1-2. Amunu sīdee ebuū sa nɔ Baibol na a lee eera a? Naa nɛ edoba.

 NAA su kɔ o gaa bee gbī eyaɛ ziī tɔ. Ena enia a emuɛ lɛɛ o gae yaɛ a? Lege aba foto a tɔgɛ deesī lo tɔ ni? Lɔgɔ baɛbaɛ beenyiɛ naale loo kɔ enia a esu o dɛɛ̄ mɔma taɛ lo tɔ, kiā tɛɛ̄ ɛŋɛnɛ, yii bu dɛ̄dɛɛ̄ ye tɛm sa ɛp, e o ɛp kɛ̄ a kuī doo. Enianage a lo e’ɛp kpa a bee lu etɔ̄ kɛ̄ ba bee wu lo tɔ doo bu. Bu kaka, enia a lo emuɛ kɛ̄ dɛ̄dɛɛ̄ gah a le loo tɔ o gaa gbī eyaɛ ama mɛā doo.

² I dapnage doo nu a bee wo sɔ̄ i gaa buū sa nɔ Baibol. Ziī nɛɛ enɔā gbɛnɛ kpa a wee nɔ nu akiiloo Baibol ɛm kɔ “Baibol le doodoo ziī gbɛnɛ tɔ-nyɔɔ lo ye ekatɛ̄ kuī gbɛnɛ.” Nyɔɔwo, i dap doodoo wa suā pya nu a le bu Baibol ni? Lo o buū bu gbaragbara, aba nwīepoo loo nu a le bu na o suā a; lo a le “tua tɔgɛ nu lo bɔātɛ̄ ue Bari.” (Hib 5:12) Taāwo, dookɛ̄ i bee kɔ kumaloo lo tɔ doo, yii “bu” lo emuɛ dɛ̄dɛɛ̄ kɛ̄ a mɛā doo. Ziī le sīdee enɔā Baibol na lo e’ɛp kɛ̄ keekee gah loo ye yereue gbaaloo ziī doo. Piiga lo edābeeloo nu o yiga le nu anua o suā kɔ lo nu lu kaka.

3. Ena nɛɛ lɛɛratam Pɔɔl bee zuurabahtɔ̄ pya ye wuga ba lu Nɛɛ Kraist kɔ ba a doo a, e ena anua a? (Pya Ɛfɛsɔs 3:14-19)

³ Lo edābeeloo Muɛ̄ Ue Bari leere bu dɛ̄dɛɛ̄ gah, i ɛrɛ enɔ pya kaka ue Baibol a toga. Nɛɛ lɛɛratam Pɔɔl bee yere mɛm loo pya ye wuga nɛɛdam le nɛɛwa ba lu Nɛɛ Kraist kɔ ba a sue loo kɛ̄ nɔ Muɛ̄ Ue Bari lokwa ba dap “[Suā] nu a ye le bu, le ye nyɔɔnyɔɔ le ye gānyɔɔ, le ye kɛ̄ a kii kɛ̄ doo.” Lo sɔ̄ ba e’ɛrɛ “li a tɔɔ̄ agɛrɛ” bu wa yira.  (Buū Pya Ɛfɛsɔs 3:14-19.) Alu ebɛɛ̄ kɔ i doonage wo. I naa ɛp kɛ̄ i dap nɔ Muɛ̄ Ue Bari leere doo lokwa i dābeeloo nu a le bu kaāna.

4. Ena i doo lokwa i dap tɔɔ̄ waɛloo Jɛhova a? Naa nɛ edoba.

⁴ Doodoo Pya Nɛɛ Kraist, naale aba pya nu a waɛ edābeeloo a le bu Baibol na i gbī esuā a. Tɛ̄maloo yerebah a aaloo kaɛ edɔɔ̄ Bari, i ɛrɛ taɛ lo enɔ “kere nu a toga kii kɛ̄ loo Bari.” (1 Kɔr 2:9, 10) Ena anua oo bɔātɛ̄ nɔ pya nu a toga nyɔɔ oloo lo ezuura a waɛma loo Jɛhova a? Bu edoba, o dap gbītɛ̄ lo esuā kɛ̄ Jɛhova bee tɔgɛ ye wereloo kumaloo pya ye zooro a dee kere doo le nu a tɔgɛ kɔ a werenage loo olo. O dap ɛp kɛ̄ Jɛhova bee gbī kɔ pya Izrɛl a taāŋa ye bah doo sa dooreloo kɛ̄ a gbī kɔ Pya Nɛɛ Kraist a taāŋa ye bah doo anii’ee. Ale pio sɔ̄, o dap su sɔ̄ gbiātɛ̄ pya mɔmanudɛɛ̄ lo Jizɔs bee doo mmɛnɛ bu ye tɔɔ̄dum le ye esiatam a kɛnɛkɛ̄.

5. Ɛrɛge ekobee ue enia a egbītɛ̄ nu akiiloo nyɔɔ oloo ni?

⁵ Bee lu ebip pio pya a sue loo kɛ̄ nɔ Baibol pya nu a toga a le bu Muɛ̄ Ue Bari lo enia wa egbītɛ̄. Pio nu ba kɔ lu e’ɛm bu ekpo a kura “ Pya Ekobee Ue I Dap Nɔā Nu Nyɔɔ I loo.” Bu a dap ɛɛ kaāna sɔ̄ o gaa su Watch Tower Publications Index ale Research Guide for Jehovah’s Witnesses nɔā pya ekobee ue ama. Sɔ̄ o nɔ pya nu a toga a le bu Baibol dap yere mɛm loo o yira sa a yerebah nɛ kɔ o gbī “suānu Bari muɛ.” (Kam 2:4, 5) Nyaawo doraa i naa ɛp pio kaka ue a toga a le bu Baibol lo i dap nɔ.

6. (a) Amunu kee na a le yɛɛ nɔɔ nu le ɛ’ɛrɛ ekɛɛrɛ a? (b) Ena anua i dap kɔ nu alu ekɛɛrɛ Jɛhova kumaloo nɛɛ le kɛnɛkɛ̄ tɔɔ̄ mmɛ ‘deedee’ a? (Pya Ɛfɛsɔs 3:11)

⁶ Bu edoba, naa ɛrɛ ekɛɛrɛ nyɔɔ nu Baibol kɔ akiiloo ekɛɛrɛ Bari. Kaāna kee le yɛɛ sɔ̄ nɛɛ nɔɔ nu le ɛrɛ ekɛɛrɛ.  Dap lu esu nɔɔ nu dooreloo dee a ture nɛɛ mmɛ kɛ̄ lo nɛɛ aa gbī ekii. Kerewo kɛ̄ i bee nɔɔ nu doo dap i lɔgɔra lo alu kɔ alu ekpaɛ̄ dee i bee nɔɔ lo etɛɛ̄ nyɔɔ. E i dap su ɛ’ɛrɛ ekɛɛrɛ dooreloo taɛ kɛ̄ i gaa gbī ekii a. I suā taɛ kɛ̄ i gaa gbī ekii, mɛ i dap tɛɛ̄nyɔɔ pya dɔɔ̄na dee ina lo kɛ̄. Lo alu ekpaɛ̄ ziī lo dee i dap tɛɛ̄nyɔɔ dɔɔ̄na dee ina lo kɛ̄. Bu i ɛɛ kaāna kɔ “aari kere” Jɛhova emuuna ye ekɛɛrɛ kinakina serekɛ̄ bu Baibol. (Buū nu enɔ nu nyɔɔ Pya Ɛfɛsɔs 3:11 [NWT].) Jɛhova dap su ɛrɛgeba sīdee daānu alu ye ekɛɛrɛ, ea wee kiisī leere nyɔnɛbee a doo kɔ dɛ̄dɛɛ̄ nu a kiā dookɛ̄ alu ye ekɛɛrɛ doo.’ (Kam 16:4) E biī a sira aabu nu Jɛhova doo wee tɔɔ̄ mmɛ deedee. Ena alu ekɛɛrɛ Jɛhova a, e pio ena a kwabaloo lo edoo lo ekɛɛrɛ mmɛɛ a?

7. Sɔ̄ tua miɔŋɔ nɛɛ a bee lu edɛm bee lɛɛbeekɛɛ̄, bu mɛ sīdee na Jɛhova bee kwabaloo nu lokwa a dap doo gbɔ̄mɛɛ ye ekɛɛrɛ a? (Matiu 25:34)

⁷ Bari bee kɔ nɛ tua pya nɛɛ a bee dɛm nu alu ye ekɛɛrɛ wa kumaloo. Ba ebee “[mana] sa yii loo, sa mma bu nyɔuwe, sa ye su seea kɛɛ̄ . . . ; sa ɛrɛ ekpo loo, . . . ɛrɛgeba nu a tɔɔ̄ dum” a nyɔɔ kɛnɛkɛ̄. (Jɛn 1:28) Sɔ̄ Adam le Iv bee lɛɛbeekɛɛ̄ sa doo kɔ pɔrɔ a yii yɛɛ miɔŋɔ nɛɛ, naa bee lu egbee ekɛɛrɛ Jɛhova. A bee kwabaloo sīdee esikɛ̄ doo nu alu lo ekɛɛrɛ gbɔ̄mɛɛ. Aba lo sɔ̄, a bee biaɛfii lo ewu ziī Buɛ̄-mɛnɛ sere li bunyɔɔ lo edoo gbɔ̄mɛɛ ye ekɛɛrɛ a ɛrɛ kumaloo miɔŋɔ nɛɛ le kɛnɛkɛ̄. (Buū Matiu 25:34.) Taɛ sɔ̄ a bɔloo, a bee yere ye tua Nwiīnɛɛdam nua a kɛnɛkɛ̄ kɔ a tɔgɛ pya nɛɛ nu akiiloo lo Buɛ̄-mɛnɛ le lo esu ye dum i aŋana lɛɛ kɛ̄bah pɔrɔ le luh. Lɛɛ alu elɛɛ Jizɔs kɛ̄ bu luh kuma bunyɔɔ kɔ a bɛɛ doodoo Mɛnɛ loo Buɛ̄-mɛnɛ Bari. Mɛ a ɛrɛ pya dɔɔ̄na nu i dap ɛrɛ ekɛɛrɛ nyɔɔ akiiloo ekɛɛrɛ Bari.

8. (a) Ena alu ekobee ue Baibol a? (b) Dookɛ̄ alu ebaatɛ̄ bu kpa Pya Ɛfɛsɔs 1:8-11 doo, ena alu taɛ ekɛɛrɛ Jɛhova ɛrɛ a? (Ɛp foto a le nyɔɔ eko.)

⁸ Taɛ ekobee ue Baibol na lo eleere ue bee Jɛhova sɔ̄ edoo gbɔ̄mɛɛ ye ekɛɛrɛ a ɛrɛ loo kɛnɛkɛ̄ tɛ̄maloo Bɛbɛɛ Kraist. Naale edap lu enyaana ekɛɛrɛ Jɛhova. A bee yira yii kɔ dɛ̄dɛɛ̄ nu gaa le dooa dookɛ̄ a gbī doo. (Ais 46:10, 11, ftn [NWT]; Hib 6:17, 18) Sɔ̄ sɔ̄ aa kiisī, elu ekwa kɛnɛkɛ̄ nua paradais kɛ̄ miɔŋɔ Adam a mmana gaa le “tɔɔ̄ dum ina dee a naatah!” (Yɔɔ 22:26) Eenyɔɔ wo, Jɛhova ɛrɛnage pya dɔɔ̄na nu lo edoo gbɔ̄mɛɛ. Taɛ nu alu ye gbɛnɛ ekɛɛrɛ na lo edoo kɔ pya nu a bee dɛm a le bunyɔɔ le kɛnɛkɛ̄ a gbaaloo ziī. Lo sɔ̄ dɛ̄dɛɛ̄ pya a tɔɔ̄dum esu loo wa ye sere kɛɛ̄ doodoo Nɛɛ A Wa Bɛɛ. (Buū Pya Ɛfɛsɔs 1:8-11.) Naa lu a nyɛŋialoo kɛ̄ Jɛhova gaa doo gbɔ̄mɛɛ ye ekɛɛrɛ doo ni?

9. Tɛ̄maloo ebuū Baibol, i dap muɛ nu a esira li deesī doodoo wa?

⁹ Naa kɛɛrɛ nu akiiloo mɔmanudɛɛ̄ Jɛhova bee kɔ li bu gɔh Idɛn, dookɛ̄ a bee lu e’ɛm doo bu Jɛnɛsis 3:15. b A kɔ nu akiiloo pya siranu lo e’mmɛɛ ye ekɛɛrɛ. Kerewo, pya siranu ama edooa gbɔ̄mɛɛ sɔ̄ boo boo zua etɛ̄na. Pya lo siranu ama kiinage loo pya mana-mana Abreham a tɛɛ̄ inaloo mɛmɛa Kraist.  (Jɛn 22:15-18) Lɛɛ alu edam tɛ̄ kpɔŋtɔ Jizɔs bu zua 33 C.E. dookɛ̄ a bee lu ekɔ doo. (Doonu 3:13-15) Kpɛdumɛ gah loo lo mɔmanudɛɛ̄ lo a le zaga ekobee Setan biikɛ̄ lege nu a eeloo 1,000 zua li deesī aā lo sɔ̄. (Mum 20:7-10) E Baibol muūna gbɛnɛ-edo nu a gaa le sira sɔ̄ baaloo a le yɛɛ lo pɔrɔ nyɔuwe Setan gaa bɛɛ ama le bɔŋanaloo Jɛhova e’ina kuma.

10. (a) Pya amunu siranu lo edooa li deesī na a gaa le esira sɔ̄ sɔ̄ naa binia a? (b) Bu mɛ sīdee na i dap kpɛ̄naloo i beenyiɛ le i ekɛɛrɛ a? (Ɛp ue a le kɛɛ̄.)

¹⁰ Naa kɛɛrɛ nu akiiloo pya siranu lo enyɔŋɛ kɛnɛkɛ̄ ama bu sīdee a tɔɔ̄dɔ nu lo Baibol bee kɔ sere kɛ̄. Tuatua, pya edonyɔɔ ekɔ “efɛɛloo le kpɔā” elea. (1 Tɛs 5:2, 3) Bu “bugere,” gbɛnɛ etɛɛrɛloo ebɔātɛ̄ sɔ̄ pya bɛbɛɛ ebebe loo dɛ̄dɛɛ̄ ekwɔ sīdee taāŋabah. (Mum 17:16) Sɔ̄ pya lo ba ama etɛ̄na elu emuɛ edoba “Nwiīnɛɛ a gaa lu bu biira bunyɔɔ gbaāloo ekpo le gbɛnɛ nyɛŋia.” (Mat 24:30) Jizɔs ebiaɛ pya miɔŋɔ nɛɛ sa sere kee yɛɛ pee tɔ le naana pee. (Mat 25:31-33, 46) Kerewo, Setan naale ebɔba baloo ye sa tɔɔ̄ ziī dɔ wee ɛp. Nyɔɔ baaloo a ye le bu, a gaa le doo kɔ pya edonyɔɔ lo Baibol kure Gɔg loo buɛ̄ Magɔg a gbaaloo ziī sa be pya a gaa taāŋabah Jɛhova bu kaka sīdee. (Ezek 38:2, 10, 11) Ɛrɛ kɛ̄ e’ina alu esu Pya Nɛɛ Kraist alu etɔ̄ nɔɔ̄ bee kuma bunyɔɔ lokwa ba gbaaloo gbo-nɔ̄ Kraist li bunyɔɔ sa be nɔ Amagidɔn, lo alu kpɛdumɛ gah loo gbɛnɛ etɛɛrɛloo. c (Mat 24:31; Mum 16:14, 16) Lo sɔ̄, Bɛbɛɛ Kraist Loo Baɛ Boo Le Lop Tup Zua ebɔātɛ̄.—Mum 20:6.

11. Ena dee lo etɔɔ̄ dum anaatah kura nɛ olo a? (Ɛpnage foto.)

¹¹ Nyaawo, naa kɛɛrɛ nu esikɛ̄ sira sɔ̄ lo Baɛ Boo Le Lop Tup Zua e’ina kuma. Baibol kɔ Nɛɛ Dɛm Nu esua “sɔ̄ a naa tah [i] yere [bu] . . . ekɛɛrɛ.” (Eklis 3:11) Naa kɛɛrɛ nu lo ama ekura a nɛ le  gbanialoo o ɛrɛ kumaloo Jɛhova. Kpa a kura Draw Close to Jehovah, 319 naɛsī baatɛ̄ lo ama kpeeloo kaāna tɛ̄maloo ekɔ: “Sɔ̄ i tɔɔ̄ dum bu nu a eeloo o’oo tup zua, baɛ boo le lop tup zua, miliɔn zua, biliɔn zua, i suā loo Jɛhova kaāna eekɛ̄ i doo anyaawo. Mɛ i muɛ kɔ a ɛrɛnage gbɛnɛ-edo lele nu a le lo i dap nɔ. . . . Dum a naatah aara gbɛnɛ-edo leelee le keekee lele nu lo ii dap kɛɛrɛ, e ziī gbɛnɛ biī i ɛrɛ aāloo na kɔ edoo kɔ i wee agɛrɛbah tɔɔ̄ waɛloo Jɛhova.” Kerewo, lo i kiisī lo enɔ Muɛ̄ Ue Bari anyaawo, ena i dap gbī muɛ a?

12. Bu mɛ sīdee na i dap ɛp taɛ bunyɔɔ a? Naa nɛ edoba.

¹² Muɛ̄ Ue Bari doo kɔ i muɛ dua kɛ̄ Jɛhova tɔɔ̄ li “mm nyɔɔ” mɛa doo. (Ais 33:5) Baibol muuna lele nu akiiloo Jɛhova le ye bɔŋanaloo a le bunyɔɔ. (Ais 6:1-4; Dan 7:9, 10; Mum 4:1-6) Bu edoba, i dap buū nu akiiloo pya nyɛŋia nu Ezekiel bee muɛ sɔ̄ “bunyɔɔ bee kpaā, e [a] bee muɛ mɔma-nu-dɛɛ̄ . . . lo Bari.”—Ezek 1:1.

13. Ena a a nia a le loo tam Jizɔs gaa si li bunyɔɔ dookɛ̄ Pya Hibru 4:14-16 baatɛ̄ doo a?

¹³ Naa kɛɛrɛnage nu akiiloo tam Jizɔs gaa si li bunyɔɔ dodoo Mɛnɛ a gaa bɛɛ le Gbɛnɛ Nɛɛ Tɛsī Ewɔp a ɛrɛ toesaɛ̄. Tɛ̄maloo Jizɔs i dap “su e’aga beenyiɛ lu ina loo kasi ewonu” lo Bari, bu yere kara sa ye bara toesaɛ̄ “sɔ̄ nu e bee i loo.” (Buū Pya Hibru 4:14-16.) Doraa ii le elɛɛbaloo kɔ ziī biradee a tɛɛ̄ sa ii kɛɛrɛbu loo nu Jɛhova le Jizɔs aa i doo nɛ aā li bunyɔɔ. Wereloo ba i ɛrɛ loo a tɔa i loo kaāna sa i zū kɔ i bɛa miā bu i taāŋabah Jɛhova.—2 Kɔr 5:14, 15.

14. Ziī e a lee gbɛnɛ na i dap doo lo etɔgɛ nia loo Jɛhova le Jizɔs a? (Ɛpnage foto.)

 ¹⁴ Ziī sīdee a lee eera i dap tɔgɛ nia loo nu Bari le ye Nwiīnɛɛdam edoora i nɛ na epiiga sa doo kɔ pya dɔɔ̄na alu Pya Ekeebee Jɛhova sa nyɔɔnɛ dumɛ Kraist. (Mat 28:19, 20) Nu nɛɛ lɛɛratam Pɔɔl bee doolo lo etɔgɛ nia loo Bari le Kraist. A bee suā kɔ Jɛhova “gbī kɔ dɛ̄dɛɛ̄ nɛɛ a ɛrɛ kpɔā sa lu loo suānu kaka.” (1 Tim 2:3, 4) A bee si tam sa piiga bu ye tam zue ue lo eyerebah nɛ pya nɛɛ kuma kɛ̄ a dap doo lokwa “bu dɛ̄dɛɛ̄ sī dee [a dap] kpɔā pio nɛɛ.”—1 Kɔr 9:22, 23.

15. Dookɛ̄ kpa Le-yɔɔ 1:2 kɔ doo, ena edoo kɔ i ɛrɛ ɛɛbu a?

¹⁵ Bu sīdee a bɔloo, nɛɛ uɛ le-yɔɔ bee baatɛ̄ nɛɛ a ɛrɛ ɛɛbu, sa kiisī leere nua nɛɛ a ɛrɛ “ɛɛbu . . . bu lok Jɛhova” sa “sere ye ekɛɛrɛ edɛɛ̄ le pie” bu lo Lok. (Yɔɔ 1:1-3; ftn [NWT]) Ziī nɛɛ a wee tap Baibol a kura Rotherham bee baatɛ̄ kɔ nɛɛ “a ɛrɛ kaāna ɛɛbu bu pya leredee a aabah Bari tɛ̄maloo egbī aābu Baibol, ye nɔ, sa ye ɛrɛ ekɛɛrɛ nyɔɔ bu nyɔɔ nyɔɔ sɔ̄,” bu ye kpa a kura Studies in the Psalms. A bee kɔ gbaāloo kɔ nɛɛ a gaa buū Baibol a “su kɔ a peeree nu ɛrɛgeba dee a naa dābeeloo suānu Baibol leere.” O dap ɛrɛ ɛɛbu bu nɔnɔ Baibol tɛ̄maloo enɔ dɛ̄dɛɛ̄ ye suānu sa muɛ kɛ̄ a gbaaloo ziī doo. Naa ɛp kɛ̄ alu nu ɛɛbu lo egbītɛ̄ dɛ̄dɛɛ̄ suānu a le bu Muɛ̄ Ue Bari doo a!

16. Ena i kɔnia bu lo ekobee ue enyɔɔnɛ a?

¹⁶ Pya kaka ue a kpeloo lo Jɛhova i tɔgɛ tɛ̄maloo ye Muɛ̄ Ue naa lu nu ii le edap dābeeloo. Bu lo ekobee ue enyɔɔnɛ, i nɔ nu akiiloo ziī kaka ue a toga lo a le gbɛnɛ tɔkaɛ Jɛhova bu edɔɔ̄, lo Pɔɔl bee baatɛ̄ bu kpa a bee ɛm ma Pya Nɛɛ Kraist a le Hibru. Doolo gbītɛ̄ ekobee ue ama a nɛ kaāna ɛɛbu.