɛbee ekpɛanu bui tam [lu] gbɛnɛ.”—Mat 5:10-12.

3. Dookɛ̄ alu e’ɛm bu kpa Doonu 4:19, 20 doo, pya nɛɛ lɛɛratam bee doo dogo doodoo wa sɔ̄ a bee lu etɛ̄ŋa wa loo, e ena anua ba bee doo wo a?

³ Gaa lu etɛ̄ŋaloo pya i wuga nɛɛdam le nɛɛwa dookɛ̄ ba bee doo pya nɛɛ lɛɛratam bu tua sɔ̄ o’oo tup zua a, nyɔɔbee ba bee zue ue akiiloo Jizɔs. Pya biaɛ ue a bee le gbɛnɛ tɔ biaɛ pya Juu wee bialoo wa “nɛ lok kɔ ba aa kɔna ue bu bee Jizɔs.” (Doonu 4:18; 5:27, 28, 40) Pya nɛɛ lɛɛratam bee doo dogo doodoo wa? (Buū Doonu pya Nɛɛ lɛɛratam 4:19, 20.) Ba bee suā kɔ ekpo a eenyɔɔ alaba ekpo bee kɔ ba a zue ue sa yira ekeebee akiiloo Kraist nɛ pya nɛɛ. (Doonu 10:42) Nyɔɔwo Pita le Jɔn a bee wa kɔ ue bee, bee su e’agaloo kɔā kɔ ba ɛrɛ egbaɛ̄tɔ̄loo Bari ee pya biaɛ, ba bee kɔnage kɔ ba naale e’ɔbɛ ekɔ nu akiiloo Jizɔs. Nyɔɔbee wo, a le doodoo bee, ba aa bip pya lo nɛɛ biaɛ kɔ, ‘ekɔ bui aa kɔ i gbaɛ̄tɔ̄loo bɔɔloo lok sa lɛɛbaloo lok Bari ni?’

4. Dookɛ̄ alu etɔgɛ doo bu kpa Doonu 5:27-29, amunu edoba na pya nɛɛ lɛɛratam bee sere kɛ̄ nɛ dɛ̄dɛɛ̄ kaka Pya Nɛɛ Kraist a, e bu mɛ sīdee na i wa dap nɔ a?

⁴ Aāge lo dee pya nɛɛ lɛɛratam sere le edoba nɛ dɛ̄dɛɛ̄ Pya Nɛɛ Kraist kɔ ba a nyɔɔnɛ, lo a le kɔ i “gbaɛ̄tɔ̄loo Bari ee pya nɛɛ.” (Buū Doonu pya Nɛɛ lɛɛratam 5:27-29.) Sɔ̄ elua ezip pya lo nɛɛ lɛɛratam sah, ba bee aa gbɛnɛ tɔ biaɛ pya Juu sa “ɛɛŋa kɔmɛ a elua ebuūe wa nua pya a bɔloo ebɔbɛɛ kɛɛ [nyɔɔbee Jizɔs],” e ba bee kiisī lo ezue ue!—Doonu 5:40-42.

5. Pya amunu ebip na alu ebɛɛ̄ kɔ i agara a?

⁵ Edoba pya nɛɛ lɛɛratam bee sere kɛ̄ ama lɛɛ pio ebip kɛ̄. Bu edoba, bu mɛ sīdee na wa biaɛfii lo egbaɛ̄tɔ̄loo Bari ee pya nɛɛ gbaaloo lok Kpa Kaɛ a kɔ “tɔɔ̄kɛɛ̄ pya a ɛrɛ gbɛnɛ ekpo ebɛɛ” ani? (Rom 13:1) Bu mɛ sīdee na i dap sere i loo “kɛɛ̄ pya a [i] bɛɛ, lo pya a ɛrɛ ekpo” dookɛ̄ nɛɛ lɛɛratam Pɔɔl bee kɔ doo sa kiinagesī lo eyira agara nɛ Bari doodoo gbɛnɛ Nɛɛ-a-i-bɛɛ a?—Taitɔs 3:1.

6. (a) Ba mɛɛ na alu “gbɛnɛ ekpo [a] bɛɛ”alu ekɔ bu Pya Rom 13:1 a, e ena alu ekɔ i doo wa nɛ a? (b) Ekpo dɛ̄dɛɛ̄ miɔŋɔ nɛɛ a gaa bɛɛ ɛrɛ, mɛā doodoo wa?

⁶ Buū Pya Rom 13:1. Bu lo barakpaɛ̄ ama, ue a kɔ “gbɛnɛ ekpo [a] bɛɛ” na miɔŋɔ nɛɛ a gaa bɛɛ lo ba ɛrɛ ekpo sa gaa baɛbee pya dɔɔ̄na. Pya Nɛɛ Kraist tɔɔ̄ kɛɛ̄ ekpo a bɛɛ ama. Pya bɛbɛɛ ama, wee sere efɛɛloo bu buɛ̄, doo kɔ pya nɛɛ a tɔɔ̄ kɛɛ̄ lok, e pio sɔ̄ ba wee kpeganage pya nɛɛ Jɛhova. (Mum 12:16) Nyɔɔwo lu enɛ i lok kɔ i kpɛ tax le etup wa nɛ, wa ɛrɛ bɔɔ loo, sa wa nɛ ka. (Rom 13:7) Kerewo, pya bɛbɛɛ ama ɛrɛ ekpo nyɔɔbee Jɛhova lɛɛ wa baloo kɔ ba a ɛrɛ. Jizɔs bee doo kɔ alu esuā lo ama leere sɔ̄ aa bee agara ebip nɛ Mɛnɛ Pya Rom a kura Pɔntiɔs Pailat. Sɔ̄ Pailat aa bee kɔ nu akiiloo ekpo a ɛrɛ lo e’iye Jizɔs ale lo esu ye wa nɛ kɔ ba a fɛ ye, Jizɔs bee kɔ: “Oo mɛ ɛrɛ lɔgɔ ekpo loo, kɛɛrɛ kɔ a bee lu enɛ a aā nyɔɔ.” (Jɔn 19:11) Dookɛ̄ a bee le doo kiiloo Pailat, ekpo dɛ̄dɛɛ̄ miɔŋɔ nɛɛ a gaa bɛɛ le pya bira bɛbɛɛ anii’ee ɛrɛ, ɛrɛ kɛ̄ a ina yira.

7. Bu pya amunu kɛ̄tɔɔ̄ na ii ɛrɛ egbaɛ̄tɔ̄loo nu pya nɛɛ a gaa bɛɛ kɔ a, e ena a bɔloo kɔ pya bɛbɛɛ a suā a?

⁷ Pya Nɛɛ Kraist wee tɔɔ̄ kɛɛ̄ bɛbɛɛ miɔŋɔ nɛɛ sɔ̄ a naa gbanasī lok Bari. Mɛ ii lee dap gbaɛ̄tɔ̄loo nɛɛ sɔ̄ ba gbī kɔ i doo nu Bari naa gbī ale sɔ̄ ba kɔ i aa doo nu Bari kɔ. Bu edoba, ba dap gbī kɔ pya zege a yii bu nɔ̄. * Ale ba dap kɔ i aa suna i Baibol le pya i kpa a dɛɛa nyɔɔ Baibol daānu, kpaɛ̄ i tam zue ue sa kɔ i aa gbaana taāŋabah Bari. Pya a gaa bɛɛ ɛrɛ e’agara ebip nɛ Bari lo ba su wa ekpo daānu bu pɔrɔ sīdee, doodoo tɛ̄tɛ̄ŋaloo Pya Nɛɛ Kraist. Jɛhova aa wa ɛp!—Eklis 5:8.

8. Amunu kee na a le yɛɛ bee ue a kura “gbɛnɛ” le “eenyɔɔ dɛ̄dɛɛ̄ nu” a, e ena anua alu ebɛɛ̄ kɔ i suā lo ama a?

⁸ Nu bee ue a kɔ “gbɛnɛ” kura na “nu a lee, nu a kuī, nu ye dɔ kii nyɔɔ.” Mɛ a naa kura kɔ a “lee eera, kuī eera, ale bee ye dɔ kii nyɔɔ eera.” Lo alu pya bee ue a baatɛ̄ “nu a eenyɔɔ dɛ̄dɛɛ̄ nu.” Kere alu esu bɛbɛɛ pya miɔŋɔ nɛɛ kure “gbɛnɛ ekpo a bɛɛ,” a ɛrɛ dɔɔ̄na ekpo bɛbɛɛ a kii nyɔɔ eera a le. Bu Baibol, nia sɔ̄ alu esu Jɛhova Bari kure “Nɛɛ a eenyɔɔ dɛ̄dɛɛ̄ nu.”—Dan 7:18, 22, 25, 27.

9. Ena nɛɛ mɔmanudɛɛ̄ Daniɛl bee muɛ bu mɔmanudɛɛ̄ a?

⁹ Nɛɛ mɔmanudɛɛ̄ Daniɛl bee muɛ mɔmanudɛɛ̄ a tɔgɛ leere kɔ ekpo Jɛhova eenyɔɔ dɛ̄dɛɛ̄ dɔɔ̄na ekpo bɛbɛɛ. Daniɛl bee dasī muɛ nia gbɛnɛ ka nam kuɛ, lo a yira dɔ pya ekpo bɛbɛɛ nyɔuwe a tɛɛ̄ kii adumɛ le lo a le anyawo, lo a le ekpo bɛbɛɛ Babilɔn, Midia le Pesia, Gris, le Rom, le lo a ye aaloo a le anii’ee, lo a le Anglo-America. (Dan 7:1-3, 17) Lɛɛ Daniɛl sikɛ̄ muɛ Jɛhova a le e’ɛŋɛtɛ̄ nyɔɔ kasi mɛnɛ bu ye tɔ biaɛ li bunyɔɔ. (Dan 7:9, 10) Nu lo nɛɛ mɔmanudɛɛ̄ bee sikɛ̄ muɛ lu nu zuurabahtɔ̄ nɛ pya a gaa bɛɛ anii’ee.

10. Dookɛ̄ kpa Daniel 7:13, 14, 27 tɔgɛ doo, ba mɛɛ na Jɛhova su bɛbɛɛ nyɔuwe obara nɛ a, e ena lo ama tɔgɛ a Ye kiiloo a?

¹⁰ Buū Daniel 7:13, 14, 27. Bari lɛɛ ekpo bɛbɛɛ bah dɛ̄dɛɛ̄ miɔŋɔ nɛɛ sa nɛ pya ba bɔloo sa ɛrɛ ekpo wa ee. Ba  mɛɛ na a nɛ ani? A nɛ “ziī nɛɛ . . . a doodoo nwiīnɛɛ” lo a le Jizɔs Kraist, le “pya kaɛ lo Nɛɛ-a-eenyɔɔ-dɛ̄dɛɛ-nu,” lo a le 144,000 pya nɛɛ lo ba enyɔɔnɛ ye bɛɛ dɛ̄dɛɛ̄ sɔ̄ “mmɛ deedee.” (Dan 7:18) Sirapie kɔ Jɛhova na “Nɛɛ-a-eenyɔɔ-dɛ̄dɛɛ̄-nu” a, nyɔnɛbee aba alɛ na a ɛrɛ ekpo lo edoo dua nu ama a.

11. Dɔɔ̄na e na Daniɛl bee ɛm lo a tɔgɛ kɔ Jɛhova lu nɛɛ a eenyɔɔ dɛ̄dɛɛ̄ edonyɔɔ a?

¹¹ Nu Daniɛl bee muɛ bu mɔmanudɛɛ̄ gbaaloo ziī nu a bee kɔ tua sɔ̄. Daniɛl bee kɔ: “Bari bunyɔɔ . . . su pya mɛnɛ-buɛ̄ lɛɛ sa wunage pya mɛnɛ-buɛ̄.” A bee ɛmnage kɔ: “Nɛɛ-a-eenyɔɔ-dɛ̄dɛɛ̄-nu bɛɛ bu buɛ̄-mɛnɛ pya nɛɛ, sa ye su nɛ ɛrɛgeba nɛɛ a gbī enɛ.” (Dan 2:19-21; 4:17) Ɛrɛge sɔ̄ Jɛhova bee lɛɛ pya mɛnɛ a bɛɛ sa wu pya lo aā ni? Aiī!

12. Naa nɛ edoba a tɔgɛ kɛ̄ Jɛhova bee lɛɛ bɛbɛɛ bah pya mɛnɛ sɔ̄ akii adumɛ doo. (Ɛp foto.)

¹² Jɛhova etɔgɛ kaāna kɔ a kiie nyɔɔ ee dɛ̄dɛɛ̄ “gbɛnɛ ekpo [a] bɛɛ.” Naa ɛp taa edoba ama. Fɛro a bee bɛɛ Ijipt bee su pya nɛɛ Jɛhova nua zooro sa naa bee yiga elɛɛ wa baloo kɔ ba a kii. Mɛ Bari bee wa agara sa doo kɔ maā a su Fɛro bie bu Miimii Pɛnɛ. (A’aa 14:26-28; Yɔɔ 136:15) Mɛnɛ Belshaza a bee bɛɛ Babilɔn bee doo ziī gbɛnɛ doo nu sa “dāna loo [ye lo] edoo Nɛɛ-a-ɛrɛ bunyɔɔ” e “[a] bee leera pya bari silva le gold” taā a leera Jɛhova. (Dan 5:22, 23) Mɛ Bari bee su gbara a eeloo nɛ nyɔɔ ama kumakɛ̄. “Taɛ lo uunɛ” bee lu efɛ Belshaza, e ye buɛ̄-mɛnɛ bee lu esu nɛ pya Midia le Pesia. (Dan 5:28, 30, 31) Mɛnɛ Hɛrod Agripa I, alu Palestine bee fɛ nɛɛ lɛɛratam Jems sa su nɛɛ lɛɛratam Pita yere tɔ kpɔgɔrɔ, lokwa a ye dap fɛnage. Mɛ Jɛhova bee kpaɛ̄ Hɛrod lɛɛ loo nu a bee nɔɔ ama. ‘E ɛnjɛl Jɛhova bee ye zip’ e a bee u.—Doonu 12:1-5, 21-23.

13. Naa nɛ edoba a tɔgɛ kɛ̄ Jɛhova bee be eebah dɛ̄dɛɛ̄ pya mɛnɛ a bee gbaaloo ziī doo.

¹³ Jɛhova etɔgɛnage kɔ a eenyɔɔ dɛ̄dɛɛ̄ nɛɛ kere sɔ̄ pya a bɛɛ keekee barasī gbaaloo ziī. A bee bebe nɛ pya Izrɛl sa wa yerebah nɛ doo kɔ ba a be eebah 31 mɛnɛ pya Kenan sa ɛrɛ gbɛnɛ edo buɛ̄ a bee lu eyira yii loo. (Josh 11:4-6, 20; 12:1, 7, 24) Jɛhova bee zipnage  Mɛnɛ Ben-hadad le 32 pya dɔɔ̄na mɛnɛ Siria fɛ, lo ba bee bebe loo pya Izrɛl.—1 Mɛnɛ 20:1, 26-29.

14-15. (a) Ena Mɛnɛ Nebukadneza le Dariɔs kɔ akiiloo bɛbɛɛ Jɛhova a? (b) Ena nɛɛ uɛ le-yɔɔ bee kɔ akiiloo Jɛhova le ye edonyɔɔ a?

¹⁴ Aā ziī sɔ̄ mmɛ ziī, Jɛhova etɔgɛ kɔ alue Nɛɛ-a-eenyɔɔ dɛ̄dɛɛ̄ nɛɛ! Sɔ̄ Mɛnɛ Nebukadneza a bee bɛɛ Babilɔn bee kaaga akiiloo ‘ye ekpo le mɛm le ka loo ye buɛ̄-mɛnɛ’ taā a kumaloo kɛ̄ yiga kɔ Jɛhova na a bɔloo eleera a, Bari bee doo kɔ a bɔdaa. Sɔ̄ Nebukadneza esuāloo ye, a bee “nɛ leelee Nɛɛ-a-eenyɔɔ-dɛ̄dɛɛ̄-nu” sa yiga kɔ “bɛbɛɛ [Jɛhova] lu bɛbɛɛ a naatah.” A bee kɔ yereloo kɔ: “Lɔgɔ nɛɛ naa dap ɔbɛ ye bah.” (Dan 4:30, 33-35) Sɔ̄ elua edoā-ɛp Daniɛl sah, sa muɛ kɔ a yira agara; Jɛhova bee ye zuura lɛɛbu bana sasa-ekpo. Mɛnɛ Dariɔs bee nɛ lok kɔ: “Pya nɛɛ a nyɔŋ kwak kwak sa ɛrɛ aa bɔɔ kɛ̄sī Bari Daniel, nyɔɔbee alu Bari a le dum, a tɔɔ̄ mmɛ deedee; ye buɛ̄-mɛnɛ naale dap lu egbee lɔgɔ sɔ̄.”—Dan 6:7-10, 19-22, 26, 27.

¹⁵ Nɛɛ uɛ le-yɔɔ bee kɔ: “Jɛhova egbeera bira pya dɛ̄dɛɛ̄ edonyɔɔ; a lagiri [nɔɔnɔɔnu] dɛ̄dɛɛ̄ pya nɛɛ.” A bee kɔnage gbaāloo kɔ: “[Ɛɛbu] a le nɛ pya edonyɔɔ wa Bari lu Jɛhova, pya nɛɛ alɛ bee sagɛ doodoo ye nu a ɛrɛ.” (Yɔɔ 33:10, 12) Naa ɛp kɛ̄ lo ama, lu lenu anua i kiisī lo etɔɔ̄ agara nɛ Jɛhova doo a!

16. Ena i suā leere akiiloo “gbɛnɛ etɛɛraloo a,” e ena anua a? (Ɛp foto.)

¹⁶ I emɔna nu Jɛhova bee doo sɔ̄ akii adumɛ. Ena i dap ɛmadɛɛ̄ kɔ esira li deesī a? I suā leere kɔ Jɛhova gaa le agara pya ye zooro ba tɔɔ̄ agara bu “gbɛnɛ etɛɛraloo” a gaa lu li deesī. (Mat 24:21; Dan 12:1) E doo lo ama sɔ̄ dɛ̄dɛɛ̄ edonyɔɔ a gbaaloo ziī, lo alu  ekure Gɔg lo Magɔg ebebe loo pya zooro Jɛhova ba bɔloo eture nyiɛ loo ba le dɛ̄dɛɛ̄ kɛ̄ a le bu nyɔuwe. Kere dɛ̄dɛɛ̄ 193 edonyɔɔ a le bu United Nations gbaaloo ziī, ba naale edap yira baɛ Nɛɛ-a-eenyɔɔ-dɛ̄dɛɛ̄-nu le ye gbo nɔ̄ bunyɔɔ! Jɛhova yira yii kɔ: “M gaa le tɔgɛ na gbɛnɛ kɛ̄tɔɔ̄ le na kaɛ siā, sa doo kɔ alu esuā mɛ loo kɛ̄sī booboo edonyɔɔ. Lo sɔ̄ ba gaa le suā kɔ mda na Jɛhova.”—Ezek 38:14-16, 23; Yɔɔ 46:10.

17. Ena Baibol kɔ esiraloo pya mɛnɛ nyɔuwe le pya a yira agara nɛ Jɛhova li deesī a?

¹⁷ Be Gɔg gaa le doo kɔ Jɛhova a be lo kpɛdumɛ be bu nɔ̄ Amagidɔn, sɔ̄ a gaa le gbeesī “pya mɛnɛ bu dɛ̄dɛɛ̄ nyɔuwe.” (Mum 16:14, 16; 19:19-21) Bu kiiya sī, “pya a yira kaāna gaa le tɔɔ̄ kɛnɛkɛ̄ a, e pya kaāna nɛɛ gaa le tɔɔ̄ ye bu.”—Kam 2:21.

18. Ena gbɛnɛ-edo Pya Nɛɛ Kraist kpɛ̄naloo lo edoo a, e ena anua a? (Daniel 3:28)

¹⁸ Aāge a dee kere, gbɛnɛ-edo Pya Nɛɛ Kraist epeere wa ɛrɛ loo, sa sunage wa dum yere bu pe nyɔɔ wereloo ba ɛrɛ loo Jɛhova doodoo Nɛɛ a wa bɛɛ, lo alu nɛɛ a Eenyɔɔ-dɛ̄dɛɛ̄-nu. Ba lu pya a yira agara, lo ba ebiaɛrafii dookɛ̄ taa pya Hibru lo a bee lu ekpɔā wa dum lɛɛ bu ebɛa miā nyɔɔbee wa bɔ ture nyiɛ loo nɛ Nɛɛ-a-eenyɔɔ-dɛ̄dɛɛ̄-nu bee doo.—Buū Daniel 3:28.

19. Ena Jɛhova eyira nyɔɔ biaɛ pya ye nɛɛ a, e ena i ɛrɛ edoo anyaawo a?

¹⁹ Nɛɛ ɛm le-yɔɔ Devid bee ɛm nu akiiloo kɛ̄ yira agara nɛ Bari lu gbɛnɛ doo sɔ̄ a kɔ: “Jɛhova, biaɛ ue loo dɛ̄dɛɛ̄ pya nɛɛ; biaɛ mɛ, aa Jɛhova, dookɛ̄ na kaāna dogo le doo, le dookɛ̄ mdaa le dogo a mɛ le bu le doo.” (Yɔɔ 7:8) Dɔɔ̄na sɔ̄ Devid bee ɛm kɔ: “Doo lo na kaāna dum, le le dogo mɛ sere.” (Yɔɔ 25:21) Le sīdee etɔɔ̄dum na lo ebiabu bɔ ture nyiɛ loo nɛ Jɛhova, sa ii gbee i tɔɔ̄ agara ye nɛ kaɛlɛɛ nu a i siraloo! Lo sɔ̄ i ɛrɛ aba ekɛɛrɛ doodoo nɛɛ ɛm le-yɔɔ lo a bee ɛm kɔ: “[Ɛɛbu] a le nɛ pya ue naa bee bu wa dee, pya ba kiā bu lok Jɛhova.”—Yɔɔ 119:1.