Pya Izrɛl A Dee Kere Bee Be Nɔ̄—Ena Anua Ili Ii Be A?
ZIĪ nɛɛ nɔ̄ pya Nazi bee pɔm sɔ̄ aa kɔ ue nɛ zii eku Pya Ekeebee Jɛhova bu eree II Sɔ̄ Nɔ̄ Nyɔuwe a kɔ: “Lo zii nɛɛ a i le yɛɛ naa yiga ebebe loo pya France ale pya England, elu efɛ dɛ̄dɛɛ̄ bui!.” Kere pya nɔ̄ Nazi ba aara naā bee le eyira wa kpaɛ̄ lɔgɔ pya i wuga naa bee yiga edoo wo. Mɛ dua e’agaloo ba bee tɔgɛ sɛh! Wa edoba ama, tɔgɛ kɛ̄ ili Pya Ekeebee Jɛhova ɛp be nɔ̄ doo, lo a le kɔ: Ii wee yiga ebe nɔ̄ bu nyɔuwe ama, kere ba kɔ ba efɛe i. E i tɔɔ̄ kee aāloo bira bɛbɛɛ.
Kerewo, naale dɛ̄dɛɛ̄ pya ba kɔ ba lue Pya Nɛɛ Kraist na ba yiga lo ama. Gbɛnɛ-edo nɛɛ kɛɛrɛ kɔ a lee kɔ Nɛɛ Kraist a bebe lo ekpega ye edonyɔɔ. Ba dap kɛɛrɛ kɔ: ‘Pya Izrɛl a dee kere a bee le pya nɛɛ Bari e ba bee be nɔ̄, nyɔɔwo ena anua Pya Nɛɛ Kraist anii’ee naale ebe nɔ̄ a?’ O agara ebip ama doodoo wa? O dap wa baatɛ̄ nɛ kɔ a ɛrɛ gbɛnɛ kee a le yɛɛ kɛ̄tɔɔ̄ pya Izrɛl a dee kere le pya nɛɛ Bari anii’ee. I naa kɔ nu akiiloo o’oo kee a wa le yɛɛ.
1. DƐ̄DƐƐ̄ PYA NƐƐ BARI BEE NUŪNA ZIĪ EDONYƆƆ
Sɔ̄ akii adumɛ, Jɛhova bee bɔŋɛnɛloo pya ye nɛɛ nua ziī edonyɔɔ, lo a le pya Izrɛl. A bee su pya Izrɛl kure “nu mda ɛrɛ yɛɛ dɛ̄dɛɛ̄ pya nɛɛ.” (A’aa 19:5) Bari bee wa nɛnage kɛnɛkɛ̄ e’ɛrɛ. Nyɔɔwo, sɔ̄ Bari bee nɛ lok pya Izrɛl kɔ ba a be nɔ̄ loo pya dɔɔ̄na edonyɔɔ, ba naa wee bebe loo ale fɛ pya le aba gaa gbaa taāŋabah Bari. *
Nii’ee pya nɛɛ Jɛhova aabu “dɛ̄dɛɛ̄ edonyɔɔ le dɛ̄dɛɛ̄ edo le pya nɛɛ, le muɛ̄ ue.” (Mum 7:9) Lo pya nɛɛ Bari ɛrɛ bah bu be nɔ̄, ba edap bebe loo ale fɛfɛ pya le aba aa gbaa taāŋabah Bari.
2. JEHOVA BEE NƐ LOK PYA IZRƐL KƆ BA A BE NƆ̄
Sɔ̄ akii adumɛ, Jɛhova na a wee kɔ sɔ̄ le nu anua pya Izrɛl ebe nɔ̄ a. Bu edoba, Bari bee kɔ nɛ pya Izrɛl kɔ ba a bebe lo esu biaɛ nua nyɔɔ pya Kenan, nyɔnɛbee ba taāŋabah yɔ, kunagā bu gbɛnɛ sīdee sa su pya wa miɔŋɔ wɔma zɔɔ. Jɛhova bee nɛ lok pya Izrɛl kɔ ba a gbeesī pya nɛɛ a le doo wo lɛɛ bu buɛ̄ a bee lu eyira yii loo lokwa pya nɛɛ Izrɛl naa nɔ̄ lo elap dogo wa aābah. (Lev 18:24, 25) Sɔ̄ pya Izrɛl ebee yii bu buɛ̄ a bee lu eyira yii loo, pio sɔ̄, Bari bee wa kɔ nɛ kɔ ba a bebe lo ekpega wa loo lɛɛ bah pya wa baa. (2 Sam 5:17-25) Kerewo, Jɛhova naa bee yiga kɔ pya Izrɛl a biaɛfii nyɔɔ wa loo lo ebe nɔ̄ lɔgɔ sɔ̄. Sɔ̄ ba ye lɛɛbeekɛɛ̄ sa doo wo, gbɛnɛ pɔrɔ nu wee sira aabu.—Buā 14:41-45; 2 Edoo 35:20-24.
Nii’ee, Jɛhova naa nɛ ekpo pya nɛɛ kɔ ba a be nɔ̄. Pya nɛɛ bebe lo edoo nu alu wa taɛ, e a naale nyɔɔ doo nu Jɛhova gbī. Ba dap be nɔ̄ lo e’ɛrɛ kɛnɛkɛ̄ ale lo e’ɛrɛ kpugi ale nyɔɔ bira bɛbɛɛ ale kɔ ba a nyɔɔnɛ alaba ekɛɛrɛ. Mɛ ena i kɔ akiiloo pya nɛɛ ba kɔ ba gaa be e be nyɔɔbee Bari lo ekpega wa taāŋabah ale lo egbeesī pya nɛɛ baa Bari a? Jɛhova ekpega pya a gaa ye taāŋabah bu kaka sīdee bu nɔ̄ lo aa le esu dɔ li deesī, lo a le nɔ̄ Amagidɔn. (Mum 16:14, 16) Bari gaa le su gbo nɔ̄ bunyɔɔ beā lo nɔ̄, e a naale pya miɔŋɔ nɛɛ a gaa ye taāŋabah.—Mum 19:11-15.
3. PYA IZRƐL NAA BEE FƐ PYA A BEE ƐRƐ YIRA BU JƐHOVA.
Sɔ̄ pya nɛɛ aa be nɔ̄ anii’ee, ba wee lɛɛgebaloo pya nɛɛ a ɛrɛ yira dookɛ̄ Jɛhova bee doo loo Rehab le pya ye butɔ sɔ̄ a bee lu ebebe loo Jɛriko ni?
Sɔ̄ akii adumɛ, pya nɔ̄ Izrɛl wee ɛrɛ toesaɛ̄ loo pya nɛɛ a bee ɛrɛ yira bu Bari sa fɛ aba pya nɛɛ Jɛhova kɔ alu efɛ. Ɛp baɛ edoba ama. Kere Jɛhova bee kɔ alu egbeesī buɛ̄ Jɛriko, pya Izrɛl bee kpɔā Rehab le pya ye butɔ nyɔɔbee a bee ɛrɛ yira. (Josh 2:9-16; 6:16, 17) Sɔ̄ esaa, a bee lu ekpɔā dɛ̄dɛɛ̄ pya Gibeon nyɔɔbee ba bee ɛrɛ bɔɔloo Bari kaāna.—Josh 9:3-9, 17-19.
Nii’ee, sɔ̄ pya edonyɔɔ aa bebe ba naa wee lɛɛbaloo pya ba ɛrɛ yira. E pio sɔ̄, ba wee fɛnage pya nɛɛ a naa doo lɔgɔ nu sɔ̄ ba gaa be nɔ̄.
4. BEE LU E’ƐMADƐƐ̄ KƆ PYA IZRƐL A NYƆƆNƐ DAAKUU BARI NƐ NYƆƆ BE NƆ̄.
Sɔ̄ akii adumɛ, Jɛhova bee kɔ pya nɔ̄ Izrɛl a nyɔɔnɛ ye zuurabahtɔ̄ sɔ̄ ba aa be nɔ̄. Bu edoba, pio sɔ̄ Bari wee wa kɔ nɛ kɔ sɔ̄ ba ina ziī buɛ̄ ba gaa le kɔ nu a ɛrɛ edoo “lo a le a gbī efɛɛloo.” (Deut 20:10) Jɛhova bee gbīnage kɔ pya nɔ̄ Izrɛl a sere wa loo le kɛ̄ ba tɔɔ̄ ɛɛrɛ, sa doo dogo a gbaaloo ye daakuu nyɔɔ tɔɔ̄dum a ɛɛ. (Deut 23:9-14) Pya edonyɔɔ a wa tɛɛ̄ ɛŋɛnɛ wee su bah ekpo maa loo pya nɛɛwa ba aa aā uwe nɔ̄, kerewo Jɛhova bee nɛ lok pya Izrɛl kɔ ba aa doo wo. E ba naa wee ii pya nɛɛwa ba aa aā uwe nɔ̄ mmɛ sɔ̄ ziī enɔɔ̄ etɛ̄na.—Deut 21:10-13.
Nii’ee, gbɛnɛ-edo barasī egbaara nɔɔ pya lok a baɛbee be nɔ̄. Kere pya lok ama bee lu eyere lo ekpega pya kunɛ nɛɛ, alu nu ekiɛ̄nu kɔ gbɛnɛ-edo sɔ̄ ba naa serenage lo lok.
5. BARI BEE BEBE BEE YE EDONYƆƆ
E kɔ Bari aa bege be nɛ ziī edonyɔɔ anii’ee dookɛ̄ a bee be nɔ̄ loo Jɛriko nɛ pya Izrɛl doo ni?
Sɔ̄ akii adumɛ, bu nyɛŋia sīdee Jɛhova wee bebe lɛɛ bee pya Izrɛl sa ba eebah. Bu edoba, bu mɛ sīdee na Jɛhova bee yerebah nɛ pya Izrɛl kɔ ba a dap be eebah gbɛnɛ buɛ̄ Jɛriko a? Tɛ̄maloo leredee a aabah Jɛhova, pya Izrɛl bee “wii gbɛnɛ muɛ̄ kpā, e ekpadɛɛ̄ a bee dɔ ɔgɛrɛsī” kɛ̄, sa doo kɔ a waɛ wa loo egbeesī lo buɛ̄. (Josh 6:20) E bu mɛ sīdee na ba bee be eebah pya Amorait a? “Jɛhova bee top pio gbɛnɛ dɛm aā bunyɔɔ wa tɛrɛ nyɔɔ . . . , pya a bee u tɛ̄maloo beebee maā bee eenyɔɔ pya Izrɛl fɛ tɛ̄maloo gɛ̄ nɔ̄.”—Josh 10:6-11.
Nii’ee, Jɛhova naa aa bena be nɛ lɔgɔ edonyɔɔ a kɛnɛkɛ̄. Ye Buɛ̄-mɛnɛ lo Jizɔs Bɛɛ “naa aabu lo nyɔuwe ama.” (Jɔn 18:36) Bu kiiya sī, Setan na nɛɛ a ɛrɛ ekpo loo dɛ̄dɛɛ̄ bɛbɛɛ miɔŋɔ nɛɛ a. Pya nɔ̄ aa dɔ nyɔuwe anii’ee lo a bee piya gbɛnɛ, tɔgɛ dua pɔrɔ ekɛɛrɛ Setan ɛrɛ.—Luk 4:5, 6; 1 Jɔn 5:19.
PYA KAKA NƐƐ KRAIST LU PYA A SERE EFƐƐLOO
Dookɛ̄ i emuɛ̄na doo, I kɛ̄tɔɔ̄ lu kaāna kee loo pya Izrɛl a dee kere a. Kerewo, naale aba pya lo kee ama na a doo kɔ i aa be nɔ̄ a. A ɛrɛ pya dɔɔ̄na nu anua ii be nɔ̄. Bu edoba, Bari bee kɔ sere kɛ̄ kɔ bu kpɛdumɛ dee pya nɛɛ alɛ tɔgɛ nu “naale sinakɛ̄ nɔ be nɔ̄ lɔgɔ sɔ̄,” ale kunɛ ɛrɛ bah bu. (Ais 2:2-4) Gbaāloo wo, Kraist bee kɔ pya a ye nyɔɔnɛ dumɛ naa “le loo nyɔuwe,” ba ekiisī lo etɔɔ̄ kee aaloo be a le yɛɛ pya bira bɛbɛɛ a le bu nyɔuwe.—Jɔn 15:19.
Kraist bee yerenage mɛm loo pya a ye nyɔɔnɛ dumɛ kɔ ba a doo eenyɔɔ wo. A bee wa nɛ zuurabahtɔ̄ kɔ ba a kiī pya elap dogo edoo kɔ ba a ɛrɛ biirabu, saŋ, sa bebe. (Mat 5:21, 22) Gbaāloo wo, a bee zuurabahtɔ̄ pya a wee ye nyɔɔnɛ dumɛ kɔ ba alu “pya a sere efɛɛloo” sa wereloo pya wa nɛɛ baa.—Mat 5:9, 44.
Bu mɛ sīdee na ziī ziī ii i doo lo ama ani? Kɛādoo, ii ɛrɛ taɛ lo ebe nɔ̄, mɛ ekɔ a ɛrɛ ziī nɛɛ i su nua i nɛɛ baa lo a dap doo kɔ epoo epoo a yiibu bɔŋanaloo ni? Doraa i kiisī lo ebebe lo elɛa ɛrɛgeba ekɛɛrɛ a le doo wo bu i.—Jem 4:1, 11.
Taā i gbaaloo pya nyɔuwe be nɔ̄, i nyimɛ efɛɛloo le wereloo yɛɛ ɛnia ii. (Jɔn 13:34, 35) Dooraa i biaɛfii lo etɔɔ̄ kee kuma sɔ̄ i aa tɔɔ̄baɛ sɔ̄ Jɛhova elɛɛ be nɔ̄ mmɛ deedee.—Yɔɔ 46:9.
^ Pio sɔ̄, pya gā Izrɛl wee bebe loo ziī, e lo ama naa wee ɛɛrɛ bu Jɛhova. (1 Mɛnɛ 12:24) Kerewo, a wee yere kpotɛ̄ be ama pio sɔ̄, nyɔɔbee ziī gā Izrɛl elɛra ye bee kɛɛ̄ ale ba esia gbɛnɛ pɔrɔ ye kumaloo.—Biaɛ 20:3-35; 2 Edoo 13:3-18; 25:14-22; 28:1-8.
