Bu lo zua, bɔŋanaloo bee nyaana baloo pio nu lo a bee yerebah doo kɔ Pya Nɔ Baibol a gbaaloo bu taāŋabah. Bee bɔātɛ̄ lu e’ɛm pya ue a baatɛ̄ pya dɔ Kpa Kaɛ bu Watch Tower lo ba wee nɔ bie Enɔānu a kura Kara, Leera le Le Kpɛa, bu ziī ziī kaɛ. Gbaāloo wo, Pya Nɔ Baibol bee kwanage kalɛnda lo a aara pya dɔ Kpa Kaɛ a le nɛ ziī ziī kaɛ, gbaāloo yɔɔ a dap lu e’uɛ sɔ̄ aa lu e’ɛrɛ enɔānu nyɔɔ i loo le enɔānu butɔ.

Bie pya lo zɔ̄zɔ̄ŋia, Pya Nɔ Baibol wee kɔ nu a bee wa siraloo bie uwe zue ue, uɛ yɔɔ, ale yere kara sa doo yaa Jɛhova loo lenu a wa doo nɛ. Eva Barney, lo a bee liamaā bu zua 1923 sɔ̄ ebee lu 15 zua kɔ: “Lo o aa gbī ekɔ ziī lenu a bee a siraloo, o yira yah sa bɔātɛ̄ ekɔ kɔ, ‘M gbī edoo yaa Nɛɛ-a-i-ɛrɛ loo dɛ̄dɛɛ̄ lenu edoora mɛ nɛ.’” A wee nia pio pya wuga lo ekɔ nu a bee wa siraloo. Wuga nɛɛwa Barney kɔ yere kɔ: “Wuga Nɛɛdam Godwin a e’ana ɛrɛ gbɛnɛ-edo nu edoo yaa Nɛɛ-a-i-ɛrɛ loo. Mɛ sɔ̄ ye wa emɔna kɔ loo wuga nɛɛdam lo a gaa bee baɛbee [lo enɔānu] naa sunakɛ̄, a wee zuura kīna bee egā bɛloo ye dam lɛɛ ye dam ɔbɛ ekɔ ue sa a ɛŋɛtɛ̄ kɛ̄.”

Ziī sɔ̄ bu ziī enɔɔ̄, ziī ziī bɔŋanaloo wee ɛrɛ keebee zɔ̄zɔ̄ŋia lo Eyere Kara, Nɛ Leera, sa Kɔ Kpɛa Le. Sɔ̄ Watch Tower April 1, 1923 gaa baatɛ̄ kɛ̄ enɔānu ama wee mɛā doo, a kɔ: “Elu esu kūnakūna bah loo zɔ̄zɔ̄ŋia ama kɔā kpɛa le akiiloo zue ue sa yere mɛm loo pya zue ue. . . . I dɛrɛ nyiɛ nyɔɔ kɔ zɔ̄zɔ̄ŋia a yere mɛm loo nɛɛ ama ezuura pya wuga waɛmaloo ziī.”

Charles Martin ebee lu 19 zua, sa lu nɛɛ zue ue bu bɔŋanaloo, alu Vancouver li Canada, bee ɛrɛ biī kaāna aāloo pya zɔ̄zɔ̄ŋia ama. A bee kɔ sɔ̄ esaa kɔ: “Bu pya enɔānu ama na m bee dasī nɔ nu m dap kɔ sɔ̄ m aa zue ue aā ziī tɔ yii ziī a. Gbɛnɛkpo sɔ̄ pya nɛɛ wee kɔ nu a bee wa siraloo sɔ̄ ba gaa bee zue ue aā ziī tɔ yii ziī. Lo ama wee doo kɔ m suā dua nu m dap kɔ le kɛ̄ e’agara ue nɛ pya nɛɛ ba naa gbī edā doo.”

“Pya Dee Zue Ue” bee yerenage bah lo edoo kɔ gbaaloo a le bu bɔŋanaloo. Watch Tower April 1, 1923, bee kɔ: “Lokwa i gbaaloo bu esiatam . . . , elua esere Baɛ Deelookaɛ, 1 biradee bu O’oo Enɔɔ̄ bu zua 1923, nua dee i gbaaloo si tam. Bu aba lo sīdee sɔ̄  esaa, tuatua Baɛ Deelookaɛ bu dɛ̄dɛɛ̄ enɔɔ̄ . . . dɛ̄dɛɛ̄ nɛɛ a le bu bɔŋanaloo a ɛrɛ epoo bu tam zue ue ama.”

Pya Nɔ Baibol ba le zege bee sinage lo tam. Hazel Burford lo ebee lu aba 16 zua lo sɔ̄ kɔ: “Kpa a kura Bulletin (lo a bee edoba kɛ̄ ezue ue doo anii’ee) wee kɔ kɛ̄ i zue ue doo, lo i wee aa biea bee. a M wee nyɔɔnɛ na gbɛnɛ tɛ su mɛm siā pya tam ama.” Kerewo, a bee lu nyɛŋia loo Wuga nɛɛwa Burford kɛ̄ ziī wuga nɛɛdam ɛmadɛɛ̄ lo tam doo. A kɔ: “A bee nɛ taāŋa ziī wuga nɛɛdam e’ana kɔ m gaa zue ue nɛ pya nɛɛ. Taɛ sɔ̄ ama, pio nɛɛ sii bee dābeeloo kɔ dɛ̄dɛɛ̄ Pya Nɔ Baibol, gbaāloo ‘pya miɔŋɔ zuguru le pya miɔŋɔ emuā’ ɛrɛ esu dɔ bu eleera Gbɛnɛ Nɛɛ a bee i dɛm.” (Yɔɔ 148:12, 13) Mɛ Wuga nɛɛwa Burford bee kiisī lo ezue ue. A bee le yɛɛ eree baɛ eku pya a si Tɔkpa Gilɛd sa si tam zue ue dɔɔ̄na edo li Panama. Sɔ̄ esaa, pya lo wuga bee nyaana wa ekɛɛrɛ kumaloo kɔ pya zege aa zue ue.

Kɔnvɛnsɔn bee yerenage bah nɛ pya wuga kɔ ba a gbaaloo ziī. Bu gbɛnɛ-edo lo kɔnvɛnsɔn wee ɛrɛ dee ba kii ee uwe zue ue, doodoo lo a bee lu e’ɛrɛ bie Winnipeg, li Canada. Nyɔɔ 31 biradee bu Taa Enɔɔ̄, bee lu ekɔ nɛ dɛ̄dɛɛ̄ pya a bee si lo kɔnvɛnsɔn kɔ ba a sudɔ bu “Keebee Zue Ue Lo Enyɔŋɛ Winnipeg.” Wee lu ezue ue nɛ gbɛnɛ-edo nɛɛ dee alu enɔɔ tam doo wo, e le kpɛa wee sira aabu. Nyɔɔ 5 biradee bu Ɛrɛtaa Enɔɔ̄, nu aluge 7,000 pya nɛɛ bee si dɔɔ̄na kɔnvɛnsɔn li Winnipeg. Kɔnvɛnsɔn ama na lo pya nɛɛ bee si ee dɛ̄dɛɛ̄ kɔnvɛnsɔn lɛɛ a gae lu lo sɔ̄ bie Canada a.

Kɔnvɛnsɔn pya nɛɛ Jɛhova a kuī gbɛnɛ bee sudɔ bie Los Angeles, li California nyɔɔ 18-26 biradee bu Ɛrɛtaa Enɔɔ̄ bu zua 1923. Bu pya kaɛ lɛɛ lo kɔnvɛnsɔn gae sudɔ, niuspepa bee kɔ yaari kɔ lo kɔnvɛnsɔn gae sudɔ, e Pya Nɔ Baibol bee dɔɔ̄ nu a eeloo 500,000 nwīepɛɛ kpa. Bee lu eka gbɛnɛ gbɛnɛ ebakpa  loo fah pya nɛɛ le fah ɔmadee lo a kɔ kɔ lo kɔnvɛnsɔn gae sudɔ.

Nyɔɔ Dee Nwīpinikaɛ 25 biradee bu Ɛrɛtaa Enɔɔ̄, Wuga Rutherford bee nɛ ziī ekɔaue lo ye ekobee ue kɔ, “Naana Pee Le Kunɛ Pee,” sa baatɛ̄ kɔ “naana pee” na pya kaāna dogo lo ba etɔɔ̄dum bu paradais a kɛnɛkɛ̄. A bee kɔnage ziī biaɛfii siā lo a kura “Ziī Zuurabahtɔ̄.” Biaɛfii ama bee kɔ ue bege pya Tɔbari sa kɔ nɛ pya nɛɛ le beenyiɛ kɔ ba a kpoora loo lɛɛloo “Babilɔn Lo Gbɛnɛ.” (Mum 18:2, 4) Sɔ̄ esaa, Pya Nɔ Baibol bee gbaaloo su mɛm dɔā gbɛnɛkpo miliɔn nwīepɛɛ kpa a kɔ lo biaɛfii siā.

Nyɔɔ kpɛdumɛ biradee loo lo kɔnvɛnsɔn, nu a eeloo 30,000 pya a bee si bee gbaɛ̄tɔ̄loo Wuga Rutherford sɔ̄ a nɛ ekɔaue taɛkɛ̄ ye ekobee ue kɔ: “Dɛ̄dɛɛ̄ Edonyɔɔ Gaa Kpesī Amagidɔn, kerewo Gbɛnɛkpo Miliɔn Pya A Le Dum Anyaawo Naale E’una.” Nyɔɔbee a bee lu e’ɛmadɛɛ̄ kɔ gbɛnɛkpo nɛɛ esi a, Pya Nɔ Baibol bee bara kɛ̄ Birabii li Los Angeles. Lokwa dɛ̄dɛɛ̄ nɛɛ dap dā pya nu elu ekɔ, pya wuga bee su nu kɔ ue tɛ̄ma bu a le lo kɛ̄ bii daānu. Booboo nɛɛ bee dā pya ue a bee lu ekɔ bu lo doonu nyɔɔ radio.

Bu zua 1923, tam zue ue bee nyim yiiloo bu keebee sīdee bie Africa, Europe, India, le South America. Bie India, sɔ̄ A. J. Joseph gaa bee kuūdɛɛ̄loo ye wa le ini’ī gbomiɔŋɔ, a bee kuūnage dɛɛ̄ loo kwa pya i kpa li Hindi, Tamil, Telugu, le Urdu.

Bie Sierra Leone, Alfred Joseph le Leonard Blackman ba lu Pya Nɔ Baibol, bee ɛm kpa ture i beekɛ̄ bu dɛ̄dɛɛ̄ nyɔuwe li Brooklyn, New York, sa bara yerebah. Nyɔɔ 14 biradee bu Nia Enɔɔ̄ bu zua 1923, bee lu enɛ wa ture loo wa bara. Alfred kɔ: “Uunɛ ziī Dee Nwīpinikaɛ sɔ̄ dee ekūna, bee lu ekue mɛ nyɔɔ fon sɔ̄ mm bee ɛmadɛɛ̄.” A bee dā ziī gbɛnɛ muɛ̄ a ye bip kɔ, “Lege olo na o bee ɛm kpa ma Watch Tower Society lo ebara pya nɛɛ zue ue ani?” Alfred bee agara doo “aiī.” Lo nɛɛ bee kɔ: “Ba yere mɛ kɔ m lu.” A bee le William R. Brown na a gaa bee kɔ ue a. Ye wa Antonia le ɛɛ bee aa Caribbean lu gbaāloo wa zege miɔŋɔ nɛɛwa Louise le Lucy. Pya wuga naa bee pee sɔ̄ lo ezɔ̄ŋia Brown le pya ye butɔ.

Alfred bee kiisī lo ekɔ: “Sɔ̄ dee eyira, Leonard le mm gaa bee ɛrɛ enɔānu Baibol  lo i wee ɛrɛ ziī ziī kaɛ, sɔ̄ ziī nyɔɔnyɔɔ gbara bee yii nutɔ sɔ̄ ii bee ɛmadɛɛ̄. A bee le William R. Brown. A bee ɛrɛ mɛm loo kaka ue mmɛ lo dɔ a bee gbī enɛ ekɔaue taɛkɛ̄ lo dee a nyɔɔnɛ.” Lɛɛ a gae lu ziī enɔɔ̄, Wuga Brown bee nɛ dɛ̄dɛɛ̄ kpa a bee aara nua. Sɔ̄ naa bee binia sɔ̄ a bee lu ema ye dɔɔ̄na 5,000 ekpo ekpo kpa. E sɔ̄ pio sɔ̄ etɛ̄na, pya dɔɔ̄na kpa bee lu ebɛɛ̄. Kerewo, naa bee lu esu Wuga Brown kure nɛɛ oo kpa. A wee bialoo kɔ Kpa Kaɛ kɔ, sɔ̄ a gaa nɛ ekɔaue, nyɔɔwo a bee lu ekure ye Bible Brown.

Taɛ lo sɔ̄ li Germany, pya wuga bee biaɛfii lo e’aa tɔ-naatam a bee le Barmen, kuma sɔ̄ lo kɛ̄ bee wa tera loo a. Gbaāloo wo, bɔɔ bee le nyɔɔbee ba bee dā kɔ pya nɔ̄ France gaa le yii bu lo buɛ̄ sɔ̄ sɔ̄ naa binia. Pya Nɔ Baibol bee muɛ ziī tɔ a le Magdeburg lo a bee kɔ elee loo wa tam kuɛ̄ kpa kaāna. Nyɔɔ 19 biradee bu Ini’ī Enɔɔ̄, pya wuga bee lap dɛ̄dɛɛ̄ nu le kpe kuɛ̄ma kpa sa kii wa aā Bɛtɛl a le Magdeburg. Taɛ dee alu ekɔ nɛ pya a le i beekɛ̄ bu dɛ̄dɛɛ̄ nyɔuwe kɔ elua elap nu sah, niuspepa bee kɔ pya France ebea eebah sa su buɛ̄ Barmen. Pya wuga bee doo yaa Jɛhova kɔ a nɛ leelee sa baɛloo wa kii lo kɛ̄.

Bie Brazil, George Young, bee si gbɛnɛ-edo kɛ̄ wee zue le yereue, sa sinage tam lo eyere aā tɔ-naatam, sa doo kɔ alu ebɔātɛ̄ loo ɛm Watch Tower bu muɛ̄ ue Portugal. Aba bu nwīepoo loo enɔɔ̄, a bee nɛ nu a eeloo 7,000 pya i kpa. Sɔ̄ a bee ina Brazil bu Sarah Ferguson bee ɛɛ kaāna sɔ̄ Wuga Young inaloo pya wa butɔ. Aa bee buū Watch Tower aāge bu zua 1899, mɛ a sii bee dap tɔgɛ ye kiīloo nɛ tɛ̄maloo liamaā. Sɔ̄ pio enɔɔ̄ etɛ̄na, Wuga nɛɛwa Ferguson le nia pya ye miɔŋɔ bee liamaā.

Sɔ̄ lo zua ina kuma, kɛ̄ Pya Nɔ Baibol gbaaloo bu taāŋabah doo bee lu e’ɛm bu Watch Tower December 15, 1923 kɔ: “A sira pie kɔ pya wuga bu bɔŋanaloo . . . le bu le kɛ̄tɔɔ̄ bu edɔɔ̄ . . . Doraa i yaa i nu nɔ̄, yaa mɛm loo, sa biaɛfii lo ekiisī bu zua i yii li bu ɛɛbu.”

Zua 1924 bee lunage gbɛnɛ ekpeloo zua nɛ Pya Nɔ Baibol. Pya wuga a bee le Bɛtɛl gaa bee si tam bu pio enɔɔ̄ nyɔɔ kɛnɛkɛ̄ a le Staten Island, a waɛ kpaɛ̄ i beekɛ̄ li Brooklyn. Pya tɔ a bee lu ewu nyɔɔ lo aā kɛnɛkɛ̄, bee lu ewu lɛɛ bu bɔātɛ̄ loo zua 1924. E a bee yerebah lo edoo kɔ pya wuga a gbaaloo ziī sa zue le yereue eekɛ̄ ba wee doo.